ᐅᑭᐅᖑᔪᖅ ᑲᖏᖅᖠᓂᕐᒥ ᐃᖃᓗᒡᔪᐊᕋᓱᒃᑐᑦ ᑲᔪᓯᓂᖃᑦᑎᐊᓚᐅᖅᑐᑦ ᒪᐃ 15-ᒥ 18-ᒧᑦ, ᐊᔾᔨᐅᙱᑦᑐᒃᑯᑦ ᑲᒪᒋᔭᐅᓚᐅᕋᓗᐊᖅᑎᓪᓗᒍ ᒪᓕᒃᑕᐅᔭᕆᐊᓖᑦ ᑕᐃᒪᐅᓚᐅᕐᒪᑕ ᓄᕙᒡᔪᐊᕐᓂᖅ19 ᐱᔾᔪᑎᒋᑉᓗᒍ.

ᓄᑕᕋᖅ ᐃᖃᓗᒐᓱᒃᑎ ᑐᕈᐃ ᖃᓗᔾᔭᖅ ᐊᖏᓛᖑᔪᒥᒃ ᐃᖃᓗᓚᐅᖅᑐᖅ $10,000.00-ᑖᖅᖢᓂ ᐃᖃᓗᖓᑕ ᑕᑭᓂᖓ 45.5 inches-ᖑᓚᐅᖅᑐᖅ, ᓴᓚᒪᓐ ᕗᐊᑦ ᐊᒻᒪᓗ ᐊᐃᕆᔅ ᑕᑎ−ᑕᓄᔭᐅᑉ ᐃᖃᓘᑎᖏᑦ ᐊᔾᔨᒌᖕᓂᒃ ᑕᑭᓂᖃᖅᖢᑎᒃ ᐊᑐᓂ $7,000-ᑖᓚᐅᖅᑑᒃ ᐃᖃᓗᖏᑦᑕ ᑕᑭᓂᖏᒃ 44 7/8 inches-ᖑᑉᓗᑎᒃ ᐊᒻᒪᓗ ᐋᔅᑲ ᐊᐃᕈᑦ ᓯᑕᒪᒋᔭᐅᓚᐅᖅᑐᖅ $5,000-ᑖᖅᖢᓂ ᐃᖃᓗᖓᑕ ᑕᑭᓂᖓ 44 5/8 inches-ᖑᑉᓗᓂ.

ᓇᓇᐅᖅ ᑕᓄᔭᖅ ᑎᒍᒥᐊᖅᑐᖅ ᓄᓕᐊᖓᑕ ᐃᖃᓗᔾᔪᐊᖅᓯᒪᔭᖓᓂᒃ, ᐊᐃᕆᔅ ᑕᑎ−ᑕᓄᔭᐅᑉ ᐃᖃᓗᒡᔪᐊᖅᑕᖓ, ᑐᒡᓕᕆᔭᐅᖃᑕᐅᓚᐅᕐᒪᑦ ᐊᕕᖃᑎᖃᖅᖢᓂ ᑲᖏᖅᖠᓂᕐᒥ ᐃᖃᓗᒡᔪᐊᕋᓱᒃᑎᓪᓗᒋᑦ, ᒪᐃ 19-ᒥ. ᐊᔾᔨ ᓱᓴᓐ Hᐃᒃᔅᒥᙶᖅᑐᖅ

ᐊᓯᖏᑦ ᐃᖃᓗᒡᔪᐊᖅᑐᑦ ᐋᒻᐳ ᐅᕐᕕᓐ ᑕᓪᓕᒪᒋᔭᐅᓚᐅᖅᑐᖅ $4,000-ᑖᖅᖢᓂ ᐃᖃᓗᖓᑕ ᑕᑭᓂᖓ 44.5 inches-ᖑᓚᐅᖅᑐᖅ, ᓇᑕᓂᐅ ᖃᓗᔾᔭᖅ ᐊᕐᕕᓂᓕᒋᔭᐅᓚᐅᖅᑐᖅ $3,000-ᑖᖅᖢᓂ ᐃᖃᓗᖓᑕ ᑕᑭᓂᖓ 44 inches-ᖑᓚᐅᖅᑐᖅ, ᕆᑦᓱᑦ ᓇᑦᑕ 7-ᒋᔭᐅᓚᐅᖅᑐᖅ $2,000-ᑖᖅᖢᓂ ᐃᖃᓗᖓᑕ ᑕᑭᓂᖓ 43 13/16 inches-ᖑᓚᐅᖅᑐᖅ, ᐊᒻᒪᓗ ᑯᕆᔅ ᐃᑯᔅ 8-ᒋᔭᐅᓚᐅᖅᑐᖅ $1,000-ᑖᖅᖢᓂ ᐃᖃᓗᖓᑕ ᑕᑭᓂᖓ 43 1/8-ᖑᓚᐅᖅᑐᖅ.

ᐃᖃᓗᒡᔪᐊᕋᓱᒃᑐᑦ ᑲᑎᒪᔨᕋᓛᖏᓐᓂᒃ ᑲᑎᒪᔨᐅᖃᑕᐅᔪᖅ ᓱᓴᓐ Hᐃᒃᔅ ᐅᖃᖅᖢᓂ ᐃᖃᓗᒡᔪᐊᕋᓱᒃᑐᑦ ᑲᔪᓯᓂᖃᑦᑎᐊᓚᐅᕐᒪᑕ ᓯᓚᓗᓚᐅᕋᓗᐊᖅᑎᓪᓗᒍ ᐃᖃᓗᓪᓕᐊᖅᓯᒪᔪᑦ ᑐᐱᕐᒥᓃᓐᓂᖅᓴᐅᓚᐅᖅᑐᑦ ᓴᓇᑦᑕᐃᓕᐊᕈᓯᕐᒥ ᒪᐃ 16-ᒥ, ᓄᓇᒦᖦᖢᑎᒃ ᐃᖃᓗᒐᓱᒡᕕᒋᕙᒃᑕᒥᓂᒃ.

ᐅᖃᖅᖢᓂ ᓵᓚᒃᓴᖅᑕᐅᔪᒡᒎᖅ ᐅᖃᐅᓯᐅᓂᖏᑦ ᓇᐃᓐᓂᖅᓴᒻᒪᕆᐊᓘᓚᐅᖅᑐᖅ ᐊᓯᖏᓐᓂᒃ ᐅᑭᖑᔪᓂᐅᖓᓂᒃ.

“ᐅᑭᐅᑕᒫᒃᑯᑦ ᐃᓄᐃᑦ ᑲᑎᖃᑦᑕᖅᓯᒪᖕᒪᑕ ᓯᖐᑦᑐᖅ ᐱᙳᐊᕐᕕᖕᒥ ᑐᓂᐅᖅᑲᐃᓂᐊᖅᑎᓪᓗᑕ ᓵᓚᒃᓴᒐᒃᓴᓂᒃ, ᑭᓯᐊᓂ ᑕᐃᒪᐃᑦᑐᓐᓇᓚᐅᙱᓐᓇᑉᑕ ᓄᕙᒡᔪᐊᕐᓂᖅ -19 ᐱᔾᔪᑎᒋᑉᓗᒍ,” ᑕᐃᒪᓐᓇ ᐅᖃᖅᖢᓂ Hᐃᒃᔅ.

“ᑕᒪᕐᒥᒃ ᓵᓚᒃᓴᖅᑐᑦ ᐅᖃᐅᓯᕆᓚᐅᖅᑕᖅᐳᑦ Facebook-ᑯᑦ ᐊᒻᒪᓗ ᓈᓚᐅᑎᐊᓛᒃᑯᑦ ᑕᒡᕙᓂ ᐅᑭᐅᖑᔪᒥ, ᕿᓚᒥᐊᓗᒃ ᐱᐊᓂᓚᐅᖅᑐᒍᑦ.”

“ᑕᒪᓐᓇ ᑲᒪᒋᒐᔪᒃᑲᓗᐊᕋᑉᑎᒍᑦ ᒪᕐᕉᖕᓂᒡᓘᓐᓃᑦ ᐃᑲᕐᕋᓂᒃ ᑐᓂᐅᖅᑲᐃᓂᖅ ᓵᓚᒃᓴᖅᑐᓄᑦ ᑭᓯᐊᓂ, ᐅᑭᐅᖑᔪᖅ, ᓯᑕᒪᐃᓐᓇᐅᑉᓗᑕ ᑕᐃᑲᓂ, ᓵᓚᒃᓴᖅᑐᑦ ᐊᐃᒃᖠᖃᑦᑕᓚᐅᖅᑐᑦ ᓵᓚᒃᓴᖅᑕᒥᓂᒃ, ᐊᔾᔨᓕᐅᖅᑕᐅᕙᒃᖢᑎᒡᓗ ᖁᕕᐊᓱᖃᑎᒋᑉᓗᒋᑦ ᐊᒻᒪᓗ ᐱᐊᓂᒃᑳᖓᑕ ᐊᓂᕙᒃᖢᑎᒃ.

“ᑕᐃᒪᐃᒻᒪᑦ ᐃᒻᒪᖄ ᐱᓕᕆᓚᐅᖅᑐᒍᑦ 45 ᒥᓂᑦᓂᒃ ᑕᒡᕙᓂ ᐅᑭᐅᒥ.”

Hᐃᒃᔅ ᐅᖃᖅᖢᓂ ᕿᓚᒥᐅᓂᖅᓴᕉᖅ ᐆᒃᑐᕋᐃᓚᐅᕐᒥᔪᑦ, ᓯᓚ ᓈᒻᒫᓂᙱᒃᑲᓗᐊᖅᑎᓪᓗᒍ.

ᐅᖃᖅᖢᓂ ᓱᓇᓗᒃᑖᒡᒎᖅ ᑲᔪᓯᓂᖃᑦᑎᐊᓚᐅᖅᑐᑦ ᐃᓄᐃᑦ ᐊᒥᓱᑦ ᑲᑎᒪᙱᖦᖢᑎᒃ ᑕᐅᑐᒋᐊᖅᑐᖅᓯᒪᓇᔭᓚᐅᖅᑐᑦ ᐆᒃᑐᕋᖅᑐᓂᒃ.

ᐃᓄᐃᑦ ᓄᓇᒃᑰᕈᑎᒥᒍᑦ ᖃᐃᑐᐃᓐᓇᖃᑦᑕᓚᐅᖅᑐᑦ, ᐃᖃᓗᖏᑦ ᐆᒃᑐᕋᖅᑕᐅᑉᓗᑎᒃ ᐊᒻᒪᓗ ᐊᖏᕐᕋᐅᓕᖅᖢᑎᒃ, ᑕᐃᒪᐃᒻᒪᑦ ᓱᑲᓂᖅᓴᐅᔫᔭᓚᐅᖅᑐᖅ.

“ᐃᓄᐃᑦ ᖁᕕᐊᓱᑦᑎᐊᖅᑑᔭᓚᐅᖅᑐᑦ ᐱᓕᕆᐊᖑᔪᑦ ᒥᒃᓵᓄᑦ ᑭᓯᐊᓂ ᓯᓚᓗᓚᐅᕐᓂᖓ ᓴᓇᑦᑕᐃᓕᐊᕈᓯᕐᒥ ᖁᕕᐊᒋᔭᐅᙱᑦᑐᑑᓚᐅᖅᑐᖅ.

“ᖃᒪᓂᕐᒦᓚᐅᕋᑉᑕ ᐅᖓᓯᒃᑐᒧᑦ ᑕᑯᔪᓐᓇᐃᓪᓕᖃᑦᑕᓚᐅᖅᑐᒍᑦ. ᑐᐱᑉᑎᓐᓃᖏᓐᓇᓕᓚᐅᖅᑐᒍᑦ ᐅᑉᓛᒃᑯᑦ ᐊᒻᒪᓗ ᐅᑉᓘᑉ ᐃᓚᖓᓂᒃ.

“ᓯᓚ ᐱᐅᓂᖅᓴᐅᓕᓚᐅᖅᑐᖅ ᐅᓐᓄᒃᓴᓕᕐᒪᑦ ᐊᒻᒪᓗ ᓯᓚᑦᑎᐊᕙᙳᑦᑎᐊᖅᖢᓂ ᑕᐃᑲᙵᑦ ᐱᒋᐊᖅᖢᒍ ᐱᓇᓱᐊᕈᓯᐅᑉ ᓄᙳᐊᑕ ᐃᓱᐊᓄᑦ.”

Advertisement

Darrell Greer

Darrell Greer is Editor of Kivalliq News