Skip to content

ᓯᑦᓇᖑᐊᖅ ᓱᕋᒃᑎᖅᓯᒪᓕᖅᑐᖅ

ᐃᒡᓗᓕᒃᒥᐅᖅ ᓴᓇᖑᐊᖅᑎ ᑲᑎᖅᓱᐃᓇᓱᐊᓚᐅᖅᑐᖅ ᓴᓇᖑᐊᖅᑕᒥᓂᒃ ᓴᓇᕕᖓ ᐃᓵᖅᑕᐅᓚᐅᖅᑎᓪᓗᒍ ᓱᕋᒃᑎᖅᑕᐅᓪᓗᓂ ᐊᑯᓂ ‘ᓴᓇᑦᑎᐊᕋᓱᐊᖅᑕᖓ’

ᓴᓇᖑᐊᒐᖅᑎ ᐹᑦ ᕼᐊᓇ ᐋᕿᒃᓱᐃᓯᒪᕙᒌᓕᖅᑐᖅ ᖃᓪᓗᐱᓪᓗᖑᐊᓕᐊᒥᓂᒃ ᓯᑦᓇᒥᒃ ᓴᓇᖑᐊᖅᐸᓪᓕᐊᔭᒥᓂᒃ ᐅᑭᐅᓂᒃ ᒪᕐᕉᖕᓂᒃ, ᐊᒃᓱᑲᓪᓚᒃ ᑭᓱᓕᒪᖏᓐᓂᒃ ᑕᖅᓯᖅᓱᖅᖢᓂᐅᒃ, ᓄᔭᖑᐊᖓᓘᓐᓃᑦ, ᐊᒃᓱᐊᓗᒃ ᖁᕕᐊᑦᑐᓐᓃᖅᑐᕕᓂᖅ ᐊᑯᓂ ᓴᓇᓲᔭᖅᑕᖓ ᓱᕋᒃᑎᖅᑕᐅᓐᓂᕐᒪᑦ ᓇᑎᕐᒧᑦ ᐅᕐᕈᑎᑕᐅᓪᓗᓂ ᓴᓇᕕᐊᓂ ᑕᖅᑭᐅᓚᐅᖅᑐᖅ. ᐃᓱᒪᔪᕉᖅ ᓄᑕᕋᐃᑦ ᐃᓵᑲᑕᓕᕐᒥᖕᒪᑕ ᓱᕋᒃᑎᕆᖃᑦᑕᖅᖢᑎᒃ ᐃᓗᓕᖏᓐᓂᒃ, ᓴᓇᖑᐊᖅᑕᖓ ᓯᖃᓪᓕᑦᑎᐊᖅᑐᖅ ᐊᒥᓱᐊᓘᓕᖅᑐᖅ.

ᐅᖓᑖᓄᑦ ᐅᑭᐅᓂᒃ ᒪᕐᕉᖕᓂᒃ ᓴᓇᕙᓪᓕᐊᔭᕋ, ᐹᑦ ᕼᐊᓇ ᐊᑯᓂ ᖃᐅᑕᒫᑦ ᓴᓇᕙᒃᖢᓂᐅᒃ ᑭᓱᓕᒫᑦᑎᐊᖏᓐᓂᒃ ᑕᑯᒃᓴᐅᑎᑦᑎᓪᓗᓂ ᕿᓪᓕᓴᖅᓯᒪᑦᑎᐊᖅᖢᓂᓗ ᓯᑦᓇᖑᐊᖅ ᓴᓇᖑᐊᖅᑕᖓ ᓴᓇᕕᖕᒥᓂ, ᓱᕋᒃᑎᖅᑕᐅᓐᓂᕐᒪᑦ ᓇᑎᕐᒧᑦ ᐅᕐᕈᑎᑕᐅᓪᓗᓂ ᒪᐃᒥ ᐅᓪᓗᒥᒃ ᐊᑕᐅᓯᕐᒥᒃ ᐊᐅᓪᓚᖅᓯᒪᑎᓪᓗᒍ.

“ᓱᕋᒃᑎᕆᖕᒪᑕ ᓴᓇᑦᑎᐊᕋᓱᐊᖅᑕᓐᓂᒃ,” ᐅᖃᓚᐅᖅᑐᖅ ᐊᒃᓱᕈᖅᖢᓂ ᐊᐃᑦᑖᕈᓱᒃᑐᖅ ᓇᓗᓇᖏᖢᓂ. “ᑕᕝᕙ ᑲᑎᖅᓱᕋᓱᐊᕋᓗᐊᖅᑕᕋ, ᐃᓚᖏᑦ ᓇᓂᖃᑦᑕᖅᖢᒋᑦ ᐅᑎᒃᑲᓐᓂᕈᓐᓇᖅᐸᓪᓚᐃᔪᖅ ᐱᖅᑯᓯᑐᖃᕐᒥᓄᑦ.”

ᑕᐃᓱᒪᓂ ᐅᓪᓗᓕᒫᑲᓴᒃ ᓯᓚᒥ ᐊᓯᕙᖅᓯᒪᖃᑕᐅᓚᐅᒪᑦ ᐅᓇᓕᒃᓴᔭᓄᑦ ᒪᐃ 9-ᒥ. ᐅᑎᖅᖢᓂ, ᖃᐅᔨᓕᖅᑐᕕᓂᖅ ᐃᒐᓛᖓ ᓴᓇᕕᖓᓂ ᒪᑐᐃᖓᑦᑎᐊᖅᑐᖅ. ᐃᓗᐊᓂ, ᐅᕿᖏᑦᑐᕈᓗᒃ ᓴᓇᖑᐊᒐᖅ ᐅᓂᒃᑳᖅᑐᐊᒥᒃ ᑕᑯᖅᑯᐊᖅᑐᖅ ᖃᓪᓗᐱᓪᓗᖑᐊᖑᓪᓗᓂ ᓯᑦᓇ - ᓇᖏᖅᖢᓂ ᐳᖅᑐᓂᖃᓪᓗᐊᖅᑐᖅ ᒦᑐᒥᒃ ᐊᒻᒪᓗ 2 1/3 ᒦᑐᓗᐊᖓᓂᒃᑕᐅᖅ ᓴᓂᕋᒧᑦ - ᓇᑎᕐᒥ ᐅᕐᕈᓯᒪᔪᖅ ᓴᓇᖑᐊᕈᑎᖏᓪᓗ ᓇᑎᕐᒦᒃᑭᓪᓗᑎᒃ.

“ᑕᑯᒐᒃᑯ ᐊᒃᓱᐊᓗᒃ ᖁᓪᓗᓚᐅᖅᑐᖓ ᐊᒻᒪᓗ ᖃᓄᐃᓕᐅᕆᐊᒃᓴᖅ ᓇᓗᓕᖅᖢᖓ - ᕿᐊᓗᖓ ᐃᒡᓚᕐᓗᖓᓘᓐᓃᑦ. ᐊᒃᓱᐊᓗᒃ ᐊᐃᑦᑖᖑᓚᐅᖅᑐᖅ,” ᕼᐊᓇ ᐃᖅᑲᐅᒪᔭᒥᓂᒃ ᐅᓂᒃᑳᓚᐅᖅᑐᖅ ᐅᖃᖅᖢᓂ ᑖᓐᓇ ᓴᓇᖑᐊᒐᖓ ᓇᖏᖅᑎᓪᓗᒍ ᕿᒪᓚᐅᖅᑕᖓ ᕿᔪᕈᓗᖕᒥ ᐊᓪᓕᕋᖓᓂ. “ᐊᒃᓱᐊᓗᒃ ᐱᔭᕆᑐᓂᐊᓕᕐᒥᔪᖅ ᐅᑎᖅᑎᓐᓇᓱᐊᕐᓗᒍ ᐱᖅᑯᓯᑐᖃᖓᓄᑦ… ᐃᓚᒃᑲᓘᓐᓃᑦ ᕿᐊᒻᒪᕆᓚᐅᖅᑐᑦ ᖁᒡᓗᓗᐊᒧᑦ. ᐋᓐᓂᖅᖢᑎᒃ. ᐊᒃᓱᐊᓗᒃ ᐱᑦᑎᐊᖏᑕᐅᔪᒍᑦ.”

ᐅᖃᕆᓪᓗᓂ ᖃᐅᔨᒪᔪᕉᖅ ᓄᑕᕋᓂᒃ ᑕᒫᓃᑦᑐᓂᒃ ᑕᑯᔪᕕᓂᕐᒥᒃ ᑭᓯᐊᓂᓕ ᑭᒃᑰᖕᒪᖔᑕ ᓇᓗᓇᖅᖢᑎᒃ, ᑕᐃᒪᓐᓇ ᐅᖃᐅᓯᕆᔪᓐᓇᖏᑕᕗᑦ ᐳᑭᖅᑕᓕᒃᑯᓐᓄᑦ ᐃᓵᖅᑕᐅᓚᐅᕈᓯᕗᑦ. ᓯᕗᓪᓕᖅᐹᖑᖏᑦᑐᖅ ᓄᑕᕋᐃᑦ ᐃᓵᑲᑕᖃᑦᑕᕐᒪᑕ ᓱᕋᒃᑎᕆᓪᓗᑎᒃ ᐃᓗᓕᖏᓐᓂᒃ ᐱᖁᑎᒋᔭᐅᔪᓂᒃ.

“ᖃᐅᔨᒪᑦᑎᐊᖅᖢᑎᒃ ᑕᐃᒪᓐᓇ ᐱᒋᐊᖃᖏᓐᓂᕐᒥᓂᒃ, ᐊᖑᔭᐅᒑᖓᒥᒃ ᕿᒫᖃᑦᑕᖅᖢᑎᒃ,” ᐅᓂᒃᑳᕆᓪᓗᓂ. “ᓄᑕᕋᑯᓗᐃᑦ. ᐃᖅᑲᖅᑐᖅᑕᐅᔪᓇᖏᑦᑐᑦ ᓱᓕ. ᓱᓗᐊᖅᑕᐅᔪᓐᓇᖏᒻᒪᑕ ᑕᐃᒪᐃᑎᓪᓗᒋᑦ.”

ᕼᐊᓇ ᐅᖃᕆᓪᓗᓂ ᓂᐅᕕᕐᓂᐊᓚᐅᖅᑐᖅ ᑕᐃᒪ ᐅᖃᐅᑎᒋᐊᖃᕐᓂᐊᖅᑕᕋ ᑖᓱᒥᖓ ᓴᓇᖑᐊᒐᕐᒥᒃ. ᕼᐊᓇ ᑎᑭᓴᐃᖃᑦᑕᕐᒪᑦ ᐅᒃᑯᓯᒃᓴᓂᒃ ᓴᓇᖑᐊᕐᓂᐊᖅᑕᒥᓂᒃ ᐃᒃᐱᐊᕐᔪᖕᒥᐅᓂᑦ. ᐅᕐᓱᕆᐊᑐᑦ ᐱᔪᖅ ᐅᒃᑯᓯᒃᓴᖓ ᑖᕙᓂᕐᒥᐅᑦ ᒥᑭᔫᑎᓂᒃ ᑕᖅᓯᖅᓱᖅᖢᒍ ᐱᐅᓂᖅᓴᖅ, ᑕᐃᒫᓴᐃᓐᓇᖅ ᓄᔭᖑᐊᖏᑦ ᓯᑦᓇᖑᐊᑉ ᑕᖅᓯᖅᓱᑦᑎᐊᓚᐅᖅᑕᒃᑲ, ᐅᓂᒃᑳᖅᑐᖅ ᐊᔪᕆᒃᓱᐃᓪᓗᓂ.

“ᑖᓐᓇ ᐱᐅᓯᒻᒪᕆᓚᐅᖅᑐᖅ ᓴᓇᓪᓗᒍ ᓯᑦᓇᖑᐊᒥᒃ ᓴᓇᖃᑦᑕᕋᒪ,” ᐅᓂᒃᑳᕆᓪᓗᓂ.

ᕿᓚᒥ ᑕᖅᑭᐅᓂᐊᖅᑐᓂ ᐱᐊᓂᓕᒑᓕᓚᐅᖅᑐᖅ ᐊᑯᓂ ᓴᓇᔭᕋ ᓱᕋᒃᑎᖅᑕᐅᓚᐅᕐᒪᑦ ᕿᓚᒥᕈᓗᒃ.

ᒫᓐᓇ ᑕᕝᕙ ᐱᔭᕆᑐᔪᒥᒃ ᐊᑐᓕᖅᑐᒍᑦ ᐅᑎᖅᑎᑦᑎᓇᓱᐊᖅᖢᓂ ᓂᐱᐅᑎᓂᒃ ᐊᒻᒪᓗ ᐅᒥᖕᒪᐅᑉ ᓇᒡᔪᖓᓂᒃ ᐊᑐᖅᖢᓂ. ᖁᔭᓐᓇᒦᒃ ᐸᓂᖓᑕ ᐊᔾᔨᓕᐅᖃᑦᑕᓚᐅᓂᕐᒪᒍ ᑕᐃᒃᑯᐊ ᑕᕝᕙ ᒪᓕᒃᖢᓂᒋᑦ ᐱᐊᓂᒃᓯᓇᓱᐊᓕᖅᑐᖅ. ᓱᓕᒃᑲᓂᖅ ᑕᖅᑭᓂᒃ ᓴᓇᓲᔭᕐᓂᐊᓚᐅᖅᑕᖓ, ᐱᖅᑯᓯᑐᖃᖓᓄᑦ ᐅᑎᖅᑎᑦᑐᓐᓇᖅᐸᓪᓚᐃᔭᖓᒎᖅ ᓯᑦᓇᖑᐊᖅ ᓱᕋᒃᓯᒪᓂᖓ ᑕᑯᒃᓴᐅᔪᓐᓃᕐᓗᓂ. ᐃᒻᒪᖄ ᓱᓕ ᑕᐃᓐᓇ ᓂᐅᕕᕐᓂᐊᕐᓂᕋᓚᐅᖅᑐᖅ ᐱᔪᒪᑐᐃᓐᓇᕆᐊᓕᒃ, ᐅᓐᓃᑦ ᐊᑭᑭᒡᓕᒋᐊᖅᓯᒪᓕᖅᑎᓪᓗᒍ, ᐅᖃᕆᓪᓗᓂ.

ᓴᓇᖑᐊᖅᑎᐅᓪᓗᓂ ᕼᐊᓇᐅᑉ ᐃᓅᔪᑎᒋᖕᒪᒍ ᓴᓇᖑᐊᒐᒥᓄᑦ ᑮᓇᐅᔭᒃᓴᖅᖢᓂ. “ᑕᐃᒪᓐᓇ ᐃᓅᔪᑎᖃᖅᑐᖓ, ᓴᓇᖑᐊᖅᐸᒃᖢᖓ ᐊᓯᖏᓐᓂᒃᓗ ᓴᓇᕙᒃᖢᖓ, ᐃᓚᓐᓄᑦ ᐊᖑᓇᓱᒃᑎᐅᓪᓗᖓᓗ.” ᐅᓂᒃᑳᕆᓪᓗᓂ.