Skip to content

ᓯᕗᓂᒃᓴᖃᙱᑦᑐᖅ ᒪᒃᑯᒃᑐᑦ ᐃᑲᔪᖅᓯᖅᑕᐅᙱᒃᑯᑎᒃ

ᐃᓱᓕᑉᐸᔾᓕᐊᓕᖅᑎᓪᓗᑕ ᐃᓕᓐᓂᐊᕐᕕᐅᑉ ᐊᕐᕌᒍᖓᓂ, ᐅᑭᐅᖅᑕᖅᑐᒥ ᒪᒃᑯᒃᑐᑦ ᐸᕐᓇᒃᐸᓪᓕᐊᕗᑦ ᐊᐅᔭᕐᒧᑦ ᐊᒻᒪ ᐱᓂᖏᓐᓂ ᐊᑭᓕᐅᑎᒃᓴᐅᔪᓂ ᐊᒃᓱᕈᖅᖢᑎᒃ ᐱᓕᕆᓂᐅᔪᒥ ᐊᒥᐊᒃᑯᖓᓂ ᐊᕐᕌᒎᔪᒥ.

ᐅᖅᓱᖅᑑᒥ, ᒪᒃᑯᒃᑐᑦ ᐃᖃᓗᒃᑑᑦᑎᐊᒥ ᐊᖏᕐᕋᐅᔾᔨᓚᐅᖅᐳᑦ ᒪᒃᑯᒃᑐᓄᑦ ᑕᐃᒎᓯᑐᐃᓐᓇᐅᙱᑦᑐᒥ ᐃᓄᒃᑎᑐᑦ ᒧᒥᕐᓂᐅᔪᒥ ᓵᓚᖃᕋᓱᐊᕐᓂᐅᔪᒥ, ᑭᓯᐊᓂᑦᑕᐅᖅ ᑕᒪᐃᑎᒍᑦ ᓵᓚᒃᓴᕐᓂᐅᔪᒥ. ᐆ, ᐊᒻᒪᓗ $10,000-ᒥ.

ᓄᓇᑦᓯᐊᕐᒥ, ᓴᓇᐅᒐᓕᕆᔨᐅᔪᖅ ᖃᑉᓗᓯᐊᖅ (ᔭᐃᑦ ᓇᓱᒐᓗᐊᖅ ᑳᐱᓐᑕ) ᓯᕗᓪᓕᖅᐸᐅᓪᓗᓂ ᐃᓗᕕᐊᓗᒃ ᑕᑭᔪᒥ-ᑎᑎᕋᖅᑕᐅᓯᒪᓂᐅᔪᓄᑦ ᐱᕐᔪᐊᖑᔪᒧᑦ ᓲᐱ ᓴᓇᐅᒐᓄᑦ ᓵᓚᖃᐅᓯᐊᖑᔪᒧᑦ ᐊᑭᖃᓪᓗᐊᖅᑐᒥ $100,000-ᒥ. ᑕᐃᒪᓐᓇᑎᑐᑦ 2006-ᒥ ᓵᓚᖃᖅᑎᐅᔪᒥ ᐋᓂ ᐳᑐᒍᖅ ᖃᑉᓗᓯᐊᖅ ᓴᓇᐅᒐᓕᐊᖑᔪᓄᑦ ᓇᓗᓇᐃᖅᑕᐅᓂᐅᔪᒥ ᖃᐅᑕᒫᒥ ᐃᓅᓯᖓᓐᓂ, ᖃᑉᓗᓯᐊᑉ ᐱᓕᕆᓂᖓᓂ ᑭᐅᓂᕐᒧᑦ ᐃᓕᖅᑯᓯᕐᒥ ᓅᑕᐅᓂᐅᔪᓄᑦ.

ᐊᒻᒪᓗᑦᑕᐅᖅ, ᐃᓄᕕᐊᓘᖃᑎᖓ ᑕᐃᕋ ᑳᒃᓂ-ᒎᔅ ᐱᓚᐅᖅᐳᖅ $25,000-ᒥ ᐊᑭᖃᙱᑦᑐᒥᒃ ᐃᓕᓐᓂᐊᕆᐊᒃᑲᓐᓂᕈᓯᐊᕐᒥ ᐊᔪᙳᓛᖑᓂᐊᒍᑦ ᐱᓪᓗᓂ ᓇᒃᓯᐅᔾᔨᓚᐅᖅᑎᓪᓗᒍ ᑕᕐᕆᔭᓕᐊᖑᔪᒥ STEAM Horizon ᓵᓚᖃᐅᓯᖃᒃᓴᓄᑦ. ᐊᕐᕌᓂᓵᖅ, ᓵᓚᒃᓴᓚᐅᖅᐳᖅ ᑲᓐᓄᔭᐅᔭᕐᒥ ᑲᓇᑕᓕᒫᒥ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ ᐋᑐᕚᒥ, ᐊᒻᒪ ᖃᐃᖁᔭᐅᒃᑲᓐᓂᓚᐅᖅᐳᖅ ᑲᓇᑕᐅᑉ ᐊᖓᔪᖅᑳᖃᕐᕕᖓᓄᑦ ᑲᓇᑕᒥ ᐊᖓᔪᖅᑳᕐᔪᐊᖓᑕ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᒧᑦ.

ᐅᕙᓂ ᓄᓇᕗᒻᒥ, ᑎᓴᒪᓂ ᒪᒃᑯᒃᑐᓂ ᐊᕐᓇᓂᑦ ᐃᖃᓗᖕᓂ ᒫᓐᓇ ᐸᕐᓇᒃᐸᓪᓕᐊᕗᑦ ᓇᖕᒥᓂᖅ ᐊᐅᓪᓛᕐᓂᐊᕐᓂᖏᓐᓄᑦ ᐋᑐᕚᒧᑦ ᑲᓇᑕᓕᒫᒧᑦ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᒧᑦ ᐱᓚᐅᖅᑎᓪᓗᒋᑦ ᖁᑦᑎᓛᖑᔪᓂ ᐱᖓᓱᓂᑦ ᐃᓂᐅᔪᓄᑦ ᓯᕗᓪᓕᖅᐹᖑᔪᒥ ᕿᑭᖅᑖᓗᖕᒥ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ ᐊᕐᕌᒍᓄᑦ 18-ᓄᑦ. ᐃᓕᔅᓯᓐᓄᑦ ᐃᑲᔪᖅᑕᐅᔭᕆᐊᖃᖅᐳᑦ ᑕᐃᑯᙵᐅᓂᕐᒧᑦ, ᐊᑭᖏᓐᓂ ᓇᓚᐅᑦᑖᕆᔭᐅᙳᒪᔪᓄᑦ $10,000-ᓄᑦ.

ᐅᑯᐊᑦᑕᐃᓐᓇᑦ ᒪᒃᑯᒃᑐᑦ ᑐᕌᒐᒃᓴᐅᕗᑦ ᐊᑭᖃᙱᑦᑐᒥᒃ ᐃᓕᓐᓂᐊᕆᐊᒃᑲᓐᓂᕈᓯᐊᕐᒥ ᐊᔪᙳᓛᖑᓂᐊᒍᑦ ᐱᓇᓱᐊᕐᓂᐅᔪᒥ ᑎᒥᖁᑕᐅᔪᓂ ᐃᓅᔪᓄᑦ ᓄᑖᖑᔪᓂ ᓄᓇᕗᒻᒧᑦ, ᑕᐃᒪᓐᓄᑦ ᐱᓕᕆᔨᕐᔪᐊᖑᔪᑦ De Beers, ᐊᑐᐃᓐᓇᖃᖅᑎᑦᑎᔪᓂ 9-ᓂ ᐊᑭᖃᙱᑦᑐᒥᒃ ᐃᓕᓐᓂᐊᕆᐊᒃᑲᓐᓂᕈᓯᐊᕐᒥ ᐊᔪᙳᓛᖑᓂᐊᒍᑦ ᐱᓇᓱᐊᕐᓂᐅᔪᓄᑦ ᐊᑭᖃᓪᓗᐊᖅᑐᒥ $4,800 US ᐊᑐᓂ ᐊᕐᓇᓄᑦ ᐃᓯᖅᑐᓄᑦ STEM (ᖃᐅᔨᓴᕐᓂᕐᒧᑦ, ᓄᑖᙳᖅᐸᓪᓕᐊᔪᓄᑦ, ᓴᓇᔭᐅᓯᒪᓂᐊᖅᑐᓂᒃ ᐋᖅᑭᒃᓱᐃᔨᐅᓪᓗᑎᒃ ᑎᑎᕋᐅᔭᕐᓂᕐᒧᑦ, ᓇᐃᓴᐅᓯᕆᓂᕐᒧᑦ) ᑲᓇᑕᒥ ᖁᑦᑎᖕᓂᖅᓴᐅᔪᒧᑦ-ᐃᓕᓐᓂᐊᕐᓂᕐᒧᑦ ᐃᓕᓐᓂᐊᕐᕕᖓᓄᑦ. ᐱᐅᒋᔭᐅᓂᖅᓴᐅᓪᓗᑎᒃ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᐅᑭᐅᖅᑕᖅᑐᒥ.

ᐊᒻᒪ ᐳᐃᒍᖅᑕᐃᓕᑕ ᒪᒃᑯᒃᑐᓂ ᐃᓄᖕᓂ ᐃᖃᓗᒃᑑᑦᑎᐊᒥ ᓵᓚᒃᓴᓚᐅᖅᑐᓂ $100,000-ᒥ ᐅᑭᐅᖅᑕᖅᑐᒥ ᑲᔪᖏᖅᓴᐃᓂᐅᔪᒥ ᓵᓚᖃᕋᓱᐊᕐᓂᐅᔪᒥ ᓴᓇᓪᓗᑎᒃ ᐃᒋᑕᐅᓯᒪᔪᓄᑦ ᓴᕕᕋᔭᖕᓂ ᐊᒻᒪ ᓴᓇᐅᒐᓕᐅᕆᓪᓗᓂᔾᔪᒃ.

ᓇᓗᓇᐃᖅᓯᓇᓱᐊᖅᑕᕋ, ᐱᕕᒃᓴᖅᑕᖃᐅᖅᐳᖅ ᓄᓇᕗᒻᒥ ᒪᒃᑯᒃᑐᓄᑦ ᑎᑭᐅᑎᔭᒃᓴᖏᓐᓂ ᐊᒻᒪ ᐊᑭᓕᖅᑕᐅᓂᖃᕐᓗᑎᒃ ᐊᒃᓱᕈᖅᖢᑎᒃ ᐱᓕᕆᐊᕆᔭᖏᓐᓄᑦ.

ᐊᓯᐊᒎᖅᑐᒥ, ᐊᒥᓱᓂᑦ ᒪᒃᑯᒃᑐᓂ ᑐᓴᕐᕕᒋᕙᙱᑕᑦᑎᓐᓂ ᑎᑭᐅᑎᙱᓐᓂᖏᓐᓂ ᐅᕙᒍᑦ ᐃᓐᓇᐅᔪᑎᒍᑦ ᑐᓂᓯᓂᖃᒐᔪᙱᓐᓇᑦᑕ ᐱᕕᒃᓴᖃᕐᓂᐅᔪᓂ ᐱᔭᕆᐊᖃᖅᑕᒥᓂᑦ.

ᐅᖃᐅᓯᐅᒃᑲᓐᓂᖅᑐᒥ ᓄᖅᑲᖅᑎᑕᐅᓯᒪᓂᐅᔪᒥ ᐅᖃᐅᓯᐅᔪᒥ ᓄᓇᕗᒻᒥ ᑐᙵᕕᒃᑯᓐᓂ ᓄᓇᕗᒻᒥ ᒐᕙᒪᒃᑯᑦ ᐱᓕᕆᓂᖃᑦᑎᐊᙱᓚᑦ ᓄᓇᕗᒻᒥ ᒪᒃᑯᒃᑐᖁᑎᖏᓐᓄᑦ ᑐᓂᓯᙱᓐᓂᕐᒧᑦ ᒪᕐᕉᖕᓂ ᐅᖃᓪᓚᖕᓂᐅᔪᒥ ᐃᓕᓐᓂᐊᕐᓂᖃᕐᓂᕐᒧᑦ. ᑕᒪᓐᓇ ᑕᑯᒃᓴᐅᔮᓕᖅᐳᖅ ᒫᓐᓇᐅᔪᒥ ᐊᓯᐅᔨᔭᐅᓂᐊᖅᑑᔮᖅᑐᒥ ᐱᓕᕆᓂᐅᓂᖓᓂ. ᒐᕙᒪᒃᑯᑦ ᑐᓂᓯᐊᕐᔪᒍᓐᓇᑐᐃᓐᓇᖅᐳᑦ ᐱᓕᕆᔾᔪᑕᐅᔪᓂ ᒪᒃᑯᒃᑐᖁᑎᑦᑎᓐᓂ ᐃᓱᓕᑦᑎᓂᕐᓄᑦ, ᐱᓗᐊᖅᑐᒥ ᐃᓱᓕᑦᑎᓂᕐᒥ ᐃᓄᐃᑦ ᐅᖃᐅᓯᖏᑎᒍᑦ.

ᒐᕙᒪᑐᖃᒃᑯᑦᑕᐅᖅ, ᐱᓕᕆᑦᑎᐊᕐᓂᖃᙱᓚᖅ ᑲᑉᐱᐊᑦᑕᐃᓐᓂᖃᙱᓐᓂᖏᓐᓂ ᓴᓇᓂᕐᒥ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᑦ ᑐᖅᑯᖅᑕᐅᓯᒪᓪᓗᑎᒃ ᐱᔭᕆᐊᖃᖅᑐᓄᑦ ᐃᓱᓕᑦᑎᓂᕐᒧᑦ ᐃᒡᓗᒃᓴᖃᙱᓗᐊᕐᓂᐅᔪᒥ ᑐᐊᕕᕐᓇᖅᑑᔪᒥᒃ ᐊᒻᒪᓗ ᓂᕿᒃᓴᖃᙱᓗᐊᕐᓂᐅᔪᒥ ᐊᒥᓱᓗᐊᓂ ᒪᒃᑯᒃᑐᓂᐊᒻᒪ ᐃᓚᒌᑦᓵᙵᓲᖑᓂᖏᓐᓂ ᖃᐅᑕᒫᑦᑎᐊᖅ.

ᑭᓯᐊᓂ ᐅᕙᒍᑦ ᐃᓄᑐᐃᓐᓇᐅᔪᑎᒍᑦ ᐊᒥᓱᓂ ᐱᕕᒃᓴᖃᐅᖅᐳᒍᑦ ᓇᖏᖅᓯᒃᑲᓐᓂᕐᓂᕐᒧᑦ ᐱᓕᕆᓂᕆᕙᒃᑕᑦᑎᓐᓄᑦ. ᑐᓴᓲᖑᕗᒍᑦ ᐅᓂᒃᑳᓕᐊᖑᔪᓂ ᒪᒃᑯᒃᑐᓄᑦ ᐱᓕᕆᓂᐅᔪᓄᑦ ᐅᓗᕆᐊᓇᖅᑐᒦᑦᑐᓄᑦ ᐃᓐᓇᐃᑦ ᓯᕗᓕᐅᖅᑎᐅᔪᑦ ᐊᒻᒪ ᐊᔪᕆᖅᓱᐃᕙᒃᑐᓂ ᓄᓇᓕᖕᓂ ᕿᒪᐃᑎᓪᓗᒋᑦ ᐅᕝᕙᓘᓐᓃᑦ ᐊᓯᐊᓄᑦ ᖃᓄᐃᓕᐅᕐᓂᐅᔪᒧᑦ ᓅᑐᐃᓐᓇᖅᖢᑎᒃ.

ᓄᓇᓕᓕᒫᓂᑦ ᐱᓕᕆᓂᖃᓲᖑᕗᖅ ᒪᒃᑯᒃᑐᓂ ᒧᒥᕐᓂᕐᒧᑦ ᓵᓚᖃᕋᓱᐊᕐᓄᐊᖅᑎᑦᑎᕆᓂᕐᒧᑦ ᐊᒻᒪᓗ ᐊᓯᖏᓐᓂ ᓄᓇᓕᐅᔪᓄᑦ ᐱᙳᐊᕐᓂᕐᓄᑦ ᖃᓄᐃᓕᐅᕐᓂᐅᔪᓄᑦ, ᐊᒻᒪ ᐃᒻᒪᖄ, ᓯᓚᑦᑐᖅᓴᕐᕕᒡᔪᐊᖅᒧᐊᖅᑎᑦᑎᓂᕐᒧᑦ.

ᐊᔪᕐᓇᙱᑦᑐᒃᓴᐅᕗᖅᐊᒻᒪ ᐊᑑᑎᖃᑦᑎᐊᖅᖢᓂᐃᓐᓇᕐᓄᑦ ᐊᑐᐃᓐᓇᖃᖅᑎᑦᑎᓂᖏᓐᓂ ᑮᓇᐅᔭᓂᒃ ᑖᒃᑯᓂᖓ ᐊᔪᕐᓇᕈᓐᓃᖅᑎᑦᑎᓂᕐᒧᑦ.

ᑭᓯᐊᓂ ᒫᓐᓇᓕᓴᐅᔪᒥ, ᐃᒪᐃᑦᑑᔮᖅᐳᖅ, ᓄᓇᕗᒻᒥ ᒪᒃᑯᒃᑐᑦ ᐱᔭᕆᐊᖃᖅᐳᑦ ᐃᓐᓇᕐᓂ ᐊᑐᐃᓐᓇᖃᖅᑎᑦᑎᓂᖏᓐᓂ ᐃᑲᔪᕐᓂᖏᓐᓂ ᐊᑯᓂᐅᔪᒃᑯᑦ ᐃᑲᔪᕐᓂᕐᒧᑦ ᐃᓕᓴᐃᔨᐅᓂᕐᓄᑦ, ᐊᔪᕆᖅᓱᐃᕙᒃᑐᓄᑦ ᐱᙳᐊᕐᓂᐅᔪᓄᑦ, ᐃᓚᐅᖃᑕᐅᓗᑎᒃ ᐊᐅᓪᓛᖅᑐᓄᑦ ᐊᒻᒪ ᐃᑲᔪᖅᓱᔨᐅᓂᕐᓄᑦ.

ᐊᐱᕆᓗᑎᑦ ᖃᓄᖅ ᐃᑲᔪᕈᓐᓇᕐᒪᖔᖅᐱᑦ.