ᑲᑎᒪᔨᙳᕈᓐᓇᖅᐳᖓ ᓂᕈᐊᒐᒃᓴᖃᙱᓗᐊᕐᓂᕐᒧᑦ?’

272

Twitter−ᒥ ᐊᑐᓲᖑᙱᒃᑯᕕᑦ, ᑕᑯᓇᔭᙱᓚᑎᑦ ᐅᖃᐅᓯᒃᓴᓕᐊᖑᔪᒥ ᑎᑎᕋᖅᑕᐅᔪᒥ TootooGoggles−ᒥ, ᐃᔪᕆᔪᒥ ᑎᑎᕋᖅᑕᐅᓂᐅᔪᒥ ᑐᙵᕕᖃᖅᑐᒥ ᓕᐱᕈᒃᑯᑦ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᔪᖅ ᕼᐊᓐᑐᕐ ᑑᑑᑉ ᖃᓄᐃᓕᐅᖅᐸᖕᓂᖏᓐᓂ. ᑎᑎᕋᖅᑕᐅᓂᐅᔪᖅ ᐱᒋᐊᖅᑕᐅᓚᐅᖅᐳᖅ 2015−ᒥ ᓂᕆᐅᕐᓂᖃᓚᐅᖅᑎᓪᓗᒍ ᐊᒻᒪ ᐃᔪᕐᓇᕈᓘᔭᖃᑦᑕᖅᐳᖅ ᑑᑑ ᐊᓂᑕᐅᓚᐅᖅᑎᓪᓗᒍᓘᓐᓃᑦ ᔭᔅᑎᓐ ᑐᕉᑑᑉ ᑲᓇᑕᒥ ᑲᑎᒪᔨᕐᔪᐊᖑᔪᖏᓐᓂ.

ᑕᖅᑭᐅ ᐱᒋᐊᕐᓂᖓᓂ, TootooGoggles ᐅᖃᓚᐅᖅᐳᖅ, “ᑲᑎᒪᔨᙳᕈᓐᓇᖅᐳᖓ ᓂᕈᐊᒐᒃᓴᖃᙱᓗᐊᕐᓂᖓᓄᑦ,” ᐅᖃᐅᓯᖃᖅᑐᒥ ᒫᓐᓇᓕᓴᐅᔪᒥ ᐊᐅᓚᓂᐅᔪᒥ ᑲᑎᒪᔨᙳᖅᑐᓄᑦ ᓂᕈᐊᒐᒃᓴᖃᙱᓗᐊᕐᓂᖓᓄᑦ ᐊᓯᖏᓐᓂ ᑭᒡᓕᐅᔪᓄᑦ ᒐᕙᒪᐅᔪᓄᑦ.
ᓲᕐᓗ, ᒪᓕᒐᓕᐅᖅᑎ ᒥᓚ ᑲᒥᙳᐊᖅ ᑲᑎᒪᔨᙳᓚᐅᖅᐳᖅ ᓂᕈᐊᒐᒃᓴᖃᙱᓗᐊᕐᓂᖓᓄᑦ ᐃᓇᖏᖅᓯᓂᕐᒧᑦ ᐊᓂᕙᓪᓕᐊᔪᒥ ᓯᕗᓕᐅᖅᑎᐅᔪᒥ ᐲᑕ ᑕᑉᑑᓇᒥ ᐊᕐᕌᓂᐅᓚᐅᖅᑐᒥ. ᐸᑎᖅ ᓇᑦᓱᕐ ᒪᓕᒐᓕᐅᖅᑎᑐᐊᖑᓚᐅᖅᐳᖅ ᐊᑎᖓᓂ ᑐᓂᔭᖓᓂ ᒪᓕᒐᓕᐅᖅᑏᑦ ᑲᑎᒪᔨᖏᓐᓄᑦ ᐃᓂᖓᓄᑦ ᒫᓐᓇᓕᓴᒥ ᐃᓄᖃᕈᓐᓃᖅᑐᒥ ᐹᑦ ᐊᕐᓇᒃᑲᕐᒧᑦ. ᐊᒻᒪ ᑕᒪᑐᒪᓂ ᑕᖅᑭᐅᔪᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᑦ ᐊᖓᔪᖅᑳᖓ PJ ᐊᕿᐊᕈᖅ ᐊᖓᔪᖅᑳᙳᓚᐅᖅᐳᖅ ᓂᕈᐊᒐᒃᓴᖃᙱᓗᐊᕐᓂᖓᓄᑦ ᓯᕗᓂᐊᓂ ᑎᓯᐱᕆ 10−ᒥ ᓂᕈᐊᕐᓂᐅᔪᒥ, ᑕᐃᒪᐃᓚᐅᕐᒥᔪᑦ ᐊᒥᓱᓂ ᓄᓇᓕᖕᓂ ᑲᑎᒪᔨᙳᓚᐅᖅᑐᓄᑦ. ᑕᑯᓯᒪᕗᒍᑦ ᐊᒥᓱᓂ ᒪᐃᔭᐅᔪᓂ ᐊᒻᒪ ᑲᑎᒪᔨᓂᑦ ᓄᓇᕗᓕᒫᒥ ᐃᓕᔭᐅᔪᓂ ᐱᔪᓐᓇᕐᓂᖃᖅᑐᓄᑦ ᑕᐃᒪᐃᖦᖢᑎᒃ.
ᑐᓴᕈᒥᓇᖅᑑᓲᖑᕗᖅ TootooGoggles−ᒥ ‘ᑲᑎᒪᔨᙳᕈᓐᓇᖅᐳᖓ ᓂᕈᐊᒐᒃᓴᖃᙱᓗᐊᕐᓂᖓᓄᑦ’ ᐃᔪᕐᓂᐅᔪᖅ ᓱᓕᑦᑎᐊᖅᐳᖅ.
ᑕᐅᑐᙳᐊᖅᐳᒍᑦ ᐃᓱᒪᓂᐅᔪᒥ ᑲᔪᓯᑎᑦᑏᓐᓇᕐᓂᐅᔪᒥ ᐊᑐᕐᓂᖃᐅᑎᖓᓐᓂ ᐋᑐᕚᒥ ᑲᑎᒪᔨᙳᖅᑐᖅ ᓂᕈᐊᒐᒃᓴᖃᙱᓗᐊᕐᓂᖓᓄᑦ 2019−ᒥ ᒐᕙᒪᑐᖃᒃᑯᑦ ᓂᕈᐊᕐᓂᐅᔪᒥ ᑎᒍᒥᐊᕐᓂᖓᓂ ᐱᔪᒪᓂᖃᕐᓂᐅᔪᒥ ᑑᑑᒧᑦ. ᑲᑕᖕᓂᕆᓚᐅᖅᑕᖓᓂ ᐱᓐᓇᕆᔭᐅᓂᖓᓄᑦ ᐱᓚᐅᖅᐳᖅ ᓯᕗᓪᓕᕐᒥ ᐊᕐᕌᒍᖓᓂ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᓪᓗᓂ ᐊᒻᒪ ᒐᕙᒪᑐᖃᒃᑯᓐᓄᑦ ᒥᓂᔅᑕᐅᓪᓗᓂ, ᐱᔪᓐᓇᕐᓂᕐᔪᐊᖃᕐᓂᐅᓪᓗᓂ ᐋᑐᕚᒥ, ᐱᓂᕐᓗᓚᐅᙱᒃᑯᓂ, ᑐᓂᓯᓂᖃᕋᔭᓚᐅᖅᐳᖅ ᐃᓗᐊᑦᑎᐊᖅᑐᒥ ᐃᓂᐅᔪᒥ ᑲᓇᑕᐅᑉ ᒥᓂᔅᑕᖏᓐᓄᑦ ᑭᐳᖓᓐᓂ ᐊᕐᕌᒍᒐᓴᓄᑦ.
ᓲᖃᐃᒻᒪ, ᑑᑑ ᐊᑯᓂᐅᔪᒥ ᑲᑎᒪᔨᐅᓯᒪᖕᒪᑦ ᑕᑯᒃᓴᐅᕐᔪᐊᖅᑐᒥ ᐃᓚᖃᖅᖢᓂ−ᐃᓚᖃᖅᑐᒥ ᑲᓇᑕᒥ ᕼᐋᑭᖅᑎᐅᔪᕕᓂᐅᔪᒥ ᔪᐊᑕᓐ ᑑ], ᓇᖕᒥᓂᖃᖅᑎᐅᔪᖅ ᕕᒃᑐᕐ ᑑᑑ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒥᓂᔅᑕᖓ ᔪᐊᔾ ᕼᐃᒃᔅ−ᐊᐅᓚᑦᑏᓐᓇᖅᑐᓂ ᑎᓕᐅᕇᓐᓇᖅᓯᒪᔪᓂ ᓄᓇᕗᓕᒫᒥ.
ᓄᓇᕗᒻᒥᐅᑦ ᓇᒃᓯᐅᔾᔨᓚᐅᖅᐳᑦ ᑑᑑᒥ ᐋᑐᕚᒧᑦ ᓂᕆᐅᖕᓂᖃᖅᖢᑎᒃ ᐃᒃᓯᕚᕋᔭᕐᓂᖓᓂ ᑲᓇᑕᐅᑉ ᑲᑎᒪᔨᕐᔪᐊᖑᔪᖏᓐᓂ ᑭᐳᖓᓐᓂ, ᑲᓐᓲᕕᑕᒃᑯᓐᓂ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᔪᖅ ᓕᐆᓇ ᐊᒡᓘᒃᑲᖅ ᑕᐃᒪᐃᓚᐅᕐᓂᖓᓂ ᑕᒪᕐᒥᒐᓚᖕᒥ ᑲᑎᒪᔨᐅᖃᑕᐅᓚᐅᕐᓂᖓᓂ ᓯᑏᕙᓐ ᕼᐋᕐᐳᕐ ᒐᕙᒪᖓᓐᓂ. ᓄᓇᕗᑦ ᐊᑕᐅᓯᑐᐊᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᔪᖃᓲᖑᕗᖅ. ᑲᓇᑕᒥ ᐊᖓᔪᖅᑳᕐᔪᐊᑦ ᑕᑯᓲᖑᕗᑦ ᐱᐅᓂᐅᔪᒥ ᐃᓄᖕᒥ ᑲᓇᑕᐅᑉ ᐱᐅᓂᖓᓂᑦᑕᐅᖅ, ᐊᖏᒡᓕᒋᐊᕐᓂᖃᖅᑐᒥ ᐱᕕᒃᓴᖃᕐᓂᖏᓐᓄᑦ ᒐᕙᒪᑐᖃᒃᑯᑦ ᑮᓇᐅᔭᖏᓐᓂ ᐃᖏᕐᕋᕙᓪᓕᐊᓂᖏᓐᓄᑦ ᐅᑭᐅᖅᑕᖅᑐᒧᑦ.
ᒥᓂᔅᑕᐅᓪᓗᓂ ᐃᖃᓗᓕᕆᓂᕐᒧᑦ ᐊᒻᒪ ᑕᕆᐅᖓᓐᓄᑦ, ᑑᑑ ᑮᓇᐅᓇᔭᓚᐅᖅᐳᖅ ᓯᒡᔭᒃᑯᑦ ᓄᓇᓖᒃ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐱᓕᕆᐊᖑᔪᓄᑦ, ᐊᒻᒪ ᑮᓇᐅᔭᖃᖅᑎᑕᐅᓂᐅᔪᓄᑦ ᐅᖃᐅᓯᐅᓂᐅᔪᓄᑦ ᓄᓇᕗᒻᒥ.
ᑭᓯᐊᓂ, ᑑᑑ ᓴᓂᕌᓃᑉᐳᖅ, ᐊᑕᐅᓯᐅᓪᓗᓂ ᒪᕐᕉᖕᓂ ᐃᒻᒥᒃᑰᖅᑐᓂ ᑲᓇᑕᐅᑉ ᒪᓕᒐᓕᐅᖅᑎᖏᓐᓄᑦ ᐃᓚᒋᔭᐅᔪᓂᑦ. ᐅᖃᓚᐅᖅᐳᖅ ᐱᕕᒃᓴᖃᕐᓂᖅᓴᐅᓂᖓᓂ ᐱᕈᖅᓴᐃᓂᕐᒧᑦ ᓄᓇᕘᑉ ᐃᓱᒫᓘᑎᖏᓐᓂ ᑲᓇᑕᐅᑉ ᒪᓕᒐᓕᐅᕐᕕᖓᑕ ᑲᑎᒪᕕᒡᔪᐊᖓᓐᓂ ᒥᓂᔅᑕᐅᓚᐅᕐᓂᖓᓂ ᑭᓯᐊᓂ ᐅᒃᐱᕆᓗᐊᙱᓚᕗᑦ. ᖁᕕᐊᑉᐳᒍᑦ ᖃᓄᐃᙱᑦᑎᐊᖅᑐᒥ ᑭᐅᓘᑎᓂᐅᔪᓂ ᑎᑭᓐᓂᐊᖅᑐᓄᑦ ᐊᕐᕌᒎᓂᐊᖅᑐᒥ, ᐊᒻᒪ ᖃᐅᔨᔪᒪᕗᒍᑦ ᑭᓇ ᐱᓇᓱᐊᓛᕐᓂᐊᕐᓂᖓᓂ ᐊᑭᑦᑐᕋᕐᓗᓂ ᑑᑑᒥ. ᐃᒻᒪᖄ ᓂᕈᐊᖅᑕᐅᒃᑲᓐᓂᓛᖅᐳᖅ ᑭᓯᐊᓂ ᐅᒃᐱᕈᓱᙱᓚᒍᑦ ᑲᑎᒪᔨᙳᕐᓂᐊᕐᓂᖓᓂ ᓂᕈᐊᒐᒃᓴᖃᙱᓗᐊᕐᓂᖓᓄᑦ. ᒪᒥᐊᓇᖅ, TootooGoggles.
ᐃᑲᔪᕈᓐᓇᖅᐳᓯ ᓇᓚᐅᑦᑖᕈᑎᑦᑎᓐᓂ ᓱᓕᓕᖅᑎᑦᑎᓂᕐᒧᑦ.
ᐅᕙᑦᑎᓐᓄᑦ, ᑲᑎᒪᔨᐅᔪᖅ ᐱᔪᓐᓇᕐᓂᖃᕐᓂᖅᓴᐅᕗᖅ ᓂᕈᐊᖅᑕᐅᓯᒪᑎᓪᓗᒍ ᐃᓄᖕᓄᑦ, ᐱᓗᐊᖅᑐᒥ ᓵᓚᖃᕋᓱᐊᕐᓂᐅᔪᒥ ᐱᔭᕆᐊᖃᖅᑎᑦᑎᖕᒪᑦ ᑐᓂᓯᓂᕐᒥ ᐅᖃᐅᓯᒃᓴᓂ ᖃᓄᖅ ᑭᒡᒐᖅᑐᐃᓂᐊᕐᓂᖓᓂ ᐱᔪᒪᓂᕆᔭᑦᑎᓐᓂ.
ᖃᐃᖁᔨᕗᒍᑦ ᓄᓇᕗᒻᒥᐅᓂ ᐱᒋᐊᕋᓱᐊᕐᓂᕐᒧᑦ ᐊᒻᒪ ᑭᒡᒐᖅᑐᐃᓗᑎᒃ ᐱᔭᐅᔪᒪᔭᐅᔪᓂᑦ ᓴᓂᓕᑦᑎᓐᓂ ᓄᓇᓕᖕᓂ, ᓄᓇᕗᒻᒥ ᐊᒻᒪ ᒐᕙᒪᑐᖃᒃᑯᑦ ᑭᒡᓕᐅᔪᓄᑦ, ᐃᓄᐃᑦ ᓂᐱᖏᓐᓂ ᑐᓴᖅᑕᐅᓗᑎᒃ, ᐊᒻᒪ ᓯᕗᓕᐅᖅᑎᐅᓗᑎᒃ ᐱᔭᕆᐊᖃᖅᑕᑦᑎᓐᓂ ᒫᓐᓇᐅᔪᒥ.
ᐱᓗᐊᖅᑐᒥ ᒪᒃᑯᒃᑐᓂ ᐃᓄᖕᓂ ᐊᒻᒪ ᐊᕐᓇᓂᑦ ᓯᕗᒻᒧᐊᕆᓂᖏᓐᓄᑦ. ᓂᐱᓯ ᑐᓴᖅᑕᐅᖃᑦᑕᙱᒻᒪᑕ ᑐᓴᖅᑕᐅᔭᕆᐊᖃᕐᓂᖏᓐᓄᑦ, ᐊᒻᒪ ᐱᓕᕆᓂᑐᐊᖑᕗᖅ ᑕᐃᒪᐃᓐᓂᖓᓄᑦ ᓂᕈᐊᒐᒃᓴᐅᓇᓱᒡᓗᑎᑦ.
ᐃᓱᒪᓕᐅᕈᑎᑦᑎᐊᕙᖃᕈᕕᑦ, ᐃᓄᖕᓂ ᐃᑲᔪᖅᓯᖅᑕᐅᓂᐊᖅᐳᑎᑦ. ᐊᒻᒪ ᐱᓂᕐᓗᖕᓂᖃᕋᓗᐊᕈᕕᑦ, ᐱᕕᒃᓴᖃᕐᓂᐊᖅᐳᑎᑦ ᐃᓕᖕᓂ ᐱᐅᓯᒋᐊᖅᑎᑦᑎᒃᑲᓐᓂᕐᓂᕐᒧᑦ.
ᐃᓕᖕᓄᑦ ᓵᙵᕗᒍᑦ, ᒥᔅᑕ ᑑᑑ.