ᑭᕙᓪᓕᐅᑉ ᐃᓗᐊᓂᑦ: ᐃᑦᓴᕐᓂᑕᓕᕆᓂᒃᑯᑦ ᓄᓇᙳᐊᓕᕆᓂᖅ

188

ᐃᒡᓗᓕᒑᕐᔪᖕᒥ Hᐊᒻᓚᒃᑯᑦ ᐱᓕᕆᕙᓪᓕᐊᔪᑦ ᑎᑎᕋᖅᐸᓪᓕᐊᓂᕐᒧᑦ ᐃᑦᓴᕐᓂᑕᖃᕐᕖᑦ ᒥᒃᓵᓄᑦ ᓄᓇᖓᓂ ᐊᑐᖅᖢᑎᒃ ᓄᓇᙳᐊᓕᕆᔾᔪᑎᓂᒃ.
ᐱᓕᕆᖃᑎᖃᖅᖢᑎᒃ ᓇᖕᒥᓂᕆᔭᐅᔪᒥᒃ ᕕᓂᐲᒃᒥ, ᐃᓕᑕᕆᔭᐅᔾᔪᑎᓕᒃ ᐃᑦᓴᕐᓂᑕᓕᕆᓂᕐᒧᑦ ᓄᓇᓕᖕᒧᙵᐅᓂᐊᖅᑐᖅ ᐊᐳᑎᖃᕈᓐᓃᖅᐸᑦ – ᐃᒻᒪᖄ ᔫᓐᒥ ᐅᕝᕙᓘᓐᓃᑦ ᔪᓚᐃᒥ – ᐃᑲᔪᕆᐊᖅᑐᕐᓗᓂ ᓄᓇᙳᐊᓕᕆᓂᒃᑯᑦ ᖃᓄᖅᑑᕈᑕᐅᔪᒪᔪᒥᒃ, ᑕᐃᒪᓐᓇ ᐅᖃᖅᖢᓂ ᐱᕙᓪᓕᐊᔪᓕᕆᔨ ᑕᐃᕕᑎ ᖃᑎᒑᑦᓯᐊᖅ. ᑕᒪᓐᓇ ᑐᕌᒐᕆᔭᐅᔪᖅ ᐸᐸᑐᕈᒪᓂᖅ ᐃᑦᓴᕐᓂᑕᓕᕆᓂᒃᑯᑦ ᐱᒻᒪᕆᐅᑎᑕᐅᔪᓂᒃ ᓯᕗᓂᒃᓴᒥ ᐱᕙᓪᓕᐊᑎᑦᑎᓂᕐᒧᑦ ᐸᕐᓇᐃᓕᖅᐸᑕ. ᐱᔫᒥᒋᔭᐅᖕᒥᔪᖅ ᐃᒡᓗᓕᒑᕐᔪᖕᒥ ᐃᑦᓴᕐᓂᑕᓕᕆᓂᒃᑯᑦ ᐃᓕᑕᕆᔭᐅᖁᑉᓗᒍ ᐋᓐᓂᐊᕐᕕᕕᓂᖅ, ᓴᓇᔭᐅᓚᐅᖅᓯᒪᔪᖅ 1930-ᖏᓐᓂᒃ. “ᓴᓇᔭᐅᑦᑎᐊᖅᑐᕕᓂᒻᒪᕆᐊᓗᒃ,” ᑕᐃᒪᓐᓇ ᐅᖃᖅᖢᓂ ᖃᑎᒑᑦᓯᐊᖅ.

ᑮᓇᐅᔭᓕᐅᕐᓂᒃᑯᑦ ᐃᖃᓗᒐᓱᐊᖅᑎᑦᑎᓂᖅ ᐃᒻᒪᖄ
ᐊᕐᕕᐊᓂ
ᐊᕐᕕᐊᓂ ᐊᖑᓇᓱᒃᑎᒃᑯᑦ ᑲᑐᔾᔨᖃᑎᒌᒃᑯᖏᑦᑕ ᑲᑎᒪᔨᖏᑦ ᖃᐅᔨᓴᐃᔪᑦ ᐊᑑᑎᖃᕋᔭᕐᒪᖔᑦ ᐃᖃᓗᖕᓂᐊᕐᓂᒃᑯᑦ ᑮᓇᐅᔭᓕᐅᕈᑕᐅᓇᔭᖅᑐᖅ, ᐃᒻᒪᖄ ᑕᕆᐅᕐᒥᐅᑕᓄᑦ, ᑕᐃᒪᓐᓇ ᐅᖃᖅᖢᓂ ᐊᓐᑐᕆᔭ ᐃᓴᓗᒃ, ᐊᖑᓇᓱᒃᑎᒃᑯᑦ ᑲᑐᔾᔨᖃᑎᒌᖏᑦᑕ ᐊᖓᔪᖅᑳᖓ.
“ᒫᓐᓇ ᐱᓕᕆᐊᕆᓇᓱᒃᑕᖅᐳᑦ ᐊᒻᒪᓗ ᖃᐅᔨᓇᓱᒃᖢᑕ ᐊᖏᖅᑕᐅᓂᐊᕐᒪᖔᑦ,” ᑕᐃᒪᓐᓇ ᐃᓴᓗᒃ ᐅᖃᖅᖢᓂ, ᐅᖃᖅᖢᓂᓗ ᐊᒥᓱᒡᒎᖅ ᖃᓄᐃᓕᐅᕈᑎᒃᓴᑦ ᑲᒪᒋᔭᐅᔭᕆᐊᓖᑦ ᓱᓕ.
ᐅᖃᖅᖢᓂᓗ ᑐᓴᖃᑦᑕᖅᓯᒪᔪᕉᖅ ᐃᓐᓇᑐᖃᕐᓂᒃ ᐅᖃᖃᑦᑕᖅᓯᒪᔪᓂᒃ ᐊᕐᕕᐊᓂ ᐃᖃᓗᖃᑦᑕᖅᓯᒪᓂᖏᓐᓄᑦ ᐊᒥᓱᓂᒃ ᑕᐃᑉᓱᒪᓂᑐᖃᖅ.” ᑲᑎᒪᔩᑦ ᑲᑎᒪᔪᒫᕐᒥᔪᑦ ᕕᕗᐊᕆ 12-ᒥ.

ᐱᒋᐊᖅᑎᑦᑎᓂᖅ ᐱᓕᕆᕙᓪᓕᐊᓕᖁᑉᓗᒋᑦ
ᓴᓪᓕᓂ
ᐊᑕᐅᓯᕐᒥᒃ ᐱᓇᓱᐊᕈᓯᕐᒥᒃ ᑭᖑᕙᖅᓯᒪᖅᑳᖅᖢᑎᒃ, ᐊᑎᓕᐅᕐᓂᖅ ᐃᑲᔫᑕᐅᔪᒃᑯᑦ ᒪᒃᑯᒃᑐᓄᑦ ᐱᒋᖅᑎᑦᑎᓂᖅ ᐱᓕᕆᕙᓪᓕᐊᖁᑉᓗᒋᑦ ᐅᑭᐅᓕᖕᓄᑦ ᖁᓕᓂᒃ 12-ᓄᑦ ᐱᒋᐊᓚᐅᖅᑐᖅ ᐱᓇᓱᐊᕈᓯᐅᓚᐅᖅᑐᒥ.
ᑲᔪᓯᓂᖃᑦᑎᐊᖅᐸᑦ ᐸᕐᓇᐅᑕᐅᓯᒪᔪᖅ ᒪᓕᒃᖢᒍ, ᐱᙳᐊᕐᓃᑦ ᐱᙳᐊᕐᕕᖕᒥ ᐱᒋᐊᕐᓂᐊᖅᑐᑦ ᑕᒡᕙᓂ ᐱᓇᓱᐊᕈᓯᕐᒥ.
“ᖃᓄᐃᓕᐅᖅᑎᑕᐅᕈᓘᔭᕐᓂᐊᖅᑐᑦ ᖁᓕᓂᒃ ᐱᓱᐊᕈᓯᕐᓂᒃ ᖃᐃᔪᓂᒃ,” ᑕᐃᒪᓐᓇ ᐅᖃᖅᖢᓂ ᐸᐱ ᐊᑭᕈᓕᒃ, ᒥᐊᓂᖅᓯᔨᐅᔪᖅ ᐱᒋᐊᖅᑎᑦᑎᓂᕐᒧᑦ ᐱᓕᕆᕙᓪᓕᐊᓕᖁᑉᓗᒋᑦ ᐃᑲᔫᑎᒃᑯᑦ, ᐃᓕᓐᓂᐊᓚᐅᖅᓯᒪᔪᖅ ᐱᙳᐊᖅᑐᓕᕆᓂᒃᑯᑦ ᒥᕐᖑᐃᖅᓯᕐᕕᓕᕆᔨᒃᑯᓪᓗ ᓄᓇᕗᒥ ᒫᓐᓇᓵᖑᓯᒪᔪᖅ.
ᐊᑭᕈᓕᒃ, ᒥᐊᓂᖅᓯᔨᐅᖃᑦᑕᖅᓯᒪᖕᒥᔪᖅ Hᐊᑭᑦᑐᓂᒃ, ᐅᖃᐅᓯᖃᖅᖢᓂ ᐱᙳᐊᕐᓂᕐᒥᒃ ᐋᒻᒪᑭᑕᐅᔪᑎᑑᖅᑐᒥᒃ ᐃᒪᓐᓇ ᑕᐃᔭᐅᔪᖅ “hotdog” ᐱᙳᐊᖅᑏᑦ ᐋᒻᒪᒃᑕᐅᔪᑦ ᐸᓪᓗᕆᐊᖃᖅᖢᑎᒃ ᐊᒻᒪᓗ ᓂᑯᕕᒍᓐᓇᖅᓯᑕᐃᓐᓇᖃᑦᑕᖅᖢᑎᒃ ᐃᒪᓐᓇ ᐅᖃᕈᑎᒃ “I need buns.” ᒪᕐᕉᒡᓗ ᐱᙳᐊᖃᑕᐅᔫᒃ ᓴᓂᐊᓄᑦ ᐸᓪᓗᕆᐊᖃᓕᕐᓗᑎᒃ ᐱᙳᐊᖃᑕᐅᒃᑲᓐᓂᕈᓐᓇᖅᓯᖁᑉᓗᒍ.

ᓇᒧᙵᐅᓐᓂᖅᐸᓪᓕ ᓇᓄᐃᑦ?
ᑎᑭᕋᕐᔪᐊᖅ
ᓯᑕᒪᑦ ᓇᓐᓂᒍᑎᒃᓴᑦ ᐊᑐᖅᑕᐅᓯᒪᓕᖅᑐᑦ, ᑭᓯᐊᓂ ᑭᖑᓪᓕᖅᐹᖅ ᑖᑉᑯᓂᙵ ᓯᑕᒪᐅᔪᓂᒃ ᐊᑐᖅᑕᐅᓚᐅᖅᑐᖅ ᓄᕕᐱᕆᒥ. ᓯᑕᒪᒃᑲᓐᓃᑦ ᐊᑐᖅᑕᐅᔭᕆᐊᖃᖅᓯᒪᔪᑦ ᓱᓕ, ᒪᓕᒃᖢᒍ ᓕᓴ ᔫᓐ ᐅᖃᐅᓯᕆᓯᒪᔭᖓ, ᐊᖓᔪᖅᑳᖅ ᐃᓴᑎᒃ ᐊᖑᓇᓱᒃᑎᒃᑯᑦ ᑲᑐᔾᔨᖃᑎᒌᒃᑯᖏᓐᓄᑦ.
ᓲᕐᓗ ᓇᓄᐃᑦ ᑎᑭᕋᕐᔪᐊᕐᒦᑦᑕᐃᓕᓯᒪᔫᔭᕐᒪᑕ ᑕᖅᑭᓂᒃ ᖄᖏᖅᓯᒪᔪᓂᒃ, ᑕᑯᑦᑕᐃᓕᓯᒪᔫᔭᖅᑐᑦ ᐊᖑᓇᓱᒃᑎᓂᒃ.
“ᐊᑯᓂᐅᓕᖅᑐᖅ … ᓇᓐᓄᒍᑎᒃᓴᖃᓕᕋᑉᑕ, ᓇᓄᐃᑦ ᓴᖅᑭᑦᑐᒪᔪᓐᓃᖅᑐᑦ,” ᑕᐃᒪᓐᓇ ᐅᖃᖅᖢᓂ ᔫᓐᔅ, ᐅᖃᖅᖢᓂᓗ ᐃᓱᓕᕝᕕᒃᑕᖃᙱᒻᒪᑕ ᓇᓐᓄᒍᑏᑦ.
ᐅᖃᖅᖢᓂᓗ ᐊᖑᓇᓱᒃᑎᒃᑯᒡᒎᖅ ᑲᑎᒪᔨᖏᑦ ᓴᓇᑎᑦᑎᓕᓚᐅᖅᑐᑦ ᓇᓄᕐᓂᒃ ᖃᐅᔨᓴᖅᑎᓂᒃ ᐅᑭᐊᒃᓵᖑᓚᐅᖅᑐᖅ ᓄᓇᖅᑲᑎᒌᑦ ᐊᑦᑕᓇᖅᑐᒦᖁᓇᒋᑦ ᑕᐃᑉᓱᒪᓂ ᓇᓄᖃᕋᔪᓕᓚᐅᖅᑎᓪᓗᒍ.

ᑭᖑᓪᓕᖅᐹᖅ ᐱᓇᓱᐊᕈᓯᖅ ᓴᓇᒋᐅᖅᓴᓂᕐᒧᑦ ᐃᓕᓐᓂᐊᕈᑎᒃᑯᑦ
ᐊᕐᕕᐊᑦ
ᐃᓕᓐᓂᐊᖃᑕᐅᔪᑦ ᓴᓇᒋᐅᖅᓴᓂᕐᒧᑦ, ᐃᓕᓐᓂᐊᕈᑕᐅᑎᑕᐅᔪᖅ ᐊᕐᕕᐊᑦ Hᐊᒻᓚᒃᑯᖏᓐᓄᑦ ᐊᒻᒪᓗ ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᓐᓄᑦ ᑭᖑᓪᓕᖅᐹᖅᓱᓕᖅᑐᑦ ᐱᓇᓱᐊᕈᓯᒃᑯᑦ. ᑕᒡᕘᓇ ᐃᓕᓐᓂᐊᕈᑎᒃᑯᑦ 180 ᐆᒃᑐᓚᐅᖅᑐᑦ 75-ᖑᑉᓗᑎᒃ ᐃᓂᒋᔭᐅᔪᓐᓇᖅᑐᑦ ᑕᓪᓕᒪᑦ ᐱᓇᓱᐊᕈᓰᑦ ᐃᓗᐊᓂ, ᑕᐃᒪᓐᓇ ᐅᖃᖅᖢᓂ Hᐊᒻᓚᒃᑯᑦ ᐱᕙᓪᓕᐊᔪᓕᕆᔨᖓ ᒥᓗᑎ ᐊᑉᓴᐅᕐᓯᑭ.
“ᑕᒪᓐᓇ ᐃᓕᓐᓂᐊᕈᑕᐅᔪᒪᒐᔪᒃᑐᖅ,” ᑕᐃᒪᓐᓇ ᐅᖃᖅᖢᓂ, ᐅᖃᖅᖢᓂᓗ ᑕᓪᓕᒪᒋᐅᓕᕐᒪᑦ ᑕᒪᓐᓇ ᐃᓕᓐᓂᐊᕈᒪᔪᓂᒃ ᑐᓴᕈᒪᖃᑦᑕᖅᑎᓪᓗᒋᑦ ᑕᐃᒪᙵᓂ 2013-ᒥ ᐱᒋᐊᖅᖢᒍ.
ᐃᓕᓐᓂᐊᕈᑕᐅᖃᑦᑕᖅᑐᑦ ᓲᕐᓗ ᐅᔾᔨᕐᑐᕆᐊᖃᖃᑦᑕᕐᓂᖅ, ᕿᒃᓵᖕᓂᖅ ᐊᒻᒪᓗ ᐊᒃᓱᕈᕐᓇᖅᑐᒃᑰᖅᖢᓂ ᖃᓄᐃᓕᐅᕈᑏᑦ, ᖃᓄᕐᓗ ᐊᒃᓱᕈᕐᓇᖅᑐᒃᑰᖅᖢᓂ ᖃᓄᐃᓕᐅᖃᑦᑕᕆᐊᖃᕐᓂᕐᒧᑦ, ᖃᓄᕐᓗ ᖁᕕᐊᓱᙱᖦᖢᓂ ᐋᖅᑭᒋᐊᖅᓯᔪᓐᓇᕐᓂᕐᒧᑦ, ᐊᑦᑕᓇᖅᑐᓕᕆᓂᒃᑯᑦ, ᖃᓄᕐᓗ ᑐᓴᐅᒪᖃᑦᑕᐅᑎᓂᒃᑯᑦ ᐱᐅᓯᕚᓪᓕᖅᑎᑦᑎᓂᖅᓴᐅᓇᔭᕐᒪᖔᑕ ᐊᒻᒪᓗ ᐸᕐᓇᒃᖢᒋᑦ ᖃᓄᖅ ᓴᓇᔭᒃᓴᒃᑯᑦ ᐊᐱᖅᓱᖅᑕᐅᓕᖅᐸᑕ ᑭᐅᖃᑦᑕᕋᓱᒐᔭᕐᒪᖔᑕ. ᐃᓕᓐᓂᐊᖅᑐᑦ ᐱᐊᓂᒃᓯᓯᒪᓕᖅᐸᑕ ᓴᓇᒋᐅᖅᓴᓂᕐᒧᑦ ᐃᓕᓐᓂᐊᕈᑎᒥᒃ ᐃᓕᑕᕆᔭᐅᔾᔪᑎᑖᕐᓗᑎᒃ, ᐊᑎᓕᐅᖅᑕᐅᖃᑕᐅᓇᔭᖅᑐᑦ ᐅᔭᕋᖕᓂᐊᕐᕕᖕᒧᑦ ᐅᐸᒍᑎᔪᓐᓇᖅᓯᓂᕐᒧᑦ ᐊᐳᖅᑎᓐᓈᖅᑐᒥ ᐅᔭᕋᖕᓂᐊᕐᕕᖕᒧᑦ, ᑕᐃᒪᓐᓇ ᐅᖃᖅᖢᓂ ᐊᑉᓴᐅᕐᓯᑭ.
ᐃᓕᑕᐅᔭᕆᐊᓖᑦ ᑕᐃᒪᐅᖕᒪᑕ ᓴᓇᔨᐅᓂᐊᕐᓗᓂ ᐅᔭᕋᖕᓂᐊᕐᕕᖕᒥ.
ᐅᖃᖅᖢᓂᓗ ᐃᓕᓐᓂᐊᕐᕕᒡᔪᐊᕐᒥᒎᖅ ᐃᓕᓐᓂᐊᖅᑐᑦ ᒪᒃᑯᒃᑐᑦ ᐃᓚᐅᖃᑕᐅᑎᑕᐅᖃᑦᑕᙱᑦᑐᑦ. “ᐃᓕᓐᓂᐊᕐᕕᒡᔪᐊᕐᒥ ᐃᓕᓐᓂᐊᖅᑐᑦ ᐃᓕᓐᓂᐊᕈᓐᓃᖅᑎᖃᑦᑕᙱᓐᓇᑉᑎᒍᑦ,” ᑕᐃᒪᓐᓇ ᐅᖃᖅᖢᓂ. “ᐃᓕᓐᓂᐊᖅᑎᓐᓇᓱᖃᑦᑕᖅᑕᖅᐳᑦ ᐃᓕᓐᓂᐊᕌᓂᒃᓯᒪᔪᑦ ᐃᓕᓐᓂᐊᕐᕕᒡᔪᐊᕐᒥ ᐊᒻᒪᓗ ᓴᓇᔭᒃᓴᖅᓯᐅᖅᑐᑦ. 12
“ᐅᔾᔨᖅᑐᑦᑎᐊᖃᑦᑕᖅᑐᒍᑦ ᓂᕈᐊᖅᖠᓂᕌᖓᑉᑕ ᑕᒡᕘᓇ.”