ᑮᓇᐅᔾᔭᒃᓴᖅᑐᑦ ᖃᒪᓂ’ᑐᐊᕐᒥ

73

12 ᐃᓕᓐᓂᐊᕌᓂᒃᑐᒃᓴᐅᓂᐊᖅᑐᑦ ᔫᓇ ᐊᒥᑦᓈᖅ ᐃᓕᓐᓂᐊᕐᕕᖕᒥ ᑮᓇᐅᔾᔭᒃᓴᑦᑎᐊᓕᖅᑐᑦ ᐃᓕᓐᓂᐊᕌᓂᒃᑯᑎᒃ ᖁᕕᐊᓱᖃᑎᒌᖕᓂᕐᒧᑦ ᐊᑐᕈᒪᑉᓗᒋᑦ ᑮᓇᐅᔭᑦ ᖃᒪᓂ’ᑐᐊᕐᒥ.

Grade 12 student Shanae Piercey creates some wonderful sweet treats during a Valentine's Day fundraiser for the potential graduates at Jonah Amitnaaq Secondary School in Baker Lake on Feb. 14, 2019. Photo courtesy Olivia Ullyot
Grade 12 student Shanae Piercey creates some wonderful sweet treats during a Valentine’s Day fundraiser for the potential graduates at Jonah Amitnaaq Secondary School in Baker Lake on Feb. 14, 2019. Photo courtesy Olivia Ullyot

ᐃᓕᓐᓂᐊᕌᓂᒃᑐᒃᓴᓕᐊᑦ ᐃᑲᔪᖅᑕᐅᔪᑦ ᐃᓕᓐᓂᐊᖅᑎᑦᑎᔨᒥᓄᑦ ᐅᓕᕕᔭ ᐆᔪᑦᒧᑦ ᐅᖃᖅᓯᒪᔪᖅ, ᐅᑉᓗᒥᒧᒡᒎᖅ ᐃᓕᓐᓂᐊᕐᓂᓖᑦ 12-ᒥ ᐱᓕᕆᑦᑎᐊᖅᓯᒪᔪᒻᒪᕆᐊᓗᐃᑦ.
ᐆᔪᑦ ᐅᖃᖅᖢᓂ ᐃᓕᓐᓂᐊᕌᓂᒃᑐᒃᓴᓕᐊᒡᒎᖅ ᑮᓇᐅᔭᓕᐅᕆᐊᖃᕐᒪᑕ $6,000 ᖃᓂᒋᔭᖓᓂᒃ ᓯᕗᓂᒃᓴᒥ ᖁᕕᐊᓲᑎᖃᕈᒫᖅᑎᓪᓗᒋᑦ ᐱᓇᓱᐊᕈᓯᐅᑉ ᓄᙳᐊᓂᐅᔪᒫᖅᑐᖅ, ᓂᕆᕕᒡᔪᐊᕈᒫᖅᖢᑎᒃ, ᒧᒥᕈᒫᖅᖢᑎᒃ ᐊᒻᒪᓗ ᒧᒥᕐᕕᐅᓂᐊᖅᑐᒥ ᐱᐅᓴᕆᐊᖃᕈᒫᖅᖢᑎᒃ.
“ᐃᓕᓐᓂᐊᕌᓂᒃᑐᒃᓴᓕᐊᑦ ᐃᓱᒪᒃᓴᖅᓯᐅᑦᑎᐊᓲᑦ ᖃᓄᖅ ᑮᓇᐅᔾᔭᒃᓴᕋᔭᕐᒪᖔᕐᒥᒃ,” ᑕᐃᒪᓐᓇ ᐅᖃᖅᖢᓂ ᐆᔪᑦ.
“ᑲᑎᒪᓂᖃᖃᑦᑕᖅᑐᒍᑦ ᑕᖅᑭᑕᒫᒃᑯᑦ ᐸᕐᓇᐃᑉᓗᑕ ᑕᖅᑭᑕᒫᒃᑯᑦ ᑮᓇᐅᔾᔭᒃᓴᕈᑎᒋᓂᐊᖅᑕᑉᑎᓐᓂᒃ ᐊᒻᒪᓗ ᐃᖕᒥᓂᒃ ᐱᓕᕆᒋᐊᒥᐊᓕᓲᑦ.”
ᐃᓕᓐᓂᐊᖅᑐᖅ ᑲᕐᓚ ᑳᔭᒃ, 18-ᓂᒃ ᐅᑭᐅᓕᒃ, ᐅᖃᖅᖢᓂ ᐊᒧᔭᒃᓴᓂᒃ ᓂᐅᕕᐊᒃᓴᖃᖃᑦᑕᓚᐅᕐᒪᑕᒎᖅ ᑎᓯᐱᕆᒥ ᐊᒻᒪᓗ ᒪᒪᖅᑐᓂᒃ ᑯᑮᓂᒃ ᓂᐅᕕᐊᒃᓴᖃᓚᐅᖅᖢᑎᒃ ᑎᑕᕈᓘᔭᖅᑎᓪᓗᒋᑦ.
ᓂᕆᑎᑦᑎᓚᐅᕐᒥᔪᑦ ᐃᓕᓐᓂᐊᕌᓂᓕᒑᔪᑦ, ᑮᓇᐅᔭᓕᐅᕈᑕᐅᑦᑎᐊᓚᐅᖅᑐᖅ.
“ᐅᑉᓗᒥᒧᑦ ᐃᓚᐅᖃᑕᐅᙱᓐᓇᖅᑐᖓ ᑮᓇᐅᔭᓕᐅᕋᓱᒃᑐᓂᒃ ᐊᒻᒪᓗ ᖁᕕᐊᒋᑦᑎᐊᖅᖢᒍ,” ᑕᐃᒪᓐᓇ ᐅᖃᖅᖢᓂ ᑳᔭᒃ.
“ᐃᑲᔪᕆᐊᖃᕋᒪ, ᑭᓯᐊᓂ ᖁᕕᐊᓇᖅᑐᐊᓘᓯᒪᔪᖅ ᐊᒻᒪᓗ ᐃᓚᐅᖃᑕᐅᔪᒪᖃᑦᑕᖅᖢᖓ. ᑮᓇᐅᔭᓕᐅᑦᑎᐊᖅᓯᒪᔪᒍᑦ ᐊᒻᒪᓗ ᑎᑭᐅᑎᓕᖅᑐᒍᑦ ᑎᑭᓐᓇᓱᒃᑕᑉᑎᓐᓄᑦ.
“ᑮᓇᐅᔭᓕᐅᕋᓱᐃᓐᓇᕐᓂᐊᖅᑐᒍᑦ ᑲᑎᑦᑎᒃᑲᓐᓂᐊᕐᔪᒍᒪᒐᑉᑕ ᐊᔾᔨᓕᐅᖅᑕᐅᓗᑕ ᐊᔾᔨᖃᕈᒪᒐᑉᑕ ᐃᓕᓐᓂᐊᕌᓂᖕᓂᕐᒧᑦ ᐊᒻᒪᓗ ᒥᑭᓕᕋᕈᑎᑖᕈᒪᑉᓗᑕ.”
ᐆᔪᑦ ᐅᖃᖅᖢᓂ ᓂᕆᓂᐊᖅᑐᒡᒎᖅ ᓇᓂᓯᓚᐅᖅᑐᑦ ᐃᓕᓐᓂᐊᕌᓂᓕᒑᔪᓂᒃ ᓂᕆᑎᑦᑎᖁᑉᓗᒋᑦ ᐱᓕᕆᑦᑎᐊᖅᑐᒻᒪᕆᐊᓘᓚᐅᖅᑐᑦ ᐃᓕᓐᓂᐊᕌᓂᓕᒑᔪᑦ ᑕᒡᕘᓇ.
ᐅᖃᖅᖢᓂ ᓄᓇᖓᓂᒎᖅ ᐃᒡᓗᓕᕆᔨᒃᑯᑦ ᐃᓕᓐᓂᐊᕌᓂᓕᒑᔪᓂᒃ ᖃᐅᔨᒋᐊᓚᐅᕐᒪᑕ ᓂᕆᑎᑦᑎᔪᓐᓇᕐᒪᖔᑕ ᖁᕕᐊᓱᖕᓇᒥ ᓂᕆᓂᖃᕐᓂᐊᖅᑎᓪᓗᒋᑦ.
“ᐃᓕᓐᓂᐊᕌᓂᓕᒑᔪᑦ ᐱᓕᕆᑦᑎᐊᖅᑐᒻᒪᕆᐊᓘᓚᐅᖅᑐᑦ ᐊᕿᒡᒋᕐᔪᐊᓕᐅᖅᑎᒃ ᑰᑯᓯᖕᒥᓗ ᐊᒻᒪᓗ ᓱᓇᓗᒃᑖᓂᒃ ᐃᓚᒋᔭᐅᖃᑦᑕᖅᑐᓂᒃ ᓂᕆᕕᒡᔪᐊᕐᓂᐊᕐᓗᓂ, ᐃᖃᐃᓕᓴᕐᕕᖕᒥᒃ ᐋᖅᑭᒃᓱᐃᑉᓗᑎᒃ ᓂᕆᕝᕕᐅᓂᐊᖅᑐᓂᒃ ᐊᒻᒪᓗ ᓂᕆᑎᑦᑎᑉᓗᑎᒃ 62-ᓂᒃ ᑕᐃᑉᓱᒪᓂ ᐅᓐᓅᔪᒥ,” ᑕᐃᒪᓐᓇ ᐅᖃᖅᖢᓂ ᐆᔪᑦ.
“ᐱᓕᕆᑦᑎᐊᖅᑐᐊᓘᓚᐅᖅᑐᑦ ᐱᐊᓂᒃᓯᑦᑎᐊᖅᖢᑎᒃ.”
ᐃᓕᓐᓂᐊᕌᓂᓕᒑᔪᑦ ᑮᓇᐅᔾᔭᒃᓴᒃᑲᓐᓂᕈᓐᓇᕐᓂᐊᖅᑐᑦ ᐊᐅᔭᒧᑦ ᑎᑭᓪᓗᒍ ᐃᓕᓐᓂᐊᖅᑎᑦᑎᔩᑦ ᐊᐅᓪᓚᕐᓂᐊᓕᖅᐸᑕ ᐊᐅᔭᒃᑯᑦ Hᐊᓚᑏᕆᐊᖅᑐᕐᓗᑎᒃ.
ᐆᔪᑦ ᑕᒪᕐᒥᒎᖅ ᐃᓕᓐᓂᐊᕌᓂᓕᒑᔪᑦ ᐃᑲᔪᖃᑦᑕᖁᔭᐅᓯᒪᔪᑦ ᐊᑕᐅᓯᕐᒧᓪᓘᓐᓃᑦ ᖃᓄᐃᓕᐅᕈᑕᐅᓂᐊᖅᑐᒃᑯᑦ.
ᐅᖃᖅᖢᓂ, ᐅᑉᓗᒥᒧᑦ, ᐃᓚᐅᖃᑕᐅᙱᑦᑐᖃᖅᓯᒪᙱᑦᑐᖅ, ᑕᒪᕐᒥᒃ ᐃᑲᔪᖅᓯᒪᔪᑦ ᐊᒻᒪᓗ ᕕᕗᐊᕆ 15-ᒧᑦ ᑎᑭᖦᖢᒍ, $1,200-ᒥᒃ ᓱᓕ ᑲᑎᑦᑎᔭᕆᐊᖃᖅᓯᒪᓕᓚᐅᖅᑐᑦ $6,000-ᒧᑦ ᑎᑭᓐᓂᐊᕐᓗᑎᒃ.
“ᐅᑭᐅᖑᔪᖅ ᐃᓕᓐᓂᐊᕌᓂᓕᒑᔪᑦ ᓴᙱᔪᒻᒪᕆᐊᓗᐃᑦ ᐊᒻᒪᓗ, ᐃᓕᓐᓂᐊᕆᐊᑦᑎᐊᔪᔪᑦ ᓯᕗᓂᒃᓴᒥᓂᒃ ᑕᐅᑐᑦᑎᐊᖅᑐᑦ, ᑕᒪᕐᒥᒃ ᑕᑯᓂᐊᖅᑕᒃᓴᕆᔭᖅᐳᑦ ᐃᓕᓐᓂᐊᕌᓂᑦᑎᐊᕐᑎᓪᓗᒋᑦ.
ᐃᓕᓐᓂᐊᕐᕕᕗᑦ Bingo-ᑎᑦᑎᔪᓐᓇᙱᒻᒪᑕ ᑮᓇᐅᔾᔭᒃᓴᕋᓱᒡᓗᑎᒃ ᐃᓕᓐᓂᐊᕌᓂᒍᒫᖅᑐᓄᑦ, ᑕᐃᒪᐃᒻᒪᑦ ᐃᓚᐅᖃᑕᐅᑦᑎᐊᕈᓐᓇᖃᑦᑕᖅᑐᑦ ᑕᒪᐃᓐᓂᒃ ᐊᒻᒪᓗ ᓂᑉᓕᖃᑦᑕᕈᓐᓇᓗᒃᑖᖅᖢᑎᒃ ᐸᕐᓇᐃᓂᒃᑯᑦ.
“ᓯᕗᒻᒧᐊᒃᐸᓪᓕᐊᓗᑎᒃ, ᐃᓕᓐᓂᐊᕌᓂᓕᒑᔪᑦ ᓂᐅᕕᐊᒃᓴᖃᕋᓱᒍᒫᖅᑐᑦ ᓂᕆᔭᒃᓴᓂᒃ ᐱᓇᓱᐊᕈᓯᐅᑉ ᓄᙳᐊᓂ, ᑭᓯᐊᓂ ᓇᓗᓇᐃᖅᑕᐅᓪᓚᑦᑖᖅᓯᒪᙱᑦᑐᖅ, ᐊᒻᒪᓗ ᐃᓚᒌᖕᓂᒃ ᖁᕕᐊᓱᒃᑎᑦᑎᓂᕐᒧᑦ ᐅᑉᓗᖃᖅᑎᑦᑎᔪᒪᔪᒫᖅᑐᑦ ᖃᑯᒍᒃᑲᓐᓂᖅ ᐅᐱᕐᖔᒃᑯᑦ.
“ᖁᕕᐊᒋᑦᑎᐊᖅᓯᒪᔭᒃᑲ ᐱᓕᕆᓂᕆᓯᒪᔭᖏᑦ ᐅᑉᓗᒥᒧᑦ, ᐊᓕᐊᓇᐃᑦᑎᐊᖃᑦᑕᕐᒪᑕ ᐱᓕᕆᖃᑎᒋᑉᓗᒋᑦ, ᑕᒪᐃᓐᓂᖅᑲᔭᖅ ᐸᕐᓇᐃᓲᑦ ᐊᒻᒪᓗ ᐱᓕᕆᓲᑦ, ᑕᐃᑲᓃᑐᐃᓐᓇᖃᑦᑕᖅᑐᖓ ᐱᓕᕆᑦᑎᐊᕐᒪᖔᑕ ᖃᐅᔨᓴᖅᖢᒋᑦ.”