ᐊᐱᕆᔭᐅᖕᒪᑦ ᓱᖕᒪᑦ ᓴᓇᙳᐊᖅᑕᖏᑦ ᑎᖕᒥᐊᙳᐊᖑᒐᔪᖕᒪᖔᑕ - ᒪᕐᕉᒃ ᑎᓴᒪᐅᔪᓂᑦ ᓴᓇᙳᐊᖅᑕᖏᓐᓂᒃ 2023-ᒥᑦ ᑭᙵᕐᓂᑦ ᐊᕐᕌᒍᑕᒫᑦ ᑎᑎᕋᐅᔭᖅᓯᒪᔪᓂᒃ ᑲᑎᑕᐅᔪᓂᑦ ᑕᑯᒃᓴᐅᑎᑕᐅᓚᐅᖅᑐᑦ ᐅᑭᐊᒃᓵᖅ ᓄᓇᑦᑕ ᓱᓇᒃᑯᑖᖏᑦ ᑕᑯᔭᒐᒃᓴᖃᕐᕕᖕᒥᑦ ᐃᖃᓗᖕᓂᑦ ᑎᖕᒥᐊᙳᐊᖑᓚᐅᖅᑐᑦ - ᐊᑭᓱᒃ ᑭᐅᓚᐅᖅᑐᖅ, “ᐊᑖᑕᑦᑎᐊᕋ ᓴᓇᙳᐊᖃᑦᑕᓚᐅᖅᑐᖅ ᑎᖕᒥᐊᓂᒃ, ᑕᒪᐃᓐᓇᒧᑦ ᐃᓱᒪᔪᖓ ᐊᑖᑕᑦᑎᐊᒻᓂᑦ ᐱᓯᒪᔭᕋ. ᐅᕙᑉᑎᖕᓂᕐᒥᐅᑕᙳᓚᐅᖅᑐᖅ ᐃᒻᒪᖄ ᑎᓴᒪᓂᒃ ᐅᑭᐊᖃᖅᑎᓪᓗᖓ, ᐊᒻᒪᓗ ᐱᕈᖅᓴᓚᐅᖅᑐᖓ ᑕᒡᕙᐅᖃᑎᒋᑉᓗᒍ ᐃᓅᔪᖕᓃᕐᒪᑦ ᑭᓯᐊᓂ. ᐃᓱᒪᒋᓕᕌᖓᑉᑯ, ᓱᖁᑎᒋᓗᐊᓚᐅᖏᑕᒃᑲ ᓴᓇᙳᐊᒐᖏᑦ ᐅᕝᕙᓘᓐᓃᑦ ᓴᓇᙳᐊᖅᑕᖏᑦ [ᓱᕈᓯᐅᑉᓗᖓ]… ᑎᖕᒥᐊᙳᐊᑐᐃᓐᓇᐅᓚᐅᖅᑐᑦ [ᐅᕙᒻᓄᑦ], ᓇᓗᓇᐃᔭᕐᓂᖃᓗᐊᖏᖦᖢᑎᒃ, ᐃᓛᓐᓂᒃᑯᑦ ᐃᓱᒪᓲᖑᔪᖓ ᑕᐅᑐᓚᐅᖏᑕᒃᑲ… ᐃᓱᒪᒋᖃᑦᑕᖅᑕᕋ ᐃᑲᔪᖃᑦᑕᓚᐅᕐᓂᖓ ᐊᖏᕐᕋᑉᑎᖕᓂᑦ ᓂᕆᔭᒃᓴᖃᖅᑎᖦᖢᑕ [ᓂᐅᕕᐊᒃᓴᕆᑉᓗᒋᑦ ᓴᓇᙳᐊᖅᑕᖏᑦ]. ᐃᓛᓐᓂᒃᑯᑦ ᐃᓱᒪᖃᑦᑕᖅᑐᖓ ᐃᑲᔪᖅᑖᖓ. ᐃᓛᓐᓂᒃᑯᑦ ᖃᐅᔨᒪᖃᑦᑕᓚᐅᖏᑦᑐᖓ ᓱᓇᓕᐅᕐᓂᐊᕐᒪᖔᕐᒪ [ᑎᑎᕋᐅᔭᕆᐊᓕᕌᖓᒪ], ᑎᑎᕋᕐᕕᒋᓂᐊᖅᑕᕋ ᓱᓇᑕᖃᙱᖦᖢᓂ.
“ᐃᖅᖃᐅᒪᔪᖓ ᓯᕗᓪᓕᖅᐹᒥᑦ ᑎᑎᕋᐅᔭᕋᒪ ᐃᓚᖓᓐᓂᑦ ᑎᖕᒥᐊᙳᐊᓕᐅᖅᓯᒪᔭᖏᓐᓂᑦ. ᐱᖓᓱᒋᓚᐅᖅᑕᖓ ᑎᑎᕋᐅᔭᖅᑕᕐᒪ. ᐊᑎᓕᐅᓚᐅᖏᑕᕋ. ᓂᐅᕕᕐᕕᖕᒧᙵᐅᑎᑐᐃᓐᓇᓚᐅᖅᑕᕋ ᐊᒻᒪᓗ [ᓂᐅᕕᕐᕕᓕᒃ] ᐃᓕᑕᕆᑲᐅᑎᒋᓚᐅᖅᑕᖓ. ᑕᐃᓚᐅᖅᑕᖓ ‘ᓚᑦᓴᓘᓯᐅᑉ ᑎᖕᒥᐊᖏᑦ.’ ᖃᑕᙳᑎᒃᑲ ᐊᒻᒪᓗ ᐃᓄᐃᑦ ᐃᑲᔪᖃᑦᑕᕐᓗᒋᑦ ᖁᕕᐊᒋᔭᕋ, ᓄᑕᖅᖃᒃᑲᑐᐃᓐᓇᐅᖏᑦᑐᖅ ᐅᕙᒻᓂᓪᓘᓐᓃᑦ, ᑕᐃᒪᓐᓇᒧᑦ ᐃᓛᓐᓂᒃᑯᑦ ᐃᓱᒪᖃᑦᑕᖅᑐᖓ [ᐊᑖᑕᑦᑎᐊᕐᒪ] ᐃᑲᔪᖅᑖᖓ.”
ᐊᑲᔪᕐᓂᖓ ᑐᑭᓕᐅᖅᓯᒪᔪᖅ ᓄᓇᕐᔪᐊᕐᒧᑦ ᐱᐊᓂᑦᑎᐊᖅᓯᒪᓂᖅ ᐊᑭᓱᒃ ᐅᑎᓵᓚᐅᖅᖢᓂ ᐱᖓᖕᓇᖓᓂᑦ ᕿᑭᖅᑖᓗᖕᒥᑦ ᐃᓄᐃᑦ ᑯᐊᐸᒃᑯᑦ 50-ᒋᓕᖅᑕᖓᓂᒃ ᐅᑭᐅᖃᓕᕐᓂᖓᓄᑦ ᖁᕕᐊᓲᑎᖃᕐᓂᖅ ᐱᒋᐊᖅᑎᑕᐅᓂᖓᓂᑦ ᒪᐃᐋᒥᒥ ᑕᖅᕿᐅᓚᐅᖅᑐᒥᑦ, ᑕᑯᒃᓴᐅᑎᑕᐅᑉᓗᓂ ᓴᓇᙳᐊᖅᑎᐅᓂᖓᓄᑦ ᐅᒃᑯᐃᖅᓯᑎᓪᓗᒋᑦ ᑲᓇᑕ ᒎᔅ-ᑯᑦ ᓂᐅᕕᕐᕕᖓᓐᓂᑦ ᓄᓇᓕᐸᐅᔭᕐᒥᑦ. ᖁᕕᐊᓲᑎᖃᕐᓂᐅᓚᐅᖅᑐᖅ ᐱᓕᕆᖃᖅᖢᑎᒃ ᑯᐊᐸᒃᑯᓐᓂᑦ, ᐃᓚᖏᓐᓂᒃ ᓴᓇᙳᐊᖅᑕᖏᓐᓄᑦ ᑮᓇᐅᔭᒃᑯᑦ ᐃᑲᔪᖃᑦᑕᖅᑐᖅ.
“ᐅᒃᐱᕐᓇᙱᑦᑎᐊᖅᑐᖅ ᓱᓕ, ᐱᐊᓂᒃᓯᒪᓕᕋᓗᐊᖅᑎᓪᓗᒍ… ᐅᐱᑦᑎᐊᓚᐅᖅᑐᖓ. ᐃᒡᓚᕈᑎᒋᑐᐃᓐᓇᖃᑦᑕᖅᑕᕋ ᐃᓛᓐᓂᒃᑯᑦ ᐃᓱᒪᓚᐅᖅᓯᒪᙱᓐᓇᒪ ᑕᐃᒪᓐᓇᐃᓕᐅᕈᒫᕋᒪ. ᖁᒃᓴᓱᒃᑕᐃᓕᓚᐅᖅᑐᖓ [ᑕᑯᒃᓴᐅᑎᖃᖅᑎᓪᓗᒋᑦ].
“ᐱᒋᐊᖅᐸᓪᓕᐊᓕᕋᒪ, ᖃᐅᔨᒪᓚᐅᖏᑦᑎᐊᖅᑐᖓ ᑎᑎᕋᐅᔭᕐᓂᐊᕋᒪ. ᐅᖃᖃᑦᑕᖅᑐᖓ [ᑎᑎᕋᐅᔭᓕᕈᒪ] ᖃᓄᐃᖓᓂᐊᕐᓂᖓ ᐋᖅᕿᖕᓂᐊᖅᑐᖅ. ᖃᓄᐃᖓᓂᖓ ᐊᔾᔨᒋᙱᑦᑎᐊᖃᑦᑕᖅᑕᖓ.
ᐃᒪᓐᓇᐅᖅᖃᐅᑕᐅᓚᐅᖅᑐᖅ, ᐊᑭᓱᒃ ᓯᓚᑦᑐᖅᓴᕐᕕᖕᒧᙵᐅᓚᐅᖅᑐᖅ ᐃᓕᓴᐃᔨᙳᕐᓂᐊᕐᓗᓂ. ᐃᓕᓴᖅᑕᐅᑎᓪᓗᒍ ᐊᒻᒪᓗ ᐃᓕᓴᖅᑐᓂᑦ ᑎᑎᕋᐅᔭᖃᑦᑕᓚᐅᖅᑐᖅ ᑐᐸᒃᓯᒪᔪᒪᑉᓗᓂ. ᓴᓇᙳᐊᖅᑎᐅᖃᑎᖓ ᐃᓕᓴᖅᑐᓂᑦ ᐃᑲᔪᖅᑐᐃᖏᓐᓇᖃᑦᑕᓚᐅᖅᑐᖅ ᐊᔪᙱᓐᓂᕆᔭᖓᓄᑦ, ᐊᒻᒪᓗ ᐊᑐᕐᓂᐊᖅᑕᖏᓐᓂᒃ ᓂᐅᕕᕆᐊᖅᑎᓕᖅᖢᒍ. ᐃᓕᓴᕐᕕᖕᒥᑦ, ᐊᑭᓱᒃ ᖁᕕᐊᒋᓚᐅᖏᑕᖓ ᑎᑎᕋᐅᔭᕐᓂᕐᒥᒃ ᐃᓕᓴᕐᓂᖅ ᐅᕝᕙᓘᓐᓃᑦ ᐊᔪᙱᓐᓂᖓᓄᑦ ᓇᓗᓇᐃᒃᑯᑕᖅᑖᕈᑎᒋᑉᓗᒍ ᐃᓕᓴᕐᓂᖓᓄᑦ.
“ᖃᖓᑐᐃᓐᓇᖅ ᐃᓅᓯᒻᓂᑦ ᐃᓱᒪᓚᐅᖅᓯᒪᙱᑦᑐᖓ ᓴᓇᙳᐊᖅᑎᐅᓂᐊᕋᒪ… ᐃᓕᓵᓂᓵᖅᑐᑐᐃᓐᓇᐅᖏᑦᑐᖓ [ᓯᓚᑦᑐᖅᓴᕐᕕᖕᒥᑦ] ᐃᓕᓴᐃᔨᐅᓂᕐᒧᑦ, ᓴᓇᙳᐊᖅᑎᙳᓚᐅᖅᑐᖓ ᐊᒻᒪᓗ ᐃᓕᓴᐃᔨᙳᕐᓗᖓ,” ᐅᖃᖅᑐᖅ.
ᐊᑭᓱᒃ ᐃᓕᓴᐃᓚᐅᖅᑐᖅ 2020-ᒥᑦ, ᓄᖅᖃᕐᒪᑦ ᐃᓕᓴᐃᔨᐅᓂᖅ ᖁᕕᐊᒋᔪᖕᓃᓚᐅᕐᒪᒍ.
“ᑕᐃᑲᓃᓐᓂᖅ ᐊᔪᓚᐅᖅᑐᖓ ᐱᐅᓛᒃᑯᑦ ᐱᓕᕆᔪᖕᓇᖅᑕᒻᓂᒃ ᐊᔪᓚᐅᕋᒪ. ᓈᒻᒪᓚᐅᖏᑦᑐᖅ ᐃᓕᓴᖅᑎᓄᑦ.”
ᑕᐃᑲᙵᑦ ᓴᓇᙳᐊᖅᑎᙳᓚᐅᖅᑐᖅ ᐊᑕᐅᑦᑎᒃᑯᑦ ᐅᑉᓘᑉ ᐃᓚᖓᓂᑦ ᐃᖅᖃᓇᐃᔮᖃᖅᖢᓂ ᐃᖅᖃᖅᑐᐃᕝᕕᖕᒥᑦ ᑭᙵᕐᓂᑦ ᐊᒻᒪᓗ ᓄᑕᖅᖃᖏᑦ ᑲᒪᒋᑉᓗᒋᑦ.
ᐃᓄᐃᑦ ᓴᓇᙳᐊᖅᑎᙳᖅᓴᔪᓄᑦ, ᐊᑭᓱᒃ ᐅᖃᐅᔾᔨᔪᖅ “ᐅᖓᑎᓗᐊᖓᓄᑦ ᐃᓱᒪᑦᑕᐃᓕᒋᐊᕐᓗᑎᑦ ᓱᓇᓕᐅᕐᓂᐊᕐᒪᖔᖅᐱᑦ.” ᐅᖃᖅᖢᓂᓗ ᐱᒻᒪᕆᐅᓂᖓᑕ ᓴᓇᙳᐊᖅᑎᒧᑦ ᐃᖕᒥᖕᓂᒃ ᐅᒃᐱᕆᓗᑎᒃ ᐊᒻᒪᓗ ᓇᖕᒥᓂᖅ ᐊᔪᙱᓐᓂᕆᔭᖏᓐᓂᒃ ᓄᖅᖃᖅᑕᕈᑎᑕᖃᕋᓗᐊᖅᑎᓪᓗᒍ.
“ᐱᐊᓂᙱᒃᑲᓗᐊᕈᕕᑦ ᐆᒃᑐᒃᑲᓐᓂᕈᖕᓇᖅᑐᑎᑦ. ᐃᓚᒋᔭᐅᔪᖅ ᐃᓅᓯᕐᒧᑦ. ᖃᐅᔨᓗᒍ ᖃᓄᐃᓕᐅᕆᐊᖃᕐᒪᖔᖅᐱᑦ ᐊᔾᔨᒋᙱᑖᒍᑦ, ᐃᓕᑦᑎᓯᒪᑐᐊᕈᕕᑦ ᐊᔪᕈᑕᐅᓚᐅᖅᑐᓄᑦ,” ᐅᖃᐅᔾᔨᔪᖅ.
ᓯᕗᓂᒃᓴᒧᑦ ᐊᒻᒪᓗ ᐱᓕᕆᐊᓄᑦ ᐱᑕᖃᕐᓂᐊᖅᑐᓄᑦ, ᐊᑭᓱᒃ ᐅᖃᓗᐊᓚᐅᖏᑦᑐᖅ.
“ᖃᐅᔨᓂᐊᖅᐳᒍᑦ. ᐅᖃᐅᓯᕆᓂᖅ ᐊᓕᐊᓇᐃᒋᓗᐊᖃᑦᑕᙱᑕᕋ ᐸᕐᓇᐅᑕᐅᔪᑦ ᐊᓯᐊᙳᖃᑦᑕᕐᒪᑕ. ᖃᐅᔨᒋᐊᖏᓐᓇᕐᓗᓯ ᖃᓄᐃᓕᐅᓕᕐᒪᖔᕐᒪ. ᓱᓇᑐᐃᓐᓇᒥᒃ ᑐᓴᖅᑎᑦᑎᔾᔮᖏᑦᑐᖓ ᑭᓯᐊᓂ [ᐱᙳᕐᓂᐊᓕᖅᐸᑦ].”
ᖃᐅᔨᒃᑲᓐᓂᕈᖕᓇᖅᑐᑎᑦ ᐊᑭᓲᑉ ᐱᓕᕆᐊᖏᓐᓂᒃ “ᑎᑎᕋᐅᔭᖅᑏᑦ”-ᒥᑦ ᐅᕙᓂ dorsetfinearts.com.