ᐃᓄᐃᑦ ᖁᕕᐊᓱᑦᑎᐊᖅᑐᑦ ᐸᕐᓇᒃᐸᓪᓕᐊᑉᓗᑎᒃ ᐃᖃᓗᒡᔪᐊᕋᓱᖕᓂᐊᕐᓂᕐᒧᑦ ᐅᑭᐅᖅ ᐱᓇᓱᐊᕈᓯᐅᑉ ᓄᙳᐊᓂᒃ ᒪᕐᕉᖕᓂᒃ ᖃᐃᔪᓂᒃ ᑲᖏᖅᖠᓂᕐᒥ.

ᑲᖏᖅᖠᓂᕐᒥᐅᑕᑦ ᖁᕕᐊᓱᑦᑎᐊᖅᑐᑦ ᐃᖃᓗᒡᔪᐊᕋᓱᖕᓂᐊᓕᕐᒥᒐᒥᒃ ᐱᓇᓱᐊᕈᓯᐅᑉ ᓄᙳᐊᓂ ᐊᒻᒪᓗ ᐃᖃᓗᒐᓱᖕᓂᐊᖅᑐᑦ ᐃᒪᓐᓇᐃᑦᑐᒥᒃ ᑕᐱ ᐸᐃᑰᑉ ᐃᖃᓗᓚᐅᖅᑕᖓᑕ ᐊᔾᔨᖓᓂᒃ – ᑕᑭᓂᓕᒃ 43 1/6 inches-ᒥᒃ – ᑲᖏᖅᖠᓂᕐᒥ ᐃᖃᓗᒡᔪᐊᕋᓱᒃᑎᓪᓗᒋᑦ 2018-ᒥ.
ᐊᔾᔨ ᐸᒥᓚ ᐱᓚᑲᑉᓯᒥᙶᖅᑐᖅ

Hᐊᒻᓚᒃᑯᑦ ᑲᑎᒪᔨᖏᑦ ᐊᖏᓚᐅᖅᑐᑦ ᒪᕐᕈᐃᖅᑕᕐᓗᑎᒃ ᐃᓄᐃᑦ ᐃᖃᓗᒡᔪᐊᕋᓱᒍᓐᓇᕐᓂᖏᓐᓄᑦ ᑕᖅᑭᐅᓚᐅᖅᑐᒥ, ᑭᓯᐊᓂ ᑐᓴᖅᑎᑦᑎᓚᐅᕐᒥᔪᑦ ᑕᒪᓐᓇ ᑕᑯᒋᐊᖅᑕᐅᒃᑲᓐᓂᕐᓂᐊᕐᓂᖓᓄᑦ ᓄᕙᒡᔪᐊᕐᓂᖅ – 19 ᓴᖅᑭᓐᓂᖅᐸᑦ ᑲᖏᖅᖠᓂᕐᒥ.

ᐊᑐᓂ ᐃᖃᓗᒡᔪᐊᕋᓱᖕᓂᐅᓂᐊᖅᑑᒃ ᐊᑎᓕᐅᖅᑎᑦᑎᓂᐊᖅᑐᑦ ᑭᓯᒥ ᑲᖏᖅᖠᓂᕐᒥᐅᑕᓂᒃ ᒪᓕᒃᖢᑎᒃ ᓄᓇᕗᑦ ᒐᕙᒪᒃᑯᖏᑦᑕ ᒪᓕᒐᖏᓐᓂᒃ. ᐊᑎᓕᐅᖃᑕᐅᓂᐊᕐᓗᓂ ᐊᑭᓖᔭᕆᐊᖃᕐᓇᕐᓂᐊᖅᑐᖅ $50-ᒥᒃ ᐊᑐᓂ ᐃᒡᓗᒥᐅᖃᑎᒌᒃ ᑕᒪᐃᓐᓄᑦ ᐃᖃᓗᒡᐊᕐᓂᐅᓂᐊᖅᑐᓄᑦ ᑐᕌᖓᓂᐊᖅᑐᖅ; ᐃᖣᕋᕋᓱᖕᓂᐊᖅᑐᑦ ᒪᐃ 15-ᒥ 18-ᒧᑦ ᐊᒻᒪᓗ ᑲᓇᔪᕋᓱᒡᓗᑎᒃ ᒪᐃ 22-ᒥ 24-ᒧᑦ.

ᓱᓴᓐ Hᐃᒃᔅ, ᑲᑎᒪᔨᐅᖃᑕᐅᔪᖅ ᓯᑕᒪᐅᔪᓂᒃ ᑲᑎᒪᔨᐅᖃᑎᒌᒃᑐᓂᒃ, ᐃᖅᑲᐃᑎᑦᑎᔪᖅ ᑲᖏᖅᖠᓂᕐᒥᐅᑕᓂᒃ ᐃᖃᓗᒃᑐᖃᖅᐸᑦ ᐊᑎᓕᐅᖅᑕᐅᖃᑕᐅᓯᒪᙱᑦᑐᒥᒃ ᐆᒃᑐᕋᖅᑕᐅᔪᓐᓇᔾᔮᙱᒻᒪᑕ, ᐊᒻᒪᓗ ᐃᓄᐃᑦ ᐆᒃᑐᕋᖅᑕᐅᑎᑦᑎᔪᓐᓇᔾᔮᙱᑦᑐᑦ ᐊᓯᒥᓄᑦ.

Hᐃᒃᔅ ᐅᖃᖅᖢᓂ ᐃᖃᓗᒐᓱᒡᔪᐊᖅᑐᓄᑦ ᑲᑎᒪᔩᑦ ᓄᓇᖅᑲᑎᒥᓂᒃ ᐅᖃᐅᔾᔨᓯᒪᔪᑦ ᐃᓄᐃᑦ ᑲᑎᙶᓗᖁᓇᒋᑦ ᐊᒻᒪᓗ ᐅᖓᓯᒌᒡᔫᒥᖃᑦᑕᖁᑉᓗᒋᑦ.

ᐅᖃᖅᖢᓂ ᐃᖃᓗᖕᓂᒃ ᐆᒃᑐᕋᐃᓂᐊᕐᒪᑕ ᓯᖏᑦᑐᖅ ᐱᙳᐊᕐᕕᐅᑉ ᓯᓚᑖᓂ, ᐱᙳᐊᖅᑐᓕᕆᔨᒃᑯᑦ ᐋᖅᑭᒃᓱᐃᓯᒪᓂᐊᖅᖢᑎᒃ ᓄᓇᒃᑰᕈᑎᒃᑰᖅᑐᑦ ᑐᑭᓕᕇᒃᓯᒪᔪᓐᓇᖁᑉᓗᒋᑦ.

“ᐆᒃᑐᕋᐃᕌᓂᒃᑯᑉᑕ ᐃᖃᓗᖕᓂᒃ, ᐊᖏᕐᕋᐅᖁᔨᓂᐊᖅᑐᒍᑦ,” ᑕᐃᒪᓐᓇ ᐅᖃᖅᖢᓂ Hᐃᒃᔅ. “ᐃᓄᐃᑦ ᑲᑎᔾᔮᙱᑦᑐᑦ ᓯᓚᒥ ᐆᒃᑐᕋᖅᑕᐅᕝᕕᐅᔪᒥ ᐊᒻᒪᓗ ᐃᓄᐃᑦ ᐅᖓᓯᒌᒃᑑᑎᖁᓂᐊᖅᑕᖅᐳᑦ.

“ᓵᓚᒃᓴᖅᑐᑦ ᐊᑎᖏᑦ ᐅᖃᐅᓯᕆᔪᒫᖅᑕᖅᐳᑦ ᖃᕆᑕᐅᔭᒃᑯᑦ Facebook-ᑯᑦ ᐃᖃᓗᒡᔪᐊᕋᓱᒃᑏᑦ ᒪᒃᐱᒐᖓᒍᑦ.

“ᐃᓄᖕᓂᒃ ᑐᓴᖅᓯᒪᔭᒃᑯᑦ, ᐃᓄᐃᑦ ᖁᕕᐊᓱᑦᑎᐊᖅᑐᑦ ᑐᓴᖅᑎᑕᐅᓯᒪᓂᕐᒥᓂᒃ. ᐊᓂᑦᑕᐃᓕᒪᑎᑕᐅᓇᓱᒃᓯᒪᒐᑉᑕ, ᐅᕝᕙᓘᓐᓃᑦ ᖃᓄᑐᐃᓐᓇᖅ, 8-ᖑᓕᖅᑐᓂᒃ ᐱᓇᓱᐊᕈᓯᕐᓂᒃ ᐊᒻᒪᓗ ᐃᓄᐃᑦ ᑕᖃᓯᒪᔪᑦ ᓴᓇᔪᓐᓇᐃᓪᓕᑎᑕᐅᓯᒪᓂᕐᒧᑦ ᐊᖏᕐᕋᖅᓯᒪᐃᓐᓇᖅᖢᑎᒡᓗ.

“ᐃᖃᓗᒡᐊᕋᓱᖃᑦᑕᖅᑎᓪᓗᒋᑦ ᐃᓄᐃᑦ ᐃᓚᐅᖃᑕᐅᑦᑎᐊᖃᑦᑕᕐᒪᑕ ᐅᑭᐅᑉ ᐃᓗᐊᓂ ᐊᒻᒪᓗ ᐃᓄᐃᑦ ᖁᕕᐊᓱᑦᑎᐊᖅᑐᑦ ᑕᒪᑐᒥᙵ ᑲᔪᓯᓂᐊᖅᑐᒥᒃ ᑐᓴᐅᒪᓕᕋᒥᒃ.”

Hᐃᒃᔅ ᐅᖃᖅᖢᓂ ᒫᓐᓇᒧᑦ, ᑕᐃᒪᑐᕉᖅ ᓯᓚ ᓈᒻᒪᖕᓂᐊᖅᐳᖅ.

ᐅᖃᖅᖢᓂ ᑕᐃᒪᑐᖅ ᐃᓄᐃᑦ ᑲᒪᑦᑎᐊᕐᓂᐊᖅᐳᑦ ᐃᖃᓪᓕᐊᕐᕕᒋᖃᑦᑕᕈᒪᔭᒥᓄᑦ ᑎᑭᑉᐸᓪᓕᐊᑎᓪᓗᒋᑦ ᐊᒻᒪᓗ ᐊᖏᕐᕋᑦᑎᐊᕐᒥᓗᑎᒃ.

“ᑭᖑᓪᓕᖅᐹᒃᑯᑦ ᐱᓕᕆᐊᕆᔭᕆᐊᖃᖅᑕᖅᐳᑦ ᐃᓄᐃᑦ ᐊᑎᓕᐅᖅᑎᓪᓗᒋᑦ ᐊᒻᒪᓗ ᐊᐅᓪᓚᓕᕐᓗᑕ.

“ᐃᓱᒫᓗᒃᑐᓂᒃ ᑐᓴᖅᓯᒪᙱᑦᑐᖓ ᒪᓕᒐᑦ ᑲᑦᑐᖓᔾᔫᒥᖁᔭᐅᓗᑎᒃ. ᐃᓄᐃᑦ ᖁᕕᐊᓱᒃᑐᑦ ᓂᕆᐅᖕᓂᖃᑦᑎᐊᖅᑐᑦ ᑲᔪᓯᑦᑎᐊᖁᑉᓗᒍ.

“ᓄᕙᒡᔪᐊᖅᑐᒥᒃ ᑐᓴᖅᓯᒪᙱᓐᓇᑉᑕ ᑕᒫᓂ ᐊᒻᒪᓗ, ᑕᐃᒪᑐᖅ ᑐᓴᔾᔮᙱᓚᒍᑦ ᓄᕙᒡᔪᐊᕐᓂᐅᔪᖅ ᓄᓇᕐᔪᐊᕐᒥ ᐃᓱᓕᑉᐸᓪᓕᐊᓂᓗᒃᑖᖓᓄᑦ.

“ᐃᓄᐃᑦ ᖁᕕᐊᓱᖁᒐᑉᑎᒍᑦ, ᑭᓯᐊᓂ, ᑕᐃᒪᓐᓇᑦᑕᐅᖅ, ᐃᖏᕐᕋᑦᑎᐊᖁᔭᖅᐳᑦ ᐊᒻᒪᓗ ᖃᓂᒌᒃᑑᑎᓗᐊᙱᓪᓗᑎᒃ ᐊᑦᑕᓇᖅᑐᒦᖁᓇᑕ.”

Advertisement

Darrell Greer

Darrell Greer is Editor of Kivalliq News