ᓄᓇᕗᒻᒥᐅᑦ ᐱᓪᓗᐊᖅᐳᑦ ᓇᓕᒧᑦᑐᒥ ᐊᑐᐃᓐᓇᖃᕐᓂᕐᒧᑦ ᐱᔭᕆᐊᖃᓪᓚᕆᒃᑐᓄᑦ

72

ᐅᑭᐅᖅᑕᖅᑐᒥ ᓂᕿᑦᑎᐊᕙᓕᕆᓂᖅ ᑲᓇᑕ ᑐᕌᒐᒃᓴᖃᖅᐳᖅ ᒥᒃᖠᒋᐊᖅᓯᓂᕐᒧᑦ ᓂᕿᒃᓴᖃᑦᑎᐊᙱᓐᓂᐅᔪᒥ ᐅᑭᐅᖅᑕᖅᑐᒥ. ᑕᐃᔅᓱᒪᒃᑲᓐᓂᖅ, ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᐊᑐᖅᓯᒪᕗᑦ ᑕᑯᒃᓴᐅᑎᑦᑎᓂᐅᔪᒥ ᐴᖑᔪᓂ ᓂᕿᓂᑦ ᑕᑯᒃᓴᐅᑎᑦᑎᓂᕐᒧᑦ ᐊᔾᔨᒌᙱᓐᓂᐅᔪᓂᑦ ᓂᕿᐅᑉ ᐊᑭᖏᓐᓂ ᐅᑭᐅᖅᑕᖅᑐᒥ ᐊᒻᒪ ᖃᓪᓗᓈᑦ ᓄᓇᖓᓐᓂ ᑲᓇᑕᒥ.

ᑐᕕᑐᒥ ᐊᑐᖅᑎᒥ ᐅᕙᑦᑎᓐᓄᑦ ᖃᐅᔨᑎᑦᑎᓚᐅᖅᐳᖅ CBC-ᑯᑦ ᓂᐅᕕᕐᕕᒐᓚᖕᓄᑦ ᑲᑎᙵᓂᐅᔪᓄᑦ ᒫᓐᓇᓕᓴᒥ ᑕᐃᒪᐃᓕᐅᕆᓚᐅᕆᕗᑦ. ᖃᓄᐃᓕᖓᓂᐅᔪᑦ ᐃᓱᒫᓘᑎᒃᓴᐅᓚᐅᖅᐳᑦ, ᑭᓯᐊᓂ ᑲᒪᓇᕐᓇᓂ ᐊᒻᒪ ᖃᐅᔾᔨᒍᑕᐅᒋᓪᓗᑎᒃ ᐊᑕᐅᑦᑎᒃᑯᑦ.

ᐅᕙᓂ ᐱᓕᕆᓂᐅᔪᒥ, ᐃᓚᒌᖑᔪᑦ ᐃᖃᓗᖕᓂ ᐊᐃᑉᐸᕇᒃᑎᑕᐅᓚᐅᖅᐳᑦ ᐃᓚᒌᖑᔪᓄᑦ ᐅᐃᓂᐸᐃᒡᒥ ᐊᒻᒪ ᐊᐱᕆᔭᐅᓪᓗᑎᒃ ᓂᐅᕕᕐᓂᕐᒧᑦ ᐊᔾᔨᒌᓂᒃ ᓂᕿᓂᑦ ᐊᒻᒪ ᐊᑐᖅᑕᐅᖏᓐᓇᓲᓂᑦ.

(ᑐᕕᑐᒥ ᐊᑐᖅᑎ ᐅᖃᓚᐅᕆᕗᖅ ᐊᑐᓂ ᐃᓚᒌᖑᔪᑦ ᓂᐅᕕᕆᐊᖃᓚᐅᖅᐳᑦ ᐃᓗᐃᑦᑐᒥᒃ ᐃᒪᕐᒥ ᐃᓗᓕᖃᖅᑐᓂ, ᐊᑭᖓ ᐊᑑᑎᖃᖅᑎᑦᑎᙱᖦᖢᓂ ᖃᐅᑕᒫᒥ ᐃᓅᓯᖃᕐᓂᐅᔪᒧᑦ ᓄᓇᕗᒻᒥᐅᓄᑦ, ᑭᓯᐊᓂ ᐃᒪᕐᒥ ᖃᓛᖅᑎᑦᑎᔭᕆᐊᖃᕌᖓᑕ ᐅᖃᐅᔾᔨᓂᐅᔪᒥ ᐅᕝᕙᓘᓐᓃᑦ ᓄᓇᕗᒻᒥ ᒐᕙᒪᒃᑯᑦ ᐃᒥᖅᑕᐅᔪᒃᓴᓂ ᑐᓂᓯᓂᐊᕈᑎᒃ ᑲᑎᒪᓂᕐᒥ. ᐃᖃᓗᖕᓂ ᐊᓈᓇᐅᔪᖅ ᐊᑭᓖᓚᐅᖅᐳᖅ $29.95-ᒥ, ᐅᐃᓂᐸᐃᒡᒥ ᐊᓈᓇᐅᔪᖅ ᐊᑭᓖᓪᓗᓂ $4.49-ᒥ ᑕᐃᔅᓱᒧᖓᑦᑕᐃᓐᓇᖅ 24-ᓂ ᐃᓗᓕᓕᖕᒥ.)

ᑕᒪᐃᑎᒍᑦ, ᐊᑭᖏᓐᓂ ᑕᑯᒃᓴᐅᑎᑦᑎᓂᐅᔪᖅ ᑕᑯᒃᓴᐅᑎᑦᑎᓚᐅᖅᐳᖅ ᐃᖃᓗᖕᓂ ᐃᓚᒌᖑᔪᑦ ᐊᑭᓖᓂᖏᓐᓂ ᒪᕐᕈᐃᓪᓗᐊᖅᑐᒥ ᐊᑭᑐᓂᖅᓴᒥ ᐅᐃᓂᐸᐃᒡ ᐃᓚᒌᖑᔪᓂᑦ ᑕᐃᒃᑯᓂᖓᑦᑕᐃᓐᓇᖅ ᐴᖑᔪᒥ ᓂᕿᓂᑦ.

ᐊᒃᓱᕈᕈᑕᐅᕗᖅ ᐅᑭᐅᖅᑕᖅᑐᒥ ᓂᕿᑦᑎᐊᕙᓕᕆᓂᖅ ᑲᓇᑕᒥ ᐱᓕᕆᐊᖑᔪᖅ ᐃᑲᔪᕈᑎᒋᔭᕆᐊᖃᓚᐅᖅᑕᖓᓂ ᐋᖅᑭᖕᓂᕐᒧᑦ. ᐃᓚᖏᑦ ᐅᖃᕋᔭᖅᐳᑦ ᐃᓅᓯᖅ ᐱᐅᓂᖅᓴᐅᓚᐅᖅᐳᖅ ᐅᕘᓇ ᓂᕿᓄᑦ ᑎᑎᖅᑲᒃᑯᕕᒃᑰᖅᑎᑕᐅᓂᒃᑯᑦ ᐱᓕᕆᐊᖑᔫᓚᐅᖅᑐᒥ.

ᓇᓗᓇᙱᑦᑎᐊᖅᐳᖅ ᐅᑭᐅᖅᑕᖅᑐᒥ ᓂᕿᑦᑎᐊᕙᓕᕆᓂᖅ ᐱᐅᙱᓐᓂᖃᕐᓂᖓᓂ, ᐊᒻᒪ ᐃᓄᐃᑦ ᐊᒃᓱᕈᖅᖢᑎᒃ ᐱᓕᕆᓲᖑᕗᑦ ᓇᓂᓯᓇᓱᐊᕐᓂᕐᒧᑦ ᐊᑭᑐᓗᐊᙱᓐᓂᖅᓴᐅᔪᓂ ᕿᓂᖅᖢᑎᒃ. ᖁᑦᑎᓛᕆᔭᐅᔪᒥ ᑎᑎᕋᖅᓯᒪᔪᓂ ᑕᐃᒃᑯᓄᖓ ᓄᓇᖃᖅᑐᓂ ᐃᖃᓗᖕᓂ ᐋᒥᓵᓐ-ᖑᕗᖅ ᐊᒻᒪ ᐊᑭᖓᙱᑦᑐᒥ ᐅᓯᔭᐅᓂᖓᓂ ᐊᑐᐃᓐᓇᖃᕈᓐᓇᕐᓂᖏᓐᓂ ᐊᖓᔪᖅᑳᖃᕐᕕᖕᒧᑦ. ᐊᒥᐊᒃᑯᖓᓄᑦ ᓄᓇᕗᒻᒧᑦ, ᑕᒪᓐᓇ ᓂᕈᐊᒐᒃᓴᐅᙱᓚᖅ. ᑕᐃᓐᓇ ᐃᓄᐃᑦᑐᖅ ᐃᒪᖅ ᐅᖃᐅᓯᕆᖅᑲᐅᔭᕗᑦ ᐊᔾᔨᑲᓴᑦᑎᐊᕆᕙᖓ ᐋᒥᓵᓐᒥ. ᐃᖃᓗᐃᑦ ᓯᓚᑖᓂ, ᐃᓄᐃᑦ ᐊᒃᓱᕈᖅᑐᓂ ᐊᑭᓖᓂᐊᖅᐳᑦ ᐊᑭᑐᔪᒥ ᐊᑭᖓᓂ. ᐊᓯᐊᒍᑦ ᐅᖃᕐᓗᓂ, ᐋᒥᓵᓐ ᐃᓇᖏᖅᓯᓯᒪᕗᖅ ᓂᕿᓄᑦ ᑎᑎᖅᑲᒃᑯᕕᒃᑰᖅᑎᑕᐅᓂᕐᒥ, ᑭᓯᐊᓂ ᑕᐃᒃᑯᓄᖓᑐᐊᖅ ᐃᖃᓗᖕᓂᕐᒥᐅᑕᓄᑦ.

ᐃᓚᓯᓂᖅ ᐋᒥᓵᓐᒥ – ᐅᕝᕙᓘᓐᓃᑦ ᑳᔅᑰᓕᐊᕐᓂᕐᒧᑦ ᖃᓪᓗᓈᑦ ᓄᓇᖓᓐᓄᐊᖅᓯᒪᑎᓪᓗᒋᑦ – ᑲᑎᙵᓂᐅᔪᒧᑦ ᑭᓯᐊᓂ ᐱᓕᕆᔪᓐᓇᖅᑐᓄᑦ ᐊᑲᐅᔾᔪᑎᒋᕗᖅ. ᐊᑐᕐᓂᕐᒧᑦ ᐅᑯᓂᖓ ᓂᕈᐊᒐᒃᓴᐅᔪᓂ, ᐊᐅᒃᑕᔫᒥᒃ ᐊᑭᓕᒃᓴᓂᒍᑎᖃᕆᐊᖃᖅᐳᑎᑦ, ᑐᑭᖃᖅᑐᒥ ᐊᑭᓕᒃᓴᖃᓗᐊᙱᓪᓗᑎᑦ ᐊᒻᒪ ᐃᖅᑲᓇᐃᔮᖃᐃᓐᓇᕐᓗᑎᑦ, ᐊᒻᒪ ᐱᓕᕆᓂᐅᔪᒥ ᑳᔅᑯᒥ ᓂᐅᕕᕆᐊᕐᓂᕐᒧᑦ, ᖃᓪᓗᓈᑦ ᓄᓇᖓᓐᓄᐊᕈᓐᓇᕆᐊᖃᖅᐳᑎᑦ. ᐅᑯᐊ ᓂᕈᐊᒐᒃᓴᐅᔪᑦ ᐊᑐᐃᓐᓇᐅᙱᓚᑦ ᐊᒥᓱᓄᑦ ᓄᓇᕗᒻᒥᐅᓄᑦ.

ᑕᐃᒫᒃ ᐱᓕᕆᔾᔪᓯᐅᔪᖅ ᐱᐅᓯᒋᐊᖅᑎᑦᑎᔭᕆᐊᖃᓚᐅᖅᑐᒥ ᐃᓅᓯᖏᓐᓄᑦ ᓄᓇᕗᒻᒥᐅᓄᑦ ᓴᖅᑭᑎᑦᑎᕙᓪᓕᐊᕗᖅ ᐊᕕᒃᓯᒪᓂᐅᔪᒥ. ᓂᐅᕕᕆᐊᖅᐸᒃᑐᑦ ᐅᖃᐱᓗᒍᓐᓇᖅᐳᑦ North West ᑲᒻᐸᓂᖓᓐᓂ ᓄᐊᑦᒫᑦᒥ ᐊᒻᒪ ᐅᑭᐅᖅᑕᖅᑐᒥ ᓂᐅᕕᕐᕕᓂᑦ, ᐊᒻᒪ ᓲᓕ ᓂᐅᕕᕐᕕᒐᓚᐅᔪᑦ ᐅᖃᖃᑎᖃᓚᐅᖅᐳᑦ ᑮᓇᐅᔭᓂ ᖃᐅᔨᓴᖅᑎᐅᔪᓄᑦ ᓇᓂᓯᓚᐅᖅᐳᑦ ᑲᒻᐸᓂᐅᑉ ᖃᑭᓂᖏᑦ ᑐᑭᓕᐊᕐᓂᖃᖅᐳᑦ ᐊᓯᖏᓐᓂ ᓂᕿᓂᒃ ᓂᐅᕕᕐᕕᐅᔪᓄᑦ ᑲᓇᑕᓕᒫᒧᑦ. ᐊᒻᒪ ᓇᓂᓯᓚᐅᖅᐳᑦ ᑲᒻᐸᓂᐅᔪᖅ ᑐᓂᓯᕙᖕᓂᖓᓂ ᒐᕙᒪᐅᔪᓂ ᐃᑲᔫᓯᕐᓂᐅᔪᓂᑦ ᓂᐅᕕᖅᐸᒃᑐᓄᑦ.

ᑕᒪᓐᓇ ᕿᒪᐃᕗᖅ ᒐᕙᒪᐅᔪᓂ ᐋᖅᑭᒃᑕᕕᓂᕆᓂᕋᖅᑕᐅᔪᒥ ᐊᒥᐊᒃᑯᔪᒥ ᐊᑲᐅᙱᓕᐅᕈᑎᖓᓂ. ᒐᕙᒪᑐᖃᒃᑯᓪᓘᓐᓃᑦ ᐅᖃᖅᐳᑦ ᐱᓕᕆᑎᐊᙱᔾᔪᔾᔨᓂᖏᓐᓂ ᐊᒥᓱᓄᑦ.

ᑕᑯᓂᐊᖅᐳᒍᑦ ᐸᕐᓇᖅᑕᐅᓯᒪᔪᓂ ᐊᓯᔾᔨᕐᓂᐅᔪᓂ ᐃᑲᔫᓯᐊᖑᔪᒧᑦ ᑎᑎᕋᖅᓯᒪᓂᐅᔪᓄᑦ ᐊᓯᔾᔩᑎᑦᑎᓂᐊᕐᒪᖔᑦ. ᐊᐱᕆᓗᐊᕐᓂᐅᓇᔭᙱᓚᖅ ᓂᕆᐅᖕᓂᕐᒧᑦ ᒐᕙᒪᑐᖃᒃᑯᓐᓂ ᓇᓂᓯᓂᖏᓐᓂ ᐱᓕᕆᓂᐅᔪᒥ ᐱᔪᓐᓇᖅᑎᑦᑎᓂᕐᒧᑦ ᐃᓚᒌᖑᔪᓂᑦ ᓄᓇᕗᓕᒫᒥ ᐊᑐᐃᓐᓇᖃᕈᓐᓇᕐᓂᕐᒧᑦ ᑖᒃᑯᓂᖓᑦᑕᐃᓐᓇᖅ ᐊᑐᖅᑕᐅᕙᒃᑐᓂ ᐱᔭᕆᐊᓕᖏᓐᓂ ᑕᐃᒃᑯᓄᖓ ᐊᓕᐊᓇᐃᒋᔭᐅᕙᒃᑐᓄᑦ ᐃᓚᒌᖑᔪᓄᑦ ᖃᓪᓗᓈᑦ ᓄᓇᖓᓐᓂ.

ᐱᔭᕆᐊᖃᕐᓂᐅᕗᖅ ᑕᐃᒃᑯᓄᖓ ᑲᒪᒋᔭᖃᖅᑐᓂ ᐅᑭᐅᖅᑕᖅᑐᒥ ᓂᕿᑦᑎᐊᕙᓕᕆᓂᕐᓂ ᑕᑯᒃᓴᐅᑎᑦᑎᓂᕐᒧᑦ ᐱᔭᕆᐊᖃᕐᓂᐅᔪᓂ ᐃᓄᓪᓚᕆᖕᓂᑦ, ᐊᒻᒪ ᓇᓂᓯᓂᕐᒧᑦ ᐋᖅᑭᒍᑎᒃᓴᓂᑦ ᐃᓕᓯᔪᒥ ᓄᓇᕗᒻᒥᐅᓕᒫᓂᑦ ᓇᓕᒧᑦᑐᒥ ᑐᖕᒥᕋᕐᕕᖃᕐᓂᐅᔪᒥ ᐊᒥᐊᒃᑯᖓᓂ ᑲᓇᑕᒥ. ᑕᒪᓐᓇ ᑐᑭᖃᕋᓗᐊᕈᓂ ᐅᑎᕐᓂᕐᒧᑦ ᓂᕿᓄᑦ ᑎᑎᖅᑲᒃᑯᕕᒃᑰᖅᑎᑕᐅᓂᕐᒧᑦ ᐅᕝᕙᓘᓐᓃᑦ ᐋᒥᓵᓐᒧᑦ ᐊᑭᖃᙱᑦᑐᒥ ᐅᓯᔭᐅᓂᖓᓄᑦ ᑭᒃᑯᓕᒫᓄᑦ, ᒪᑐᐃᖓᕗᒍᑦ ᑭᓱᑐᐃᓐᓇᒥᒃ ᐋᖅᑭᒍᑎᒃᓴᐅᔪᒧᑦ ᒥᒃᖠᒋᐊᖅᑎᑦᑎᓂᐊᖅᑐᒥ ᐊᑭᖓᓂ ᐆᒪᓇᓱᐊᕐᓂᕐᒧᑦ.