ᕿᑎᒃᑐᓕᕆᔨᒃᑯᑦ ᖃᓄᐃᓕᐅᖅᑎᑦᑎᕈᓘᔭᖃᑦᑕᖅᑎᓪᓗᒋᑦ ᒪᒃᑯᒃᑐᓂᒃ ᐃᓐᓇᕐᓂᒡᓗ ᖃᓄᐃᓕᐅᕈᑎᒋᓂᐊᖅᑕᖏᑦ ᐃᓚᕚᓪᓕᖅᓯᒪᔪᑦ ᓂᕆᐅᒋᓚᐅᖅᑕᖏᑦᑕ ᐅᖓᑖᒍᑦ ᑲᖏᖅᖠᓂᕐᒥ ᐊᐅᔭᖅ ᑭᕙᓪᓕᖅ ᓄᕙᒡᔪᐊᕐᓂᖅ-19 – ᖃᙲᓐᓇᖅᐸᑦ ᐊᒻᒪᓗ Hᐊᒻᓚᒃᑯᑦ ᐱᔪᒪᔭᖏᑦ ᓴᖅᑭᑦᑐᓐᓇᑐᐊᖅᐸᑕ.

ᓛᓐᑕᓐ ᑐᓗᒐᖅ, ᓴᐅᒥᖅᖠᕐᒦᑦᑐᖅ, ᐊᒻᒪᓗ ᐳᕋᐃᓴᓐ ᑲᐅᑕᖅ ᐆᒃᑑᑎᓂᒃ ᕿᒥᕐᕈᔫᒃ ᐃᓚᐅᖃᑕᐅᑉᓗᑎᒃ Actua ᓱᓇᑐᐃᓐᓇᕐᓂᒃ ᖃᐅᔨᓴᐃᓂᕐᒧᑦ ᐃᓕᓐᓂᐊᕐᓂᕐᒥᒃ ᑲᖏᖅᖠᓂᕐᒥ ᔪᓚᐃ 25, 2019-ᒥ. ᒪᓕᒃᑕᒃᓴᑦ ᑕᐃᒪᐅᑎᓪᓗᒋᑦ ᐱᔾᔪᑎᒋᑉᓗᒍ ᓄᕙᒡᔪᐊᕐᓂᖅ – 19 ᐊᐅᔭᐅᔪᖅ ᑭᕙᓪᓕᕐᒥ ᑕᒪᓐᓇ ᐃᓕᓐᓂᐊᕈᑎ ᓴᖅᑭᔾᔮᙱᑦᑐᖅ.

ᑲᖏᖅᖠᓂᕐᒥ ᕿᑎᒃᑐᓕᕆᔨ ᑕᐃᕕᑎ ᑲᓛᒃ ᐅᖃᖅᖢᓂ ᕿᑎᒃᑐᓕᕆᔨᒃᑯᒡᒎᖅ ᐱᓕᕆᕐᔪᐊᖅᑐᑦ ᐱᔪᓐᓇᕐᓂᓗᒃᑖᒃᑯᑦ ᓴᖅᑭᑦᑐᓐᓇᖅᑐᓂᒃ ᓴᖅᑭᑎᑦᑎᔪᒪᑉᓗᑎᒃ ᓄᓇᓕᖕᒥ ᐊᐅᔭᖅ.

ᐅᖃᖅᖢᓂ ᑐᒡᓕᐊᒍᒡᒎᖅ ᐊᕐᕌᒍᑕᒫᒃᑯᑦ 16 ᑐᖔᓂ ᐅᑭᐅᓖᑦ ᑭᕙᓪᓕᕐᒥ ᒪᒃᑯᒃᑐᑦ ᐊᓇᐅᓕᒑᕐᓂᕆᕙᒃᑕᖏᑦ ᑲᔪᓯᓂᐊᖅᑐᖅ ᑕᓪᓕᒻᒥᐅᓕᕐᒥᒃᐸᑦ ᑲᖏᖅᖠᓂᕐᒥ.

ᐃᓕᐅᖅᑲᖅᓯᒪᔪᒪᓂᐊᖅᑕᖅᐳᑦᑕᐅᖅ ᐊᖅᓴᕐᕕᒃ ᓄᑖᒥ ᓯᐊᕐᕆᔮᕐᕕᖕᒥ ᕿᓚᒻᒥᐅᔪᒃᑯᑦ, ᑕᐃᒪᐃᓕᐅᕈᓐᓇᕈᑉᑕ ᐊᓯᖏᑦ ᖃᓄᐃᓕᐅᕈᑎᒃᓴᑦ ᑲᔪᓯᔪᓐᓇᕐᓂᐊᖅᑐᑦ ᒫᓐᓇᑲᐅᑎᒋ,” ᑕᐃᒪᓐᓇ ᐅᖃᖅᖢᓂ ᑲᓛᒃ.

ᐊᖅᓴᕐᕕᒃ ᐱᐊᓂᒃᓯᒪᓕᖅᐸᑦ, ᓄᑕᖅᑲᑦ ᐊᖅᓴᕈᓐᓇᖅᓯᓂᐊᖅᑐᑦ ᓄᑖᒥ ᓯᐊᕐᕆᔮᕐᕕᖕᒥ, ᐊᒻᒪᓗ ᐃᓐᓇᐃᑦ ᐊᖅᓴᖅᑎᑕᐅᓗᑎᒃ, ᓯᓚᒥᓗ ᐃᓕᓐᓂᐊᖅᑎᑕᐅᓗᑎᒃ, ᐊᖓᔪᖅᑳᕆᔭᐅᔪᓪᓗ ᓄᑕᕋᓛᓕᔭᕐᓗᑎᒃ ᑲᑎᖃᑦᑕᕐᓗᑎᒃ ᐅᑉᓛᒃᑯᑦ ᐊᒻᒪᓗ, ᐅᑉᓗᒃᑯᑦ, ᓄᑕᖅᑲᑦ ᐊᐅᔭᖅ ᐸᐃᕆᔭᐅᖃᑦᑕᕐᓂᐊᕐᒥᔪᑦ ᖃᓄᐃᓕᐅᖅᑎᑕᐅᕈᓘᔭᖃᑦᑕᕐᓗᑎᒃ. ᑕᐃᒪᐃᒻᒪᑦ ᓄᖅᑲᖓᑐᐃᓐᓇᔾᔮᙱᑦᑐᑦ ᖃᓄᐃᓕᐅᕈᑏᑦ ᑲᔪᓯᑎᑕᐅᒋᐊᖅᐸᑕ.”

ᑲᓛᒃ ᐅᖃᖅᖢᓂ ᓄᕙᒡᔪᐊᕐᓂᖅ-19 ᐱᔾᔪᑎᒋᑉᓗᒍ Actua Canada-ᑯᑦ ᑎᑭᑦᑐᓐᓇᙱᒻᒪᑕ ᓱᓇᑐᐃᓐᓇᕐᓂᒃ ᖃᐅᔨᓴᐃᓂᕐᒧᑦ ᐃᓕᓐᓂᐊᖅᑎᑦᑎᖃᑦᑕᖅᑑᒐᓗᐊᑦ ᐊᐅᔭᒃᑯᑦ ᑭᕙᓪᓕᕐᒥ.

ᐅᖃᖅᖢᓂ ᖃᑉᓯᑲᓪᓚᑦ ᒪᒃᑯᒃᑐᙳᖅᓴᔪᑦ ᖃᐅᔨᓴᐃᓂᕐᒧᑦ ᐃᓕᑦᑎᔪᒪᒃᑲᐅᔪᑦ ᐱᓕᕆᑎᑕᐅᔫᒐᓗᐊᑦ, ᑭᓯᐊᓂ, ᖁᔭᓐᓇᒦᒃ 30-ᓂᒃ ᖃᐅᔨᓴᕈᑎᓂᒃ ᐴᓂᒃ (ᖃᐅᔨᓴᐃᓂᕐᒧᑦ, ᓄᑖᓂᒃ ᓴᖅᑭᑉᐸᓪᓕᐊᔪᓂᒃ, ᓴᓇᙳᐊᕐᓂᕐᒧᑦ ᐊᒻᒪᓗ ᓈᓴᐅᓯᕆᓂᕐᒧᑦ) ᐅᖃᓕᒫᒐᓂᒃ ᐊᒻᒪᓗ ᓱᓇᕈᓘᔭᕐᓂᒃ ᑐᓂᐅᖅᑲᐅᑎᖃᓚᐅᕐᒪᑕ ᓄᑕᖅᑲᓄᑦ ᕿᑎᐊᖑᓚᐅᖅᑐᒥ, ᔪᓚᐃ 15-ᒥ.

ᐅᖃᓕᒫᒐᑦ, ᓄᑕᖅᑲᓄᑦ ᐅᑭᐅᓕᖕᓄᑦ 7-ᓂᒃ 12-ᒧᑦ, ᐃᓗᓕᖃᖅᑐᑦ ᖃᓄᐃᓕᐅᕈᑎᒃᓴᓂᒃ ᓯᓚᑐᐃᓐᓇᒃᑯᑦ, ᐃᑯᒪᓕᒃᑯᑦ ᐃᓄᙳᐊᒃᑯᑦ, ᓈᓴᐅᓯᕆᓂᒃᑯᑦ, ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ, ᖃᐅᔨᓴᐃᓂᒃᑯᑦ ᐊᒻᒪᓗ ᓂᕐᔪᑎᑦ ᐃᓗᖏᓐᓂᒃ ᖃᐅᔨᓴᐃᓂᕐᒧᑦ.

Actua Canada-ᑯᑦ ᑎᒥᖁᑎᒋᔭᐅᔪᑦ ᐱᐅᔪᐊᓗᐃᑦ ᐊᐃᑦᑖᕈᓱᓚᐅᖅᑐᑦ ᐊᐅᔭᖅ ᑎᑭᑦᑐᓐᓇᔾᔮᙱᓐᓇᒥᒃ.” ᑕᐃᒪᓐᓇ ᐅᖃᖅᖢᓂ ᑲᓛᒃ. “ᐅᖃᓕᒫᒐᐃᑦ ᖃᓄᐃᓕᐅᕈᑏᑦ ᑐᓂᐅᖅᑲᐅᑎᒋᓚᐅᖅᑕᖅᐳᑦ ᓄᑕᖅᑲᓄᑦ ᐊᖏᕐᕋᒥᓂᒃ ᐱᓕᕆᐊᕆᔪᓐᓇᕐᓂᐊᖅᑕᖏᑦ Actua-ᑯᑦ ᑲᒪᒋᓇᔭᓚᐅᖅᑕᖏᑦ ᐃᓕᓐᓂᐊᖅᑎᑦᑎᓇᔭᓚᐅᖅᐸᑕ ᐊᐅᔭᖅ ᓄᕙᒡᔪᐊᕐᓂᖅ-19 ᑕᐃᒪᐅᓚᐅᙱᑉᐸᑦ. ᑭᕙᓪᓕᐅᑉ ᐃᓗᐊᓂ ᐳᓚᕋᕈᑎᖃᑦᑕᕈᓐᓇᖅᑐᑦ ᒫᓐᓇᐅᔪᖅ, ᑕᐃᒪᐃᒻᒪᑦ, 16 ᑐᖔᓂ ᐅᑭᐅᓖᑦ ᑭᕙᓪᓕᕐᒥᐅᑕᑦ ᐊᓚᐅᓕᒑᕆᐊᖅᑐᕐᓂᐊᖅᑐᑦ ᑕᖅᑭᐅᑉ ᓄᙳᐊᓂ, ᒪᕐᕉᒃ ᐊᓇᐅᓕᒑᖃᑎᒌᒃᑏᑦ ᑲᖏᖅᖠᓂᕐᒥ, ᐊᒻᒪᓗ ᐱᙳᐊᕆᐊᖅᑐᖅᑐᖃᕐᓂᐊᖅᖢᓂ ᐊᕐᕕᐊᓂ, ᖃᒪᓂ’ᑐᐊᕐᒥ, ᓴᓪᓕᓂ ᐊᒻᒪᓗ ᑎᑭᕋᕐᔪᐊᕐᒥ.

ᑕᐃᒪᑐᖅ, ᓱᓇᓗᒃᑖᑦ ᐱᐅᓯᕙᓪᓕᐊᓂᐊᖅᐳᑦ ᐅᕝᕙᓘᓐᓃᑦ, ᐱᐅᔪᓐᓃᖅᐸᓪᓕᐊᙱᓪᓗᑎᒃ ᑕᐃᑲᙵᑦ ᑳᒻ ᐃᐊᒃᑯᑦ ᑎᖕᒥᓲᓕᕆᔨᒃᑯᑦ ᐊᓇᐅᓕᒑᒡᒎᑎᑦᑎᓂᐊᕐᒥᔪᑦ ᐃᓐᓇᕐᓂᒃ ᐊᒐᓯᐅᑉ ᓄᙳᐊᓂ.”

Advertisement

Darrell Greer

Darrell Greer is Editor of Kivalliq News