2020 ᐊᕐᕌᒎᓚᐅᖅᐳᖅ ᖄᖏᐅᔾᔨᓂᕐᒥ ᐅᓄᕐᓂᖅᓴᓂ ᐊᒡᕕᐊᕈᑕᐅᔪᓂ ᑕᐃᒪᐃᒐᔪᖕᓂᐅᔪᒥ, ᑭᓯᐊᓂ ᓄᓇᕗᒻᒥᐅᑦ ᑕᑯᒃᓴᐅᑎᑦᑎᓚᐅᖅᐳᑦ ᓴᙱᓂᐅᔪᒥ ᐋᓯᑦ

ᐊᑲᐅᙱᓕᐅᕈᑎ: ᐊᕐᕌᒍ ᖄᖏᖅᑐᖅ
ᐅᖃᖅᐳᒍᑦ: ᐃᓕᑕᒃᓴᐃᑦ ᐃᓕᑕᑦ

ᑕᒪᓐᓇ ᐊᕐᕌᒎᓚᐅᖅᐳᖅ ᐊᔾᔨᖃᙱᑦᑐᒥ.

ᑕᒪᑦᑕᒐᓚᒃ ᖃᓱᕚᓪᓕᖅᐳᒍᑦ, ᐸᕐᓇᒃᓯᒪᓪᓗᑕ ᐱᒋᐊᕐᓂᐊᕐᓂᕐᒧᑦ ᒪᓕᒃᑐᒥ ᐊᑐᕐᓂᐊᖅᑕᑦᑎᓐᓂ ᐃᓅᓯᑦᑎᓐᓂ 2021–ᒥ ᖄᖏᖅᓯᒪᓕᖅᑐᒥ ᐊᕐᕌᒎᔪᒥ ᑎᑭᐅᑎᓚᐅᕐᓂᖓᓂ ᐊᒥᓱᒻᒪᕆᐊᓗᖕᓂ ᓄᑖᓂ ᐊᒃᓱᕈᕈᑕᐅᔪᓂ ᐊᒻᒪᓗ ᐱᖁᔭᓂᑦ ᓴᖅᑭᑦᑐᒥ ᓄᓇᕐᔪᐊᓕᒫᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ.

ᓇᖕᒥᓂᕆᔭᐅᔪᑦ, ᐃᓕᓐᓂᐊᕐᕖᑦ ᐊᒻᒪ ᐱᙳᐊᕐᕕᒐᓚᑦ ᒪᑐᔭᐅᓚᐅᖅᐳᑦ, ᐅᔭᕋᖕᓂᐊᕐᕖᑦ ᒪᑐᔭᐅᓪᓗᑎᒃ ᓄᓇᓕᖕᓄᑦ ᓴᓇᔨᐅᔪᓄᑦ, ᐃᖅᑲᓇᐃᔮᖑᔪᓄᑦ ᑕᑯᒃᓴᐅᑎᑕᐅᓂᐅᔪᓂ ᐊᒻᒪᓗ ᑲᑎᒪᓂᐅᔪᑦ ᓄᖅᑲᖅᑎᑕᐅᓚᐅᖅᐳᑦ ᐊᒻᒪᓗ ᓲᕐᓗ ᓄᓇᕗᓕᒫᖅ ᓄᖅᑲᓚᐅᖅᐳᖅ ᐅᓐᓄᐊᖏᓐᓇᕐᒥ.

ᐊᕐᕌᒍᓕᒫᑲᓴᖕᒥ ᑎᑭᐅᑎᓇᓱᐊᓚᐅᖅᐳᖅ ᓄᓇᕘᑉ ᐊᑦᑕᓇᙱᑦᑐᒥ ᑭᓴᕐᕕᖓᓄᑦ ᐋᖅᑭᐅᒪᑎᑕᐅᓚᐅᖅᑐᒥ ᐊᑐᕐᓂᕐᒧᑦ ᐅᐸᒃᑕᐅᑦᑕᐃᓕᒪᓂᐅᔪᒧᑦ ᑐᔪᕐᒥᕕᖕᓄᑦ, ᐃᓅᖃᑎᒌᖑᔪᓄᑦ ᐅᖓᓯᒌᒋᐊᖃᕐᓂᐅᔪᓄᑦ ᐊᒻᒪᓗ ᐊᖏᒡᓕᒋᐊᖅᑐᒥ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᓂᐅᔪᓂ, ᐃᓚᖃᖅᑐᒥ ᒪᑐᐊᕐᓂ–ᐊᑐᕆᐊᖃᕐᓂᐅᔪᓄᑦ ᐊᒻᒪᓗ ᐊᒡᒐᓂ ᐅᐊᓴᐃᓐᓇᕆᐊᖃᕐᓂᐅᔪᒥ, ᑭᓯᐊᓂ ᓄᕙᒡᔪᐊᕐᓇᖅ-19 ᐃᓯᕋᒥ ᓄᓇᕗᒻᒧᑦ ᓄᓇᕗᒻᒥᐅᑦ ᐸᕐᓇᒃᓯᒪᓚᐅᖅᐳᑦ.
ᓱᒃᑲᔪᒥ ᑭᐅᓂᕐᒧᑦ ᑲᑎᙵᓂᐅᔪᑦ ᐊᐅᓪᓚᖅᑎᑕᐅᓚᐅᖅᐳᑦ ᑕᒪᒃᑭᓄᑦ ᐊᒃᑐᖅᑕᐅᓯᒪᔪᓄᑦ ᓄᓇᓕᐅᔪᓄᑦ ᐊᒻᒪᓗ ᒐᕙᒪᑐᖃᒃᑯᑦ ᐃᓚᒋᐊᖅᓯᓚᐅᖅᐳᑦ ᖄᒃᑲᓐᓂᐊᒍᑦ $19.4 ᒥᓕᐊᓐᓂ ᑮᓇᐅᔭᖃᖅᑎᑕᐅᓂᐅᔪᓂ ᐃᑲᔪᕐᓂᕐᒧᑦ ᐃᕐᙲᓐᓇᑲᐅᑎᒋ ᐱᔭᕆᐊᖃᕐᓂᐅᔪᓄᑦ.

ᑕᐃᒪᙵᓂ ᐱᒋᐊᕐᓂᖓᓂ ᐊᒥᓱᓄᑦ ᖃᓂᒻᒪᓐᓇᐅᔪᒥ, ᒐᕙᒪᑐᖃᒃᑯᑦ ᑐᓂᓯᓯᒪᕗᑦ ᑲᑎᓪᓗᒍ $105 ᒥᓕᐊᓐᓂ ᓄᕙᒡᔪᐊᕐᓇᖅ-19–ᒧᑦ ᐃᑲᔪᖅᓱᐃᓂᐅᔪᒥ ᓄᓇᕗᒻᒥ ᓄᓇᓕᐅᔪᓄᑦ.

ᓄᓇᖃᖅᑎᐅᔪᑦ ᐱᓕᕆᑦᑎᐊᕐᓂᖃᓚᐅᖅᐳᑦ ᐃᒻᒥᖕᓄᑦ, ᒪᓕᑦᑎᐊᕋᓱᐊᖅᖢᑎᒃ ᒪᓕᒋᐊᓕᖕᓂ ᐋᖅᑭᒃᑕᐅᓯᒪᔪᓄᑦ ᓄᓇᕗᒻᒥ ᒐᕙᒪᒃᑯᓐᓂ (GN) ᐊᒻᒪᓗ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖓᓄᑦ, ᐊᒻᒪᓗ ᓄᓇᕗᑦ ᑐᑭᓕᐊᖅᑎᑦᑎᒃᑲᓐᓂᓚᐅᖅᐳᖅ ᓴᖑᖓᓂᐅᔪᒥ ᐊᐃᑦᑐᐃᓂᐅᔪᒥ, ᐱᖓᓱᑐᐃᓐᓇᓂ ᖃᓄᐃᓐᓂᐅᔪᓂ ᐊᒥᐊᒃᑯᔪᓂ ᓄᓇᕗᒻᒥ ᑕᒪᑐᒪᓂ ᐆᒪᙵᑦ ᑎᑎᕋᖅᑕᐅᓂᖓᓂ.

ᐅᖃᕋᓱᐊᙱᑦᑐᒍᑦ ᐊᒃᑐᖅᑕᐅᓚᐅᙱᓐᓂᑦᑎᓐᓂ, 266–ᓂ ᓇᓗᓇᐃᖅᑕᐅᔪᓂ ᖃᓄᐃᓐᓂᐅᔪᓄᑦ ᐅᓂᒃᑳᕆᔭᐅᓪᓗᑎᒃ ᐊᒻᒪᓗ ᒪᕐᕉᖕᓂ ᓄᓇᕗᒻᒥᐅᓂ – ᐊᑕᐅᓯᖅ ᐊᕐᕕᐊᕐᒥᐅᑕᖅ ᐊᒻᒪ ᐊᑕᐅᓯᖅ ᑲᖏᖅᖠᓂᕐᒥᐅᑕᑦ – ᐃᓅᔪᓐᓃᓚᐅᖅᑐᓂ ᐋᓐᓂᐊᕐᓇᒧᑦ.
ᖃᐅᒪᑎᑕᐅᓂᐅᔪᖅ ᐆᓇᕐᓂᖅᓴᐅᓚᐅᖅᐳᖅ ᐊᒻᒪ ᖃᐅᒻᒪᒋᐊᓪᓚᓚᐅᖅᐳᖅ ᐃᒡᓗᒃᓴᖃᕐᓂᕐᒧᑦ ᑐᐊᕕᕐᓇᕐᓂᐅᔪᒥ ᓵᙵᔪᒥ ᓄᓇᕗᒻᒥ – ᑐᐊᕕᕐᓇᕐᓂᐅᔪᒥ ᐊᑲᐅᙱᓕᐅᕈᑕᐅᔪᒥ ᐱᐅᔪᓐᓃᒃᑲᓐᓂᕐᓂᐅᔪᒥ ᐊᐃᑦᑐᐃᓂᐅᔪᒥ ᖁᐱᕐᕈᐃᑦ ᐊᐃᑦᑐᐃᓂᐅᔪᒥ ᑎᑭᐅᑎᒐᒥ ᓄᓇᕗᒻᒧᑦ. ᐊᑲᐅᙱᓕᐅᕈᑎ ᓇᓗᓇᐃᖅᑕᐅᒃᑲᓐᓂᓚᐅᖅᐳᖅ ᑕᒪᒃᑭᑦ ᐃᓚᒋᔭᐅᔪᒥ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᒧᒥᓛᖅ ᖃᖅᑲᕐᒧᑦ, ᐋᖅᑭᒃᓱᐃᔪᒥ ᐅᓂᒃᑳᓕᐊᖑᔪᒥ ᐊᑐᕐᓂᑯᖏᓐᓂ ᐃᒡᓗᓕᕆᓂᕐᒧᑦ ᐳᓚᕋᕐᓂᐅᔪᒥ ᑭᕙᓪᓕᕐᒥ ᐊᒻᒪᓗ ᕿᑎᕐᒥᐅᓂ ᐊᕕᒃᑐᖅᓯᒪᓂᐅᔪᓂ ᑕᒪᑐᒪᓂ ᐊᐅᔭᐅᔪᒥ, ᐊᒻᒪᓗ ᐅᕘᓇ ᓄᓇᕗᒻᒥ ᑐᙵᕕᒃᑯᓐᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᐃᓚᑰᓂᐅᔪᓂ ᐅᓂᒃᑳᓕᐊᖑᔪᒥ, ᐋᖅᑭᒃᓱᐃᔪᒥ ᐊᖏᕐᔪᐊᖅᑐᒥ ᑕᒪᒃᑭᓂ ᐃᓂᐅᔪᓂ ᐱᔭᕆᐊᖃᖅᑐᓂ ᐊᖏᐸᓗᒃᑐᓂ ᑲᑎᖅᓱᖅᑕᐅᕙᓪᓕᐊᔪᓂ ᑮᓇᐅᔭᓂ ᑐᖅᑯᖅᑕᐅᓯᒪᓪᓗᑎᒃ ᐱᕈᖅᐸᓪᓕᐊᑎᑕᐅᔪᓂᑦ ᓄᓇᕗᑦ ᐱᕈᖅᐸᓪᓕᐊᑦᑎᐊᕈᓐᓇᕐᓂᖓᓂ.

“ᐃᓅᓪᓗᑕ, ᐋᖅᑭᒋᐊᖅᓯᔪᓐᓇᖅᑰᕋᔭᙱᑉᐳᒍᑦ ᑭᓱᑐᐃᓐᓇᓂ ᓲᕐᓗ ᐋᓐᓂᖅᓯᕆᓂᐅᔪᒥ, ᐱᑦᑎᐊᙱᓐᓂᐅᔪᒥ, ᑐᖂᑦᑎᓂᕐᒥ, ᐃᒻᒥᓃᕐᓂᕐᒥ ᑭᓯᐊᓂ ᐋᖅᑭᒃᓯᒋᐊᕈᑦᑕ ᐃᒡᓗᒃᓴᖃᕐᓂᐅᔪᒥ ᑐᐊᕕᕐᓇᕐᓂᐅᔪᒥ,” ᐅᖃᓚᐅᖅᐳᖅ ᖃᖅᑲᖅ.

ᑲᓇᑕᒥ ᐸᓖᓯᒃᑯᑦ ᖃᐅᔨᓴᖅᑕᐅᕐᔪᐊᓕᓚᐅᖅᐳᑦ ᒪᓕᒃᑐᒥ ᒪᕐᕉᖕᓂ ᐃᓅᔪᓐᓃᕐᓂᐅᔪᓂ ᐹᖅᓯᓂᐅᔪᓂ ᐊᒻᒪᓗ ᐊᓯᐊᓂ ᐊᖑᒻᒥ ᐊᐳᖅᑕᐅᓚᐅᖅᑎᓪᓗᒍ ᓄᖅᑲᖅᐸᓪᓕᐊᔪᒥ ᓄᓇᓯᐅᑎᐅᑉ ᐹᖓᓂ. ᐃᒻᒥᒃᑰᖅᑐᓂ ᖃᐅᔨᓴᖅᑎᐅᔪᓂ ᒪᓕᓚᐅᖅᐳᖅ ᐊᒻᒪᓗ ᐸᓖᓯᐅᔪᑦ ᐸᓯᔭᒃᓴᐅᓚᐅᙱᓐᓂᕋᖅᑕᐅᓚᐅᕋᓗᐊᖅᑎᓪᓗᒋᑦ ᒪᕐᕉᔪᓂ ᑕᐃᒃᑯᓄᖓ ᑐᑭᓯᓇᑦᑎᐊᖅᑐᒥ ᖁᑦᑎᒃᑐᒥ–ᐊᒃᓱᕈᕐᓇᖅᑐᒥ ᖃᓄᐃᓐᓂᐅᔪᓄᑦ, ᐃᓄᓕᒫᑦ ᐱᔪᒪᓂᖃᓚᐅᖅᐳᑦ ᑕᑯᒃᓴᐅᓂᖃᕐᓂᖅᓴᐅᓂᐅᔪᒥ ᐊᒻᒪᓗ ᓵᑕᐅᔪᒃᓴᐅᑕᐅᔪᓐᓇᕐᓂᖏᓐᓂ ᐸᓖᓯᓂ ᐱᔨᑦᑎᕋᖅᑎᐅᔪᓂᑦ. ᑎᒥᒧᑦ ᐊᑕᔪᓂ ᐊᔾᔨᓕᐅᕈᑎᓂ ᐊᑐᖁᔭᐅᓂᖃᓚᐅᖅᐳᑦ ᐊᒥᓱᓂ ᓄᓇᕗᒻᒥ ᑲᑎᒪᔨᕐᔪᐊᖑᔪᓂ ᐃᓚᖃᖅᑐᒥ ᑲᓇᑕᒥ ᒪᓕᒐᓕᐊᕆᔭᐅᔪᓂᒃ ᖃᐅᔨᓴᖅᑎᒧᑦ ᑕᓂᔅ ᐹᑐᓴᓐᒧᑦ, ᐊᒻᒪᓗ ᑲᓇᑕᒥ ᓯᕗᓪᓕᖅᐹᒥ ᐱᓕᕆᐊᕆᔭᐅᔪᒥ ᐱᒋᐊᖅᑕᐅᔪᖃᓚᐅᖅᑎᓪᓗᒍ ᓄᕕᐱᕆ 30–ᒥ ᐃᖃᓗᖕᓂ. ᑲᓇᑕᒥ ᐸᓖᓯᒃᑯᑦ ᕿᓂᖅᐳᑦ ᑭᐅᔾᔪᑎᒃᓴᓂ ᐅᕘᓇ ᖃᐅᔨᓴᖅᑕᐅᓂᐅᔪᒥ ᖃᕋᓴᐅᔭᑎᒍᑦ ᐅᕝᕙᓘᓐᓃᑦ ᐊᑐᐃᓐᓇᐅᔪᒥ ᐸᓖᓯᒃᑯᓐᓂ ᐃᒡᓗᕐᔪᐊᖓᓂ ᐃᖃᓗᖕᓂ.

ᐊᒃᓱᕈᕐᓂᐅᔪᑦ ᑎᑭᕐᔪᐊᕐᓂᖃᓚᐅᖅᐳᑦ, ᑭᓯᐊᓂᑦᑕᐅᖅ ᑭᐅᓂᐅᔪᓂ, ᐋᖅᑭᒃᓯᒪᓂᐅᔪᓂ ᐋᖅᑭᒃᓱᖅᑕᐅᑲᐅᖅᑐᖅᑐᒥ ᐅᓪᓛᕈᒻᒥᑕᒧᑦ ᐱᓕᕆᐊᖑᓂᐅᔪᓂ ᐋᖅᑭᒃᓱᖅᑕᐅᔪᒥ ᓇᒡᓕᒍᓱᒃᑐᓄᑦ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᐅᔪᓂ ᐱᒋᐊᕐᓂᖓᓂ ᐊᓂᑦᑕᐃᓕᒪᔭᕆᐊᖃᕐᓂᐅᔪᒥ, ᐊᒻᒪᓗ ᐊᔪᖅᓴᖅᑐᓄᑦ ᓂᑭᑖᕐᕕᓂᑦ ᐊᒻᒪᓗ ᖃᔪᖅᑐᕐᕕᖕᓂ ᐱᓕᕆᓪᓗᑎᒃ ᑕᖃᔪᐃᑦᑑᓪᓗᑎᒃ ᐊᖑᒻᒪᑎᓇᓱᐊᖅᖢᑎᒃ ᐊᖏᒡᓕᒋᐊᖅᑐᒥ ᐱᔪᒪᓂᐅᔪᒥ.

ᐱᓪᓚᕆᐅᔪᓄᑦ ᐃᖅᑲᓇᐃᔭᖅᑎᐅᔪᓂ, ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐸᖅᑭᔨᐅᔪᓂ ᑲᑎᙵᓂᐅᔪᑦ ᐊᒻᒪᓗ ᓄᓇᓕᖕᓂ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᐅᔪᑦ ᓴᐳᔾᔨᔨᕐᔪᐊᖑᓚᐅᖅᐳᑦ 2020–ᒥ.

ᓯᕗᓪᓕᖅᐹᖑᔪᒥ ᑲᐴᑎᐅᔪᑦ ᒪᑑᓇ ᓄᕙᒡᔪᐊᕐᓇᖅ-19 ᐋᓐᓂᐊᓕᕇᒃᑯᑎ ᑎᑭᓚᐅᖅᐳᖅ ᐃᖃᓗᖕᓄᑦ ᑎᓯᐱᕆ 30–ᒥ, ᐊᒻᒪᓗ ᐃᓅᓯᖅ ᑕᒪᐃᑎᒍᑦ – ᐊᑦᑕᓇᙱᓐᓂᖅᓴᐅᔪᓐᓇᖅᓯᓂᐊᓕᕆᕗᖅ.

ᖃᓄᑐᐃᓐᓇᖅ 2021 ᓇᒃᓴᕐᓂᐊᕐᓂᖓᓂ ᐅᕙᑦᑎᓐᓄᑦ, ᖃᐅᔨᒪᕗᒍᑦ ᓄᓇᕗᒻᒥᐅᑦ ᓵᙵᓂᐊᖅᐸᖓ ᑕᐃᒪᓐᓇᑎᒋ ᓇᒡᓕᒍᓱᖕᓂᖃᕐᓂᐅᔪᒥ, ᑐᙵᓇᕐᓂᐅᔪᒥ, ᐊᒻᒪᓗ ᓱᖁᓯᔪᐃᓐᓂᕐᒥ ᑕᑯᒃᓴᐅᑎᑕᐅᓚᐅᖅᑐᒥ ᖄᖏᖅᓯᒪᓕᖅᑐᓄᑦ ᑕᖅᑭᓄᑦ 12–ᓄᑦ.

ᑕᐃᒪᑐᖅ ᓄᑖᖑᔪᒥ ᑎᑭᑉᐸᓪᓕᐊᔪᒥ ᐊᕐᕌᒍᖃᑦᑎᐊᕐᓂᐊᖅᐳᓯ.

Advertisement