Skip to content

ᒎᒍᓪᑯᑦ ᐊᔾᔨᓕᐅᕆᓚᐅᖅᑐᑦ ᓄᓇᕐᔪᐊᑦ ᖄᖓᓂᒥᐅᓂᒃ

ᖁᑦᑎᖕᓂᖅᐹᒥ ᑲᓇᑕᒥ ᒥᕐᖑᐃᖅᓯᕕᒥ ᐊᖅᑯᑎᖃᐅᖏᑦᑑᒐᓗᐊᖅ, ᑭᓯᐊᓂᓕ ᐃᓚᓕᐅᑎᔭᐅᓯᒪᓕᖅᐳᖅ ᐊᖅᑯᑎᒃᑯᑦ ᐱᓱᔪᖑᐊᖅᑐᓂ ᐊᔾᔨᓕᐅᖅᑕᐅᖃᑕᐅᓯᒪᓕᖅᑐᖅ ᓇᒦᓕᕆᐊᖏᓐᓂᒃ ᑕᑯᒃᓴᐅᓪᓗᓂ ᖃᕆᑕᐅᔭᒥ ᓄᓇᖑᐊᑎᒍᑦ ᐱᑕᖃᓕᖅᑐᖅ.

ᑲᓇᑕᒥ ᒥᕐᖑᐃᖅᓯᕕᓕᕆᔨᒃᑯᓐᓂ ᐃᖅᑲᓇᐃᔭᖅᑎ ᐃᐅᕆᒃ ᓚᕙᓚᒻ, ᐅᕙᓂ ᐊᑐᖅᑐᖅ ᒎᒍᓪᑯᑦ 360-ᑎᒍᕇᔅᓂᒃ ᑲᐃᕙᔪᓐᓇᖅᑐᒥᒃ ᐊᔾᔨᓕᐅᕈᑎᒥᒃ ᓄᖅᑲᖓᓚᐅᑲᒃᑎᓪᓗᒋᓄᓇᒧᑦ ᐊᔾᔨᓕᐅᕆᒋᐊᖅᓯᒪᓪᓗᑎᒃ ᐱᓱᔪᒋᐊᖅᓯᒪᔪᑦ ᖁᑦᑎᖕᓂᖅᐹᒥ ᒥᕐᖑᐃᖅᓯᕕᖕᒥ ᐊᖅᑯᑎᒦᑦᑐᑎᑐᑦ ᑕᑯᒃᓴᐅᔪᓐᓇᕐᓂᐊᕐᒪᑕ.

“ᑕᐃᒪᖓᓂᑦ ᓄᓇᖑᐊᓕᐅᖅᑎᓂ ᐱᐅᓂᖅᐹᒥᒃ ᐋᕿᒃᓱᐃᓇᓱᐊᖃᑦᑕᖅᓯᒪᒐᑦᑕ ᑲᓇᑕᒥᐅᑦ ᓄᓇᖓ ᖃᓄᑎᒋ ᐊᒃᑎᒋᓂᖓᓂᒃ ᑕᑯᑎᑦᑎᔪᒪᓪᓗᑕ ᐊᒻᒪᓗ ᖃᕆᑕᐅᔭᑎᒍᑦ ᑕᑯᒃᓴᐅᔪᓐᓇᖅᑐᓂᒃ ᓄᓇᖑᐊᓕᐅᖅᖢᑕ ᐊᑐᓂ ᑕᑯᔭᖅᑐᖅᑕᐅᔪᓐᓇᖅᑐᓂᒃ ᓄᓇᓂ ᑲᓇᑕᒥᐅᓄᑦ ᒎᒍᓪᑯᑦ ᑕᕐᕆᔭᐅᑏᑦ ᑕᑯᔭᐅᔪᓐᓇᕐᓂᐊᕐᒪᑕ ᒎᒍᓪᑯᑦ ᐅᖃᖅᑎᖓ ᐅᓂᒃᑳᓚᐅᖅᑐᖅ ᐊᓕᒃᓵᓐᑐᕋ ᕼᐊᒥᖕ ᒃᓚᐃᓐ ᖃᕆᑕᐅᔭᑎᒍᑦ ᐄ-ᑎᑎᕋᖅᖢᓂ.

ᖁᑦᑎᖕᓂᖅᐹᖅ, ᐃᓄᒃᑎᑐᑦ ᑐᑭᖃᖅᑐᖅ ‘ᓄᓇᕐᔪᐊᑉ ᖄᖓᓃᒥᐅᑦ’, ᐊᖏᔪᑲᓪᓛᓗᖕᒥᒃ ᓄᓇᒥᒃ ᓈᓯᓯᒪᖕᒪᑦ ᓄᓇᕐᔪᐊᑉ ᑲᔾᔨᖓᓂᑦ (ᐃᒻᒪᖄ ᑖᓐᓇ 800-ᑭᓛᒥᑐᒥᒃ ᐅᖓᓯᖕᓂᖃᖅᑐᖅ ᑲᓇᖕᓇᖔᖓᓂᑦ) ᖃᐅᓱᐃᑦᑐᒥᐅᓂᑦ ᐊᐅᓱᐃᑦᑐᒥᐅᓂᓪᓗ (ᐃᒻᒪᖄ 700-ᑭᓛᒥᑐᒥᒃ ᓂᒡᒋᖔᖔᓂ), ᓄᓇᖑᐊᑎᒍᑦ ᖁᑦᑎᖕᓂᖅᐹᖑᖕᒪᑦ ᐃᐊᓪᔅᒥᐅᑉ ᕿᑭᖅᑕᖓᓂ.

ᒥᕐᖑᐃᖅᓯᕕᒃ ᐊᐅᓚᑦᑎᔨᖃᖅᑐᖅ ᐃᒪ ᐊᑉᑕᓐᒥᒃ ᐅᓂᒃᑲᐅᓯᕆᓚᐅᕐᒪᒍ ᖁᑦᑎᖕᓂᖅᐹᑉ ᓴᐃᒻᒪᖅᑯᑎᐊᓂᒃ ᐊᐅᓚᑎᑦᑎᓚᐅᖅᑐᖅ ᑐᓴᕋᒥ ᐱᐊᓂᒃᓯᓂᕋᕐᒪᑕ ᒎᒍᓪᑯᑦ ᓄᓇᖑᐊᓕᐅᖅᑎᖏᑦ ᐊᒻᒪᓗ ᑲᓇᑕᒥ ᒥᕐᖑᐃᖅᓯᕕᓕᕆᔨᒃᑯᑦ ᐱᓇᓱᐊᖃᑎᒌᒍᑎᒋᔭᖓᑦ ᐃᓱᓕᓐᓂᐊᓕᕐᒪᑦ 2016-ᒥ.

“ᐊᓕᐊᓇᐃᒍᓱᓗᐊᒧᑦ ᕿᒡᒋᖅᑕᓕᓚᐅᖅᑐᖓ, ᐅᖃᕆᓪᓗᓂ ‘ᐃᓱᒪᒋᔭᒃᑲ ᑕᐃᒃᑯᐊ ᐊᕿᒃᓱᐃᔨᒋᓚᐅᖅᑕᕗᑦ Trekker-ᒃᑯᑦ ᑎᑭᓴᓚᐅᕋᑦᑎᒍ ᑕᒫᓂ ᓄᓇᕐᔪᐊᑉ ᖁᑦᑎᖕᓂᖅᐹᖓᓂ ᐊᔾᔨᓕᐅᕆᖁᓪᓗᒋᑦ ᒎᒍᓪᑯᑦ ᑕᑯᒃᓴᐅᑎᑕᐅᓂᐊᖅᑐᓂᒃ ᑕᒪᑐᒪᓂ ᑭᖑᓪᓕᖅᐹᕆᓕᖅᑕᖓᓂ ᐅᑭᐅᒥ ᐱᓇᓱᐊᖃᑎᒋᓪᓗᒋᑦ. ᐃᓱᓕᓕᖅᑎᓪᓗᒍ ᐱᕝᕕᒃᓴᖃᓪᓗᐊᓕᓚᐅᕋᑦᑕ.’ ᐊᓱᒃᓗᒃ ᑕᐃᒪᓐᓇ ᐱᒃᑯᒥᒍᓱᓚᐅᕋᒪ ᐱᕙᓪᓕᐊᑎᑕᐅᔪᖃᖅᐸᑦ ᑕᒫᓂ,” ᐅᖃᕆᓪᓗᓂ ᐊᑉᑕᓐ.

ᐊᑐᓂ ᓄᓇᕗᒥ ᒥᕐᖑᐃᖅᓯᕕᓕᐊᕆᔭᐅᓯᒪᔪᑦ ᓯᑕᒪᐅᖕᒪᑕ; ᐊᐅᔪᐃᑦᑐᒥᐅᑦ, ᖃᐅᓱᐃᑦᑐᒥᐅᑦ, ᓯᕐᒥᒥᐅᑦ ᐊᒻᒪᓗ ᐅᒃᑯᓯᒃᓴᓕᖕᒥᐅᑦ ᐊᑐᓂ ᒥᕐᖑᐃᖅᓯᕕᖕᓂᒃ ᐊᐅᓚᑦᑎᔨᖃᐅᕐᒪᑕ ᐃᓄᖕᓂᒃ ᐊᒻᒪᓗ ᒐᕙᒪᑎᒃᑯᑦ ᑲᑎᒪᔨᕋᓛᖃᖅᖢᑎᒃ.

“ᑕᐃᒪᖓᓂᑦ ᓄᓇᓕᖕᒥᐅᓂᒃ ᑐᓴᐅᒪᑎᑦᑎᒋᐊᖃᕋᑦᑕ ᑲᑐᔾᔨᓪᓗᑕ ᒥᕐᖑᐃᖅᓯᕕᓂᒃ ᐊᐅᓚᑦᑎᔨᐅᖃᑎᑦᑎᓐᓂᒃ ᑲᑎᒪᔨᕋᓛᖃᕋᑦᑕ. ᐅᐱᕐᖓᕌᖓᑦ, ᐳᓚᕋᑲᑕᒃᑐᑦ ᑎᑭᑉᐸᓪᓕᐊᓕᓚᐅᖏᓐᓂᖏᓐᓂ ᓴᓇᓯᒋᐊᖃᑦᑕᖅᑐᒍᑦ, ᑲᑎᒪᖃᑎᒋᓚᐅᖅᖢᒋᑦ ᓄᓇᓕᖕᒥᐅᑦ ᐊᐅᓚᑦᑎᔨᐅᖃᑎᕗᑦ. ᑐᓴᕐᕕᒋᓪᓗᒋᑦ ᐱᒃᑯᒥᒋᔭᖏᓐᓂᒃ ᐃᓱᒫᓗᒋᔭᖏᓐᓂᒃᓗ ᐊᑐᐊᖅᓯᓪᓗᑕ ᐱᓕᕆᐊᒃᓴᓂᒃ ᐋᕿᒃᓱᐃᖃᑦᑕᕋᑦᑕ,” ᐅᖃᕆᓪᓗᓂ ᐊᑉᑕᓐ, ᐊᐅᓚᑦᑎᔨᒋᔭᐅᔪᖅ ᐊᑯᓂᐅᓕᖅᑐᖅ 2014-ᒥᑦ.

“ᑲᒪᒋᔭᐅᔪᓂ ᑕᒪᑐᒪᓂ ᖃᐅᔨᒪᖃᑦᑕᐅᑎᖃᑦᑕᖅᑐᒍᑦ ᐋᕿᒃᓱᖅᑕᐅᕙᒌᖃᑦᑕᕐᒪᑕ ᐱᒃᑯᒥᒋᔭᐅᓂᖅᐹᖑᔪᑦ ᑮᓇᐅᔭᑎᒍᑦ ᐊᑭᓕᖅᓱᐃᔨᐅᖃᖅᑕᖅᑐᓄᑦ.”

ᐃᓄᐃᓪᓘᓐᓃᑦ ᑕᒪᐅᖓᑲᑕᓗᐊᖃᑦᑕᖏᒻᒪᑕ ᑕᒪᑐᒪᓂ ᓱᓕ.

“ᖁᑦᑎᖕᓂᖅᐹᖅ ᐅᖓᓯᓗᐊᕐᒪᑦ ᑭᒃᑯᑐᐃᓐᓇᓄᑦ ᑕᑯᔭᖅᑐᖅᑕᐅᓇᓱᐊᕆᐊᒃᓴᖅ ᐱᔭᕆᑐᓗᐊᕆᔭᐅᖃᑦᑕᕐᒪᑦ ᐃᓱᒪᒋᓪᓗᒍ ᐊᐅᔪᐃᑦᑐᒥᐅᓂᒃ ᖃᐅᓱᐃᑦᑐᒥᐅᓂᓪᓗ ᑕᒪᓐᓇ ᓄᓇᖓ ᐊᑐᖅᑕᐅᖃᑦᑕᕈᓐᓃᕐᒪᓘᓐᓃᑦ,” ᐅᖃᕆᓪᓗᓂ ᐊᑉᑎᓐ.

“ᑕᐃᓱᒪᓂᐊᓘᑎᓪᓗᒍ ᑕᒫᓂ ᓄᓇᖃᖅᐸᒃᑐᕕᓂᐅᒐᓗᐊᑦ ᓇᔪᖅᑕᐅᕙᒃᑐᕕᓃᑦ ᑕᑯᒃᓴᐅᔪᑦ ᓱᓕ 5000-ᓂ ᐅᑭᐅᓂ ᑕᒫᓂ ᐊᑯᓐᓂᖓᓂ, ᑭᓯᐊᓂᓕ ᖃᓂᓐᓂᖅᓴᓂ 800-ᓂ ᐅᑭᐅᓂ ᓱᓕ ᓇᔪᖅᑕᐅᕙᖕᓂᕐᒪᑕ ᐃᓚᖓᓂ ᑕᒫᓂ ᓄᓇᒥ.”

ᑭᓯᐊᓂᓕ ᓄᓇᖓ ᑕᒪᓐᓇ ᐅᐸᒋᐊᒃᓴᖅ ᐱᔭᕆᑐᖕᒪᑦ ᐃᓄᖕᓄᓪᓘᓐᓃᑦ ᐅᐸᒃᑕᐅᒐᔪᐃᒻᒪᑦ, ᐊᔾᔨᓕᐅᖅᑕᐅᒃᐸᑦ ᑕᑯᔪᒪᔪᓄᑦ ᐱᕝᕕᒃᓴᖃᖅᑎᑦᑎᓇᓱᐊᓕᔪᔪᒍᑦ ᒎᒍᓪᑯᑎᒍᑦ Trekker-ᑯᑦ ᓄᓇᖑᐊᖁᑎᖓᓐᓂ ᐃᓚᓕᐅᑎᔭᐅᖁᓪᓗᒍ ᐊᔾᔨᓕᐅᖅᑕᓗᓂ ᑭᓯᐊᓂᐅᓚᐅᕐᒪᑦ ᐊᑭᓕᖅᑕᐅᓪᓗᓂ ᒪᕐᕉᖕᓄᑦ ᑎᒥᖁᑎᒋᔭᐅᔪᓄᑦ.

“ᑕᐃᒪᓐᓇ ᓄᓇᓕᖕᒥᐅᓄᑦ ᑕᑯᔭᐅᔪᓐᓇᖅᓯᕗᖅ ᒎᒍᒃᑯᑦ Trekker-ᖓᓃᓕᕐᒪᑦ. ᑕᐃᒪ Trekker-ᑯᑦ ᑕᐅᑐᒍᒪᔪᑦ ᑕᕐᕆᔭᕈᓐᓇᖅᓯᔪᑦ ᖃᐅᓱᐃᑦᑐᒥᐅᓂᒃ ᐊᐅᓱᐃᑦᑐᒥᐅᓂᒃᓗ ᐊᒃᓱᐊᓗᒃ ᑕᒪᓐᓇ ᐱᒃᑯᒥᒋᔭᐅᓚᐅᖅᑐᖅ.

ᐊᒃᑎᒋᓂᖃᖅᑐᖅ 37,775 ᓯᒃᑭᑕ ᑭᓛᒥᑐᓂᒃ ᓈᓯᓪᓗᓂ ᑭᖑᓪᓕᐅᓪᓗᓂ ᒥᑭᓐᓂᖅᓴᐅᕌᕐᔪᒃᑐᑦ Wood Buffalo National Park-ᒥᑦ, ᓄᓇᓯᐊᑉ ᐃᐊᓪᐴᑕᒥᐅᓪᓗ ᐊᑯᓐᓂᖓᓃᑦᑐᒥᑦ, ᓄᓇᑐᐃᓐᓈᓗᖕᒥ.

ᐊᑉᑕᓐ ᐃᓱᒪᓂᕋᑦᖢᓂ ᐅᓂᒃᑳᓚᐅᖅᑐᖅ ᐃᓚᐃᓐᓈᐱᖓ ᐊᔾᔨᓕᐅᖅᑕᐅᔪᓐᓇᓚᐅᕐᒪᑦ ᑕᑯᔭᐅᔪᓐᓇᖅᓯᔪᖅ.

“ᐃᒻᒪᖄ ᓈᓯᔪᓐᓇᓚᐅᖅᑐᒍᑦ ᑎᑭᓪᓗᒍ 300 ᓯᒃᑭᑕ ᑭᓛᒥᑐᓂᒃ,” ᐅᖃᕆᓪᓗᓂ “ᑐᕌᒐᖃᓚᐅᕋᑦᑕ ᐊᔾᔨᓕᐅᕆᔪᒪᓪᓗᑕ ᑭᒃᑯᑐᐃᓐᓇᓄᑦ ᑕᑯᔪᒥᓇᕋᔭᖅᑐᓂᒃ ᐱᒃᑯᒥᒋᔭᐅᓂᖅᐹᓂᒃ ᑲᔾᔮᕐᓇᕐᓂᖏᓐᓄᑦ ᑕᑯᒋᐅᕆᐊᖅᑐᖃᑦᑕᖅᑐᓄᑦ ᐳᓛᕆᐊᖅᑕᐅᔪᒥᓇᕋᔭᖅᑐᓂᒃ. ᑕᑯᖅᑯᔾᔨᓪᓗᑕ ᐱᓱᔪᒃᕕᐅᔪᓐᓇᖅᑐᒥᒃ Air Force Loop-ᖑᓂᕋᖅᑕᐅᔪᒥ. ᑖᓐᓇ 140-ᑭᓛᒥᑐᓂᒃ ᑕᑭᓂᖃᖅᑐᖅ ᓇᓗᓇᐃᒃᑯᑦᑎᖅᑐᖅᓯᒪᓪᓗᓂ ᐱᓱᔪᒃᕕᐅᔪᓐᓇᖅᑐᖅ ᐱᒋᐊᖓᕐᕕᖃᕐᒪᑦ ᑖᖕᑯᐊᕆᐅᑉ ᑲᖏᖅᓱᖓᓂᑦ.”

ᐊᔾᔨᓕᐅᖅᑏᑦ ᐊᔾᔨᓕᐅᕆᔪᓐᓇᓚᐅᖅᑐᑦ ᐃᓚᖓᓂᒃ ᖁᓕᒥᒎᓕᒃᑯᑦ.

ᐃᐅᕆᒃ ᓚᕙᓛᒻ ᐃᓚᐅᖃᑕᐅᓚᐅᕐᒪᑦ ᑲᓇᑕᒥ ᒥᕐᖑᐃᖅᓯᕕᓕᕆᔨᒃᑯᓐᓂ ᐃᖅᑲᓇᐃᔭᖅᑎ ᑖᓱᒥᖓ ᓄᓇᒥ ᐊᔾᔨᓕᐅᕆᔨᐅᓂᕐᒥᒃ ᐃᓕᓴᖅᓯᒪᔪᖅ 360-ᑎᒍᕇᒥᒃ ᐊᔾᔨᓕᐅᕈᑎᖃᕐᒪᑕ ᒎᒍᓪᑯᑦ ᐊᑐᖅᖢᑎᒃ. ᐅᕿᖏᑦᑐᑲᓪᓚᐅᖕᒪᑦ ᐊᖏᔪᕈᓘᓪᓗᓂᓗ. ᐊᑉᑕᓐ ᐃᓚᐅᓚᐅᖅᑐᖅ ᐊᔾᔨᓕᐅᕆᔪᓂ ᓇᒧᑐᐃᓐᓇᐅᔾᔨᑲᑕᒃᖢᓂ ᓄᓇᓄᑦ ᐅᐸᒋᐊᖅᓴᖅ ᐱᔭᕆᑐᔪᓄᑦ, ᓄᓇᓗᒃᑐᓄᓪᓗ ᐃᓄᖃᖏᑦᑎᐊᖅᑐᓄᑦ ᐊᔾᔨᓕᐅᖅᑕᐅᓚᐅᕐᒪᑕ ᑲᔾᔮᕐᓇᖅᑐᑦ.

“ᐃᓛᓐᓂᒃᑯᑦ ᐅᑭᐅᖅ ᒪᓕᒃᖢᒍ 150-ᓂᑦ 200-ᓄᑦ ᑕᒪᐅᖓ ᓂᐅᕈᓯᒪᔪᖃᐅᖃᑦᑕᕐᒪᑦ ᒥᕐᖑᐃᖅᓯᕕᖕᒥᒃ ᑕᑯᒋᐅᕆᐊᖅᑐᖅᓯᒪᔪᓂᒃ, ᐊᒻᒪᓗᖅᑕᐅᖅ ᐊᒥᓱᓄᑦ ᖃᐅᔨᓴᖅᑎᓄᑦ ᑎᑭᓯᒪᕕᐅᖃᑦᑕᕆᓪᓗᓂ. ᐊᒻᒪᓗᑦᑕᐅᖅ ᐅᓇᑕᖅᑐᒃᓴᐃᑦ ᒥᐊᓂᖅᓯᔨᐅᔪᑦ ᑕᒪᑐᒥᖓ ᑲᓇᑕᐅᑉ ᓄᓇᖁᑎᖓᓂᒃ ᑕᒪᐅᖓ ᒥᕐᖑᐃᖅᓯᕕᖕᒧᑦ ᐆᒃᑐᕋᕆᐊᖅᑐᖃᑦᑕᕐᒪᑕ. ᐃᓛᓐᓂᓚᐅᓱᖓᒃᑯᓪᓗ ᐅᒥᐊᕐᔪᐊᓄᑦ ᑎᑭᑕᐅᓚᐅᖅᐸᒃᑭᓪᓗᓂ. ᑭᓯᐊᓂᓕ ᑕᒪᐅᖓ ᑎᑭᑦᑐᑦ ᓄᓇᖓᓂ ᑕᑯᔭᖅᑐᖅᖢᑎᒃ ᐃᒻᒪᖄ 25 ᐅᕝᕙᓘᓐᓃᑦ 30-ᒧᑦ ᑎᑭᓯᒪᓚᐅᕐᒪᑕ” ᐅᖃᕆᓪᓗᓂ ᐊᑉᑕᓐ, ᐃᓚᓐᓂᒃᑯᑦ ᐅᑭᐅᓕᒫᒥ ᐱᖓᓱᐃᓐᓇᐅᓱᖑᒻᒪᕆᒃᑐᑦ ᑎᑭᓪᓚᑦᑖᖅᓯᒪᔪᑦ ᑕᑯᔭᖅᑐᖅᖢᑎᒃ.

ᐊᕐᕌᒍᑕᒫᑦ ᐊᔾᔨᒋᖏᖃᑦᑕᕐᒪᑕ, ᑭᓯᐊᓂᓕ ᐃᓱᒪᓇᖅᑐᖅ ᐅᐊᑲᓪᓚᐅᓂᖓ ᑕᒪᐅᖓ ᑎᑭᒋᐊᒃᓴᖅ ᐃᓱᒪᒋᓪᓗᒍ.”

ᐊᑉᑕᓐ ᐅᖃᕆᓪᓗᓂ ᐊᑭᑐᔪᑲᓪᓚᐅᖕᒪᑦ ᓄᓇᖓᓂᒃ ᐊᔾᔨᓕᐅᕆᓇᓱᐊᕆᐊᒃᓴᖅ ᑕᐃᒪᓐᓇ ᐊᒥᓱᓂᑦ ᒥᕐᖑᐃᖅᓯᕖᑦ ᑮᓇᐅᔭᖏᓐᓂᑦ ᑲᑎᖅᓱᐃᓪᓗᑕ ᑭᓯᐊᓂ ᐊᑭᓖᔪᓐᓇᖅᓯᓚᐅᖅᑐᒍᑦ.

“ᐱᓇᓱᐊᖃᑎᖃᓚᐅᖅᑐᒍᑦ Polar Continental Shelf-ᑯᑦ ᖃᐅᔨᓴᖅᑎᖏᓐᓂᒃ ᑖᒃᑯᐊ ᐱᒋᐊᖓᕐᕕᖃᕐᒪᑕ ᑐᓚᒃᑕᕐᕕᖃᖅᖢᑎᒃ ᖃᐅᓱᐃᑦᑐᒥᐅᓂ ᖃᖓᑕᓱᒃᑯᑦ ᑕᒪᐅᖓᐅᔾᔭᐅᓪᓗᑎᒃ ᐃᓛᓐᓂᒃᑯᓪᓗ ᖁᓕᒥᒎᓕᒃᑯᑦ ᓄᓇᓂᒃ ᓈᓯᓇᓱᐊᖃᕐᑕᕐᒪᑕ ᒥᐊᓂᖅᓯᔩᑦ ᐊᑐᖅᑐᐊᕐᕕᒋᓚᐅᖅᑕᕗᑦ,” ᐅᖃᕆᓪᓗᓂ.

“ᐊᑭᑐᔪᑲᓪᓚᐅᓚᐅᕐᒪᑦ ᑕᒪᐅᖓᖅᑎᑦᑎᓇᓱᐊᖅᖢᓂ  ᒎᒍᓪ Trekker-ᑯᑦ ᐃᖅᑲᓇᐃᔭᖅᑎᖏᓐᓂᒃ ᓄᓇᓕᖕᓄᑦ ᖃᓂᒋᔭᖓᓃᑦᑐᓄᑦ ᖃᐅᓱᐃᑦᑐᒥᐅᓂᒃ ᐊᐅᓱᐃᑦᑐᒥᐅᓂᒃᓗ ᑭᓯᐊᓂ ᐊᖅᑯᓵᖅᓯᓚᐅᖅᖢᑎᒃ ᑖᕗᖓ ᒥᕐᖑᐃᖅᓯᕕᖕᒧᑦ ᑎᑭᑕᐃᓐᓇᓚᐅᕐᒪᑕ ᖃᖓᑕᓲᒥᒃ ᐊᑐᖅᑐᐊᖅᖢᑎᒃ $50,000,-ᕌᖅᑎᓪᓗᒍ, ᐃᖅᑲᓇᐃᔭᖅᑎᖏᓪᓗ ᐊᑭᓕᕆᐊᖃᖅᖢᒋᑦ ᖄᖓᒍᑦ.”

ᒎᒍᓪᑯᑦ ᐊᔾᔨᓕᐅᕈᑎᖓ ᑕᒪᐅᖓ ᑎᑭᓯᒪᓕᖅᐳᖅ ᐊᒻᒪᓗ ᐊᐅᔪᐃᑦᑐᒧᑦ ᒥᕐᖑᐃᖅᓯᕕᐊᓄᑦ.

“ᑲᓇᑕᒥ ᒥᕐᖑᐃᖅᓯᕕᓕᕆᔨᒃᑯᑦ ᑕᐃᒪᖓᓂᑦ ᐱᓇᓱᐊᖃᑎᖃᐃᓐᓇᕐᓂᐊᓕᖅᑐᑦ ᓱᓕ, ᒎᒍᓪᑯᑦ ᓄᓇᖑᐊᓕᐅᖅᑎᖏᓐᓂᒃ ᐊᑐᕈᓐᓇᕐᓂᐊᖅᑐᑦ 2020-ᒧᑦ ᑎᑭᓪᓗᒍ,” ᐅᖃᕆᓪᓗᓂ ᓄᓇᕗᒥ ᓄᓇᒧᑦ ᐱᓱᔪᖃᑦᑕᖅᑐᓂᒃ ᑲᒪᔨᐅᔪᖅ ᐱᓕᐴᓯ ᒪᒃᑯᒥᔅᑭ.

“ᒪᓐᓇ ᐅᖃᓪᓚᖃᑎᒋᒃᑲᓂᓕᓚᐅᕋᑦᑎᒍ ᖃᓄᖅ ᒎᒍᓪᑯᑦ ᐊᔾᔨᓕᐅᕈᑎᖓᓂᒃ ᐊᑐᕐᓗᑕ ᐱᓕᕆᓂᐊᕐᒪᖔᑦᑕ ᐅᓂᒃᑲᐅᑎᓪᓗᒋᑕᒪᑐᒪᓂ ᐊᐅᔭᐅᓂᐊᖅᒥ ᑕᑯᒃᓴᐅᑎᑦᑎᔪᒪᒐᑦᑕ ᐱᒃᑯᒥᓇᖅᑐᓕᒫᓂᒃ ᑲᓇᑕᒥ ᒥᕐᖑᐃᖅᓯᕕᖕᓂᒃ ᓄᓇᕗᒥ ᐊᒻᒪᓗ ᐊᓯᑦᑎᓐᓂ ᓄᓇᖃᖅᑐᓄᑦ ᑕᑯᔭᐅᑎᓐᓂᐊᕐᓗᒋᑦ ᓄᓇᑦᑎᓐᓂ ᑲᔾᔮᕐᓇᖅᑐᖁᑎᕗᑦ ᑲᓇᑕᒥᐅᓄᑦ ᐊᖅᑯᑎᒃᑯᑦ ᐱᓱᒃᑐᑎᑐᑦ ᑕᑯᒃᓴᐅᓗᑎᒃ.”