Skip to content

ᐱᖓᓱᑦ ᓄᓇᕗᒥᐅᓄᑦ ᓴᓇᐅᒐᐃᑦ ᐊᑭᓯᔪᑦ ᐅᑭᐅᖅᑕᖅᑐᒥ ᕿᓚᓈᕆᔭᐅᔪᓄᑦ ᑐᓂᐅᓯᐊᖅᑖᕐᕕᒃᒥ

ᓄᓇᕗᒥᐅᓄᑦ ᓴᓇᕕᓕᐊᖑᓯᒪᔪᑦ ᑐᓂᐅᓯᐊᓚᐅᖅᑐᑦ ᐃᓕᑕᕆᔭᐅᓪᓗᑎᒃᓗ ᐱᓕᕆᐊᖏᑦ ᐊᑭᓕᐅᓯᐊᖅᖢᑎᒃ ᑮᓇᐅᔭᓂᒃ ᑲᑎᓱᒋᑦ $2.4-ᒥᓕᐊᓐᑖᓚᓂᒃ 8-ᓄᑦ ᓴᓇᕕᖃᖅᑐᓄᑦ ᐊᒡᒍᖅᑕᐅᓪᓗᓂ ᐅᑭᐅᖅᑕᖅᑐᒥ ᕿᓚᓇᕆᔭᐅᔪᓄᑦ ᑐᓂᐅᓯᐊᖅᑐᑦ Arctic Inspiration Prize ᖁᕕᐊᓲᑕᐅᑎᓪᓗᒋᑦ ᔮᓐᓄᐊᕆ 31-ᒥ ᐋᑐᕚᒥ.

ᐅᑯᐊᑦᑕᐅᖅ ᐱᓕᕆᐊᖃᖅᑐᑦ North in Focus-ᒥᒃ ᐄᕙ ᕝᕘ ᐋᓯᓕ ᑲᒥᖕ ᐊᑭᐅᓯᐊᓚᐅᕐᒥᔪᑦ ᐅᑭᐅᖅᑕᖅᑐᒥᐅᓄᑦ ᕿᓚᓈᕆᔭᐅᔪᓂᒃ ᑐᓂᐅᓯᐊᕐᕕᖕᒥᑦ $20,000-ᓂᒃ ᐋᕿᒃᓱᐃᓂᐊᕐᒪᑕ ᐊᕐᕌᒍ ᐱᓇᓱᐊᕐᓂᐊᖅᑕᒥᓂᒃ. ᐱᖃᑎᖃᖅᖢᑎᒃ ᒪᓕᓐᑕ ᐃᕼᐊᓗᐊᕐᒥᒃ, ᓯᓚᑦᑐᒃᓴᕐᕕᒃᔪᐊᒥ ᓱᓕ ᐃᓕᓴᖅᑏᑦ ᐃᓕᓴᕈᑎᒋᓪᓗᒍ ᐋᕿᒃᓱᐃᓇᓱᐊᕐᒪᑕ ᐃᓅᓯᕐᒥᓂᒃ ᑭᐱᓯᑦᑕᐃᓕᒪᔪᑎᒃᓴᓂᒃ ᐃᓱᒪᓐᓂᐊᖅᑎᓄᑦ ᐃᓗᐊᖅᓴᐃᔪᑕᐅᓗᑎᒃ ᐃᒻᒥᓃᖃᑦᑕᖅᑐᓂᒃ ᐋᓐᓂᐊᕆᔭᐅᔪᖅ ᐃᓱᒪᓐᓂᐊᖅᑎᓄᑦ ᑲᒪᒋᔭᐅᔪᓐᓇᖅᓯᓂᐊᕐᒪᑦ ᐋᕿᒃᑕᐅᓯᒪᔪᓂᒃ ᐊᑐᐊᒐᖃᕐᓗᑎᒃ ᐃᓱᒪᓐᓂᐊᕈᑎᓂᒃ ᐃᓄᓱᒃᑐᓄᑦ.

ᐊᒃᓱᐊᓗᒃ ᖁᕕᐊᓇᓚᐅᖅᑐᖅ,” ᐅᖃᓚᐅᖅᑐᖅ ᐃᒡᓗᓕᒑᕐᔪᖕᒥᐅᖅ ᒋᓕᓐ ᐳᕌᑯᓪᐹᖕᒃ, ᐱᒋᐊᖅᑎᑦᑎᔨᐅᓚᐅᖅᓯᒪᔪᖅ ᑖᓐᓇ ᐊᐅᓚᑦᑎᔨᐅᖕᒪᑦ ᖃᔭᓕᐅᕐᕕᖕᒥᒃ ᕕᒃᑐ ᓴᒻᒧᖅᑐ ᐱᖅᑯᓯᑐᖃᕐᓂᒃ ᐃᓕᓴᕐᕕᐊᓂ ᐃᓕᓴᖅᑎᓄᑦ ᐊᒥᓱᓂᒃ ᐅᑭᐅᓂᒃ.

ᐱᖃᑎᒋᓪᓗᓂᒋᑦ ᐅᑯᐊ ᓗᐃ ᐊᐅᑑᑦ, ᓚᐃᓚ ᐸᐅ, ᑭᕕᓐ ᐃᓴᓗᒃ, ᓴᐃᒪᓐ ᐊ’ᒐᖅ, ᐋᓇ ᓖᓯᒪᓐ ᐊᒻᒪᓗ ᔫᓖᓐ ᐊᑉᐱᐊᖅ, ᐳᕌᑯᓪᐹᖕᒃ ᑐᒃᓯᕋᐅᑎᒥᒃ ᑎᑎᕋᓚᐅᕐᒪᑦ ᖃᔭᓕᐅᖅᑏᑦ ᐱᓕᕆᐊᖓᓄᑦ ᐊᑐᖅᑕᐅᓂᐊᖅᑐᒥᒃ, ᐊᓱᐃᓚᒃ ᑖᒃᑯᐊ ᓴᓇᔩᑦ ᑐᓂᐅᓯᐊᓚᐅᖅᑐᑦ $140,000.-ᓂᒃ.

ᖃᓄᕐᓕ ᑐᑭᖃᖅᐸ? ᖃᔭᓕᐅᖃᑦᑕᓯᒋᐊᓚᐅᖅᑐᒍᑦ 2004 ᐊᐅᔭᖓᓂ, ᐊᒻᒪᓗ ᑕᐃᓱᒪᓂ ᐊᑭᐅᓯᐊᓚᐅᖅᖢᑕ $110,000-ᓂᒃ ᑮᓇᐅᔭᓂᒃ. ᐊᑐᖅᓯᒪᔭᕗᑦ ᐅᑭᐅ 14 ᐅᖓᑖᓄᑦ. ᒪᓐᓇ ᐊᑕᐅᑦᑎᒃᑯᑦ ᐱᒐᑉᑕ ᑖᓱᒪ ᐅᖓᑖᓄᑦ ᐅᐊᑲᓪᓚᐅᓂᐊᖅᑐᖅ ᐊᑐᕈᓐᓇᖅᓯᔭᕗᑦ ᑕᐃᒪᖓᓂ ᐱᒋᐊᓚᐅᕈᓯᑦᑎᓐᓂᑦ. ᑕᒪᐃᓐᓄᓕᒫᖅ ᐊᑐᕈᓐᓇᖅᑐᖅ.”

ᑕᒪᐃᓐᓄᓕᒫᑦ ᐅᑯᐊᖑᖕᒪᑕ 30 ᖃᔭᓕᐊᕆᔪᒪᔭᕗᑦ ᐃᓱᒪᒃᑯᑦ ᐸᕐᓇᒃᓯᒪᒐᓗᐊᕋᑦᑎᒍ ᑕᐃᓱᒪᓂᑐᖃᖅ ᐃᒡᓗᓕᒑᕐᔪᖕᒥᐅᑦ ᖃᓂᒋᔭᖓᓂ ᖃᔭᕆᔭᐅᕙᔪᔪᓂᒃ ᓴᓇᓂᐊᕋᑦᑕ ᑕᒫᓂᕐᒥᐅᑎᑐᑦ.

ᐅᑎᖅᑎᑦᑎᓂᐊᕋᑦᑕ ᖃᔭᓕᐅᕈᓯᕐᓂᒃ ᐃᓚᖏᓐᓂ ᓄᓇᓕᖕᓂ ᐊᓯᐅᔨᔭᐅᓯᒪᔪᓂᒃ ᑕᒫᓂ ᓯᒡᔭᒥ ᑕᑯᒃᓴᐅᔪᓐᓃᖅᑐᓂᒃ ᖃᔭᓕᐅᕐᓗᑕ ᐊᑐᖅᑕᐅᓂᐊᖅᑐᓂᒃ ᐃᓄᖕᓄᑦ. ᑕᐃᒪᓐᓇ ᑕᐅᑐᖑᐊᖅᖢᒍ ᕿᓚᓈᕆᔭᖃᖅᑐᖓ. ᐊᒻᒪᓗ ᑕᒪᑐᒪᓂᓴᐃᓐᓇᖅ, ᓴᓇᖅᑯᑎᑖᕐᓂᐊᖅᖢᑕ ᓴᓇᓂᐊᕐᒪᑕ ᐅᑭᐅᖅᑕᖅᑐᒥ ᐊᑐᖅᑕᐅᔪᓐᓇᖅᑐᒥᒃ ᐃᒪᕐᒥ ᐃᒃᑮᕋᓗᖕᒥ,” ᐅᖃᕆᓪᓗᓂ ᐳᕌᑯᓪᐹᖕᒃ.

ᐃᓕᓴᖅᑎᖁᑎᕗᑦ ᐅᔾᔨᖅᓱᑦᑎᐊᖏᓐᓇᐅᔭᕐᒪᑕ ᓴᓇᖅᑯᑎᑦᑎᓐᓂᒃ ᑭᓯᐊᓂᓕ ᐃᓛᓐᓂᒃᑯᑦ ᓱᕋᒃᑐᖃᖃᑦᑕᓕᓲᖑᖕᒥᖕᒪᑦ. ᐅᑭᐅᖅᑕᖅᑐᒥᐅᖑᓪᓗᓂ ᓇᖕᒥᓂᖅ ᑭᓯᐊᓂ ᐋᕿᒃᓗᒍ. ᒫᓐᓇ ᖃᔭᓕᐊᕆᓯᒪᔭᕗᑦ ᓇᑉᐸᖏᑦ ᐃᒻᒪᖃᑦᑕᓕᕐᒪᑕ,” ᑖᓐᓇ ᐊᑭᐅᓯᐊᕗᑦ ᐊᓱᐃᓛᒃ ᐊᒥᓱᓄᑦ ᐊᑐᕈᓐᓇᖅᓯᕗᖅ, “ᐱᖏᖕᓇᔭᐃᒃᑯᑎᒋᓂᐊᖅᑕᕗᑦ ᐊᑯᓂᒃᑲᓐᓂᐊᕐᔪᒃ ᓱᓕ ᐃᖏᕐᕋᔪᓐᓇᕐᓂᐊᕋᑦᑕ ᐃᒻᒪᖄ ᐅᑭᐅᓂᒃ ᖁᓕᓂᒃ.”

ᖃᐅᔨᒪᔨᒋᔭᐅᔪᑦ ᓄᓇᓕᖕᒥᐅᓄᑦ ᐃᓐᓇᐃᓪᓗ ᐃᓕᓴᐃᔪᓐᓇᕐᓂᐊᖅᑐᑦ ᒪᒃᑯᒃᑐᓂᒃ ᖃᓄᖅ ᖃᔭᓕᐅᓲᖑᓂᖏᓐᓂᒃ ᐊᒻᒪᓗ ᖃᓄᕐᓗ ᐸᐅᓕᐅᖅᑕᐅᓱᖑᖕᒪᖔᑕ ᐅᐸᒃᐳᓕᖕᓂᒃ. ᓇᒧᑐᐃᓐᓇᖅ ᑎᑭᓴᖅᑕᐅᒃᐸᑕ ᓇᒃᓯᐅᔾᔨᔪᓐᓇᖅᓯᔪᒍᑦ ᐊᓯᑦᑎᓐᓄᑦ ᓄᓇᓕᖕᓄᑦ ᐃᓕᓴᐃᔪᑎᓂᒃ ᐊᑭᓖᔪᓐᓇᖅᑐᓄᑦ ᐃᓕᓴᐃᒋᐊᖅᑐᕈᓐᓇᖅᑐᒍᑦ ᖃᔭᓕᐅᕐᓂᕐᒥᒃ ᑲᑎᖓᖃᑎᒋᓗᒋᑦ.

ᑲᖏᖅᖠᓂᕐᒥ ᐱᖑᐊᖅᑐᓕᕆᔨᒃᑯᓐᓂ ᑐᑭᒧᐊᖅᑎᑦᑎᔨᖓᑦᑕᐅᖅ ᑏᕕᑦ ᑲᓛᒃ ᕼᐊᑭᖅᑎᓄᑦ ᐊᔪᖏᓴᕐᕕᖃᖅᑐᖅ Rankin Rock Hockey Camp-ᒥ ᑐᓂᐅᓯᐊᓚᐅᕐᒥᔪᑦ $80,000-ᓂᒃ ᓴᓇᐅᒐᕐᒥᓄᑦ ᐱᕙᓪᓕᐊᑎᑦᑎᓯᒪᖕᒪᑦ ᒪᒃᑯᒃᑐᓂᒃ ᐱᖑᐊᕈᓯᕐᓂ ᓯᕗᓕᖅᑎᐅᓂᕐᒥᒃ ᐃᓕᓴᕐᕕᖕᒥᒃ ᐱᒃᑯᒥᓵᕆᔪᒥᒃ ᐃᓅᓯᖃᑦᑎᕐᓂᕐᒥᒃ ᑖᓱᒥᖓ ᐃᕿᐊᖑᐃᔭᐅᑎᒥᒃ ᐊᑐᖃᑦᑕᕐᒪᑕ ᐊᐅᔭᐅᓕᕌᖓᑦ ᑲᖏᖅᖠᓂᕐᒥ, ᖃᒪᓂ’ᑐᐊᒥ ᐊᒻᒪᓗ ᐊᕐᕕᐊᓂ.

ᑲᓚᒃ ᑕᒪᑐᒪᓂ ᑲᑎᓴᐅᔪᓐᓇᖅᓯᓚᐅᖏᒻᒪᑦ ᐊᐱᖅᓱᖅᑎᒧᑦ, ᑭᓯᐊᓂᓕ ᕖᔅᐳᒃᑯᑎᒍᑦ ᐅᓂᒃᑳᓚᐅᖅᑐᖅ, “ᓄᓇᓕᓐᓄᑦ ᑭᕙᓪᓕᕐᒥᐅᓄᓪᓗ ᑕᐅᑐᖑᐊᖃᑦᑕᖅᑕᓐᓂᒃ ᓂᕆᐅᒍᓐᓇᖅᓯᕗᖓ ᐊᖏᓂᖅᓴᐅᓕᕐᓗᓂ ᐱᐊᓂᖅᓴᐅᓕᕐᓗᓂ ᕼᐊᑭᖅᑎᓄᑦ ᐊᔪᖏᓴᕈᑎᓂᒃ ᐃᓕᓴᐃᔪᓐᓇᖅᓯᒐᑦᑕ ᐃᓕᓯᓐᓂᒃ. ᐊᒃᓱᐊᓗᒃ ᓱᓕᓪᓗᖓ ᖁᔭᓕᕗᖓ.”

North in Focus-ᑯᑦᑕᐅᖅ, ᑖᓐᓇ ᑲᑐᔾᔭᐅᓪᓗᓂ ᐱᓕᕆᐊᕆᔭᐅᔪᖅ ᓯᓚᑦᑐᒃᓴᕐᕕᒃᔪᐊᒥ ᐃᓕᓴᖅᑎᓄᑦ ᐋᕿᒃᓱᖅᑕᐅᓚᐅᕐᒪᑦ ᐋᓯᓕ ᑲᒥᖕᔅ ᐸᖕᓂᖅᑑᒥᐅᖅ, ᑐᓂᔭᐅᓚᐅᕐᒪᑦ $20,000-ᓂᒃ ᓴᓇᕕᖓᑕ ᐱᒋᐊᖓᖅᑎᑕᐅᔪᑎᒃᓴᖓᓂᒃ ᐋᕿᒃᓱᐃᓂᐊᕐᒪᑕ ᓴᓇᐅᒐᕐᒥᒃ ᑕᐃᔭᐅᔪᒥᒃ ᓄᓇᕗᒥᐅᑦ, ᐃᓄᖁᑎᕗᑦ.

ᕙᐅᕗ. ᓯᓐᓇᖅᑐᖅᑑᔭᑲᐃᓐᓇᖅᐳᖓ,” ᐅᖃᓚᐅᖅᑐᖅ ᑲᒥᖕᔅ ᑕᒪᑐᓂ ᐅᓐᓄᐊᒥ ᖁᕕᐊᓲᑕᐅᑎᓪᓗᒋᑦ, ᐊᒻᒪᓗ ᑐᓴᕋᒥ ᓴᓇᐅᒐᓕᐅᖃᑎᒥᓂᑦ ᐱᑎᑕᐅᓂᕐᒥᓂᒃ

ᑖᒃᑯᐊ ᓴᓇᐅᒐᓕᐅᖃᑎᒌᒃᑐᑦ ᑲᒥᖕᑯᑦ, ᒪᓕᓐᑕ ᐃᕼᐊᓗᐊᖅ, ᐊᒻᒪᓗ ᐃᕙ ᕝᕘ ᑕᒃᑯᓂᖓ ᑮᓇᐅᔭᓂᒃ ᐊᑐᕐᓂᐊᕐᒪᑕ ᐱᒋᐊᖓᖅᑎᑦᑎᔪᑎᒋᓗᒋᑦ ᐊᑐᖅᑕᐅᔪᓐᓇᖅᑐᓂᒃ ᐃᓱᒪᓐᓂᐊᖅᑎᓄᑦ ᐃᓅᓯᕐᒥᓂᒃ ᑭᐱᓯᖃᑦᑕᖅᑐᑦ ᐅᓄᖏᓐᓂᖅᓴᐅᓕᖁᓪᓗᒋᑦ ᑲᖑᓇᖅᑐᑦ ᐱᓕᕆᐊᖏᑦ.

ᐊᒻᒪᓗᑦᑕᐅᖅ $1-ᒥᓕᐊᓐᑖᓚᓂᒃ ᑐᓂᐅᓯᐊᓚᐅᕐᒥᔪᑦ ᐅᑭᐅᖅᑕᖅᑐᒥ ᓄᓇᖃᖅᑳᖅᑐᓄᑦ ᐃᓗᐊᖅᓴᐅᑎᓂᒃ ᑲᒪᔨᐅᔪᓄᑦ ᓄᓇᒧᖓᐅᔾᔨᖃᑦᑕᕐᒪᑕ ᒪᒃᑯᒃᑐᓂᒃ ᐃᓅᓯᕐᒥᒍᑦ ᐱᕈᖅᓴᑦᑎᐊᖁᓪᓗᒋᑦ ᐊᑦᑕᕐᓇᖅᑐᒥᒃ ᐃᓅᓯᖃᓕᖅᑐᓄᑦ ᒪᒃᑯᒃᑐᓄᑦ ᐃᓄᖕᓄᑦ, ᐊᓪᓚᓄᑦ, ᐊᓪᓚᐃᖓᔪᓄᓪᓗ ᔭᓗᓇᐃᕝ ᓄᓇᓕᐸᐅᔭᖓᓂ ᓄᓇᓯᐊᒥ.

ᑖᓐᓇ ᐱᓕᕆᐊᖅ ᐅᑭᐅᖅᑕᖅᑐᒥᐅᓂᒃ ᖁᕕᐊᓲᑕᐅᓪᓗᓂ ᐱᒋᐊᖓᖅᑎᑕᐅᔪᖕᒪᑦ ᐊᒃᖢᐃᑦᑐᓄᑦ ᐊᐃᐸᕇᖕᓄᒃ ᓯᒪ ᓵᕆᕕᒧᑦ ᐊᒻᒪᓗ ᐋᓄᓪ ᕗᑦᔨᒃᒧᑦ, ᑕᒪᑐᒥᖓ ᐊᑭᐅᓯᐊᕈᓯᕐᒥᒃ ᓴᓇᕕᖃᖅᑐᓄᑦ ᑮᓇᐅᔭᓂᒃ ᐋᕿᒃᓱᐃᓚᐅᕐᒪᑕ 2012-ᒥ, ᒪᓐᓇ ᐅᖃᒃᑲᓐᓂᓚᐅᖅᑐᑦ ᓱᓕᒃᑲᓐᓂᖅ ᐃᓕᓯᒃᑲᓐᓂᕈᓐᓇᕐᓂᕋᖅᖢᑎᒃ $60-ᒥᓕᐊᓐᑖᓚᓂᒃ ᑖᓱᒧᖓ ᑎᒥᖁᑎᐊᓄᑦ.