ᑎᒥᒧᑦ ᐊᑕᔪᑦ ᐊᔾᔨᓕᐅᕈᑎᑦ ᐊᖏᒡᓕᒋᐊᖅᑎᑦᑎᔪᓐᓇᖅᑎᓪᓗᒍ ᑲᒪᑦᑎᐊᕆᐊᖃᕐᓂᖏᓐᓂ ᐃᓄᓕᒫᓄᑦ, ᐃᒻᒥᒃᑰᖅᑐᓂ ᐊᐅᓚᑦᑎᓂᐅᔪᒥ ᐱᔭᐅᔭᕆᐊᖃᕐᔪᐊᖅᐳᖅ ᖃᐅᔨᓴᐃᑎᓪᓗᒋᑦ ᑲᓇᑕᒥ ᐸᓖᓯᒃᑯᓐᓂ

ᐊᑲᐅᙱᓕᐅᕈᑎ: ᐸᓖᓯᒃᑯᑦ ᑲᒪᑦᑎᐊᕆᐊᖃᕐᓂᖏᓐᓂ
ᐅᖃᖅᐳᒍᑦ: ᐃᖏᕐᕋᓂᖓ ᐊᑭᓪᓗᐊᕆᕙᖓ

ᓱᓕᒃᑲᓐᓂᖅ ᐃᓱᒫᓗᖕᓇᖅᑐᒥ ᖃᓄᐃᓐᓂᐅᔪᒥ ᓄᓇᕗᒻᒥ ᑲᓇᑕᒥ ᐸᓖᓯᒃᑯᓐᓂ ᐃᓚᒋᔭᐅᔪᓂ ᖃᐅᔨᓴᖅᑕᐅᓯᒪᑎᓪᓗᒍ ᓈᒻᒪᙱᑦᑐᒥ ᐃᓕᖅᑯᓯᖃᕐᕕᒋᔭᖃᕐᓂᕐᒥ ᑎᒍᓯᓇᓱᐊᖅᑎᓪᓗᒋᑦ ᐊᒻᒪ ᓇᓂᔭᐅᓂᖓᓂ ᐱᕋᔭᖕᓂᕐᒧᑦ ᐱᔮᕆᙱᓐᓂᐅᔪᒥ ᐃᓱᓕᑕᐅᓚᐅᖅᐳᖅ ᒫᓐᓇᓕᓴᐅᔪᒥ.

ᑎᒍᓯᓂᐅᔪᖅ ᐊᐱᖅᑯᑕᐅᔪᖅ ᐋᖓᔮᖅᑐᒥ ᐊᖑᒻᒥ ᑭᙵᕐᓂ ᐊᐳᖅᑕᐅᓂᖓᓂ ᐹᖓᓄᑦ ᐃᖏᕐᕋᔪᒥ ᑲᓇᑕᒥ ᐸᓖᓯᒃᑯᓐᓂ ᓄᓇᓯᐅᑎᒧᑦ, ᓯᕗᓂᐊᓂ ᐅᓄᙱᓐᓂᖅᓴᐅᔪᓂ ᑕᓪᓕᒪᓂ ᐸᓖᓯᐅᔪᓂ ᐊᕙᓗᓯᓯᒪᓪᓗᑎᒃ ᐊᖑᒻᒥ ᓄᖅᑲᖅᑎᑕᐅᓇᓱᐊᖅᑎᓪᓗᒍ. ᑕᕐᕆᔭᓕᐊᖑᔪᒥ ᖃᓄᐃᓐᓂᐅᔪᒥ, ᐸᓖᓯᒥᒃ ᒪᓂᖅᑲᒥ ᓴᐅᒥᖓᓂ ᐊᔾᔨᓕᐅᕆᔭᐅᔪᒧᑦ ᑕᑯᔭᐅᔪᓐᓇᖅᐳᖅ ᓰᖅᑯᖓᓂ ᐅᑎᖅᑎᖦᖢᓂᐅᒃ ᐊᒻᒪ ᑐᑭᖅᓯᔫᔮᖅᖢᓂ ᐸᓴᒋᔭᐅᔪᒥᑦ.

ᖃᓄᐃᓐᓂᐅᔪᒥ ᑕᕐᕆᔭᓕᐊᖑᔪᒥ ᐊᒃᓱᕈᕐᓇᖅᑎᓪᓗᒍ, ᑭᓯᐊᓂ ᖃᓄᐃᓚᐅᕐᓂᖓᓂ ᒪᓕᒃᑐᒥ ᑕᕐᕆᔭᓕᐊᖑᔪᒥ ᑭᐅᓘᑕᐅᒃᑲᓐᓂᕈᓐᓇᖅᐳᖅ – ᑕᐃᒫᒃ ᖃᓄᐃᓚᐅᕐᓂᖓᓂ, ᐃᔨᐅᔪᓄᑦ ᑕᐃᒃᑯᓄᖓ ᐃᓱᒪᓕᐅᕆᔪᓄᑦ, ᐱᕋᔭᖕᓂᐅᓚᐅᙱᒻᒪᑦ.

ᕿᒥᕐᕈᔭᐅᓂᖓᓂ ᑎᒍᔭᐅᓂᐅᔪᒥ ᐱᔭᕇᖅᑕᐅᓚᐅᖅᐳᖅ ᐋᑐᕚᒥ ᐸᓖᓯᒃᑯᓐᓂ ᐱᔨᑦᑎᕋᕐᓂᒃᑯᓐᓄᑦ (OPS), ᑎᒥᐅᔪᑦ ᑲᒪᒋᔭᖃᖅᑐᓂ ᐊᐅᓚᑦᑎᔪᓂ ᒪᓕᒐᕐᓂᑦ ᓄᓇᕗᒻᒥ ᐸᓖᓯᒃᑯᓐᓂ.

ᖃᔅᓯᒐᓚᖕᓂ ᖃᓄᐃᓕᐅᕐᓂᐅᔪᓂ ᕿᒥᕐᕈᔭᐅᓂᖅᑕᖃᖅᐳᖅ ᓄᓇᕗᒻᒥ ᑕᒪᑐᒪᓂ ᐊᕐᕌᒎᔪᒥ ᒪᓕᒃᑐᒥ ᑐᖂᑦᑎᓂᐅᔪᓂ ᐸᓖᓯᒃᑯᓐᓂ ᐹᖅᓯᓂᐅᔪᓄᑦ ᑭᙵᕐᓂ ᕕᕈᐊᕆ 26–ᒥ ᐊᒻᒪ ᒪᐃ 5–ᒥ ᑲᖏᖅᖢᒑᐱᖕᒥ. ᕕᕈᐊᕆᒥ ᖃᓄᐃᓐᓂᐅᔪᒥ ᐸᓯᔭᒃᓴᐅᙱᓐᓂᕋᐃᓚᐅᕆᕗᖅ ᐸᓖᓯᐅᔪᒥ ᐊᐱᖅᑯᑕᐅᔪᒥ ᐊᒻᒪᓗ ᐅᓂᒃᑳᓕᐊᖑᓪᓚᕆᖕᓂᐅᔪᒥ ᐋᑐᕚᒥ ᐸᓖᓯᒃᑯᓐᓂ ᐱᔨᑦᑎᕋᕐᓂᒃᑯᓐᓂ ᓴᖅᑭᑎᑦᑎᓚᐅᖅᐳᖅ ᐅᓗᕆᐊᓇᕐᓂᖓᓂ ᖃᓄᐃᓐᓂᐅᔪᒥ ᑐᓂᓯᔪᒥ ᑲᓇᑕᒥ ᐸᓖᓯᒃᑯᓐᓂ ᐃᓚᒋᔭᐅᔪᓄᑦ ᐃᓱᒪᓕᐊᖑᓚᐅᖅᑐᒥ ᐱᔾᔪᑎᖃᒻᒪᕆᒐᓱᒋᔭᐅᓪᓗᓂ ᐊᒧᓯᓂᕐᒥ ᐊᒻᒪᓗ ᖁᑭᕆᐊᕐᓗᑎᒃ ᖁᑭᐅᑎᒥᓂᑦ.

ᐅᓂᒃᑳᕆᓂᐅᔪᓂ ᕕᕈᐊᕆᒥ ᖁᑭᖅᓯᓂᐅᔪᒥ ᓴᖅᑭᑎᑕᐅᕋᔮᓚᐅᖅᑎᓪᓗᒋᑦ, ᐊᑕᐅᓯᕐᒥ ᐊᑲᐅᙱᓕᐅᕈᑕᐅᔪᒥ ᐆᒪᙵᑦ ᐱᓕᕆᔾᔪᓯᐅᔪᒥ ᑐᓴᒐᒃᓴᐅᔪᓄᑦ ᑕᑯᒃᓴᐅᑎᑕᐅᓂᖓᓂ ᑕᖅᑭᓄᑦ 6–ᖑᓚᐅᕐᓂᖓᓂ ᐋᑐᕚᒥ ᐸᓖᓯᒃᑯᓐᓂ ᐱᔨᑦᑎᕋᕐᓂᒃᑯᓐᓄᑦ ᕿᒥᕐᕈᔭᐅᓂᖓᓄᑦ ᐊᒻᒪ ᐅᑎᖅᑎᑕᐅᓂᖓᓄᑦ ᑎᑎᖅᑲᖁᑕᐅᔪᓂ ᓄᓇᕗᒻᒧᑦ V ᐊᕕᒃᑐᖅᓯᒪᓂᐅᔪᓄᑦ. ᐅᓇ ᐊᒃᓱᕈᕐᓇᖅᑐᒻᒪᕆᐅᓪᓗᓂ ᐊᑯᓂᐅᓂᐅᕗᖅ ᐃᓚᒌᖑᔪᓄᑦ ᐊᒻᒪᓗ ᓄᓇᓕᖕᓄᑦ ᐅᑕᖅᑭᓂᕐᒧᑦ ᐃᓱᓕᑦᑎᓂᐅᔪᒥ ᐅᑯᓄᖓ ᖃᓄᐃᓐᓂᐅᔪᓄᑦ. ᖃᐅᔨᓴᖅᑕᐅᓂᐅᔪᖅ ᑲᖏᖅᖢᒑᐱᖕᒧᑦ ᖃᓄᐃᓐᓂᐅᔪᒥ ᓱᓕ ᐃᓱᓕᑕᐅᔭᕆᐊᖃᖅᐳᖅ.

ᐊᑐᕈᓐᓇᙱᑎᓪᓗᑕ ᐃᖅᑲᖅᑐᐃᕕᖕᒥ ᐃᓄᓕᒫᓄᑦ ᐃᓱᒪᒋᔭᐅᓂᐅᔪᓄᑦ ᑕᐃᒪᐃᑦᑐᓄᑦ ᖃᓄᐃᓐᓂᐅᔪᓄᑦ, ᑲᒪᓇᙱᓚᖅ ᐊᔭᐅᕆᓂᐅᔪᒥ ᐃᓕᓯᓂᕐᒥ ᐸᓖᓯᒃᑯᓐᓂ ᐱᔨᑦᑎᕋᖅᑎᐅᔪᓄᑦ ᑎᒥᒧᑦ–ᐊᑕᔪᓄᑦ ᐊᔾᔨᓕᐅᕈᑎᓂᑦ ᐱᓯᒪᓂᖓᓂ ᐱᐅᒋᔭᐅᕐᔪᐊᓕᕐᓂᖓᓂ. ᐃᓄᓕᒫᑦ ᐃᖅᑲᖅᑐᐃᖃᑦᑕᕈᒪᕗᑦ ᓇᖕᒥᓂᖅ ᐃᔨᒥᓄᑦ ᑕᑯᔭᑦᑎᓐᓂ ᖃᓄᐃᓕᐅᕐᓂᐅᔪᓂᑦ. ᑕᕐᕆᔭᓕᐊᖑᔪᓂ ᑕᑯᒃᓴᐅᓂᐅᔪᒥ ᐃᓱᒪᓕᐅᕆᓂᐅᔪᒥ, ᑭᓯᐊᓂ ᐊᖏᔪᒻᒪᕆᐊᓗᖕᒥ ᐅᓯᒋᐊᖅᑎᑦᑎᓂᐅᕗᖅ ᑕᐃᒃᑯᓄᖓ ᖃᓄᐃᑦᑐᑐᐃᓐᓇᐅᔪᓂ ᐅᓗᕆᐊᓇᖅᑐᓂ ᐅᖃᓗᖕᓂᐅᔪᓄᑦ ᑕᑯᔭᐅᙱᓐᓂᐅᔪᓂ.

ᓄᕕᐱᕆ 30–ᒥ, ᑲᓇᑕᒥ ᐸᓖᓯᒃᑯᑦ ᐃᖃᓗᖕᓂ ᐃᓪᓕᕆᔭᐅᓚᐅᖅᐳᑦ ᓯᕗᓪᓕᖅᐹᖑᔪᒥ 8–ᖑᔪᓂ ᑎᒥᒧᑦ ᐊᑕᔪᓂ ᐊᔾᔨᓕᐅᕈᑎᓂᑦ ᐊᑐᖅᑕᐅᔪᒃᓴᐅᑕᐅᔪᓄᑦ ᐸᓖᓯᖏᓐᓄᑦ, ᒪᕐᕉᖕᓂ ᐊᑐᓂ ᐃᖅᑲᓇᐃᔭᕐᓂᐅᔪᓄᑦ, ᑲᓇᑕᓕᒫᒥ ᓯᕗᓪᓕᖅᐹᒥᒃ ᐱᓕᕆᐊᕆᔭᐅᔪᒥᒃ. ᐅᓄᕐᓂᐅᔪᓂ ᐸᓖᓯᓂ ᐊᑐᖅᑐᓂ ᐊᔾᔨᓕᐅᕈᑎᓂᑦ ᐅᓄᖅᓯᒋᐊᖅᑕᐅᓂᐊᖅᐳᑦ ᒪᕐᕉᖕᓄᑦ ᐊᑐᓂ ᐃᖅᑲᓇᐃᔭᕐᓂᐅᔪᒥ ᔭᓄᐊᕆ 11–ᒥ ᐊᒻᒪᓗ ᓱᓕᒃᑲᓐᓂᖅ ᕕᕈᐊᕆ 15, 2021–ᒥ, ᑕᐃᑲᓂ ᑕᒪᒃᑭᑦ ᑕᒪᐃᑎᒍᑦ ᐱᓕᕆᐊᒃᓴᒥᓂ ᐃᓚᒋᔭᐅᔪᑦ ᐊᑐᓂ ᐃᖅᑲᓇᐃᔭᕐᓂᐅᔪᒥ ᐊᑐᕐᓂᐊᖅᐳᑦ ᐅᑯᓂᖓ ᐱᓕᕆᔾᔪᑕᐅᔪᓄᑦ.

ᑲᒪᒋᔭᒃᓴᖃᕐᓂᖓ ᐅᑯᓂᖓ ᐱᓕᕆᔾᔪᑕᐅᔪᓂ ᐃᑭᑎᑕᐅᓂᖏᓐᓂ ᐊᒻᒪ ᓂᐱᓕᐅᕆᓂᕐᒥ ᒪᓕᖕᓂᖃᖅᐳᖅ ᐊᑐᓂ ᐸᓖᓯᐅᔪᒧᑦ, ᑭᓯᐊᓂ.

ᐅᒃᐱᕈᓱᒃᑲᓗᐊᕈᕕᑦ ᐋᒃᑲᓘᓐᓃᑦ ᑎᒥᒧᑦ ᐊᑕᔪᑦ ᐊᔾᔨᓕᐅᕈᑎᑦ ᐊᖏᒡᓕᒋᐊᕐᓂᐊᕐᓂᖓᓂ ᑲᒪᑦᑎᐊᕆᐊᖃᕐᓂᖏᓐᓂ ᐃᓄᓕᒫᓄᑦ, ᐅᕝᕙᓘᓐᓃᑦ ᐃᓱᒪᓗᓂ ᑮᓇᐅᔭᐃᑦ ᐊᑐᖅᑕᐅᑦᑎᐊᒃᑲᓐᓂᕈᓐᓇᕋᔭᕐᓂᖏᓐᓂ ᐱᓕᒻᒪᒃᓴᕐᓂᕐᒧᑦ ᐊᒻᒪᓗ ᐅᓄᕐᓂᖅᓴᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᑲᔪᕈᑎᒃᓴᓄᑦ ᑲᓇᑕᒥ ᐸᓖᓯᒃᑯᓐᓄᑦ ᐃᓚᒋᔭᐅᔪᓄᑦ, ᒪᓕᒐᓕᕆᔨᒃᑯᑦ ᓱᒃᑲᔪᒥ ᐃᖏᕐᕋᔭᕆᐊᖃᖅᐳᑦ ᐊᒻᒪ ᐃᓱᒪᓕᐅᕆᑦᑎᐊᕐᓗᑎᒃ ᓴᖅᑭᑎᑦᑎᓂᕐᒧᑦ ᐃᒻᒥᒃᑰᖅᑐᓂ ᑲᒪᒋᔭᖃᕐᓂᐅᔪᓂ ᑎᒥᐅᔪᓂ ᖃᐅᔨᓴᕐᓂᕐᒧᑦ ᑕᐃᒪᐃᑦᑐᒐᓚᖕᓂ ᖃᓄᐃᓐᓂᐅᔪᓄᑦ.

ᐸᓖᓯᒃᑯᑦ ᐸᐸᑦᑏᓐᓇᓪᓗᐊᖅᑎᓪᓗᒋᑦ ᐱᑕᖃᕐᓂᖏᓐᓂ ᑕᐃᒪᐃᑦᑐᓂ ᑲᑎᒪᔨᕋᓛᖑᔪᓄᑦ ᑲᑎᒪᔨᐅᔪᓄᓪᓘᓐᓃᑦ ᐱᔾᔪᑎᖃᖅᑐᒥ ᖃᐅᔨᒪᓂᕐᔪᐊᕆᔭᖏᓐᓂ ᒪᓕᒐᕐᓂ ᐊᑐᖅᑎᑦᑎᓂᐅᔪᒥ, ᑐᓴᕆᐊᖃᖅᐳᒍᑦ ᑭᒡᒐᖅᑐᐃᔨᐅᔪᓂ ᐃᓄᖕᓂ ᑲᑐᔾᔨᖃᑎᒌᖑᔪᓂᑦ, ᐃᓄᑐᖃᕐᓂ, ᐃᓄᓕᕆᔨᐅᔪᓂ ᐊᒻᒪᓗ ᓴᐳᓐᓂᐊᖅᑎᐅᔪᓂ.
ᓇᒃᓴᕐᓂᐊᖅᐳᑦ ᐱᔭᕆᐊᖃᕐᔪᐊᖅᑐᒥ ᐊᔾᔨᒌᙱᕈᓘᔭᖅᑐᓂ ᐃᓱᒪᒋᔭᐅᓂᐅᔪᓂ ᐊᒻᒪᓗ ᐊᔾᔨᒋᙱᑕᖓᓂ ᐊᑐᖁᔭᐅᓂᐅᓇᔭᖅᑐᓂ ᖃᓄᐃᓐᓂᐅᔪᓄᑦ ᑐᑭᓯᓇᖅᓯᑎᑦᑎᓪᓚᕆᖕᓂᖃᕆᐊᖃᖅᑐᓂ.

Advertisement