ᒋᐳᕆᐅᓪ (ᒋᑉ) ᔨᓕ ᐱᒋᐊᖅᑎᑦᑎᖃᑕᐅᓯᒪᔪᖅ ᐱᕙᓪᓕᐊᑎᑦᑎᓂᕐᒧᑦ ᖁᕝᕙᖅᑎᕆᓂᕐᒧᓪᓗ ᐃᓄᐃᑦ ᓴᓇᙳᐊᖅᓯᒪᔭᖏᓐᓂᒃ ᐅᑭᐅᖅᑕᖅᑐᒥ 25 ᐅᑭᐅᑦ ᐅᖓᑖᓂ.

ᑎᑎᕋᐅᔭᖅᑎᐅᑉᓗᓂᑦᑕᐅᖅ ᑎᑎᕋᐅᔭᖅᓯᒪᔭᖏᑦ ᐅᑭᐅᖅᑕᖅᑐᒥᐅᑕᑦ ᖃᐅᔨᒪᔭᐅᑦᑎᐊᖅᖢᑎᒃ, ᐊᔾᔨᓕᐅᕆᖃᑦᑕᖅᓯᒪᓂᖓ ᖃᐅᔨᒪᔭᐅᔪᑑᙱᑦᑐᖅ.

ᒋᐳᕆᐅᓪ ᔨᓕ, ᓴᐅᒥᖅᖠᕐᒦᑦᑐᖅ, ᐋᓂ ᓯᕗᐃ (ᐊᓕᑲᓱᐊᖅ), ᐊᑕᔅᓗᒃ ᐊᒻᒪᓗ ᐅᐃᖓ, ᔭHᐊ, ᕿᒥᕐᕈᔪᑦ ᓴᓇᙳᐊᒐᓂᒃ ᐊᕐᕕᐊᓂ 1967-ᒥ.

ᔨᓖ ᐊᒥᓱᓂᒃ ᑲᑎᑦᑎᓯᒪᖕᒪᑦ ᑎᑎᕋᐅᔭᖅᓯᒪᔪᓂᒃ ᑲᑎᑦᑎᒋᐊᓚᐅᖅᓯᒪᔪᖅ 1954-ᒥ 1987-ᒧᑦ. ᐊᔾᔩᑦ ᐊᔾᔨᓕᐊᕆᓯᒪᔭᖏᑦ ᐃᓄᐃᑦ ᐊᒻᒪᓗ ᓄᓇᓕᖕᓂ ᐊᔾᔨᓕᐅᕆᓯᒪᓂᖓ ᐅᑭᐅᖅᑕᖅᑐᒥ.

ᑲᑎᑦᑎᖃᑦᑕᖅᓯᒪᔪᑦ ᑲᑕᕆ ᓅᓪᔅ ᐊᒻᒪᓗ ᓱᓴᓐ Hᐊᐅ ᐱᔫᒥᒍᓱᓕᓚᐅᖅᓯᒪᔫᒃ ᔨᓖ ᑎᑎᕋᐅᔭᖅᓯᒪᔭᖏᓐᓂᒃ, ᐊᔾᔨᓕᐅᕆᓯᒪᔭᖏᓐᓂᒃ ᐊᒻᒪᓗ ᐃᓅᓯᖓᑕ ᐅᓂᑉᑳᖅᑐᐊᖓᓂᒃ ᐊᒻᒪᓗ, 2014-ᒥ, ᑐᓂᓯᓚᐅᖅᑐᑦ ᐊᔾᔨᓕᐅᖅᓯᒪᔭᖏᓐᓂᒃ ᑲᑎᖅᓱᖅᓯᒪᔭᖏᓐᓂᒃ ᐃᑦᓴᕐᓂᑕᖃᕐᕕᖕᒧᑦ ᒪᓂᑑᐸᐅᑉ ᓯᓚᑦᑐᖅᓴᕐᕕᒡᔪᐊᖓᓂᒃ.

ᒪᓂᑑᐸᐅᑉ ᐃᑦᓴᕐᓂᑕᖃᕐᕕᖓᓂᒃ ᐊᖓᔪᖅᑳᖑᓚᐅᖅᑐᖅ ᖃᐅᔨᓴᖅᑎᐅᓚᐅᖅᑐᕐᓗ/ᐃᑲᔪᖅᑎᐅᓚᐅᖅᑐᖅ ᑲᑕᕆ ᐱᑎᐸᔅ, ᔨᓖᓗ, 96-ᓂᒃ ᐅᑭᐅᖃᓕᖅᑐᖅ, ᐱᔫᒥᒍᓱᓕᓚᐅᖅᑐᕈᖅ ᐃᓄᐃᑦ ᓴᓇᙳᐊᒐᖏᓐᓂᒃ ᕿᒥᕐᕈᖅᑳᖅᖢᓂ ᐱᐅᕆᔅᒥ, ᕗᕌᓐᔅᒥ, ᑐᒡᓕᐊᒍᑦ ᐅᓇᑕᕐᔪᐊᖅᑐᓂᒃ ᐅᓇᑕᖃᑕᐅᖅᑳᖅᖢᓂ.

ᐱᑎᐸᔅ ᐅᖃᖅᖢᓂ 1952-ᖑᓕᖅᑎᓪᓗᒍᒎᖅ ᐅᓇᑕᕐᔪᐊᖅᑐᓂᙶᓵᖅᑐᖅ ᑮᓇᐅᔭᖃᓕᓚᐅᕋᒥ ᑲᓇᑕᒧᙵᐅᔾᔪᑎᒋᔪᓐᓇᖅᑕᒥᓂᒃ. ᑎᑭᓵᖅᖢᓂ ᑲᓇᑕᒧᑦ, ᔨᓖ ᐃᒐᔨᐅᓚᐅᖅᑐᖅ ᒐᕙᒪᒃᑯᑦ ᐃᖏᕐᕋᔭᒃᑐᓕᕆᔨᒃᑯᖏᓐᓄᑦ ᓯᓚᓕᕆᕝᕕᖕᒥ ᑲᖏᖅᑐᒑᐱᖕᒥ ᕿᑭᖅᑖᓗᖕᒥ.

ᐅᖃᖅᖢᓂ 1954-ᒥ 1955-ᒧᑦ, ᔨᓖ ᐃᑲᔪᓚᐅᖅᑐᖅ ᐱᕐᓕᓕᖅᑐᓂᒃ ᐃᓚᒌᖕᓂᒃ ᓂᕿᑖᖅᑎᑦᑎᕙᒃᖢᓂ ᐱᓕᕆᕝᕕᖕᒥᓂᙶᖅᑐᓂᒃ ᓴᓇᑉᓗᓂ ᓯᓚᓕᕆᕝᕕᖕᒥ ᐃᓂᑕᐃ ᓖᒃᒥ, ᐃᓅᖃᑎᖃᖅᖢᓂ ᐊHᐃᐊᕐᒥᐅᑕᓂᒃ.

ᓄᓇᖅᑲᑎᒌᑦ ᔨᓖᒥᒃ ᖃᐅᔨᒪᓚᐅᖅᑐᑦ ᐃᒪᓐᓇ ᑕᐃᖃᑦᑕᖅᖢᒍ ᑕᕌᒥ (ᐊᑖᓂ), ᒐᕙᒪᒃᑯᑦ ᐃᖏᕐᕋᔪᓕᕆᔨᒃᑯᖏᑦᑕ ᓂᕿᖏᑦ ᐊᑖᓃᖃᑦᑕᓚᐅᕐᒪᑕ,” ᑕᐃᒪᓐᓇ ᐅᖃᖅᖢᓂ ᐱᑎᐸᔅ. “ᒋᑉ ᐃᖏᕐᕋᔭᒃᖢᓂ ᐱᐊᓂᒃᓯᓚᐅᖅᑐᖅ ᓅᑲᑕᖕᓂᕆᔭᕐᒥᓂᒃ ᐃᒐᔨᒋᔭᐅᖅᑳᖅᖢᓂ ᒐᕙᒪᒃᑯᑦ ᐃᖏᕐᕋᔪᓕᕆᔨᒃᑯᖏᓐᓄᑦ ᐃᑲHᐅᒃᒥ.”

ᐱᑎᐸᔅ ᐅᖃᖅᖢᓂ 1960-ᒥ, ᔨᓖ ᓴᓇᔨᒋᔭᐅᓕᓚᐅᕐᒪᑦ ᓴᓇᙳᐊᒐᓕᕆᔨᐅᑉᓗᓂ ᐃᓄᓕᕆᔨᑐᖃᒃᑯᓐᓄᑦ.

ᐅᖃᖅᖢᓂ ᔨᓖ ᖃᒪᓂ’ᑐᐊᕐᒦᓚᐅᖅᑐᖅ 1963-64-ᒥ; ᐊᑐᕚᒥ 1965-66-ᒥ; ᐊᒻᒪᓗ ᐊᕐᕕᐊᓂ ᔭᓄᐊᕆᒥ ᒪᐃᒧᑦ 1966-ᒥ ᐊᒻᒪᓗ ᐊᕐᕕᐊᓃᒃᑲᓐᓂᓚᐅᖅᖢᓂ 1970-ᒥ 71-ᒧᑦ.

ᒪᐃᑯ ᓲᑕᐃᔅ ᑲᖏᖅᖠᓂᕐᒥᐅᑕᖅ, ᐊᖓᔪᖅᑳᕆᔭᐅᓚᐅᖅᓯᒪᔪᖅ ᓄᓇᕗᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ, ᐅᖃᓚᐅᖅᓯᒪᔪᖅ 2017-ᒥ ᐅᖃᖃᑎᒋᔭᐅᑎᓪᓗᒍ ᔨᓖ ᒥᒃᓵᓄᑦ ᐃᒪᓐᓇ “ᔨᓖ ᐊᔾᔨᓕᐅᕈᑎᓕᔭᐃᓐᓇᖃᑦᑕᓚᐅᖅᑐᖅ ᐱᙳᐊᕆᓂᕋᖅᖢᓂᐅᒃ.”

ᐅᖃᖃᑎᖃᖅᖢᓂ ᑭᕙᓪᓕᕐᒥ ᓂᐱᒃᑯᓐᓂᒃ ᐱᓇᓱᐊᕈᓯᐅᓚᐅᖅᑐᒥ, ᓲᑕᐃᔅ ᐅᖃᓚᐅᖅᑐᖅ ᐅᖃᖃᑎᖃᖃᑦᑕᕋᒥ ᓱᓕᒎᖅ ᔨᓖᒥᒃ ᖃᑯᑎᒃᑯᑦ ᖃᕆᑕᐅᔭᒃᑯᑦ, ᔨᓖ ᓴᙲᓕᕙᓪᓕᐊᔫᒐᓗᐊᖅ ᒫᓐᓇᐅᔪᖅ. ᓲᑕᐃᔅ ᐅᖃᖅᖢᓂ ᑕᑯᔭᕆᐅᓚᐅᖅᓯᒪᒐᒥᐅᒃ ᔨᓖ ᐊᕐᕕᐊᓄᑦ ᑎᑭᒋᐅᕋᒥ 1970-ᖏᓐᓂᒃ.

ᐅᖃᖅᖢᓂ ᔨᓖᒎᖅ ᐃᒃᓯᕋᕐᔪᐊᖑᔪᒥᓇᑦᑎᐊᓚᐅᖅᑐᖅ.

ᐅᖃᖃᑦᑕᓚᐅᕐᒪᑦ ᐅᖃᓪᓚᒃᖢᓂ ᐅᐃᕕᑎᑐᑦ ᐅᖃᓪᓚᒃᖢᓂ ᐃᒪᓐᓇ, “Hᐊᓘ, ᐊᑖᑕ ᒌᑉ ᔨᓖᖑᔪᖓ,” ᐊᑖᑕᐅᓚᐅᖅᑐᖅ ᒪᕐᕈᖕᓂᒃ ᐃᕐᓂᖃᕋᒥ,” ᑕᐃᒪᓐᓇ ᐅᖃᖅᑐᖅ ᐃᒡᓚᖅᖢᓂ ᓲᑕᐃᔅ.

ᒌᑉ ᑎᑉᓯᓇᒃᑲᒻᒪᕆᐊᓘᖕᒪᑦ, ᐃᓄᓕᕆᔨᓪᓚᕆᐅᑉᓗᓂ ᐊᒻᒪᓗ ᐃᓄᖕᓂᒃ ᓇᒡᓕᒍᑦᑕᐅᑉᓗᓂ. ᐱᓱᖃᑎᒋᑉᓗᒍ ᐊᕐᕕᐊᑦ ᐃᓱᐊᓂ ᐃᓱᒃᑲᓐᓂᖓᓄᑦ ᐊᑯᓂ ᐱᓱᖕᓇᖃᑦᑕᓚᐅᖅᑐᖅ ᒌᑉ ᖃᐅᔨᒪᔭᐅᓪᓚᕆᓚᐅᕐᒪᑦ ᐅᖃᖃᑎᒋᔭᐅᔪᒪᒐᔪᒃᖢᓂᓗ. ᑕᒪᐃᓐᓂᒃ ᐃᓄᖕᓂᒃ ᖃᐅᔨᒪᓚᐅᖅᑐᖅ ᐊᒻᒪᓗ ᑕᐸᓱᕈᓘᔭᖅᐸᒃᖢᓂ ᑕᒪᐃᓐᓂᒃ. ᐅᕙᒻᓄᓪᓕ ᐊᔾᔨᓕᐊᖏᑦ ᖁᕕᐊᓇᖅᑐᐃᓐᓇᐅᓚᐅᙱᑦᑐᑦ ᑭᓯᐊᓂᓕ ᐃᓅᓯᖓ ᐅᐱᓐᓇᖅᑐᒻᒪᕆᐊᓘᓚᐅᖅᑐᖅ.

ᓲᑕᐃᔅ ᐅᖃᖅᖢᓂ ᔨᓖ ᐊᓕᐊᓇᐃᒋᔭᖃᓚᐅᕐᒪᑦ ᐊᔾᔨᓂᒃ ᐱᙳᖅᑎᑦᑎᔨᐅᓂᕐᒧᑦ.

ᐊᔾᔨᓂᒃ ᑲᒪᒋᐊᕐᕕᖕᒥ ᐃᒡᓗᑕᖃᓚᐅᕋᑉᑕ ᐃᓄᓕᕆᔨᑐᖃᒃᑯᑦ ᑎᑎᕋᕐᕕᖓᓂᒃ. ᐊᔾᔨᒃᓴᐃᑦ ᑲᒪᒋᐊᓂᒃᑳᖓᑉᑎᒍᑦ ᓴᖅᑭᓐᓂᐊᕐᓂᖏᓐᓂᒃ ᐅᑕᖅᑭᑎᓪᓗᑕ, ᒌᑉ ᐃᒪᓐᓇ ᐅᖃᖃᑦᑕᓚᐅᖅᑐᖅ, “ᑕᒡᕙ ᐅᐱᓐᓇᖅᑐᖅ ᓴᖅᑭᓐᓂᐊᓕᖅᐳᖅ.”

Advertisement

Darrell Greer

Darrell Greer is Editor of Kivalliq News

Leave a comment

Your email address will not be published. Required fields are marked *