Facebook-ᑯᑦ ᒪᒃᐱᒐᖅ ᐃᓕᐅᖅᑲᐃᕝᕕᐅᕙᒃᑐᖅ ᐊᔾᔨᓂᒃ ᑕᑯᑎᑦᑎᕙᒃᑐᓂᒃ ᖃᓄᖅ ᑲᔾᔮᕐᓇᖅᑎᒋᖕᒪᖔᑦ ᐅᑭᐅᖅᑕᖅᑐᖅ ᒪᓕᒃᑕᐅᓕᖅᑐᖅ 10,000-ᓄᑦ.

ᑯᑎ ᐸᓐᑐᕐ/ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ ᐊᔾᔨᖏᓐᓂᙶᖅᑐᖅ
ᑕᒪᓯ ᐊᖑᓴᓪᓗᖅ ᕿᒥᕐᕈᔪᖅ Facebook-ᑯᑦ ᐃᒪᓐᓇ ᑕᐃᒎᓯᓕᖕᒥ ᐊᔾᔨᑦ ᐅᑭᐅᖅᑕᖅᑐᒥᐅᑦ, ᑲᑎᑦᑎᓯᒪᔪᑦ 10,000-ᓂᒃ ᐃᓚᒋᔭᐅᖃᑕᐅᓕᖅᑐᓂᒃ ᑕᐃᒪᙵᓂ 2013-ᒥ ᐅᑉᓗᒥᒧᑦ.

ᑕᒪᓐᓇ ᒪᒃᐱᒐᖅ ᐱᒋᐊᖅᑎᑕᐅᓚᐅᖅᑐᖅ ᑲᖏᖅᖠᓂᕐᒥᐅᑕᒧᑦ ᑕᒪᓯ ᐊᖑᓴᓪᓗᕐᒧᑦ 2013-ᒥ, ᐃᓄᐃᑦ ᓄᓇᖁᑎᖏᑦ ᑲᑕᒃᑎᖅᑕᐅᕙᓪᓕᐊᓕᓚᐅᖅᑎᓪᓗᒋᑦ ᑕᕆᐅᑉ ᐊᑭᐊᓂᕐᒥᐅᑦ ᓇᑦᑎᕋᓱᖃᑦᑕᖁᔨᔪᓐᓃᖅᑎᓪᓗᒋᑦ.

ᑕᒪᓐᓇ ᐃᓱᒪᒋᑉᓗᒍ, ᐃᓱᒪᓕᓚᐅᖅᑐᖓ ᖃᓄᖅ ᖁᕝᕙᖅᑎᕆᕙᓪᓕᐊᔪᓐᓇᕐᒪᖔᑉᑕ ᐅᑭᐅᖅᑕᖅᑐᒥ ᐃᓅᖃᑦᑕᕐᓂᑉᑎᓐᓄᑦ,” ᑕᐃᒪᓐᓇ ᐅᖃᖅᖢᓂ. “ᑕᒪᓐᓇ ᒪᒃᐱᒐᖅ (ᐱᒋᐊᖅᑕᐅᓚᐅᖅᑐᖅ) ᐃᓄᐃᑦ ᐃᓕᑦᑎᖁᑉᓗᒋᑦ ᐅᑭᐅᖅᑕᖅᑐᖅ ᑕᐃᒪᐅᖕᒪᑦ ᑲᔾᔮᕐᓇᖅᑐᒻᒪᕆᐊᓘᑉᓗᓂ, ᓂᕐᔪᑎᖃᑦᑎᐊᖅᖢᓂ ᐊᒻᒪᓗ ᐃᓄᖏᑦ ᐱᐅᔫᓗᑎᒃ.”

ᐊᖑᓴᓪᓗᖅ ᐱᕈᖅᓴᖅᖢᓂ ᑲᖏᖅᖠᓂᕐᒥ ᖃᕆᑕᐅᔭᓕᕆᖅᑳᕐᓇᑎᒃ, ᖃᐅᔨᒪᙱᑦᑎᐊᓚᐅᕐᒪᑦ ᖃᓄᖅ ᐅᑭᐅᖅᑕᖅᑐᖅ ᑲᖏᖅᖠᓂᐅᑉ ᓯᓚᑖᓂ ᑕᐅᑐᖅᑲᕐᒪᖔᑦ.

ᖃᐅᔨᒪᓚᐅᖅᑐᖓ ᖃᓄᖅ ᓄᓇ ᑕᐅᑦᑐᖃᕐᒪᖔᑦ ᑲᖏᖅᖠᓂᐅᑉ ᖃᒪᓂ’ᑐᐊᑉᓗ ᐊᑯᓐᓂᖓᓂᒃ ᐊᒻᒪᓗ ᖃᒪᓂ’ᑐᐊᑉ ᐅᖅᓱᖅᑑᑉᓗ ᐊᑯᓐᓂᖓᓂ ᑭᓯᐊᓂ ᖃᐅᔨᒪᙱᑦᑎᐊᓚᐅᖅᑐᖓ ᖃᓄᖅ ᑕᐅᑦᑐᖃᕐᒪᖔᑦ ᕿᑭᖅᑖᓗᒃ ᑕᐃᑉᓱᒪᓂ,” ᑕᐃᒪᓐᓇ ᐅᖃᐅᔾᔨᑉᓗᓂ ᑭᕙᓪᓕᕐᒥ ᓂᐱᖏᒃᑯᓐᓄᑦ.

ᓄᓇᖃᓚᐅᖅᑳᖅᖢᓂ ᖁᕐᓗᖅᑑᕐᒥ ᐊᒻᒪᓗ ᐃᖃᓗᖕᓂ, ᐊᖑᓴᓪᓗᖅ ᐳᓚᕋᕈᓐᓇᖅᓯᓚᐅᖅᑐᖅ ᐊᓯᖏᓐᓄᑦ ᓄᓇᓕᖕᓄᑦ ᓄᓇᕗᒥ. ᖁᔭᓕᔪᓐᓇᖅᓯᓚᐅᖅᑐᖅ ᖃᓄᖅ ᐊᖏᑎᒋᖕᒪᖔᑦ ᐱᐅᑎᒋᖕᒪᖔᓪᓗ ᐅᑭᐅᖅᑕᖅᑐᖅ.

ᖃᐅᔨᒪᑉᓗᓂ ᖃᓄᖅ ᐊᑭᑐᑎᒋᖕᒪᖔᑦ ᐊᓯᖏᓐᓄᑦ ᓄᓇᓕᖕᓄᙵᐅᓇᓱᒃᖢᓂ, ᐊᖑᓴᓪᓗᖅ ᐱᔫᒥᒍᓱᓕᓚᐅᖅᑐᖅ ᐱᒋᐊᖅᑎᑦᑎᔪᒪᓂᕐᒧᑦ ᒪᒃᐱᒐᕐᒥᒃ ᑕᑯᑎᑦᑎᔪᒪᑉᓗᑎᒃ ᖃᓄᖅ ᐱᐅᑎᒋᖕᒪᖔᑕ ᓄᓇᓖᑦ ᖃᓄᕐᓗ ᐃᓄᒋᐊᒃᑎᒋᖕᒪᖔᑕ ᐳᓚᕋᓚᐅᖅᓯᒪᔾᔮᖏᑕᒃᓴᕆᔭᖅᐳᑦ.

ᐃᓱᒪᒋᑐᐃᓐᓇᓚᐅᖅᑕᕋ ᐊᓈᓇᑦᑎᐊᕋ. ᖃᓄᕐᓗ ᐊᒥᓱᑦ ᐃᓄᐃᑦ ᐅᑭᐅᖅᑕᖅᑐᒥᐅᑕᑦ ᐊᐅᓪᓚᕋᔪᙱᓐᓂᖏᓐᓄᑦ ᐊᑭᑐᓗᐊᕐᓂᖏᓐᓄᑦ ᖃᖓᑦᑕᐅᑏᑦ,” ᑕᐃᒪᓐᓇ ᐅᖃᖅᖢᓂ.

5,000-ᒪᓕᓕᕐᓂᐊᕋᓱᒋᓚᐅᙱᑕᒃᑲ ᓯᕗᓪᓕᖅᐹᒥ. 5,000 ᒪᓕᓕᕐᒪᑕ ᐃᓱᒪᓕᓚᐅᖅᑐᖓ ᐃᒻᒪᖄ ᐃᓚᒃᑲᓐᓂᕐᓂᐊᖅᑐᑦ.” ᐅᐱᒍᓱᑦᑎᐊᖅᑐᖓ ᑕᒪᕐᒥᒃ ᐊᔾᔨᑦ ᐃᓕᔭᐅᓯᒪᔪᑦ ᐊᒻᒪᓗ ᐊᒥᓲᖕᒪᑕ ᐃᓚᐅᖃᑕᐅᔪᒪᔪᑦ. ᐅᐱᓐᓇᑦᑎᐊᖅᑐᖅ, ᐅᑉᐱᕐᓇᙱᒻᒪᕆᒃᑐᖅ.”

ᒪᓕᒃᑕᐅᔭᕆᐊᓖᑦ ᑕᒡᕘᓇ ᐱᔭᕆᐊᑐᙱᑦᑐᑦ. ᑭᓯᒥ ᐅᑭᐅᖅᑕᖅᑐᒥᐅᑦ ᐊᔾᔩᑦ ᐃᓕᔭᐅᔪᓐᓇᖃᑦᑕᖅᑐᑦ, ᑲᓇᑕᒥᓪᓘᓐᓃᑦ ᓇᓂᑐᐃᓐᓇᖅ. ᐊᔾᔨᓂᒃ ᓴᖅᑭᑦᑐᖃᕋᔪᒃᑐᖅ ᕋᓴᒥᐅᓂᒃ, ᐊᓛᔅᑲᒥᐅᓂᒃ ᐊᒻᒪᓗ ᐊᑯᑭᑦᑐᕐᒥᐅᑕᓂᒃ ᐊᒻᒪᓗ ᑲᓇᑕᐅᑉ ᐅᑭᐅᖅᑕᖅᑐᒥ ᓄᓇᖁᑎᖏᓐᓂᒃ ᓄᓇᕗᒥ, ᓄᓇᑦᓯᐊᕐᒥ ᔫᑳᓐᒥᓗ.

ᐊᓕᐊᓇᐃᒋᓂᖅᐹᒃᑲ ᐊᑯᑭᑦᑐᕐᒥᐅᑕᑦ, ᔫᑳᓐᒥᐅᑕᑦ ᐊᒻᒪᓗ ᐊᓛᔅᑲᒥᐅᑕᑦ,” ᑕᐃᒪᓐᓇ ᐅᖃᖅᖢᓂ ᐊᖑᓴᓪᓗᖅ.

ᑭᓇᑐᐃᓐᓇ ᐃᓚᐅᖃᑕᐅᓕᕈᓐᓇᖅᑐᖅ ᐊᖑᓴᓪᓘᑉ ᒪᒃᐱᒐᓕᐊᖓᓄᑦ, ᑭᓯᐊᓂ ᐊᔾᔨᑦ ᐃᓕᐅᖅᑲᖅᑕᐅᔪᑦ ᐊᓯᖏᓐᓄᑦ ᐱᔭᐅᑎᑦᑕᐃᓕᖃᑦᑕᖅᑕᖏᑦ ᒪᒃᐱᒐᐅᑉ ᓯᓚᑖᓄᑦ. ᑕᒪᑐᒥᙵ ᐃᓱᒪᓕᐅᓚᐅᖅᓯᒪᔪᖅ ᐊᑐᖅᑕᐅᒃᑲᓐᓂᖃᑦᑕᖁᓇᒋᑦ ᐊᔾᔨᑦ ᐃᓕᔭᐅᓯᒪᔪᑦ ᐃᓄᖁᑎᖏᑦ ᐊᖏᖅᑳᖅᑎᓐᓇᒋᑦ.

ᒪᒃᐱᒐᖅ ᓴᖅᑭᑎᓯᒪᔭᕋ ᐃᓄᐃᑦ ᐊᔾᔨᓂᒃ ᑕᑯᔪᓐᓇᖃᑦᑕᖁᑉᓗᒋᑦ ᐅᑭᐅᖅᑕᖅᑐᒥᐅᓂᒃ, ᐃᓄᐃᑦ ᐊᑐᕐᓂᕐᓗᖁᓇᒋᑦ ᐃᓅᖃᑎᒋᔭᖏᑦᑕ ᐊᔾᔨᓕᐊᖏᓐᓂᒃ, ᑮᓇᐅᔭᓕᐅᕈᑎᒋᑐᐃᓐᓇᖁᓇᒋᓪᓗ ᐊᔾᔨᑦ,” ᑕᐃᒪᓐᓇ ᐅᖃᖅᖢᓂ.

Advertisement