ᑎᑭᕋᕐᔪᐊᕐᒥ ᓯᕗᓪᓕᖅᐸᐅᖃᑕᐅᔪᖅ ᓇᑉᐸᖅᑎᖅᑕᐅᓚᐅᖅᓯᒪᔪᓂᒃ ᓄᖑᑎᖅᑕᐅᓚᐅᖅᑐᖅ ᐱᓇᓱᐊᕈᓯᐅᓚᐅᖅᑐᒥ ᐊᔪᕿᖅᑐᐃᔨᒃᑯᑦ ᑐᒃᓯᐊᕐᕕᕕᓂᖓ. ᖁᓕᖅᑲᐃ ᐅᑭᐅᖅ ᐱᐊᓂᒃᓯᒪᓕᖅᑐᑦ ᑭᖑᓪᓕᖅᐹᒥ ᐊᑐᖅᑕᐅᓚᐅᖅᑳᖅᑎᓪᓗᒍ ᐋᖅᑭᒃᓱᖅᑕᐅᔪᓐᓇᐃᓪᓕᓚᐅᕐᒪᑦ.

ᓯᕗᓪᓕᖅᐹᖅ ᐊᔪᕿᖅᑐᐃᔨᒃᑯᑦ ᑐᒃᓯᐊᕐᕕᖓ ᑎᑭᕋᕐᔪᐊᕐᒥ ᓄᖑᑎᖅᑕᐅᓚᐅᖅᑐᖅ ᐱᓇᓱᐊᕈᓯᐅᓚᐅᖅᑐᒥ ᐋᖅᑭᒃᓱᖅᑕᐅᔪᓐᓇᐃᓪᓕᖕᒪᑦ. ᑯᑎ ᐸᓐᑐᕐ/ᐅᑭᐅᑦᑕᖅᑐᒥ ᑐᓴᒐᒃᓴᓕᕆᔨᒃᑯᓐᓂᙶᖅᑐᖅ ᐊᔾᔨ

“ᑭᖑᓪᓕᖅᐹᖑᖃᑕᐅᔪᖅ ᓴᓇᔭᐅᖅᑳᓚᐅᖅᓯᒪᔪᓂᒃ ᓄᓇᓕᖕᒥ,” ᑕᐃᒪᓐᓇ ᐅᖃᖅᖢᓂ ᓱᓯ ᕿᑎᖅᖠᖅ, ᐊᔪᕿᖅᑐᐃᔨᒃᑯᓐᓂᒃ ᐅᖃᓕᒫᖅᑎᐅᖃᑕᐅᔪᖅ.

ᐊᔪᕿᖅᑐᐃᔨᒃᑯᑦ ᑐᒃᓯᐊᕐᕕᖓ ᐃᓂᖃᖅᑳᓚᐅᖅᑐᖅ ᑕᕙᓂ 1950-ᖏᓐᓂᒃ, ᑭᓯᐊᓂ ᑎᑭᕋᕐᔪᐊᖅ ᓄᓇᑖᖑᕙᓪᓕᐊᓕᕐᒪᑦ, ᐊᕕᒃᑐᖅᑕᐅᑉᓗᓂ ᓅᑕᐅᓚᐅᖅᓯᒪᔪᖅ ᕿᒧᒃᓯᒃᑯᑦ ᓄᓇᓕᖕᒧᑦ.

ᐊᔪᕿᖅᑐᐃᔨᐅᓚᐅᖅᑐᖅ ᐊᕐᒪ ᑕᒍᕐᓈᖅ, ᐅᖃᓕᒫᖅᑎᐅᓚᐅᖅᑐᖅ ᒧᓯᓯ ᐊᓕᔭᖅ, ᐊᒻᒪᓗ ᐊᓯᖏᑦ ᓄᓇᖅᑲᑎᒌᑦ ᐃᑲᔪᓚᐅᖅᓯᒪᔪᑦ ᓇᑉᐸᖅᑎᕆᑉᓗᑎᒃ ᑐᒃᓯᐊᕐᕕᖕᒥᒃ 1960 ᐱᒋᐊᓕᓵᖅᑎᓪᓗᒍ.

Hᐊᒻᓚᒃᑯᑦ ᑲᑎᒪᔨᖓ ᓗᐃᔅ ᕗᐃᓯ, ᓄᓇᑖᖅᑳᖃᑕᐅᓚᐅᖅᓯᒪᔪᓂᒃ ᐃᓚᐅᖃᑕᐅᔪᖅ, ᑯᕝᕕᕆᔭᐅᓚᐅᖅᓯᒪᔪᖅ ᑕᕙᓂ ᑐᒃᓯᐊᕐᕕᖕᒥ ᓅᑕᐅᖅᑳᕋᓂ.

ᐃᖅᑲᐅᒪᔪᖅ ᑐᒃᓯᐊᕐᕕᒃ ᓅᑕᐅᓂᖅ ᐊᔪᓕᓚᐅᖅᓯᒪᖕᒪᑦ ᓴᑭᖓ ᔮᓐ ᑕᐅᑐᙱ, ᐅᓂᐊᖃᑕᐅᑉᓗᓂ. “ᑕᐅᕙᓃᓚᐅᖅᓯᒪᔪᖓ ᓅᑕᐅᓂᖅ ᐊᔪᓕᖅᑎᓪᓗᒍ ᑕᕙᓂ,” ᑕᐃᒪᓐᓇ ᐅᖃᖅᖢᓂ. “ᑕᐃᑉᓱᒪᓂ ᐱᓕᕆᒋᐊᕌᖓᑉᑕ ᐱᐊᓂᒃᓯᔭᕆᐊᖃᖃᑦᑕᓚᐅᕋᑉᑕ. ᐊᔪᓕᖅᑐᖃᖅᑑᔭᖃᑦᑕᓚᐅᙱᑦᑐᖅ. ᓴᙱᔪᐊᓘᓚᐅᖅᑰᖅᑐᑦ. ᐅᑉᓗᒥᐅᓕᖅᑐᕐᓕ ᓱᓇᒥᒃ ᓅᑦᑎᔪᓐᓇᐃᓪᓕᒍᑉᑕ ᕿᒪᒃᑕᐅᑐᐃᓐᓇᖃᑦᑕᓕᖅᑐᖅᑲᐃ.”

ᐊᔪᕿᖅᑐᐃᔨᒃᑯᑦ ᐊᖓᔪᖅᑳᖃᕐᕕᖓ ᐃᓱᒪᓕᐅᓚᐅᖅᑐᖅ ᓄᖑᑎᖅᑕᐅᖁᑉᓗᒍ ᑐᒃᓯᐊᕐᓂᒃ ᖃᑉᓯᑲᓪᓚᐅᓕᖅᑐᑦ ᐅᑭᐅᑦ. ᑭᓯᐊᓂᓕ, ᐱᓇᓱᐊᕈᓯᐅᓚᐅᖅᑐᖅ Hᐊᒻᓚᒃᑯᑦ ᐃᓱᒪᓕᐅᑕᐃᓐᓇᓚᐅᖅᑐᑦ ᓄᖑᑎᖅᑕᐅᖁᑉᓗᒍ.

“ᓄᖑᑎᕋᓱᓕᖅᑲᒻᒥᙱᑕᖅᐳᑦ ᖃᑉᓯᓂᒃᑭᐊᖅ ᐅᑭᐅᓂᒃ,” ᑕᐃᒪᓐᓇ ᐅᖃᖅᖢᓂ ᕗᐃᓯ. “ᑕᑯᔪᒥᓇᕈᓐᓃᕐᓂᐊᓕᕐᒪᑦ ᓇᑉᐸᖓᑐᐃᓐᓇᕋᓗᐊᖅᐸᑦ.”

ᐊᔪᕿᖅᑐᐃᔨᕐᔪᐊᖅ ᓄᓇᕗᒧᑦ ᓄᓇᓕᖕᒧᙵᐅᓵᓚᐅᕐᒪᑦ ᓴᐃᒻᒪᖅᑎᑦᑎᔭᖅᑐᖅᖢᓂ ᑐᒃᓯᐊᕐᕕᕕᓂᕐᒥᒃ ᒪᑐᔭᐅᓂᐊᓕᕐᒪᑦ, ᑕᐃᒪᓐᓇ ᐅᖃᖅᖢᓂ ᕿᑎᖅᖠᖅ.

ᓄᕙᒡᔪᐊᕐᓂᖅ−19 ᐱᔾᔪᑎᒋᑉᓗᒍ, ᐊᔪᕿᖅᑐᐃᔨᕐᔪᐊᖅ ᑎᑭᑦᑐᓐᓇᐃᓪᓕᓚᐅᕐᒪᑦ ᑎᑭᕋᕐᔪᐊᕐᒧᑦ ᓄᖑᑎᖅᑕᐅᔪᓐᓇᖁᑉᓗᒍ. “ᐊᑯᓂ ᑕᐅᕙᓃᑐᐃᓐᓇᓕᓚᐅᖅᑐᖅ. ᐅᑕᖅᑭᑐᐃᓐᓇᓕᓚᐅᖅᑐᒍᑦ ᓄᖑᑎᖅᑕᐅᓂᐊᕐᓂᖓᓄᑦ,” ᑕᐃᒪᓐᓇ ᐅᖃᖅᖢᓂ ᕿᑎᖅᖠᖅ.

“ᖃᓄᖅᑑᖅᑕᐅᒃᑲᓐᓂᕈᓐᓇᓚᐅᙱᒻᒪᑦ. ᐸᐸᑐᑐᐃᓐᓇᕈᓐᓇᓚᐅᙱᓐᓇᑉᑎᒍᑦ. ᓄᓇᓕᖕᒥ ᐅᓗᕆᐊᓇᕐᒪᑦ.”

ᒪᒃᑯᒃᑑᑉᓗᖓ ᓄᓇᓕᖕᒥ ᐊᕐᓇᐅᑉᓗᖓ ᐱᕈᖅᓴᖅᖢᖓ, ᕿᑎᖅᖠᖅ ᐃᓚᐅᖃᑕᐅᓕᓚᐅᖅᓯᒪᔪᖅ ᐊᔪᕿᖅᑐᐃᔨᒃᑯᓐᓂᒃ, ᐱᓗᐊᖅᑐᒥᖅᑲᐃ ᐅᐃᖓ ᐊᔪᕿᖅᑐᐃᔨᓅᕐᒪᑦ. ᕿᑎᖅᖠᖅ ᐅᖃᖅᖢᓂ ᖁᕕᐊᓱᒃᖢᓂᒎᖅ ᐊᒥᓱᐃᖅᑕᖅᖢᓂ ᐃᖅᑲᐅᒪᔪᖅ ᑐᒃᓯᐊᕐᕕᖕᒦᖃᑦᑕᓚᐅᖅᑎᓪᓗᒋᑦ.

“ᐊᖓᔪᖅᑳᒃᑲ ᑐᒃᓯᐊᕆᐊᖅᑎᐅᓚᐅᕐᒪᑎᒃ ᐊᒻᒪᓗ ᑐᒃᓯᐊᕆᐊᖏᓐᓇᖃᑦᑕᖅᖢᑎᒃ ᑐᒃᓯᐊᓕᕌᖓᑕ. ᐃᖅᑲᐅᒪᔪᖓ ᐊᒥᓱᓂᒃ ᑕᐃᑲᓂ ᑲᑎᑎᑕᐅᓯᒪᔪᓂᒃ ᐊᒻᒪᓗ ᐹᑉᑎᑕᐅᓯᒪᔪᓂᒃ ᓄᑕᕋᓛᓂᒃ,” ᑕᐃᒪᓐᓇ ᐅᖃᖅᖢᓂ. “ᐱᒻᒪᕆᐊᓘᓚᐅᖅᑐᖅ ᐅᕙᒻᓄᑦ ᑐᒃᓯᐊᕐᕕᕕᓂᖅ.”

ᓄᓇᓕᖕᒦᓚᐅᙱᑦᑐᖅ ᓄᖑᑎᖅᑕᐅᑎᓪᓗᒍ ᑭᓯᐊᓂ ᖃᕆᑕᐅᔭᒃᑯᑦ ᑕᐅᑐᓚᐅᖅᑐᖅ ᑲᖏᖅᖠᓂᕐᒦᖦᖢᓂ.

“ᑕᐅᑐᓚᐅᖅᑐᖓ ᐊᒻᒪᓗ ᐃᒃᐱᖕᓇᖅᑐᒻᒪᕆᐊᓘᓚᐅᖅᑐᖅ. ᑕᐅᑐᕐᕈᓕᓚᐅᖅᑐᖓ ᑕᐃᑲᓃᖃᑦᑕᖅᓯᒪᔪᓂᒃ ᐊᒻᒪᓗ ᖃᓄᐃᓕᐅᖃᑦᑕᓚᐅᖅᑐᓂᒃ ᑕᐃᑲᓂ. ᕿᒃᓵᓚᐅᙱᑦᑐᖓ ᐃᖅᑲᐅᒪᓇᑐᐃᓐᓇᓚᐅᖅᑐᖅ.”

ᕗᐃᓯ ᐅᖃᖅᖢᓂ ᐃᖃᓪᓕᐊᖅᓯᒪᓚᐅᖅᑐᕈᖅ ᐃᒡᓗᕋᓛᒥᓂᒃ ᑐᒃᓯᐊᕐᕕᒃ ᓄᖑᑎᖅᑕᐅᓕᕐᒪᑦ.

“ᐊᖏᕐᕋᕋᒪ ᐃᖃᓗᒐᓱᖅᑳᖅᖢᖓ ᑕᐅᓄᙵᐅᓚᐅᖅᑐᖓ ᑭᓴᕐᕕᖕᒧᑦ. ᐅᔾᔨᕆᓚᐅᙱᑕᕋᓘᓐᓃᑦ ᑕᐃᑲᓃᑦᑐᓐᓃᕐᓂᕐᒪᑦ. ᐊᒻᒪᓗ ᐅᑎᕋᒪ ᐅᔾᔨᕈᓱᓕᖅᖢᖓ ᑕᐃᑲᓃᑦᑐᖃᕈᓐᓃᕐᓂᖓᓄᑦ.”

Advertisement