60 ᐅᑭᐅᑦ ᖄᖏᖅᓯᒪᑐᐃᓐᓇᖅᑐᑦ ᐃᓄᐃᑦ ᓄᓇᑖᖅᐸᓪᓕᐊᓕᓚᐅᖅᑎᓪᓗᒋᑦ ᑎᑭᕋᕐᔪᐊᕐᒥ − ᒫᓐᓇᓵᖑᓯᒪᓂᖓ ᐃᓱᒪᒋᑉᓗᒍ ᓄᓇᑖᖃᑕᐅᖅᑳᓚᐅᖅᓯᒪᔪᑦ ᐃᓅᔪᑦ ᓱᓕ ᐅᖃᐅᓯᖃᕈᓐᓇᖅᑐᑦ ᐱᒋᐊᕐᓂᕆᓚᐅᖅᑕᖓᓂᒃ. ᓄᓇᓕᐅᔪᖅ ᐃᓚᐅᖃᑕᐅᔪᖅ ᒐᕙᒪᑐᖃᒃᑯᑦ ᓄᓇᓕᙳᖅᑎᕆᓚᐅᖅᑕᖏᓐᓄᑦ ᐃᓄᐃᑦ ᐃᓱᒪᖅᓱᙱᖦᖢᑎᒃ ᓅᑎᖅᑕᐅᓚᐅᕐᓂᖏᓐᓄᑦ ᐱᒋᐊᖅᖢᒍ 1920-ᖏᓐᓂᒃ.

ᐊHᐃᐊᕐᒥᐅᑦ ᐃᓱᒪᖅᓱᖅᑎᑕᐅᓇᑎᒃ ᓅᑕᐅᓚᐅᖅᓯᒪᔪᑦ ᖃᑉᓰᑲᓪᓚᒃᖢᑎᒃ, ᐱᒋᐊᖅᖢᒍ 1950-ᒥ. 1957-ᒥ, ᐊHᐃᐊᕐᒥᐅᑦ ᐅᖃᖃᑦᑕᓚᐅᕋᓗᐊᖅᑎᓪᓗᒋᑦ ᓄᓇᑖᖑᑎᑕᐅᓇᓱᒃᑐᖅ ᐊᖑᓇᓱᒡᕕᑦᑎᐊᕙᐅᙱᓐᓇᔭᕐᓂᖓᓄᑦ, ᓅᑕᐅᓚᐅᕐᒥᔪᑦ ᓄᓇᒧᑦ ᖃᐅᔨᒪᙱᑕᖓᓄᑦ ᐋᖅᑭᒃᓱᕈᔾᔭᐅᓯᒪᔮᕐᓇᑎᒃ. 7 ᐊHᐃᐊᕐᒥᐅᑦ ᐃᓅᔪᓐᓃᓚᐅᖅᓯᒪᔪᑦ ᐱᕐᓕᖅᖢᑎᒃ ᑕᐃᑲᓂ ᐅᑭᐅᖑᔪᒥ. (ᐊHᐃᐊᕐᒥᐅᑦ ᐅᑕᖅᑭᔭᕆᐊᖃᓕᖅᖢᑎᒃ 60 ᐅᑭᐅᑦ ᐅᖓᑖᓂ − ᔭᓄᐊᕆ 22-ᒧᑦ ᑕᒡᕙᓂ ᐅᑭᐅᒥ − ᒐᕙᒪᑐᖃᒃᑯᓐᓄᑦ ᐊᒥᐊᕝᕕᐅᓂᐊᕐᓂᕐᒧᑦ ᑐᓂᔭᐅᑉᓗᑎᒡᓗ $5 ᒥᓕᔭᓂᒃ ᓄᒃᑎᖅᑎᕆᓚᐅᕐᓂᖏᓐᓄᑦ). 1958-ᒥ, 17 ᐃᓄᐃᑦ ᐃᓅᔪᓐᓃᓚᐅᖅᑐᑦ ᐱᕐᓕᖅᖢᑎᒃ Garry Lake-ᒥ, ᓄᓇᓕᒃ ᑕᓯᕐᔪᐊᑉ ᐅᐊᖕᓇᖓᑕ ᑲᓇᖕᓇᖅᐸᓯᖓᓃᑦᑐᖅ, ᒐᕙᒪᑐᖃᒃᑯᑦ ᑭᐅᓯᔪᓐᓇᙱᑎᓪᓗᒋᑦ ᐊHᐃᐊᕐᒥᐅᑦ ᐊᒃᓱᕈᕐᓇᖅᑐᒃᑰᓕᕐᓂᖏᓐᓄᑦ.

ᑕᐃᑲᓂ ᐅᑭᐅᒥ, ᒐᕙᒪᑐᖃᒃᑯᑦ ᓴᖅᑭᑎᑦᑎᓚᐅᖅᑐᑦ ᓄᑖᒥᒃ ᓄᓇᒋᔭᐅᓂᐊᓕᖅᑐᒥᒃ ᓯᒡᔭᒥ ᑲᖏᖅᖠᓂᐅᑉ ᐊᕐᕕᐊᓪᓗ ᐊᑯᓐᓂᖓᓂᒃ, ᑕᐃᑲᓂ ᐱᓕᕆᕝᕕᖕᓂᒃ ᓴᖅᑭᑎᑦᑎᓂᐊᕐᓂᕋᖅᖢᑎᒃ ᓲᕐᓗ ᐃᓕᓐᓂᐊᕐᕕᖕᒥ ᐊᒻᒪᓗ ᓂᐅᕕᕐᕕᖕᒥ. ᐃᓄᐃᑦ ᓄᓇᕗᒥᐅᑕᑦ, ᐃᓅᕌᓂᒃᓯᒪᔪᑦ ᑳᖕᓇᖅᑐᒃᑰᓚᐅᖅᓯᒪᒐᓗᐊᖅᓗᑎᒃ, ᑕᐃᑲᓂ ᓄᓇᑖᓚᐅᖅᓯᒪᔪᑦ, ᐊᒻᒪᓗ ᓄᓇᓕᒃ ᑎᑭᕋᕐᔪᐊᖅ ᐱᙳᖅᖢᓂ.

ᐱᒋᐊᕈᑎᖏᑦ ᐱᕙᓪᓕᐊᑎᑕᐅᓚᐅᕋᓗᐊᖅᑎᓪᓗᒋᑦ ᐊᒃᓱᕈᕐᓇᖅᑐᒃᑰᕐᓂᒃᑯᑦ, ᐅᑉᓗᒥ ᑎᑭᕋᕐᔪᐊᖅ ᐃᓄᖁᑎᖃᓕᖅᑐᖅ ᐃᓅᖄᑎᒌᑦᑎᐊᖅᑐᓂᒃ Hᐊᑭᖅᑎᖃᖅᖢᓂᓗ ᐊᒥᓱᓂᒃ ᑭᓛᒥᑕᓂᒃ ᐃᖏᕐᕋᕙᒃᑐᓂᒃ ᓯᑭᑑᒃᑯᑦ Hᐊᑭᒋᐊᖅᑐᖅᑐᓄᑦ. ᖃᑉᓰᓐᓇᐅᓂᖅᐹᖑᔪᑦ ᐃᓅᓯᕐᒥᓂᒃ ᑭᐱᓯᓲᑦ ᓄᓇᓕᖕᓂᒃ ᓄᓇᕗᒥᐅᖓᓂᒃ.

ᕕᕗᐊᕆ 2019-ᒥ ᑭᕙᓪᓕᕐᒥ ᑐᓴᒐᒃᓴᓕᕆᔨ ᑯᑎ ᐸᓐᑐᕐ ᐊᒻᒪᓗ ᓱᓯ ᓇᐸᔪᖅ−ᓱᐊᑦ ᑎᑭᕋᕐᔪᐊᓕᐊᓚᐅᖅᓯᒪᔫᒃ ᐅᓂᑉᑳᖅᑐᐊᓂᒃ ᓂᐱᓕᐅᕆᐊᖅᑐᖅᖢᑎᒃ ᐊᕐᕕᓂᓕᐅᔪᓂᒃ ᓄᓇᖅᑲᑎᒋᔭᐅᔪᓂᒃ. ᐊᕐᕕᓂᓕᖕᓂᒃ ᐱᓇᓱᐊᕈᓯᕐᓂᒃ ᖃᐃᔪᓂᒃ, ᑎᑎᕋᐅᓯᕆᓂᐊᖅᑕᖅᐳᑦ ᑕᐃᑉᑯᐊ ᐅᓂᑉᑳᖅᑐᐊᑦ ᐅᖃᖃᑎᒋᓚᐅᖅᑕᑉᑎᓐᓂᙶᖅᑐᑦ, ᒪᕐᕈᒃ ᐅᖃᖃᑎᒋᓯᒪᔭᖅᐳᑦ ᓄᓇᑖᖃᑕᐅᒋᐅᖅᑳᓚᐅᖅᓯᒪᔫᒃ, ᐊᑕᐅᓯᖅ ᐊᐃᑦᑖᖑᒐᓗᐊᖅ ᐃᓅᔪᓐᓃᓚᐅᖅᑐᖅ ᐊᕐᕌᓂ.

ᐅᑯᐊ ᐅᖃᐅᓰᑦ ᑎᑭᕋᕐᔪᐊᕐᒥᙶᖅᑐᑦ

ᑐᓴᒐᒃᓴᓕᕆᔨᐅᑉ ᐅᖃᐅᓯᖓ: ᑖᑉᓱᒪ ᐅᓂᑉᑳᖅᑐᐊᑉ ᐊᔾᔨᖓ ᓴᖅᑭᓚᐅᖅᑐᖅ ᐊᐅᔭᒃᑯᑦ 2019-ᒥ ᐅᖃᓕᒫᒐᒃᑯᑦ Walrus-ᑯᑦ. ᑕᑯᓂᐊᖅᐸᐃᑦ ᐱᓇᓱᐊᕈᓯᐅᓕᕐᒥᒃᐸᑦ ᑐᓴᒐᒃᓴᖅ ᑐᒡᓕᐊᒍᑦ ᐅᓂᑉᑳᖅᑐᐊᑉ ᐃᓚᖓ.

ᐊᓂᐊᓯ ᑏᓈᖅ

ᐊᓂᐊᓯ ᑏᓈᖅ ᐃᓐᓇᐅᓂᖅᐹᖑᖃᑕᐅᓚᐅᖅᑐᖅ ᑎᑭᕋᕐᔪᐊᕐᒥ ᐃᓅᔪᓐᓃᖅᑳᕐᓇᓂ ᐊᕐᕌᓂ. ᐃᓚᒌᑦ ᓯᕗᓪᓕᖅᐸᐅᖃᑕᐅᓚᐅᖅᑐᑦ ᓄᓇᓕᖕᒧᑦ ᓅᑕᐅᔪᓂᒃ ᒐᕙᒪᑐᖃᒃᑯᑦ ᓅᑎᕆᓕᓚᐅᖅᑎᓪᓗᒋᑦ ᐃᓄᖕᓂᒃ 1950 ᐃᓱᕈᔪᐊᓂ.

ᐊᓂᐊᓯ ᑏᓈᖅ ᐅᖃᖃᑎᒋᔭᐅᖅᑳᖅᖢᓂ ᐊᖏᕐᕋᖓᓂᒃ ᑎᑭᕋᕐᔪᐊᕐᒥ ᕕᕝᕗᐊᕆ 2019-ᒥ. ᑏᓈᖅ ᓄᓇᑖᖃᑕᐅᖅᑳᓚᐅᖅᓯᒪᔪᖅ ᑎᑭᕋᕐᔪᐊᕐᒥ ᐃᓚᒌᑦ ᓅᑕᐅᖕᒪᑕ ᒪᓪᓕᕈᐊᓕᒃᒥ Hᐊᓐᓂᖓᔫᑉ ᖃᓂᒋᔮᓂ. ᐊᕐᕌᓂ ᐃᓅᔪᓐᓃᓚᐅᖅᑐᖅ.

ᐊᓂᐊᓯᐅᔪᖓ. ᐃᒃᓯᕋᕐᔪᐊᕐᒧᑦ ᐸᑉᑎᑕᐅᓚᐅᖅᓯᒪᔪᖓ ᑖᑉᓱᒥᙵ ᐊᑦᑎᖅᖢᓂᖓ. ᐃᓄᒃᑎᑐᑦ ᐊᑎᕋ ᐊᑐᕈᓐᓃᓚᐅᖅᑕᕋ ᐸᑉᑎᑕᐅᕌᓂᒃᑲᒪ.

ᒪᒃᑯᒃᖢᖓ, ᓄᓇᒥᐅᑕᐅᓚᐅᖅᓯᒪᔪᒍᑦ ᒪᓪᓕᕈᐊᓕᒃᒥ Hᐊᓐᓂᖓᔫᑉ ᖃᓂᒋᔭᖓᓂᒃ. ᓯᓚᒦᒃᑲᐅᓚᐅᖅᑐᖓ ᐊᒻᒪᓗ ᐅᑉᓗᒥᒧᑦ ᐊᓃᕈᒪᒃᑲᐅᔪᖓ. ᐃᒡᓗᕕᒐᕐᓂᒃ ᐃᒡᓗᖃᖃᑦᑕᓚᐅᖅᑐᒍᑦ ᐅᑭᐅᒃᑯᑦ. ᐃᒡᓗᕕᒐᐃᑦ ᐃᓗᓕᖃᖃᑦᑕᓚᐅᖅᑐᑦ ᐊᕕᒃᑐᖅᓯᒪᔪᒃᑯᑦ ᐅᐸᒃᑕᐅᒐᔪᒃᑐᖅ ᐃᒡᓗ ᑕᐃᒪᐃᑉᐸᓚᐅᖅᑐᖅ. ᐊᐅᔭᒃᑯᑦ, ᕿᓯᖕᓂᒃ ᐊᒥᕐᓂᒡᓗ ᑐᐱᖃᖃᑦᑕᓚᐅᖅᑐᒍᑦ. ᒥᖅᓱᖃᑦᑕᓚᐅᖅᑕᖅᐳᑦ ᐅᕙᒍᑦ. ᑐᒃᑐᑦ ᐅᓂᖏᑦ ᐃᒐᓛᕆᖃᑦᑕᓚᐅᖅᑕᖅᐳᓪᓘᓐᓃᑦ.

ᓂᕿᒃᓴᖅᑕᖃᐃᓐᓇᖃᑦᑕᓚᐅᙱᑦᑐᖅ ᓄᓇᒋᔭᑉᑎᓐᓂᒃ. ᐅᖓᓯᒃᑐᒧᑦ ᐱᓱᓗᖃᑦᑕᓚᐅᖅᑐᒍᑦ. ᐃᓐᓇᑐᖃᐃᑦ ᐱᓱᒍᑎᖃᖃᑦᑕᓚᐅᖅᑐᑦ ᑕᑭᔪᓂᒃ ᕿᔪᖕᓂᒃ, ᐃᓐᓇᐃᑦ ᓇᒻᒪᒃᑕᑉᑎᓐᓂᒃ ᓇᒻᒪᒃᐸᒃᖢᑎᒃ, ᐊᒻᒪᓗ ᕿᒻᒦᑦ ᓇᒻᒪᖃᑦᑕᓚᐅᕐᒥᔪᑦ ᐱᖁᑎᑉᑎᓐᓂᒃ ᓴᓂᕋᒥᒍᑦ. ᐊᖑᑎᕗᑦ ᐃᓱᒪᓕᐅᖅᑎᐅᓚᐅᖅᑐᑦ ᓇᒧᙵᐅᖃᑦᑕᕐᓂᐊᕐᓂᑉᑎᓐᓄᑦ ᐊᒻᒪᓗ ᖃᖓᐅᓕᖅᐸᑦ, ᒪᓕᖃᑦᑕᓚᐅᖅᑐᒍᑦ ᑐᒃᑐᖃᕐᕕᐅᓇᓱᒋᔭᐅᔪᓄᑦ ᐊᐅᔭᒃᑯᑦ.

ᒪᕐᕈᖕᓂᒃ ᐅᐃᖃᖅᓯᒪᔪᖓ. ᐅᐃᑖᒃᑲᓐᓂᓚᐅᖅᓯᒪᔪᖓ ᐅᐃᒋᖅᑳᓚᐅᖅᑕᕋ ᐃᓅᔪᓐᓃᕐᒪᑦ. ᐅᐃᒋᖅᑳᓚᐅᖅᑕᕋ ᐊᐅᓪᓚᖅᑎᑕᐅᓚᐅᖅᓯᒪᔪᖅ ᐳᕙᒡᓗᒡᕕᖕᒧᑦ, ᐊᒻᒪᓗ ᐅᑎᓚᐅᖅᓯᒪᙱᖦᖢᓂ. ᐅᑉᓗᒥᒧᑦ, ᓇᓃᓕᕐᒪᖔᑦ ᖃᐅᔨᒪᙱᑦᑐᒍᑦ ᐅᕝᕙᓘᓐᓃᑦ ᓱᔭᐅᓚᐅᕐᒪᖔᑦ.

ᓴᑭᒪ ᐊᖑᑕᐅᓂᖅᓴᐅᑉ ᐅᖃᐅᑎᓚᐅᖅᓯᒪᔮᖓ ᐅᐃᑖᒃᑲᓐᓂᕆᐊᖃᓕᕐᓂᕋᓄᑦ ᐅᐃᑖᕆᖁᑉᓗᒍᓗ ᑏᓈᖅ. ᖁᒃᓴᓱᓚᐅᖅᑐᖓ ᑏᓈᖅ ᐊᓯᒐᓄᑦ ᐅᐃᑖᖑᖁᔭᐅᖅᑳᓚᐅᖅᓯᒪᖕᒪᑦ. ᐅᕙᒻᓂᒃ ᓄᓕᐊᖅᑖᕈᒪᓪᓚᕆᓚᐅᖅᑐᖅ. ᑕᐃᒻᓇ ᓄᓕᐊᖅᑖᖑᖁᔭᐅᔪᖅ ᓄᓕᐊᖅᑖᕆᔪᒪᙱᖦᖢᓂᐅᒃ.

ᐃᓅᖃᑎᒌᑦᑎᐊᓚᐅᖅᑐᒍᒃ. ᑕᐃᒪᐃᒻᒪᑦ, ᐃᒃᓯᕋᕐᔪᐊᕐᓘᓐᓃᑦ ᐅᔾᔨᕈᓱᓚᐅᖅᓯᒪᔪᖅ ᐃᒪᓐᓇ ᐅᖃᖅᖢᓂ “ᓴᐃᒪᑦᑎᐊᖅᑑᔭᖅᑐᓯᒃ ᐊᐃᑉᐸᕇᒃᖢᓯᒃ.” ᑏᓈᖅ ᐃᓱᒪᖅᓱᖅᑎᖃᑦᑕᓚᐅᕋᑉᑯ. ᖃᓄᐃᓕᐅᖅᑎᑦᑕᐃᓕᐊᓗᖃᑦᑕᓚᐅᙱᓐᓇᑉᑯ, ᖃᓄᐃᓕᐅᕈᒪᓕᕌᖓᑦ ᐃᓱᒪᖅᓱᖅᑎᑉᐸᒃᖢᒍ, ᑕᐃᒪᓐᓇ ᓴᐃᒪᓂᖃᓚᐅᖅᑰᖅᑐᒍᒃ.

ᑎᑭᕋᕐᔪᐊᕐᒧᑦ ᑎᑭᓚᐅᖅᓯᒪᔪᒍᒃ ᐃᑯᒪᓕᒡᔪᐊᒃᑯᑦ. ᑎᑭᕋᕐᔪᐊᖅ ᐃᓄᖃᔮᓚᐅᙱᑦᑐᖅ. ᓯᕗᓪᓕᖅᐹᖑᑦᑎᐊᖅᖢᑕ ᑕᒫᓂ ᓄᓇᑖᓚᐅᖅᓯᒪᔪᒍᑦ. ᑎᑭᓵᖅᑎᓪᓗᑕ, ᓵᒻ ᐋᕈᐊᓛᒃᑯᑦ ᐃᓚᖏᑦ ᑎᑭᓚᐅᖅᓯᒪᔪᑦ. ᐊᓕᐊᓇᐃᑦᑐᐊᓘᓚᐅᖅᑐᖅ ᑕᒫᓃᓕᖅᖢᓂ. ᒧᒥᕋᔪᓚᐅᖅᑐᒍᑦ ᐅᑉᓗᑕᒫᒃᑯᑦ. ᒧᒥᕈᒪᒃᑲᐅᑉᓗᑕ, ᐃᒡᓗᒋᔭᖅᐳᓪᓗ ᒥᑭᑦᑐᑯᓘᑉᓗᑎᒃ, ᐃᓗᓖᕈᑎᔭᕆᐊᖃᖃᑦᑕᓚᐅᖅᑕᖅᐳᑦ ᒧᒥᕈᓐᓇᖁᑉᓗᑕ. ᐅᐃᒪ ᒧᒥᖃᑎᒋᖃᑦᑕᓚᐅᖅᑖᖓ ᑲᐃᑉᔮᕈᑎᕙᒃᖢᓂᖓ. ᐊᖏᔪᐊᓘᓚᐅᕐᒪᑦ. ᐊᑕᐅᓯᕐᒥ ᐅᓐᓅᔪᒥ ᒧᒥᑲᑕᓐᓇᒃᑲᑉᑕ − ᐅᓇ ᐅᑉᐱᕆᔾᔮᙱᑕᓯ − ᑭᓯᐊᓂ ᓇᑎᖓᓘᓐᓃᑦ ᓯᖁᒥᓚᐅᖅᓯᒪᔭᖅᐳᑦ. ᐊᐃᑦᑖ, ᑕᐃᒪᐃᑦᑐᐊᓘᓚᐅᖅᑐᒍᑦ.

11-ᓂᒃ ᓄᑕᕋᖃᓚᐅᖅᑐᖓ. ᐊᖓᔪᒃᖠᖅᐹᕋ ᐸᓂᒐ Hᐊᓐᓂᖓᔪᓂ ᓅᑕᐅᓚᐅᖅᓯᒪᔪᖅ ᐃᒡᓗᓕᒑᕐᔪᖕᒧᑦ ᐃᓕᓐᓂᐊᕆᐊᖅᑎᑕᐅᑉᓗᓂ. ᐊᖓᔪᒃᖠᐊᓘᓕᖅᖢᓂ ᐅᑎᓚᐅᖅᓯᒪᔪᖅ.

ᐃᓐᓇᕈᓕᓵᖅᖢᖓ ᐃᓕᖅᑯᓯᑐᖃᑎᒍᑦ ᐃᓕᓐᓂᐊᖅᑎᑦᑎᔨᙳᓚᐅᖅᓯᒪᔪᖓ ᐃᓕᓐᓂᐊᕐᕕᖕᒥ. ᐃᕐᓂᓱᒃᓰᔨᐅᓚᐅᕐᒥᔪᖓ. ᐊᑕᐅᓰᖅᖢᑕ, ᑲᑉᐱᐊᓇᖅᑐᒃᑰᓚᐅᖅᓯᒪᔪᒍᑦ ᐊᕐᓇᖅ ᐃᕐᓂᓱᒃᑐᖅ ᖃᐅᔨᒪᔪᓐᓃᕐᒪᑦ, ᐊᑯᓂ ᖃᐅᔨᒪᔪᓐᓃᖅᓯᒪᑉᓗᓂ. ᒎᑎ ᖁᔭᒋᔭᕋ ᑲᒪᒋᑦᑎᐊᙱᓐᓇᓚᐅᕋᑉᑯ ᖃᓄᐃᑦᑐᓐᓃᓚᐅᕐᒪᑦ.

ᐊᕐᕕᐊᓄᑦ ᓅᓚᐅᖅᓯᒪᔪᖅ. ᐸᓂᑯᓗᐊ ᐃᓐᓇᕈᖅᖢᓂ. ᖃᐅᔨᒐᒥ ᑭᓇᐅᖕᒪᖔᕐᒪ ᐊᒻᒪᓗ ᐃᕐᓂᓱᒃᓰᖃᑕᐅᓚᐅᕐᓂᕋᓄᑦ ᐃᓅᓕᖅᑎᓪᓗᒍ, ᐸᓂᑯᓗᓂ ᐅᕙᒻᓂᒃ ᐊᑦᑎᓚᐅᖅᑕᖓ. ᖃᑯᑎᒃᑯᑦ ᑕᑯᖃᑦᑕᖅᑕᕋ. ᐊᓈᓇᒥᓂᒃ ᖃᐅᔨᒪᔪᓐᓃᖅᑎᑦᑎᓚᐅᖅᑐᑯᓗᒃ ᐃᓐᓇᐅᓕᖅᑐᖅ, ᖃᓄᐃᙱᑦᑐᑯᓗᒃ.

ᐱᖏᒋᖃᑦᑕᖅᑕᒃᑲ ᓄᑕᕋᒃᑲ ᐃᕐᖑᑕᒃᑲᓗ − ᐃᓚᒃᑲᓗ. ᐃᕐᖑᑕᒃᑲ ᐃᓕᑕᕆᔭᐅᓯᒪᔪᒪᔪᑦ ᖃᑉᓗᑖᑎᑐᑦ. ᐊ’ᐋᕌᓗᒃ ᖃᐅᔨᒪᑉᓗᖓ ᐃᓄᒃᑎᑑᖃᑦᑕᙱᓐᓂᖏᓐᓄᑦ. ᐃᓄᒃᑎᑐᐃᓐᓇᖅ ᐅᖃᓪᓚᒃᑐᓂᒃ ᑐᓵᖃᑦᑕᓚᐅᕋᒪ ᐱᕈᖅᓴᑉᓗᖓ. ᑕᐃᒪᑐᖅ ᐃᓅᓯᖃᑦᑎᐊᕐᓂᐊᖅᐳᑦ ᑕᑯᑎᑦᑎᖃᑦᑕᕐᓂᐊᖅᐳᑦᑐᕐᓗ ᓇᒡᓕᖕᓂᕐᒥᒃ ᐃᒃᐱᒍᓱᒍᓐᓇᕐᓂᕐᒥᒃ ᐊᒻᒪᓗ ᐊᒥᖅᑳᖃᑎᖃᕈᓐᓇᕐᓂᕐᒥᒃ, ᑕᐃᒪᓐᓇ ᐅᖃᐅᑎᓇᓱᖃᑦᑕᖅᑕᒃᑲ ᑕᐃᒪᓐᓇ ᐃᓅᓇᓱᖁᑉᓗᒋᑦ. ᑕᐃᒪᓐᓇᑦᑕᐅᖅ ᓄᓇᖅᑲᑎᒃᑲ ᐃᓅᖁᔭᒃᑲ.

ᒐᕙᒪᓕᕆᓂᕐᒥᒃ ᐅᖃᐅᓯᖃᓗᐊᕈᓐᓇᙱᑦᑐᖓ. ᐃᓅᓇᓱᐊᕋᒪ ᐱᑦᑎᐊᕈᑎᖃᑦᑕᖁᔨᑉᓗᖓ. ᑕᐃᒪᓐᓇ 87-ᓂᒃ ᐅᑭᐅᖅᑖᖅᓯᒪᓕᖅᑐᖓ. ᐱᐅᓂᖅᐹᖑᓇᓱᒋᔭᕋ ᐃᓅᓇᓱᒋᐊᖃᕐᓂᖅ ᓴᐃᒪᓂᒃᑯᑦ. ᑕᐃᒪᓐᓇ ᓄᑕᖅᑲᒃᑲ ᐃᓅᖁᔭᒃᑲ, ᑭᖑᕚᒃᑲᓗ ᓄᓇᑉᑎᓐᓂᒃ, ᓴᐃᒪᓂᕐᒥᒃ ᐃᓅᔪᓐᓇᖁᑉᓗᒋᑦ ᐅᑭᐅᓂᒃ ᖃᐃᔪᓂᒃ.

(ᑐᑭᓕᐊᖑᓯᒪᔪᖅ ᐃᓄᒃᑎᑐᑦ ᓴᖅᑭᑎᑕᐅᖅᑳᖅᖢᓂ)

Advertisement

Leave a comment

Your email address will not be published. Required fields are marked *