ᐊᑎᓕᐅᕈᑎ ᓄᖅᑲᖅᑎᑦᑎᓇᓱᒃᑐᖅ ᐊᒡᓂᒍ ᐃᒍᒃᑯᓐᓂᒃ ᐋᖅᑭᒋᐊᖅᑕᐅᖁᑉᓗᒍ ᐱᔪᓐᓇᐅᑎ ᓴᓇᕙᓪᓕᐊᔪᒪᓂᕐᒧᑦ ᓱᑉᓗᓕᐊᓗᖕᒥᒃ 42-ᓂᒃ ᑭᓛᒥᑕᓂᒃ ᑕᑭᓂᓕᖕᒥ ᑕᓯᕐᔪᐊᕐᒥ ᐃᑎᕕᐊᓄᑦ ᑲᖏᖅᖠᓂᕐᒥ ᑲᑎᑦᑎᓯᒪᔪᖅ 600 ᐅᖓᑖᓂ ᐊᑎᕐᓂᒃ ᐅᑉᓗᒥᒧᑦ.

ᐊᑐᐃᓐᓇᕈᖅᓯᒪᔪᑦ ᐃᓚᐅᖃᑕᐅᓂᐊᕐᓂᕐᒧᑦ ᑐᒡᓕᐊᒍᑦ ᑲᖏᖅᖠᓂᕐᒥ ᐊᖑᓇᓱᒃᑎᒃᑯᑦ ᑲᑎᒪᔨᖏᑦ ᒪᒃᑯᒃᑐᓂᒃ ᐊᖑᓇᓱᒋᐊᖅᑎᑦᑎᑎᓪᓗᒋᑦ ᐅᑯᐊᖑᔪᑦ, ᑐᓄᐊᓂ ᓴᐅᒥᖅᖠᕐᒥ, ᐃᐅᕆᒃ ᑲᑕᓗᒃ, ᐱᓯ ᓇHᐊᕐᓗᓕᒃ, ᕈᓴᓕ ᐊᖑᓴᓪᓗᖅ, ᓲ ᐅᒡᔪᒃ ᐊᒻᒪᓗ ᕋᔾᔪ ᐱᓚᑲᑉᓯ ᐊᒻᒪᓗ ᓯᕗᓂᐊᓂ, ᔭᐃᓴᓐ ᐱᓚᑲᑉᓯ ᑲᖏᖅᖠᓂᕐᒥ ᓯᑎᐱᕆ 5, 2019-ᒥ. ᑲᖏᖅᖠᓂᕐᒥ ᐊᖑᓇᓱᒃᑎᒃᑯᑦ ᑲᑎᒪᔨᖏᑦ ᒫᓐᓇᐅᔪᖅ ᐃᓄᖕᓂᒃ ᐊᑎᓕᐅᖅᑎᑦᑎᓇᓱᒃᑐᑦ ᓱᑉᓗᓕᐊᓗᒃ ᑲᔪᓯᖁᓇᒍ 42-ᓂᒃ ᑭᓛᒥᑕᓂᒃ ᑕᑭᓕᓂᒃ ᓴᓇᔭᐅᔪᒪᓯᒪᔪᖅ ᑕᓯᕐᔪᐊᕐᒥ ᐃᑎᕕᐊᓄᑦ ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᖏᓐᓄᑦ.
ᐊᔾᔨ ᐊᓐᑐᕈ ᐊᑭᕈᓕᖕᒥᙶᖅᑐᖅ

ᓱᑉᓗᓕᒃᑯᑦ ᓅᑎᕆᓇᔭᖅᑐᑦ ᑕᕆᐅᕐᒥᒃ ᐃᒪᕐᒥᒃ ᐅᔭᕋᖕᓂᐊᕐᕕᖕᒥ ᐃᑎᕕᐊᓄᑦ ᑯᕕᓴᒃᓴᓕᐊᖑᑉᓗᓂ ᑕᕆᐅᕐᒧᑦ ᐃᒪᖁᑎᑉᑎᓐᓄᑦ.

ᐊᑎᓕᐅᖅᑎᑦᑎᓂᐅᔪᖅ ᐱᒋᐊᖅᑎᑕᐅᓚᐅᖅᑐᖅ ᑲᖏᖅᖠᓂᕐᒥ ᐊᖑᓇᓱᒃᑎᒃᑯᑦ ᑲᑎᒪᔨᖏᓐᓄᑦ, ᐅᖃᖅᓯᒪᔪᑦ ᐊᒡᓂᒍ ᐃᒍᒃᑯᑦ ᐱᓕᕆᐊᒃᓴᒥᓂᒃ ᑲᒪᑦᑎᐊᓚᐅᙱᒻᒪᑕ ᑕᒡᕘᓇ ᐱᓕᕆᐊᖑᓇᓱᒃᑐᒃᑯᑦ ᐅᖃᖃᑎᖃᖅᓯᒪᙱᖦᖢᑎᒃ ᓄᓇᖅᑲᑎᒌᖕᓂᒃ.

ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦ ᓇᓗᓇᐃᖅᓯᓯᒪᔪᑦ ᐃᓄᐃᑦ ᑲᑎᒪᑎᑕᐅᔪᒫᕐᓂᖏᓐᓄᑦ, ᐅᖃᖅᓯᒪᒐᓗᐊᖅᑎᓪᓗᒋᑦ ᐊᒡᓂᒍ ᐃᒍᒃᑯᑦ ᐃᓄᐃᑦ ᑲᑎᒪᑎᑕᐅᔭᕆᐊᖃᙱᒥᐊᕐᓂᖏᓐᓄᑦ ᓱᑉᓗᓕᒃᓴᐅᑉ ᒥᒃᓵᓄᑦ.

ᑲᖏᖅᖠᓂᕐᒥ ᐊᖑᓇᓱᒃᑎᒃᑯᑦ ᑲᑎᒪᔨᖏᑦᑕ ᐅᖃᖅᑎᖓ ᐊᓐᑐᕈ ᐊᑭᕈᓕᒃ ᐅᖃᖅᖢᓂ ᑕᒪᓐᓇ ᓈᒻᒪᙱᑦᑑᓂᖓᓄᑦ ᑕᒪᓐᓇ ᐱᒻᒪᕆᐊᓘᑎᓪᓗᒍ ᓱᑉᓗᓕᒃᓴᖅ ᐊᖏᖅᑕᐅᑐᐃᓐᓇᕆᐊᖃᙱᒻᒪᑦ ᐃᓄᐃᑦ ᐅᖃᖃᑎᒋᔭᐅᙱᓪᓗᑎᒃ ᐃᓚᐅᖃᑕᐅᓗᑎᒃ ᐊᖑᓇᓱᒃᑎᒃᑯᑦ ᑲᑎᒪᔨᖏᑦ.

ᐅᖃᖅᖢᓂ ᐊᖑᓇᓱᒃᑎᑦᑯᑦ ᑲᑎᒪᔨᖏᑦ ᐃᓱᒪᖕᒪᑕ ᐊᒡᓂᒍ ᐃᒍᒃᑯᑦ ᓄᕙᒡᔪᐊᕐᓂᖅ 19-ᒥ ᒪᓕᒃᑕᐅᔭᕆᐊᓕᖕᓂᒃ ᐱᔾᔪᑎᖃᕋᓱᖕᓂᖏᓐᓄᑦ ᐱᕚᓪᓕᕈᓐᓇᕈᒪᑉᓗᑎᒃ ᑲᔪᓯᑎᑕᐅᖁᑉᓗᒍ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ ᓴᓇᔭᐅᕙᓪᓕᐊᓕᖁᑉᓗᒍ ᓱᑉᓗᓕᒃᓴᖅ.

ᐃᓱᒪᒐᑉᑕ ᓄᓇᓕᖕᒥᐅᑦ ᑲᑎᒪᑎᑕᐅᖃᑦᑕᖅᓯᒪᓂᖏᑦ ᐱᔾᔪᑎᒋᑉᓗᒍ ᑕᓯᕐᔪᐊᕐᒥ ᐅᔭᕋᖕᓂᐊᕐᕕᒃ ᑲᔪᓯᑦᑎᐊᖃᑦᑕᖅᓯᒪᙱᒻᒪᑕ ᐊᒡᓂᒍ ᐃᒍᒃᑯᑦ ᐱᕚᓪᓕᕈᑎᒃᓴᖏᓐᓄᑦ, ᑕᐃᒪᐃᒻᒪᑦ ᑲᑎᒪᖃᑎᖃᖅᑕᐅᓕᒪᓇᓱᒃᑑᔭᖅᑐᑦ,” ᑕᐃᒪᓐᓇ ᐅᖃᖅᖢᓂ ᐊᑭᕈᓕᒃ.

ᑕᒪᓐᓇ ᑲᔪᓯᔭᕆᐊᖃᙱᒻᒪᕆᒃᑐᖅ ᓄᓇᖅᑲᑎᒌᒃ ᐅᖃᖃᑎᒋᔭᐅᙱᓪᓗᑎᒃ, ᐊᒻᒪᓗ ᐃᓚᐅᖃᑕᐅᑎᑕᐅᑦᑎᐊᕐᓗᑎᒃ ᑲᖏᖅᖠᓂᕐᒥ ᐊᖑᓇᓱᒃᑎᒃᑯᑦ ᑲᑎᒪᔨᖏᑦ ᐅᖃᖃᑎᒌᒃᑐᑑᙱᓪᓗᑎᒃ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᐊᒻᒪᓗ ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᑦ.”

ᐊᑭᕈᓕᒃ ᐅᖃᖅᖢᓂ ᐊᑎᓕᐅᖅᑐᒡᒎᖅ ᐊᒥᓱᙳᖅᐹᓪᓕᖅᑐᑦ (603 ᑐᓴᒐᒃᓴᖅ ᓴᖅᑭᑎᑕᐅᖅᑳᖅᑎᓪᓗᒍ) ᓇᓗᓇᐃᔭᐅᑕᐅᔪᖅ ᑕᒪᓐᓇ ᐃᑲᔪᖅᑐᖅᑕᐅᙱᒻᒪᑦ ᐃᓄᖕᓄᑦ ᑲᖏᖅᖠᓂᕐᒥ.

ᐊᑎᓕᐅᕈᑎ ᐅᖃᖅᓯᒪᔪᖅ ᑭᓇᑐᐃᓐᓇᖅ ᐊᑎᓕᐅᖅᑐᖅ ᐊᖏᕐᒪᑦ ᓱᑉᓗᓕᐊᓗᒃ ᓴᓇᔭᐅᔪᒪᔪᖅ ᑲᔪᓯᑎᑕᐅᖁᓇᒍ.

ᐅᖃᖅᓯᒪᑉᓗᓂᓗ ᑭᓇᑐᐃᓐᓇᖅ ᐊᑎᓕᐅᖅᑐᖅ ᐃᓱᒫᓘᑎᖃᕐᒪᑦ ᓱᑉᓗᓕᐊᓗᒃ ᒪᓕᒐᓕᖅᑐᐃᑐᐃᓐᓇᕋᔭᕐᓂᖓᓄᑦ ᐊᖑᓇᓱᒡᕕᖕᓂᒃ ᐊᑐᖅᑕᐅᖃᑦᑕᖅᑐᓂᒃ ᐊᖑᓇᓱᒃᑎᓄᑦ, ᐊᒻᒪᓗ ᑭᖑᕙᕆᐊᖅᑎᑦᑎᓇᔭᖅᑐᒃᓴᐅᑉᓗᓂ ᑐᒃᑐᑦ ᓅᑉᐸᓪᓕᐊᓂᕆᖃᑦᑕᖅᑕᖏᓐᓂᒃ ᑲᖏᖅᖠᓂᐅᑉ ᖃᓂᒋᔭᖓᒍᑦ ᐊᒻᒪᓗ ᑕᓯᕐᔪᐊᕐᒥ ᐅᔭᕋᖕᓂᐊᕐᕕᖕᒥ.

ᐊᑎᓕᐅᕈᑎ ᐅᖃᖅᓯᒪᖕᒥᔪᖅ ᑕᐃᑉᑯᐊ ᐊᑎᓕᐅᖅᑐᑦ ᓂᕆᐅᖕᓂᖃᕐᒪᑕ ᐊᒡᓂᒍ ᐃᒍᒃᑯᓐᓂᒃ ᑐᑭᓯᑎᑦᑎᒃᑲᓐᓂᖁᑉᓗᒋᑦ ᖃᓄᖅ ᐱᒋᐊᖅᑎᑦᑎᖃᑦᑕᕐᓂᐊᕐᒪᖔᑕ ᐱᒻᒪᕆᐊᓗᒃᑯᑦ ᐊᓯᔾᔩᑎᑦᑎᓇᓱᓕᕌᖓᑕ ᐅᔭᕋᖕᓂᐊᕐᓂᒃᑯᑦ, ᐊᒻᒪᓗ ᑲᖏᖅᖠᓂᕐᒥ ᐃᓄᐃᑦ ᐃᓗᐃᑦᑐᒃᑯᑦ ᑐᓴᐅᒪᑎᑕᐅᖁᑉᓗᒋᑦ ᐱᒋᐊᕈᑎᒃᑯᑦ ᐊᒃᑐᖅᓯᓂᖃᕐᓂᐊᖅᑎᓪᓗᒋᑦ ᓄᓇᓕᖕᒥ.

ᐊᑭᕈᓕᒃ ᐅᖃᖅᖢᓂ ᐃᓄᐃᑦ ᑲᑎᒪᑎᑕᐅᔪᒫᕐᓂᖏᓐᓄᑦ ᑕᒪᑐᒪ ᒥᒃᓵᓄᑦ ᐅᑭᐊᒃᓵᖑᔪᖅ ᐊᒻᒪᓗ ᐱᓕᕆᒋᐊᕆᐊᖃᙱᓪᓚᑦᑖᖅᑐᑦ ᓯᕗᓂᐊᒍᑦ.

ᐅᖃᖅᖢᓂ ᒫᓐᓇᐅᔪᖅ ᓄᕙᒡᔪᐊᕐᓂᖅ-19-ᑯᑦ ᒪᓕᒃᑕᐅᔭᕆᐊᓖᑦ ᑕᐃᒪᐅᒃᐸᑕ ᓱᓕ ᐊᒻᒪᓗ ᐃᓄᐃᑦ ᖃᑉᓗᓈᑦ ᓄᓈᓂᙶᖅᑐᑦ ᑲᑎᒪᔭᖅᑐᖅᑐᑦ ᒪᕐᕉᖕᓂᒃ ᐱᓇᓱᐊᕈᓯᕐᓂᒃ ᕕᓂᐲᒃᒥ ᐃᓄᖕᓃᑦᑕᐃᓕᔭᕆᐊᖃᖅᐸᑕ ᓄᓇᕗᒨᖅᑳᖅᑎᓐᓇᒋᑦ, ᐊᑏ.

ᑕᐃᒪᑐᖅ ᐊᒥᓱᑦ ᐃᓄᐃᑦ ᑲᖏᖅᖠᓂᕐᒥ ᑲᑎᒪᔭᖅᑐᕈᒫᖅᐳᑦ ᐊᒻᒪᓗ ᓂᑉᓕᖅᑎᑕᐅᔪᓐᓇᕐᓗᑎᒃ ᐃᓱᒫᓘᑎᒥᓂᒃ ᑐᓴᖅᑎᑦᑎᔪᓐᓇᕐᓗᑎᒃ. ᓄᓇᓕᒃ ᓂᑉᓕᕆᐊᓕᒃ ᑐᓴᖅᑕᐅᔭᕆᐊᓕᒃ ᑕᒪᑐᒪ ᒥᒃᓵᓄᑦ ᑭᖑᕙᓗᐊᖅᑳᖅᑎᓐᓇᒋᑦ,” ᑕᐃᒪᓐᓇ ᐅᖃᖅᖢᓂ. “ᓈᒻᒪᙱᑦᑑᓇᔭᕐᒪᑦ ᐃᓄᐃᑦ ᑲᑎᒫᓂᒃᓯᒪᓕᖅᐸᑕ ᐅᖃᖃᑦᑕᓕᕈᑎᒃ ᐃᒪᓐᓇ ᐅᖃᕋᔭᓚᐅᕋᑉᑖᓚᓗᑎᒃ ᐅᕝᕙᓘᓐᓃᑦ ᐃᒪᓐᓇᖔᖅ ᐅᖃᕋᔭᓚᐅᕋᑉᑕᓚᓗᑎᒃ. ᑕᒡᕙ ᐊᑕᐅᓯᖅ ᐱᕕᒃᓴᕆᓂᐊᖅᑕᖅᐳᑦ ᓂᑉᓕᕈᓐᓇᖁᑉᓗᑕ ᑐᓴᖅᑕᐅᔪᓐᓇᖁᑉᓗᑕ ᑲᒪᒋᔭᐅᔪᓐᓇᖁᑉᓗᒋᑦ ᐃᓱᒫᓘᑎᒋᔭᖅᐳᑦ. ᑭᖑᕙᓕᐊᕐᓂᐊᖅᑐᒍᑦ ᑭᖑᓂᐊᓂ.”

Advertisement

Darrell Greer

Darrell Greer is Editor of Kivalliq News