ᐃᖅᑲᐅᒪᓂᕐᒧᑦ ᐅᑉᓗᕐᒥ ᖃᓄᐃᓕᐅᕈᑕᐅᕙᒃᑐᑦ ᑲᓇᑕᒥ ᐊᓯᔾᔨᖅᓯᒪᓚᐅᕋᓗᐊᖅᑎᓪᓗᒋᑦ ᐅᑭᐅᖅ ᓄᕙᒡᔪᐊᕐᓂᖅ -19 ᐱᔾᔪᑎᒋᑉᓗᒍ, ᐱᒻᒪᕆᐊᓗᒃ ᐅᓇᑕᕆᐊᕈᔾᔭᐅᓚᐅᕋᑉᑕ ᐃᖅᑲᐅᒪᔭᕆᐊᖃᖅᑕᖅᐳᓪᓗ ᐱᓕᕆᔾᔪᔾᔨᓚᕆᓚᐅᖅᑐᑦ.

ᐊᑯᓂ ᑲᓇᑕᒥ ᓖᔾᔭᓐ 169-ᑯᓐᓄᑦ ᐃᓚᒋᔭᐅᖃᑕᐅᓕᖅᑐᖅ ᑎᐅᕆᓐ ᓂᑯᓪ ᑲᖏᖅᖠᓂᕐᒥᐅᑕᖅ ᐅᖃᖅᖢᓂ ᓖᔾᔭᒃᑯᑦ ᐱᓕᕆᖃᑎᖃᓚᐅᕐᒪᑕ Hᐊᒻᓚᒃᑯᓐᓂᒃ ᑲᔪᓯᖁᑉᓗᒍ ᐅᑭᐅᖅ ᐃᖅᑲᐅᒪᓂᕐᒧᑦ ᐅᑉᓗᒃᑯᑦ ᖃᓄᐃᓕᐅᕈᑕᐅᕙᒃᑐᖅ.

3,000 ᐅᖓᑖᓃᑦᑐᑦ ᑐᒡᓕᐊᓂ ᐅᓇᑕᕐᔪᐊᖅᑐᓂᒃ ᐃᓅᔪᓐᓃᓚᐅᖅᑐᑦ, ᐊᒥᓱᑦ ᑲᓇᑕᒥᐅᑕᑦ, ᐳᕐᓕᓐᒥ ᐃᓗᕕᖃᕐᕕᖕᒦᑦᑐᑦ ᓴᐅᓕᑦᐳᕐᒡ ᔪᒪᓂᒥ. ᐊᔾᔨ ᑎᐅᕆᓐ ᓂᑯᓪᒥᙶᖅᑐᖅ

ᐅᖃᖅᖢᓂ ᖃᓄᐃᓕᐅᕈᑏᑦ ᑲᔪᓯᓂᐊᕐᒪᑕ ᐅᑉᓗᒥ, ᓄᕕᐱᕆ 11-ᒥ, ᑲᖏᖅᖠᓂᐅᑉ ᐱᙳᐊᕐᕕᖓᓂᒃ, 100-ᖑᔪᓐᓇᕐᓂᐊᖅᑐᑦ ᐅᐸᒍᑎᔪᑦ ᐊᒻᒪᓗ ᐅᖓᓯᒌᒍᑎᖃᑦᑕᕆᐊᖃᕐᓂᐊᖅᑐᑦ. ᓱᓇᑕᖃᙱᓐᓂᖅᓴᐅᓂᐊᖅᑐᖅ ᑭᓯᐊᓂ ᐱᒻᒪᕆᐊᓗᒃ ᑕᐃᒪᐃᓕᐅᖅᑎᑦᑎᔭᕆᐊᖃᕐᓂᑉᑎᓐᓄᑦ ᓄᓇᑉᑎᓐᓂᒃ,” ᑕᐃᒪᓐᓇ ᐅᖃᖅᖢᓂ ᓂᑯᓪ.

“ᐱᒻᒪᕆᐊᓗᒃ ᐃᖅᑲᐅᒪᔭᕆᐊᖃᕐᓂᖅ, ᓇᐅᒃᑯᓗᒃᑖᖅ, ᑕᒪᐃᓐᓂᒃ ᐅᓇᑕᕆᐊᖅᑐᓚᐅᖅᑐᓂᒃ, ᐳᑭᖅᑕᓕᖕᓂᒃ ᐊᒻᒪᓗ ᐊᓯᖏᓐᓂᒃ ᓴᐃᒪᑎᑦᑎᓇᓱᒃᐸᒃᑐᓂᒃ.

“ᑕᒪᕐᒥᒃ ᑭᒡᒐᖅᑐᐃᖃᑦᑕᖅᑐᑦ ᑲᓇᑕᒥᒃ, ᒥᐊᓂᖅᓯᓂᒃᑯᑦ ᐊᒻᒪᓗ ᐊᒃᓱᕈᑎᒋᖃᑦᑕᖅᑕᒃᑯᑦ, ᑕᐃᒪᐃᒻᒪᑦ ᐊᓕᐊᓇᐃᑦᑐᖅ ᑕᑯᖃᑦᑕᖅᖢᓂ ᐊᒥᓱᓂᒃ ᐅᐸᒍᑎᔪᓂᒃ ᐃᖅᑲᐅᒪᓂᐅᑉ ᐅᑉᓗᖓᓂᒃ ᖃᓄᐃᓕᐅᖅᑎᑦᑎᑎᓪᓗᑕ ᑕᒪᓐᓇ ᐱᕙᓪᓕᐊᖏᓐᓇᕐᒪᑦ.”

ᓂᑯᓪ ᐅᖃᖅᖢᓂ ᑐᒡᓕᐊᒍᑦ ᐅᓇᑕᕐᔪᐊᓚᐅᖅᑐᑦ ᑕᐃᑉᓱᒪᓂᐅᓚᐅᕐᒪᑦ 100 ᐅᑭᐅᑦ ᐱᐊᓂᒃᓯᒪᓕᖅᑐᑦ, ᐊᒻᒪᓗ ᐃᓄᐃᑦ ᓇᓂᓗᒃᑖᖅ ᐳᐃᒍᖅᐸᓪᓕᐊᑐᐃᓐᓇᕆᐊᖃᕐᒪᑕ ᖃᑉᓯᑦ ᑲᓇᑕᒥᐅᑦ ᐅᓇᑕᕆᐊᖅᑐᓚᐅᕐᓂᖏᓐᓄᑦ.

ᐅᖃᖅᖢᓂ ᐊᒥᓱᑦ ᑲᓇᑕᒥᐅᑦ ᐃᓅᔪᓐᓃᖅᓯᒪᔪᑦ ᐱᑦᑎᐊᙱᖃᑎᒌᖕᓂᕐᒧᑦ ᑕᐃᒪᙵᓂ ᑐᒡᓕᐊᒍᑦ ᐅᓇᑕᕐᔪᐊᖅᑳᖅᑎᓪᓗᒋᑦ.

“ᑕᐃᒪᓘᓐᓃᑦ, ᒪᒃᑯᒃᑐᖅ ᐃᖃᓗᖕᒥᐅᑕᐅᓚᐅᖅᑐᖅ, ᔪᐊᑕᓐ ᐊᓐᑐᓴᓐ, 25-ᓂᒃ ᐅᑭᐅᖃᓚᐅᖅᑐᖅ, ᐃᓅᔪᓐᓃᓚᐅᖅᓯᒪᔪᖅ ᐃᓚᐅᖃᑕᐅᑉᓗᓂ ᐊᕐᕕᓂᓕᖕᓂᒃ ᑲᓇᑕᒥᐅᓂᒃ ᖄᕐᕕᐅᑉᓗᑎᒃ ᐊᕝᒐᓇᔅᑖᓐᒥ ᔪᓚᐃ 4, 2007-ᒥ.

“ᐊᒻᒪᓗ ᑕᒫᓂᕐᒥᐅᑕᑦ ᐅᓇᑕᖃᑕᐅᖃᑦᑕᖅᓯᒪᖕᒥᔪᑦ ᑯᕆᔭᒥ ᐊᒻᒪᓗ ᐊᒥᓱᑦ ᐅᓇᑕᖅᑐᒃᓴᓂᒃ ᐊᓯᖏᓐᓂᒃ ᐃᓚᐅᖃᑕᐅᖃᑦᑕᖅᓯᒪᔪᑦ, Air Force-ᑯᑦ ᐊᒻᒪᓗ ᐅᓇᑕᖅᑐᒃᓴᒃᑯᑦ − ᐊᒥᓱᑦ ᑕᒫᓂᕐᒥᐅᑕᑦ, ᐃᓛᒃ − ᐊᒻᒪᓗ ᑕᐃᒪᐅᔪᑦ ᐳᑭᖅᑕᓖᑦ, ᐊᒻᒪᓗ ᐱᒻᒪᕆᐊᓗᒃ ᐃᖅᑲᐅᒪᔭᕆᐊᖃᖅᑕᖅᐳᑦ ᐱᓕᕆᔾᔪᔾᔨᓯᒪᓂᖏᑦ ᐱᓕᕆᔪᒪᓂᖏᓪᓗ.”

ᓂᑯᓪ ᐅᖃᖅᖢᓂ ᖃᑕᙳᑎᖃᕋᒥ ᓄᓕᐊᖓᑕ ᐃᓚᖓᓂᒃ, ᐅᐃᓕᔭᒻ ᒍᕆᓐᒥᒃ, ᐃᓚᖃᓪᓚᕆᒃᑐᖅ ᐊᕐᕕᐊᓂ ᐊᒻᒪᓗ ᑰᒡᔪᐊᕐᒥ ᐃᓅᔪᓐᓃᓚᐅᖅᓯᒪᔪᖅ ᑐᒡᓕᐊᓂ ᐅᓇᑕᕐᔪᐊᖅᑎᓪᓗᒋᑦ.

ᐅᖃᖅᖢᓂ ᒍᕆᓐ ᑮᔭᖃᑦᑕᓕᕆᖃᑦᑕᓚᐅᖅᓯᒪᖕᒪᑦ ᐊᕐᕕᐊᑦ ᖃᓂᒋᔭᖓᓂᒃ ᒪᕐᕈᖕᓂᒃ ᐸᓂᖃᖅᖢᓂ ᐊᐃᕆᓐ ᖃᑉᓗᑦᓯᐊᕐᒥᒃ ᐊᒻᒪᓗ ᐃᒪᓕ ᐊᖓᓕᒃᒥᒃ, ᐊᕐᕕᐊᓂ ᑕᒪᕐᒥᒃ ᐃᓅᔪᓐᓃᖅᓯᒪᑉᓗᑎᒡᓗ.

ᑲᓇᑕᒥᐅᓂᒃ ᑭᒡᒐᖅᑐᐃᑉᓗᓂ ᐅᓇᑕᖃᑕᐅᓚᐅᖅᓯᒪᔪᖅ ᐃᓅᔪᓐᓃᓚᐅᖅᓯᒪᔪᖅ ᖄᖅᑕᖅᑐᓕᒃᑯᑦ 432 ᑎᖕᒥᓲᒃᑯᑦ ᐃᖕᓕᓐᒥ, ᐃᖅᑲᐅᒪᑦᑎᐊᕈᒪ, ᓄᓇᓕᖕᒥ ᒪᕐᓗ, ᔪᒥᓂᒥ,” ᑕᐃᒪᓐᓇ ᐅᖃᖅᖢᓂ ᓂᑯᓪ.

“ᐅᒃᐱᕆᔭᐅᔪᖅ ᒪᕐᕈᒃ ᐃᓚᒌᒃ ᑎᖕᒥᓲᑦ ᖃᖓᑕᓚᐅᖅᓯᒪᖕᒪᑕ ᑕᐃᑉᓱᒪᓂ ᐅᓐᓅᔪᒥ. ᐃᖅᑲᐅᒪᔭᕆᐊᖃᖅᑐᓯ ᑖᖅᑐᐊᓘᓚᐅᕐᒪᑦ, ᑎᖕᒥᓲᒃᑯᓪᓗ ᑐᓴᐅᒪᖃᑦᑕᐅᑎᒍᑏᑦ ᐅᑉᓗᒥᐅᓕᖅᑐᑐᑦ ᐱᓚᐅᕐᓇᑎᒃ, ᖃᖓᑕᑉᓗᑎᒃ ᑐᓗᕈᑎᔪᕕᓃᒃ.

ᐃᖢᐊᖅᓴᐃᔩᑦ ᓇᔭᙳᐊᑦ ᑕᐃᑯᙵᕈᓐᓇᖅᓯᖕᒪᑕ ᓇᓗᓇᐃᔭᐃᔭᖅᑐᖅᖢᑎᒃ ᑭᒃᑰᖕᒪᖔᑕ, ᓇᓂᓯᓚᐅᖅᑐᑦ 16-ᓂᒃ ᑲᑎᒪᔪᓂᒃ ᐃᓗᕕᕐᒥ ᐅᓐᓄᖓᓂ ᐅᓇᑕᖃᑕᐅᔪᕕᓃᑦ.

“ᐅᖃᖃᑎᖃᖅᖢᑎᒃ ᓄᓇᖅᑲᑎᒌᒃᑐᓂᒃ ᑕᐃᑲᓂ ᐅᖃᐅᑎᔭᐅᓚᐅᖅᑐᑦ ᒪᕐᕈᒎᖅ ᑎᖕᒥᓲᑦ ᑲᑕᒃᑐᕕᓃᑦ ᐊᑕᐅᑦᑎᒃᑯᑦ ᑕᐅᕙᓂ, ᑕᐃᒪᐃᒻᒪᑦ ᐃᓅᔪᓐᓃᖅᑐᓂᒃ ᑲᒪᒋᐊᖅᑐᕕᓃᑦ ᒍᕆᓐᓗ ᓇᓗᓇᐃᖅᑕᐅᔪᕕᓂᖅ ᐃᓚᐅᖃᑕᐅᓚᐅᕐᓂᖓᓄᑦ.”

“ᑕᒪᐃᓐᓂᒃ ᑎᖕᒥᓲᓂᒃ ᖃᖓᑕᔪᑦ ᐃᓅᔪᓐᓃᖅᓚᐅᖅᑐᑦ.”

ᓂᑯᓪ ᐅᖃᖅᖢᓂ ᐃᓚᒌᑦ ᖃᐅᔨᒪᖕᒪᑕ ᓇᓂ ᒍᕆᓐ ᑎᒥᖓ ᐃᓗᕕᖅᑕᐅᓯᒪᖕᒪᖔᑦ ᐳᕐᓕᓐᒥ ᓴᕐᓕᑦᐳᕐᒡ, ᔪᒥᓂᒥ, ᑕᒪᓐᓇ ᖃᐅᔨᒪᑉᓗᒍᒎᖅ ᐊᒃᓱᕈᕐᓇᙱᓐᓂᖅᓴᐅᔾᔪᑕᐅᔪᖅ ᐃᓚᒌᖕᓄᑦ.

ᐅᖃᖅᖢᓂ ᐅᖃᐅᓯᐅᖃᑦᑕᖅᑐᖅ ᐳᐃᒍᖅᑕᐃᓕᔭᕆᐊᖃᕐᓂᑉᑎᓐᓄᑦ ᐅᓇᑕᕆᐊᖅᑐᓚᐅᖅᑐᓂᒃ ᐅᕙᒍᑦ ᐱᔾᔪᑎᒋᑉᓗᑕ ᐃᓱᒪᖅᓱᓕᕈᓐᓇᖁᑉᓗᑕ ᐃᒃᐱᒋᔭᐅᑦᑎᐊᖅᓯᒪᔪᖅ ᓱᓕ ᒪᒃᑯᖕᓂᖅᓴᓄᑦ, ᐱᓗᐊᖅᑐᒥ ᓄᓇᒋᓚᐅᖅᑕᖓᓂᒃ.

“ᑲᓇᑕ ᐊᓯᔾᔨᖅᓯᒪᓪᓚᕆᒃᑐᖅ ᐅᑭᐅᓂᒃ ᖄᖏᖅᓯᒪᔪᓂᒃ ᑭᓯᐊᓂ ᐅᕙᑉᑎᓐᓂᒃ ᑭᒡᒐᖅᑐᐃᓚᐅᖅᓯᒪᔪᑦ ᐳᐃᒍᖅᑕᐅᔪᓐᓇᙱᑦᑐᑦ, ᓲᖃᐃᒻᒪ, ᐊᒻᒪᓗ ᑕᒡᕙ ᐱᓕᕆᐊᒃᓴᕆᔭᐅᔪᖅ ᓖᔾᔭᒃᑯᓐᓄᑦ − ᐃᖅᑲᐅᒪᑎᑦᑎᔭᕆᐊᖃᕐᓂᖅ, ᐊᒻᒪᓗ ᖁᕝᕙᖅᑎᕆᓂᖅ ᐃᓕᑕᖅᓯᖃᑦᑕᕆᐊᖃᕐᓂᕐᒧᑦ ᐃᓄᖕᓂᒃ ᐅᓇᑕᕆᐊᖅᑐᓚᐅᖅᑐᓂᒃ ᑲᓇᑕᒥᐅᑦ ᐱᔾᔪᑎᒋᑉᓗᒋᑦ ᐊᒻᒪᓗ ᑭᖑᓂᐊᓂ ᐱᓕᕆᖃᑕᐅᓯᒪᔪᑦ.

ᓯᕗᒻᒧᐊᒃᐸᓪᓕᐊᑎᓪᓗᑕ, ᑕᒪᓐᓇ ᐅᖃᐅᓯᐅᖃᑦᑕᖅᑐᖅ ᐱᒻᒪᕆᐊᓗᒃ ᐱᒻᒪᕆᐅᓂᖅᓴᐅᙱᓐᓂᖅᐸᓪᓘᓐᓃᑦ ᐱᓕᕆᑦᑎᐊᖅᑑᔭᖅᑐᒍᑦ ᑕᒡᕘᓇ. ᑲᓇᑕ ᐊᓯᔾᔨᖅᓯᒪᔪᖅ ᐅᑉᓗᒥ ᑕᐃᑉᓱᒪᓂᐅᖓᓂᒃ 100 ᐅᑭᐅᑦ ᓈᓯᒪᓕᖅᑐᓂᒃ ᑐᒡᓕᐊᒍᑦ ᐅᓇᑕᕐᔪᐊᓚᐅᖅᑎᓪᓗᒋᑦ ᑭᓯᐊᓂ, ᐅᖃᐅᓯᐅᖃᑦᑕᖅᓯᒪᔪᑦ ᑐᕌᖓᓂᖃᓪᓚᕆᒃᑐᑦ ᓇᓃᑦᑐᒪᓂᑉᑎᓐᓄᑦ, ᐄᓛᒃ.

“ᑕᒡᕙᓂ ᑲᖏᖅᖠᓂᕐᒥ, ᐱᕈᖅᓯᐊᙳᐊᖅᑖᕈᒪᓲᑦ ᐊᒥᓲᓂᖏᑦ ᖃᑉᓰᓐᓇᕈᖅᓯᒪᙱᑦᑐᑦ. ᑲᓇᑕᒥᐅᑦ ᐊᒥᓱᙳᖅᐹᓪᓕᕐᒪᑕ, ᐃᓛᓐᓂᒃᑯᑦ ᐃᓱᒪᓇᖃᑦᑕᖅᑐᖅ ᐊᒥᓲᙱᓐᓂᖅᓴᐅᓕᕐᓂᖏᓐᓄᑦ ᐱᕈᖅᓯᐊᙳᐊᓂᒃ ᐊᑐᖅᑐᑦ ᐃᖅᑲᐅᒪᑉᓗᒋᑦ ᐅᓇᑕᕐᔪᐊᓚᐅᖅᑐᑦ ᐊᕐᕌᒍᑕᒫᒃᑯᑦ.

“ᑭᓯᐊᓂ, ᐅᖃᕈᔾᔨᑉᓗᖓ ᓖᔾᔭᓐᑎᓐᓂᒃ ᐊᒻᒪᓗ ᑕᑯᖃᑦᑕᖅᓯᒪᔭᖅᐳᑦ ᑕᒫᓂ ᐅᑭᐅᓂᒃ ᖄᖏᖅᓯᒪᔪᓂᒃ, ᐱᕈᖅᓯᐊᙳᐊᖅᑖᕈᒪᓲᑦ ᐊᒥᓱᒻᒪᕆᐊᓗᐃᑦ ᓱᓕ ᐊᒥᓲᓂᖅᓴᐅᔪᒃᓴᐅᔪᓪᓘᓐᓃᑦ ᐊᒻᒪᓗ ᑕᐃᒪᐃᑦᑐᓂᒃ ᑕᑯᑉᓗᓂ ᖁᕕᐊᓇᖅᑐᖅ. ᑲᖏᖅᖠᓂᕐᒥᐅᑦ ᐃᖅᑲᐅᒪᔪᑦ ᐊᒻᒪᓗ ᐅᒃᐱᕈᓱᒃᑐᖓ, ᐃᖅᑲᐅᒪᐃᓐᓇᖃᑦᑕᕐᓂᐊᕐᓂᖏᓐᓄᑦ.”

Advertisement

Darrell Greer

Darrell Greer is Editor of Kivalliq News