ᑕᒪᑐᒥᙵ ᑎᑎᕋᖅᑑᑉ ᐅᖃᐅᓯᒃᓴᖓ: ᑕᒪᓐᓇ ᐱᖓᓱᒋᔭᖓ ᐱᖓᓲᔪᓂᒃ ᑎᑎᕋᐅᑕᐅᓯᒪᔪᓂᒃ ᑕᑯᑎᑦᑎᓇᓱᒃᑐᑦ ᖃᓄᖅ ᐱᕚᓪᓕᖅᓯᒪᑎᒋᖕᒪᖔᑕ ᑲᖏᖅᖠᓂᕐᒥ ᖃᑉᑎᕆᔨᒃᑯᑦ ᑕᓪᓕᒪᓂᒃ ᐅᑭᐅᓂᒃ ᖄᖏᖅᑐᓂᒃ ᐸᕐᓇᒃᐸᓪᓕᐊᑎᓪᓗᒋᑦ ᒪᑐᐃᖅᓯᓂᐊᕐᓂᕐᒧᑦ ᓄᑖᒥᒃ ᐃᓕᓐᓂᐊᕐᕕᖕᒥᒃ ᑲᖏᖅᓕᓂᕐᒥ.

ᖃᑉᑎᕆᔨᒃᑯᑦ ᐊᖓᔪᖅᑳᖓ ᒪᑯᓯ ᐅᐊᐃᔭᑦ ᖁᓛᓂ ᓂᑯᕕᖓᔪᖅ ᓄᑖᖑᔪᒥ ᑲᖏᖅᖠᓂᐅᑉ ᖃᑉᑎᕆᔨᒃᑯᑦ ᐃᓕᓐᓂᐊᕐᕕᒃᑖᖓᓂᒃ ᐅᑐᐱᕆ 1-ᒥ. ᑎᐅᕈᓪ ᒍᕆᐅᕐ/ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᓐᓂᙶᖅᑐᖅ ᐊᔾᔨ

ᓈᒻᒪᒃᓴᕐᓂᖓ ᐅᔾᔨᕐᓇᖅᑐᖅ ᑕᑯᑉᓗᒍ ᖃᑉᑎᕆᔨᒃᑯᑦ ᐊᖓᔪᖅᑳᖓ ᒪᑯᓯ ᐅᐊᐃᔭᑦ ᓂᑯᕕᖓᑉᓗᓂ ᖁᓛᓂ ᓄᑖᖑᔪᒥ ᑲᖏᖅᖠᓂᕐᒥ ᖃᑉᑎᕆᔨᒃᑯᑦ ᐃᓕᓐᓂᐊᕐᕕᒃᑖᓵᖓᓂᒃ ᑲᖏᖅᖠᓂᕐᒥ ᐱᓇᓱᐊᕈᓯᐅᓚᐅᖅᑐᒥ.

ᑕᓪᓕᒪᓂᒃ ᐅᑭᐅᓂᒃ ᑕᒪᓐᓇ ᐱᙳᖅᑎᑕᐅᓇᓱᓕᖅᑐᖅ ᖃᑉᑎᕆᔨᒃᑯᑦ ᐊᖓᔪᖅᑳᖓᓄᑦ, ᐃᖅᑲᐅᒪᑉᓗᓂ ᖃᓄᖅ ᐃᓱᒪᓚᐅᕐᒪᖔᕐᒥ ᓯᕗᓪᓕᖅᐹᒥ ᐅᐸᒍᑎᒐᒥ ᓄᑕᐅᙱᑦᑐᒧᑦ ᐃᓕᓐᓂᐊᕐᕕᓕᐊᖑᓯᒪᓚᐅᖅᑐᒧᑦ.

ᐅᐊᐃᔭᑦ ᐅᖃᖅᖢᓂ ᖃᐅᔨᓚᐅᖅᑐᕈᖅ ᒫᓐᓇᑲᐅᑎᒋ ᑕᑯᔭᓂ ᓈᒻᒪᙱᓐᓂᖓᓄᑦ ᐃᓕᓐᓂᐊᕐᕕᐅᓂᐊᕐᓗᓂ.

ᐅᖃᖅᖢᓂ ᐃᓄᐃᑦ ᐃᓕᑦᑎᓪᓚᕆᔾᔮᙱᓐᓂᖏᓐᓄᑦ ᖃᑉᑎᕆᓂᕐᒥᒃ ᑕᐃᒪᓐᓇ ᐃᓕᓐᓂᐊᖅᑎᑕᐅᓗᑎᒃ.

ᓯᕐᓗᐊᕋᓛᒧᑦ ᐃᑎᕐᓗᓂ, ᓴᖑᓗᓂ ᐊᒻᒪᓗ ᖃᑉᑎᕆᒋᐊᕐᓗᓂ ᐃᓕᓐᓂᐊᖅᑎᑦᑎᓂᒃᑯᑦ ᓈᒻᒪᙱᒻᒪᑦ,” ᑕᐃᒪᓐᓇ ᐅᖃᖅᖢᓂ ᐅᐊᐃᔭᑦ.

ᐃᓕᓐᓂᐊᖅᑎᑦᑎᔪᓐᓇᙱᒻᒪᑦ ᐃᓄᖕᓂᒃ ᐅᑭᐅᖅᑕᖅᑐᒥᐅᓂᒃ ᐊᑦᑕᓇᖅᑐᒃᑰᙱᓪᓗᑎᒃ ᖃᓄᖅ ᖃᒥᑦᑎᓇᔭᕐᓂᕐᒧᑦ, ᐊᒻᒪᓗ ᑕᒫᓂ ᐃᑭᑦᑐᖃᕌᖓᑦ ᓄᓇᕗᒥ ᐊᔾᔨᖃᑐᐃᓐᓇᖅᑐᖅ ᐃᑭᑦᑐᖃᕋᔭᖅᐸᑦ ᑭᐅᒍᕈᒥ, ᐃᑭᑦᑐᖃᖅᐸᓪᓘᓐᓃᑦ ᒥᒃᓯᑯᒥ ᐅᕝᕙᓘᓐᓃᑦ ᓇᓂᑐᐃᓐᓇᑦᑎᐊᖅ ᓄᓇᕐᔪᐊᕐᒥ.

ᐃᑭᑦᑐᖃᕌᖓᑦ ᐃᑭᑦᑐᑦ ᐊᔾᔨᒌᖃᑦᑕᓗᒃᑖᕐᒪᑕ ᐊᒻᒪᓗ ᖃᐅᔨᒪᔭᕆᐊᖃᕐᓇᖅᖢᓂ ᓱᓇᓂᒃ ᖃᒥᑦᑎᓇᓱᖕᓂᐊᖅᖢᓂ. ᐊᒥᓲᖕᒪᑕ ᖁᓕᕇᓖᑦ ᐃᒡᓗᑦ ᑕᒫᓂ, ᐊᒻᒪᓗ ᐃᓕᓐᓂᐊᕐᕕᒃᑕᖃᙱᑉᐸᑦ ᖃᓄᖅ ᖃᑉᑎᕈᑏᑦ ᐊᑐᖅᑕᐅᖃᑦᑕᕐᒪᖔᑕ ᐅᕝᕙᓘᓐᓃᑦ ᖁᓛᓄᙵᐅᔾᔭᐅᖃᑦᑕᕐᒪᖔᑕ ᖃᑉᑎᕆᓂᐊᕐᓗᓂ, ᐃᓕᓐᓂᐊᖅᑎᑦᑎᓂᐅᙱᑦᑐᖅ ᖃᓄᖅ ᐊᑦᑕᓇᖅᑐᒦᙱᓐᓇᔭᕐᒪᖔᑕ ᐅᕝᕙᓘᓐᓃᑦ ᖃᓄᖅ ᑲᒪᔭᕆᐊᖃᕐᓂᖏᓐᓄᑦ.

ᑕᐃᒪᐃᒻᒪᑦ, ᐃᒪᓐᓇᐃᑦᑐᖃᕋᑉᑕ ᓄᓇᖃᕋᑉᑕ ᓄᓇᕗᒥ ᐊᒥᓲᑉᓗᑎᒃ ᖃᑉᑎᕆᔩᑦ ᐃᑎᕆᐊᖃᙱᑦᑐᓪᓘᓐᓃᑦ ᐃᑭᑦᑐᒧᑦ.”

ᐅᐊᐃᔭᑦ ᐅᖃᖅᖢᓂ ᐊᒥᓲᔪᑦᑕᐅᖅ ᐊᓯᐅᔨᔭᐅᓲᑦ ᖃᑉᑎᕆᔨᒃᑯᑦ ᐃᓕᓐᓂᐊᑦᑎᐊᖅᓯᒪᙱᒃᑳᖓᑕ.

ᐅᖃᖅᖢᓂ ᓄᑖᖅ ᐃᓕᓐᓂᐊᕐᕕᒃᑖᖑᔪᖅ ᑲᖏᖅᖠᓂᕐᒥ ᐃᓕᓐᓂᐊᕐᕕᒃᓴᑦᑎᐊᕙᒻᒪᕆᐊᓗᒃ ᖃᑉᑎᕆᔨᓄᑦ ᑲᖏᖅᖠᓂᕐᒥᐅᑕᑐᐃᓐᓇᐅᙱᑦᑐᓂᒃ ᑭᓯᐊᓂᓕ ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᑦ ᖃᑉᑎᕆᔨᖏᓐᓂᒃ ᐊᒻᒪᓗ ᐊᓯᖏᓐᓂᒃ ᓄᓇᓕᖕᓂ ᓄᓇᕗᒥᐅᓂᒃ.

ᐃᓕᓐᓂᐊᖅᑎᑦᑎᒍᑕᐅᓲᖅ ᓄᓇᕗᒥ ᒫᓐᓇᐅᔪᖅ ᖃᑉᑎᕆᔨᒃᑯᑦ ᐊᖓᔪᖅᑳᕐᔪᐊᖓᑕ ᑎᑎᕋᕐᕕᖓᒍᑦ ᓈᒻᒪᒃᑐᖅ, ᑭᓯᐊᓂ ᓄᓇᕗᒧᑦ ᐃᓕᑕᕆᔭᐅᔾᔪᑎᑖᕈᑕᐅᔪᓐᓇᖃᑦᑕᕐᒪᑦ, ᑲᓇᑕᓕᒫᒨᙱᑦᑐᖅ ᐅᕝᕙᓘᓐᓃᑦ ᓄᓇᕐᔪᐊᕐᒨᙱᑦᑐᖅ ᐃᓕᓐᓂᐊᕐᕕᒃᑕᕋᙱᓐᓇᑉᑕ ᑕᐃᒪᓐᓇ ᖁᑦᑎᒃᑎᒋᔪᒧᑦ ᑎᑭᐅᑎᔾᔪᑕᐅᔪᓐᓇᖅᑐᒃᑯᑦ.

ᓄᑖᖅ ᐃᓕᓐᓂᐊᕐᕕᒃᑖᖑᔪᖅ ᐱᕕᒃᓴᖃᖅᑎᑦᑎᓂᐊᖅᑐᖅ ᐃᓕᑕᕆᔭᐅᔾᔪᑎᑖᕈᑕᐅᔪᓐᓇᖅᑐᒃᓴᐅᔪᒃᑯᓪᓘᓐᓃᑦ ᖃᑉᓗᓈᑦ ᓄᓇᖓᓂᒃ ᓲᕐᓗ ᐳᕆᑎᔅ ᑲᓚᒻᒥᔭᒥᐅᑎᑐᑦ ᐅᕝᕙᓘᓐᓃᑦ ᓯᓚᑦᑐᖅᓴᕐᕕᒃᑯᑦ Rockies-ᓂᒃ, ᐊᒻᒪᓗ ᐃᓕᑕᕆᔭᐅᔾᔪᑎᑕᖃᖅᑐᖓ ᐃᓕᓐᓂᐊᖅᑎᑦᑎᔪᓐᓇᕐᓂᒃᑯᑦ ᑕᐃᒪᐃᑦᑐᒃᓴᓂᒃ.

ᑕᐃᒪᐃᒻᒪᑦ ᑐᕌᒐᕆᔭᕋ ᐃᓄᐃᑦ ᐃᓕᓐᓂᐊᖅᑎᑦᑐᒪᑉᓗᒋᑦ ᑕᒫᓂᕐᒥᐅᑕᑦ ᐊᔪᙱᓐᓂᖅᐹᒃᑯᑦ ᐃᓚᐅᖃᑕᐅᔪᓐᓇᖅᓯᓇᔭᕐᓂᕐᒧᑦ ᐅᕝᕙᓘᓐᓃᑦ ᐱᒋᐊᕈᑎᒃᑯᑦ ᖃᑉᑎᕆᔨᒃᑯᑦ ᐃᓕᓐᓂᐊᖅᑎᑦᑎᔾᔪᑎᒋᕙᒃᑕᖏᑦᑎᒍᑦ, ᐃᓕᑕᕆᔭᐅᔾᔪᑎᑖᖑᓲᖅ ᖃᑉᑎᕆᔨᐅᔪᓐᓇᖅᓯᓂᕐᒧᑦ ᓇᓂᑐᐃᓐᓇᖅ ᑲᓇᑕᒥ ᐅᐸᒍᒪᓇᔭᖅᑕᖏᓐᓄᑦ.”

ᐅᐊᐃᔭᑦ ᐅᖃᖅᖢᓂ ᐊᑯᓂᒎᖅ ᓇᓂᓯᓇᓱᓚᐅᖅᑐᖅ ᐃᓂᒃᓴᑦᑎᐊᕙᖕᒥᒃ ᓄᑖᒧᑦ ᐃᓕᓐᓂᐊᕐᕕᒃᑖᖑᓂᐊᖅᑐᒧᑦ.

ᐅᖃᖅᖢᓂ ᐃᓂᒃᓴᐅᓇᔭᖅᑐᑦ ᐊᒥᓱᑦ ᑕᑯᒋᐊᖃᑦᑕᓚᐅᖅᑕᖏᒡᒎᖅ, ᑭᓯᐊᓂ ᐋᒃᑳᖃᑦᑕᓚᐅᖅᑕᖏᑦ ᐊᔾᔨᒌᙱᑦᑑᑕᐅᔪᓂᒃ ᐱᔾᔪᑎᖃᖅᖢᓂ. “ᑕᐃᒪᓕ ᑎᑭᐅᑎᓕᓚᐅᖅᑐᒍᑦ ᐃᓂᒋᓕᖅᑕᖓᓄᑦ ᐊᓇᐅᓕᒑᕐᕕᐅᑉ ᐅᖓᑖᓂ, ᐊᖏᖅᑕᐅᑉᓗᓂᓗ Hᐊᒻᓚᒃᑯᑦ ᑲᑎᒪᔨᖏᓐᓄᑦ, ᑭᓯᐊᓂ ᓄᑖᖅ ᓄᓇᓕᖕᒧᑦ ᐸᕐᓇᐅᑎᒃᓴᖅ ᓴᖅᑭᓚᐅᕐᒪᑦ ᐊᒻᒪᓗ ᐅᖃᐅᑎᔭᐅᑉᓗᑎᒃ ᑕᐃᑲᓂ ᓇᑉᐸᖅᑎᕆᔭᕆᐊᖃᙱᓐᓂᖏᓐᓄᑦ ᖃᖓᑐᐃᓐᓇᖅ.

ᑕᒪᓐᓇ ᓈᒻᒪᓚᐅᖅᑐᖅ ᑕᐅᕙᓂ ᐃᑰᑕᖅᐸᓪᓕᐊᓕᕋᔭᕈᑉᑕ, ᓈᒻᒪᙱᑦᑐᖃᓪᓚᕆᒐᔭᓚᐅᕐᒪᑦ.

ᓇᓂᓯᔪᓐᓇᖅᓯᓚᐅᖅᑐᒍᑦ ᓄᑖᒥ ᐃᓂᒃᓴᕆᓂᐊᓕᖅᑕᖓᓂᒃ ᓄᓇᓕᐅᑉ ᑭᒡᓕᖃᕐᕕᑦᑎᐊᖓᓂᒃ ᓈᒻᒪᑦᑎᐊᖅᖢᓂᓗ ᐃᓂᑖᖓ.

ᓇᓂᓯᔪᒪᓚᐅᕋᒪ ᓈᒻᒪᒋᔭᐅᓇᔭᖅᑐᒥᒃ ᐊᒡᓂᒍ ᐃᒍᒃᑯᑦ ᖃᑉᑎᕆᔨᖏᓐᓄᑦ. ᐃᑲᔪᖅᓯᒪᓪᓚᕆᖕᒪᑕ ᑕᒡᕘᓇ ᐊᒻᒪᓗ ᓄᕙᒡᔪᐊᕐᓂᖅ ᐃᓱᓕᓯᒪᓕᖅᐸᑦ, ᐃᓕᓐᓂᐊᖅᓯᒪᓂᖏᑦ ᐱᐅᓯᕚᓪᓕᓪᓚᕆᖕᓂᐊᖅᑐᑦ.”

ᓄᑖᖅ ᖃᑉᑎᕆᔨᒃᑯᑦ ᐃᓕᓐᓂᐊᕐᕕᒃᑖᖓ ᐊᑭᖃᖅᑐᖅ ᐅᖓᑎᐊᕐᔪᐊᓂᒃ $500,000, ᐊᒡᓂᒍ ᐃᒍᒃᑯᑦ ᐃᓕᓯᓯᒪᑉᓗᑎᒃ $250,000-ᒥᒃ, ᖃᑉᑎᕆᔨᒃᑯᑦ ᑮᓇᐅᔾᔭᒃᓴᓚᐅᖅᖢᑎᒃ $75,000-ᒥᒃ, $100,000 ᓄᓇᕗᑦ ᒐᕙᒪᒃᑯᖏᓐᓂᙶᖅᖢᓂ ᒥᑭᔪᓄᑦ ᐊᑭᑐᔫᑎᓄᑦ ᑐᓂᕐᕈᑎᒃᑯᑦ, ᐊᒻᒪᓗ Hᐊᒻᓚᒃᑯᑦ ᑲᑎᒪᔨᖏᑦ ᐊᖏᖅᓯᒪᑉᓗᑎᒃ ᐊᒥᐊᒃᑯᒋᔭᐅᔪᖅ ᖃᑉᑎᕆᔨᒃᑯᓐᓄᑦ ᒪᕐᕈᖕᓂᒃ ᐅᑭᐅᓂᒃ ᖄᖏᖅᓯᒪᔪᓂᒃ ᐃᓕᓐᓂᐊᕐᕕᒃᓴᒨᕈᓐᓇᕐᓂᖓᓄᑦ.

ᐅᐊᐃᔭᑦ ᐅᖃᖅᖢᓂ ᓄᑖᖅ ᐃᓕᓐᓂᐊᕐᕕᒃ ᓴᖅᑭᑎᑦᑎᓂᐊᕐᒪᑦ ᐊᔾᔨᐅᙱᑦᑐᓂᒃ ᐱᔭᕆᐊᑐᔪᓂᒡᓗ ᐃᓕᓐᓂᐊᕈᑎᒃᓴᓂᒃ ᖃᑉᑎᕆᔨᓄᑦ.

ᐅᖃᖅᖢᓂ ᖃᑯᒍᑭᐊᕈᖅ ᓯᕗᓂᒃᓴᒥ ᐃᓕᓐᓂᐊᖅᑐᑦ ᖃᑉᑎᐱᔨᒃᑯᑦ ᓄᑖᒥ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᓪᓗᒋᑦ ᐃᓅᓕᑦᑎᔪᒫᖅᑐᑦ.

ᑕᒪᓐᓇ ᓴᕆᒪᓇᖅᑐᖅ ᖃᑉᑎᕆᔩᑦ ᐱᓕᕆᑦᑎᐊᖅᑐᑦ ᑕᑯᑉᓗᒋᑦ ᐱᓕᕆᓪᓚᑦᑖᖅᑎᓪᓗᒋᑦ ᐊᒻᒪᓗ ᐊᔪᕈᓐᓃᖅᐹᓪᓕᕐᓂᐊᖅᑐᑦ ᓯᕗᒻᒧᐊᒃᐸᓪᓕᐊᑎᓪᓗᑕ.”

ᐊᑐᕐᓂᐊᖅᑕᖅᐳᑦ ᓄᑖᖅ ᐃᓕᓐᓂᐊᕐᕕᒃ ᐱᓇᓱᐊᕈᓯᑕᒫᑦ ᒫᓐᓇᐅᔪᖅ ᐱᒋᐊᕐᓗᒍ ᓂᒡᓕᓗᐊᖅᑳᖅᑎᓐᓇᒍ, ᐊᒻᒪᓗ ᐱᓕᕆᖃᑎᒋᔭᒃᑲ ᖃᑉᑎᕆᔨᒃᑲ ᓴᖅᑭᑦᑎᔪᓐᓇᖁᑉᓗᑕ ᐃᓕᓐᓂᐊᕈᑎᒃᓴᒥᒃ ᐱᓇᓱᐊᕈᓯᑕᒫᑦ, ᑕᐃᒪᐃᒻᒪᑦ ᖃᐅᔨᒪᔪᒍᑦ ᖃᓄᖅ ᐱᕙᓪᓕᐊᑦᑎᐊᖅᑎᒋᓂᐊᕐᒪᖔᑉᑕ ᐃᓄᐃᑦ ᐱᕙᓪᓕᐊᓪᓚᕆᒍᓐᓇᖁᑉᓗᒋᑦ ᐅᑭᐅᖅ.

ᐅᐱᕐᖔᖑᓕᕐᒥᒃᐸᑦ, ᓱᓇᓗᒃᑖᑦ ᒪᑐᐃᖅᐸᑕ, ᐱᑕᖃᕐᓂᖅᓴᐅᓂᐊᖅᑑᔭᖅᑐᖅ ᐃᓕᓐᓂᐊᕈᑎᒃᓴᓂᒃ ᖃᑉᑎᕆᔨᒃᑯᑦ ᐊᖓᔪᖅᑳᕐᔪᐊᖓᑕ ᑎᑎᕋᕐᕕᖓᓂᒃ ᑕᒫᓂ, ᐊᒻᒪᓗ ᐱᓕᕆᖃᑎᒋᓂᐊᖅᑕᒃᑲ ᓴᖅᑭᑎᑦᑎᔪᓐᓇᖁᑉᓗᑕ ᐱᕚᓪᓕᖅᓯᒪᓂᖅᓴᓂᒃ ᐃᑭᑦᑐᖃᓪᓚᑦᑖᖅᑎᓪᓗᒍ ᐃᓕᓐᓂᐊᕈᑎᒃᓴᓂᒃ.

ᖃᑉᑎᕆᔨᒃᑯᑦ ᐊᖓᔪᖅᑳᕐᔪᐊᖓᑕ ᑎᑎᕋᕐᕕᖓ ᐃᓕᓐᓂᐊᕈᑎᒥᓂᒃ ᐋᖅᑭᒋᐊᖅᓯᓯᒪᖕᒪᑦᑕᐅᖅ, ᐊᒻᒪᓗ ᐱᓕᕆᖃᑎᒌᒡᓗᑕ ᐱᓕᕆᑦᑎᐊᕐᓂᐊᖅᑑᔭᖅᑐᒍᑦ ᑕᒡᕙᓂ ᓄᓇᓕᖕᒥ ᐊᒻᒪᓗ ᓄᓇᕗᓗᒃᑖᒥ.”

Advertisement

Darrell Greer

Darrell Greer is Editor of Kivalliq News