ᐱᐅᔪᒻᒪᕆᐊᓗᒃ ᑎᑎᕋᐅᔭᖅᓯᒪᔪᖅ ᐃᖃᓗᙳᐊᑦ ᓴᖅᑭᔮᓕᖅᑐᖅ ᑲᓕᖕᕗᑦ, ᐊᓐᑎᐅᕆᔫᑉ ᐊᑉᖁᑎᖓᓂᒃ, ᐃᓄᐃᑦ ᑎᑎᕋᐅᔭᕈᓯᖓᓂᙶᖃᑕᐅᓯᒪᔪᖅ ᑕᖅᓴᕆᔭᒃᑯᑦ.

ᕋᑉ ᓴᐃᓕ ᓂᑯᕕᖓᔪᖅ ᑎᑎᕋᐅᔭᓚᐅᖅᑕᖓᑕ ᓴᓂᐊᓂᒃ ᑲᓕᖕᕗᑦ, ᐊᓐᑎᐅᕆᔪᒥ, ᑎᑎᕋᐅᔭᕐᓂᕐᒧᑦ ᐊᑐᖅᑕᐅᕙᒃᑐᒥᒃ ᐊᑐᖅᖢᓂ ᐃᓕᓚᐅᖅᑕᒥᓂᒃ ᐊᓐᑐᕈ ᖃᐱᒃᒥᒃ ᑎᑎᕋᐅᔭᕐᓂᕐᒥᒃ ᐃᓕᓐᓂᐊᖅᑎᓪᓗᒋᑦ ᑭᕙᓪᓕᕐᒥ. ᐊᔾᔨ ᕋᑉ ᓴᐃᓕᒥᙶᖅᑐᖅ

ᕋᑉ ᓴᐃᓕ ᑎᑎᕋᐅᔭᖅᑎᐅᔪᖅ ᑎᑎᕋᐅᔭᓚᐅᖅᑐᖅ 20-foot-ᓂᒃ ᑕᑭᓂᓕᖕᒥᒃ 6.5-foot-ᓂᒃ ᖁᑦᑎᖕᓂᓕᖕᒥᒃ ᑎᑎᕋᐅᔭᓚᐅᖅᑕᖓ ᐊᓐᑐᕈ ᖃᐱᖕᒥᒃ ᐃᓕᓐᓂᕆᓚᐅᖅᑕᖓᓂᒃ ᐊᑐᖅᖢᓂ ᐊᐅᔭᒃᑯᑦ ᑎᑎᕋᐅᔭᕐᓂᕐᒥᒃ ᐃᓕᓐᓂᐊᖅᑎᑦᑎᑎᓪᓗᒋᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ.

ᖃᐱᒃ ᑎᑎᕋᐅᔭᕐᓂᕐᒥᒃ ᐃᓕᓐᓂᐊᖅᑎᑦᑎᓚᐅᖅᑐᖅ, ᓴᐃᓕ ᐊᒻᒪᓗ ᑎᑎᕋᐅᔭᖅᑎᐅᖃᑎᖓ ᐸᐅᓕ ᒪᓐᑐᕋᑉ ᐃᓚᐅᖃᑕᐅᕝᕕᒋᖃᑦᑕᖅᓯᒪᔭᖓᓄᑦ ᑕᐃᒪᙵᓂ 2006-ᒥ ᐱᒋᐊᖅᖢᒍ.

ᓴᐃᓕ ᐅᖃᖅᖢᓂ ᑎᑎᕋᐅᔭᖅᑕᒥᓂᒃ ᐱᐊᓂᒃᓯᓚᐅᕐᒪᑦ, ᐊᓕᐊᓇᐃᒋᑦᑎᐊᖅᖢᓂᐅᒃ ᑎᑎᕋᐅᔭᕋᒥᐅᒃ, ᐃᒻᒪᖄ ᐱᖓᓱᑦ ᐱᓇᓱᐊᕈᓯᐅᓕᖅᑐᑦ ᐃᑲᔪᖅᑎᖃᖅᖢᓂ 16-ᓂᒃ ᐅᑭᐅᓕᖕᒥᒃ ᐸᓂᖕᒥᓂᒃ ᓇᑕᓕᔭᒥᒃ.

ᐅᖃᖅᖢᓂ ᐸᓂᓂᓗ ᓯᑕᒪᓂᒃ ᐃᖃᓗᙳᐊᕐᓂᒃ ᑎᑎᕋᐅᔭᕈᓐᓇᖃᑦᑕᓚᐅᕐᒪᑎᒃ ᐃᑲᕐᕋᑕᒫᑦ ᐊᒻᒪᓗ ᐱᐊᓂᒃᓯᑉᓗᑎᒃ ᐃᒻᒪᖄ ᑕᓪᓕᒪᑦ ᐃᑲᕐᕋᑦ ᑐᖔᓂ.

“ᖃᐅᔨᒋᐊᕐᕕᐅᓚᐅᕋᒪ ᑲᓕᖕᕗᑦ ᓄᓇᓕᐸᐅᔭᒃᑯᖏᓐᓄᑦ ᖃᐅᔨᔪᒪᑉᓗᑎᒃ ᑎᑎᕋᐅᔭᕈᓐᓇᕐᒪᖔᕐᒪ 20-ᓂᒃ foot-ᓂᒃ ᑕᑭᓂᓕᖕᒥᒃ ᖁᑦᑎᖕᓂᖃᕐᓗᓂ 6.5 foot-ᓂᒃ ᐊᕙᓗᔭᐅᖁᑉᓗᒍ ᐃᒡᓗᕐᔪᐊᓕᐅᕐᕕᐅᔪᖅ ᑎᑎᕋᐅᔭᖅᑎᒧᒡᒎᖅ ᐱᐅᓯᒋᐊᖅᑕᐅᖁᔭᐅᖕᒪᑦ,” ᑕᐃᒪᓐᓇ ᐅᖃᖅᖢᓂ ᓯᐊᓕ.

ᐃᓱᒪᒃᓴᖅᓯᐅᓕᓚᐅᖅᑐᖓ ᖃᓄᖅ ᑎᑎᕋᐅᔭᕐᓂᐊᕐᒪᖔᑉᑯ ᑐᐱᒃᓴᒃᑯᑦ ᐃᓛᒃ ᑕᐃᒪᓐᓇ ᐊᖏᑎᒋᔪᒥᒃ ᑎᑎᕋᐅᔭᓚᐅᖅᓯᒪᔪᓐᓃᕋᒪ ᐊᕙᑎᓂᒃ ᐅᑭᐅᓂᒃ.

“ᐱᓕᕆᐊᕆᔪᒪᓕᓚᐅᖅᑕᕋ ᐊᑐᕐᓗᖓ ᐃᓕᓚᐅᖅᑕᕋᓂᒃ ᐃᓄᐃᑦ ᑎᑎᕋᐅᔭᕐᓂᕐᒧᑦ ᐃᓕᓐᓂᐊᖅᑎᑕᐅᑎᓪᓗᒋᑦ ᐊᓐᑐᕈ ᖃᐱᖕᒧᑦ ᐊᒻᒪᓗ ᐃᓕᓐᓂᐊᖅᑎᑦᑎᖃᑦᑕᖅᑎᓪᓗᒍ ᑎᑎᕋᐅᔭᕈᑎᓂᒃ ᐊᑐᖅᖢᓂ, ᐊᑐᕈᓐᓇᕐᓂᐊᕋᓱᒋᓚᐅᕋᒪ ᒥᙳᑎᓂᒃ ᑎᖕᒥᑳᖅᐸᒃᑐᓂᒃ.

“ᑎᑎᕋᐅᔭᖅᑕᕋ ᐱᐊᓂᒃᑲᑉᑯ ᐅᑭᐅᖅᑕᖅᑐᒥ ᐃᓕᓐᓂᕆᔭᒃᑲᓂᙶᓪᓚᕆᓚᐅᖅᑐᑦ.”

ᓴᐃᓕ ᐅᖃᖅᖢᓂ ᐊᑐᓂ ᐃᖃᓗᐃᑦ ᑎᑎᕋᐅᔭᓚᐅᖅᑕᖏᑦ ᐊᑐᖅᖢᓂ ᖄᐱᐅᑉ ᑎᑎᕋᐅᔭᕈᓯᖓᓂᒃ ᓯᑕᒪᐅᓕᖓᔪᒃᑯᑦ ᑎᑎᕋᐅᔭᕐᕕᖃᓚᐅᖅᑐᑦ.

ᐅᖃᖅᖢᓂ ᐊᕕᒃᑐᖅᓯᒪᔪᒃᑯᑦ ᑎᑎᕋᐅᔭᓚᐅᕋᒥᒋᑦ ᑲᑎᑉᐸᓪᓕᐊᔪᓐᓇᖅᓯᖕᒪᑕ ᑲᑎᑎᑦᑐᓐᓇᖅᓯᑉᓗᓂᒋᑦ. ᑎᖕᒥᑳᕐᕕᒋᔪᓐᓇᖅᖢᓂᒋᓪᓗ ᐊᑐᓂ ᐱᐊᓂᒃᐸᓪᓕᐊᔪᓐᓇᕐᓂᐊᕐᓗᒋᑦ.

ᐅᑭᐅᖅᑕᖅᑐᒥ ᑎᑎᕋᐅᔭᕈᑎᒥᒃ ᐊᑐᖃᑦᑕᕐᒪᑕ ᐊᒻᒪᓗ ᐅᖅᓱᖃᖅᑐᓂᒃ ᒥᙴᑎᓂᒃ ᐊᒻᒪᓗ ᑎᑎᕋᐅᔭᕈᑕᐅᕙᒃᖢᑎᒃ. ᑕᐃᒪᓐᓇᑦᑕᐅᖅ ᑎᑎᕋᐅᔭᓕᓚᐅᖅᑐᖓ, ᑭᓯᐊᓂ ᑎᖕᒥᑳᖁᑎᓕᒃᑯᑦ ᒥᙴᑎᒃᑯᑦ.

“ᒪᕐᕉᖕᓂᒃ ᐅᑉᓗᕐᓂᒃ ᓇᑉᐸᖓᓂᒡᓗ ᐸᕐᓇᒋᐊᖃᓚᐅᖅᑕᒃᑲ ᓴᓇᙳᐊᕐᕕᒐᓂᒃ − ᐊᓕᓚᔪᓂᒃ ᐋᖅᑭᒃᓱᐃᑉᓗᖓ ᐊᒻᒪᓗ ᐊᕙᓗᒃᓴᖏᓐᓂᒃ ᐃᓂᒋᓂᐊᖅᑕᖏᓐᓃᑦᑎᐊᕈᓐᓇᖁᑉᓗᒋᑦ − ᐊᒻᒪᓗ ᐃᒻᒪᖄ 4.5 ᐃᑲᕐᕋᑦ ᐊᑐᓚᐅᖅᑕᒃᑲ ᒥᙳᐊᕐᓂᒃᑯᑦ ᐱᐊᓂᒃᓯᓂᒃᑯᓪᓗ ᐱᓕᕆᐊᒃᓴᒻᓂᒃ.”

ᓴᐃᓕ ᐅᖃᖅᖢᓂ ᐊᐅᔭᒃᑯᑦ ᑎᑎᕋᐅᔭᕐᓂᕐᒧᑦ ᐃᓕᓐᓂᐊᕈᑎ ᓴᖅᑭᓚᐅᙱᒻᒪᑦ 2019-ᒥ ᓴᓇᔨᒋᔭᐅᔪᑦ ᐊᓯᔾᔨᖅᑎᓪᓗᒋᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ, ᑲᔪᓯᔪᓐᓇᐃᓪᓕᓪᓗᓂᓗ.

ᐅᖃᖅᖢᓂ ᓄᕙᒡᔪᐊᕐᓂᖅ -19 ᐸᕐᓇᐅᑎᓂᒃ 2020-ᒧᑦ ᑲᔪᓯᔪᓐᓇᐃᓪᓕᑎᑦᑎᓚᐅᖅᑐᖅ, ᑕᐃᒪᐃᒻᒪᑦ ᐅᑕᖅᑭᑐᐃᓐᓇᓕᖅᑐᖅ ᖃᓄᐃᓐᓂᐊᕐᒪᖔᑕ ᓯᕗᓂᒃᓴᒥ.

“ᓱᓕᔪᒃᑯᑦ, ᖃᐅᔨᒋᐊᓚᐅᙱᑦᑐᖓᓘᓐᓃᑦ ᐊᐅᔭᖅ ᐃᓕᓐᓂᐊᖅᑎᑦᑎᓂᐊᕐᒪᖔᑕ ᑎᑎᕋᐅᔭᕐᓂᕐᒥᒃ ᐃᓱᒪᑉᓗᖓ ᓱᓇᓗᒃᑖᑦ ᓄᖅᑲᖓᑎᑕᐅᓂᐊᕐᓂᖏᓐᓄᑦ ᓄᕙᒡᔪᐊᕐᓂᖅ -19 ᐱᔾᔪᑎᒋᑉᓗᒍ ᐊᒻᒪᓗ ᑎᑭᑎᑦᑎᔪᒪᔾᔮᙱᓐᓂᖏᓐᓄᑦ.

ᑕᐃᒪᐃᒻᒪᑦ, ᐅᑕᖅᑭᑐᐃᓐᓇᖅᑑᔭᓕᖅᑐᒍᑦ ᑭᓯᐊᓂ ᑕᐃᒪᑐᖅ ᑎᑎᕋᐅᔭᕐᓂᒃᑯᑦ ᐃᓕᓐᓂᐊᓕᕈᒫᕆᕗᑦ ᑕᒪᓐᓇ ᐊᒃᓱᕈᕐᓇᖅᑐᖅ ᐃᓱᓕᓯᒪᓕᖅᐸᑦ.”

Advertisement

Darrell Greer

Darrell Greer is Editor of Kivalliq News