Skip to content

NHL-ᑯᓐᓂ ᓴᐳᔾᔨᔨᒧᑦ ᖃᐃᖁᔭᐅᔪᕕᓂᐅᖕᒪᑕ ᐊᑖᑖᒋᑦ ᐃᕐᓂᖏᓪᓗ ᑭᐊᒍᕆᒥᐅᑦ ᕼᐊᑭᖅᑎᖏᓐᓄᑦ

ᒪᒃᑲᓚᐅᑦ ᐊᕐᓇᑦᓯᐊᖅ ᓯᕗᓪᓕᖅᐹᒥ ᓂᐅᕈᓯᒪᓚᐅᕐᒪᑦ ᓄᓇᓕᐸᐅᔭᒧᑦ ᑎᓯᐱᕆᐅᓚᐅᖅᑐᒥ, ᑭᐊᓪᒍᕆᒥᐅᑦ ᕼᐊᑭᖅᑎᖏᑕ ᓴᐳᔾᔨᔨᖓᓄᑦ ᑐᕌᕕᔅ ᕼᐊᒪᓂᒃᒧᑦ ᖃᐃᖁᔭᐅᒐᒥᒃ ᖃᖓᑦᑕᐅᑎᒃᓴᖏᓐᓂᒃ ᓇᒃᓯᐅᔾᔨᕕᐅᓪᓗᑎᒃ ᓄᑲᑯᓗᓂᓗ ᓇᒃᓴᕈᓐᓇᒻᒪᕆᒃᖢᓂᐅᒃ ᑖᓐᓇ ᓇᐅᔮᒥᐅᓂᒃ ᐳᓛᕆᐊᖁᔨᓐᓂᕐᒪᑦ ᑭᐊᒍᕆᒧᑦ.

Calgary Flames ᕼᐊᑭᖅᑎᖏᑕ ᓴᐳᔾᔨᔨᖓ ᑐᕌᕕᔅ ᕼᐊᒪᓂᒃ, ᐅᕙᓂ ᑕᑯᒃᓴᐅᔪᖅ ᐊᑎᓕᐅᕆᑎᓪᓗᒍ ᐊᔾᔨᖑᐊᒥᓂᒃ, ᑎᒍᒥᐊᖅᑕᐅᔪᒥᒃ ᓇᐅᔮᒥᐅᓄᑦ ᓄᑲᕇᖕᓄᑦ ᐸᑲᒃᒧᑦ ᒪᑲᓚᐅᑦᒧᓪᓗ ᐃᒫᓂᐅᐊᓪ ᐅᑕᐅᑉ ᐃᕐᓂᖏᓐᓄᑦ ᑭᐊᒍᕆᒥ ᓂᐅᕈᓯᒪᑎᓪᓗᒋᑦ ᐊᒻᒪᓗ NHL-ᑯᑦ ᕼᐊᑭᖅᑎᓪᓗᒋᑦ ᑕᑯᔭᖅᑐᖅᑎᑕᐅᓚᐅᕐᒪᑕ ᐊᖅᑯᑎᖃᖅᖢᑎᒃ ᑐᕌᕕᔅ ᕼᐊᒪᓂᒃ ᓄᓇᓕᖕᓂ ᐱᓕᕆᐊᖓᓂᒃ.

ᑑᒑᓕᒃ ᐃᓕᓴᕐᕕᒃᔪᐊᖓᓂ ᐊᖓᔪᖅᑳᖓᑕ ᑐᖓᓕᖓ ᔫᓕᐊ ᒪᒃᕘᓴᓐ ᐅᖃᓚᐅᖅᑐᖅ ᐳᑭᖅᑕᓕᒧᑦ ᑐᓴᖅᑎᑕᐅᒐᒥ ᑳᓐᓯᑕᐳᓪ ᑐᕆᕗ ᒎᓯᐃᒧᑦ ᑕᒪᑐᒥᖓ ᐱᔭᐅᔪᓐᓇᖅᑐᒥᒃ.

“ᐃᓛᓐᓂᒃᑯᑦ ᑖᓐᓇ ᐊᔾᔨᐅᖏᑦᑐᓂᒃ ᖃᐅᔨᒪᓱᖑᖕᒪᑦ ᑐᓴᖅᑕᕕᓂᕐᒥᓂᒃ ᑕᑯᔭᕕᓂᕐᒥᓂᒃᓗ ᐅᓂᒃᑳᖅᐸᒃᖢᓂ ᓇᒥᑐᐃᓐᓇᖅ ᑕᑯᑎᑉᐸᖕᒫᖓ ᐱᒃᑯᒥᓇᖅᑐᓂᒃ ᐃᓕᓴᖅᑎᓄᑦ,” ᐅᖃᓚᐅᖅᑐᖅ ᒪᒃᕘᓴᓐ.

ᕼᐊᒪᓂᒃ, ᓇᖕᒥᓂᖅ ᐊᓪᓚᐃᖓᔫᓪᓗᓂ ᐱᖅᑯᓯᑐᖃᕐᒥᓂᒃ ᐅᐱᒍᓱᖕᒪᑦ ᐊᒃᓱᐊᓗᒃ ᑕᐃᓱᒪᓂ ᐱᖅᑯᓯᐅᕙᔪᔪᓂᒃ, ᐊᒻᒪᓗ ᐊᐃᑉᐸᖓ ᓯᑎᕚᓂ ᐊᐅᓚᑦᑎᔨᐅᖕᒪᑕ ᑐᕌᕕᔅ ᕼᐊᒪᓂᒃ ᓄᓇᓕᖕᒥᐅᓂᒃ ᐱᓕᕆᐊᖓᓂᒃ ᓄᓇᖃᖅᑳᖅᑐᓄᑦ ᒪᒃᑯᑦᑐᓄᑦ ᐊᑐᖅᑕᐅᔪᓐᓇᖅᑐᒥᒃ ᐊᕐᕌᒍᓕᖕᓂᒃ 6-ᒥᑦ 17-ᒧᑦ. ᖃᖓᑦᑕᐅᑎᑖᖅᑎᑦᑎᔪᓐᓇᕐᒪᑦ ᑕᑯᔭᖅᑐᕈᒪᔪᓂᒃ ᕼᐊᑭᖅᑐᓂᒃ ᒪᕐᕉᖕᓄᑦ, ᐅᓐᓄᐊᕐᓂᒃ ᒪᕐᕉᖕᓂᒃ ᑐᔪᕐᒥᕕᖏᓐᓂᒃ ᐊᑭᓖᓪᓗᓂ, $750-ᒥᒃ ᑐᓂᓪᓗᓂᒋᓪᓗ ᐊᐅᒃᑕᔫᒥᒃ, ᓂᕆᑎᓗᓂᒋᑦ, ᐱᖑᐊᕆᐊᖅᑐᖅᑎᖢᓂᒋᑦ ᒪᕐᕉᖕᓂᒃ ᐃᓯᕈᓐᓇᐅᑏᖕᓂᒃ ᐊᑖᓂ ᕼᐊᑭᕐᕕᐅᑉ ᖃᓂᓐᓂᖅᓴᓂ ᐃᒃᓯᕙᐅᑕᖃᕐᓗᑎᒃ, ᕼᐊᒪᓂᒃ ᐊᑎᖓᓂᒃ ᑎᑎᕋᖃᖅᑐᒥᒃ ᑭᐊᑎᑖᖅᖢᑎᒃ, ᐊᒻᒪᓗ ᐱᖃᑎᖃᕈᓐᓇᖅᖢᑎᒃ ᐅᓐᓄᒃᓴᓕᒫᒥᒃ ᕼᐊᒪᓂᒃᒥᒃ.

“ᑕᐃᓯᓚᐅᖅᑐᖓ ᐃᒻᒪᖄ 15-ᓂᒃ ᐃᓕᓴᖅᑎᓂᒃ. ᐃᓱᖃᖏᑦᑐᒧᑦ ᐱᔪᓐᓇᕋᓗᐊᖅᑐᖓ … ᑕᒪᐃᑕ ᐅᓂᒃᑳᓕᐅᕆᐊᖃᓚᐅᕋᒃᑭᑦ ᓇᐃᑦᑐᒥᒃ ᑕᐃᔭᒃᑲ. ᓇᒃᓯᐅᑎᓪᓗᒋᓪᓗ ᕼᐊᒪᓂᒃᒧᑦ,” ᒪᒃᕘᓴᓐ ᐅᖃᕆᓪᓗᓂ.

ᐊᑐᓂ ᐊᐱᖅᓱᖅᓯᒪᔪᒥᒃ ᐊᑕᐅᓯᕐᒥᒃ ᑭᐅᓯᒋᐊᖃᓚᐅᖅᑐᑦ: “ᕼᐊᑭᖅᑎᐅᓪᓗᓂ ᖁᕕᐊᓇᖅᑐᒥᒃ ᐃᓱᒪᓇᓱᐊᕆᐊᖃᕐᓇᕐᒪᑦ ᐱᔭᕆᑐᔪᖅᓯᐅᖅᖢᓂ. ᐊᑏ ᑎᑎᕋᕈᓐᓇᖅᐲᑦ ᖃᓄᐃᑦᑐᒥᒃ ᐃᓕᖕᓄᑦ ᖁᕕᐊᓇᖅᑐᒥᒃ ᐃᓱᒪᒋᔭᖃᖅᖢᓂ ᐃᓅᓯᕐᒥᓄᑦ ᐊᑭᓯᔪᓐᓇᓚᐅᕐᓂᖅᐸ.”

ᓄᑕᕋᐅᓪᓗᓂ ᕼᐊᒪᓂᒃ ᓇᖕᒥᓂᖅᑕᐅᖅ ᐊᑖᑕᓂ ᐊᓯᐅᔨᓐᓂᕐᒪᒍ ᖁᓕᓂᒃ ᐅᑭᐅᖃᖅᖢᓂ, ᐅᖃᓚᐅᖅᑐᖅ ᐊᒃᓱᕈᖅᓯᒪᒐᒥᒎᖅ ᕿᒪᒃᑕᐅᖔᖅᖢᓂ, ᐊᒃᓱᕈᕐᓇᖅᑐᒻᒪᕆᐅᖕᒪᑦ.

“ᓇᖕᒥᓂᖅ ᐱᐅᔪᒥᒃ ᐊᑐᕐᓂᖃᖅᑐᒥᒃᓗ ᐋᕿᒃᓯᓇᓱᐊᖅᓯᒪᒐᒪ ᐅᕙᓐᓄᑦ ᓄᓇᕐᔪᐊᒥᐅᓄᓪᓗ. ᑕᐃᒪᓐᓇ ᐱᓇᓱᐊᒐᓕᐅᓚᐅᖅᑐᖓ ᓄᑕᖅᑲᓂᒃ ᖃᐃᖁᔨᔪᒪᓪᓗᖓ ᐊᖓᔪᖅᑳᒥᓂᒃ ᐊᓯᐅᔨᓯᒪᔪᓂᒃ - ᐊᑖᑕᒥᓂᒃ, ᐊᓈᓇᒥᓂᒃ - ᐊᒻᒪᓗ ᐊᒥᐊᒃᑰᔪᖅ ᐊᑖᑕ ᐊᓈᓇᓘᓐᓃᑦ ᐃᓚᐅᔪᓐᓇᖅᖢᓂ ᐱᖑᐊᖅᑐᓂᒃ ᕿᑐᖓᖏᑦ ᑕᐅᑐᒋᐊᖅᑐᖅᑎᓪᓗᒋᑦ ᕼᐊᑭᕐᕕᐅᓪᓗ ᐃᓗᐊᓂᒃ ᕿᒥᕈᑎᑕᐅᓂᐊᕐᓗᑎᒃ ᐊᓯᖏᓐᓄᑦ ᐃᓯᕐᕕᐅᒋᐊᖃᖏᑦᑐᓂᒃ. ᐊᒻᒪᓗ ᑲᒪᒋᔭᐅᑦᑎᐊᕐᓗᑎᒃ ᒎᓗᑎᑐᑦ ᕼᐊᒪᓂᒃᑯᑦ ᑎᒥᖁᑎᐊᓂ ᐃᖅᑲᓇᐃᔭᖅᑎᓄᑦ,” ᕼᐊᒪᓂᒃ ᐅᖃᓚᐅᖅᑐᖅ sportsnet.ca-ᑯᑦ.

ᒪᒃᕘᓴᓐ ᑎᑎᕋᓕᖅᑐᕕᓂᖅ ᐅᓂᒃᑳᖅᖢᓂ ᖃᓄᖅ ᐊᕐᓇᑦᓯᐊᒃᑯᑦ ᐊᒃᓱᕈᖅᓯᒪᓂᖏᓐᓂᒃ ᐊᓯᐅᔨᒐᒥᒃ ᐃᓚᒥᓂᒃ ᓄᑕᕋᐅᓪᓗᓂ - ᐊᓈᓇᖓ ᐃᓅᔪᓐᓃᕐᓂᕐᒪᑦ ᐊᖓᔪᖏᓪᓗ ᒪᕐᕈᒃ.

ᑕᐃᓱᒪᓂ ᐱᖓᓱᓂᒃ ᐅᓪᓗᓂᒃ ᐱᖅᓯᓚᐅᖅᑎᓪᓗᒍ ᐅᓪᓗᒥ, ᒪᒃᕘᓴᓐ ᐅᖃᓗᒃᕕᐅᔪᕕᓂᖅ ᐃᓕᓴᖅᑎᖁᑎᖓᓄᑦ ᐊᖏᕐᕋᖅᓯᒪᑎᓪᓗᒍ. ᐊᑕᐅᓯᖅ ᐃᓕᓴᖅᑎ ᑕᐃᔭᖓ ᓂᕈᐊᑦᑕᐅᓐᓂᕐᒪᑦ.

“ᐊᒃᓱᐊᓗᒃ ᖁᕕᐊᓱᓕᓚᐅᖅᑐᖓ. ᕿᐊᒻᒪᕆᒃᖢᖓ ᑕᒪᑐᒪᓂ ᐊᒃᓱᕉᑎᒋᓗᐊᓚᐅᕋᒃᑯ ᐱᓇᓱᐊᕈᑎᓪᓗᒋᑦ.” ᐅᖃᕆᓪᓗᓂ.

“ᖃᐅᔨᒪᖏᒃᑲᓗᐊᖅᖢᒍ ᑕᐃᓱᒪᓂ ᓱᓇᐅᕙ, ᒪᒃᑲᓚᐅᑦ ᓂᕈᐊᖅᑕᐅᔪᕕᓂᖅ ᐊᒻᒪᓗ ᓄᑲᖓ ᐃᓚᐅᔪᓐᓇᕆᓪᓗᓂ.”

ᒪᒃᕘᓴᓐ ᐊᐱᕆᓕᖅᑐᕕᓂᖅ ᐃᒫᓂᐅᐊᓪᒧᑦ ᐅᑕᒃ ᐃᕐᓂᖏᓪᓗ ᒪᒃᑲᓚᐅᑦ ᐸᑲᒃᓗ ᖃᐃᖁᓐᓂᖅᖢᓂᒋᑦ ᐃᓕᓴᕐᕕᖕᒧᑦ ᐅᓐᓄᒃᑎᓪᓗᒍ, ᑕᒪᑐᒪᓂ ᐅᖃᓗᒃᕕᐅᓂᐊᕐᒪᑕ ᕼᐊᒪᓂᒃᒧᑦ.

“ᐊᒃᓱᐊᓗᒃ ᖁᕕᐊᓱᓕᓚᐅᖅᑐᒍᑦ ᐊᓕᐊᓇᖅᑐᒧᑦ ᑎᑭᕝᕕᐅᒐᑦᑕ.” ᐅᖃᕆᓪᓗᓂ ᒪᒃᕘᓴᓐ.

ᐊᑖᑕᒌᑦ ᐃᕐᓂᖏᓪᓗ ᓂᐅᕈᓂᐊᖅᑐᑦ ᐊᑕᐅᑦᑎᒃᑯᑦ ᑭᐊᓪᒍᕆᒧᑦ ᑎᒥᐱᕆ 15-ᒥᑦ 17-ᒧᑦ.

ᒪᑲᓚᐅᑦ ᐅᖃᕆᓪᓗᓂ ᑐᓴᕋᒥᒎᖅ ᑭᐊᒍᕆᒧᖓᐅᓂᐊᕐᓂᕐᒥᓂᒃ ᐊᒃᓱᐊᓗᒃ ᖁᕕᐊᓱᓕᖅᑐᕕᓂᖅ, ᑕᒪᑐᒪᓂᓴᐃᓐᓇᖅ ᓄᑲᖓ ᐸᑲᒃ ᐊᒃᓱᐊᓗᒃᑕᐅᖅ ᐃᓚᐅᓂᐊᕋᒥ ᖁᕕᐊᓱᓕᕐᓂᕆᓪᓗᓂ.

ᐊᑖᑕᕗᑦ ᕿᐊᓕᓚᐅᖅᑐᖅ, ᐅᖃᖅᖢᓂ ᒪᒃᑲᓚᐅᑦ.

ᖃᑕᖑᑎᒌᑦ ᐊᓱᐃᓛᒃ ᑎᑭᒻᒪᑕ ᐊᐃᔭᐅᓕᖅᑐᕕᓃᑦ ᖃᖓᑕᓲᒥᑦ ᓕᒧᓰᓐᒧᑦ ᑎᑭᒻᒪᑕ, ᐊᒻᒪᓗ ᑭᐊᒍᕆᒥᐅᑦ ᓯᐊᕆᔮᕐᕕᖓᓄᖓᐅᔭᐅᓪᓗᑎᒃ ᐱᖑᐊᓚᐅᖏᓐᓂᖏᓐᓂ ᐆᒃᑐᕋᖅᑐᓂᒃ ᑕᐅᑐᖕᓂᐊᕐᒪᑕ ᐊᒻᒪᓗ ᐊᓐᓄᕌᖅᑐᕐᕕᐊᓂ ᕼᐊᑭᖅᑎᓂᒃ ᐱᖃᑎᖃᕆᐊᖅᑐᖅᖢᑎᒃ, ᐊᒻᒪᓗ ᑕᐅᑐᒃᑎᑕᐅᓪᓗᑎᒃ ᐱᖑᐊᓕᖅᑎᓪᓗᒋᑦ.

“ᑐᓂᓚᐅᖅᑕᕗᑦ ᑐᕌᕕᔅ ᕿᓚᓗᒐᖑᐊᒥᒃ ᑑᒑᓕᖕᒥᒃ (ᓴᓇᖑᐊᒐᒥᒃ),” ᐅᖃᕆᓪᓗᓂ ᒪᒃᑲᓚᐅᑦ.

“ᐊᒻᒪᓗ ᐅᒃᐱᖑᐊᒥᒃ ᕿᓯᖏᒧᑦ ᓴᓇᓯᒪᔪᒥᒃ ᐊᒻᒪᓗ ᒥᑭᔪᓂᒃ ᑲᒥᖑᐊᑯᓗᖕᓂᒃ ᓄᓕᐊᖓᓄᑦ,” ᐅᖃᕆᓪᓗᓂ ᒪᒃᕘᓴᓐ.

ᐊᐃᑦᑖᖑᒐᓗᐊᕐᓕ ᑕᐃᓱᒪᓂ ᑭᐊᒍᕆᒥᐅᑦ ᕼᐊᑭᖅᑎᖏᑦ ᓵᓚᒋᔭᐅᓚᐅᕐᒪᑕ ᓈᔅᕕᓪᒥᐅᑦ ᕼᐊᑭᖅᑎᖏᓐᓄᑦ ᑕᐃᓱᒪᓂ ᐱᓇᓱᐊᕈᓯᐅᑉ ᐃᓱᓕᕝᕕᐊᓂ ᑖᕙᓃᑎᓪᓗᑕ, ᐅᖃᖅᖢᓂ ᒪᑲᓚᐅᑦ.