ᕼᐋᑭᖅᑐᓕᕆᔨᒃᑯᑦ ᑲᓇᑕᒥ ᐊᒥᓱᓂᒃ ᒪᒃᑯᒃᑐᓂᒃ ᐃᓕᓐᓂᐊᖅᑎᑎᓚᐅᖅᐳᑦ ᓇᑎᕐᒥ ᕼᐋᑭᕐᓂᕐᒥᒃ ᓇᐅᔮᓂ ᑕᒡᕙᓂ ᑕᖅᑭᒥ.
ᐊᐅᓚᑦᓯᔨᖓᑦ ᐃᓕᓐᓂᐊᕈᑎᓄᑦ ᕼᐋᑭᖅᑐᓕᕆᔨᒃᑯᑦ ᑲᓇᑕᒥ, Pier-Alexandre Poulin, ᐊᒻᒪ ᐃᓕᓐᓂᐊᖅᑎᑎᔨ Jeff Shepherd ᔭᓐᓄᐊᕆ 10-ᒥ 11-ᒥ ᐃᓕᓐᓂᐊᖅᑎᑎᓚᐅᖅᐳᑦ ᑐᓴᕐᕕᒃ ᐃᓕᓐᓂᐊᕐᕕᐊᓛᖓᓂ ᐊᒻᒪ ᑑᒑᓕᒃ ᐃᓕᓐᓂᐊᕐᕕᒡᔪᐊᖓᓂ ᒪᓕᒐᒃᓴᓂᒃ ᓇᑎᕐᒥ ᕼᐋᑭᕐᓂᕐᒧᑦ.
ᐅᓐᓄᒃᑯᓪᓗ ᓯᑯᒥ ᐃᓕᓐᓂᐊᖅᑎᑕᐅᓚᐅᖅᐳᑦ ᓇᐅᔮᓂ ᕼᐋᑭᖅᑎᐊᓛᑦ ᐱᓐᖑᐊᖅᑎᖏᑦ.
ᑑᒑᓕᒃ ᐃᓕᓐᓂᐊᕐᕕᖓᑕ ᐊᖓᔪᖄᑉ ᑐᖏᓕᖓ ᔪᓕᐊ ᒪᒃᐴᓴᓐ ᐅᖃᓚᐅᑎᖅᐳᖅ ᕿᓚᒥ ᓇᐅᔮᓃᓚᐅᕋᓗᐊᖅᖢᑎᒃ, ᐃᓕᓐᓂᐊᖅᑎᑦ ᐃᓕᓐᓂᐊᖅᑎᑕᐅᓚᐅᖅᐳᑦ.
ᐅᖃᓚᐅᖅᖢᓂᓗ ᓇᑎᕐᒥ ᕼᐋᑭᕐᓂᖅ ᐱᐊᓚᔪᒃᑯᑦ ᓇᐅᔮᓂ ᐱᓐᖑᐊᖅᑕᐅᓕᕈᓐᓇᖅᐳᑦ ᐊᒥᓱᓄᑦ ᐊᑭᑐᖏᓐᓂᖓᓄᑦ ᐊᒻᒪ ᖁᕕᐊᓇᕐᓂᖓᓄᑦ.
“ᐋᖅᑭᒃᓱᐃᓚᐅᖅᐳᖓ ᐃᖃᐃᓕᓴᕐᓂᕐᒧᑦ ᐃᓕᓐᓂᐊᖅᑎᑎᔨ Gary Minauda, ᐱᓕᕆᖃᑎᖃᓚᐅᖅᖢᑎᒡᓗ ᐃᓕᓐᓂᐊᖅᑐᓂᑦ ᒍᕇᑦ 4 ᐊᒻᒪ ᖁᑦᓯᖕᓂᖅᓴᓄᑦ,” ᐅᖃᓚᐅᖅᐳᖅ ᒪᒃᐴᓴᓐ.
“ᐃᑲᕋᒥᒃ ᐊᑕᐅᓯᕐᒥᒃ ᐃᓕᓐᓂᐊᖅᑎᑦᓯᖃᑦᑕᖅᖢᑎᒃ ᐊᑐᓂ ᒍᕇᑦᖃᖅᑐᓂᒃ ᐊᔾᔨᒌᖏᑦᑐᓂᒃ ᖃᓄᐃᓕᐅᖅᑎᑕᐅᑉᓗᑎᒃ ᐊᖅᓴᒥᒃ ᑐᓂᓯᖃᑦᑕᕐᓂᖅ ᑐᓂᔭᐅᖃᑦᑕᕐᓂᕐᓗ ᐱᓐᖑᐊᕆᐊᓕᓚᐅᖅᖢᑎᒃ ᑭᖑᓂᐊᒍᑦ.
“ᑕᑯᔭᖅᑐᖅᑎᐊᓪᓛᓗᓚᐅᕋᑉᑭᓪᓗ ᓄᓇᓕᖕᒥᒃ, ᐊᒻᒪ ᐅᐱᑦᓯᐊᓚᐅᖅᐳᑦ ᑕᑯᕋᓐᓂᕈᓱᒃᖢᑎᒃ ᓇᐅᔮᓂ ᓯᑯᒥᓗ.
“ᑕᑯᓚᐅᖅᖢᑎᒡᓗ ᑭᒧᒃᓯᒃᑐᓂᒃ ᐅᑎᓕᓚᐅᖅᐳᒍᓪᓗ ᓄᓇᒃᑰᕈᑎᒃᑯᑦ ᐃᓕᓐᓂᐊᕐᕕᒡᔪᐊᒧᑦ ᑭᖑᓪᓕᖅᐹᖅᓯᐅᕐᓂᐊᓕᖅᑎᓪᓗᒋᑦ.”
ᑖᒃᑯᐊ ᒪᕐᕉᒃ ᕼᐋᑭᖅᑐᓕᕆᓂᕐᒧᑦ ᑲᓇᑕᒥ ᐃᓕᓐᓂᐊᖅᑎᑎᔨᒃ ᐃᓕᓐᓂᐊᖅᑎᑦᓯᓚᐅᖅᐳᑦ 140-ᓂᒃ ᐃᓕᓐᓂᐊᖅᑎᓂᒃ.
Poulin ᐅᖃᓚᐅᖅᐳᖅ ᐃᓕᓐᓂᐊᖅᑎᑦ ᖃᓄᐃᓕᐅᕈᑕᐅᔪᓂᒃ ᖁᕕᐊᒋᔭᖃᓚᐅᖅᐳᑦ, ᐊᒻᒪ ᐊᒥᓱᑦ ᒪᒃᑯᒃᑐᑦ ᐱᓕᕆᐊᖃᖃᑕᐅᓚᐅᖅᖢᑎᒡᓗ ᕼᐋᑭᕐᓂᕐᒥᒃ ᓇᑎᕐᒥ.
ᐅᖃᓚᐅᖅᐳᖅ ᐱᓗᐊᖅᑐᒥᒃ, ᑕᒪᕐᒥᒃ ᖁᕕᐊᓱᑦᓯᐊᓚᐅᖅᐳᑦ ᐃᓚᐅᒋᐊᒃᓴᖅ.
“ᒪᓕᒐᐃᑦ ᓇᑎᕐᒥ ᕼᐋᑭᕐᓂᕐᒧᑦ ᐊᔾᔨᒌᖏᒻᒪᒋᑦ ᓇᑎᕐᒥ ᕼᐋᑭᖑᐊᕈᑕᐅᕙᒃᑐᑦ ᐊᓯᖏᑦᑕ,” ᐅᖃᓚᐅᖅᐳᖅ Poulin.
“ᑲᑐᔾᔨᖃᑎᒌᑦ, ᕼᐋᑭᖅᑐᓕᕆᓂᖅ ᑲᓇᑕᒥ ᑕᑯᓐᓇᕐᒪᑕ ᐊᖅᓴᒥᒃ ᕼᐋᑭᕈᑎᖃᕐᓂᖅ ᐱᓐᖑᐊᕈᑦ ᑕᐃᒪᓐᓇ ᕼᐋᑭᕈᓐᓇᖅᓯᓴᐅᑕᐅᔪᓐᓇᕐᒪᑦ ᐃᖃᐃᓕᓴᕐᕕᖕᒥ.
“ᐊᔾᔨᒌᖏᓐᓂᖏᑦ ᕼᐋᑭᕐᓂᖅ ᓇᑎᕐᒥ ᐊᒻᒪ ᓇᑎᕐᒥᑦᑕᐅᖅ ᕼᐋᑭᖑᐊᓂᖅ ᑕᐃᓐᓇ ᓇᑎᕐᒥ ᕼᐋᑭᖑᐊᕐᓗᓂ ᐊᒃᑐᖅᓯᒋᐊᖃᖏᒻᒪᑕ ᕼᐋᑭᕈᑎᒥᓄᑦ ᑎᒥᓂᒃ, ᑕᐃᒪᓐᓇ ᓄᑕᖃᓄᓪᓗ ᐅᓗᕆᐊᓇᖏᓐᓂᖅᓴᐅᑉᓗᓂ.
“ᐊᑐᖅᑕᐅᒋᐊᖃᖅᑐᓪᓗ ᐅᕿᓐᓂᖅᓴᐅᑉᓗᑎᒃ, ᕼᐋᑭᕈᑎᖏᓪᓗ ᓇᐃᓐᓂᖅᓴᐅᑉᓗᑎᒃ, ᐊᒻᒪ ᐱᓐᖑᐊᖃᑦᑕᖅᖢᑎᒡᓗ ᐊᖅᓴᖃᖅᖢᑎᒃ ᐊᑎᖃᖅᑐᒥᒃ Wiffle ball, ᑕᐃᒪᓐᓇ ᓄᑕᖃᑦ ᕼᐋᑭᕈᑎᒥᒃ ᐊᑐᓚᐅᖅᓯᒪᖏᑦᑐᑦ ᐊᐅᓚᑕᐅᔪᓐᓇᑦᓯᐊᕐᓂᖅᓴᐅᑉᓗᑎᒃ ᓇᑎᕐᒥ ᕼᐋᑭᖑᐊᓚᐅᖅᓯᒪᖏᑉᐸᑕ.
ᐅᖃᓚᐅᖅᐳᖅ ᐅᕿᓐᓂᖅᓴᖅ ᐊᖅᓴᖅ ᐊᒡᒐᖕᒧᑦ ᐊᐅᓚᑕᐅᓂᖅᓴᐅᑦᓯᐊᕈᓐᓇᕐᓂᖅᓴᐅᕗᖅ, ᐃᔨᓪᓗ/ᐊᒡᒐᐃᓪᓗ ᒪᓕᖃᑦᑕᐅᑎᒍᓐᓇᖅᓂᖅᓴᐅᑉᓗᑎᒃ.
“ᐃᓕᓐᓂᐊᕐᕕᒡᔪᐊᒥ ᐱᖁᑎᖃᓕᐊᓂᒃᖢᑎᒡᓗ ᑕᒪᒃᑯᓂᖓ, ᑕᐃᒪᓐᓇ ᐃᖃᐃᓕᓴᕐᓂᕐᒧᑦ ᐃᓕᓐᓂᐊᖅᑎᑎᔨ ᐊᑲᐅᓈᖅᑐᒦᓐᓂᕋᐃᓚᐅᖅᖢᓂᓗ ᑕᒪᒃᑯᓂᖓ.
“ᓇᐅᔮᓂ ᐃᓕᓐᓂᐊᖅᑎᑦ ᒥᑭᓂᖅᓴᐃᑦ ᐃᓕᓐᓂᐊᕐᕕᐊᓛᒥᐅᑕᐃᑦ ᐱᑎᑕᐅᓂᐊᖅᐳᑦ ᑕᒪᒃᑯᓂᖓ ᐱᓐᖑᐊᕈᑎᓂᒃ ᐊᒻᒪ, ᑕᐃᒪᑐᖅ, ᐊᑐᖅᑕᐅᖃᑦᑕᕐᓂᐊᖅᐳᑦ ᐱᕈᖅᐸᓪᓕᐊᔪᓐᓇᖁᓪᓗ ᒪᒃᑯᒃᑐᓄᑦ ᓄᓇᓕᖕᒥ.
“ᑕᐃᒪᑐ ᓄᑕᖃᓄᑦ ᑕᒪᓐᓇ ᐱᓐᖑᐊᕐᓂᖅ ᐊᑐᖅᑕᐅᕙᓪᓕᐊᓂᐊᖅᐳᖅ ᐃᓕᓐᓂᐊᕐᕕᖕᓂ ᐊᒻᒪ, ᑕᐃᒪᑐᖅ, ᑐᖏᓕᖓᓂ ᐃᓕᓐᓂᐊᕈᑕᐅᓂᐊᖅᐳᖅ ᖃᓄᖅ ᓯᐊᕐᕆᔮᕈᓐᓇᖅᓯᒋᐊᒃᓴᒧᑦ.
“ᐊᔪᖏᒃᑯᕕᑦ ᓇᑎᕐᒥᒃ ᕼᐋᑭᖑᐊᕐᓂᕐᒥᒃ ᓯᐊᕐᕆᔮᕈᓐᓇᕈᕕᓪᓗ, ᓯᑯᒥ ᕼᐋᑭᖃᑕᐅᔪᓐᓇᕋᔭᖅᐳᑎᑦ ᑕᐃᒪᓐᓇ ᐊᑯᓂᐅᓂᐊᖅᑐᒥ ᐃᓕᓐᓂᐊᖅᑎᑕᐅᒍᑎᒋᖁᕙᕗᑦ.”