Skip to content

ᓱᓕᓪᓚᕆᒃᖢᑎᒃ ᓴᕆᒪᓱᒃᑐᑦ

ᐃᓕᓐᓂᐊᖅᑏᑦ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ (VSS) ᐃᒡᓗᓕᒑᕐᔪᖕᒥ ᑭᖑᕙᑲᓴᓚᐅᖅᐳᑦ ᐱᔪᓐᓇᖃᑕᐅᓂᕐᒧᑦ ᑕᒪᑐᒪᓂ ᐊᕐᕌᒍᒥ ᑭᕙᓪᓕᕐᒥ ᐊᕕᒃᑐᖅᓯᒪᓂᐅᔪᒥ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ ᐱᓕᕆᓂᐅᔪᒧᑦ ᐱᓕᕆᐊᖑᓚᐅᖅᑐᒥ ᑲᖏᖅᖠᓂᕐᒥ ᐱᓇᓱᐊᕈᓯᐅᑉ ᓄᙳᐊᓂᐅᓚᐅᖅᑐᒥ.

ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑦᑎᓚᐅᖅᐳᖅ ᑲᖏᖅᖠᓂᕐᒥ ᕕᕈᐊᕆ 28-ᖑᑎᓪᓗᒍ, ᐊᒻᒪᓗ ᐃᓕᓐᓂᐊᖅᑎᐅᔪᑦ ᐱᖓᓲᔪᓂᑦ ᖁᑦᑎᓛᖑᔪᓂᑦ ᐱᓕᕆᐊᖏᓐᓄᑦ ᐊᕕᒃᑐᖅᓯᒪᓂᐅᔪᒧ ᑕᑯᒃᓴᐅᓂᐅᔪᒨᖅᐸᓪᓕᐊᓕᓚᐅᖅᐳᑦ ᑲᖏᖅᖠᓂᕐᒧᑦ ᐅᓪᓗᑦ ᒪᕐᕉᒃ ᐊᓂᒍᖅᑎᓪᓗᒋᑦ ᒫᔾᔨ 2-ᒥ.

ᒪᑲᔭᒃ ᒥᒥᓕᐊᒃ ᐊᒻᒪ ᐅᐃᓕ ᑲᓂᒐᑦᓯᐊᖅ ᐱᖓᔪᖓᓐᓂ ᓵᓚᖃᓚᐅᖅᐳᑦ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ ᖃᐅᔨᓴᕐᓂᕐᒧᑦ ᐱᓕᕆᓂᖓᓄᑦ ᓄᓇᓕᖕᓂ ᐃᓕᓐᓂᐊᕐᕕᐅᑉ ᖃᔭᕐᓄᑦ ᐱᓕᕆᐊᖑᔪᒥ ᐃᒡᓗᓕᒑᕐᔪᖕᒥ ᕕᕈᐊᕆ 28-ᖑᑎᓪᓗᒍ.

ᖁᑦᑎᓛᑦ ᐱᖓᓱᑦ ᐃᒡᓗᓕᒑᕐᔪᖕᒥ ᐱᔭᕇᖅᑐᑦ ᐅᑯᐊᖑᓚᐅᖅᐳᑦ ᑖᓄᑦ ᒪᓕᓐᔅ ᓯᕗᓪᓕᐅᓪᓗᓂ ᐱᓕᕆᐊᖓᓂ ᐱᖅᑯᓯᑐᖃᖅᑎᒍᑦ ᐃᑰᑕᕐᒥ, ᐹᑉ ᑲᔾᔪᒃ ᒪᕐᕈᒋᔭᐅᓪᓗᓂ ᖃᐅᔨᓴᕐᓂᖓᓄᑦ ᒪᒃᑕᕐᒥᑦ ᐊᒻᒪᓗ ᑕᑯᓂᕐᒧᑦ ᐊᒃᑐᐃᓂᐅᔪᓂᑦ ᓂᕆᕙᖕᓂᑦᑎᓐᓄᑦ ᓂᕿᑦᑎᐊᕙᖕᓂᑦ ᐃᓅᑉ ᑎᒥᖓᑕ ᐆᓇᕐᓂᖓᓂ ᐊᒻᒪ ᑎᓪᓕᕐᓂᖓᑕ ᓱᒃᑲᓂᖓᓂ ᐊᒻᒪᓗ ᑲᑎᙵᓂᐅᔪᑦ ᒪᑲᔭᒃ ᒥᒥᓕᐊᒃ ᐊᒻᒪ ᐅᐃᓕ ᑲᑎᒐᑦᓯᐊᖅ ᐱᖓᔪᒋᔭᐅᓪᓗᑎᒃ ᖃᐅᔨᓴᕐᓂᖏᓐᓄᑦ ᐱᓕᕆᓂᖏᓐᓂ ᓄᓇᓕᐅᔪᒥ ᐃᓕᓐᓂᐊᕐᕕᐅᑉ ᖃᔭᓕᐅᕐᓂᕐᒧᑦ ᐱᓕᕆᐊᖑᔪᒥ.

ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᖃᐅᔨᓴᕐᓂᕐᒧᑦ ᐃᓕᓴᐃᔨᖓ ᒋᓕᓐ ᐳᕌᑯᓪᐹᖕᒃ ᐅᖃᓚᐅᖅᐳᖅ ᒪᓕᓐᔅ ᐊᐱᕆᓚᐅᖅᐳᖅ ᐃᓄᑐᖃᕐᒥ ᖃᓄᖅ ᓴᓇᓲᖑᓂᖏᓐᓂ ᐃᑰᑕᕐᒥᑦ, ᐊᔪᕆᖅᓱᖅᑕᐅᓪᓗᓂ, ᐊᓱᐃᓛᒃ ᓴᓇᓪᓗᓂ ᐊᒻᒪ ᑕᒻᒪᖅᑕᑲᑕᕈᓘᔭᖅᖢᓂ ᐃᑰᑕᓕᐅᕋᓱᐊᖅᑎᓪᓗᒍ.

ᐅᖃᓚᐅᖅᐳᖅ ᒪᓕᓐᔅ ᐊᓱᐃᓛᒃ ᒪᓕᒐᓱᐊᓕᖅᖢᓂ ᖃᐅᔨᓴᕐᓂᕐᒧᑦ ᐱᓕᕆᔾᔪᓯᐊᓂ ᐱᐅᓯᒋᐊᖅᑎᑦᑎᓂᕐᒧᑦ ᐃᑰᑕᖓᓂ ᐊᒻᒪᓗ ᐊᓱᐃᓛᒃ ᐱᔪᓐᓇᖅᓯᑎᖦᖢᓂᐅᒃ.

ᑖᓄᑦ ᐱᕕᒃᓴᐃᕈᑎᓚᐅᖅᐳᖅ ᖃᓄᐃᓕᐅᕈᒪᓪᓚᕆᖕᓂᖓᓄᑦ, ᑕᑯᒃᓴᐅᑎᑦᑎᓂᖓᓄᑦ ᐊᒃᓱᕈᕐᓂᖓᓂ ᐱᔭᕆᐊᖃᕐᓂᐅᔪᒧᑦ ᐃᖏᕐᕋᔪᓐᓇᕐᓂᖓᓄᑦ ᑕᐃᑐᒡᓗᒍ ᐅᐊᔭᓅᖅᑐᓄᑦ ᐃᑰᑕᐅᔪᓄᑦ,” ᐅᖃᓚᐅᖅᐳᖅ ᐳᕌᑯᓪᐹᖕᒃ. “ᖃᔭᖅᑐᖅᖢᓂ ᐊᓕᐊᓇᐃᒋᔮᓗᖓ ᐊᒻᒪᓗ ᖃᐅᔨᒪᓪᓗᓂ ᖃᔭᓕᐅᕐᓂᐊᕐᓂᑦᑎᓐᓂ, ᑕᐃᒫᒃ ᖃᐅᔨᔪᒪᓚᐅᖅᐳᖅ ᓴᓇᔭᐅᕙᓚᐅᕐᓂᖏᓐᓂ ᐊᐅᔭᓅᖅᑐᓄᑦ ᐃᑰᑕᖃᓚᐅᖅᑳᕋᑎᒃ. ᖁᔭᖅ ᐱᓕᕆᐊᖑᒐᔫᔮᓚᐅᖅᐳᖅ ᖃᐅᔨᓴᕐᓂᕐᒧᑦ ᑕᑯᒃᓴᐅᑎᑕᐅᓂᐅᔪᒥ ᑕᒪᑐᒪᓂ ᐊᕐᕌᒎᔪᒥ, ᑭᓯᐊᓂ ᖃᐅᔨᒪᙱᑦᑐᖓ ᑖᓐᓇ ᑐᕌᖓᓂᖃᕐᒪᖔᑦ ᐅᑭᐅᖅᑕᖅᑐᒥ ᑲᔪᖏᖅᓴᐃᓂᕐᒧᑦ ᓵᓚᖃᐅᓯᐊᖑᔪᒧᑦ ᖃᔭᓕᐅᕐᓂᕐᒧᑦ ᐱᓕᕆᐊᑦᑎᓐᓄᑦ.”

ᐃᓕᓐᓂᐊᖅᑎᒃᑲᓐᓂᐅᔪᒥ ᐃᓕᑦᑎᔪᒪᓚᐅᖅᐳᖅ ᖃᓄᖅ ᑐᒃᑐᑉ ᐊᒥᖏᓐᓂ ᐱᓕᕆᓲᖑᓂᖏᓐᓂ ᐅᓕᒃᓯᓂᕐᒧᑦ ᖃᔭᕐᒥᑦ ᐊᒻᒪᓗ ᐱᖓᔪᖓᓐᓂ-ᓵᓚᖃᖅᑐᖅ ᐱᔾᔪᑎᖃᓚᐅᖅᐳᖅ ᖃᓄᖅ ᐃᓄᐃᑦ ᓄᓇᓕᖏᓂ ᐃᓱᒪᒋᔭᖃᕐᓂᖏᓐᓂ ᖃᔭᓕᐅᕐᓂᕐᒧᑦ ᐱᓕᕆᐊᖑᔪᒥ, ᓴᓇᓪᓗᓂ ᐱᓕᕆᓪᓗᓂ ᐱᖓᔪᒋᔭᖓᓂ 13-ᖑᔪᓄᑦ ᐱᓕᕆᐊᖑᔪᓂᑦ ᐃᓚᐅᖃᑕᐅᔪᓂ ᑕᑯᒃᓴᐅᑎᑕᐅᓂᐅᔪᒥ ᐃᓕᓐᓂᐊᖅᑎᓂᑦ ᖁᑦᑎᖕᓂᓕᖕᓂ 9-ᒥ ᖁᑦᑎᖕᓂᓕᖕᓄᑦ 12-ᒧᑦ ᑐᕌᖓᓂᖃᖅᑐᒥ ᖃᔭᓕᐅᕐᓂᐅᔪᓄᑦ.

ᐳᕌᑯᓪᐹᖕᒃ ᐅᖃᓚᐅᖅᐳᖅ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓ ᓇᒃᓯᐅᔾᔨᔪᓐᓇᖅᑎᑕᐅᓪᓗᑎᒃ ᑎᓴᒪᓂ ᐃᓕᓐᓂᐊᖅᑎᓂᑦ ᑭᕙᓪᓕᕐᒧᑦ ᑕᑯᒃᓴᐅᑎᑦᑎᓂᐅᔪᒧᑦ ᑲᖏᖅᖠᓂᕐᒧᑦ, ᑕᐃᒫᒃ ᐃᓕᓐᓂᐊᕐᕕᒃ ᐊᐅᓪᓚᖅᑎᑦᑎᔪᓐᓇᓚᐅᖅᐳᑦ ᐱᖓᓱᓂᒃ ᐱᓕᕆᐊᖑᔪᓂᑦ, ᒪᕐᕉᒃ ᐱᓕᕆᐊᖑᔪᓂ ᐱᓕᕆᐊᖑᓪᓗᑎᒃ ᐊᑕᐅᓯᕐᒧᑦ ᐃᓕᓐᓂᐊᖅᑎᐅᔪᒧᑦ.

ᐅᖃᓚᐅᖅᐳᖅ, ᑕᐃᒪᐃᖏᓐᓇᐅᔭᖅᖢᑎᒃ, ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᐃᓕᓐᓂᐊᖅᑎᐅᔪᑦ ᐊᐅᓪᓚᓚᐅᖅᐳᑦ ᐃᒡᓗᓕᒑᕐᔪᖕᒥ ᓂᕆᐅᖕᓂᖃᕐᔪᐊᖅᖢᑎᒃ ᐱᓕᕆᐊᖏᓐᓄᑦ ᐊᕕᒃᑐᖅᓯᒪᓂᐅᔪᒥ ᑕᑯᒃᓴᐅᑎᑦᑎᓂᐅᔪᒥᑦ.

ᑕᐅᑐᒃᖢᒍ ᑕᐃᒪᐃᒐᔪᖕᓂᖓᓂ, ᐱᓕᕆᐊᖑᔪᑦ ᐃᓕᓐᓂᐊᖅᑎᑦᑕ ᐃᓚᐅᑎᑕᖏᓐᓂ ᐊᕕᒃᑐᖅᓯᒪᓂᐅᔪᒥ ᑕᑯᒃᓴᐅᑎᑦᑎᓂᐅᔪᒥ ᓵᓚᖃᕋᓱᐊᕐᓂᐅᔪᒦᓐᓂᖓᓂ, ᑭᓯᐊᓂ ᑐᓴᖅᓯᒪᕗᖓ ᐱᐅᔫᑎᐅᔪᓂᑦ ᓴᖅᑭᑦᑐᖃᖅᓯᒪᓂᖓᓂ ᐊᕐᕕᐊᓂᑦ ᐊᒻᒪ ᓇᐅᔮᓂ ᑕᒪᑐᒪᓂ ᐊᕐᕌᒎᔪᒥ.

ᑭᓯᐊᓂ, ᐃᓛᒃ, ᑕᐃᒃᑯᐊ ᐃᓕᓴᐃᔨᐅᔪᑦ ᐅᕙᑦᑎᓐᓂ ᑲᑉᐱᐊᓵᕆᓇᓱᑐᐃᓐᓇᕆᐊᖃᖅᐳᑦ ᐊᖅᑯᑎᖓᓐᓂ,” ᐅᖃᓚᐅᖅᐳᖅ ᐳᕌᑯᓪᐹᖕᒃ ᐃᒡᓚᖅᖢᓂ.