ᓄᕙᒡᔪᐊᕐᓇᖅ-19–ᒥ ᖃᓄᐃᓐᓂᐅᔪᑦ ᐅᓄᖅᓯᕙᓪᓕᐊᑐᐃᓐᓇᖅᖢᑎᒃ ᑭᕙᓪᓕᕐᒥ, 150 ᐅᖓᑖᓂ ᖃᓄᐃᓐᓂᐅᔪᓄᑦ ᒫᓐᓇᒧᑦ ᑎᑭᖦᖢᒍ ᐊᒻᒪ ᐱᕈᖅᐸᓪᓕᐊᑐᐃᓐᓇᖅᖢᓂ.

ᖃᐅᑕᒫᒥ ᖃᓄᐃᓐᓂᐅᔪᑦ ᑎᑭᐅᑎᙱᒃᑲᓗᐊᖅᑎᓪᓗᒍ 12 ᐅᖓᑖᓄᑦ, ᕿᓚᒥᑯᓗᒃ ᐋᓐᓂᐊᕐᓇᐅᔪᒥ ᓯᐊᒻᒪᕈᓐᓇᖅᐳᖅ. ᐱᒻᒪᕆᕐᔪᐊᖑᐃᓐᓇᖅᐳᖅ ᓄᓇᕗᒻᒥᐅᑦ ᒪᓕᖕᓂᖏᓐᓂ ᑐᕌᒐᒃᓴᐅᔪᓂ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖓ ᓘᒃᑖᖅ ᒪᐃᑯᓪ ᐹᑐᓴᓐᒧᑦ ᐊᒻᒪᓗ ᑲᑎᙵᓂᕆᔭᖏᓐᓂ ᐅᖓᓯᒌᒋᐊᖃᕐᓂᐅᔪᒥ ᐊᒻᒪ ᐊᒡᒐᑎᑦ ᐅᐊᓴᒐᔪᒡᓗᒋᑦ.

ᕿᓚᒻᒥᐅᓗᐊᖅᐳᖅ ᐅᖃᕐᓂᕐᒧᑦ ᓄᕙᒡᔪᐊᕐᓇᖅ-19 ᐱᓕᕆᓯᒪᑦᑎᐊᕐᓂᖓᓂ ᐱᐅᓂᐅᔪᓂ ᓄᓇᕗᓕᒫᒧᑦ ᑲᓇᑕᒧᓪᓘᓐᓃᑦ, ᑭᓯᐊᓂ ᓇᓗᓇᐃᖅᓯᓯᒪᕗᖅ ᐃᓚᑰᓂᐅᔪᓂ.

ᐃᒡᓗᒃᓴᖃᖅᑎᑦᑎᓂᕐᒧᑦ ᖃᓄᐃᓐᓂᐅᔪᒥ ᓄᓇᕗᒻᒥ ᐅᓂᒃᑳᕆᔭᐅᑐᐃᓐᓇᕈᓐᓇᖅᐳᖅ ᑐᐊᕕᕐᓇᕐᓂᐅᔪᒥ, ᐊᑕᐅᓯᖅ ᖁᓛᒍᑦ ᖄᖏᖅᑕᐅᓯᒪᓂᖃᖅᑐᒥ ᒐᕙᒪᑐᖃᒃᑯᓐᓂ ᑲᑎᒪᔨᕐᔪᐊᖑᔪᓄᑦ ᖄᖏᖅᓯᒪᓕᖅᑐᓄᑦ ᐊᕐᕌᒍᓄᑦ 20–ᓄᑦ. ᐱᑕᖃᙱᕐᔪᐊᕐᓂᖃᖅᐳᖅ ᐃᒡᓗᒃᓴᖃᖅᑎᑦᑎᓂᐅᔪᒥ ᐊᒻᒪ ᑕᒪᕐᒥᒐᓚᑦ ᑮᓇᐅᔾᔭᒃᓴᓂᖃᙱᓗᐊᖅᐳᑦ ᓇᖕᒥᓂᖅ ᐃᒡᓗᑖᕋᓱᐊᕐᓂᕐᒧᑦ ᐊᒻᒪᓗ ᐃᓄᓕᒫᓄᑦ ᐃᒡᓗᒃᓴᖏᓐᓄᐊᕆᐊᖃᖅᐳᑦ. ᑕᐃᓐᓇ ᐃᓄᓕᒫᓄᑦ ᐃᒡᓗᒃᓴᖃᖅᑎᑦᑎᓂᖅ ᑕᑯᒃᓴᐅᑎᑦᑎᓂᖃᖅᐳᖅ ᓈᒻᒪᙱᓗᐊᕐᓂᖓᓂ ᑕᒪᒃᑭᓄᑦ ᐱᖓᓱᓄᑦ ᐊᕕᒃᑐᖅᓯᒪᓂᐅᔪᓂ ᓄᓇᕗᒻᒥ. ᐱᑕᖃᒐᔪᖕᓂᖅᓴᐅᔪᓂ ᐅᖃᐱᓘᑕᐅᓂᐅᔪᓂ ᐃᓚᖃᖅᐳᖅ ᐅᖁᖃᕐᓂᖓᓂ, ᐊᓂᐊᑎᑦᑎᕙᓪᓕᐊᓂᖃᑦᑎᐊᙱᓐᓂᖓᓂ ᐅᕝᕙᓘᓐᓃᑦ ᐃᑭᐊᕐᒥᒃᓴᖃᙱᓗᐊᕐᓂᖓᓂ ᐊᒻᒪ ᐱᑕᖃᙱᓗᐊᕐᓂᖓᓂ ᐋᖅᑭᐅᒪᑎᑦᑎᑐᐃᓐᓇᕐᓂᐅᔪᒥ ᐱᔪᓐᓇᖅᑎᑦᑎᓇᔭᖅᑐᒥ ᐃᓄᖕᓂ ᐅᐱᒋᔭᖃᕐᓂᖏᓐᓂ ᐊᖏᕐᕋᖏᓐᓂ.

ᓄᓇᕗᒻᒥ ᑐᙵᕕᒃᑯᑦ ᑐᓂᓯᓚᐅᖅᐳᑦ 200-ᐅᖓᑖᓂ ᒪᒃᐱᖅᑐᒐᓕᖕᒥ ᐅᓂᒃᑳᓕᐊᒥ ᐅᒃᑐᐱᕆᒥ ᐅᓂᒃᑳᕆᔪᒥ ᐅᑯᓂᖓ ᐱᓪᓚᕆᐅᔪᓂ ᐊᑲᐅᙱᓕᐅᕈᑕᐅᔪᓂ. ᐅᓂᒃᑳᓕᐊᖅ ᓇᓗᓇᐃᖅᓯᕗᖅ, ᐃᓚᖓᓐᓂ ᐊᓯᖏᓐᓂ ᐊᑲᐅᙱᓕᐅᕈᑕᐅᔪᓂ, 41 ᐳᓴᓐᑎᖓᓂ ᓄᓇᕘᑉ ᐃᒡᓗᖁᑎᖏᓐᓂ ᐱᔭᕆᐊᖃᖅᐳᑦ ᐊᖏᔪᓂ ᐋᖅᑭᒃᓱᑦᑎᐊᖅᑕᐅᔭᕆᐊᖃᖅᑐᓂ.

ᐊᒥᓱᒻᒪᕆᐅᓗᖕᓂ ᓇᓗᓇᐃᖅᑕᐅᓯᒪᔪᓄᑦ ᐆᒃᑑᑎᑕᖃᖅᐳᖅ ᐃᒡᓗᒋᔭᐅᔪᓄᑦ ᐊᑲᐅᙱᓕᐅᕈᑕᐅᔪᓂ ᐅᖃᐅᓯᕆᓂᕐᒧᑦ, ᑭᓯᐊᓂ ᐊᑕᐅᓯᔪᒥ ᒫᓐᓇᓕᓴᐅᓛᖑᔪᒥ ᐅᓇᐅᓇᔭᖅᐳᖅ ᐃᓚᒋᔭᐅᔪᖅ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᒧᒥᓛᖅ ᖃᖅᑲᖅ ᐃᒡᓗᓕᕆᓂᕐᒧᑦ ᐳᓚᕋᕆᐊᖅᑎᓪᓗᒍ ᕿᑎᕐᒥᐅᓂ ᐊᒻᒪ ᑭᕙᓪᓕᕐᒥ. ᓇᓂᓚᐅᖅᑕᖓᓂ, ᑲᒪᓇᕐᓇᓂ, “ᐅᖁᖕᓂ ᕿᑐᑦᑐᒐᐅᔭᕐᓂ” ᑲᑕᒃᐸᓪᓕᐊᔪᓂ ᐋᖅᑭᒃᓱᖅᓯᒪᙱᓐᓂᐅᔪᒧᑦ.

“ᐊᖏᓂᖓᓂ ᑲᓇᑕᒥ ᒐᕙᒪᐅᔪᒥ ᐆᒥᖓ ᐱᔪᓐᓇᖅᑎᑦᑎᓂᖓᓂ ᑕᐃᒪᐃᖏᓐᓇᕐᓂᕐᒧᑦ ᖀᒥᓇᕐᔪᐊᖅᐳᖅ,” ᐅᖃᓚᐅᖅᐳᖅ ᓯᕗᓂᐊᓂ ᐊᐱᖅᓱᖅᑕᐅᓂᐅᔪᒥ ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᓇᔭᖓᓂ ᑎᑎᕋᖅᑕᐅᓂᐅᕙᒃᑐᒥ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᓐᓂ. 

ᑭᓯᐊᓂ ᐱᑕᖃᒐᔪᖕᓂᖅᓴᐅᔪᖅ ᐊᒻᒪ ᓱᔪᐃᓂᖅᓴᐅᔪᒥ ᐊᑲᐅᙱᓕᐅᕈᑕᐅᔪᖅ ᐸᖕᒥᐅᓗᐊᕐᓂᐅᕗᖅ.

ᖃᖅᑲᐅᑉ ᐳᓚᕋᕐᓂᕆᓚᐅᖅᑕᖓᓂ, ᓇᓗᓇᐃᖅᑕᐅᓚᐅᖅᐳᖅ ᐊᑐᓂ ᓄᓇᓕᐅᔪᒥ ᐳᓚᕋᓚᐅᖅᑕᒥᓂ 100–ᓗᐊᓂ ᐃᓄᖕᓂ ᐅᑕᖅᑭᔪᓂ ᑎᑎᕋᖅᓯᒪᓂᐅᔪᒥ ᐃᓄᓕᒫᓄᑦ ᐃᒡᓗᒃᓴᐅᔪᓄᑦ. ᓄᓇᓕᐅᔪᒥ, ᓲᕐᓗ ᓴᓪᓕᓂᑦ, 900–ᑐᐃᓐᓇᓂ ᐃᓄᖃᖅᑐᓂ ᓄᓇᓕᐅᔪᒥ, ᐅᓄᕐᓂᐅᔪᑦ ᑲᒪᓇᖅᓯᕐᔪᐊᓲᖑᕗᑦ. 

ᐃᓚᒌᖑᔪᑦ ᓇᓂᓯᙱᖔᖅᖢᑎᒃ ᓈᒻᒪᒃᑐᒥ ᐃᒡᓗᒃᓴᒥ, ᐃᒡᓗᖃᕆᐊᖃᖅᑎᑕᐅᕗᑦ ᐸᖕᒥᐅᕐᓂᐅᔪᓂ ᖃᓄᐃᓐᓂᐅᔪᓂ ᐃᓚᒃᑲᓐᓂᖏᓐᓂ ᐊᒻᒪ ᖃᔅᓯᒐᓚᖕᓂ ᐃᓕᖅᑯᓯᖃᑎᒌᖑᔪᓂᑦ.

ᓄᓇᕗᒻᒥ ᑐᙵᕕᒃᑯᑦ ᑭᖑᓂᐊᒍᑦ ᐅᖃᐅᓯᐅᖅᑲᐅᔪᒥ ᐅᓂᒃᑳᓕᐊᒥ ᓇᓗᓇᐃᖅᓯᕗᖅ ᓄᓇᕗᑦ ᖁᑦᑎᓛᖑᔪᒥ ᐅᓄᕐᓂᖃᖅᐳᖅ ᐸᖕᒥᐅᓚᐅᕐᓂᐅᔪᒥ ᐃᒡᓗᖃᖅᑎᑕᐅᓂᐅᔪᓄᑦ ᑲᓇᑕᒥ, ᐊᒻᒪ ᐊᖏᓛᖑᔪᒥ ᐃᓚᖓᓐᓂ ᐃᒡᓗᖁᑕᐅᔪᓄᑦ ᐋᖅᑭᒃᓱᑦᑎᐊᖅᑕᐅᔭᕆᐊᓕᖕᓂ (6–ᖏᖅᓱᐸᓗᒃᑐᒥ ᑲᓇᑕᒥ ᑕᐃᒪᐃᒐᔪᖕᓂᐅᔪᒥ). ᑕᐃᓐᓇᑦᑕᐃᓐᓇᖅ ᐅᓂᒃᑳᓕᐊᖅ ᓇᓗᓇᐃᖅᓯᒋᕗᖅ ᖃᓄᖅ ᐅᑯᐊ ᐱᐅᙱᕐᔪᐊᕐᓂᐅᔪᓂ ᖃᓄᐃᓐᓂᐅᔪᓄᑦ, ᐃᓚᖃᖅᑐᒥ ᐊᓯᖏᓐᓂ ᐱᔾᔪᑕᐅᔪᓂ ᓲᕐᓗ ᐊᑐᐃᓐᓇᖃᕐᓂᕐᒥ ᐃᒪᕐᒧᑦ, ᓱᔪᐃᔪᓐᓇᖅᑐᒥ ᐱᔾᔪᑕᐅᓂᐊᖅᐳᖅ ᐅᓇᑕᕐᓂᕐᒧᑦ ᓄᕙᒡᔪᐊᕐᓇᖅ-19–ᒥ.

ᐊᕿᒡᒌᑦ ᐃᒃᓯᕚᕌᓂᒃᐳᑦ ᐊᖏᕐᕌᓂᒃᐳᑦ ᐹᑐᓴᓐ ᓇᓗᓇᐃᖅᓯᓚᐅᕐᓂᖓᓂ ᓄᕕᐱᕆ 25–ᒥ ᐸᖕᒥᐅᓚᐅᕐᓂᐅᔪᒥ ᐊᖏᕐᕋᓂ ᐃᓚᒋᔭᐅᕗᑦ ᓯᐊᒻᒪᖅᐸᓪᓕᐅᓂᐅᔪᒧᑦ.

“ᐱᕐᔪᑎᕐᔪᐊᖑᕗᖅ, ᐃᒻᒪᖄ ᐊᖏᓛᖑᖃᑕᐅᔪᒥ ᑐᓂᓯᔨᐅᔪᓂ ᓯᐊᒻᒪᖅᑎᑕᐅᓂᖓᓂ,” ᐅᖃᓚᐅᖅᐳᖅ ᓘᒃᑖᖅ ᒪᐃᑯᓪ ᐹᑐᓴᓐ. “ᐸᒡᕕᓵᕆᓪᓚᕆᒃᐳᖅ ᐊᑲᐅᙱᓕᐅᕈᑕᐅᔪᒧᑦ.”

ᐃᒡᓗᖃᕐᓂᖅ ᐅᖓᑖᓅᖓᕗᖅ ᑎᓴᒪᓄᑦ ᓴᓂᕋᐅᔪᓄᑦ. ᑐᙵᕕᐅᕗᖅ ᐃᓅᑉ ᐃᓅᓯᖓᓄᑦ ᐊᒻᒪᓗ ᐊᑕᐅᓯᐅᓗᓂ ᐃᓂᐅᓪᓗᐊᖅᐳᖅ ᑭᓇᑐᐃᓐᓇᖅ ᐊᑦᑕᓇᔾᔭᐃᖅᓯᒪᔪᓐᓇᕐᓂᖓᓂ ᐊᒻᒪᓗ ᐃᓗᐊᕐᓗᓂ, ᐃᓱᒪᒋᓇᒍ ᓇᒦᓐᓂᖓᓂ ᑲᓇᑕᒥ.

ᓄᕙᒡᔪᐊᕐᓇᖅ-19 ᐃᓕᓯᓯᒪᕗᖅ ᓄᓇᕘᑉ ᐃᒡᓗᖃᖅᑎᑕᐅᓂᕐᒥ ᐊᑲᐅᙱᓕᐅᕈᑕᐅᔪᓂ ᐊᒻᒪ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖃᓪᓗᒋᑦ ᐃᓚᑰᓂᐅᔪᓂ ᓴᖅᑭᑕᐅᓪᓗᑎᒃ ᓄᓇᕐᔪᐊᓕᒫᒧᑦ ᑕᑯᔭᐅᓂᖏᓐᓄᑦ. ᐊᑲᐅᙱᓕᐅᕈᑕᐅᔪᖅ ᖃᐅᔨᓴᖅᑕᐅᕐᔪᐊᖅᓯᒪᕗᖅ ᐃᓱᓗᐊᕌᓗᖓᓄᑦ. ᒫᓐᓇ ᐱᓕᕆᓐᓇᖅᓯᕗᖅ.

Advertisement