ᖃᐅᔨᙱᓈᖅᑕᐅᑦᑕᐃᓕᒋᑦᑎ ᐅᐃᒪᔮᙱᑦᑑᔭᖅᑐᒥᒃ, ᐱᓕ ᒐᓛᓐᑦ ᑲᖏᖅᖠᓂᕐᒥᐅᑕᖅ 100%-ᒥᒃ ᓂᐱᖅᑯᖅᑐᔪᐊᓗᒃᑯᑦ ᑯᑭᒃᑕᐹᖅᑎᐅᔪᖅ.

Guns N’ Roses ᒪᒃᑯᒃᑐᒥᒃ ᐱᓕ ᒐᓛᓐᑦᒥᒃ ᑯᑭᒃᑕᐹᕐᓄᑦ ᐱᕙᓪᓕᐊᑎᑦᑎᔪᑦ ᑯᑭᒃᑕᐹᖅᑎᐅᔪᓐᓇᖅᓯᖁᑉᓗᒍ.
ᐊᔾᔨ ᐱᓕ ᒐᓛᓐᑦᒥᙶᖅᑐᖅ

ᖃᓄᓗᒃᑖᖅ ᑎᑕᖃᑕᐅᖃᑦᑕᖅᓯᒪᔪᖅ ᐃᓅᖃᑎᒥᓂᒃ ᖃᑉᓰᓐᓇᐅᓪᓗᑎᒃ ᑎᑕᖃᑎᒌᒃᐸᒃᖢᑎᒃ ᐊᒻᒪᓗ ᐅᓐᓅᑉ ᐃᓚᖓᓂᒃ ᑎᑕᒋᐊᖅᑐᖅᑎᑦᑎᕙᒃᖢᓂ, ᑭᓯᐊᓂᓕ ᐅᑉᓗᒥᐅᔪᖅ ᓂᐱᖅᑯᖅᑐᙱᓐᓂᖅᓴᒃᑯᑦ ᑎᑕᐅᔭᖃᑦᑕᕐᓂᖅᓴᐅᓕᖅᑐᖅ.

ᐳᕆᓐᔅ ᐃᑦᕗᑦ ᐊᐃᓚᓐᒥᐅᑕᒃᓴᔭᖅ, ᒐᓛᓐᑦ, 46-ᓂᒃ ᐅᑭᐅᓕᒃ, ᑲᖏᖅᖠᓂᕐᒥᐅᑕᐅᓯᒪᓕᖅᑐᖅ 12-ᓄᒃ ᐅᑭᐅᓂᒃ ᐊᒻᒪᓗ ᐅᑭᐅᓂᒃ 15-ᓂᒃ ᐅᑭᐅᖅᑕᖅᑐᒥᐅᑕᐅᓯᒪᑉᓗᓂ, ᐃᖕᒥᓂᒃ ᐃᓱᒪᒋᔭᓕᒃ ᑯᑭᒃᑕᐹᓂᒃ ᐊᑐᖃᑦᑕᓕᓚᐅᕐᓂᕐᒥᓄᑦ ᐃᓐᓇᕈᓕᖅᖢᓂ ᑭᓯᐊᓂ, ᑯᑭᒃᑕᐹᕐᒥᒃ ᑎᒍᓯᑕᐃᓐᓇᓚᐅᖅᓯᒪᔪᕉᖅ 16-ᓂᒃ ᐅᑭᐅᖃᓕᖅᖢᓂ.

ᑐᓵᖃᑦᑕᓕᖅᖢᓂ Guns N’ Roses-ᑯᓐᓂᒃ ᐊᒻᒪᓗ ᑯᑭᒃᑕᐹᖅᑎᖓᓂᒃ Slash-ᒥᒃ, ᐱᔫᒥᒍᓱᓕᖅᑎᑦᑎᓚᐅᖅᑐᖅ ᑯᑭᒃᑕᐹᕈᒪᖃᑦᑕᕐᓂᕐᒧᑦ ᒐᓛᓐᑦᒧᑦ.

“ᑕᒪᓐᓇ ᑎᑉᓯᓇᖅᑐᖅ ᓯᕗᓪᓕᖅᐹᒥ ᑕᑯᒋᐅᕋᑉᑯ Welcome to the Jungle ᐱᐅᒋᓚᐅᙱᓐᓇᑉᑯ,” ᑕᐃᒪᓐᓇ ᐅᖃᖅᖢᓂ ᒐᓛᓐᑦ.

“Sweet Child of Mine ᐃᒻᖏᐅᑎ ᓴᖅᑭᓚᐅᖅᓯᒪᔪᖅ ᒪᕐᕉᒃ ᑕᖅᑮᒃ ᐱᐊᓂᖕᒪᑎᒃ ᑐᓴᕐᓂᕆᕕᒃᓲᑕᕿᑉᓗᒍᓗ.”

ᒐᓛᓐᑦ ᐅᖃᖅᖢᓂ ᓂᐱᖅᑯᖅᑐᔪᓂᒎᖅ ᐃᒻᖏᖅᑐᓂᒃ ᑐᓴᕐᓂᕈᓱᓪᓚᕆᓚᐅᕋᒥ ᖃᑉᓗᓈᓂ ᓄᓇᖃᖅᖢᓂ ᐊᒻᒪᓗ, ᑕᐃᑉᓱᒪᓂᒧᑦ, ᐊᓯᐊᒎᕐᕕᒃᑕᖃᒃᑲᓐᓂᖅᑑᔭᓚᐅᙱᒻᒪᑦ ᑎᑕᒃᑎᐅᖃᑎᖏᑦ ᑲᑎᒪᓚᐅᕐᒪᑕ ᐊᓯᖏᓐᓂᒃ ᑎᑕᒃᑎᓂᒃ ᕿᑎᖃᑎᖃᓗᐊᖃᑦᑕᕐᓇᑎᒃ.

ᐅᖃᖅᖢᓂ ᑕᒪᓐᓇ ᐊᓯᔾᔨᓚᐅᕐᒪᑦ ᐅᑭᐅᖅᑕᖅᑐᒧᑦ ᓅᒃᑲᒥ, ᑎᑕᖃᑎᖃᖃᑦᑕᖅᓯᒪᓕᕋᒥ 40-ᓂᒃ ᐊᔾᔨᒌᙱᑦᑑᑕᐅᔪᓂᒃ ᐃᓄᖕᓂᒃ ᐅᑉᓗᒥᒧᑦ.

“ᑎᑕᐅᑎᓂᒃ ᐊᑐᖃᑦᑕᖅᓯᒪᔪᖓ, ᓱᐴᓗᑕᕐᓂᒃ, saxophone-ᓂᒃ… ᓱᓇᑐᐃᓐᓇᐅᔪᓐᓇᖅᑐᑦ ᑕᒫᓂ ᐅᑭᐅᖅᑕᖅᑐᒥ,” ᑕᐃᒪᓐᓇ ᐅᖃᖅᖢᓂ ᐃᓱᒪᔪᖅ ᓇᓗᓇᙱᖦᖢᓂ ᖃᓄᖅ ᑕᐃᒪᐃᖃᑦᑕᖅᓯᒪᖕᒪᖔᕐᒥ ᐃᖕᒥᓂᒃ ᐃᔪᕆᑉᓗᓂ.

ᒐᓛᓐᑦ ᐅᑭᐅᖅᑕᖅᑐᒥ ᑎᑕᖃᑦᑕᖅᑐᑎᑐᑦ ᐱᓕᕆᓲᖅ, ᐅᖃᕈᓐᓇᕐᒪᑦ ᖃᓄᖅ ᐱᔭᕆᐊᑐᑎᒋᖕᒪᖔᑦ ᑎᑕᖃᑎᒃᓴᒥᒃ ᓇᓂᓯᓇᓱᖕᓂᐊᕐᓗᓂ ᐅᑭᐅᖅᑕᖅᑐᒥ “ᐃᓂᒃᓴᖃᑦᑎᐊᕐᓇᙱᒻᒪᑦ.”

“ᐊᑐᖅᓯᒪᔭᕋ ᐃᓕᓐᓂᐊᕐᕕᑉᑎᓐᓂᒃ ᐃᓕᓐᓂᐊᕐᕕᒐ ᐃᒡᓗᑕᖅ ᐊᒻᒪᓗ ᓄᑕᐅᙱᑦᑐᖅ ᓯᐊᕐᕆᔮᕐᕕᒃ ᐱᔪᓐᓇᕌᖓᒪ, ᐃᒡᓗᒐᓂᓘᓐᓃᑦ ᖃᑉᓰᖅᖢᑕ, ᑭᓯᐊᓂ ᑖᑉᑯᐊ ᓈᒻᒪᓗᐊᖃᑦᑕᙱᒻᒪᑕ ᑎᑕᖃᑎᖃᕐᓂᐊᕐᓗᓂ,” ᑕᐃᒪᓐᓇ ᐅᖃᖅᖢᓂ ᒐᓛᓐᑦ.

ᑭᓯᐊᓂ, ᐅᑭᐅᖅᑕᖅᑐᒦᖦᖢᓂ ᑯᑭᒃᑕᐹᒥᒃ ᓂᐱᖃᙱᓐᓂᖅᓴᒥᒃ ᐊᑐᕆᐅᖅᓯᒪᔪᖓ ᐊᒻᒪᓗ Country ᐃᒻᖏᐅᑎᓂᒃ. ᖃᐅᔨᒪᓚᐅᙱᑕᕋ ᔮᓂ ᑳᔅ ᐅᑭᐅᖅᑕᖅᑐᒨᖅᑳᖅᑎᓐᓇᖓ. ᐊᒻᒪᓗ ᖃᐅᔨᕙᓪᓕᐊᓯᒪᔪᖓ ᓂᐱᖃᙱᓐᓂᖅᓴᐅᔪᓂᒃ ᑎᑕᐅᑎᓂᒃ ᐊᒻᒪᓗ ᐃᓕᖅᑯᓯᑐᖃᑎᒍᑦ ᑎᑕᖕᓂᐅᕙᒃᑐᓂᒃ. ᑐᓴᕐᓂᕆᔭᕋ ᓴᕐᓕ ᐸᓂᒍᓂᐊᖅ ᐊᒻᒪᓗ ᑕᐃᒪᓐᓇᕐᓚᒃ ᑎᑕᖃᑦᑕᖅᑐᑦ ᐃᒻᖏᖃᑦᑕᖅᑐᑦ, ᑕᐃᒪᓐᓇ ᐃᓕᑦᑎᓯᒪᔪᖓ ᐅᑭᐅᖅᑕᖅᑐᒥᐅᑕᐅᑉᓗᖓ.

“ᐃᓄᖕᓃᖃᖅᑕᖅᖢᖓ ᐅᐃᒪᔮᙱᓐᓂᖅᓴᐅᔪᓂᒃ ᐊᒻᒪᓗ ᓴᓚᐅᓱᖕᓂᖅᓴᐅᕙᒃᑐᓂᒃ, ᐊᒻᒪᓗ ᑐᐊᕕᖅᑐᐊᓗᖕᒥ ᐃᓅᓯᖃᙱᑦᑐᓂᒃ, ᐊᒃᑐᖅᓯᓯᒪᔪᖅ ᑕᒪᓐᓇ ᑎᑕᖃᑦᑕᕐᓂᒻᓄᑦ ᐅᔾᔨᕈᓱᒃᓯᒪᔪᖓ ᐊᑯᓂᐅᓂᖅᓴᖅ ᑎᑕᖃᑦᑕᓕᕐᓂᒻᓄᑦ ᐊᒻᒪᓗ, ᐱᔫᒥᓵᖅᓯᒪᔭᐅᙱᓐᓂᖅᓴᐅᒍᒪ ᐅᑭᐅᖅᑕᖅᑐᒧᑦ ᐊᒻᒪᓗ ᐃᓄᖁᑎᖏᓐᓄᑦ, ᖃᓄᐃᒃᓴᕋᔭᙱᑦᑎᐊᖅᑐᖓ ᓂᐸᐃᒥᐊᖃᑦᑕᕋᔭᕐᓂᕐᒧᑦ.

“ᑕᐃᒪᐃᒻᒪᑦ, ᓂᐱᑭᓐᓂᖅᓴᐅᓕᖅᓯᒪᔪᖅ ᑎᑕᖃᑦᑕᕐᓂᕋ, ᐅᕝᕙᓘᓐᓃᑦ ᐃᓚᕚᓪᓕᖅᓯᒪᔪᖅ, ᐊᒻᒪᓗ ᐃᓱᒫᓘᑎᖃᙱᓐᓂᖅᓴᐅᓕᖅᖢᖓ ᓂᑉᓕᕆᐊᖃᐃᓐᓇᕆᐊᖃᕐᓂᕐᒧᑦ.”

ᒐᓛᓐᑦ ᐅᔾᔨᕈᓱᒃᓯᒪᔪᖅ ᖃᕆᑕᐅᔭᓕᕆᓂᖅᓴᐅᓕᕐᓂᕐᒥᓄᑦ ᓄᕙᒡᔪᐊᕐᓂᖅ-19 ᑕᐃᒪᐅᑎᓪᓗᒍ, ᐊᒻᒪᓗ ᒫᓐᓇᐅᔪᖅ ᖃᓄᐃᓕᐅᒃᑲᓐᓂᕈᒪᓂᖅᓴᐅᓕᖅᖢᓂ.

ᑕᒪᓐᓇ ᐱᕙᓪᓕᐊᑎᑦᑎᓯᒪᔪᖅ ᐊᑖᑕᐃᑦ ᓂᐱᖅᑯᖅᑐᔪᓂᒃ ᑎᑕᐅᑎᒋᕙᒃᑕᖏᓐᓂᒃ ᑲᑎᑦᑎᓂᕐᒧᑦ ᐱᓕᕆᐊᕐᒥᒃ.

“ᓂᐱᖅᑯᖅᑐᑉᓗᓂ ᑎᑕᖃᑦᑕᕐᓂᖅ ᖁᕕᐊᒋᒐᑉᑯ ᐊᒻᒪᓗ ᐊᑖᑕᐅᑉᓗᓂ ᖁᕕᐊᒋᑉᓗᒍ, ᑕᐃᒪᐃᒻᒪᑦ YouTube-ᑯᑦ ᐱᒋᐊᖅᑎᑦᑎᓯᒪᔪᖓ ᒪᒃᐱᒐᕐᒥᒃ ᖁᕝᕙᖅᑎᕆᓇᓱᒃᓯᒪᔪᖓ ᐊᓯᒃᑲᓂᒃ ᐊᑖᑕᐅᔪᓂᒃ ᓂᐱᖅᑯᖅᑐᔪᒃᑯᑦ ᑎᑕᒍᒪᕙᒃᑐᓂᒃ ᐃᒻᖏᐅᓯᐅᖅᐸᒃᑐᓂᒃ ᐊᒻᒪᓗ ᖁᕕᐊᓇᖅᑐᓂᒃ ᐱᕙᓪᓕᐊᑎᑦᑎᓯᒪᔪᓂᒃ.

“ᑕᐃᒪᐃᒻᒪᑦ ᑕᒪᓐᓇ ᑲᒪᒋᔭᒻᒪᕆᐊᓗᒐ ᒫᓐᓇᐅᔪᖅ.

“ᐃᒻᖏᐅᓯᐅᖃᑦᑕᕐᓂᕋ ᑕᐃᒪᐅᑎᓪᓗᒍ, ᓴᖅᑭᑦᑐᒫᕐᓂᖓ ᑕᐃᒪᐅᖕᒪᑦ ᐊᒻᒪᓗ ᐃᓂᖃᕈᒫᕐᓂᖓ ᑭᓯᐊᓂ ᓂᐱᖅᑯᖅᑐᔪᓂᒃ ᑎᑕᒃᑎᓪᓚᕆᐅᔪᖓ.

“ᓂᐱᖃᙱᑦᑐᖅ ᓄᓇᕐᔪᐊᕐᒥ ᑯᑭᒃᑕᐹᖅᑐᑎᑐᑦ ᓂᐱᖅᑯᖅᑐᔪᒃᑯᑦ. ᓇᐅᓪᓚᑦᑖᖅ.”

Advertisement

Darrell Greer

Darrell Greer is Editor of Kivalliq News