Skip to content

ᑲᖏᖅᖠᓂᕐᒥ ᐃᖃᐃᓕᓴᖅᑏᑦ ᓵᓚᖃᕋᓱᐊᖅᐳᑦ ᕙᐃᒐᔅᒥ

ᐃᓚᒋᔭᐅᔪᑦ ᑲᖏᖅᖠᓂᕐᒥ ᐊᖅᓴᕐᓃᑦ ᐅᔭᐅᑦᑕᖅ (ᐊᖅᓴᕐᓃᑦ) ᐃᖃᐃᓕᓴᕐᓂᕐᒧᑦ ᑲᑎᙵᓂᐅᔪᓄᑦ ᐱᖅᓯᓚᐅᖅᐳᑦ ᐊᑕᐅᓯᕐᒥ ᓄᖅᑲᕐᓂᐅᔪᒥ ᐱᔪᒪᓇᔭᖅᑕᒥᓂᑦ ᑎᑎᕋᖅᓯᒪᓂᐅᔪᒥ, ᐊᒻᒪ ᓴᙱᔪᒥ ᑕᑯᒃᓴᐅᑎᑦᑎᓂᖃᖅᖢᑎᒃ ᓵᓚᖃᕋᓱᐊᕐᓂᐅᔪᒥ ᓛᔅ ᕙᐃᒐᔅᒥ ᒫᔾᔨ 2-ᒥ 4-ᒧᑦ.

ᖃᓄᐃᓐᓂᐅᔪᖅ ᑲᒪᒋᔭᖃᓚᐅᖅᐳᑦ ᐅᖓᑖᓂ 80-ᓂ ᑲᑎᙵᓂᐅᔪᓂᑦ ᑲᓇᑕᓕᒫᒥ ᐊᒻᒪ ᔫᓇᐃᑎᑦ ᔅᑕᐃᑦᔅᓂ.

Members of the Rankin Inlet Aqsarniit Ujauttaq (Northern Lights) gymnastics club proudly display their medal haul from a gymnastics competition in Las Vegas on March 4, 2018.
ᐃᓚᒋᔭᐅᔪᑦ ᑲᖏᖅᖠᓂᖅ ᐊᖅᓴᕐᓃᑦ ᐅᔭᐅᑦᑕᖅ (ᐊᖅᓴᕐᓃᑦ) ᐃᖃᐃᓕᓴᕐᓂᕐᒧᑦ ᑲᑎᙵᓂᐅᔪᓄᑦ ᐅᐱᐅᖅᑲᓪᓗᑎᒃ ᑕᑯᒃᓴᐅᑎᑦᑎᕗᑦ ᐅᔭᒥᖏᓐᓂ ᒫᓐᓇᓕᓴᐅᔪᒥ ᓵᓚᖃᕋᓱᐊᕐᓂᐅᔪᒥ ᓛᔅ ᕙᐃᒐᔅᒥ ᒫᔾᔨ 4-ᖑᑎᓪᓗᒍ.

ᑲᖏᖅᖠᓂᖅ ᐃᖃᐃᓕᓴᖅᑏᑦ ᑲᒪᑎᑦᑎᓚᐅᖅᐳᑦ ᑲᑎᙵᓂᐅᔪᓂ ᐊᑐᖅᐸᒃᑕᖏᓐᓂᑦ, ᐊᑐᓚᐅᖅᑐᒥ ᐸᐃ ᒑᓚᓯᐅᑎᒥᑦ ᐃᙱᐅᓯᐊᖓᓂ ᐅᑭᐅᕐᒥ ᓂᔾᔮᑎᑕᐅᓂᐅᓪᓗᓂ ᑕᑯᒃᓴᐅᑎᑕᐅᓂᕆᔭᐅᓪᓗᓂ.

ᐊᐅᓪᓛᕐᓂᐅᔪᖅ ᐃᖃᐃᓕᓴᕐᓂᒨᑐᐊᖑᓚᐅᙱᓚᖅ, ᑲᑎᙵᔨᐅᔫᑉ ᐊᔪᕆᖅᓱᐃᕙᒃᑐᒥ ᓚᐃᓴ ᑯᕋᔅᑭ ᐋᖅᑭᒃᓱᐃᑎᓪᓗᒍ ᖃᔅᓯᒐᓛᓗᖕᓂ ᐊᓕᐊᓇᐃᓐᓂᐅᔪᓂ ᐊᒻᒪ ᐃᓕᓐᓂᐊᕐᓂᕐᒧᑦ ᓄᖅᑲᕐᓂᐅᔪᓂ ᐊᒻᒪ ᖃᓄᐃᓕᐅᕐᓂᐅᔪᓂᑦ ᑕᐅᕙᓃᑎᓪᓗᒋᑦ.

ᑯᕋᔅᑭ ᐅᖃᓚᐅᖅᐳᖅ ᑲᑎᙵᓂᐅᔪᑦ ᐅᓪᓗᓂᒃ ᒪᕐᕉᖕᓂ ᐅᐃᓂᐱᐊᒡᒦᓚᐅᖅᐳᑦ ᕙᐃᒐᔅᓕᐊᖅᐸᓪᓕᐊᑎᓪᓗᒋᑦ.

ᐅᖃᓚᐅᖅᐳᖅ ᐅᐃᓂᐱᐊᒡᒥ ᐅᔭᖅᑲᓄᑦ ᒪᔪᕋᕆᐊᓚᐅᖅᐳᑦ ᐊᒻᒪᓗ ᐳᓚᕋᖅᖢᑎᒃ ᒪᕐᕉᖕᓂ ᐊᔾᔨᒌᙱᑦᑐᓂ ᑐᕌᒻᐳᓖᖃᕐᕕᐅᔪᓄᑦ (ᕿᒡᒋᖅᑕᕐᕕᐅᔪᓄᑦ), ᖃᓄᐃᓐᓂᐅᔪᓂ ᒪᒃᑯᒃᑐᓂ ᐱᙳᐊᖅᑎᐅᔪᓂᑦ ᓱᓕ ᐱᓕᒻᒪᒃᓴᐃᓐᓇᕈᓐᓇᖅᖢᑎᒃ ᐊᒻᒪ ᐱᓕᕆᓂᖏᓐᓄᑦ ᐊᐅᓚᓂᕆᕙᒃᑕᖏᓐᓄᑦ. ᐱᕕᒃᓴᖃᖅᑎᑦᑎᓚᐅᕆᕗᑦ ᐱᓕᕆᓂᕐᒧᑦ ᑭᓱᑐᐃᓐᓇᓂᒃ ᐊᑐᓚᐅᖅᓯᒪᙱᑕᖏᓐᓄᑦ.

"ᑕᒡᓘᓅᓚᐅᕆᕗᒍᑦ, ᐊᒃᓱᐊᓗᒃ ᐊᑐᕐᓂᖃᐅᑎᑦᑎᐊᕙᐅᓚᐅᖅᑐᒥ ᓄᑕᖅᑲᓄᑦ," ᐅᖃᓚᐅᖅᐳᖅ ᑯᕋᔅᑭ.

"ᓛᔅ ᕙᐃᒐᔅᒧᐊᕋᑦᑕ ᓲᒃ ᑎ ᓱᓚᐃᒧᐊᓚᐅᖅᐳᒍᑦ ᐊᒻᒪ ᐱᓕᒻᒪᒃᓴᖅᖢᑕ ᐃᖃᐃᓕᓴᕐᓂᕐᒧᑦ ᑲᑎᙵᓂᖃᕐᒪᑕ ᑕᐅᓇᓂ, ᐊᓕᐊᓇᐃᑦᑎᐊᓚᐅᖅᑐᒥ ᓯᕗᓪᓕᖅᐹᑦᑎᐊᒥ ᓵᓚᖃᕋᓱᐊᕐᓂᐅᔪᒧᐊᓚᐅᕐᒪᑕ ᓇᑉᐸᓪᓗᐊᖑᔪᓄᑦ ᐱᙳᐊᖅᑎᑦᑎᓐᓂ ᐊᒻᒪᓗ ᐅᐸᓚᐅᖅᓯᒪᙱᒻᒪᑕ ᑕᒪᒃᑭᐅᒪᔪᒥ ᐱᐃᖃᐃᓕᓴᕐᕕᖕᒥ ᓯᕗᓂᐊᓂ.

"ᐅᐸᒃᑎᓚᐅᕆᕙᕗᑦ ᑯᑯᓕᐅᕐᕕᖕᒧᑦ ᑯᑯᖕᓂ ᐆᒃᑐᕆᐊᖅᓯᓂᕐᒧᑦ, ᑕᐃᑯᖓᓗ ᕙᐃᒐᔅᒥ ᐊᔾᔨᐸᓗᖓᓐᓂ ᐊᐃᕗᓪ ᐳᖅᑐᔪᐊᓗᖓᓂ ᑕᑯᔪᓐᓇᕐᓂᐊᕐᒪᑕ ᓄᓇᓕᖅᐸᐅᔭᖓᓂ, ᐊᒻᒪᓗ ᑲᓇᑕᒥ ᕼᐋᑭᕐᓂᕐᒧᑦ ᐱᙳᐊᕐᓂᐅᔪᒥᑦ.

"ᐊᖏᔫᓪᓗᓂ ᓇᓗᓇᐃᖅᑕᐅᓂᖓᓂ ᐅᓪᓗᕐᒥ ᐊᐅᓪᓛᕐᓂᑦᑎᓐᓂ ᐊᖏᔪᐊᓗᖕᒥ ᓇᑕᕐᓇᒧᑦ ᐊᒻᒪ ᕼᐆᕙ ᓴᐳᓗᔭᕐᒧᑦ, ᐃᓚᖏᑦ ᓄᑕᖅᑲᐃᑦ ᕗᕇᒫᓐᑦ ᐊᖅᑯᑎᖓᓄᐊᓚᐅᖅᑎᓪᓗᒋᑦ ᑕᑯᔭᖅᑐᖅᖢᑎᒃ ᖃᐅᒪᔪᒥᕐ ᓴᙱᒃᑎᒋᐊᖅᓯᒪᔪᒥ ᕿᙳᐊᕐᓂᐅᔪᒥᑦ, ᐊᒻᒪ ᐊᑕᐅᓯᖅ ᑐᔪᕐᒥᕕᐅᔪᖅ ᐱᙳᐊᕐᕕᕈᓘᔭᖃᓚᐅᖅᐳᖅ ᐃᑭᒪᕕᖕᓂ, ᑕᐃᑯᙵᓚᐅᕆᕗᒍᑦᑕᐅᖅ."

ᑯᕋᔅᑭ ᐅᖃᓚᐅᖅᐳᖅ ᓵᓚᖃᕋᓱᐊᕐᓂᐅᔪᖅ ᐱᓕᕆᐊᖑᓚᐅᖅᐳᖅ ᐅᐃᔅᒐᐃᑦ ᑐᔪᕐᒥᕕᖓᓐᓂ ᐊᒻᒪᓗ ᐋᖅᑭᒃᑕᐅᓯᒪᓂᖓ ᐊᖏᔪᒻᒪᕆᐊᓘᓚᐅᖅᐳᖅ.

ᐅᖃᓚᐅᖅᐳᖅ ᐱᖓᓱᓂ ᑕᑖᖅᑐᓂ ᒧᒥᕐᕕᐊᓗᖕᓂ ᖃᓄᐃᓐᓂᐅᔪᒧᑦ ᑎᓴᒪᓂ ᓵᓚᖃᕋᓱᐊᕐᓂᐅᔪᖃᓚᐅᕐᒪᑦ ᐊᑕᐅᑦᑎᒃᑯᑦ.

"ᐱᓕᕆᔾᔪᑎᑕᖃᐅᓚᐅᖅᐳᖅ ᓇᒥᑐᐃᓐᓈᓗᒃ, ᐊᒻᒪ ᑕᐅᓯᓐ-ᖏᓐᓂ ᐱᙳᐊᖅᑎᐅᔪᓂᑦ ᐊᒻᒪ ᐊᖓᔪᖅᑳᓂᑦ ᑕᑖᖅᑎᑦᑏᓐᓇᓚᐅᖅᑐᓂ ᖃᐅᑕᒫᑦᑎᐊᖅ.

"ᐱᕕᒃᓴᑦᑎᐊᕚᓘᓚᐅᖅᐳᖅ ᐃᖃᐃᓕᓴᖅᑎᑦᑎᓐᓄᑦ ᑕᑯᓂᖏᓐᓄᑦ ᐊᔾᔨᒌᙱᑦᑐᓂ ᑭᒡᓕᐅᔪᓄᑦ, ᑭᓯᐊᓂᑦᑕᐅᖅ ᐊᔾᔨᒌᙱᑦᑐᓄᑦ ᒪᓕᒋᐊᖃᕐᓂᐅᔪᓄᑦ.

"ᑕᑯᔪᓐᓇᖅᓯᓚᐅᖅᐳᑦ ᐊᒃᓴᑳᓂᕐᔪᐊᖑᔪᓂᑦ ᐊᒻᒪ ᑭᒡᒋᖅᑕᐅᑎᓄᑦ ᑭᒡᒋᖅᑕᕐᓂᐅᔪᓂᑦ ᐊᒻᒪ ᑕᒪᓐᓇ ᐱᒻᒪᕆᐅᓚᐅᖅᐳᖅ ᓄᑕᖅᑲᓄᑦ ᑕᑯᓂᖏᓐᓄᑦ."

ᑯᕋᔅᑭ ᐅᖃᓚᐅᖅᐳᖅ ᑲᖏᖅᖠᓂᕐᒥ ᐊᕐᓇᖏᑦ ᑲᑉᐱᐊᓱᖕᓂᖏᓐᓂ ᑕᑯᒃᓴᐅᑎᑦᑎᓚᐅᙱᓚᑦ.

ᐅᖃᓚᐅᖅᐳᖅ ᑲᑎᙵᓂᐅᔪᑦ ᐱᙳᐊᑐᐃᓐᓇᖅᖢᑎᒃ ᓵᓚᖃᕋᓱᙳᐊᓚᐅᖅᐳᑦ ᐊᖓᔪᖅᑳᓄᑦ ᐊᐅᓚᓚᐅᕐᓇᑎᒃ ᑲᖏᖅᖠᓂᕐᒥ ᐱᓇᓱᐊᕐᓂᐅᔪᒧᑦ ᐊᕐᓇᓂᑦ ᓱᖏᐅᔾᔨᓇᓱᐊᕐᓂᖏᓐᓄᑦ ᐊᖏᓂᖅᓴᐅᔪᓄᑦ ᐃᓄᒋᐊᖕᓂᐅᔪᓄᑦ ᖁᙱᐊᕆᐊᖅᑐᓄᑦ ᐱᙳᐊᖅᑎᓪᓗᒋᑦ.

"ᐃᓚᖏᑦ ᓄᑕᖅᑲᐃᑦ ᐆᒻᒪᕆᖕᓂᐅᔪᒥ ᐊᑐᓚᐅᖅᐳᑦ ᐃᓄᒋᐊᖕᓂᐅᔪᓄᑦ ᐊᒻᒪ ᐊᑐᖅᖢᑎᒃ ᐃᑲᔪᖅᓱᐃᓂᐅᔪᓂ ᐃᓚᒋᐊᖅᓯᒃᑲᓐᓂᕐᓂᖏᓐᓄᑦ ᐱᓕᕆᓂᖏᓐᓂ.

"ᐊᑐᓂ ᐃᖏᕐᕋᓂᐅᔪᒧᑦ – ᓅᑉᐸᓪᓕᐊᑎᓪᓗᒋᑦ ᐊᔾᔨᒌᙱᑦᑐᓄᑦ ᖃᓄᐃᓐᓂᐅᔪᓄᑦ – ᐊᑐᓂ ᓵᓚᖃᕋᓱᐊᕐᓂᐅᔪᓄᑦ ᐊᕕᒃᓯᒪᓂᐅᔪᓄᑦ ᑲᑎᙵᑎᑕᐅᓚᐅᖅᐳᒍᑦ ᐊᔾᔨᒌᙱᑦᑐᓄᑦ ᑲᑎᙵᓂᐅᔪᓄᑦ ᓅᑉᐸᓪᓕᐊᓂᕐᒧᑦ ᐊᔾᔨᒌᙱᑦᑐᓄᑦ ᖃᓄᐃᓐᓂᐅᔪᓄᑦ, ᑕᐃᒪᓐᓇ ᑕᑯᔭᕆᐅᖅᑎᑕᐅᓪᓗᑎᒃ ᓄᑕᖅᑲᓂ ᓇᒥᓕᒫᕐᒥᐅᓂᑦ ᑕᐃᑰᓇ, ᐊᒻᒪᓗ ᐃᑲᔪᖅᓯᖃᑦᑕᐅᑎᖃᑦᑕᓚᐅᖅᐳᒍᑦ.

"ᐱᐅᑦᑎᐊᓚᐅᖅᐳᖅ ᐊᕐᓇᓄᑦ ᑕᑯᔭᕆᐅᓂᐅᔪᒥ ᐊᒻᒪ ᐅᖃᖃᑎᖃᕐᓗᑎᒃ ᐊᔾᔨᒌᙱᕈᓘᔭᖅᑐᓂ ᓄᑕᖅᑲᓂᑦ ᑲᓇᑕᓕᒫᒥ ᐊᒻᒪ ᔅᑕᐃᑦᔅᓂᑦ."

ᑯᕋᔅᑭ ᐅᖃᓚᐅᖅᐳᖅ ᐋᖅᑭᒃᓱᐃᔨᐅᔪᑦ ᑐᓂᓯᓚᐅᖅᐳᑦ ᐅᔭᒥᖕᓂᑦ ᑕᐃᑯᖓᓗᒃᑖᖅ 10-ᒋᔭᖓᓄᑦ ᐃᓂᐅᔪᒧᑦ, ᐊᒻᒪᓗ 10 ᐅᖓᑖᓅᙱᑦᑐᒧᑦ ᓄᑕᖅᑲᓂ ᓵᓚᖃᕋᓱᐊᖅᐸᓚᐅᕐᓂᖏᓐᓂ ᓇᓂᑐᐃᓐᓇᖅ ᓵᓚᖃᕋᓱᐊᕐᓂᐅᔪᓂᑦ.

ᐅᖃᓚᐅᖅᐳᖅ ᑕᒪᓐᓇ ᑭᓱᑐᐃᓐᓇᒥᒃ ᐲᖅᓯᓂᖃᓚᐅᙱᓚᖅ ᐱᙳᐊᖅᑎᐅᑉ ᐱᓕᕆᑦᑎᐊᕈᓐᓇᕐᓂᖓᓄᑦ, ᓱᓕ ᐱᓇᓱᒋᐊᖃᕐᒪᑕ ᓯᕗᓪᓕᕐᒥ,ᖓᓂ-ᐱᖓᔪᖓᓐᓂᓪᓘᓐᓃᑦ ᑕᑯᒃᓴᐅᓂᐅᔪᒥ ᐊᑐᓂ ᖃᓄᐃᓐᓂᐅᔪᒥ.

"ᐊᕐᓇᐃᑦ ᐱᓂᐊᖅᐳᑦ ᑲᔪᖓᖅᓴᐃᓂᐅᒃᑲᓐᓂᖅᑐᒥ ᐱᙳᐊᕐᓂᐅᔪᒧᑦ ᐃᓚᐅᖃᑕᐅᓂᕐᓄᑦ ᓵᓚᖃᕋᓱᐊᕐᓂᐅᔪᒥ ᓲᕐᓗ ᐆᒥᖓᑎᑐᑦ.

"ᐊᓕᐊᓇᐃᒋᐊᓂᑕᖓ ᐱᙳᐊᕐᓂᐅᔪᖅ, ᑭᓯᐊᓂ ᓵᓚᖃᕋᓱᐊᕐᓂᐅᔪᖅ ᐱᔭᕇᕐᒪᑦ, ᐊᑯᓂᒍᓱᓚᐅᖅᑐᑦ ᐅᑎᕐᓂᐊᕐᓂᕐᒧᑦ ᐃᖃᐃᓕᓴᕐᕕᖓᓐᓄᑦ ᐱᓕᕆᓂᕐᒧᑦ, ᐃᓕᑦᑎᒃᑲᓐᓂᕐᓂᕐᒧᑦ ᐱᐅᓯᒋᐊᖅᑎᑦᑎᓗᓂᓗ ᐊᐅᓚᓂᐅᔪᒥ, ᑲᔪᖏᖅᓴᐃᑦᑎᐊᓚᐅᖅᐳᖅ ᐅᖓᓯᖕᓂᖅᓴᒧᐊᕈᒪᓂᕐᒧᑦ ᐱᙳᐊᕐᓂᐅᔪᒥ.

"ᑕᖃᖓᔪᐃᓐᓇᐅᓚᐅᖅᐳᒍᑦ ᐃᓱᐊᓂ, ᑭᓯᐊᓂ ᐱᓕᕆᑦᑎᐊᖏᓐᓇᓚᐅᖅᐳᑦ ᐊᐅᓪᓛᕐᓂᓕᒫᒥᑦ.

"ᐅᐱᒍᓱᑦᑎᐊᖅᐳᖓ ᐊᑐᓂ ᐊᕐᓇᐅᔪᒥᑦ ᐅᕙᓂ ᐊᐅᓪᓛᕐᓂᐅᔪᒥ ᐊᒻᒪᓗ ᐊᒃᓱᕈᓚᐅᕐᓂᖏᓐᓂ ᑕᐃᑲᓃᓐᓂᕐᒧᑦ. ᐊᒃᓱᐊᓗᒃ ᐊᑐᕐᓂᖃᐅᑎᑦᑎᐊᕙᐅᓚᐅᖅᐳᖅ."