Hᐃᒪᔅ ᒪᒻᖓᐅᑉ ᐱᓇᓱᐊᕈᓯᖓ ᐃᒪᓐᓇᐃᓚᐅᖅᑐᖅ ᖁᕕᐊᓇᙱᑦᑑᖅᑳᖅᖢᓂ ᖁᕕᐊᓇᖅᓯᓪᓚᕆᒃᖢᓂ ᐅᑉᓗᕐᓂᒃ ᖃᐃᔪᓂᒃ ᑖᒻᓇ ᑕᖅᑭᖅ ᐱᒋᐊᓕᓵᖅᑎᓪᓗᒍ ᐊᕐᕕᐊᓂ.

ᒪᒻᖓᖅ ᓂᕆᐅᖏᓐᓇᓚᐅᕐᒪᑦ ᐊᑎᓂ ᐊᒧᔭᐅᖁᑉᓗᒍ 12-ᖑᔪᑦ ᐊᒧᔭᐅᓂᐊᖅᑎᓪᓗᒋᑦ ᓇᓐᓄᒐᓱᒍᓐᓇᕋᔭᖅᑐᑦ ᐊᕐᕕᐊᓂ ᑕᖅᑭᐅᓚᐅᖅᑐᒥ, ᐊᒻᒪᓗ ᐃᓱᒪᓚᐅᖅᑐᖅ ᖃᓄᖅ ᐱᕕᒃᓴᖃᖅᑎᑕᐅᒃᑲᓐᓂᕋᔭᕐᒪᖔᕐᒥ ᐊᑎᖓ ᐊᒧᔭᐅᓚᐅᙱᑎᓪᓗᒍ ᓂᕕᙵᑖᒃᑯᑦ.

Hᐃᒪᔅ ᒪᒻᖓᖅ ᐊᕐᕕᐊᕐᒥᐅᑕᖅ ᓴᕆᒪᓱᒃᑐᖅ ᓇᓐᓄᒋᐅᕋᒥ, ᓇᓅᑉ ᐊᖏᓂᖓ 3.35 ᒦᑕᑦ (11 feet) ᐊᕐᕕᐊᓂ ᐱᓇᓱᐊᕈᓯᐅᓚᐅᖅᑐᒥ. ᐊᔾᔨ Hᐃᒪᔅ ᒪᒻᖓᕐᒥᙶᖅᑐᖅ

ᒪᒻᖓᖅ ᒧᒥᙱᑐᐃᓐᓇᓚᐅᖅᑐᖅ ᑐᓴᕋᒥ ᐊᑎᖓ ᐊᒧᔭᐅᓂᖓᓄᑦ ᐃᓇᖏᖅᑎᐅᓂᐊᖅᖢᓂ ᐊᑎᕐᓂᒃ ᐊᒧᔭᐅᔪᓂᒃ.

ᐊᑕᐅᓯᐅᓈᖅᑎᖅᖢᑎᒃ ᐊᖑᓇᓱᒃᑏᑦ ᐊᑎᖏᑦ ᐊᒧᔭᐅᔪᑦ ᓄᓇᒧᙵᐅᖃᑦᑕᓕᓚᐅᖅᑐᑦ ᓇᓐᓄᒋᐊᖅᑐᖅᖢᑎᒃ ᐊᒻᒪᓗ ᒪᒻᖓᖅ ᓂᕆᐅᑦᑎᐊᓕᕆᑉᓗᓂ ᑐᓴᖃᑦᑕᓕᕋᒥ ᓇᓐᓄᒃᓯᒪᙱᑦᑐᓂᒃ.

ᒪᒻᖓᖅ, ᐊᕙᑎᓂᒃ ᐅᑭᐅᓕᒃ, ᐅᖃᖅᖢᓂ ᓈᓚᐅᑎᐊᓛᓂᒎᖅ ᑐᓵᓚᐅᙱᑦᑐᖅ ᐊᑎᕐᓂᒃ ᐅᒨᖅᑲᐃᓕᖅᑎᓪᓗᒋᑦ ᐊᒻᒪᓗ, ᐅᖃᐅᑎᔭᐅᒐᒥ ᐊᑎᖓ ᐊᒧᔭᐅᓂᖓᓄᑦ ᐃᓇᖏᖅᑎᐅᓗᓂ ᓯᕗᓪᓕᖅᐹᒃᑯᑦ, ᓂᕆᐅᓕᓚᐅᖅᑐᖅ ᐱᑎᑕᐅᓇᔭᕐᓂᕐᒥᓄᑦ ᓇᓐᓄᒋᐊᖅᑐᕆᐊᒃᓴᖅ.

ᐅᖃᖅᖢᓂ ᑐᑭᓯᐅᒪᔭᒃᑯᑦ, ᓯᕗᓪᓕᖅᐹᑦ 12 ᐃᓄᐃᑦ ᓇᓐᓄᒋᐊᖅᑐᓚᐅᖅᑐᑦ ᐅᑐᐱᕆ 30-ᒥ, ᐱᕕᒃᓴᖃᖅᑎᑕᐅᓚᐅᕐᒪᑕ 5:00-ᒧᑦ ᑎᑭᖦᖢᒍ ᓄᕕᐱᕆ 1-ᒥ ᓇᓐᓄᒐᔭᕐᓂᕐᒧᑦ ᐅᕝᕙᓘᓐᓃᑦ ᐅᑎᖅᑎᑦᑎᓇᔭᕐᓂᕐᒧᑦ ᓂᕕᙵᑖᒥ.

ᓯᕗᓪᓕᖅᐸᐅᑉᓗᖓ ᐃᓇᖏᖅᑎᐅᓚᐅᖅᑐᖓ, ᐅᕝᕙᓘᓐᓃᑦ ᖃᓄᑭᐊᖅ ᑕᐃᔭᐅᓇᔭᖅᑐᖓ, ᑕᐃᒪᐃᒻᒪᑦ ᓴᓇᑦᑕᐃᓕ ᑎᑭᑕᐃᓐᓇᕐᒪᑦ, ᐊᑯᓂ ᐅᑕᖅᑭᓐᓇᖅᑑᔭᓚᐅᖅᑐᖅ, ᐊᐅᓪᓚᕈᓐᓇᖅᓯᑕᐃᓐᓇᖅᖢᖓ. ᓱᑲᔪᐊᓗᒃᑯᑦ ᑎᑭᑦᑑᔭᓚᐅᖅᑐᖅ ᐊᒻᒪᓗ ᖃᐅᔨᓕᖅᖢᖓ ᐃᖏᕐᕋᓕᖅᖢᑕ 12 ᒪᐃᓕᒥᒃ ᐅᖓᓯᖕᓂᓕᖕᒧᑦ ᓄᓇᒋᔭᑉᑕ ᓂᒋᐊᓄᑦ,” ᑕᐃᒪᓐᓇ ᐅᖃᖅᖢᓂ ᒪᒻᖓᖅ.

“ᑕᑯᒐᑉᑯ ᓇᓄᖅ ᓄᓇᒥ ᐅᐱᒍᓱᑦᑎᐊᓚᐅᖅᑐᖓ, ᑕᒃᑰᕌᓗᒃ. ᖁᕕᐊᓱᑦᑎᐊᖅᖢᖓ. ᐅᐱᒍᓱᒃᖢᖓ ᖃᓄᖅ ᐊᖏᑎᒋᖕᒪᖔᑦ.

“ᓇᓄᖅ ᐅᕙᑉᑎᓐᓂᒃ ᑕᑯᑉᓗᓂ ᐊᒻᒪᓗ ᐸᖓᓕᓕᖅᖢᓂ ᐃᒪᕐᒧᑦ. ᐸᖓᓕᒋᐊᓚᐅᖅᑐᖅ. ᓂᑯᕕᑦᑐᐊᓘᓚᐅᙱᑦᑐᖅ ᐸᖓᓕᒋᐊᑐᐃᓐᓇᓚᐅᖅᑐᖅ.

ᒪᓕᒃᖢᑎᒍᑦ ᐃᒻᒪᖄ 30 ᓯᑲᓐᔅᓂᒃ, ᑐᕌᕐᕕᒋᒋᐊᕈᓐᓇᖅᓯᒐᑉᑯ ᐱᑕᕈᓐᓇᖅᓯᓚᐅᖅᑕᕋ. ᐅᖃᕈᓐᓇᙱᑦᑐᖓ ᖃᓄᖅ ᐃᒃᐱᒍᓱᓚᐅᕐᒪᖔᕐᒪ. ᐊᓕᐊᓇᐃᒍᓱᓚᐅᖅᑐᖓ ᖁᕕᐊᓱᑦᑎᐊᖅᖢᖓ.”

ᓇᓐᓄᒐᓱᓕᓚᐅᕐᒪᑕᑦᑕᐅᖅ ᑲᖏᖅᖠᓂᕐᒥ, ᑲᖏᖅᖠᓂᕐᒥ 12-ᓂᑦᑕᐅᖅ ᓂᕕᙵᑖᖃᖅᖢᑎᒃ − ᐊᕐᕕᓂᓖᑦ ᐊᖑᓴᓪᓗᕐᓄᑦ ᐊᒻᒪᓗ ᐊᕐᕕᓂᓖᑦ ᐊᕐᓇᓪᓗᕐᓄᑦ, ᖁᓕᖏᓗᐊᖅᑐᑦ ᐱᑕᖅᓯᖅᑳᖅᑐᓅᕐᓂᐊᖅᖢᑎᒃ ᐊᒻᒪᓗ ᐱᖓᓱᑦ ᐊᒧᔭᐅᔪᒃᑯᑦ.

ᑐᓴᒐᒃᓴᖅ ᓴᖅᑭᓐᓂᐊᓕᖅᑎᓪᓗᒍ ᑲᖏᖅᖠᓂᕐᒥ, ᑕᓪᓕᒪᑦ ᐱᑕᖅᑕᐅᓯᒪᓕᓚᐅᖅᑐᑦ ᐱᖓᓲᑉᓗᑎᒃ ᐊᖑᓴᓪᓗᐃᑦ ᐊᒻᒪᓗ ᒪᕐᕈᑉᓗᑎᒃ ᐊᕐᓇᓪᓗᐃᑦ ᐱᑕᖅᑕᐅᓯᒪᔪᑦ.

ᐊᕐᕕᐊᓂ ᓂᐱᙵᑖᑦ ᓄᖑᑕᐅᓚᐅᖅᑐᑦ ᐊᒻᒪᓗ ᐊᒥᓱᑦ ᓄᓇᖅᑲᑎᒌᑦ ᖁᕕᐊᓱᙱᑦᑐᑦ ᐊᕐᕕᐊᑦ, ᓇᓄᖃᕐᓂᖅᐹᖑᑎᓪᓗᒍ ᓄᓇᕗᒥ, 12-ᖏᓐᓇᕐᓂᒃ ᓇᓐᓄᒍᑎᒃᓴᖃᖃᑦᑕᕐᓂᖓᓄᑦ.

ᒪᒻᖓᖅ ᐅᖃᖅᖢᓂ ᐊᕐᕕᐊᑦ ᐊᒥᓲᓂᖅᓴᓂᒃ ᓂᐱᙵᑖᖅᑎᑕᐅᖃᑦᑕᕆᐊᓕᐅᒐᓗᐊᖅ ᑭᓯᐊᓂ ᖁᕕᐊᓱᑦᑎᐊᖅᑐᖅ ᓇᓐᓄᒍᓐᓇᓚᐅᕋᒥ, ᓇᓐᓄᒋᐅᖅᖢᓂ ᐅᑭᐅᖅ.

ᐅᖃᖅᖢᓂ ᐅᐃᒪᔮᓚᐅᐱᓪᓚᓚᐅᖅᑐᕈᖅ ᓇᓐᓄᒃᑲᒥ ᐊᒻᒪᓗ ᐋᒃᑐᖃᑕᐅᓕᖅᖢᓂ.

“ᐋᒃᑐᕆᐊᑲᐅᑎᒋᓚᐅᖅᑕᖅᐳᑦ ᐊᒻᒪᓗ ᑐᓂᕐᕈᑎᒋᔭᕆᐊᖃᖅᑕᖅᐳᑦ ᐆᒪᔪᓕᕆᔨᒃᑯᓐᓄᑦ ᑐᓂᕐᕈᑎᒋᑉᓗᒋᑦ ᑮᓇᐅᔭᖅᑖᕈᑎᒋᔪᓐᓇᖅᑕᖅᐳᑦ ($45 ᐊᒡᓕᕈᖓᓄᑦ, $100 ᐅᓱᐊᖓ, $40 ᖃᖅᖢᐊᖓᓂ ᑎᑎᕋᖅᓯᒪᔪᖅ(ᔪᑦ), ᐊᓯᖏᓪᓗ).

“ᐸᐸᓚᐅᖅᑕᒃᑲ ᓇᓅᑉ ᓂᐊᖁᖓ ᐊᒻᒪᓗ ᓇᓄᕋᖓ, ᑭᓯᐊᓂ ᓂᕿᖏᑦ ᕿᒪᓚᐅᖅᑕᖅᐳᑦ ᓄᓇᒥ ᑕᒫᓂ ᓂᕆᔭᐅᔪᓐᓇᙱᒻᒪᑕ.

“ᐊᓈᓇᒪ ᓇᓄᕋᖅ ᓇᑎᐊᓗᙳᖅᑎᓐᓂᐊᖅᑰᖅᑕᖓ ᐅᕙᖓ ᐱᒋᓂᐊᕐᓗᒍ.

“ᐊᖑᓇᓱᒋᐊᖃᑦᑕᓕᓚᐅᕋᒪ ᐃᓄᑑᑉᓗᖓ 15-ᓂᒃ ᐅᑭᐅᖃᖅᖢᖓ ᐊᒻᒪᓗ ᓇᓐᓄᒋᐅᕐᓂᕋ ᖁᕕᐊᓇᕐᓂᖅᐹᖑᓯᒪᔪᖅ ᐊᖑᓇᓱᒃᑎᐅᓕᖅᑎᓪᓗᖓ. ᓇᓐᓄᒃᖢᓂ ᐊᖑᑎᙳᖅᑑᔭᕐᓇᓚᐅᖅᑐᖅ.”

Advertisement

Darrell Greer

Darrell Greer is Editor of Kivalliq News