ᐃᓄᓕᒫᑦ ᑳᒃᐳᑦ ᓄᓇᕗᒻᒥ ᓴᓇᐅᒐᐅᔪᓂ

78

ᖃᐅᑕᒫᖅᓯᐅᑎᓄᑦ ᑕᑖᓗᐊᒧᑦ, ᐊᔪᕐᓇᖅᐳᖅ ᐃᖅᑲᐅᒪᓂᕐᒥ ᐊᔪᙱᓐᓂᐅᔪᒥ ᓄᓇᓕᖕᓂ ᐊᖏᕐᕋᕆᔭᐅᔪᓄᑦ ᐃᓕᖅᑯᓯᐅᔪᒥ ᐃᓕᓐᓂᐊᕐᓂᖓ ᐱᓕᕆᓂᖃᕈᓐᓇᕐᓂᖓᓂ ᐊᓯᔾᔩᔪᓐᓇᕐᓂᖓᓂ ᐃᓄᖕᒧᑦ ᓄᓇᕗᒻᒥᐅᖑᔪᒥ ᐃᓅᓯᖓᓐᓂ, ᐊᒻᒪᓗ ᑐᓂᓯᓂᖓᓐᓂ ᐃᒻᒥᓂᒃ ᐅᒃᐱᕆᓱᒍᓐᓇᕐᓂᖓᓂ ᓴᖅᑭᔮᖅᑎᑦᑎᓂᕐᒧᑦ ᓄᓇᕐᔪᐊᒥ ᖁᙱᐊᕐᕕᐅᔪᒧᑦ.

ᑕᒪᓐᓇ ᐅᓂᒃᑳᖅᑐᐊᖑᕗᖅ ᕕᒃᑐᐊᕆᐊ ᖃᑯᖅᑎᓐᓂᕐᒧᑦ ᕕᒃᑐᐊᕆᐊᐅᑉ ᐅᑭᐅᖅᑕᖅᑐᒥ ᐊᓐᓄᕌᓕᐊᖏᓐᓄᑦ (VAF), ᐃᓚᐅᖃᑕᐅᓚᐅᖅᑐᒥ ᖃᓄᐃᑦᑑᓂᖓᓂ ᒥᖅᓱᕐᓂᕐᒧᑦ ᐃᓕᓐᓂᐊᕐᓂᐅᔪᒥ ᐅᖃᐅᓯᐅᒐᔪᒃᑐᒥ ᐅᑯᓇᓂ ᒪᒃᐱᖅᑐᒐᐅᔪᓂ. ᐅᕙᑦᑎᓐᓄᑦ ᐅᖃᓚᐅᖅᐳᖅ ᐃᓕᑦᑎᓂᕐᒥ ᐱᖅᑯᓯᑐᖃᖅᑎᒍᑦ ᖁᓕᑦᑕᐃᔭᓕᐅᕆᐅᕐᓂᕐᒥ ᐊᓕᐊᓇᐃᓚᐅᖅᐳᖅ, ᐊᒻᒪ ᐊᒥᓱᒃᑲᓐᓂᕐᓂ ᓴᓇᔪᒪᓕᓚᐅᖅᐳᖅ.

ᐊᕐᕌᒍᓂ 7-ᓂ ᑕᐃᒪᙵᓂ ᑲᖏᖅᖠᓂᕐᒥ ᐃᓕᓐᓂᐊᕐᓂᐅᓚᐅᖅᑐᒥ, ᖃᑯᖅᑎᓐᓂᖅ ᐆᒃᑐᕈᓘᔭᖅᓯᒪᕗᖅ, ᐊᒃᓱᕈᖅᓯᒪᓪᓗᓂ, ᐊᒻᒪᓗ ᐃᕙᓗᓯᓯᒪᓪᓗᓂ ᒥᖅᑯᑎᒐᓴᓂᑦ. ᕕᒃᑐᐊᕆᐊᐅᑉ ᐅᑭᐅᖅᑕᖅᑐᒥ ᐊᓐᓄᕌᓕᐊᖏᓐᓄᑦ ᓴᓇᐅᒐᖏᑦ ᓇᒥᑐᐃᓐᓈᖅᑰᔨᓕᖅᐳᑦ, ᐃᖃᓗᖕᓂ ᐱᓗᐊᖅᑐᒥ, ᒪᑐᐃᖅᓯᓚᐅᖅᑎᓪᓗᒍ ᓂᐅᕕᕐᕕᖕᒥ ᐊᕐᕌᒍᑦ ᒪᕐᕉᖕᓂ ᑐᖔᓂ.

ᐃᖃᓗᖕᓂ ᐱᒃᑲᐅᒋᔭᐅᓪᓗᓂ, ᐱᕐᔪᐊᖑᓂᖅᓴᐅᕗᖅ ᐱᓐᓇᕆᔭᐅᓂᖓᓂ ᓄᓇᕐᔪᐊᓕᒫᒥ, ᖃᑯᖅᑎᓐᓂᖅ ᑕᐃᒪᐃᓚᐅᕐᓂᖓᓂ ᑕᑯᒃᓴᐅᑎᑦᑎᓪᓗᓂ ᓴᓇᐅᒐᖏᓐᓂ ᐱᐊᕆᔅᒥ ᐊᓐᓄᕌᓕᐊᓄᑦ ᐱᓇᓱᐊᕈᓯᖓᓐᓂ.

ᖄᒃᑲᓐᓂᐊᒍᑦ ᐃᓚᐅᖃᑕᐅᓂᖓᓂ ᑕᑯᒃᓴᐅᑎᑕᐅᓂᐅᔪᒥ ᓴᖅᑭᑉᐸᓪᓕᐊᔪᓄᑦ ᐊᔪᙱᓐᓂᐅᔪᓄᑦ, ᐃᓚᐅᖃᑎᖃᓚᐅᖅᐳᖅ ᐊᓯᖏᓐᓂ ᓄᓇᖃᖅᑳᖅᓯᒪᔪᓄᑦ ᓴᓇᔨᐅᔪᓄᑦ ᑲᓇᑕᓕᒫᒥ ᑕᑯᒃᓴᐅᑎᑦᑎᓂᐅᔪᒧᑦ, ᑕᐃᑲᓂ ᐹᖅᓯᓚᐅᖅᐳᖅ ᓄᕗᔭ9 ᒪᓕᓴ ᐊᑕᒍᑦᓯᐊᕐᒥ ᐋᑐᕚᒥᐅᑕᖅ, ᐃᖃᓗᖕᒥᐅᑕᒃᓴᔭᐅᓪᓗᓂ.

ᐱᐊᕆᔅᒥ ᑕᑯᒃᓴᐅᑎᑦᑎᓂᖃᖅᑐᑐᐊᖑᓇᓱᖕᓇᓂ, ᖃᑯᖅᑎᓐᓂᖅ ᓇᒃᓴᓚᐅᖅᐳᖅ ᐊᓐᓄᕌᓂᒃ ᑕᑯᒃᓴᐅᑎᑦᑎᓂᐊᖅᑐᓂ ᐃᓄᖕᓂ ᓄᓇᕗᒻᒥ ᐊᒻᒪ ᐱᐅᓴᐅᑎᖏᓐᓂ ᓄᓇᕗᒻᒥ ᓴᓇᔭᐅᓂᑰᔪᓂᑦ. ᐊᒻᒪ ᐱᕈᖅᓴᐃᓂᕐᒧᑦ ᐊᑐᕐᓂᕆᓚᐅᖅᑕᒥᓂᑦ, ᐃᒻᒥᓂᒃ ᐊᒻᒪ ᐊᑕᒍᑦᓯᐊᖅ ᐅᑎᓚᐅᖅᐳᑦ ᐃᖃᓗᖕᓄᑦ ᑕᑯᒃᓴᐅᑎᑦᑎᓂᕐᒧᑦ ᐊᑐᓚᐅᖅᑕᒥᓂᑦ ᐃᓂᒃᓴᐃᕈᔾᔭᐅᓯᒪᔪᒥ ᑕᑯᒃᓴᐅᑎᑕᐅᓂᐅᔪᒥ, ᓱᓕᓂᐅᔪᖅ ᐱᔪᒪᓂᐅᔪᒥ ᐃᑲᔪᖅᓱᐃᓂᕐᒧᑦ ᐊᖏᕐᕋᖓᓐᓂ ᓴᓇᔭᐅᔪᓂ ᓴᓇᐅᒐᓕᕆᔨᐅᔪᓄᑦ.

ᑐᓂᒃ ᑕᐃᒻᒥ ᐅᐸᒃᓯᒪᔪᑦ ᖁᕕᐊᓚᐅᖅᐳᑦ ᑕᑯᓂᕐᒥ ᑐᒃᑐᕋᔭᖕᓂ ᐊᓐᓄᕌᓕᐊᖑᔪᓂᑦ ᐃᒍᑉᑕᖅ ᐊᐅᑐᑦ ᐊᓈᓇᖓᑕ ᓴᓇᓚᐅᖅᓯᒪᔭᖕᓐᓂ ᐊᕐᕌᒍᑦ 20-ᓂ ᖄᖏᖅᓯᒪᓕᖅᑐᓂ, ᐱᒃᑲᓐᓂᑕᐃᓐᓇᓚᐅᖅᑕᖏᓐᓂ ᐊᕐᕌᒍᒐᓴᓂ ᑐᖅᑯᖅᑕᐅᓯᒪᓚᐅᖅᑎᓪᓗᒋᑦ ᐱᖃᓐᓇᕆᔭᖓᑕ ᐃᒡᓗᖓᓂ.

CBC-ᒥ ᓈᓚᐅᑎᒃᑯᑦ ᓈᓚᒃᑎᐅᔪᑦ ᑲᓇᑕᓕᒫᒥ ᕿᓚᒻᒥᐅᔪᒥ ᑐᓴᕋᓐᓈᖃᑦᑕᓛᓕᖅᐳᑦ ᓂᐱᐅᔪᓂ ᓄᓇᕗᒻᒥ ᓂᔾᔮᑎᑦᑎᓂᐅᔪᒧᑦ ᐱᓇᓱᐊᕈᓯᐅᔪᒥ ᑖᒻ ᐸᐅᕗᕐ, ᐅᖃᖅᑎᐅᔪᖅ ‘q-ᒥ‘, ᑲᒪᒋᔭᖃᓚᐅᖅᑐᒥ ᒪᕐᕈᖓᓂ ᐊᕐᕌᒍᑕᒫᒥ ᖃᓄᐃᓕᐅᕐᓂᐅᔪᒥ, ᑐᓴᕋᓐᓈᕐᓂᖃᓚᐅᖅᑐᒥ ᖃᓄᐃᓐᓂᐅᔪᒥ ᓈᓚᐅᑎᒃᑰᖅᑕᐅᓂᐊᖅᖢᓂ ᐱᓇᓱᐊᕈᓯᐅᔪᒥ ᒪᐃ 13-ᒥ.

ᐊᒻᒪ ᑭᓇ ᐳᐃᒍᕈᓐᓇᖅᐸ ᒫᓐᓇᓕᓴᐅᔪᒥ ᐊᑭᑦᑐᕋᐅᑎᓂᒃᑯᑦ ᓂᐅᕕᖅᑕᐅᓂᖓᓂ ᕿᓐᓄᐊᔪᐊᖅ ᐋᓯᕙᐅᑉ ᑲᒪᓇᖅᑐᖅ ᐅᒃᐱᒡᔪᐊᒥ ᑎᑎᕋᐅᔭᒐᖓᓐᓂ, ᑲᓇᑕᒥ ᖁᑦᑎᓛᖑᓂᐅᓚᐅᖅᑐᒥ $217,000-ᒥ?

ᐃᓕᖅᑯᓯᖅ ᐱᔪᒪᔭᐅᕐᔪᐊᖅᐳᖅ ᑲᓇᑕᒥ, ᐊᒻᒪ ᐱᕕᒃᓴᖅᑕᖃᖅᐳᖅ ᓄᓇᕗᒻᒥᐅᓄᑦ ᓴᓇᐅᒐᓕᕆᔨᐅᔪᓄᑦ ᐊᔪᙱᓐᓂᖃᖅᑐᓂ ᐊᒻᒪ ᐱᔪᒪᓂᖃᖅᑐᓂ ᐋᖅᑭᒋᐊᖅᓯᒃᑲᓐᓂᕐᓂᖏᓐᓂ ᓴᓇᐅᒐᖏᓐᓂ ᐊᒻᒪ ᐱᕈᖅᓴᐃᓗᑎᒃ ᐱᔪᒪᓂᐅᔪᒥ ᐱᓕᕆᐊᖏᓐᓄᑦ.

ᐊᔪᕐᓇᖅᑑᙱᓚᖅ ᑕᐃᒪᐃᑦᑕᕆᐊᒃᓴᖅ ᓵᙵᓂᖃᖅᑎᓪᓗᒋᑦ ᓱᓕᓂᐅᔪᓄᑦ ᖃᐅᑕᒫᖑᔪᒥᑦ. ᐱᓕᕆᙱᒃᑲᓗᐊᕈᕕᑦ ᐊᔪᖅᓴᕐᓂᐅᔪᒥ, ᐊᖏᕐᕋᒃᓴᖃᙱᓗᐊᕐᓂᕐᒧᑦ, ᓂᕿᒃᓴᖃᑦᑎᐊᙱᓐᓂᕐᒧᑦ, ᐋᖓᔮᕐᓇᖅᑐᓂ ᐊᑲᐅᙱᓕᐅᕈᑕᐅᔪᓄᑦ, ᐅᕝᕙᓘᓐᓃᑦ ᐊᑐᕐᓂᕐᓗᒃᑕᐅᓂᑯᓂ ᐱᓂᕐᓗᖕᓂᑰᔪᓄᑦ, ᐅᑯᐊ ᐃᓅᖃᑎᒌᖕᓂᕐᒧᑦ ᐃᓱᒫᓘᑕᐅᔪᑦ ᐊᒃᑐᐃᓲᖑᕗᑦ ᑕᒪᒃᑭᓂ ᓄᓇᕗᒻᒥᐅᓂᑦ. ᐃᔅᓴᓲᖑᕗᑦ ᐃᓅᓯᑦᑎᓐᓄᑦ ᐊᒻᒪ ᐊᒃᓱᕈᖅᑎᑦᑎᓪᓗᑎᒃ ᐱᔪᓐᓇᕐᓂᑦᑎᓐᓂ ᐃᖏᕐᕋᑎᑦᑎᓂᐅᔪᒧᑦ ᐱᐅᓯᒋᐊᖅᑎᑦᑎᓂᕐᒧᑦ ᐃᓅᓯᑦᑎᓐᓂ.

ᐱᓕᕆᓂᖃᕈᒪᒍᕕᑦ, ᖃᐅᔨᒪᒋᑦ ᑎᑭᐅᑎᔭᒃᓴᐅᓂᖓᓂ. ᕼᐋᒻᓚᐅᔪᑦ, ᒐᕙᒪᐃᑦ, ᐊᒻᒪ ᑮᓇᐅᔾᔭᒃᓴᓂᐅᙱᑦᑐᒧᑦ ᐱᓕᕆᔨᐅᔪᑦ ᐃᑲᔪᖅᓱᐃᔪᒪᕗᑦ ᐃᓄᑐᐃᓐᓇᕐᓂ ᐊᒻᒪ ᑲᑎᙵᓂᐅᔪᓂ ᐊᖏᔪᓂ ᐱᓕᕆᐊᕆᔭᐅᔪᒪᔪᓄᑦ, ᐃᓚᖓᒍᑦ ᐃᓱᒪᓂᖃᙱᓐᓂᖏᓐᓂ ᐅᕝᕙᓘᓐᓃᑦ ᐱᔪᓐᓇᕐᓂᖃᙱᓐᓂᖏᓐᓂ ᐱᑎᑕᐅᓂᖏᓐᓄᑦ. ᑕᐃᑲᓂ ᓴᖅᑭᑎᑦᑎᔨᐅᔪᑦ ᐃᓯᓲᖑᕗᑦ.

ᑕᒪᑦᑖᓗᒃ ᓇᓂᓯᔾᔮᙱᓚᒍᑦ ᐱᓕᕆᑦᑎᐊᕐᓂᐅᔪᒥ ᕕᒃᑐᐊᕆᐊ ᖃᑯᖅᑎᓐᓂᖅᑎᑐᑦ ᐅᕝᕙᓘᓐᓃᑦ ᕿᓐᓄᐊᔪᐊᖅ ᐋᓯᕙᒃᑎᑐᑦ, ᑭᓯᐊᓂ ᐊᑐᓂ ᐃᑲᔪᖅᓱᐃᔪᓐᓇᖅᐳᒍᑦ ᐃᓱᒪᓂᕐᒥ ᖃᓄᖅ ᓄᓇᕗᑦ ᐱᐅᒃᑲᓐᓂᕈᓐᓇᕐᓂᖓᓂ, ᐅᕝᕙᓘᓐᓃᑦ ᐃᑲᔪᖅᓱᐃᓂᕐᒥ ᑕᐃᒃᑯᓂᖓ ᐃᓱᒪᓕᐊᖑᔪᓄᑦ.