Skip to content

'ᐱᔪᓐᓇᖅᓯᑎᑦᑎᓇᓱᖕᓂᐅᖕᒪᑦ ᐃᓄᖕᓂ'

ᐱᓇᓱᐊᕈᓯᐅᓚᐅᖅᑐᒥ ᐊᕐᓇᒐᓴᐃᑦ ᑲᖏᖅᖠᓂᕐᒥᐅᑕᑦ ᐃᒡᓗᕋᓛᕐᒦᑎᓪᓗᒋᑦ ᓯᒡᔭᒥ ᐱᔅᓯᓕᐅᓚᐅᖅᐳᑦ ᐅᖅᑭᔭᖕᓇᖅᑎᓪᓗᒍ.

ᑕᐃᒪᓐᓇᑐᐃᓐᓇᐅᒐᔭᓚᐅᖅᑑᒐᓗᐊᖅ ᐱᔅᓯᓕᐅᕐᓂᖏᑉᐸᑕ ᓴᓇᔭᐅᒐᔪᒃᑐᒥ. ᐃᓕᓐᓂᐊᖅᑎᑕᐅᖔᓚᐅᖅᐳᑦ ᐳᔫᖅᑎᑦᑎᓂᕐᒥᒃ ᑖᔅᓱᒪᐅᑉ ᒧᕋᐃᔭ ᓴᓚᕕᒧ, ᐅᒃᐱᒃᑯᓐᓂᙶᖅᑐᖅ ᐊᓛᔅᑲᒥ ᐃᓕᓐᓂᐊᖅᑎᑦᑎᓲᖅ.

ᒪᐅᓴᓕᓐ ᖃᓚᓯᖅ-ᐊᐅᐱᓛᕐᔪᒃ ᐊᒡᒍᖅᑐᐃᑎᓪᓗᒍ ᐱᓇᓱᐊᕈᓯᐅᓚᐅᖅᑐᒥ ᐃᒡᓗᕋᓛᖅ ᓯᓚᑖᓂ, ᐊᕐᓇᓂ ᓂᕿᓕᐅᓕᒻᒪᒃᓴᖅᑎᑦᑎᑎᓪᓗᒋᑦ. ᖃᓚᓯᖅ-ᐊᐅᐱᓛᕐᔪᒃ ᐃᓕᓐᓂᐊᖅᑎᑦᑎᖃᑦᑕᕐᓂᖓᓄ ᐋᖓᔮᕐᓇᖅᑐᖅᑐᖏᒃᑲᓐᓂᕈᑎᒋᕚ.
Marcelline Kallaserk-Aupilardjuk filets arctic char at a cabin near the ocean last week, as part of the women's cooking program. Kallaserk-Aupilardjuk credits the program with keeping her sober. Cody Punter/NNSL photo

ᓂᕿᑦᓯᐊᓕᐅᖅ, ᐃᓕᑕᖅᓯᓂᒃᑯᓐᓂ ᐊᐅᓚᑕᐅᓲᖑᕗᖅ (ᓄᓇᕗᒻᒥ ᐅᖃᓕᒫᖅᑎᑦᑎᓂᕐᒧᑦ ᑲᑎᒪᔨᖏᑦ) ᓄᓇᓕᖕᓂ ᐋᖅᑭᒃᑕᐅᓯᒪᔪᖅ ᓂᕿᐅᓕᒻᒪᒃᓴᖅᑎᑦᑎᓲᑦ ᐃᓄᒃᑐᑦ.

ᐃᓕᓐᓂᐊᕐᓂᐅᓲᖅ ᐊᔾᔨᒌᖏᑦᑐᓂᒃ ᓂᐅᕕᐊᒃᓴᐅᒐᔭᖅᑐᓂᒃ ᓂᕿᓕᕆᓂᕐᒥᒃ ᑰᖃᕐᕕᖕᒥ ᐊᑐᖅᑕᐅᒐᔭᖅᑐᓂ, ᐃᓕᓐᓂᐊᖅᑎᑕᐅᓯᓐᓈ ᐃᓐᓇᕐᓂ ᐊᖑᓇᓱᖕᓂᒃᑯᑦ ᓂᕿᓕᕆᓂᕐᒥᒡᓗ.

“ᐱᔪᓐᓇᖅᓯᑎᑦᑎᓂᕐᒨᖓᕗᖅ,” ᐊᐃᑐᕌᓇ ᑯᓱᒐᖅ ᐅᖃᓚᐅᖅᐳᖅ, ᐊᐅᓚᑦᑎᔨᐅᖃᑕᐅᔪᖅ ᐃᓕᑕᖅᓯᓂᒃᑯᓐᓂ ᑲᖏᖅᖠᓂᕐᒥ.

ᒫᓂᑲ ᖃᓗᔾᔭᖅ, ᐃᓱᓕᑦᑎᓚᐅᖅᓯᒪᔪᖅ ᐸᓂᖓ 2016-ᖑᑎᓪᓗᒍ, ᖁᕕᐊᓱᓪᓚᕆᓚᐅᖅᑐᖅ ᐱᖃᑕᐅᔪᓐᓇᕐᓂᖓᓄ.

“ᖁᕕᐊᓪᓚᕆᓚᐅᖅᑐᖓ ᐃᓕᓐᓂᐊᖃᑕᐅᔪᓐᓇᕐᓂᕋᖅᑕᐅᒐᒪ, ᐃᓗᖏᖅᓱᓚᐅᖅᐳᖓ,”.

ᐊᕐᕋᐅᒍᖏᑦ 20-ᒥ 60-ᖏᓐᓅᖓᓚᐅᖅᑐᑦ ᐱᖃᑕᐅᔪᑦ. ᖃᓗᔾᔭᖅ ᐃᖅᑲᓇᐃᔭᖃᑕᐅᔪᖅ ᐸᐃᕆᕕᖕᒥ ᐃᓕᓐᓂᐊᖃᑕᐅᔪᓐᓇᓚᐅᖅᐳᖅ, ᒪᐃᒥ ᓯᑎᐱᕆᒧ ᐊᐅᓚᑕᐅᓲᖅ. ᓂᕆᐅᒋᓪᓗᒍ ᐃᖅᑲᓇᐃᔮᒥᓄ ᐅᑎᖅᐸᑕ ᓂᕿᑦᑎᐊᕙᓕᐅᕈᓐᓇᖁᓪᓗᒋᑦ ᕿᒥᕆᓂᐊᖅᑕᒥᓂᒃ. ᖃᓗᔾᔭᖅ ᐅᖃᓚᐅᖅᐳᖅ ᐃᓕᑉᐹᓪᓕᓪᓚᕆᖕᓂᖓᓂ.

“ᐃᓚᒃᑲ ᓂᖅᖠᐅᒃᑲᐅᖕᒪᑕ ᓱᖏᐅᑎᓯᒪᕙᕋ ᑭᓯᐊᓂ ᐊᔾᔨᒋᓚᐅᙱᓚᐅᒃ. ᐊᖓᔪᖅᑳᑦᑕ ᓂᖅᖠᐅᕈᓯᕆᓚᐅᖅᑕᖓᑕ ᐊᔾᔨᒋᙱᑕᖓ,”.

ᐅᓄᓗᐊᖏᖦᖢᑎᒃ - 12-ᖑᓚᐅᖅᑐᑦ - ᐃᓕᓐᓂᖅᓴᐅᖁᓪᓗᒋᑦ ᐃᓕᖃᑦᑕᐅᑎᓗᑎᒡᓗ.

“ᐃᑲᔪᖅᐸᕗᑦ ᐱᔪᓐᓇᖅᓯᑎᑉᐹᓪᓕᕋᓱᒃᑕᕗᑦ ᐃᒻᒥᓂᒃ ᐅᒃᐱᕈᓱᓕᖅᐹᓪᓕᖁᓪᓗᒋᑦ,” ᑯᓱᒐᖅ ᐅᖃᓚᐅᖅᐳᖅ.

“ᖃᐅᔨᒪᐃᓐᓇᓚᐅᖅᑐᑦ ᑭᓯᐊᓂ ᒫᓐᓇ ᐃᓱᒪᖅᓱᓕᖅᐳᑦ.”

31-ᓂ ᐊᕐᕋᐅᒍᓕᒃ ᒪᓴᓕᓐ ᖃᓚᓯᖅ-ᐊᐅᐱᓛᕐᔪᒃ ᐅᖃᓚᐅᖅᐳᖅ ᐱᔅᓯᓕᐅᕆᐅᑕᐃᓐᓇᓚᐅᖅᑐᖅ ᐱᓇᓱᐊᕈᓯᐅᓚᐅᖅᑐᒥ, ᐱᕈᖅᓴᑎᓪᓗᒍ ᑕᐅᑐᒃᐸᓚᐅᕋᓗᐊᖅᑎᓪᓗᒍ. ᐃᓕᑉᐹᓪᓕᖅᖢᓂᒎᖅ ᐊᒻᒪᓗ ᓱᓐᓂᕐᓇᖅᑐᓕᕆᖏᑉᐹᓪᓕᓚᐅᖅᐳᖅ.

“ᐊᑲᐅᓯᕚᓪᓕᕐᓇᓚᐅᖅᐳᖅ ᖃᓄᐃᓕᐅᖃᑕᐅᓪᓗᖓ,” ᐅᖃᓚᐅᖅᐳᖅ.

ᓂᖅᖠᐅᕐᓂᐅᑉ ᓯᓚᑖᒍᑦ, ᓇᖕᒥᓂᖃᕐᓂᕐᒥᒃ ᐃᓕᓚᐅᕆᕗᑦ ᐃᓕᓐᓂᐊᕐᕕᖕᒦᑎᓪᓗᒋᑦ ᐊᒻᒪᓗ ᖁᕕᐊᓇᕈᓘᔭᖅᑐᒃᑯᑦ ᐱᓕᕆᑎᑕᐅᓪᓗᑎᒃ. ᐱᓇᓱᐊᕈᓯᑕᒫᑦ ᓂᕆᓐᓇᐅᑎᓪᓗᒍ ᓂᕿᓕᐅᖅᐸᓚᐅᖅᐳᑦ 100-ᓄᑦ ᕿᑎᖅᑰᖑᓕᕌᖓᑦ.

“ᐱᓕᕆᒋᐊᖅᓴᓂᐅᕗᖅ ᑭᓯᐊᓂᓗ ᓄᓇᓕᖕᓄᑦ ᐃᑲᔫᑎᖃᕐᓂᐊᖅᐳᖅ ᐱᔪᓐᓇᖅᓯᔭᖏᓪᓗ ᑕᑯᒃᓴᐅᓗᑎᒃ,” ᑯᓱᒐᖅ ᐅᖃᓚᐅᖅᐳᖅ.

ᑕᐃᒪᙵᓂᒃ ᐅᖃᓕᒫᕈᓐᓇᕐᓂᓕᕆᔪᑦ ᑲᑎᒪᔨᖏ ᑮᓇᐅᔭᓂᒃ ᐊᐃᑦᑐᖅᑕᐅᙱᒃᑲᓐᓂᓕᓚᐅᖅᑎᓪᓗᒋᑦ ᓯᑏᕙᓐ ᕼᐊᐅᐳ ᓯᕗᓕᖅᑎᐅᑎᓪᓗᒍ, ᖃᓄᐃᓕᐅᖅᑎᑦᑎᖏᓐᓂᖅᓴᐅᓯᒪᓕᖅᐳᑦ ᓲᕐᓗ ᑖᓐᓇᑐᑦ ᓂᕿᓕᐅᕆᐅᖅᓴᑎᑦᑎᓂᕐᒥ. ᓯᕗᓪᓕᕐᒥ 2016-ᒥ ᐱᒋᐊᖅᑎᑕᐅᓚᐅᖅᓯᒪᕗᖅ ᑭᓯᐊᓂ ᐊᕐᕋᐅᒍᓕᒫᖅ ᑯᓱᒐᖅ ᐊᐃᑦᑑᑎᒃᓴᓂᒃ ᕿᓂᑲᑕᐃᓐᓇᕆᐊᖃᓚᐅᖅᓯᒪᕗᖅ ᐊᐅᓚᑕᐅᒃᑲᓐᓂᖁᓪᓗᒍ.

ᑮᓇᐅᔭᖃᖅᑎᑕᐅᔪᓐᓇᖅᓯᕗᑦ ᐃᓄᓕᕆᔨᒃᑯᓐᓂ, ᐃᑲᔪᖅᑕᐅᒋᓪᓗᑎᒃ ᖃᓄᐃᖏᑦᑕᐃᓕᒪᓂᕐᒧ ᑮᓇᐅᔭᖃᖅᑎᑦᑎᓲᓄ ᐊᒡᓃᑰᓐᓂᒡᓗ.

ᑯᓱᒐᖅ ᐅᖃᓚᐅᖅᐳᖅ ᐊᐅᓚᑕᐅᑦᑎᐊᕐᓂᐅᓚᐅᖅᓯᒪᓂᖓᑦ ᖃᐅᔨᓇᖅᑐᖅ. ᑕᒪᕐᒥᒃ 12-ᖑᔪᑦ ᑲᔪᓯᑦᑎᐊᖅᐳᑦ ᐃᓕᓐᓂᐊᒃᑲᓐᓂᖅᖢᑎᒡᓘᓐᓃᑦ. ᒪᕐᕉᒎᖅ ᐊᕐᓈᒃ ᓂᕿᓕᐅᖅᑎᓪᓚᕆᖕᒧ ᐃᑲᔪᖅᑎᐅᕗᑦ ᐊᒡᓃᑯᒃᑯᓐᓄ, ᐃᓚᖓᒡᒎᖅ ᐃᓕᓐᓂᐊᕆᐊᖅᓯᒪᓕᖅᐳᖅ ᓂᕿᓕᐅᕐᓂᕐᒥᒃ ᕼᐋᓚᓐ ᓯᓚᑦᑐᖅᓴᕐᕕᖕᒧᑦ ᐳᕆᓐᔅ ᐊᑦᕗᑦ ᐊᐃᓚᓐᒥ.

“ᑕᒪᕐᒥᒃ ᐃᓕᓐᓂᐊᕆᐊᖅᑐᐃᓐᓇᐅᔪᓐᓇᖏᑉᐳᑦ ᓂᕿᓕᕆᓂᕐᒥ,” ᑯᓱᒐᖅ ᐅᖃᓚᐅᖅᐳᖅ. “ᑲᔪᖏᖅᓱᕈᒪᐃᓐᓇᖅᐸᕗᑦ ᓇᒥᑐᐃᓐᓇᖅ ᐃᖅᑲᓇᐃᔭᕈᒪᑎᓪᓗᒋᑦ.”