Skip to content

ᕿᑭᖅᑖᓗᑉ ᓂᒋᐊᓂ ᖃᐅᔨᒪᔭᐅᖏᑦᑐᖅ ᖃᓄᐃᓕᐅᕈᑕᐅᕙᓪᓕᐊᔪᓕᕆᔨ

ᔨᒥ ᒫᓂᖕ ᑎᑎᕋᖃᑦᑕᖅᐳᖅ ᐅᓪᓗᑕᒫᑦ ᐃᓅᓯᖅ ᖃᓄᐃᑦᑑᓂᖓᓄᑦ.

ᐊᔾᔨᓕᐅᕆᖃᑦᑕᖅᖢᓂᓗ, ᑕᕐᕆᔭᐅᑎᓕᐅᖃᑦᑕᖅᖢᓂᓗ ᐊᒻᒪ ᑎᑎᕋᖃᑦᑕᖅᖢᓂ ᖃᓄᑐᐃᓐᓇᖅ ᑎᑎᕋᕐᕕᖕᒥᓄᑦ ᖃᓄᐃᓕᐅᕈᑕᐅᕙᓪᓕᐊᔪᓂᒃ ᖃᓄᐃᓕᐅᕈᑎᒋᕙᓪᓕᐊᔭᒥᓂᒡᓗ, ᐊᒥᓱᓪᓚᕆᐅᓪᓗᑎᒡᓗ ᑎᑎᕋᖅᐸᓪᓕᐊᔭᖏᑦ.

ᔨᒥ ᒫᓂᖕ ᐊᕐᕌᒍᓄᑦ ᐊᒥᓱᓄᑦ ᖃᐅᔨᓴᖃᑦᑕᖅᐳᖅ ᓂᐅᕕᖃᑦᑕᖅᖢᓂᓗ ᑎᑎᖅᑐᒐᕐᓂᒃ ᑯᐊᐸᒃᑯᓐᓄᑦ ᑭᓐᖓᕐᓂ. ᑎᑎᕋᖃᑦᑕᖅᓯᒪᓪᓗᓂᓗ ᐃᓅᓯᕐᒥᒃ ᐅᑭᐅᖅᑕᖅᑐᒥ ᓇᖕᒥᓂᖅ ᐊᔾᔨᓕᐅᕆᕙᒃᖢᓂ ᑎᑎᕋᖃᑦᑕᖅᖢᓂᓗ ᖃᓄᐃᓕᐅᖅᐸᓪᓕᐊᔪᓂᒃ. ᒫᓂᖕ ᓂᕈᐊᖅᑕᐅᓚᐅᖅᐳᖅ ᑲᓇᑕ ᓇᓪᓕᐅᕐᓂᖅᓯᐅᕐᕕᖓᓂ 150-ᓂᒃ ᐊᕐᕌᒍᖃᕐᓂᐊᓕᖅᑎᓪᓗᒍ “ᐅᐱᒋᔭᐅᓚᐅᖅᓯᒪᖏᓐᓂᖓᓄᑦ ᐅᐱᒋᔭᐅᓕᑕᐃᓐᓇᕐᓂᐊᖅᖢᓂ” ᐅᔭᒥᒃᑖᕐᓗᓂ ᓵᓚᒃᓴᐅᑎᒥᒃ ᓴᓇᑐ ᑎᐊᓇᔅ ᐹᑐᓴᓐᒥᑦ.

“ᑕᐃᒪᓐᓇ ᐊᔾᔨᓕᐅᕆᖃᑦᑕᖅᐳᖓ, ᐊᔾᔨᓕᐅᕆᖃᑦᑕᖅᐳᖓ,” ᒫᓂᖕ ᐅᖃᓚᐅᖅᐳᖅ ᐊᔾᔨᓕᐅᕈᑎᖃᖅᖢᓂ Nikon-ᒥᒃ ᖃᕆᑕᐅᔭᒃᑯᑦ ᐊᔾᔨᓕᐅᑲᐅᑎᒋᔪᓐᓇᖅᑐᓂᒃ. “ᐊᒻᒪ ᐅᓪᓗᑕᒫᖅ ᑎᑎᕋᖃᑦᑕᖅᐳᖓ ᐊᑐᖅᐸᓪᓕᐊᔭᓐᓂᒃ ᖃᓄᐃᓕᐅᕈᑕᐅᓚᐅᖅᑐᓂᒡᓗ, ᖃᓄᐃᓕᐅᖅᐸᓪᓕᐊᓂᖏᓐᓄᓪᓗ ᐅᑭᐅᖅᑕᖅᑐᒥ ᐊᒻᒪ ᐊᓯᖏᓐᓂᒃ.”

ᐅᖃᓕᒫᒐᓕᐅᖅᓯᒪᓕᖅᐳᖅ 12-ᖑᓕᖅᐳᑦ ᑎᑎᕋᕐᕕᒋᖃᑦᑕᖅᑕᖏᑦ, ᑎᑎᕋᖅᑕᕕᓂᖏᓪᓗ ᕿᒪᑐᐃᓐᓇᕆᐊᖃᖅᖢᓂᒋᑦ ᑐᖁᒍᓂ ᑖᒃᑯᓄᖓ ᕿᓐᓄᐊᔪᐊᒃ ᐃᓕᖁᓯᑐᖃᓕᕆᔨᒃᑯᖏᓐᓄᑦ,” ᐅᖃᓚᐅᖅᐳᖅ.

“ᑕᑯᓐᓇᖅᑎᓯᒪᕙᒃᑲ ᖃᓪᓗᓈᓂᒥᐅᑕᐃᑦ – ᐸᐸᑦᓯᔨᑦ ᐱᑐᖃᖃᕐᕕᖕᓂ – ᑕᑯᔭᖅᑐᖅᓯᒪᕗᑦ ᑖᒃᑯᓂᖓ, ᐊᒻᒪ ᒪᒃᑯᒃᑐᑦ (ᑭᓐᖓᕐᓂ) ᕿᒥᕐᕈᓯᒪᓪᓗᑎᒃ ᑎᑎᕋᖅᓯᒪᔪᓂᒃ,” ᐅᖃᓚᐅᖅᐳᖅ.

ᒫᓂᖕ ᐃᓕᑕᕆᔭᐅᓯᒪᕗᖅ ᑲᓇᑕ 150 ᓇᓪᓕᐅᕐᓂᖅᓯᐅᕐᓂᖓᓂ “ᐅᐱᒋᔭᐅᓚᐅᖅᓯᒪᖏᓐᓂᖓᓄᑦ ᐅᐱᒋᔭᐅᓕᑕᐃᓐᓇᕐᓂᐊᖅᖢᓂ” ᐅᔭᒥᒃᑖᕐᓗᓂ ᓴᓇᑐ ᑎᐊᓇᔅ ᐹᑐᓴᓐᒧᑦ.

“ᐃᓕᑕᕆᔭᐅᓂᐊᕋᓱᒋᓚᐅᖏᑉᐳᖓ,” ᐅᖃᓚᐅᖅᐳᖅ ᒫᓂᖕ.

ᐃᓕᑕᕆᔭᐅᒍᓯᐊ “ᐃᓚᒋᔭᐅᓪᓗᓂ ᐱᕙᓪᓕᐊᑎᑦᓯᓯᒪᓂᖓᓄᑦ ᑭᓐᖓᐃᑦ ᑯᐊᐸᒃᑯᖏᓐᓂᒃ,” ᐊᐅᓚᑦᓯᔨᐅᓚᐅᖅᓯᒪᓪᓗᓂ ᑭᓐᖓᐃᑦ ᓴᓇᖑᐊᕐᕕᖏᓐᓂ, ᑲᑎᒪᔨᐅᖃᑕᐅᓯᒪᓪᓗᓂᓗ ᐃᓄᐃᑦ ᑎᑎᖅᑐᒐᖏᑦᑕ ᑲᑐᔾᔨᖃᑎᒌᒃᑯᖏᓐᓄᑦ ᐊᒻᒪ ᑐᓴᐅᒪᑎᑎᔨᐅᓯᒪᓪᓗᓂ ᑭᓐᖓᐃᑦ ᑎᑎᖅᑐᒐᖅᑎᖏᓐᓄᑦ ᑭᒡᒐᖅᑐᐃᔨᐅᓪᓗᓂ.

ᓂᕈᐊᖅᑕᐅᓯᒪᓂᕐᒥᖕᓂᒃ ᐃᓕᑕᕆᔭᐅᓂᕐᒧᑦ ᑐᓴᓚᐅᖅᐳᖅ ᓄᓕᐊᒥᓂᑦ, ᐅᖄᓚᕕᐅᓚᐅᖅᑎᓪᓗᒍ ᓴᓇᑐ ᐊᓪᓚᕕᖓᓂᑦ. ᒫᓂᖕ ᑕᐃᑦᓱᒪᓂ ᖃᔭᕆᐊᒃᑯᑦ ᑭᒻᒥᕈᓕᐊᒃᓯᒪᑎᓪᓗᒍ, ᑕᐃᑲᓂ ᐃᓅᓚᐅᖅᓯᒪᖕᒪᑦ. ᐅᑎᖅᑕᖃᑦᑕᖅᓱᓂᓗ ᑭᒻᒥᕈᒻᒧᑦ ᑭᓐᖓᕐᓄᓪᓗ – 14 ᐃᑲᕋᐃᑦ ᐃᒪᒃᑯᑦ ᓯᓚᑦᓯᐊᖑᑎᓪᓗᒍ ᐅᕙᓘᓐᓃᑦ ᐅᓪᓗᖅ ᒪᕐᕉᒡᓘᓐᓃᑦ ᖃᒧᑕᐅᔭᒃᑯᑦ – ᐊᕐᕌᒍᑕᒫᑦ ᑕᑯᔭᖅᑐᖃᑦᑕᖅᓱᓂ ᐃᓚᓪᓚᕆᖕᒥᓂᒃ ᐊᐅᖃᑎᒥᓂᒃ ᐊᓯᖏᓐᓂᒡᓗ ᐃᓚᒥᓂᒃ. ᐅᓪᓗᒃᑲᓐᓂᕐᒥᒃ ᒪᕐᕉᖕᓂᓪᓘᓐᓃᑦ ᐅᓪᓗᓂᒃ ᐃᓛᓐᓂᒃᑯᑦ ᓄᖅᑲᖅᐸᓪᓗᓂ ᓄᓇᒥ ᓇᓗᓇᐃᒃᑯᑕᖃᕐᕕᐅᔪᓂ, ᑕᒪᒃᑯᐊᓗ ᑎᑎᕋᖅᐸᓪᓕᐊᓪᓗᓂᒋᑦ ᓄᓇᖑᐊᒥ ᐊᖏᔪᒥ.

ᒫᓂᑦ ᑎᒍᐊᖑᓚᐅᖅᓯᒪᓪᓗᓂ ᐊᖓᒥᓄᑦ ᑭᓐᖓᕐᓂ ᓱᕈᓯᕋᓛᖑᓪᓗᓂ. ᐊᔾᔨᓕᐅᕆᓂᕐᒧᑦ ᐱᓕᕆᐊᖃᖅᓯᒪᓪᓗᓂ ᖁᕕᐊᒋᓪᓗᓂᐅᒃ ᑕᐃᒪᓐᓇ ᐊᑖᑕᑦᓯᐊᒥᑎᑐᑦ, ᐲᑕ ᐱᑦᓯᐊᓛᒃ, ᑎᒍᐊᖅᓯᖓᑕ ᐊᓈᓇᖓᑕ ᐊᑖᑕᖓ. ᐱᑦᓯᐊᓛᒃ ᐃᖕᒥᓂᒃ ᐊᔾᔨᓕᐅᖅᑕᒥᓂᒃ ᐊᔾᔨᖑᖅᑎᑦᓯᖃᑦᑕᓚᐅᖅᓯᒪᓪᓗᓂ ᓄᓇᓕᐊᓛᑐᖃᒥᓂ.

“ᑕᑯᓐᓇᖃᑦᑕᓚᐅᖅᓯᒪᒐᒃᑯ,” ᒫᓂᖕ ᐅᖃᓚᐅᖅᐳᖅ ᐃᖅᑲᐅᒪᓪᓗᓂ. “ᐊᑖᑕᑦᓯᐊᕋ ᐅᖃᓚᐅᖅᓯᒪᓪᓗᓂᓗ ᐱᒻᒪᕆᐅᓂᖓᓄᑦ ᑎᑎᕋᖅᑕᐅᓯᒪᒋᐊᖃᕐᒪᑕ ᑭᓱᑐᐃᓐᓇᐃᑦ ᐊᔾᔨᓕᐅᖃᑦᑕᕐᓗᒋᓪᓗ ᐃᓄᐃᑦ ᓄᓇᖃᑎᒥᐅᑕᕗᑦ. ᑕᐃᒪᓐᓇ ᖁᕕᐊᒋᔭᖃᓚᐅᖅᓯᒪᓪᓗᓂ, ᑕᐃᒪᐃᓕᐅᒐᓚᒃᓯᒪᒐᒪ ᓱᓕ ᑕᐃᒪᓕᐅᖃᑦᑕᖅᓱᖓ... ᑕᒪᓐᓇ ᐅᓂᒃᑳᑦᑎᓐᓄᑦ ᐃᓚᒋᔭᐅᒋᐊᖃᕐᒪᑦ.”

ᑕᐃᑦᓱᒪᓂ ᐱᒋᐊᖓᕐᓂᖏᓐᓂ 1980, ᒫᓂᖕ ᐊᔾᔨᓕᐅᕆᖃᑦᑕᓚᐅᖅᓯᒪᕗᖅ ᑲᓚᖃᖏᑦᑐᓂᒃ ᐊᔾᔨᓂᒃ ᓇᖕᒥᓂᖅ ᐊᔾᔨᖑᐊᓕᐅᕐᕕᖕᒥᓂ. ᐃᓕᓚᐅᖅᓯᒪᓪᓗᓂᓗ ᐃᒪᖅ ᑭᓐᖓᕐᓂ ᐊᔾᔨᒋᖏᒻᒪᒍ ᐱᐅᖏᓕᖅᑎᑦᓯᔪᓐᓇᖅᖢᓂ ᐊᔾᔨᖑᐊᒃᓴᓂᒃ, ᐊᐅᐸᕈᔪᓕᖅᑎᑦᓯᔪᓐᓇᖅᖢᓂ ᕿᕐᓂᖅᑑᒋᐊᖃᖅᑐᓂᒃ.

ᒫᓐᓇ ᖃᕆᑕᐅᔭᒃᑰᕈᓐᓇᖅᑐᓂᒃ ᐊᑐᖃᑦᑕᓕᖅᐳᖅ ᑕᕐᕆᔭᐅᑎᓕᐅᖅᐸᒃᖢᓂᓗ ᐊᐅᓚᔪᓂᒃ. ᑭᒻᒥᕈᒻᒧᑦ ᐅᑎᕋᐃᖓᒥ ᑕᒪᒃᑯᓂᖓ ᐃᓄᑐᖃᐃᑦ ᐃᖅᑲᐅᒪᖏᓐᓂᒃ ᐊᐱᖅᓱᖃᑦᑕᖅᐳᖅ.

“ᐃᓐᓇᑐᖃᐃᑦ ᑲᑎᑉᐸᓪᓕᐊᑎᒐᓱᐊᖅᐸᕗᑦ ᐅᓂᒃᑳᕈᓐᓇᖁᓪᓗᒋᑦ ᖃᓄᑐᐃᓐᓇᖅ. ᐊᐅᓚᔪᓕᐅᕌᕐᔪᒍᓐᓇᓚᐅᖅᐸᒃᑲᓗ ᑕᐃᒪᐃᓕᐅᖅᑎᓪᓗᒋᑦ,” ᐅᖃᓚᐅᖅᐳᖅ, ᐊᒻᒪ ᐊᔾᔨᓕᐅᕆᓚᐅᖅᓱᓂ Super-8 ᐊᑐᖅᓱᓂ ᑕᐃᑦᓱᒪᓂᑐᖃᖅ 1970-ᓂ.

ᐱᕈᖅᓴᓚᐅᖅᓯᒪᓪᓗᓂ ᑭᓐᖓᕐᓂ, “ᑕᒪᒃᑯᐊ ᑎᑎᖅᑐᒐᐃᑦ ᐃᓱᒪᒋᖏᓐᓇᖅᐸᓚᐅᖅᐸᒃᑲ,” ᐅᖃᓚᐅᖅᐳᖅ. ᐃᖅᑲᐅᒪᓪᓗᓂᓗ ᑎᑎᖅᑐᒐᖅᑎᓂᒃ ᓴᓇᖑᐊᖅᑐᓂᒃ ᐃᓐᓇᑐᖃᐃᓂᒃ ᐅᒥᒪᐅᑎᕋᓛᓂᒃ ᐊᑐᖅᓱᑎᒃ ᓯᓚᒥ ᓴᓇᖑᐊᖅᓱᑎᒃ.

ᑯᐊᐸᒃᑯᑦ ᐃᓕᓐᓂᐊᖅᑎᑎᓚᐅᖅᐳᖅ ᑭᓐᖓᕐᓂ ᐊᒻᒪ ᑐᕌᓐᑐᒥ ᖃᓄᑎᒋ ᓴᓇᖑᐊᖅᑕᐅᔪᑦ ᐊᑭᒃᓴᖏᑦ ᓇᓗᓇᐃᖅᑕᐅᖃᑦᑕᕐᓂᖏᓐᓄᑦ. ᐊᕐᕌᒍᑦ 15 ᐊᓂᒍᖅᓯᒪᓕᖅᑎᓪᓗᒋᑦ ᓂᐅᕕᖃᑦᑕᖅᓯᒪᓪᓗᓂ ᑎᑎᖅᑐᒐᕐᓂᒃ, ᐊᐅᓚᑦᓯᔨᐅᓕᓚᐅᖅᓯᒪᕗᖅ, ᑕᐃᒪᓐᓇ ᐃᖅᑲᐃᔮᕆᓯᓕᖅᓱᓂᐅᒡᓗ ᐊᕐᕌᒍᑦ 25 ᐅᖓᑖᓄᑦ.

ᓄᖅᑲᖅᐸᓪᓕᐊᓇᓱᐊᓚᐅᖅᐳᖅ ᐊᕐᕌᒎᓯᒪᓕᖅᑐᓂ ᐊᐅᓚᑦᓯᔨᖑᖁᔭᐅᓕᓚᐅᖅᓱᓂ ᑯᐊᐸᒃᑯᑦ ᓂᐅᕕᕐᕕᖏᑦᑕ ᐊᐅᓚᑕᐅᓂᖏᓐᓄᑦ ᑭᓐᖓᕐᓂ. ᐊᖏᓚᐅᖅᓱᓂᓗ. “ᖁᕕᐊᒋᑦᓯᐊᖅᐸᕋ. ᐅᖃᓪᓚᒍᒪᒃᑲᐅᓪᓗᖓᓄ ᐃᓄᖕᓄᑦ,” ᐅᖃᓚᐅᖅᐳᖅ.

ᑎᑎᖅᑐᒐᖃᑦᑕᖅᓯᒪᕗᖅ ᐃᖕᒥᓂᒃ, ᐊᒥᓱᓕᐅᖃᑕᐅᓪᓗᓂᓗ ᑎᑎᖅᑐᒐᖅᓯᒪᔪᓂᒃ ᓴᓇᖑᐊᖅᓯᒪᓪᓗᓂᓗ ᓇᖕᒥᓂᖅ ᐊᕐᕌᒎᓯᒪᓕᖅᑐᓂ -ᖃᒧᓯᐅᕈᒪᒃᑲᐅᓪᓗᓂᓗ ᖃᔭᖅᑐᕈᒪᒃᑲᐅᓪᓗᓂᓗ – ᑭᓯᐊᓂ ᐊᔾᔨᓕᐅᕆᓂᖅ ᖁᕕᐊᒋᓛᕆᓪᓗᓂᐅᒃ. ᐊᑖᑕᖓᑕ ᐊᔾᔨᓕᐅᕈᑎᕕᓂᖓᓂᒃ ᐊᔾᔨᓕᐅᑲᐅᑎᒋᔪᓐᓇᖅᑐᒥᒃ ᓱᓕ ᐱᓯᒪᕗᖅ ᐊᒻᒪ ᐱᑐᖃᒥᓂᒃ Kodak Instamatic.

“ᖃᓪᓗᓈᑦ ᓄᓇᖓᓐᓄᑦ ᐊᐅᓪᓚᖅᑎᓚᐅᖅᓱᒋᑦ ᑭᓯᐊᓂ ᐊᔾᔨᖑᖅᑎᑕᐅᖃᑦᑕᓚᐅᖅᐳᑦ ᑐᕌᓐᑐᒧᑦ. ᐊᑯᓂᐅᖃᑦᑕᓚᐅᖅᓯᒪᓪᓗᓂᓗ ᐅᑎᕌᖓᑕᓗ, ᐳᐃᒍᖅᐸᒃᓱᑕ ᓱᓇᓂᒃ ᐊᔾᔨᓕᐅᕆᓚᐅᕐᒪᖔᑦᑕ,” ᐅᖃᓚᐅᖅᐳᖅ, ᑎᑦᓯᒍᓱᒃᓱᓂ.

ᐊᒥᓱᑦ ᑕᐃᑦᓱᒪᓂᑐᖃᒥᐅᑕᐃᑦ ᐊᔾᔨᖑᐊᖅ ᒪᓐᑐᕆᔮᒦᑉᐳᑦ ᒫᓐᓇ ᖃᕆᑕᐅᔭᒃᑯᑦ ᑕᑯᓐᓇᒐᒃᓴᖑᕈᓐᓇᖅᑎᑕᐅᓪᓗᑎᒃ.

“ᑖᒃᑯᐊ ᐱᓕᕆᐊᒃᑲ, ᖃᓄᐃᒃᓴᖏᑦᓯᐊᖅᐳᖓ ᐊᑐᖅᑕᐅᒍᒪᒃᐸᑕ (ᐊᔾᔨᖑᐊᑦ) ᓱᕈᓯᑦ ᐅᖃᓕᒫᒐᒃᓴᖏᓐᓄᑦ, ᐊᒻᒪ ᕚᓐᑯᕙᒦᖔᖅᓯᒪᓪᓗᑎᒃ ᐊᓯᖏᓐᓂᒡᓗ, ᐄ,” ᐅᖃᓚᐅᖅᐳᖅ.