ᐊᑲᐅᙱᓕᐅᕈᑎ: ᐃᓕᓐᓂᐊᕐᕕᖕᒧᑦ ᐅᑎᕐᓂᖅ
ᐅᖃᖅᐳᒍᑦ: ᐅᔾᔨᖅᓱᑦᑎᐊᕐᓗᓯ ᓂᕆᐅᖕᓂᖃᑦᑎᐊᕐᓗᓯ

ᐊᐃᑉᐹᓂ ᐅᓪᓛᒃᑯᑦ, ᐃᓕᓐᓂᐊᖅᑏᑦ ᓄᓇᕗᓕᒫᒥ ᐅᑎᖅᐸᓪᓕᐊᓂᐊᖅᐳᑦ ᐃᓕᓐᓂᐊᕐᕕᐊᕈᓯᕐᓄᑦ ᕿᑲᖅᓯᒪᔪᓂ ᑕᐃᒪᙵᓂ ᒫᔾᔨ 17–ᒥ.

ᐊᖏᐸᓗᒃᑐᒥ ᐅᔾᔨᖅᓱᑦᑎᐊᕐᓂᐅᔪᒥ ᐊᒻᒪ ᓱᒃᑲᔪᒥ ᖃᓄᐃᓕᐅᕐᓂᐅᔪᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂ ᐱᓕᕆᔨᕐᔪᐊᖑᔪᓄᑦ ᓄᓇᕗᒻᒥ ᓄᕙᒡᔪᐊᕐᓇᖅᑕᖃᖅᑎᑦᑎᙱᓯᒪᕗᖅ, ᑭᓯᐊᓂ ᖃᓱᑎᑦᑎᕚᓪᓕᙱᓚᖅ ᐃᓱᒫᓗᖕᓂᐅᔪᓂ ᐊᖓᔪᖅᑳᖑᔪᓂ ᑐᕌᖅᐸᓪᓕᐊᑎᓪᓗᑕ ᐊᑐᖅᑕᐅᓚᐅᖅᓯᒪᙱᑦᑐᒥ ᐃᓕᓐᓂᐊᕐᕕᐅᑉ ᐊᕐᕌᒍᖓᓄᑦ.

ᐃᓱᓕᑦᑎᓂᐅᔪᑦ ᖁᕕᐊᓱᒍᑕᐅᓯᒪᕗᑦ ᑲᒪᓇᕐᓂᐅᔪᓂ ᐊᔾᔨᒌᙱᕈᓘᔭᖅᑐᓂ ᓄᓇᓕᐅᔪᓂ, ᐃᓕᓐᓂᐊᖅᑏᑦ ᖃᒪᓂᑦᑐᐊᕐᒥ ᐃᓕᓴᕆᔭᐅᓯᒪᓂᖓᓂ ᐅᖃᓗᒡᕕᐅᓂᐅᔪᓂ ᓄᓇᓕᖕᓄᑦ ᐅᖃᓪᓚᒡᕕᐅᔪᓄᑦ ᐃᓚᖏᓐᓂᑦ ᐅᐸᒍᓐᓇᓚᐅᙱᑦᑐᓂ ᖁᕕᐊᓱᒍᑕᐅᔪᒥ, ᐃᓚᖃᖅᖢᓂ ᓄᓇᓯᐅᑎᓂᑦ ᐃᖏᕐᕋᔭᖕᓂᐅᔪᓂ ᐱᐅᒋᔭᐅᕐᔪᐊᖅᓯᒪᔪᒥ ᐱᓕᕆᓂᐅᓪᓗᓂ ᓇᓗᓇᐃᖅᓯᓂᕐᒧᑦ ᖃᓄᐃᓐᓂᐅᔪᒥ.
ᑕᒪᒃᑭᑦ ᐊᕐᕌᒎᔪᒥ ᐃᓱᓕᑦᑎᔪᑦ ᐅᐱᒋᔭᐅᓪᓗᐊᖅᐳᑦ ᖄᖏᐅᑎᓂᖏᓐᓂ ᐊᖏᔪᒻᒪᕆᐊᓗᖕᓂ ᐊᒃᓱᕈᕈᑕᐅᔪᓂᑦ ᐱᔭᕇᖅᓯᓂᖏᓐᓂ ᐃᓕᓐᓂᐊᕐᓂᖓᓐᓂ ᖃᕋᓴᐅᔭᑎᒍᑦ.

ᐃᓕᓐᓂᐊᕐᕕᑦ ᑕᐅᑦᑐᖓ ᐊᔾᔨᒋᙱᐊᕐᔪᖕᓂᐊᖅᐳᖅ ᐃᓱᒪᒋᔭᖃᕐᓂᖅᓴᐅᔪᒥ ᐅᖓᓯᒌᒋᐊᖃᕐᓂᐅᔪᒥ ᐊᒻᒪ ᐊᖏᒡᓕᒋᐊᖅᑐᒥ ᓴᓗᒪᑎᑦᑎᓂᐅᔪᒥ ᐃᓕᓐᓂᐊᖅᑎᓄᑦ, ᐃᖅᑲᓇᐃᔭᖅᑎᓄᑦ ᐊᒻᒪ ᐃᓂᒋᔭᐅᔪᓄᑦ. ᑲᑎᓐᓂᐅᔪᑦ ᑭᒡᓕᖃᖅᑎᑕᐅᓂᐊᖅᐳᑦ ᐊᒻᒪ ᓂᕆᓂᕐᓂ ᐊᒻᒪ ᐃᒥᕐᓂᐅᔪᓂ ᐱᔪᓐᓇᖅᑎᑕᐅᔾᔮᙱᓚᑦ, ᑭᒡᓕᖃᖅᑎᑦᑎᔪᒥ ᓂᕈᐊᒐᒃᓴᐅᔪᓂ ᖃᓄᐃᓐᓂᐅᔪᓄᑦ ᓲᕐᓗ ᐃᓕᓐᓂᐊᕐᕕᖕᓂ ᐅᓪᓛᕈᒻᒥᑕᕐᓂ ᐅᕝᕙᓘᓐᓃᑦ ᐊᓯᖏᓐᓂ ᓂᕆᕕᒡᔪᐊᖅᑎᑦᑎᓂᐅᔪᓂ ᐊᒻᒪ ᖁᕕᐊᓱᒍᑕᐅᔪᓄᑦ.

ᑕᐃᒪᐃᒃᑲᓗᐊᖅᑎᓪᓗᒍ, ᐅᑎᕐᓂᕐᒧᑦ ᑭᓱᑐᐃᓐᓇᒧᑦ ᐃᒃᐱᖕᓇᖅᑐᒥ ᑕᐃᒪᐃᑉᐸᓚᐅᕐᓂᖓᓄᑦ ᐊᒥᓱᓂ ᒪᒃᑯᒃᑐᓂ ᐊᒻᒪ ᐊᖓᔪᖅᑳᑦ ᖁᕕᐊᑉᐳᑦ ᐊᑐᕐᓂᐊᕐᓂᖏᓐᓂ.

ᐸᕐᓇᐅᑎᑦ ᐃᓕᓐᓂᐊᖅᑎᓂᑦ, ᐃᓕᓴᐃᔨᓂᑦ, ᐊᒻᒪ ᓄᓇᓕᖕᓂ ᐊᑦᑕᓇᔾᔭᐃᖅᓯᒪᓂᕐᒧᑦ ᐋᖅᑭᒃᓱᖅᑕᐅᓯᒪᔪᒥ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖓᓐᓂ (CPHO) ᐊᒻᒪᓗ ᐃᓕᓐᓂᐊᖅᑐᓕᕆᔨᒃᑯᓐᓂ ᑕᒪᒃᑭᐅᒪᕗᑦ, ᐅᓂᒃᑳᕆᓯᒪᔪᒥ ᐱᓕᕆᕙᓪᓕᐊᓂᐅᔪᓂ ᓇᐃᓴᐅᓯᖅᓯᒪᔪᓄᑦ ᐊᑕᐅᓯᕐᒥ ᑎᓴᒪᓄᑦ ᐆᔭᐅᔭᕐᒥ (ᐊᐃᑦᑐᑦᑕᐅᓯᒪᓂᖃᙱᑦᑐᓄᑦ) ᐊᐅᐸᖅᑐᒧᑦ (ᓄᓇᓕᖕᓂ ᐊᐃᑦᑐᐃᓂᐅᔪᒧ).
ᑕᒪᕐᒥᒃ ᓄᓇᓄᒻᒥ ᓄᓇᓕᐅᔪᑦ ᒫᓐᓇᐅᔪᒥ ᐱᓕᕆᓂᕐᒥ ᐊᑕᐅᓯᕐᒦᑉᐳᑦ.

ᐱᓕᕆᓂᕐᒥ ᐊᑕᐅᓯᕐᒦᑎᓪᓗᒋᑦ, ᐃᓕᓐᓂᐊᕐᓂᐅᔪᑦ ᐃᖏᕐᕋᐃᓐᓇᕈᓐᓇᖅᐳᑦ ᑕᒪᒃᑭᓄᑦ ᐃᓕᓐᓂᐊᖅᑎᐅᔪᓄᑦ ᐃᓕᓐᓂᐊᕐᕕᐊᕈᓯᕐᓂ ᐅᓪᓗᓕᒫᒥᑦ, ᐃᓕᓐᓂᐊᖅᑐᓕᕆᔨᒃᑯᑦ ᐅᖃᖅᐳᑦ “ᑭᓯᐊᓂ ᓄᓇᓕᖕᒥ ᓇᓗᓇᐃᖅᑕᐅᒍᓂ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖓᓐᓂ ᐊᖏᒡᓕᒋᐊᖅᓯᒪᓂᖃᕈᓂ ᐅᓗᕆᐊᓇᕐᓂᖓᓂ ᓄᕙᒡᔪᐊᕐᓇᖅ-19–ᒥ ᐊᐃᑦᑐᐃᓂᐅᔪᒥ, ᐃᓕᓐᓂᐊᕐᕖᑦ ᒪᑐᐃᖓᐃᓐᓇᕐᓂᐊᖅᐳᑦ.”

ᑕᒪᓐᓇ ᐱᐅᔫᕗᖅ. ᐊᑐᐃᓐᓇᖃᒐᔪᖕᓂᕐᒥ ᐃᓕᓐᓂᐊᕐᕕᖕᓄᑦ ᐅᑎᖅᑎᕆᓂᐊᖅᐳᖅ ᐱᔭᕆᐊᖃᓪᓚᕆᒃᑐᒥ ᐱᓕᕆᐊᖑᓂᐅᔪᓂᑦ ᐊᑐᖅᑕᐅᕐᔪᐊᖅᓯᒪᔪᓄᑦ ᓄᖑᑲᓴᒃᖢᑎᒃ ᖄᖏᖅᓯᒪᔪᓄᑦ ᖃᔅᓯᐊᕐᔪᖕᓂ ᑕᖅᑭᐅᔪᓂᑦ ᐊᒥᓱᓄᑦ ᖃᓂᒻᒪᓐᓇᐅᔪᒥ ᐅᔾᔨᖅᓱᕆᐊᖃᕐᓂᐅᔪᓂᑦ.

ᐃᓕᓐᓂᐊᕐᕖᑦ ᒪᑐᑎᓪᓗᒋᑦ, ᑕᒪᕐᒥᒐᓚᑦ ᐅᓪᓛᕈᒻᒥᑕᕐᒥ ᐱᓕᕆᐊᖑᔪᑦ ᓄᖅᑲᓚᐅᕆᕗᑦ. ᒪᐃᒥ, ᓄᓇᕗᒻᒥ ᑐᓴᒐᒃᓴᓕᕆᔨᒃᑯᑦ ᐅᖃᖃᑎᖃᓚᐅᖅᐳᑦ ᔭᐃᓴᓐ ᕉᓵᓐᒧᑦ, ᐃᓚᖃᖅᖢᓂ ᑲᑎᙵᓂᐅᔪᓂ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᓂᑦ, ᐊᐅᓚᑦᑎᓚᐅᖅᐳᑦ ᐃᖃᓗᖕᓂ ᐅᓪᓛᕈᒻᒥᑕᒥ ᐴᖅᓯᒪᓂᐅᔪᓄᑦ ᐱᓕᕆᐊᖑᔪᒥ. ᑲᑎᙵᓂᐅᔪᑦ ᑐᓐᓂᖅᓴᐃᕙᓚᐅᖅᐳᑦ 250–ᐸᓗᖕᓂ ᓂᕿᓂᑦ ᐴᖅᓯᒪᔪᓂᑦ ᐅᓪᓗᑕᒫᒥ ᐊᒻᒪᓗ ᒪᐃ 20–ᒥ, $76,000–ᐸᓗᖕᓂ ᐊᑐᖅᑕᐅᓯᒪᕗᑦ ᐅᓪᓛᕈᒻᒥᑕᕐᒧᑦ ᐱᓕᕆᐊᖑᔪᒥ ᐅᕘᓇ ᓇᖕᒥᓂᕆᔭᐅᔪᓂ ᐊᒻᒪ ᑎᒥᖁᑕᐅᔪᓂ ᑐᓐᓂᖅᑯᓯᐊᖑᔪᓂᑦ.

ᐊᓯᐊᓂ ᐱᕚᓪᓕᕈᑕᐅᔪᒥ ᐃᓄᑐᖃᕐᓂ ᐅᑎᕐᓂᖏᓐᓄᑦ ᐃᓕᓐᓂᐊᕐᕕᖕᓄᑦ, ᐊᑦᑕᓇᙱᑦᑐᒥ ᐱᓕᕆᓂᐅᔪᒥ, ᖃᐅᔨᒪᔭᒥᓂᑦ ᐅᖃᐅᓯᖃᕐᓂᕐᒧᑦ ᐊᒻᒪ ᐊᑐᕐᓂᑯᖏᓐᓂ ᑕᒪᒃᑭᓂ ᐃᓕᓐᓂᐊᕐᕕᐊᕈᓯᕐᓂ ᐊᒻᒪᓗ ᓄᓇᒥᑦ.

ᐃᓕᓐᓂᐊᕐᕕᖕᒦᑎᓪᓗᒋᑦ, ᒪᒃᑯᒃᑐᖁᑎᕗᑦ ᐱᔪᓐᓇᖅᐳᑦ ᐱᒻᒪᕆᐅᔪᓂ ᐊᔪᙱᓐᓂᐅᔪᓂ ᐱᔭᕆᐊᖃᖅᑕᖏᓐᓂ ᐃᒻᒥᖕᓂᒃ ᐋᖅᑭᒃᓱᐃᓂᕐᒧᑦ ᐱᓕᕆᑦᑎᐊᕈᓐᓇᕐᓂᕐᒧᑦ.

“ᐊᓯᔾᔨᖅᓯᔪᓐᓇᕈᒪ ᐊᑕᐅᓯᑐᐊᒥᒃ ᐃᓕᓐᓂᐊᕐᓂᓕᕆᓂᕐᒥ ᓄᓇᕗᒻᒥ, ᑕᒪᒃᑭᓕᒫᑦᑎᐊᑦ ᐃᓕᓐᓂᐊᕐᕕᖕᒧᑦ–ᐅᑭᐅᓕᖕᓂ ᓱᕈᓯᕐᒥ ᐃᓕᓐᓂᐊᕆᐊᖅᐸᖕᓂᖏᓐᓂ ᖃᐅᑕᒫᖑᔪᒥ. ᓇᓂᓯᔪᓐᓇᕈᑦᑕ ᑕᐃᒪᐃᑎᑦᑎᓂᕐᒧᑦ, ᐊᔾᔨᙳᐊᖓ, ᐅᒃᐱᕈᓱᒃᐳᖓ, ᐊᖏᔪᒥᒃ ᐊᓯᔾᔨᕋᔭᖅᐳᖅ ᐅᖃᐅᓯᖃᕐᓂᕐᒥ ᐱᓕᕆᑦᑎᐊᕈᓐᓇᕐᓂᑦᑎᓐᓂ ᐊᒻᒪᓗ ᐅᖃᐅᓯᖃᕐᓂᕐᒥ ᑮᓇᐅᔭᓕᐅᕈᓐᓇᕐᓂᕐᒧᑦ, ᖃᖓᒃᑲᓂᐅᓛᖅᑐᒥ,” ᐅᖃᓚᐅᖅᐳᖅ ᐊᕐᕕᐊᑦ ᐅᐊᖕᓇᒥ–ᑎᑭᕋᕐᔪᐊᕐᒧᑦ ᒪᓕᒐᓕᐅᖅᑎ ᔮᓐ ᒪᐃᓐ ᒫᔾᔨ 2020–ᒥ ᐊᐱᖅᓱᖅᑕᐅᓂᐅᔪᒥ.

ᑖᓐᓇ ᓂᕆᐅᖕᓂᐅᔪᖅ ᓄᑖᙳᕆᐊᖅᐳᖅ ᒫᓐᓇᐅᔪᒥ, ᑭᓯᐊᓂ ᐃᓚᖃᖅᖢᓂ ᐊᖏᓂᖅᓴᐅᔪᒥ ᐅᔾᔨᖅᓱᑦᑎᐊᕐᓂᐅᔪᒥ.

ᐊᖓᔪᖅᑳᑦ, ᐃᓕᓐᓂᐊᖅᑏᑦ, ᐃᓕᓴᐃᔩᑦ, ᒐᕙᒪᒃᑯᓐᓂ ᐱᓕᕆᔨᕐᔪᐊᖑᔪᓄᑦ ᓴᖑᓴᕋᐃᑦᑑᔭᕆᐊᖃᖅᐳᑦ ᐊᒻᒪ ᐃᑲᔪᖅᓱᐃᓗᑎᒃ ᐃᒻᒥᖕᓄᑦ ᑭᐅᓂᑦᑎᓐᓄᑦ ᐊᓯᔾᔨᖅᐸᓪᓕᐊᔪᒥ ᖃᓄᐃᓕᖓᓂᐅᔪᒥ.

ᐊᒡᒐᑎᑦ ᐅᐊᓴᐃᓐᓇᖅᐸᒡᓗᒋᑦ – ᐊᒻᒪ ᐊᑦᑕᓇᙱᑦᑐᒥ ᐊᒻᒪ ᖁᕕᐊᓇᖅᑐᒥ ᐃᓕᓐᓂᐊᕐᕕᖕᒥ ᐊᕐᕌᒍᖃᕆᔅᓯ.

Advertisement