ᑕᓪᓕᒪᓂᒃ ᐅᑉᓗᓂᒃ ᔭᓗᓇᐃᓕᐊᓚᐅᐱᓪᓚᒃᓯᒪᔪᖅ ᑲᖏᖅᖠᓂᕐᒥᐅᑕᖅ ᐃᕙᓐ ᒧᐊᕆᓴᓐ ᐊᒻᒪᓗ ᓄᓕᐊᓱᖓ ᖁᕕᐊᓇᙱᑦᑐᒃᑰᓚᐅᖅᑑᒃ, ᓄᓇᒃᑰᕈᑎᓄᑦ ᓄᖅᑲᖅᑕᕐᕕᒃ ᑎᑎᖅᑎᕆᓯᒪᑦᑎᐊᙱᓐᓂᕐᒪᑦ, ᐱᓗᐊᖅᑐᒥ ᐳᓚᕋᖅᑎᒧᑦ ᔭᓗᓇᐃᒦᒐᔪᙱᑦᑐᒧᑦ.

ᒧᐊᕆᓴᓐ, ᐃᖃᓗᖕᒥᐅᑕᖅ, ᐊᒻᒪᓗ ᓄᓕᐊᓱᖓ ᓂᕆᔭᖅᑐᖅᖢᑎᒃ ᓂᕆᕝᕕᖕᒥ ᑕᓪᓕᒻᒥᐅᓚᐅᖅᑐᒥ, ᐅᑐᐱᕆ 30-ᒥ ᖁᕕᐊᓇᙱᑦᑐᒃᑰᓕᑳᓪᓚᓚᐅᖅᑑᒃ.

ᓄᓇᕗᒥᐅᑕᖅ ᔭᓗᓇᐃᓕᐊᓚᐅᖅᑎᓪᓗᒍ ᖃᐅᔨᙱᓈᖅᑕᐅᓚᐅᖅᑐᖅ

ᒧᐊᕆᓴᓐ ᐅᖃᖅᖢᓂ ᓂᕆᕝᕕᒋᓂᐊᖅᑕᒥᓄᑦ ᑎᑭᑉᐸᓪᓕᐊᓕᖅᖢᑎᒃ ᓄᓇᒃᑰᕈᑎ ᐊᑐᖅᑐᐊᖅᑕᓂ ᐊᑐᖅᖢᒍ ᑎᑎᕋᖅᓯᒪᔪᒥᒃ ᐅᔾᔨᕈᓱᓕᖅᑑᒃ 24-ᓂᒎᖅ ᐃᑲᕐᕋᓂᒃ ᓄᖅᑲᖓᕝᕕᐅᔪᓐᓇᖅᑐᖅ ᓂᕆᕝᕕᒋᓂᐊᖅᑕᖓᑕ ᐊᑭᑦᑎᐊᖓᓂᒃ.

ᐅᖃᖅᖢᓂ ᓄᓇᒃᑰᕈᑎ ᑕᐃᑲᓂ ᓄᖅᑲᖅᑎᖦᖢᒍ ᓂᕆᕝᕕᖕᒧᓪᓗ ᐃᑎᖅᑎᓕᖅᖢᑎᒃ.

ᐃᑎᖅᖢᓄᒃ ᓂᕆᕝᕕᖕᒧᑦ ᐋᓪᓕᕋᐅᔭᕆᓂᐊᖅᑕᑉᑎᓐᓅᕈᔾᔭᐅᑉᓗᓄᒃ ᐊᒻᒪᓗ ᓂᕆᓂᐊᖅᑕᑉᑎᓐᓂᒃ ᑎᑭᓴᐃᕌᓂᓵᖅᑎᓪᓗᓄᒃ ᐃᒻᒪᖄ 1 ᒥᓂᑦ ᐱᐊᓂᖕᒪᑦ, ᓂᕿᓂᒃ ᐊᔾᔭᖅᑐᐃᔨ ᖃᐃᑉᓗᓂ ᐊᐱᕆᑉᓗᓂ ᑭᓇ ᖃᐅᓪᓗᖅᑐᒥᒃ ᓄᓇᒃᑰᕈᑎᒥᒃ ᐊᖁᖅᑲᐅᖕᒪᖔᑦ ᐊᐅᓪᓚᖁᔾᔭᐅᓕᕐᒪᒡᒎᖅ.

ᒪᑭᖦᖢᖓ ᐊᓂᑉᓗᖓ ᐊᓯᖓ ᓂᕿᓂᒃ ᐊᔾᔭᖅᑐᐃᔨ ᑕᐅᑐᒃᑐᖅ ᑕᑯᑉᓗᒍ ᓄᓇᒃᑰᕈᑎ ᐊᐅᓪᓚᕈᔾᔭᐅᓕᖅᖢᓂ ᐅᓂᐊᖅᑕᐅᑉᓗᓂ ᑕᒃᐸᐅᙵ, ᑕᐃᒪᐃᒻᒪᑦ ᐃᒻᒪᖄ 15 ᒥᓂᑦᒥᒃ ᐊᑯᓂᐅᑎᒋᔪᖅ ᑕᐃᑯᙵ ᓄᖅᑲᖅᑕᐅᑎᑉᓗᑕ ᐊᐅᓪᓚᕈᔾᔭᐅᓕᖅᖢᓂᓗ ᐅᓂᐊᖅᑕᐅᑉᓗᓂ.”

ᒧᐊᕆᓴᓐ ᐅᖃᖅᖢᓂ ᓄᓇᒃᑰᕈᑎᓄᑦ ᓄᖅᑲᖅᑕᕐᕕᖕᒥ ᓇᖕᒥᓂᓕᒃ ᐊᒻᒪᓗ ᓄᓇᒃᑰᕈᑎᓂᒃ ᐅᓂᐊᖅᑎᒃᑯᑦ ᖃᐅᔨᒋᐊᓚᐅᙱᑦᑐᓪᓘᓐᓃᒡᒎᖅ ᐃᖕᒥᓄᑦ ᐊᐅᓪᓚᕈᔾᔭᐅᖅᑳᕐᓇᓂ ᐅᓂᐊᖅᑕᐅᑉᓗᓂ ᓄᓇᒃᑰᕈᑎ.

ᐅᖃᖅᖢᓂ ᐊᓯᖏᓐᓂᒃ ᓄᖅᑲᖅᑕᕐᕕᒃᑕᖃᓚᐅᙱᒻᒪᑦ ᓂᕆᕝᕕᐅᑉ ᖃᓂᒋᔭᖓᓂᒃ, ᑕᐃᒪᐃᒻᒪᑦ ᖃᓄᐃᙱᑦᑑᔭᓚᐅᖅᑐᖅ ᑕᐃᑲᓂ ᓄᖅᑲᕆᐊᒃᓴᖅ.

ᐅᖃᓗᒡᕕᒋᑉᓗᒋᑦ ᓄᓇᒃᑰᕈᑎᓂᒃ ᐅᓂᐊᖅᑎᒃᑯᑦ ᐊᒻᒪᓗ ᐅᖃᖅᖢᑎᒃ ᑕᐃᑲᓂ ᐅᑕᖅᑭᓂᐊᕐᓂᕋᖅᖢᑎᒃ ᓄᓇᒃᑰᕈᑎ ᐊᐃᔪᒪᒍᑉᑯ. ᐊᑭᓖᔭᕆᐊᖃᓕᓚᐅᖅᑐᖓ $315-ᒥᒃ, GST-ᒥᒃ ᐊᒻᒪᓗ $25-ᒥᒃ ᑖᒃᓯᒃᑰᕈᑎᒧᑦ.

ᐅᖃᐅᑎᓇᓱᓚᐅᖅᑕᕋ ᖃᐅᔨᒪᓚᐅᙱᓐᓇᑉᑕ ᑕᐃᒻᓇ ᓄᖅᑲᖅᑕᕐᕕᒃ HAKS-ᑯᓐᓄᑦ ᓇᖕᒥᓂᕆᔭᐅᓂᖓᓄᑦ ᐊᒻᒪᓗ ᑕᐃᑲᓃᑐᐃᓐᓇᖅᑲᐅᓂᕋᖅᖢᖓ 15 ᒥᓂᑦᑐᐃᓐᓇᕐᒥᒃ ᐊᒻᒪᓗ ᐅᖃᐅᑎᔭᐅᑉᓗᖓ ᐃᓄᐃᒡᒎᖅ ᑕᐃᒪᓐᓇ ᐅᖃᐃᓐᓇᖃᑦᑕᕐᒪᑕ. ᑕᐃᒪᓕ, ᐅᖃᓗᒃᑲᒪ HAKS-ᑯᓐᓄᑦ ᖃᓄᐃᑦᑐᒃᑰᓚᐅᒪᖔᕐᒪ, ᐅᖃᓘᑎ ᐃᓕᔭᐅᑐᐃᓐᓇᓚᐅᖅᑐᖅ. ᓈᒻᒪᙱᑦᑐᒻᒪᕆᐊᓘᓚᐅᖅᑐᖅ.”

ᒧᐊᕆᓴᓐ ᐅᖃᖅᖢᓂ ᐅᖃᐅᑎᔭᐅᓚᐅᕐᓂᕐᒥᓄᑦ ᓂᕆᕝᕕᖕᒦᑦᑐᒥᒃ ᑕᐃᑲᓂᒎᖅ ᓄᓇᒃᑰᕈᑏᑦ ᐊᐅᓪᓚᕈᔾᔭᐅᒐᔪᒃᑐᑦ ᐅᓂᐊᖅᑕᐅᑉᓗᑎᒃ, ᑭᓯᐊᓂ, ᓄᓇᕗᒥᐅᑕᐅᑉᓗᓂ, ᐃᖕᒥᓂᒃ ᓄᓕᐊᙳᐊᓂᓘᓐᓃᑦ ᑕᐃᒪᐃᑦᑐᓂᒃ ᖃᐅᔨᒪᓚᐅᙱᑦᑑᒃ.

ᐅᖃᖅᖢᓂ ᓴᓇᔩᑦ ᓂᕆᕝᕕᖕᒥ ᐃᑲᔪᕋᓱᑦᑎᐊᓚᐅᕐᒪᑕ ᖃᓄᐃᙱᑦᑐᓐᓇᖁᑉᓗᒋᑦ ᐊᒻᒪᓗ ᓂᕆᔭᖏᓪᓘᓐᓃᑦ ᐊᑭᓗᒃᓯᒋᐊᖅᑕᐅᑉᓗᑎᒃ, “ᑕᐃᒪᐃᓕᐅᕐᒪᑕ ᐃᓄᑦᑕᐅᓂᖏᑦ ᓇᓗᓇᓚᐅᙱᑦᑐᑦ.”

ᔭᓗᓇᐃᓕᐊᖅᖢᓂ ᐳᓚᕋᖅᑎᐅᑉᓗᓂ, ᐊᓕᐊᓇᐃᑦᑐᐊᓘᓚᐅᙱᑦᑐᖅ, ᑕᐃᒪᐃᒻᒪᑦ ᑕᒪᓐᓇ ᑐᓴᖅᑕᐅᖁᔭᕋ ᑭᓇᑐᐃᓐᓇᖅ ᔭᓗᓇᐃᓕᐊᕐᓂᐊᖅᑐᖅ ᓄᓇᒃᑰᕈᑎᒥᓂᒃ ᓄᖅᑲᖅᑎᑦᑎᖁᓇᒍ HAKS-ᑯᑦ ᓄᖅᑲᖅᑕᕐᕕᖓᓂᒃ ᐊᒻᒪᓗ ᖃᐅᔨᒪᔭᐅᓕᖁᓇᒋᑦ ᓄᓇᒃᑰᕈᑎᓂᒃ ᐅᓂᐊᖅᑏᑦ … ᑭᓯᐊᓂ ᐊᓯᖏᑦ ᔭᓗᓇᐃᒦᒍᑎᒋᔭᖅᐳᑦ ᐱᐅᔪᐃᓐᓇᐅᓚᐅᖅᑐᑦ ᐊᒻᒪᓗ ᓂᕆᕝᕕᖕᒥ ᓴᓇᔩᑦ ᑐᙵᓇᖅᑐᒻᒪᕆᐊᓘᓚᐅᖅᑐᑦ.”

ᑭᕙᓪᓕᕐᒥ ᓂᐲᑦ ᑐᓴᒐᒃᓴᓕᕆᔨᒃᑯᖏᑦ ᖃᐅᔨᒋᐊᓚᐅᖅᑑᒐᓗᐊᑦ ᓄᓇᒃᑰᕈᑎᓂᒃ ᐅᓂᐊᖅᑎᒃᑯᓐᓂᒃ ᑐᓴᕐᕕᒋᔪᒪᑉᓗᒋᑦ ᑭᓯᐊᓂ ᑭᐅᔭᐅᓚᐅᙱᑦᑐᑦ ᑐᓴᒐᒃᓴᖅ ᑖᒻᓇ ᓴᖅᑭᖅᑳᕐᓇᓂ.

Advertisement

Darrell Greer

Darrell Greer is Editor of Kivalliq News