0ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ
ᖃᓱᔾᔫᒥᓇᑕᖃᕐᓂᐊᖅᐳᖅ ᑎᑭᑦᑐᓂ ᓇᖕᒥᓂᖃᖅᑎᓄᑦ ᐃᒃᐱᒍᓱᒃᑐᓂ ᐊᒃᓱᕈᕐᓂᐅᔪᒥ ᐊᓯᐅᔨᕐᔪᐊᕐᓂᐅᔪᒥ ᑮᓇᐅᔭᖅᑖᕆᔭᐅᕙᓪᓕᐊᔪᓄᑦ ᐆᒪᙵᑦ ᑯᕉᓇ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥᑦ, ᖃᓄᐃᓐᓂᖃᙱᒃᑲᓗᐊᖅᑎᓪᓗᒍ ᐅᓂᒃᑲᐅᓯᐅᔪᓂ ᓄᓇᕗᒻᒥ ᓱᓕ.

ᒐᕙᒪᑐᖃᒃᑯᑦ ᐃᑲᔪᖅᓱᐃᕙᓪᓕᐊᓕᖅᐳᑦ ᐃᑲᔪᕐᓂᕐᒧᑦ ᓴᐳᔾᔨᓯᒪᓂᕐᒧᑦ ᓇᖕᒥᓂᖃᖅᑎᐅᔪᓂ ᖃᓄᑐᐃᓐᓇᖅ ᐊᖏᓂᓕᖕᓂ ᐃᓚᖃᖅᑐᒥᓪᓗ ᑮᓇᐅᔭᓂ ᐱᕈᖅᓴᐃᔨᐅᕙᒃᑐᓄᑦ ᐊᒻᒪ ᑮᓇᐅᔾᔭᒃᓴᓂᐅᙱᑦᑐᓄᑦ ᐋᖅᑭᒃᓯᒪᓂᐅᔪᒥ ᐊᖏᔪᒥ ᐃᑲᔫᓯᖅᑕᐅᓂᕐᓄᑦ ᑐᕌᖓᓂᖃᖅᑐᒥ ᑮᓇᐅᔭᓕᐊᖑᔪᓄᑦ ᐊᑭᓖᓂᕐᓄᑦ ᐃᖅᑲᓇᐃᔭᖅᑎᓄᑦ.

ᐃᓚᖏᑦ ᐃᔪᖅᓯᒪᒐᓗᐊᖅᑎᓪᓗᒋᑦ ᓯᕗᓪᓕᖅᐹᖑᔪᒥ ᐊᑐᐃᓐᓇᐅᑎᑕᐅᔪᒥ — ᑭᒡᒐᖅᑐᐃᓂᐅᔪᒥ ᐃᑲᔫᓯᖅᑕᐅᓂᕐᒥ 10 ᐳᓴᓐᑎᒥ ᐃᖅᑲᓇᐃᔭᖅᑎᓄᑦ ᑮᓇᐅᔭᓕᐅᕐᓂᕆᔭᖏᓐᓂ — ᒐᕙᒪᑐᖃᒃᑯᑦ ᓈᓚᒃᓯᒪᕗᑦ ᖃᐃᖁᔨᓂᐅᔪᒥ ᓇᖕᒥᓂᖃᖅᑎᐅᔪᓂ ᐊᒻᒪ ᖁᕝᕙᕆᐊᖅᑎᑦᑎᓯᒪᕗᑦ ᐃᑲᔪᖅᓯᕈᑎᒥᑦ 75 ᐳᓴᓐᑎᒧᑦ ᐅᑯᓇᓂ ᑮᓇᐅᔭᓕᐅᕐᓂᖏᓐᓂ.

ᑭᓯᐊᓂ ᖃᓄᐃᓕᖓᓂᖃᖅᐳᖅ. ᖃᓄᐃᓕᖓᓂᖃᐃᓐᓇᐅᔭᖅᐳᖅ. ᑖᓐᓇ 75 ᐳᓴᓐᑎᖓ ᐊᑭᓖᑐᐃᓐᓇᓲᖑᕗᖅ ᓯᕗᓪᓕᖅᐹᒥ $58,700–ᒥ ᐃᖅᑲᓇᐃᔭᖅᑎᐅᑉ ᑮᓇᐅᔭᓕᐊᖓᓐᓂ. ᐅᓇ ᑐᑭᖃᖅᐳᖅ $847–ᐸᓗᖕᓂ ᐱᓇᓱᐊᕈᓯᑕᒫᒥ ᑕᖅᑭᓄᑦ ᐱᖓᓱᓄᑦ.

ᐱᒻᒪᕆᐅᒋᕗᖅ ᐅᔾᔨᕈᓱᖕᓂᕐᒥ ᓇᖕᒥᓂᖃᖅᑎᐅᔪᑦ ᑕᑯᒃᓴᐅᑎᑦᑎᔭᕆᐊᖃᖅᐳᑦ ᐊᓯᐅᔨᓯᒪᓂᖏᓐᓂ 30 ᐳᓴᓐᑎᒥ ᑮᓇᐅᔭᓕᐅᕐᓂᖏᓐᓂ. ᑕᒪᑐᒪᓂ ᑕᖅᑭᐅᓚᐅᖅᑐᒥ ᑕᐅᑐᒃᖢᒍ ᑕᐃᔅᓱᒥᖓᑦᑕᐃᓐᓇᖅ ᑕᖅᑭᐅᔪᒥ ᐊᕐᕌᓂᐅᓚᐅᖅᑐᒥ.
ᑭᖑᓕᖅᐹᖅ ᓈᒻᒪᒋᔭᐅᔪᑦ ᑭᐅᔭᐅᓴᕋᐃᓐᓂᐊᖅᐳᖅ ᓄᓇᕗᒻᒥᐅᓄᑦ ᓇᖕᒥᓂᖃᖅᑐᓂ ᐊᒃᑐᐃᓂᐅᔪᓂ ᓄᕙᒡᔪᐊᕐᓇᖅ-19–ᒥ ᐃᒃᐱᒋᔭᐅᖕᒪᑕ ᓄᓇᕐᔪᐊᒥ ᑮᓇᐅᔭᓕᐅᕈᑎᒃᓴᒃᑲᓐᓂᕐᓂᑦ.

ᐃᖃᓗᖕᓂᑐᐊᖅ, 100 ᐅᖓᑖᓂ ᓴᓇᔨᐅᔪᓂ ᓂᕆᕕᐅᔪᓂ ᐊᒻᒪ ᐳᓚᕋᖅᑐᓕᕆᓂᕐᒥ ᐱᓕᕆᐊᖑᔪᓄᑦ ᐊᓯᐅᔨᓚᐅᖅᐳᑦ ᑮᓇᐅᔭᓕᐅᕈᑎᖏᓐᓂ ᐅᓪᓗᕐᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐱᓕᕆᔨᐅᔪᓂ ᑎᓕᐅᕆᖕᒪᑕ ᒪᑐᔭᐅᓂᐅᔪᓂ ᐃᒥᕐᕕᓂᒃ ᐊᒻᒪ ᓂᕆᕕᓂᑦ ᒫᔾᔨ 20–ᒥ.

ᒐᕙᒪᑐᖃᒃᑯᑦ ᐊᑐᖅᑐᐊᒐᒃᓴᓂ ᐊᑐᐃᓐᓇᐅᑎᑦᑎᒃᑲᓐᓂᐅᔭᓕᖅᐳᑦ. ᓇᖕᒥᓂᖃᖅᑎᐅᔪᑦ ᑐᒃᓯᕋᕈᓐᓇᖅᐳᑦ ᐊᑐᐃᓐᓇᖃᕐᓂᕐᒥ ᑎᑭᐅᑎᔪᒧᑦ $40,000–ᒧᑦ ᕿᑐᕐᙱᐅᓐᓂᖃᙱᑦᑐᓂ ᐊᑐᖅᑐᐊᕐᓂᐅᔪᓂ.
ᖃᓄᑎᒋ ᐊᔪᕐᓇᔾᔮᙱᓐᓂᖓᓂ ᓇᖕᒥᓂᖃᖅᑎᐅᔪᒥ ᐊᑐᐃᓐᓇᖃᕈᓐᓇᕐᓂᐊᕐᓂᖓᓂ ᑮᓇᐅᔭᖃᖅᑎᑕᐅᓂᕐᒥ ᓱᓕ ᓇᓗᓇᒐᓚᒃᐳᖅ ᐅᓂᒃᑳᖅᓯᒪᓂᐅᔪᑦ ᓇᓗᓇᐃᖅᑕᐅᓇᓱᐊᕐᓂᖏᓐᓂ ᐅᖃᐅᓯᒃᓴᓕᐊᖑᔪᓂ ᑲᓇᑕᒥ ᐊᖓᔪᖅᑳᕐᔪᐊᖅ ᔭᔅᑎᓐ ᑐᕈᑑ ᐊᒻᒪ ᑮᓴᐅᔭᓕᕆᓂᕐᒧᑦ ᒥᓂᔅᑕᖓ ᐱᐅᓪ ᒧᐊᕐᓅᒧᑦ.

ᕿᑎᕐᒥᐅᓂ ᓇᖕᒥᓂᖅ ᐃᖅᑲᓇᐃᔭᕐᕕᓖᑦ ᑲᑐᔾᔨᖃᑎᒌᖏᑦ ᐃᓱᒻᒥᖅᑐᐃᔨᖓ ᕚᓪᑐᕐ ᐳᑎᐅᓪᕼᐅ–ᕆᓯᓐᑎᔅ ᐊᐱᕆᓯᒫᓂᒃᐳᖅ ᓇᖕᒥᓂᖃᖅᑎᐅᔪᓂ ᐃᓱᒪᒋᔭᖏᓐᓂ ᑮᓇᐅᔭᖃᖅᑎᑕᐅᓂᐅᔪᒥ.

ᐃᓚᖏᑦ ᓇᖕᒥᓂᖃᖅᑎᐅᔪᑦ ᐅᖃᖅᐳᑦ ᐃᑲᔪᖅᓯᖅᑕᐅᓂᑦ ᐃᑲᔪᕐᓂᐊᖅᐳᑦ ᐸᐸᑦᑏᓐᓇᕐᓂᕐᒧᑦ ᐃᖅᑲᓇᐃᔭᖅᑎᓂᑦ ᑭᓯᐊᓂ ᐊᑭᓖᔾᔮᙱᓚᖅ ᐊᔾᔨᐅᙱᑦᑐᓂ ᐊᑭᐅᔪᓂᑦ ᐊᒻᒪ ᐊᒃᓱᕈᕐᓂᐅᔪᓂ ᓵᙵᓂᖃᕐᓂᐅᔪᒥ ᐅᑭᐅᖅᑕᖅᑐᒥᐅᑕᓄᑦ ᓲᕐᓗ ᐅᖅᓱᐊᓗᖕᒧᑦ ᐊᑭᖏᓐᓂ, ᐊᑭᑐᔪᐊᓗᖕᓂ ᐃᒡᓗᒧᑦ ᐊᑐᖅᑐᐊᕐᓂᕐᒧᑦ ᐊᒻᒪ ᐊᑭᓕᖅᓱᐃᓂᕐᒥ ᐊᑐᖅᑐᐊᕐᓂᐅᔪᓂ.

ᖄᒃᑲᓐᓂᐊᒍᑦ ᐃᑲᔪᕈᑎᒃᓴᒃᑲᓐᓂᕐᓂᐅᔪᒥ ᑎᑭᑦᑐᖃᕐᓂᐊᖅᐳᖅ ᐊᑕᐅᓯᐊᖅᑐᒥ $5,000 ᑐᓂᕐᕈᑎᒥᒃ ᐅᕘᓇ ᓄᓇᕗᒻᒥ ᒐᕙᒪᒃᑯᓐᓂ ᒥᑭᑦᑐᓄᑦ ᓇᖕᒥᓂᖃᖅᑎᐅᔪᓄᑦ ᐃᑲᔪᖅᓱᐃᓂᕐᒧᑦ ᐱᓕᕆᐊᖑᔪᒥ, ᐊᒻᒪ ᐊᑐᕈᓐᓇᕆᕗᖅ ᓴᓇᐅᒐᓕᕆᔨᓄᑦ ᐊᖑᓇᓱᒃᑎᓄᓪᓘᓐᓃᑦᑕᐅᖅ.

ᐃᑲᔪᖅᓱᐃᓂᕐᓂ ᑐᙵᓱᒃᑎᑕᐅᓂᐊᖅᐳᑦ ᑮᓇᐅᔭᓕᕆᓂᕐᒧᑦ ᐊᒃᓱᕈᕐᓂᐅᔪᓂ ᐊᖏᒡᓕᕙᓪᓕᐊᑎᓪᓗᒍ, ᑭᓯᐊᓂ ᓈᒻᒪᖕᓂᐊᖅᐹ? ᐃᑲᔫᓯᕐᓂᐅᔪᑦ ᐊᑐᕐᓂᖃᕐᓂᐊᖅᐸ ᐃᖅᑲᓇᐃᔮᖃᕈᓐᓃᕈᑎᒃ? ᓇᖕᒥᓂᖃᖅᑎᐅᔪᒥ ᐊᑭᓕᒃᓴᓄᐊᒃᑲᓐᓂᐅᔭᕈᒪᓇᔭᖅᐹ ᐳᒃᑕᓛᕐᓂᕐᒧᑦ ᓂᐊᖁᑐᐃᓐᓇᖓ ᓄᐃᓴᓗᓂ ᐊᒥᓱᓄᑦ ᖃᓂᒪᓐᓇᐅᔪᖅ ᐊᑦᑐᙱᖅᓯᓯᒪᓂᐅᔪᖅ ᐊᐅᔭᓚᒫᒥ ᐊᑐᕐᓂᐊᕈᓂ?

ᐊᔪᕐᓇᖅᑐᒃᓴᐅᕗᖅ ᒐᕙᒪᒃᑯᓐᓂ ᐊᓂᒍᐃᑎᑦᑎᓂᕐᒥ ᑕᐃᒪᐃᑦᑐᒥ ᐱᔭᕆᐊᓕᖕᒥ ᑎᓕᐅᕈᑕᐅᔪᒥ, ᒪᑐᓯᓂᖏᓐᓂ ᑭᓱᑐᐃᓐᓇᓂ ᐱᓪᓚᕆᐅᙱᑦᑐᓄᑦ ᐊᒻᒪ ᖃᐅᔨᒪᓪᓗᑎᒃ, ᐃᓱᒪᒋᓇᒍ ᒐᕙᒪᑐᖃᖅᑎᒍᑦ ᐊᒻᒪ ᓄᓇᕗᒻᒥ ᐊᒃᓱᕈᕐᓂᐅᔪᓂ, ᐊᔪᕐᓇᕐᔪᐊᕐᓂᐊᖅᐳᖅ ᓄᓇᕗᒻᒥᐅᓄᑦ ᐅᑎᑦᑎᐊᕐᓂᖏᓐᓄᑦ ᑮᓇᐅᔭᓕᐅᑦᑎᐊᕐᓂᖏᓐᓂ ᐊᒻᒪ ᐃᖅᑲᓇᐃᔭᖅᑎᑦᑎᒃᑲᓐᓂᕐᓂᕐᒧᑦ ᐃᖅᑲᓇᐃᔭᖅᑎᓂᑦ.

ᑕᒪᕐᒥᓕᒫᑦ ᓄᓇᕗᒻᒥ ᒐᕙᒪᒃᑯᓐᓂ ᐃᖅᑲᓇᐃᔮᖃᙱᓚᑦ, ᐃᓚᖃᒐᔪᒃᑐᓂ ᐃᓚᖏᓐᓂ ᖁᑦᑎᓛᖑᔪᓂ ᐊᒻᒪ ᑮᓇᐅᔾᔭᒃᓴᓂᖃᑦᑎᐊᕐᓂᐅᔪᓂ ᓄᓇᕗᒻᒥ ᐊᒻᒪ ᐊᖏᕐᕋᒥ ᐃᖅᑲᓇᐃᔭᕐᓂᕐᒥ ᐊᐅᓚᑕᐅᓴᕋᐃᑦᑐᓐᓇᖅᐳᑦ ᐊᒥᓱᓂ ᖃᓄᐃᓐᓂᐅᔪᓂ, ᑕᐃᒫᒃ ᐱᓪᓚᕆᐅᕗᖅ ᒥᑭᑦᑐᓂ ᐊᒻᒪ ᓄᓇᓕᖕᓂ ᓇᖕᒥᓂᖃᖅᑎᐅᔪᑦ ᐃᑲᔪᖅᓯᖅᑕᐅᓂᖏᓐᓂ ᐊᔪᕐᓇᙱᑐᐊᕌᖓᑦ ᑮᓇᐅᔭᖃᖅᑎᑕᐅᖏᓐᓇᕐᓂᕐᒧᑦ.

ᐃᖅᑲᓇᐃᔭᖅᑎᖁᑎᓖᑦ ᐊᔾᔨᒌᙱᓐᓂᐅᔪᓂ ᒐᕙᒪᒃᑯᓐᓂ ᐊᒻᒪ ᓇᖕᒥᓂᖃᖅᑐᓄᑦ ᐱᓕᕆᕝᕕᐅᔪᓄᑦ ᐱᓪᓚᕆᐅᓂᐊᖅᐳᖅ ᓄᓇᕗᒻᒥ ᐅᑎᖅᑎᕆᓂᕐᒧᑦ ᐱᓕᕆᓂᐅᔪᒥ ᐊᒻᒪ ᑮᓇᐅᔾᔭᒃᓴᑦᑎᐊᒃᑲᓐᓂᓕᕐᓂᕐᒧᑦ.

Advertisement