ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᑦ
ᓄᓇᕗᑦ ᖁᔭᓐᓇᒦᒃ ᐅᑎᕐᓂᖓᓂ ᐱᔪᓐᓇᕐᓂᖃᕐᓂᑐᐊᖑᓂᖓᓄᑦ ᑲᓇᑕᒥ ᐊᑕᐅᓯᕐᒥᓪᓘᓐᓃᑦ ᐱᑕᖃᙱᓐᓂᖓᓂ ᓄᕙᒡᔪᐊᕐᓇᖅ-19–ᒥ, ᐃᓚᖏᑦ ᐃᓱᒪᔪᒃᓴᐅᕗᑦ ᖃᖓ ᑭᓱᑐᐃᓐᓇᐃᑦ ᐅᑎᕐᓂᐊᕐᓂᖓᓂ ᐊᑐᖅᑕᐅᕙᓚᐅᖅᑐᓄᑦ.

ᐃᓱᒪᒋᔭᐅᓂᐅᕗᖅ ᐃᒃᐱᒋᔭᐅᔪᒥ ᐊᒥᓱᓄᑦ ᑲᓇᑕᓕᒫᒥ, ᐱᓗᐊᖅᑐᒥ ᐃᓂᐅᔪᓂ ᐊᑦᑎᒃᑐᒥ ᓄᕙᒡᔪᐊᕐᓇᕐᒥ ᐅᓄᕐᓂᖃᖅᑐᓄᑦ.

ᑕᒪᕐᒥᒐᓚᐃᑦ ᐃᓱᒪᒐᓗᐊᖅᑎᓪᓗᒋᑦ ᖃᖓ ᐳᓛᕆᐊᕈᓐᓇᖅᓯᓛᕐᓂᖏᓐᓂ ᐃᓚᒥᓂᑦ ᐊᒻᒪ ᐱᖃᓐᓇᕆᔭᒥᓂᑦ, ᒥᑭᑦᑐᓄᑦ ᓇᖕᒥᓂᖃᖅᑎᐅᔪᑦ ᐃᒻᒥᖕᓂᒃ ᓄᔮᖅᑐᖅᓯᒪᔪᒃᓴᐅᕗᑦ ᐅᑕᖅᑭᑎᓪᓗᒋᑦ ᑕᖅᑭᒥ–ᑕᖅᑭᒧᑦ ᒥᑭᑦᑐᑯᓗᖕᒥ ᑮᓇᐅᔾᔭᒃᓴᓂᖃᙱᑦᑎᐊᒻᒪᕋᒃᑐᒧᑦ ᓯᓚᑖᓂ ᒐᕙᒪᒃᑯᓐᓂ ᐃᑲᔪᖅᓯᖅᑕᐅᓂᐅᔪᓂ ᐃᓯᖅᐸᓪᓕᐊᔪᓄᑦ.

ᑕᐃᒃᑯᐊ, ᓲᕐᓗ ᐊᐅᓚᑦᑎᔨᒻᒪᕆᒃᑎᑐᑦ ᐃᖃᓗᖕᓂ–ᑐᙵᕕᖃᖅᑐᒥ ᐅᑭᐅᖅᑕᖅᑐᒥ UAV–ᒥ ᑰᑦ ᐃᔨᑦᓯᐊᖅ, ᐃᓱᒪᕗᖅ ᖃᓄᖅ ᓇᖕᒥᓂᕆᔭᐅᔪᑦ ᐆᒪᐃᓐᓇᕈᓐᓇᕐᓂᐊᕐᓂᖏᓐᓂ ᐃᖏᕐᕋᓂᖃᖅᑎᓪᓗᒋᑦ ᓇᓗᓇᖅᑐᐊᓗᖕᓂ ᑐᒃᓯᕋᐅᑕᐅᔪᓂ ᒐᕙᒪᑐᖃᒃᑯᓐᓄᑦ ᑐᓂᕐᕈᑎᓄᑦ ᐊᒻᒪ ᐊᑐᖅᑐᐊᕐᓂᐅᔪᓄᑦ, ᐊᒥᓱᑦ ᑭᒡᓕᖃᖅᑎᑕᐅᓯᒪᔪᓂ ᐃᓚᐅᑎᑕᐅᙱᓐᓂᖃᖅᑐᓂ ᑕᐃᒃᑯᓄᖓ ᑳᓐᑐᕌᒃᑎᐅᔪᓂ ᐊᑐᖅᐸᒃᑐᓂ.

“ᑮᓇᐅᔭᓂᒃ ᐃᓯᖅᐸᓪᓕᐊᔪᓄᑦ ᑎᑭᐅᑎᔪᓄᑦ ᐱᑕᖃᙱᑦᑎᐊᖅᑐᒧᑦ, ᐊᒥᓱᑦ ᓇᖕᒥᓂᖃᖅᑎᐅᔪᑦ ᐃᓱᒫᓗᒃᐳᑦ ᐅᒥᐊᕐᔪᐊᒧᑦ ᐊᙳᑎᔾᔮᙱᓐᓂᖏᓐᓂ, ᐱᓪᓚᕆᒃᑐᒥ … ᖄᖏᐅᔾᔭᐅᒍᕕᒃ ᐱᕕᒃᓴᖃᕐᓂᐅᔪᒥ, ᑕᐃᓐᓇ ᐱᔪᓐᓇᕐᓂᐅᔪᖅ ᐅᓯᔭᐅᑎᑦᑎᓂᕐᒥ ᐱᖁᑎᓂᑦ ᐅᑭᐅᖅᑕᖅᑐᒧᑦ, ᐊᕐᕌᒍᓕᒫᒧᑦ ᖄᖏᐅᔾᔭᐅᓂᐊᖅᐳᑎᑦ,” ᐊᒥᓱᐃᑦ ᐊᒃᓱᕈᕈᑕᐅᔪᑦ ᑐᕌᖓᓇᔭᖅᑐᒃᓴᐅᕗᑦ ᐃᒻᒥᒃᑰᖅᑐᓂ ᑳᓐᑐᕌᒃᑎᐅᔪᓄᑦ, ᑕᐃᒃᑯᓄᖓ ᐳᓚᕋᖅᑐᓕᕆᓂᕐᒦᑦᑐᓄᑦ ᐊᒻᒪ ᑐᙵᓵᕆᓂᐅᔪᒧᑦ, ᐅᕝᕙᓘᓐᓃᑦ ᐃᓚᖏᓐᓄᑦ ᐃᒻᒥᒃᑰᖅᑐᓄᑦ ᓂᐅᕕᕐᕕᐅᔪᓄᑦ ᓄᓇᕗᒻᒥ ᐊᕕᒃᑐᖅᓯᒪᓂᐅᔪᓂ ᐊᖓᔪᖅᑳᖃᕐᕕᐅᔪᓄᑦ.
ᑕᐃᒫᒃ ᐱᒻᒪᕆᕐᔪᐊᖑᕗᖅ ᓄᓇᕗᒻᒥ ᒐᕙᒪᒃᑯᓐᓂ ᐋᔩᖃᑎᖃᖅᐸᓪᓕᐊᓂᖏᓐᓂ ᓄᓇᖃᖅᑎᐅᔪᓄᑦ ᐊᒻᒪ ᓇᖕᒥᓂᖃᖅᑎᐅᔪᓄᑦ ᖃᓄᖅ ᐸᕐᓇᖕᓂᐊᕐᓂᖏᓐᓂ ᐱᒋᐊᖅᑎᑦᑎᒃᑲᓐᓂᕐᓂᐊᕐᓂᖏᓐᓂ ᑮᓇᐅᔾᔭᒃᓴᓂᐅᔪᒥ ᑭᖑᓂᐊᒍᑦ-ᓄᕙᒡᔪᐊᕐᓇᕐᒥ.

ᒐᕙᒪᒃᑯᑦ ᑐᕌᖓᓂᖃᓪᓗᐊᖅᐳᑦ ᑕᐃᒃᑯᓄᖓ ᐱᔨᑦᑎᕋᖅᐸᒃᑕᒥᓄᑦ ᐸᕐᓇᒃᓯᒪᓂᕐᒧᑦ ᐅᑎᕐᓂᐊᕐᓂᖏᓐᓄᑦ ᓄᕙᒡᔪᐊᕐᓇᕐᒥ ᐱᕐᔪᐊᕐᓂᖃᕐᓗᑎᒃ ᐊᒻᒪ ᐊᒃᓱᕈᑦᑎᐊᕐᓗᑎᒃ, ᐃᓚᖃᖅᑐᒥ ᐅᖃᐅᔾᔨᓯᒪᑦᑎᐊᖅᑐᒥ ᐊᒻᒪ ᐃᓱᒪᒋᔭᐅᑦᑎᐊᖅᓯᒪᔪᒥ ᐸᕐᓇᐅᑎᒥᒃ.

ᒥᑭᑦᑐᓄᑐᐊᖅ ᓇᖕᒥᓂᖃᖅᑎᐅᓅᙱᑦᑐᖅ ᓄᓇᕗᒻᒥ ᒐᕙᒪᒃᑯᑦ ᑭᐅᔭᕆᐊᖃᕐᓂᖏᓐᓂ, ᑭᓯᐊᓂᑦᑕᐅᖅ ᐊᖏᔪᓄᑦ ᐱᓕᕆᔨᕐᔪᐊᖑᔪᓄᑦᑕᐅᖅ.

ᓄᓇᕘᑉ ᓴᓂᓕᖓᓂ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᒥ, ᓄᓇᑦᓯᐊᕐᒥ ᒐᕙᒪᒃᑯᑦ ᓴᖅᑭᑎᑦᑎᓚᐅᖅᐳᑦ ᑭᖑᓂᐊᒍᑦ-ᓄᕙᒡᔪᐊᕐᓇᕐᒥ ᐸᕐᓇᐅᑎᖓᓂ ᐊᒻᒪ ᑐᓚᐅᖅᐳᖅ ᓂᐱᖅᑯᖅᑐᔪᒥ ᑕᐃᒃᑯᐊ ᑲᒪᒋᔭᖃᖅᑐᑦ ᐱᐅᒍᐃᓚᐅᕐᒪᑕ ᐅᖃᖃᑎᖃᕐᓂᕐᒧᑦ ᐅᔭᕋᖕᓂᐊᕐᓂᕐᒧᑦ ᐱᓕᕆᔨᕐᔪᐊᖑᔪᓄᑦ, ᑭᒡᒐᖅᑐᐃᔪᒥ ᐊᖏᐸᓗᒃᑐᒥ ᐃᓚᖓᓐᓂ ᓄᓇᕘᑉ ᓂᐅᕕᖅᑕᐅᓂᑯᓄᑦ ᑮᓇᐅᔭᓕᐊᕆᔭᐅᓯᒪᔪᑦ ᑲᑎᖦᖢᒋᑦ.
ᓄᓇᕗᑦᑕᐅᖅ ᐊᖏᐸᓗᒃᑐᒥ ᐱᖃᕐᓂᖏᓐᓂ ᓂᐅᕕᖅᑕᐅᓂᑯᓄᑦ ᑮᓇᐅᔭᓕᐊᕆᔭᐅᓯᒪᔪᑦ ᑲᑎᖦᖢᒋᒻᒥ, ᐃᖅᑲᓇᐃᔮᑦ ᐊᒻᒪ ᓇᖏᖅᑕᕐᓂᓂᑦ ᑎᑭᑉᐸᒃᑐᓂ ᐅᔭᕋᖕᓂᐊᕐᓂᕐᓄᑦ, ᐱᓕᕆᖃᑕᐅᓯᒪᒋᓪᓗᑎᒃ ᐅᔭᕋᖕᓂᐊᕐᓂᕐᒧᑦ ᐱᓕᕆᔨᕐᔪᐊᖑᔪᓄᑦ ᐃᑲᔪᖅᓱᐃᓂᐅᔪᒥ ᐱᓕᕆᕝᕕᐅᔪᒥ ᓄᓇᑦᓯᐊᕐᒥ, ᓂᕆᐅᒍᓐᓇᑐᐃᓐᓇᖅᐳᑦ ᐊᔾᔨᖓᓂ ᑕᒻᒪᕐᓂᖃᖅᑕᐃᓕᒪᓂᐊᕐᓂᖏᓐᓂ ᒪᕐᕈᐃᖅᓱᖅᑕᐅᓗᓂ.

ᐊᖏᔪᑦ ᒐᕙᒪᒃᑯᓐᓂ ᐱᓕᕆᔾᔪᓯᐅᔪᑦ ᐊᒻᒪᓗ ᑕᐃᒃᑯᓄᖓ ᐊᐅᓚᑦᑎᓂᖃᖅᑐᑦ ᐃᓗᐊᓂ ᐃᒻᒥᖕᓂ–ᓇᓗᓇᖅᓯᓯᒪᑦᑎᐊᕐᓂᖏᓐᓂ. ᐃᖅᑲᓇᐃᔭᖅᑎᖏᑦ ᖃᐅᔨᒪᕗᑦ ᑮᓇᐅᔭᒃᓴᖏᑦ ᑎᑭᖃᑦᑕᕐᓂᐊᕐᓂᖏᓐᓂ ᐱᓇᓱᐊᕈᓯᑦ ᒪᕐᕉᒃ ᐊᓂᒍᑐᐊᕌᖓᑦ ᐊᒻᒪ ᐊᖏᓂᕐᔪᐊᖑᔪᒥ ᓴᐳᔾᔭᐅᓯᒪᓂᐅᕗᑦ ᑲᑎᙵᓂᐅᔪᓂ ᐃᓅᖃᑎᒌᖕᓂᐅᔪᒥ. ᐅᓗᕆᐊᓇᕐᓂᖓ ᐱᒃᑯᓕᓯᒪᓂᖏᓐᓂ ᐅᕝᕙᓘᓐᓃᑦ ᐊᓯᐊᒎᕐᓂᐅᔪᒥ ᐃᓱᒪᓂᖃᕐᓂᐅᔪᒥ ᓴᖅᑭᓲᖑᕗᖅ.

ᒐᕙᒪᒃᑯᑦ ᐱᓕᕆᑦᑎᐊᖅᓯᒪᔪᐊᓘᒐᓗᐊᖅᑎᓪᓗᒋᑦ ᓄᕙᒡᔪᐊᕐᓇᖅ ᓄᓇᕗᒻᒧᐊᖅᑎᑦᑎᑦᑕᐃᓕᒪᓂᖏᓐᓂ ᐊᒻᒪ ᓱᒃᑲᔪᒥ ᐱᓕᕆᓪᓗᑎᒃ ᓱᓕᙱᑦᑐᒥ ᐱᑕᖃᕐᓂᕋᐃᔪᒥ ᖃᓄᐃᓐᓂᐅᔪᒥ ᐅᖃᐅᓯᐅᓚᐅᖅᑎᓪᓗᒍ ᒥᑦᑎᒪᑕᓕᖕᒥ, ᒐᕙᒪᒃᑯᑦ ᐃᓗᐃᑦᑑᓪᓗᑎᒃ ᐃᒻᒥᖕᓂᒃ ᓴᐳᔾᔨᓯᒪᔭᕆᐊᖃᖅᐳᑦ ᑭᐅᔨᐅᔪᓐᓃᖅᑎᐅᓂᕐᒧᑦ ᑕᐃᒃᑯᓄᖓ ᐃᓚᒋᔭᐅᙱᑦᑐᓄᑦ ᒐᕙᒪᒃᑯᓐᓂ.
ᐃᓱᒪᒋᔭᖃᕐᓂᕐᒥ ᐱᑕᖄᓂᒃᑐᒥ ᐅᒃᐱᕈᓱᙱᓐᓂᖃᕐᓂᖓᓂ ᒐᕙᒪᐅᔪᓄᑦ ᐊᖏᒡᓕᒋᐊᖅᑎᑦᑎᔪᓐᓇᖅᐳᖅ ᐅᑯᓇᓂ ᖃᐅᔨᒪᔭᐅᓚᐅᖅᓯᒪᙱᑦᑐᒥ ᖃᓄᐃᓐᓂᐅᔪᓂ, ᓲᕐᓗ ᑭᐅᓂᐅᔪᑦ ᐅᑎᖁᔨᓂᖏᓐᓂ ᐃᓕᓴᐃᔨᓂ ᓄᓇᕗᒻᒧᑦ, ᖃᓄᐃᑦᑐᓐᓇᕐᓂᖓᓂ ᖁᑦᑎᕐᔪᐊᓗᐊᖅᐳᖅ ᓄᓇᕗᒻᒥ ᒐᕙᒪᒃᑯᓐᓂ ᐱᙳᐊᕆᔭᖃᑐᐃᓐᓇᕐᓂᕐᒧᑦ ᐃᓄᓕᒫᓄᑦ ᐃᓱᒪᒋᔭᐅᓂᐅᔪᓄᑦ.

ᑕᒪᒃᑭᓂ ᐃᒐᓛᓂᑦ ᒪᑐᐃᖓᑎᑦᑎᓂᕐᒥ ᐅᖓᓯᒃᑐᒧᑦ–ᑎᑭᐅᑎᓂᐅᔪᒥ ᓄᓇᕗᒻᒥ ᒐᕙᒪᐅᔪᓂ ᐋᖅᑭᒃᓱᖅᑕᐅᓯᒪᓂᖓᓂ ᐊᒻᒪ ᐋᖅᑭᒃᓱᐃᓂᖓᓂ ᖃᓄᓪᓚᕆᒃ ᐸᕐᓇᖕᓂᐊᕐᓂᖏᓐᓂ ᑮᓇᐅᔾᔭᒃᓴᓂᐅᔪᖅ ᐱᒋᐊᖅᑕᐅᒃᑲᓐᓂᕐᓂᐊᕐᓂᖓᓂ ᐱᓪᓚᕆᐅᓂᐊᖅᐳᖅ ᐱᑎᑦᑎᑦᑕᐃᓕᒪᓂᕐᒧᑦ ᐊᖏᒡᓕᒋᐊᖅᑎᑦᑎᓂᕐᒥ ᐊᕕᒃᓯᒪᓂᐅᔪᒥ.

Advertisement