ᒥᑭᑦᑐᓂ ᓇᖕᒥᓂᖃᖅᑎᐅᔪᑦ ᓄᓇᕗᒻᒥ ᓱᓕ ᐊᑦᑕᓇᖅᑐᒦᑉᐳᖅ ᖄᒃᑲᓐᓂᐊᒍᑦ ᓄᓇᕗᒻᒥ ᒐᕙᒪᒃᑯᓐᓂ ᐊᒻᒪ ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑕᐅᒐᓗᐊᖅᑎᓪᓗᒋᑦ

ᐊᑲᐅᙱᓕᐅᕈᑎ: ᒥᑭᑦᑐᓂ ᓇᖕᒥᓂᖃᖅᑎᐅᔪᑦ
ᐅᖃᖅᐳᒍᑦ: ᓱᓕ ᐅᕙᑦᑎᓐᓂ ᐃᑲᔪᖅᓯᖅᑕᐅᓂᖃᕆᐊᖃᖅᐳᑦ

ᐊᒃᓱᕈᕐᓇᕐᓂᐅᔪᓂ ᐊᐅᓚᑦᑎᓂᕐᒧᑦ ᒥᑭᑦᑐᓂ ᓇᖕᒥᓂᖃᕐᓂᐅᔪᒥ ᐊᒥᓲᕗᑦ. ᐱᓕᕆᑦᑎᐊᕈᓐᓇᕐᓂᕐᒧᑦ ᖃᐅᔨᒪᔭᕆᐊᖃᖅᐳᑎᑦ ᓇᒥ ᐃᓂᖃᕐᓂᕐᓂ ᓄᓇᓕᐅᔪᒥ, ᓄᓇᓕᖕᓂ ᐃᑲᔪᖅᓱᐃᓂᖅ ᐱᓪᓚᕆᐅᖕᒪᑦ ᒪᑐᐃᖓᐃᓐᓇᕈᓐᓇᕐᓂᕐᒧᑦ, ᖃᑭᓂᖃᕈᓐᓇᕐᓂᕐᒧᓪᓗ.

ᖄᖏᖅᓯᒪᓕᖅᑐᒥ ᐊᕐᕌᒍᒥ ᐊᔪᕐᓇᖅᑐᒃᑰᖅᓯᒪᙱᓚᑦ ᐊᒥᓱᓄᑦ ᓄᓇᕗᒻᒥ ᒥᑭᑦᑐᓂ ᓇᖕᒥᓂᖃᖅᑎᐅᔪᓄᑦ. ᐃᒪᐃᑦᑑᔮᖅᐳᖅ ᓇᖕᒥᓂᖃᖅᑎᐅᔪᖅ ᖃᓄᑭᐊᖅ ᐃᓚᐅᖃᑕᐅᙱᒃᑯᓂ ᓂᕿᒃᓴᖃᖅᑎᑦᑎᓂᕐᒥ ᐃᓚᒌᖑᔪᓄᑦ ᐊᒻᒪᓗ ᓴᓇᔨᐅᔪᓂ ᐊᖏᕐᕋᕆᔭᖏᓐᓂ ᐃᓕᓯᒪᓂᐅᔪᒥ ᒫᓐᓇ ᐅᓗᕆᐊᓇᖅᑐᒥ ᓇᓕᒧᑎᑦᑎᓇᓱᐊᖅᓯᒪᕗᖅ ᐅᕝᕙᓘᓐᓃᑦ ᐊᐅᓚᑦᑎᓂᕐᒥ ᔭᒐᐃᓂᐅᔪᒥ, ᓂᕆᐅᒃᖢᑎᒃ ᑭᒡᓕᖃᖅᑎᑦᑎᒃᑲᓐᓂᕐᓂᐅᔪᓂ ᐱᑕᖃᔾᔮᙱᓐᓂᖓᓂ ᐊᒻᒪᓗ ᓄᓇᕗᑦ ᐃᖏᕐᕋᐃᓐᓇᕐᓂᐊᕐᓂᖏᓐᓂ ᐊᑦᑕᓇᙱᑦᑐᒥ ᐊᖅᑯᑎᖓᒍᑦ ᒪᑐᐃᒃᑲᓐᓂᕈᓐᓇᕐᓂᖏᓐᓂ.

ᐱᖃᕆᐊᖃᖅᐳᑦ ᐊᖏᐸᓗᒃᑐᒥ ᐃᓱᒪᑐᓂᐅᔪᒥ ᐊᒻᒪ ᓴᙱᓂᖃᕐᓂᐅᔪᒥ ᐆᒪᐃᓐᓇᕋᓱᐊᕐᓂᕐᒧᑦ ᐊᒃᓱᕈᕐᓇᖅᑐᒃᑰᖅᑎᓪᓗᒋᑦ, ᑭᓯᐊᓂ ᐅᑯᐊ ᐱᐅᓂᐅᔪᓂ ᓄᓇᕗᒻᒥᐅᑦ ᐃᓚᑰᓂᖃᙱᓚᑦ.

ᔫᓂᒥ, ᐋᑐᕚ ᐊᖏᓚᐅᖅᐳᑦ ᖄᒃᑲᓐᓂᐊᒍᑦ $133 ᒥᓕᐊᓐᓂ ᐃᑲᔪᕐᓂᕐᒧᑦ ᓄᓇᖃᖅᑳᖅᓯᒪᔪᓄᑦ ᓇᖕᒥᓂᖃᖅᑎᐅᔪᓂᑦ ᐅᑎᖅᐸᓪᓕᐊᓂᖏᓐᓂ ᐊᒃᓱᕈᕐᓇᖅᑐᒃᑰᖅᑎᓪᓗᒋᑦ ᓄᕙᒡᔪᐊᕐᓇᖅ-19–ᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ, ᖄᒃᑲᓐᓂᐊᒍᑦ $306.8 ᒥᓕᐊᓐᓂ ᓇᓗᓇᐃᖅᑕᐅᓚᐅᖅᑐᓄᑦ ᐊᐃᑉᕆᓕᒥ. ᑭᖑᓪᓕᖅᐹᖑᔪᖅ ᑮᓇᐅᔭᖃᖅᑎᑕᐅᓂᐅᔪᓂ ᐃᓚᖃᖅᐳᖅ ᒥᑭᑦᑑᑎᓂᑦ–ᓇᖕᒥᓂᖃᖅᑎᐅᔪᓄᑦ, ᓯᕗᓂᐊᓂ ᐱᔪᓐᓇᓚᐅᙱᑦᑐᓂ ᒐᕙᒪᒃᑯᓐᓄᑦ ᐃᑲᔪᖅᓯᖅᑕᐅᓂᐅᔪᒧᑦ.

ᓄᓇᕗᒻᒥ ᒐᕙᒪᒃᑯᑦ ᒥᑭᑦᑐᓄᑦ ᓇᖕᒥᓂᕆᔭᐅᔪᓄᑦ ᐃᑲᔪᖅᓱᐃᓂᐅᔪᒥ ᐱᓕᕆᐊᖑᔪᖅ, $5,000 ᐊᑭᓕᖅᑕᐅᓂᖓ ᐅᑎᖅᑎᑕᐅᔭᕆᐊᖃᙱᑦᑐᖅ ᐃᑲᔫᓯᐊᖅ ᐃᑲᔪᕐᓂᕐᒧᑦ ᐊᐅᓚᑕᐅᓂᐅᔪᓂ ᐊᑭᖏᓐᓂ ᐊᒻᒪ ᐱᓕᕆᕙᓪᓕᐊᓪᓗᓂ ᐊᑭᑐᔫᑎᓄᑦ, ᐊᑐᖅᑕᐅᒐᔪᒃᐳᖅ ᑕᐃᒪᙵᓂ ᓄᕙᒡᔪᐊᕐᓇᖅ-19 ᓴᖅᑭᓚᐅᕐᓂᖓᓂ. ᓯᑎᐱᕆ 30–ᒥ, ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐊᖏᓚᐅᖅᐳᑦ 86–ᓂ ᑐᒃᓯᕋᖅᑐᓂ ᑲᑎᓪᓗᒍ $308,488–ᒥ ᑮᓇᐅᔭᓂᒃ ᐃᑲᔪᕐᓂᐅᔪᓄᑦ. ᑐᒃᓯᕋᖅᑐᑦ ᓱᓕ ᐱᔭᐅᕙᓪᓕᐊᕗᑦ ᐊᒻᒪ ᐃᓱᒪᒃᓴᖅᓯᐅᕈᑕᐅᓪᓗᑎᒃ.

ᖄᒃᑲᓐᓂᐊᒍᑦ, ᓄᓇᕗᒻᒥ ᒐᕙᒪᒃᑯᑦ, ᑲᓇᑕᒥ ᐅᑭᐅᖅᑕᖅᑐᒥ ᑮᓇᐅᔾᔭᒃᓴᓂᕐᒧᑦ ᐱᕙᓪᓕᐊᑎᑦᑎᓂᐅᔪᒥ ᑎᒥᐅᔪᒥ ᐊᒻᒪᓗ ᓄᓇᕗᒻᒥ ᓄᓇᓕᖕᓂ ᓯᕗᓂᒃᓴᓄᑦ ᑲᑐᔾᔨᖃᑎᒌᖑᔪᓂ ᐊᑐᐃᓐᓇᖃᖅᑎᑦᑎᓂᕐᒧᑦ ᐱᔪᓐᓇᖅᑐᓂ ᓄᓇᕗᒻᒥ ᓇᖕᒥᓂᕆᔭᐅᔪᓄᑦ ᐊᓯᐊᒎᖅᑐᒥ ᑮᓇᐅᔭᖃᖅᑎᑕᐅᓂᐅᔪᒥ ᓂᕈᐊᒐᒃᓴᐅᔪᒥ ᐋᖅᑭᒃᓯᒪᓂᐅᔪᒥ ᕿᑐᕐᙱᐅᕐᓂᖃᙱᑦᑐᒥ, ᐃᓚᖓᓂ ᐃᓱᒪᒋᔪᓐᓃᖅᑕᐅᔪᓐᓇᖅᑐᒥ ᐊᑐᖅᑐᐊᕐᓂᐅᔪᒥ ᑎᑭᐅᒪᔪᒧᑦ $100,000–ᒧᑦ.
ᑕᐃᒪᐃᒃᑲᓗᐊᖅᑎᓪᓗᒍ, ᓴᓇᐅᒐᓕᕆᔩᑦ, ᓴᓇᙳᐊᖅᑏᑦ ᐊᒻᒪ ᐊᓯᖏᓐᓂ ᒥᑭᑦᑑᑎᓂ–ᓇᖕᒥᓂᖃᖅᑎᐅᔪᓄᑦ ᐱᓗᐊᖅᑐᒥ ᐊᒃᑐᖅᑕᐅᕐᔪᐊᖅᓯᒪᕗᑦ ᑭᒡᓕᖃᖅᑎᑕᐅᓂᐅᔪᓂ ᑲᑎᙵᓂᐅᔪᓄᑦ ᐊᒻᒪ ᒪᑐᔭᐅᓂᐅᔪᓄᑦ ᓇᖕᒥᓂᖃᖅᑎᐅᔪᓄᑦ ᐃᓂᐅᔪᓄᑦ ᑐᓂᓯᔪᓐᓇᕋᔭᓚᐅᖅᑐᓂ ᐃᓂᐅᔪᒥ ᓴᖅᑭᔮᖅᑎᑦᑎᓂᕐᒥ ᐊᒻᒪ ᓂᐅᕕᐊᒃᓴᖃᕐᓂᕐᒥ ᓴᓇᐅᒐᒥᓂᑦ.

ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᐅᓂᒃᑳᕆᓚᐅᖅᐳᑦ ᓯᑎᐱᕆ 7–ᒥ ᓴᓇᐅᒐᓕᕆᔨ ᒍᕋᒡ ᒧᐊᒐᓐ ᓇᓚᐅᑦᑖᕆᓂᖓᓂ ᓄᕙᒡᔪᐊᕐᓇᖅ-19 ᐊᓯᐅᑎᑦᑎᓚᐅᕐᓂᖓᓂ 75 ᐳᓴᓐᑎᐸᓗᖕᒥ ᑮᓇᐅᔾᔭᒃᓴᓂᕆᒐᔪᒃᑕᖓᓂ.

ᒫᔾᔨ 16–ᒥ ᒪᑐᔭᐅᓂᖓᓂ ᓄᓇᑦᑕ ᓱᓇᒃᑯᑖᖏᑦ ᑕᑯᔭᒐᖃᕐᕕᖓᓂ ᐊᖏᔪᒥ ᐊᒃᑐᐃᓂᖃᕐᔪᐊᖅᓯᒪᕗᖅ ᓴᓇᐅᒐᓕᕆᔨᐅᑉ ᐱᔪᓐᓇᕐᓂᖏᓐᓂ ᓂᐅᕕᐊᒃᓴᖃᕐᓂᖏᓐᓂ ᓴᓇᙳᐊᒐᓂᑦ, ᑕᑯᒥᓴᐅᑎᓂᑦ ᐊᒻᒪ ᑎᑎᕋᐅᔭᒐᕐᓂ. ᑕᑯᔭᒐᖃᕐᕕᒃ ᓱᖏᐅᔾᔨᓚᐅᖅᐳᖅ ᖃᕋᓴᐅᔭᑎᒍᑦ ᐱᓕᕆᓂᐅᔪᒥ ᐊᐅᓚᑦᑎᔨᐅᔪᖅ ᐊᒻᒪ ᐸᖅᑭᔨᐅᔪᒥ ᔭᓯᑲ ᑰᑦᑎᖅ ᐅᖃᓚᐅᖅᐳᖅ ᐱᐅᓯᒋᐊᖅᑎᑦᑎᓚᐅᖅᐳᖅ ᐊᖏᐸᓗᒃᑐᒥ ᐃᑲᔪᕈᓐᓇᕐᓂᖏᓐᓂ ᓴᓇᐅᒐᓕᕆᔨᐅᔪᓂ ᓂᐅᕕᐊᒃᓴᖃᕐᓂᖏᓐᓂ ᓴᓇᐅᒐᒥᓂᑦ ᐊᒻᒪᓗ ᒪᑐᐃᒃᑲᓐᓂᕐᓂᐅᔪᒥ ᔪᓚᐃ 7–ᒥ ᐱᓱᖕᓂᐅᒃᑲᓐᓂᓚᐅᖅᐳᖅ ᐱᐅᔪᒧᑦ ᑐᕌᖓᓂᐅᔪᒧᑦ.

ᓴᓇᐅᒐᓕᕆᓂᕐᒧᑦ ᐊᕐᕌᒍᖓᓂ – ᐊᓯᐊᒍᑦ ᐱᒻᒪᕆᐅᔪᒥ ᑮᓇᐅᔾᔭᒃᓴᓂᐅᔪᒥ ᓇᑭᙶᕐᓂᖓᓂ ᓴᓇᐅᒐᓕᕆᔩᑦ ᓴᓇᐅᒐᖏᓐᓂ ᐊᖏᕐᕋᖓᓂ ᓂᐅᕕᐊᒃᓴᖃᕐᓂᐅᔪᓂ – ᖃᓂᒡᓕᕙᓪᓕᐊᑐᐃᓐᓇᖅᑎᓪᓗᒍ, ᐊᐱᖅᑯᑎᓂ ᓴᖅᑭᑦᑐᖃᖅᐸᓪᓕᐊᕗᖅ ᐅᑯᐊ ᖃᓄᐃᓐᓂᐅᔪᑦ ᐱᓕᕆᐊᖑᔪᓐᓇᕐᓂᐊᕐᒪᖔᑕ ᐋᒃᑲᓘᓐᓃᑦ ᒫᓐᓇᐅᔪᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ–ᐱᔾᔪᑕᐅᔪᓄᑦ ᑭᒡᓕᖃᖅᑎᑕᐅᓂᐅᔪᓂ.

ᓇᐅᑦᑎᖅᓱᑦᑎᐊᕐᓂᐅᔪᒥ ᐃᓯᖅᐸᓪᓕᐊᓂᐅᔪᓂ ᓇᓗᓇᐃᖅᓯᓂᕐᒧᑦ ᓴᓇᓂᐅᔪᒥ ᐅᕝᕙᓘᓐᓃᑦ ᐃᒡᓗᕈᓯᕐᒥ ᐃᓄᖃᕈᓐᓇᕐᓂᖓᓂ ᐋᖅᑭᐅᒪᑎᑕᐅᑦᑎᐊᕈᓂ, ᒪᑐᐊᖅᓯᒪᓂᐅᔪᒥ ᐊᒻᒪ ᓴᓗᒻᒪᖅᓴᖅᑕᐅᖏᓐᓇᕈᓐᓇᕈᓂ ᐊᑐᐃᓐᓇᐅᔪᓂ, ᐱᔾᔪᑎᒃᓴᖃᓗᐊᙱᓚᖅ ᐅᑯᐊ ᖃᓄᐃᓐᓂᐅᔪᑦ ᐱᓕᕆᐊᖑᔪᓐᓇᕋᔭᙱᓐᓂᖏᓐᓂ ᒪᓕᑦᑎᐊᕐᓗᑎᒃ ᓇᓗᓇᐃᖅᓯᔾᔪᑦ ᓄᓇᕗᒻᒥ ᐊᖅᑯᑎᖓᓂ. ᑕᐃᒪᑐᖅ ᓄᓇᕗᒻᒥ ᒐᕙᒪᒃᑯᑦ ᐊᒻᒪ ᐋᖅᑭᒃᓱᐃᔨᐅᔪᑦ ᐊᐅᓚᑦᑎᖃᑎᖃᕐᓂᐊᖅᐳᑦ ᐅᑯᐊ ᐱᓪᓚᕆᐅᔪᓄᑦ ᓇᑭᙶᕐᓂᐅᔪᓂ ᑮᓇᐅᔾᔭᒃᓴᓂᐅᔪᒥ ᐊᓯᐅᔾᔮᙱᒻᒪᑕ.

ᐃᓱᒪᑐᓂᖅ ᐊᒻᒪ ᓴᙱᓂᖅ ᐱᒻᒪᕆᐅᕗᑦ ᐱᓕᕆᑦᑎᐊᕈᓐᓇᕐᓂᕐᒧᑦ, ᑭᓯᐊᓂ ᐃᖅᑲᐅᒪᓂᐊᖅᐳᒍᑦ ᐃᑲᔪᖅᓱᐃᓂᕐᒥ ᓄᓇᓕᖕᒥᐅᑕᓂ ᖁᕕᐊᓱᖕᓇᐅᔪᖅ ᑎᑭᑉᐸᓪᓕᐊᑎᓪᓗᒍ, ᒥᑭᑦᑐᓂ ᓇᖕᒥᓂᖃᖅᑎᐅᔪᑦ ᓄᓇᓕᐅᔪᒥ ᐅᕙᑦᑎᓐᓄᑦ ᐃᑲᔪᖅᑕᐅᔭᕆᐊᖃᖅᐳᑦ.

Advertisement

Leave a comment

Your email address will not be published. Required fields are marked *