Skip to content

ᒎᓕᐅᑉᓗᓂ ᓄᖅᑲᖅᑎᑦᓯᖃᑦᑕᖅᐳᑦ ᕼᐋᑭᕈᑎᒥᒃ ᕖᓚᓐ

ᕿᓂᕈᕕᑦ ᕖᓚᓐ ᐊᕐᓇᐅᔪᕐᒥᒃ ᐅᑭᐅᒃᑯᑦ, ᓇᓂᒐᔭᖅᐸᐃᑦ ᓯᐊᕐᕆᔮᕐᕕᖕᒥ, ᐃᓕᑕᕆᑲᐅᑎᒋᓇᔭᖏᑕᒃᓴᕆᕙᐃᑦ.

ᕖᓚᓐ ᐊᕐᓇᐅᔪᖅ ᕼᐋᑭᖃᑕᐅᖃᑦᑕᖅᓯᒪᓕᖅᐳᖅ ᐊᖑᑎᓂᒃ ᐃᓐᓇᕐᓂᒃ ᑕᐃᒪᖓᓂᒃ ᐊᕐᕌᒍᖃᖅᖢᓂ 14-ᓂᒃ. ᓴᓂᕋᔭᐅᑉ ᓯᐊᕐᕆᔮᕐᕕᖓᓄᐊᖃᑦᑕᖅᐳᖅ, ᖁᕕᐊᓱᖃᑕᐅᓪᓗᓂ ᐱᓕᕆᓪᓗᓂ ᐊᑯᓐᓂᖏᓐᓂ ᓱᓪᓗᓕᑦ.

ᐊᑐᖃᑦᑕᖅᐳᖅ Bauer ᒎᓕᑦ ᑮᓇᑉᐸᖓᓂᒃ ᓴᐳᒻᒥᒍᑎᒥᒃ − ᓴᐳᒻᒥᔭᐅᒍᑎᖓ ᑮᓇᒥᓄᑦ ᐊᐅᒃᓴᕋᐃᑦᑐᓄᑦ ᑮᓇᖓ ᒥᓪᓗᖅᑕᐅᖃᑦᑕᕐᒪᑦ.

ᐊᕐᓇᐅᔪᖅ, ᐊᕐᕌᒍᓕᒃ 21-ᓂᒃ, ᓄᖅᑲᖅᑎᑦᓯᖃᑦᑕᓕᖅᐳᖅ ᐊᐅᒃᓴᕋᐃᑦᑐᓂᒃ ᕼᐋᑭᕈᑎᓂᒃ ᑕᐃᒪᖓᓂᑦ ᐊᕐᕌᒍᖃᖅᖢᓂ 13-ᓂᒃ. ᐱᒋᐊᖅᑳᓚᐅᖅᓯᒪᓪᓗᓂ ᓯᐊᕐᕆᔮᖃᑦᑕᖅᖢᓂ ᐊᕐᕌᒍᖃᖅᖢᓂ ᑕᓪᓕᒪᓂᒃ, ᑭᓯᐊᓂ ᐊᓯᐊᓂᒃ ᐱᓕᕆᐊᖃᕆᐊᓕᓚᐅᖅᐳᖅ.

“ᐃᓕᓐᓂᐊᕐᕕᖕᒥ ᓇᑎᕐᒥ ᕼᐋᑭᖑᐊᖃᑦᑕᓚᐅᖅᓯᒪᕗᒍᑦ. ᒎᓕᑕᖃᓚᐅᖏᑦᖢᓂᓗ, ᐆᒃᑑᕈᒪᓚᐅᖅᓯᒪᓪᓗᒍᓗ, ᓯᐊᕐᕆᔮᖃᑕᐅᓪᓗᓂ ᐱᓐᖑᐊᖃᑕᐅᕙᓚᐅᖅᐳᖅ ᐊᖑᑎᓂᒃ ᐃᓐᓇᕙᓪᓕᐊᓕᖅᑐᓂᒃ ᑕᒪᒃᑯᓂᖓ ᐊᕐᕌᒍᖃᖅᑐᓂᒃ 18-ᓂᒃ. ᑕᐃᒪᓐᓇ ᐃᒋᑦᓯᕕᐅᖃᑦᑕᖅᖢᓂ ᐊᒃᓱᕈᑦᓯᐊᖅᑐᓄᑦ ᕼᐋᑭᖅᑐᓄᑦ ᐃᓐᓇᕐᓄᑦ ᑕᒪᓐᓇ ᖃᓄᐃᓚᐅᖏᑉᐳᖅ, ᐅᖃᓚᐅᖅᐳᖅ ᐊᕐᓇᐅᔪᖅ.

“ᓱᑲᓐᓂᖅᓴᐅᓚᐅᖅᐳᖅ ᐊᒃᓱᕈᕐᓇᕐᓂᖅᓴᐅᓪᓗᓂᓗ. ᑕᐃᒪᓐᓇᐃᒍᒪᓚᐅᖅᐳᖓ ᐊᔪᖏᓕᖅᐸᓪᓕᐊᓕᓚᐅᕋᒪ ᒪᒃᑯᒃᑑᓪᓗᖓ. “ᐃᒋᑦᓯᒍᒪᒃᑲᐅᓚᐅᖅᐳᖓ, ᑕᐃᒪᓐᓇ, ᑕᑯᒃᓴᐅᓪᓗᓂ ᕼᐋᑭᕈᑦ, ᑕᐃᒪᓐᓇ ᐊᒃᓱᕈᕐᓇᕐᓂᖅᓴᐅᖕᒪᑕ ᑕᒪᒃᑯᓇᖓ ᑐᓄᐊᓂᑦ ᐃᒋᑦᓯᓂᕐᒥᑦ ᐊᒻᒪ ᑕᓕᐊᑦ ᐊᑐᕐᓗᒍ ᐃᒋᑦᓯᓂᕐᒧᑦ, ᖃᓄᐃᓕᐅᕐᓂᐊᕐᓂᖏᓐᓄᑦ ᐊᔪᕐᓇᕐᓂᖅᓴᐅᖕᒪᑕ ᓇᒧᓪᓗ ᑐᓐᓂᐊᕐᓂᖏᓐᓄᑦ.”

ᑕᐃᒪᓐᓇᐃᒃᑲᓗᐊᖅᑎᓪᓗᒍ, ᒎᓕᓄᑦ ᐊᑐᖅᑕᐅᕙᒃᑐᓂᒃ ᓂᕈᒥᒍᑎᓂᒃ ᐊᑐᖃᑦᑕᖅᖢᓂ, ᓴᖅᑲᒥᒍᑦ ᐊᒻᒪ ᑕᓕᒥᒍᑦ, ᐊᕐᓇᐅᔪᖅ ᓯᐊᕐᕆᔮᐅᑎᖏᑦ ᐅᓂᐅᖅᓯᖃᑦᑕᓚᐅᖅᐳᑦ ᓯᑯᒥᒃ ᑕᐃᒪᓐᓇ ᐋᓐᓂᖅᐸᒃᖢᓂ ᓱᖒᔭᓂᖅᐸᒃᖢᓂᓗ.

“ᑕᒪᐃᓐᓂ ᐱᓐᖑᐊᕈᑎᑦ,” ᐅᖃᓚᐅᖅᐳᖅ.

ᐊᑖᑕᖓ ᐱᒋᐊᖅᑎᑦᓯᓚᐅᖅᓯᒪᕗᖅ ᕼᐋᑭᕐᓂᕐᒥᒃ ᖁᕕᐊᒋᔭᖃᖅᑎᑦᓯᓕᖅᖢᓂ. ᐃᓕᓐᓂᐊᓚᐅᖅᖢᓂᓗ ᖃᓄᐃᓕᐅᕆᐊᖃᕐᓂᕐᒥᒃ ᐃᑎᖅᑎᑦᓯᓇᓱᐊᕐᓂᕐᒧᑦ ᑎᐋᓐ ᐊᒻᒪ ᑏᓄ ᐊᑭᐊᕈᒃᑯᓐᓂᑦ.

ᐱᓐᖑᐊᖃᑕᐅᕙᒃᖢᓂ ᒪᕐᕈᐊᖅᑎᖅᖢᓂ ᐱᖓᓱᐊᖅᑎᖅᖢᓂᓘᓐᓃᑦ, ᐊᕐᓇᐅᔪᖅ ᐊᕐᕌᒍᒥ ᕼᐋᑭᕐᓇᐅᓕᕌᖓᑦ ᐊᓐᓄᕌᖅᑐᖃᑦᑕᖅᖢᓂ ᐊᓐᓄᕋᐃᔭᖅᐸᒃᖢᓂᓗ 80 ᓂᑦ 84ᖏᑕᖅᖢᓂ ᐱᕙᓚᐅᖅᐳᖅ. ᐊᒻᒪᓗ ᐃᓛᓐᓂᒃᑯᑦ ᐱᓐᖑᐊᕐᔪᖃᑕᐅᕙᒃᖢᓂ ᐊᓯᖏᓐᓂ ᓄᓇᓕᖕᓂ, ᑑᓂᒃᑕᐃᒥᓗ ᐃᖃᓗᖕᓂ, ᐊᕐᓇᐅᔪᖅ ᐊᑦᓯᖅᑕᐅᓚᐅᖅᓯᒪᓪᓗᓂ ᒎᓕᑦᓯᐊᕙᐅᓛᖑᓂᖓᓄᑦ 'B' ᐱᓐᖑᐊᖅᑎᓂ ᐊᕐᕌᓂ.

ᕼᐋᑭᖅᑎᓂᒃ Oilers ᐱᐅᒃᓴᑦᓯᐊᖅᖢᓂ, ᐊᕐᓇᐅᔪᖅ ᐃᑲᔪᖅᑐᐃᕙᒃᐳᖅ Cam Talbotᒥᑦ, ᒎᓕᑦᓯᐊᕙᒋᓛᖓ, Dwayne Roloson, ᐃᑲᔪᕐᔪᐊᓚᐅᖅᓯᒪᓪᓗᓂ ᐃᑦᒪᓐᑕᒥ ᐃᑲᔪᖅᖢᓂᓗ Oilersᓂᒃ ᓯᑖᓐᓕ ᑲᑉᑖᖅᑎᑦᓯᓚᐅᖅᓯᒪᓪᓗᓂ 2006-ᒥ.

“ᐅᐱᒋᓯᐊᖅᑕᕋ,” ᐊᕐᓇᐅᔪᖅ ᐅᖃᓚᐅᖅᐳᖅ ᐅᖃᐅᓯᖃᖅᖢᓂ Roloson−ᒥᒃ.

ᕼᐋᑭᕐᓂᐅᑉ ᓯᓚᑖᒍᑦ, ᐱᓕᕆᐊᖃᖃᑦᑕᖅᐳᖅ ᐹᔅᑭᑉᐹᕐᓂᕐᒥᒃ ᐊᓇᐅᓕᒑᕐᓂᕐᒥᒡᓗ ᐊᐅᔭᒃᑯᑦ.

“ᐊᒻᒪ ᐃᓛᓐᓂᓚᐅᓱᖓ ᑯᑭᑦᑕᐹᖃᑦᑕᖅᐳᖓ ᐱᓐᖑᐊᖅᖢᖓ ᑎᑕᐅᓯᖏᓐᓂᒃ ᑖᒃᑯᐊ Metallica," ᐅᖃᓚᐅᖅᐳᖅ, ᐊᒻᒪ ᐱᐅᒋᑦᓯᐊᖅᖢᓂᐅᒃ ᑖᓐᓇ ᑐᓴᕐᓈᕈᑦ Harvester of Sorrow.