Skip to content

ᓂᕈᐊᖅᑕᐅᓯᒪᔪᑦ ᐅᓇᑕᕈᑕᐅᓕᖅᑐᖅ

ᐊᒃᓱᕉᑕᐅᔪᖃᓕᖅᑐᖅ ᓴᓂᕋᔭᖕᒥᐅᒧᑦ ᑭᖑᓪᓕᕐᒥ ᐊᒥᑦᑐᕐᒥᐅᑦ ᒪᓕᒐᓕᐅᖅᑎᖓᓂᒃ ᓂᕈᐊᖅᑕᐅᔪᖃᖅᐸᑦ ᓄᓇᓕᖓᖔᓂᑦ ᐱᔪᒥᒃ ᓂᕈᐊᖅᓯᖔᖁᔨᓪᓗᑎᒃ, ᓴᓂᕋᔭᖕᒥᐅᑦ ᒥᔪᖓ ᑕᐃᒪᓐᓇ ᐅᖃᓚᐅᖅᑐᖅ ᐲᑕ ᓯᐊᑯᓗᒃ ᒪᓕᒐᓕᐅᖅᑎᖓᑦ ᐱᔾᔪᑎᒋᓪᓗᒍ.

ᓗᐃ ᑕᐹᕐᔪᒃ: ᐃᓄᒋᐊᓕᖅᐸᓪᓕᐊᖏᓐᓇᕐᒪᑕ, ᓴᓂᕋᔭᖕᒥᐅᑦ ᓇᖕᒥᓂᖅ ᒪᓕᒐᓕᐅᖅᑎᖃᕈᓐᓇᖅᓯᑐᐃᓐᓇᕆᐊᓖᑦ ᑭᖑᓪᓕᕐᒥ ᓂᕈᐊᓕᖅᐸᑕ.

“ᓇᖕᒥᓂᖅ ᑲᑎᒪᔨᖃᕐᓂᕈᑦᑕ ᓴᓂᕋᔭᖕᒥᐅᒥᒃ ᑭᒡᒐᖅᑐᖔᖅᑐᒥᒃ, ᐃᓱᒪᒐᑦᑕ ᐃᑲᔪᖅᓴᕐᓂᓴᖅᓇᔭᕋᓱᒋᓪᓗᒍ ᓴᓂᕋᔭᖕᒥᐅᓂᒃ, ᑕᐃᒪᓐᓇ ᐅᕙᑦᑎᓐᓄᑦ ᓵᖓᓂᖅᓴᐅᓇᔭᕐᒪᑦ,” ᓯᐊᑯᓗᒃ ᐅᖃᕆᓪᓗᓂ, ᑐᓵᔨᖃᖅᖢᓂ ᔩᑯ ᓯᒥᐅᓂᒥᒃ.

ᓯᑕᒪᑦ ᐊᒥᑦᑐᕐᒥᐅᓂ ᓂᕈᐊᖅᑕᐅᓇᓱᐊᖃᑕᐅᔪᑦ 7-ᐅᖕᒪᑕ ᐅᒃᑑᐸ 30-ᒥ ᓂᕈᐊᖅᑕᐅᓇᓱᐊᕐᓂᐊᖅᑐᑦ ᓄᓇᕗᒥᐅᑦ ᒪᓕᒐᓕᐅᖅᑎᖏᓐᓂᒃ ᓂᕈᐊᓕᖅᐸᑕ ᓴᓂᕋᔭᖕᒥᐅᖑᖕᒪᑕ. ᐃᓱᓕᑎᑦᑎᓇᓱᐊᓕᕐᒪᑕ ᐱᖓᓱᐊᖅᑎᒻᒪᕆᒃᖢᑎᒃ ᑭᒡᒐᖅᑐᖅᑎᖃᓕᕐᒪᑕ ᐃᒡᓗᓕᖕᒥᐅᒥᒃ. 2013-ᒥ, ᕕᒃᑐ ᔪᐊᔨ ᖁᓚᐅᑦ ᓂᕈᐊᖅᑕᐅᓚᐅᕐᒪᑦ 244-ᓄᑦ ᐊᒻᒪᓗ 103-ᓄᑦ ᐹᓪ ᕼᐊᐅᓕ, ᐊᖏᕐᕋᖃᖅᑐᖅ ᓴᓂᕋᔭᖕᒥ. ᑕᒪᑐᒪᓂᒃᑲᓐᓂᖅ ᓂᕈᐊᖅᑕᐅᓇᓱᐊᖃᑕᐅᓂᐊᕐᒪᑕ.

ᒪᕐᕈᐊᖅᑎᖅᖢᑎᒃ ᓂᕈᐊᖅᓯᒪᓕᕐᒪᑕ ᓯᕗᓂᖓᓂ ᑕᐃᒪᓐᓇ ᐃᒡᓗᓕᖕᒥᐅᖅᑕᐅᖅ ᓗᐃ ᑕᐹᕐᔪᒃ ᓂᕈᐊᖅᑕᐅᓚᐅᕆᓪᓗᓂ.

ᐊᑕᐅᓯᕐᒥᒃ ᓴᓂᕋᔭᖕᒥᐅᒥᒃ ᑭᒡᒐᖅᑐᖅᑎᖃᖅᓯᒪᔪᒍᑦ ᒪᓕᒐᓕᐅᕐᕕᖕᒥ ᓄᓇᕗᖑᕋᑖᖅᑎᓪᓗᑕ ᓯᕗᓪᓕᖅᐹᒥ 1999-ᒥ, ᐃᓅᑭ ᐃᕿᑦᑐᖅ ᓂᕈᐊᖅᑕᐅᑎᓪᓗᒍ ᑕᓪᓕᒪᓂᒃ ᓂᕈᐊᖅᑕᐅᓇᓱᐊᖅᑐᓂ.

ᓴᓂᕋᔭᖕᒥᐅᑦ ᐊᔪᖏᓐᓂᖅᓴᐅᖅᑰᖅᑐᑦ ᐅᓄᕐᓂᖅᓴᐅᖕᒪᑕ ᓄᓇᓕᖓᓂ ᓂᕈᐊᕈᓐᓇᖅᑐᑦ, 391-ᖑᖕᒪᑕ ᐃᒡᓗᐊᓄᖔᕐᓕ 257-ᐅᑎᓪᓗᒋᑦ ᐃᓚᖓᓃᑦᑐᑦ ᑖᓱᒪ ᓂᕈᐊᒐᒃᓴᐅᕕᐊᓂ ᐊᒥᑦᑐᕐᒥᐅᓂ, ᑭᓯᐊᓂᓕ ᓂᕈᐊᓕᕌᖓᑕ ᐊᕕᑦᑎᐊᖃᑦᑕᕐᒪᑕ, ᐅᖃᓚᐅᖅᑐᖅ ᑕᐹᕐᔪᒃ, ᖃᐅᔨᒪᔪᖅ ᑲᑎᒪᔨᖃᐅᓯᕐᓂᒃ ᑖᕙᓂᕐᒥᐅᓂ ᐊᓐᓂᕈᓚᐅᑎᖃᑦᑕᕐᓂᖏᓐᓂᒃ ᑭᒡᒍᖅᑐᖅᑎᒥᓂᒃ ᑖᒃᑯᐊ ᒪᕐᕉᒃ ᓄᓇᓖᒃ ᑭᒡᒐᖅᑐᖅᑎᐅᕕᒋᓯᒪᖕᒪᒋᑦ ᒪᕐᕈᐊᖅᑎᖅᖢᓂ.

“ᑕᐃᒪᖓᓂᑦ ᐱᕝᕕᒃᓴᖃᓕᑐᐊᕌᖓᑕ ᐅᐸᒃᓯᒪᐃᓐᓇᕋᓱᐊᖃᑦᑕᔪᔭᒃᑲ ᑲᑎᒪᔨᐅᕕᒋᓪᓗᒋᑦ (ᓴᓂᕋᔭᖕᒥᐅᑦ) ᐱᒃᑯᒥᒋᔭᖏᓐᓂᒃ ᑐᓴᕐᕕᒋᓇᓱᐊᖅᖢᒋᑦ,” ᑕᐹᕐᔪᒃ ᐅᖃᕆᓪᓗᓂ. “ᒥᓂᔅᑕᒋᔭᐅᓕᓚᐅᖅᓯᒪᒐᒪ ᑕᐃᓱᒪᓂ ᑭᓯᐊᓂᓕ ᐃᓚᒃᑲ ᐃᒡᓗᓕᖕᒥᐅᑕᐅᑎᓪᓗᒋᑦ, ᓂᕆᐊᖅᑕᐅᓯᒪᕕᖕᓄᑦ ᑕᒪᐃᓐᓄᑦ ᐅᐸᖃᑦᑕᕈᓐᓇᔪᒐᓗᐊᖅᑐᖓ.

ᓄᓇᕗᒥ ᑲᑎᒪᔨᖃᕐᕖᑦ ᓂᕈᐊᖅᑕᐅᕕᖏᑦ ᕿᒥᕈᔭᐅᓂᐊᓕᖅᑐᑦ ᓲᖃᐃᒻᒪ ᑕᒪᑐᒪᓂ ᐅᑭᐅᖑᓂᐊᖅᑐᓂ ᓇᓗᓇᖏᑦᑐᖅ ᐊᒻᒪᓗ ᑭᖑᓪᓕᕐᒥ ᓂᕈᐊᕐᓇᖅᓯᒃᐸᑦ ᐊᒥᒐᖅᖠᕆᐊᖃᕈᓐᓃᕐᓂᐊᖅᑐᒃᓴᐅᕗᑦ ᑲᑎᒪᔨᖁᑎᒥᓂᒃ, ᑕᐹᕐᔪᒃ ᐅᖃᓚᐅᖅᑐᖅ.

“ᕿᓚᓈᕐᓇᕐᒪᑦ ᐃᒻᒪᖄ ᖃᖓᑐᐃᓐᓇᖅ ᐃᓄᒋᐊᖕᓂᖏᑦ ᓈᒻᒪᒃᓯᔪᒫᖅᐳᑦ ᓇᖕᒥᓂᖅ ᑲᑎᒪᔨᖃᕈᓐᓇᓕᕐᓗᑎᒃ ᓴᓂᕋᔭᖕᒥᐅᑦ,” ᐅᖃᕆᓪᓗᓂ. “ᑕᒪᑐᒪᓂᐅᓂᖓᓂ, ᐊᑐᐊᒐᖃᕐᒪᑕ ᓄᓇᓖᑦ ᐃᓄᒋᐊᖕᓂᖏᓐᓂᒃ, ᒫᓐᓇᒧᑦ ᓈᒻᒪᒐᓱᒋᓪᓗᒍ ᓱᓕ. ᐃᓛᒃ ᑕᒪᓐᓇ ᓈᓴᐅᑎᓂᒃ ᐊᑐᐊᒐᖃᓪᓚᕆᖕᒪᑦ ᐅᓄᕐᓂᖅᐹᓄᑦ ᓂᕈᐊᖅᑕᐅᓂᖅ ᓲᖑᔪᒻᒪᕆᐅᖕᒪᑦ ᒐᕙᒪᑎᑦᑎᓐᓂ.”

ᐊᐱᕆᔭᐅᒐᒥᓕ ᖃᓄᐃᑦᑐᓂᒃ ᐱᕕᒃᑐᓂᒃ ᐊᒃᓱᕉᑎᖃᕆᐊᖏᓐᓂᒃ ᓴᓂᕋᔭᖕᒥᐅᑦ ᒪᓕᒐᓕᐅᖅᑎᖓᓄᑦ ᑲᒪᒋᔭᐅᓴᐅᑎᒋᒋᐊᓕᖕᓂᒃ, ᓯᐊᑯᓗᒃ ᑐᓵᔨᖃᖅᖢᓂ ᐅᖃᓚᐅᖅᑐᖅ: “ᐃᓱᒫᓗᒋᔭᐅᔪᖅ ᐊᑕᐅᓯᖅ (ᓯᐊᑯᓘᑉ ᐅᖃᐅᓯᖓ) ᓄᓇᕗᑦ ᒐᕙᒪᖓ ᓱᒃᑲᐃᑦᑐᒻᒪᕆᐅᖕᒪᑦ ᓄᓇᓖᑦ ᒐᕙᒪᑎᖏᑦ ᐱᔾᔪᑎᒋᓪᓗᒋᑦ ᓄᓇᓕᓕᕆᔪᑏᑦ ᒪᓕᒐᖏᑦ ᐋᕿᒋᐊᖅᑕᐅᒋᐊᖃᕐᒪᑕ. ᑕᒪᐃᑕᑲᓴᒃ ᕼᐊᒪᓚᐃᑦ ᓱᓕ ᓄᓇᓯᐊᒥᐅᑦ ᐊᑐᐊᒐᖏᓐᓂᒃ ᒪᓕᒃᒪᑕ ᓄᓇᕗᒥᐅᓄᑦ ᓄᒃᑎᓚᐅᖅᓯᒪᖏᒻᒪᑕ ᓱᓕ, ᐱᓗᐊᖑᐊᖅᑐᒥᒃ ᓄᓇᓕᖕᓂ ᒪᓕᒐᕋᓛᓕᐅᕈᑏᑦ. ᖃᖓᑐᐃᓐᓇᑦ ᓄᓇᓕᖕᒥᐅᓄᒃ ᒪᓕᒐᕋᓛᓕᐅᕈᒪᓕᕌᖓᑦᑕ ᓄᓇᓯᐊᒥᐅᑦ (ᑎᑎᖅᑲᖁᑎᖏᓐᓂᒃ) ᐊᑐᖅᖢᑕ ᓱᓕ ᐋᕿᒃᓱᐃᓇᓱᐊᖃᑦᑕᕋᑦᑕ ᒫᓐᓇᒧᑦ ᑎᑭᖢᒍ ᓱᓕ ᓄᓇᕗᒥᐅᑦ ᐱᖁᑎᒥᓂᒃ ᐋᕿᒃᓱᐃᕌᓂᒃᓯᒪᖏᒻᒪᑕ 2017-ᖑᓕᕋᓗᐊᖅᑎᓪᓗᒍ.”