Skip to content

ᒐᕙᒪᑎᖃᕈᓯᖅᐳᑦ ᑭᐳᒃᑐᑦ ᐃᖏᕐᕋᓯᒋᐊᓕᕈᑦᑕ ᐃᒃᓯᕙᐅᑕᑦᑎᓐᓄᑦ ᕿᓗᐊᖅᓯᒪᒋᐊᖃᕐᒃᓂᐊᓕᖅᑐᒍᑦ

ᐊᑭᒪᖃᑦᑕᐅᑎᓇᓱᐊᖅᑐᑦ ᓱᒃᑲᓕᓴᕐᓂᐊᓕᖅᑐᑦ ᓄᓇᕗᑦ ᒪᓕᒐᓕᐅᕐᕕᐊᓂ, ᐊᒻᒪᓗ ᑲᔪᓯᑦᑎᐊᕆᐊᖃᕐᓂᐊᖅᖢᑎᒃ ᑖᒃᑯᐊ ᒪᕐᕉᒃ ᐊᑏᒃ ᐃᓚᐅᔪᓐᓃᖅᑎᓪᓗᒋᑦ ᑲᑎᒪᔨᐅᖃᑕᐅᔪᓂ ᑕᒪᑐᒪᓂ ᐅᑭᐅᖑᕋᑖᖅᑐᓂ ᐊᖓᔪᖅᑳᕆᓯᒪᔭᕗᑦ: ᓯᕗᓕᖅᑎ ᐲᑕ ᑕᑉᑑᓇ, ᐊᒻᒪᓗ ᑮᓇᐅᔭᓕᕆᔨᒃᑯᑦ ᒥᓂᔅᑕᖓ ᑮᑦ ᐲᑐᓴᓐ.

ᑕᒪᐃᑕ ᑖᒃᑯᐊ ᐊᖑᑏᒃ ᑭᖑᕚᒥᓄᑦ ᕿᒪᐃᖕᒪᑕ ᓇᓗᓇᐃᒃᑲᑕᒥᓂᒃ ᓄᓇᕗᒥᐅᑦ ᐱᑕᖃᓕᖅᑎᓪᓗᒋᑦ, ᐱᐅᔪᓂᒃ ᐱᐅᖏᑦᑐᓂᒃᓗ, ᒪᓕᒃᓗᒍ ᓇᓕᐊᖕᓂᒃ ᐱᒃᑯᒥᒍᓱᖕᒪᖔᖅᐱᑦ.

ᓂᕈᐊᖅᑕᐅᓇᓱᐊᖅᑎᓪᓗᒍ 2013-ᒥ ᓯᕗᓕᖅᑎᐅᕕᖕᒧᑦ, ᑕᑉᑑᓇ ᐅᖃᓚᐅᖅᓯᒪᖕᒪᑦ ᓄᖅᑲᐃᓂᐊᕐᓂᕋᖅᖢᓂ ᐃᓕᓴᕐᕕᓂ ᐃᓅᓯᖏᓐᓂᒃ ᐱᔾᔪᑎᖃᕐᓗᑎᒃ ᐃᓕᓴᖅᓯᒪᓂᖏᓐᓄᑦ ᓇᓗᓇᐃᒃᑯᑕᖅᑖᖅᑎᑦᑎᖃᑦᑕᖅᑐᓂᒃ, ᑕᐃᒪᓐᓇ ᐱᖃᑦᑕᕐᒪᑕ ᐃᓱᒪᒋᖏᓪᓗᒋᑦ ᖃᐃᖃᑦᑕᕐᓂᖏᑦ ᐊᔪᖏᓐᓂᖏᓪᓗ. ᓯᑕᒪᑦ ᐅᑭᐅᑦ ᓈᓯᒪᓕᖅᑎᓪᓗᒋᑦ, ᑕᒪᓐᓇ ᐃᓚᓕᐅᑎᓯᒪᓚᐅᕐᒪᑦ ᐃᓕᓴᖅᑎᓕᕆᔨᒃᑯᑦ ᒪᓕᒐᒃᓴᖓᓂ ᐊᑐᐊᒐᓄᑦ ᐋᕿᒋᐊᕈᑕᐅᓂᐊᖅᑐᒥ ᑲᔪᓯᑎᑕᐅᓚᐅᖏᑦᑐᒥ ᒪᓕᒐᓕᐅᕐᕕᖕᒥ ᑭᖑᓪᓕᖅᐹᒥ ᐃᒃᓯᕚᓕᖅᑎᓪᓗᒋᑦ ᑕᕐᑭᐅᓚᐅᖅᑐᒥ.

ᑭᖑᓪᓕᖅ ᓯᕗᓪᓕᐅᑎᓐᓂᐊᕐᓂᕋᔪᔭᖓ ᑕᑉᑑᓇᐅᑉ ᐃᒡᓗᓕᕆᔪᑏᑦ ᑭᓯᐊᓂᓕ ᑕᑯᒃᓴᐅᔪᒃᑯᑦ ᓱᕚᓪᓕᓗᐊᓚᐅᖏᒻᒥᔪᖅ ᓱᓕ ᑕᕝᕙ ᐃᒡᓗᑭᒃᓴᓗᐊᖅᐳᒍᑦ.

ᐱᖓᔪᐊ ᐊᒃᓱᕉᑎᒋᓂᐊᕐᓂᕋᓚᐅᖅᑕᖓ ᐃᓗᐊᖅᓯᕚᓪᓕᖁᓪᓗᒋᑦ ᓄᓇᓕᖕᒥᐅᓄᑦ ᑮᓇᐅᔭᒃᓴᐅᑕᐅᔪᓐᓇᖅᑐᑦ ᐱᓇᓱᐊᒐᐃᑦ ᐱᕙᓪᓕᐊᑎᑕᐅᖁᓪᓗᓂᒋᑦ. ᑖᓱᒧᖓᓕ, ᓄᓇᕗᒥᐅᑦ ᓇᓗᓇᖏᑦᑐᒥᒃ ᐱᕙᓪᓕᐊᓂᖅᐹᖑᔪᑦ ᑲᓇᑕᓕᒫᒥ. ᖃᓄᑎᒋ ᐊᒃᑎᒋᔪᒥᒃ ᓱᕚᓪᓕᐅᑕᐅᕙ ᑕᑉᑑᓇᐅᑉ ᒐᕙᒪᑎᖓ? ᓇᓗᓇᕐᒥᔪᖅ ᐅᔾᔨᕐᓇᖅᑐᒃᓴᐅᒐᓗᐊᖅᐳᖅ ᓯᕗᓪᓕᕐᒥ ᒪᓕᒐᓕᐅᖅᑎᐅᓕᖅᖢᓂ ᑮᓇᐅᔭᒃᓴᐅᑎᓄᑦ ᐃᖏᕐᕋᔪᑎᓕᕆᔨᓄᓪᓗ ᒥᓂᔅᑕᒋᔭᐅᓚᐅᕐᒪᑦ ᓯᕗᓕᖅᑎᖑᓚᐅᖏᓐᓂᖓᓂ, ᑕᑉᑑᓇ ᑕᒫᓃᓐᓂᖓᓂ ᐊᒥᓱᓂᒃ ᑮᓇᐅᔭᒃᓴᐅᑕᐅᔪᓐᓇᖅᑐᓂᒃ ᐱᕙᓪᓕᐊᔪᖃᖅᓯᒪᖕᒪᑕᑦ ᓄᓇᕗᒥ ᐱᕈᖅᐸᓪᓕᐊᓂᐊᖅᑐᓂᒃ ᑭᖑᓂᕆᓂᐊᖅᑕᑦᑎᓐᓂ, ᐃᖃᓗᖕᓂ ᖃᖓᑕᓲᒃᑯᕕᒃ ᑐᓚᒃᑕᕐᕕᒃᓗ, ᐊᖏᔪᓄᑦ ᒥᑭᔪᓄᓪᓗ ᐅᒥᐊᓄᑦ ᑭᓴᖅᓯᒪᕖᑦ, ᑕᐃᒪᖓᓂᓪᓗ ᐃᑲᔪᖅᓴᐃᓐᓇᖅᖢᓂ ᐅᔭᕋᓐᓂᐊᖅᑎᓂᒃ.

ᑭᓯᐊᓂᓕ ᐱᓕᕆᐊᒃᓴᒥᓂ ᐃᓚᓕᐅᑎᓯᒪᔭᖏᑦ ᐃᓚᖏᑦ, ᑕᑉᑑᓇᐅᑉ ᐊᒃᓱᕉᑎᒋᓂᐊᕐᓂᕋᖅᖢᓂᒋᑦ ᐅᖃᐅᓯᕆᓚᐅᖅᑕᖏᑦ ᑕᐃᒪᖓᓂᑦ ᑭᖑᒻᒧᖔᖅ ᐅᑎᕐᔭᖅᑎᑕᐅᖃᑦᑕᖅᓯᒪᖕᒪᑕ ᒐᕙᒪᑎᑐᖃᒃᑯᓐᓄᑦ ᐊᒻᒪᓗ ᓄᓇᕗᒥ ᐸᕐᓇᐃᔨᒃᑯᑦ ᑲᑎᒪᔨᖏᓐᓄᑦ. ᓄᓇᕗᒥᐅᑦ ᕿᒪᒃᑕᐅᖃᑦᑕᖅᓯᒪᖕᒪᑕ ᐃᓱᒪᒋᔭᖏᑦ ᐃᓚᐅᑎᑕᐅᖏᓱᑎᒃ ᒪᑯᓇᓂ ᐅᑭᐅᖅᑕᖅᑐᒥ ᐅᕐᓱᐊᓗᖕᓂᐊᖅᑏᑦ ᐃᑰᑕᑲᑕᒍᒪᔪᑦ ᓄᖅᑲᖅᑎᑕᐅᑎᓪᓗᒋᑦ, ᐃᑲᔪᖅᓴᖅᑕᐅᔪᓐᓃᓚᐅᕆᓪᓗᑎᒃ ᒐᕙᒪᑎᑐᖃᒃᑯᑦ ᐱᓇᓱᐊᒐᖏᑦ ᓄᒃᑎᖅᑕᐅᓂᐊᔪᔪᑦ ᐅᑭᐅᖅᑕᖅᑐᒧᑦ ᓄᖅᑲᕐᒪᑕ, ᐊᒻᒪᓗ ᑕᒪᓐᓇ ᑕᑉᑑᓇᐅᑉ ᑐᑭᓕᐊᖅᑐᒥᒃ ᐅᓐᓂᕐᓗᒃᓴᐅᑎᒋᓚᐅᕋᓗᐊᖅᖢᓂᐅᒃ ᐸᕐᓇᐃᔩᑦ ᑲᑎᒪᔨᖏᓐᓄᑦ ᓄᖅᑲᖅᑎᑕᐅᓚᐅᖅᑐᖅ ᐅᑭᐅᓕᒫᒥ ᐊᐅᓚᑕᐅᓕᖁᓪᓗᒍ ᐅᒥᐊᕐᔪᐊᒃᑯᑦ ᐅᓯᑲᖅᑕᖅᑐᑦ ᓴᕕᕋᔭᒃᓴᓂᒃ.

ᑖᐃᓐᓇᓕ ᑮᓇᐅᔭᓕᕆᔨᒃᑯᑦ ᒥᓂᔅᑕᒋᓚᐅᖅᑕᖓ ᑕᒪᑐᒪᓂ ᐅᑭᐅᑦᑎᓐᓂ 9-ᓂ, ᑮᑦ ᐱᑐᓴᓐ ᐊᓂᐅᔾᔨᖕᒪᑦ ᐊᒥᓱᓂᒃ ᑎᒥᖁᑎᒋᔭᐅᔪᑦ ᐊᐅᓚᑕᐅᔪᑎᖏᓐᓂᒃ ᖃᐅᔨᒪᓕᖅᖢᓂ ᐱᒻᒪᕆᐅᔪᓂ ᒐᕙᒪᑎᒃᑯᑦ ᐱᓕᕆᕝᕕᖏᓐᓂ. ᑐᕌᒐᖃᓚᐅᕐᒪᑦ ᑮᓇᐅᔭᓕᕆᔪᑎᑎᒍᑦ ᑕᐃᒪᖓᓂᑦ ᒐᕙᒪᑎᒃᑯᑦ ᐊᒥᐊᒃᑯᖃᐃᓐᓈᕐᔪᒃᑎᓐᓇᓱᐊᖅᖢᓂᒋᑦ ᑖᒃᑯᐊ ᐊᑭᓖᔪᑕᐅᔪᓐᓇᖅᑐᒃᓴᐅᓕᖅᐳᑦ ᒪᕐᕉᖕᓂᒃ ᐃᓕᓴᕐᕕᓕᐅᕈᑕᐅᓗᑎᒃ ᐃᓇᖏᖅᓯᔪᑕᐅᓂᐊᖅᑐᓂᒃ ᐃᑭᑕᐅᓪᓗᑎᒃ ᐊᓯᐅᔨᔭᐅᓚᐅᖅᑐᓂᒃ ᑕᒪᑐᒪᓂ ᒪᕐᕉᖕᓂ ᐅᑭᐅᖑᕋᑖᖅᑐᓂ.

ᐃᒥᐊᓗᓕᕆᔨᒃᑯᑦ ᑲᑎᒪᔨᖏᓐᓂᒃ ᑲᒪᔨᐅᓪᓗᓂ, ᒥᓂᔅᑕ ᐱᑐᓯᓐ ᐊᒃᓱᕉᑎᖃᓚᐅᕐᒪᑦ ᐱᐊᓂᒃ ᕗᐊᐃᓐᓂᒃᓗ ᓂᐅᕕᕐᕕᖃᓕᖁᓪᓗᒍ ᓄᓇᕗᒥ ᑕᒪᓐᓇ ᐊᒥᓱᓄᑦ ᐱᒃᑯᒥᒋᔭᐅᓗᐊᖏᒃᑲᓗᐊᖅᑎᓪᓗᒍ. ᐊᒥᓱᓄᓪᓗ ᐱᒃᑯᒥᒋᔭᐅᒋᓪᓗᓂ ᑕᒪᑐᒥᖓ ᓈᒻᒪᓈᖅᓯᓪᓗᓂ ᐋᕿᒃᓱᐃᓚᐅᖅᑐᖅ, ᑭᓯᐊᓂᓕ ᑕᒪᑐᒥᖓ ᐊᑭᒪᓇᓱᐊᖅᑐᑦ ᐊᒥᓲᖕᒪᑕ, ᓇᓗᓇᖏᓕᖅᑐᖅ.

ᐱᓗᐊᖑᐊᖅᑐᒥᒃ, ᐲᑐᓴᓐᓗ ᑕᑉᑑᓇᓗ ᓱᕚᓪᓕᖅᑎᑦᑎᔪᓐᓇᓚᐅᖏᒻᒪᑕ ᒐᕙᒪᑎᒃᑯᑦ ᐊᖑᒻᒪᑎᓗᑎᒃ ᑲᒪᒋᒋᐊᓕᖏᓐᓂᒃ ᐃᓚᖓ 23-ᒥ ᑎᑎᕋᖅᓯᒪᔪᓂᒃ ᓄᓇᕗᑖᕈᑎᐅᑉ ᐊᖏᕈᑎᐊᓂ ᒐᕙᒪᑎᒃᑯᓐᓂ ᐃᖅᑲᓇᐃᔭᖅᑏᑦ ᐅᓄᕐᓂᖅᓴᓂᒃ ᓄᓇᕗᒥᐅᓂᒃ ᐃᖅᑲᓇᐃᔭᖅᑎᖃᓕᖁᓪᓗᒋᑦ ᐃᓄᐃᑦ ᐅᓄᕐᓂᖅᓴᐅᖕᒪᑕ ᑕᐃᒪᓐᓇ ᑕᑯᒃᓴᐅᓂᖅᓴᐅᓕᖁᓪᓗᒋᑦ ᐱᒃᑯᒥᒍᓱᓚᐅᕋᓗᐊᕐᒪᑕ. ᐃᓄᐃᑦ ᐃᖅᑲᓇᐃᔭᖅᑎᒋᔭᐅᔪᑦ ᓄᓇᕗᑦ ᒐᕙᒪᖓᓂ ᐅᓄᕐᓂᖏᑦ ᐃᓱᓕᓯᒪᖕᒪᑕ ᓇᑉᐸᓪᓗᐊᖑᓪᓗᑎᒃ ᓱᓕ 50-ᐳᓴᓐᑦ - ᐃᓄᖅᓴᖅᑐᑦ 85-ᐳᓴᒧᑦ ᑐᕌᒐᖃᔪᖕᒪᑕ - ᑖᒃᑯᓂᖓ ᐊᒃᓱᕉᑎᖃᓚᐅᖅᑐᑦ ᑕᒪᐃᑕ ᓂᕈᐊᖅᑕᐅᓯᒪᓂᖏᓐᓂ ᐱᓂᐊᕐᓂᔪᔭᖏᑦ ᑖᒃᑯᐊ ᒪᕐᕉᒃ ᐊᖑᑏᒃ.

ᒐᕙᒪᑎᑐᓄᑦ ᑭᖑᕚᒥᓄᑦ ᕿᒪᐃᖕᒪᑕᓕ ᓄᓇᕗᑦ ᒐᕙᒪᖓᓂ ᐊᒃᓱᑲᓪᓚᒃ ᑭᖑᓂᖃᕐᓂᐊᖅᑐᑦ ᒐᕙᒪᑎᖓᑕ ᐃᓗᐊᓂ, ᐊᑏ ᑕᒪᑦᑕ ᐸᕐᓇᒃᓯᒪᒋᐊᖃᓕᖅᐳᒍ ᑲᑕᔾᔭᑲᑕᒃᓗᑕ ᐃᖏᕐᕋᓂᐊᓕᕋᑦᑕ.

ᐊᑕᐅᓯᖅ ᕿᓚᓈᕈᑕᐅᔪᓐᓇᖅᑐᖅ ᒪᒃᑯᒃᑐᐃᑦ ᓂᕈᐊᖅᑕᐅᓇᓱᐊᖅᑐᑦ ᒫᓐᓇ ᐊᒥᓲᖕᒪᑕ, ᐃᓚᐅᖃᑕᐅᔪᑦ ᖃᓈᒃᑯᓐᓂ ᑲᑐᔾᔨᖃᑎᒌᖓᓐᓂ, ᐃᖃᓗᖕᒥᐅᓄᑦ ᑖᓐᓇ ᑎᒥᖁᑎᓕᐊᖑᓯᒪᔪᖅ ᐱᒋᐊᖓᖅᑎᑕᐅᓚᐅᖅᑐᖅ ᐱᐅᖅᓱᐊᖁᔭᐅᔪᓂᒃ ᓴᐳᔾᔨᓯᒪᔨᐅᓪᓗᓂ ᒪᒃᑯᑦᑐᓄᑦ ᑭᖑᕚᑎᓐᓄᑦ ᒐᕙᒪᑎᑦᑎᓐᓂ ᐊᐅᓚᑦᑎᔨᒃᓴᓂᒃ ᓯᕗᓕᖅᑎᒃᓴᓂᒃᓗ ᐱᓕᕆᕝᕕᖏᓐᓂ. ᑖᒃᑯᐊ ᒪᒃᑯᒃᑐᐃᑦ ᐃᓚᐅᖃᑕᐅᔪᑦ ᐊᑭᓯᒃᐸᑕ, ᐅᐊᑲᓪᓚᒍᓱᒃᑕᐃᓕᓂᐊᖅᐳᓯ ᖃᖓᑐᐃᓐᓇᖅ ᓂᕈᐊᖅᓯᔪᓐᓇᔪᒫᕋᑦᑕ ᑕᑎᒌᒃᑐᓄᑦ ᑎᒥᖑᖅᑎᑕᐅᓯᒪᔪᓂᒃ ᒐᕙᒪᑎᒃᓴᓂᒃ. ᑕᒪᓐᓇ ᐃᓱᒪᒃᓴᖅᓯᐅᕈᑕᐅᖃᑦᑕᖅᓯᒪᖕᒪᑦ ᒐᕙᒪᑎᓕᕆᔨᓄᑦ ᐱᒃᑯᒥᒋᔭᐅᓇᔭᕐᓂᕋᖅᑕᐅᓪᓗᓂ, ᐅᖃᐅᓯᐅᓚᐅᖅᑐᖅ ᓂᐅᕕᕐᕕᖃᖅᑐᒧᑦ ᑕᒫᓂ ᐅᖃᓪᓚᑲᑕᒍᑕᐅᑎᓪᓗᒍ.

ᕿᓚᓈᕆᔭᖃᕐᒥᔪᒍᑦ ᑭᖑᓪᓕᕐᒥ ᒐᕙᒪᑎᐅᓂᐊᖅᑐᓂᒃ ᐊᓯᐊᓄᖔᖅ ᑕᑉᑑᓇᐅᑉ ᒐᕙᒪᑎᖓᑕ ᐊᑐᐊᒐᖏᑦ ᓵᖔᖁᓗᒋᑦ ᐱᕙᓪᓕᐊᔪᓕᕆᔨᓄᑦ ᑐᓴᖅᓴᐅᑎᑕᐅᔪᓂᒃ ᐃᓱᒪᖅᓱᖁᔨᓚᐅᖏᒻᒪᑕ. ᑕᐃᒪᖓᓂᑦ ᒐᕙᒪᑎᖓᑦ ᑐᓴᐅᒪᑎᑦᑎᓗᐊᓚᐅᖏᒻᒪᑕ ᖃᓄᐃᓕᐅᕐᓂᐊᕐᓂᕐᒥᓂᒃ, ᑐᓴᕐᓇᖅᑐᓂᒃᓗ ᐊᑐᓗᐊᖃᑦᑕᖏᓱᑎᒃ ᓄᓇᓕᖕᒥᐅᓄᑦ ᑐᓴᖅᑎᑦᑎᔪᒪᓕᕌᖓᒥᒃ ᑮᓇᐅᔭᓕᕆᔪᑏᑦ ᐱᔾᔪᑎᒋᓪᓗᒋᑦ ᐊᒻᒪ ᐃᖅᑲᓇᐃᔭᖅᑎᒥᓂᒃ ᐊᓯᒥᓄᑦ ᐃᓱᒪᖅᓱᕐᓗᑎᒃ ᐅᖃᓪᓚᑲᑕᖁᔨᖏᓱᑎᒃ ᐱᕙᓪᓕᐊᔪᓕᕆᔨᓄᑦ ᐱᓚᐅᕐᒪᑕ. ᑕᕝᕘᓇ ᓄᓇᓕᖕᒥᐅᓄᑦ ᐱᔨᑦᓯᕋᑦᑎᐊᓚᐅᖏᑦᑐᑦ.

ᕿᓚᓇᕆᔭᖃᖅᑐᒍᓪᓕ ᓄᓇᕗᒥᐅᓄᑦ: ᒪᒃᑯᖕᓂᖅᓴᐅᓂᐊᓕᕐᒪᑕ ᑲᑎᒪᔨᐅᔪᑦ ᒪᓕᒐᓕᐅᕐᕕᖕᒥ ᐃᓄᐃᑦ ᐊᒥᓲᓂᖅᓴᐅᖏᓐᓇᕐᒪᑕ ᐱᐅᓂᖅᓴᒧᑦ ᐋᕿᒃᓱᖅᓯᒪᓚᖓᔪᑦ ᓇᓗᓇᖏᑦᑐᖅ. ᑕᒪᑐᒪᓂ ᓂᕈᐊᕈᓯᖅᓯ ᐊᑐᕐᓂᖃᓚᖓᔪᑦ.