Skip to content

ᐱᕕᒃᓴᖃᑦᑎᐊᕐᓇᐅᕗᖅ ᓴᓇᓂᕐᒧᑦ ᐃᖅᑲᓇᐃᔭᖅᑎᖁᑎᐅᔪᓄᑦ

ᖃᔅᓯᐊᕐᔪᖕᓂ ᒪᓕᒐᓕᐅᖅᑎᐅᖃᑕᐅᔪᓂᑦ ᓴᖅᑭᓯᒪᕗᑦ ᒪᓕᒐᓕᐅᖅᑎᒃᑯᓐᓂ ᐊᑐᖅᖢᑎᒃ ᓴᓇᕐᕈᑎᓄᑦ ᑎᕆᒃᓯᐅᑎᖏᓐᓂ ᖃᔅᓯᐊᕐᔪᖕᓄᑦ ᐊᕐᕌᒍᓄᑦ ᖄᖏᖅᓯᒪᓕᖅᑐᓂ, ᑲᐅᑕᐅᔭᕆᐊᖅᑐᖅᖢᑎᒃ ᒥᓂᔅᑕᐅᔪᓄᑦ.

ᐅᖃᐅᓯᐅᖏᓐᓇᖅᑐᓂ ᐅᖃᐅᓯᒃᓴᓂ ᓇᒃᓯᐅᔾᔭᐅᓯᒪᕗᑦ ᓄᓇᕗᒻᒥ ᒐᕙᒪᒃᑯᑦ ᐱᓕᕆᒃᑲᓐᓂᕆᐊᖃᕐᓂᖏᓐᓂ ᖁᕝᕙᕆᐊᖅᑎᑦᑎᓂᕐᒧᑦ ᑭᒡᓕᐅᔪᒥ ᐃᓄᖕᓂ ᐃᖅᑲᓇᐃᔭᖅᑎᐅᔪᓂ ᐃᓄᓕᒫᓄᑦ ᓇᑉᐸᖅᑎᕆᓂᐅᔪᒥ ᐱᓕᕆᐊᒃᓴᐅᔪᓄᑦ. 

ᒪᓕᒐᓕᕆᔨᒃᑯᑦ ᒥᓂᔅᑕᖓ ᔩᓂ ᐃᕼᐊᓗᐊᒃ ᐃᒃᐱᒍᓱᓚᐅᖅᐳᖅ ᒪᓕᒐᓕᐅᖅᑎᐅᖃᑕᐅᔪᓄᑦ ᓂᙵᒃᓯᒪᓂᖏᓐᓂ ᓄᕕᐱᕆ 2018−ᒥ ᓴᙱᖏᓗᐊᖅᑐᒥ ᓇᖏᕐᓂᖃᕐᓂᖓᓂ ᐱᔭᕆᐊᖃᖅᑐᒧᑦ ᐃᓄᖕᓄᑦ ᐃᖅᑲᓇᐃᔭᕐᓂᐅᔪᒧᑦ ᐅᓄᕐᓂᐅᔪᒥ ᑲᑕᖕᓂᖓᓂ 15 ᐳᓴᓐᑎᒧᑦ ᐅᓇᐅᙱᖔᖅᑐᒥ 20 ᐳᓴᓐᑎᐅᔪᒧᑦ ᓄᑖᖑᔪᒥ ᐃᑲᔪᖅᑕᐅᕝᕕᖕᒥ ᐃᖃᓗᖕᓂ. ᕿᓚᒻᒥᐅᔪᒥ ᖃᐅᔨᑎᑕᐅᓚᐅᖅᐳᖅ ᐊᒻᒪ ᑳᓐᑐᕌᒃᑎᒥ ᐋᖅᑭᒋᐊᖅᑎᑦᑎᓚᐅᖅᐳᖅ.

ᔮᓐ ᒪᐃᓐ, ᐃᒃᓯᕙᐅᑕᐅᔪᖅ ᒪᓕᒐᓕᐅᖅᑎᑐᐃᓐᓇᐅᔪᓄᑦ, ᑭᖑᓂᐊᒍᑦ ᐅᖃᓚᐅᖅᐳᖅ "ᐊᒡᒐᕗᑦ ᖁᒻᒧᒃᑎᑐᐃᓐᓇᕈᑦᑎᒍᑦ ᐊᒻᒪ ᐅᖃᕐᓗᑕ, ‘ᐅᓐᓃᑦ, ᑐᑭᓯᐅᒪᕗᖓ ᓈᒻᒪᒃᑐᓂ ᐃᖅᑲᓇᐃᔭᖅᑎᑖᕈᓐᓇᙱᑉᐳᒍᑦ ᑕᐃᒫᒃ 15 ᐳᓴᓐᑎ ᓈᒻᒪᒃᑐᒃᓴᐅᕗᖅ – ᑕᒪᓐᓇ, ᐃᓱᒪᓐᓂ, ᐅᕙᑦᑎᓐᓄᑦ ᐅᓗᕆᐊᓇᕈᑕᐅᕐᔪᐊᖅᐳᖅ. ᐊᔭᐅᕆᔭᕆᐊᖃᒃᑲᓐᓂᖅᐳᒍᑦ ᐊᖏᓂᖅᓴᒧᑦ." 

ᓇᓚᐅᑉᐳᖅ. 

ᐊᒥᑦᑐᕐᒧᑦ ᒪᓕᒐᓕᐅᖅᑎᐅᖃᑕᐅᔪᖅ ᔪᐃᓕ ᖃᐃᕐᓂᖅ ᐅᖃᐅᓯᖃᓚᐅᖅᐳᖅ ᔫᓂ 2019−ᒥ ᐃᓄᖕᓂ ᐊᔪᙱᓐᓂᖃᖅᑐᓂ ᐱᓕᕆᐊᖑᓂᐅᔪᓄᑦ ᑭᓯᐊᓂ ᐱᓕᕆᐊᖑᕙᒃᐳᑦ “ᓱᕙᓕᑭᐊᖑᓂᖏᓐᓂ” ᑳᓐᑐᕌᒃᑎᐅᔪᓂ ᐊᒻᒪ ᐃᖅᑲᓇᐃᔮᖃᖅᑎᑕᐅᒐᔪᙱᓚᑦ. 

ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᒥᓂᔅᑕᖓ ᓗᐊᓐ ᑯᓱᒐᖅ ᐊᑭᕋᖅᑐᖅᖢᓂ ᑭᐅᓚᐅᖅᐳᖅ ᐅᔾᔨᕈᓱᖕᓂᖓᓂ ᖃᓄᐃᓐᓂᐅᔪᓂ 60 ᐳᓴᓐᑎᖓᓂ ᓴᓇᔨᐅᔪᑦ ᐃᓅᓂᖏᓐᓂ. ᑭᓯᐊᓂ, ᑯᓱᒐᖅ ᐅᔾᔨᕈᓱᓚᐅᖅᐳᖅ ᐃᓚᖏᑦ ᓄᓇᓕᐅᔪᑦ ᑭᒡᓕᖃᖅᑐᒥ ᐃᓐᓄᒃᓯᔪᓐᓇᕐᓂᖏᓐᓂ – ᐃᒻᒪᖄ ᐅᔭᕋᖕᓂᐊᕐᓂᕐᒧᑦ ᑲᒻᐸᓂᐅᔪᑦ ᐅᕝᕙᓘᓐᓃᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᑦᑎᐊᓂᖕᓂᖏᓐᓂ ᐊᒥᓱᓂ ᐊᑐᐃᓐᓇᐅᔪᓂ ᐃᑲᔪᖅᑎᐅᔪᓄᑦ. ᐃᓚᖏᓐᓂ ᓄᓇᓕᐅᔪᓂ ᐃᖅᑲᓇᐃᔭᖅᑎᖁᑎᓕᖕᓂ ᐱᑕᖃᙱᓗᐊᖅᑐᓂ ᐱᓕᕆᐊᖑᔪᓂ ᐱᓕᕆᓕᒪᓂᐅᔪᓂ, ᒥᓂᔅᑕ ᓇᓗᓇᐃᖅᓯᓚᐅᖅᐳᖅ. ᐅᓂᒃᑳᓚᐅᖅᐳᖅ ᓄᓇᕗᒻᒥ ᒐᕙᒪᒃᑯᑦ ᐱᓕᕆᓚᐅᕐᓂᖏᓐᓂ ᐱᔭᕆᐊᖃᕐᓂᐅᔪᒥ ᑳᓐᑐᕌᒃᑎᐅᔪᓄᑦ ᐱᓕᕆᓂᖏᓐᓂ ᐊᑭᑐᔫᑎᓄᑦ ᐱᓕᕆᐊᒃᓴᐅᔪᓂ ᓇᓗᓇᐃᖅᓯᓂᖏᓐᓂ ᑭᓱᓂᒃ ᐱᓕᒻᒪᒃᓴᕐᓂᐅᔪᓂ ᐊᑐᐃᓐᓇᐅᓂᐊᕐᓂᖏᓐᓂ ᐃᓄᖕᓄᑦ ᓴᓇᔨᐅᔪᓄᑦ.

“ᐃᓱᒪᕗᖓ ᐱᐅᓪᓗᓂ ᐱᓕᕆᓂᐅᓂᖓᓂ," ᒥᓂᔅᑕ ᐅᖃᓚᐅᖅᐳᖅ. 

ᓇᓚᐅᑉᐳᖅᑕᐅᖅ – ᐊᑐᒐᒃᓴᐃᑦ ᐋᖅᑭᒃᑕᐅᓯᒪᓂᖏᑦ ᖁᑦᑎᑐᐊᕈᑎᒃ ᐊᒻᒪ ᓄᓇᕗᒻᒥ ᒐᕙᒪᒃᑯᑦ ᑎᒍᒥᐊᓪᓚᕆᒃᑯᑎᒃ ᑳᓐᑐᕌᒃᑎᐅᔪᓂ ᑲᒪᑦᑎᐊᕆᐊᖃᕐᓂᖏᓐᓂ. 

ᐊᓱᐃᓛᒃ, ᐅᒃᑐᐱᕆᒥᐅᓚᐅᖅᑐᒥ, ᒪᐃᓐ ᐅᐱᒍᓱᓚᐅᖅᐳᖅ ᐃᒡᓗᓕᕆᓂᕐᒧᑦ ᐊᒻᒪ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ ᒥᓂᔅᑕᖓᓂ ᐸᑎᖅ ᓂᐊᑦᓱᕐᒥ ᓯᕗᓪᓕᖅᐹᒥᒃ ᐱᓕᕆᐊᕆᔭᐅᔪᒥᒃ ᑲᖏᖅᖠᓂᕐᒥ, ᐃᓕᓐᓂᐊᖅᐸᓪᓕᐊᔪᓂ ᐃᖅᑲᓇᐃᔮᖅᑖᕋᓱᐊᖅᑏᑦ ᓄᑖᙳᕆᐊᖅᑎᑦᑎᓂᖏᓐᓂ ᓄᑕᐅᙱᑦᑐᒥ ᐃᒡᓗᕐᔪᐊᒥ. ᒪᐃᓐ ᖃᐃᖁᔨᓂᖃᓚᐅᖅᐳᖅ ᓂᐊᑦᓱᕐᒥ ᐊᖏᒡᓕᒋᐊᖅᓯᓂᖓᓂ ᐊᒡᒐᒨᖓᔪᓄᑦ ᐱᓕᕆᐊᖑᔪᒥ ᑕᒪᒃᑭᓄᑦ ᓄᓇᕗᒻᒥ ᓄᓇᓕᐅᔪᓄᑦ ᑕᑯᒃᓴᐅᑎᑦᑎᖕᒪᑦ ᐱᔪᓐᓇᕐᓂᕐᔪᐊᖑᔪᒥ ᖁᕝᕙᕆᐊᖅᑎᑦᑎᓂᕐᒧᑦ ᐃᖅᑲᓇᐃᔭᖅᑎᐅᔪᓄᑦ ᐊᒻᒪᓗ ᐊᑐᓕᖅᑎᑕᐅᒃᑲᓐᓂᕐᓂᖏᓐᓂ ᓱᕐᕋᑰᔪᓂ ᓴᓇᓯᒪᓂᐅᔪᓂ, ᐃᓚᖃᖅᑐᒥ ᐱᔭᕆᐊᖃᕐᔪᐊᖅᑐᓄᑦ ᐊᖏᕐᕋᒃᓴᐅᔪᓂᑦ. 

ᓂᐊᑦᓱᕐ, ᑐᙵᕕᖃᕐᔪᐊᕋᓗᐊᖅᑎᓪᓗᒍ ᐱᕈᖅᓴᕐᕕᒋᔪᓐᓇᖅᑕᖓᓂ, ᑭᐅᑦᑎᐊᓚᐅᙱᓚᖅ.

“ᑭᓱᓂᒃ ᓄᖅᑲᖅᑎᑦᑎᓂᖃᖅᐸᑦ ᐊᓯᖏᑦ ᓄᓇᓕᐅᔪᑦ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒧᐊᕐᓗᑎᒃ ᐊᒻᒪ ᐅᖃᕐᓗᑎᒃ, ᐃᒡᓗᑕᖃᖅᐳᖅ ᐅᕙᓂ ᓄᑖᙳᕆᐊᖅᑎᑕᐅᔭᕆᐊᖃᖅᑐᒥ. ᐃᓕᓐᓂᐊᖅᑎᓂᒃ ᐃᓚᐳᖃᑕᐅᔪᒪᕗᑦ ᐊᒻᒪᓗ ᐃᓕᑦᑎᔪᒪᓪᓗᑎᒃ,'” ᐅᖃᓚᐅᖅᐳᖅ ᓂᐊᑦᓱᕐ. “ᑕᒪᒃᑯᐊᓕᒫᑦ ᐱᔭᕆᑐᕗᑦ ᐊᒻᒪ ᐱᓕᕆᓂᐅᔪᒥ. ᐊᖏᖅᓯᒪᑦᑎᐊᖅᐳᖓ ᖃᓄᐃᓕᐅᒃᑲᓐᓂᕐᓂᕐᒧᑦ. ᐊᕐᕌᓂᐅᑐᐃᓐᓇᕆᐊᖃᙱᑉᐳᖅ, ᑭᓯᐊᓂ ᖃᖓᒃᑲᓐᓂᐅᓛᖅᑐᒥ, ᑕᐅᑐᓪᓚᕆᖕᓂᐊᖅᐳᒍᑦ .”

ᑖᓐᓇ ᓯᕗᓕᐅᖅᑎᐅᓂᐅᙱᑦᑐᖅ. ᓄᓇᓕᖕᓂ ᑭᒡᒐᖅᑐᐃᔨᓅᓪᓗᐊᙱᓚᖅ ᑲᓱᒃᑐᕆᐊᖅᑐᕐᓂᕐᒧᑦ. ᐅᑯᐊᖑᓪᓗᐊᖅᐳᑦ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ ᐊᒻᒪᓗ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᖁᕝᕙᖅᓴᐃᔪᓂ ᐱᕕᒃᓴᑦᑎᐊᕙᒻᒪᕆᐊᓘᔪᒥᒃ.  

ᖃᒡᓕᕙᓪᓕᐊᕗᖅ ᓄᓇᕗᒻᒥ ᑕᓪᓕᒪᖓᓂ ᒪᓕᒐᓕᐅᖅᑎᒃᑯᓐᓄᑦ ᑲᑎᒪᓂᕆᓛᓕᖅᑕᖓᓂ. ᐊᐅᔭᒃᑯᑦ ᑲᑎᒪᓂᐅᔪᑦ ᓄᖅᑲᖅᑎᑕᐅᓚᐅᖅᐳᖅ ᐱᔾᔪᑎᖃᖅᑐᒥ ᓄᕙᒡᔪᐊᕐᓇᖅ-19−ᒧᑦ ᐊᒻᒪᓗ ᒪᓕᒃᑐᒥ ᓄᓇᕗᒻᒥ ᓂᕈᐊᕐᓂᐅᔪᖅ ᑕᖅᑭᐸᓗᖕᓂ 15−ᑐᐃᓐᓇᐅᕗᑦ. ᐃᓕᓯᓂᕐᒥ ᐊᒥᓱᒃᑲᓐᓂᕐᓂ ᓄᓇᕗᒻᒥᐅᓂ ᓇᑉᐸᖅᑎᕆᓂᕐᒧᑦ ᐱᓕᕆᓂᕐᔪᐊᖑᔪᒥ ᓴᙱᔫᓪᓗᓂ ᓂᕆᐅᖕᓂᐅᕗᖅ ᐃᓚᒋᔭᐅᔭᕆᐊᖃᖅᑐᒥ ᓴᙱᔪᒥ ᐱᓕᕆᓂᐅᔪᒥ.