Skip to content

ᐊᕝᕙᖏᑦ ᑭᕙᓪᓕᕐᒥ ᒪᓕᒐᓕᐅᖅᑎᑦ ᐲᖅᑕᐅᓚᐅᕐᓂᖏᑦ ᓂᕈᐊᕐᓇᐅᑎᓪᓗᒍ

ᑭᕙᓪᓕᕐᒥ ᓂᕈᐊᖅᑎᑦ ᑕᐃᑉᓱᒪᓂᑐᖃᑎᑐᑦ ᐱᓕᕆᓚᐅᖅᐳᑦ ᐊᒻᒪ ᓂᕈᐊᖅᖢᑎᒃ ᖃᐅᔨᒪᑦᓯᐊᖅᑐᒥᒃ ᐱᖓᓱᑦ ᓂᕈᐊᖅᑕᐅᓯᒪᖃᑕᐅᓚᐅᖅᑐᑦ ᑭᕙᓪᓕᐅᑉ ᐃᓗᐊᓂ ᐲᖅᑕᐅᑉᓗᑎᒃ.

ᓲᓵᓐ ᑕᑎ, ᓴᐅᒥᐊᓂ, ᐊᒻᒪ ᑳᓖᓐ ᓇᑯᓛᒃ ᖃᐅᔨᓴᖃᑦᑕᐅᑎᔪᑦ ᐊᑐᓂ ᓂᕈᐊᖅᑐᓂᒃ ᑎᑎᕋᖅᑕᐅᓯᒪᔪᓂᒃ ᐊᑎᕐᓂᒃ ᕿᓂᖅᖢᑎᒃ ᑲᖏᖅᖠᓂᖅ ᓂᒋᐊᓂ 2017−ᒥ ᓄᓇᕗᒥ ᓂᕈᐊᕐᔪᐊᖅᑎᓪᓗᒋᑦ ᒪᓕᒐᓕᐅᖅᑎᒃᓴᓂᒃ ᑲᖏᖅᖠᓂᕐᒥ ᐊᒃᑐᐱᕆ 30-ᒥ.

ᓗᐊᓐ ᑯᓱᒐᒃ ᓵᓚᒋᔭᐅᓚᐅᖅᓯᒪᑉᓗᓂ ᑲᖏᖅᖠᓂᐅᑉ ᓂᒋᐊᓂ ᐊᑭᒋᐊᓚᐅᖅᐳᖅ ᓂᕈᐊᕐᓇᒥ ᑕᒡᕙᓂ ᓵᓚᒋᑉᓗᓂᐅᒃ ᐋᓖᔅ ᓴᒻᒧᖅᑐᖅ 309-ᓄᑦ ᓂᕈᐊᖅᑕᐅᑉᓗᓂ ᓂᕈᐊᖅᑕᐅᓂᖅᓴᐅᑉᓗᓂ 136 −ᓄᑦ.

ᑲᖏᖅᖠᓂᐅᑉ ᐅᐊᖕᓇᖓᓂ/ᐃᒡᓗᓕᒑᕐᔪᖕᒥᓗ ᓂᕈᐊᖅᑕᐅᔪᒃᓴᐃᑦ, ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓄᑦ ᐊᖓᔪᖄᕆᔭᐅᓚᐅᖅᓯᒪᔪᖅ ᑳᑎ ᑕᐅᑐᖏ (171 ᓂᕈᐊᖅᑕᐅᑉᓗᓂ) ᑖᓐᓇ ᓰᑐᕆᒃ ᐊᐅᑐᑦ (147) ᓂᕈᐊᖅᑕᐅᓚᐅᖅᖢᓂ, ᒪᓕᒐᓕᐅᖅᑎᐅᓚᐅᖅᑐᖅ ᑖᒻ ᓴᒻᒧᖅᑐᖅ ᓂᕈᐊᖅᑕᐅᓚᐅᖅᖢᓂ 93-ᓄᑦ ᐊᒻᒪ ᑕᒡᓕᔅ ᐊᒡᒐᒃ ᓂᕈᐊᖅᑕᐅᑉᓗᓂ 58-ᓄᑦ.

ᓂᕈᐊᖅᑕᐅᓯᒪᓚᐅᖅᑐᖅ ᒪᓕᒐᓕᐅᖅᑎ ᓯᒥᐊᓐ ᒥᑭᖑᐊᖅ ᓂᕈᐊᖅᑕᐅᒃᑲᓐᓂᓚᐅᖅᖢᓂ ᖃᒪᓂ'ᑐᐊᒥ 389-ᓄᑦ ᓂᕈᐊᖅᑕᐅᑉᓗᓂ ᑭᐅᕆᓐ ᖃᑉᓗᓈᒃ 280-ᓄᑦ, ᐊᕐᕕᐊᑦ ᓂᒋᐊᓂ ᒪᓕᒐᓕᐅᖅᑎᐅᓚᐅᖅᑐᖅ ᔫ ᓴᕕᑲᑖᒃ ᓂᕈᐊᖅᑕᐅᒃᑲᓐᓂᓚᐅᖅᖢᓂ 280-ᓄᑦ ᐊᒻᒪ ᔩᓴᓐ ᒋᕙᓐᔅ 234-ᓄᑦ.

ᔮᓐ ᒦᓐ ᓵᓚᒃᓴᓚᐅᖅᐳᖅ ᐊᕐᕕᐊᑦ ᐅᐊᖕᓇᖓᓄᑦ/ᑎᑭᕋᕐᔪᐊᒧᓪᓗ 408-115 ᓂᕈᐊᖅᑕᐅᓯᒪᓚᐅᖅᑐᖅ ᔪᐊᔾ ᑯᒃᓱᒃ, ᑖᓐᓇᓗ ᐸᑎᖅ ᓇᑦᓯᒃ ᑭᖑᓪᓕᖅᐹᒃᑯᑦ 318-ᓄᑦ ᓂᕈᐊᖅᑕᐅᓚᐅᖅᖢᓂ 218 ᓂᕈᐊᖅᑕᐅᓂᖅᓴᐅᑉᓗᓂ ᐊᐃᕕᓕᖕᒥᐅᓄᑦ ᓇᐅᔮᒥᐅᓄᑦ ᐊᒻᒪ ᓴᓪᓕᕐᒥᐅᓄᑦ.

ᑯᓱᒐᒃ, ᓂᕈᐊᖅᑕᐅᓯᒪᓯᒪᑉᓗᓂ ᓄᓇᓕᖕᓂ ᑲᑎᒪᔨᐅᓂᕐᒧᑦ ᐊᒻᒪ ᓄᓇᕗᒥ ᒪᓕᒐᓕᐅᖅᑎᐅᓂᕐᒧᑦ, ᐅᖃᓚᐅᖅᐳᖅ ᖁᕕᐊᓇᓚᐅᕐᓂᖓᓄᑦ ᓵᓚᒃᓴᖅᖢᓂ ᐊᔾᔨᒌᓚᐅᖏᒻᒪᑎᒃ ᓂᕈᐊᖅᑕᐅᓂᖏᑦ ᓂᕈᐊᕐᓇᐅᔪᒥ ᒫᓐᓇ ᐃᓇᖏᖅᑎᒃᓴᒥᒃ ᓂᕈᐊᓚᐅᖅᓯᒪᖕᒪᑎᑑᓚᐅᖏᑦᖢᓂ ᓴᒻᒧᖅᑐᖅ ᓂᕈᐊᖅᑕᐅᓚᐅᖅᓯᒪᑉᓗᓂ ᐊᔾᔨᒌᒃᑐᓂᒃ ᓂᕈᐊᖅᑕᐅᓚᐅᖅᓯᒪᖕᒪᑎᒃ ᐊᕐᕌᒍᑦ ᓯᑕᒪᐅᓚᐅᖅᓯᒪᔪᓂ.

ᐃᓱᒪᓕᐅᓚᖅᓯᒪᑉᓗᓂ ᐊᕐᕌᒎᓚᐅᖅᓯᒪᔪᒥ ᒪᓕᒐᓕᐅᖅᑎᖑᒃᑲᓐᓂᕈᒪᑉᓗᓂ, ᑲᔪᖏᖅᓴᐅᓚᐅᖅᓯᒪᑉᓗᓂᓗ ᐃᓄᖕᓄᑦ ᑕᐃᒪᓐᓇ ᓂᕈᐊᖅᑕᐅᓇᓱᐊᒃᑲᓐᓂᓕᓚᐅᖅᐳᖅ.

“ᐃᓄᐃᑦ ᐊᐱᖅᓱᖃᑦᑕᕐᒪᑕ ᐅᕙᒻᓂᒃ ᓂᕈᐊᖅᑕᐅᓇᓱᒃᑲᓐᓂᕐᓂᐊᕐᒪᖔᒪ ᐊᕐᕌᒍᒥ, ᐊᒻᒪ ᐃᓱᒪᒃᓴᖅᓯᐅᖁᔭᐅᑦᓯᐊᖅᖢᖓᓗ,” ᐅᖃᓚᐅᖅᐳᖅ ᑯᓱᒐᒃ.

“ᐊᒻᒪ, ᐃᓱᒪᒋᕙᓪᓕᐊᑉᓗᒍ, ᐅᖃᐅᑎᔭᐅᖃᑦᑕᐃᓐᓇᖅᖢᖓᓗ ᐃᓄᖕᓄᑦ ᓄᓇᓕᖕᓂ ᐅᑎᕆᐊᖃᕈᒪᓕᓚᐅᖅᐳᖓ.

“ᐅᖃᖃᑦᑕᓚᐅᕐᒪᑕ ᑲᖏᖅᖠᓂᕐᒥᐅᑦ ᓂᐱᖃᕈᒪᑉᓗᑎᒃ ᐊᒻᒪ, ᓂᕈᐊᖅᑕᐅᓇᓱᐊᒃᑲᓐᓂᕈᒪᓗ ᐃᑲᔪᖅᑐᖅᑕᐅᓂᐊᕐᓂᕋᖅᖢᖓ.

“ᑕᐃᒪ ᔫᓐᖑᓚᐅᖅᑐᒥ, ᐃᓱᒪᓕᐅᓚᐅᖅᐳᖓ ᓂᕈᐊᖅᑕᐅᓇᓱᐊᒃᑲᓐᓂᕈᒪᑉᓗᖓ.”

ᑯᓱᒐᒃ ᐅᖃᓚᐅᖅᐳᖅ ᓵᓚᒋᔭᐅᓚᐅᖅᓯᒪᑉᓗᓂ ᐊᕐᕌᒎᓚᐅᖅᑐᒥ ᐋᓐᓂᕐᓇᓚᐅᕐᓂᖓᓄᑦ.

ᐅᖃᓚᐅᖅᓗᓂᓗ ᓯᕗᓂᒃᓴᕆᓂᐊᖅᑕᒥᓂᒃ ᐃᓱᒪᓕᐅᕆᐊᖃᓚᐅᕋᒥ.

“ᖃᐅᔨᒪᓚᐅᖏᓐᓇᒪ ᖃᓄᐃᓕᐅᕐᓂᐊᕐᒪᖔᕐᒪ ᑲᑎᒪᔨᐅᖃᑕᐅᓂᕐᒧᑦ.

“ᑭᓯᐊᓂ, ᖃᐅᔨᒪᒐᑉᑕ, ᑲᖏᖅᖠᓂᖅ ᐆᒻᒪᑎᒋᒐᑉᑯ.

“ᐃᓅᓚᐅᖅᓯᒪᑉᓗᖓ ᐱᕈᖅᓴᓯᒪᑉᓗᖓᓗ ᑕᒡᕙᓂ ᐊᒻᒪ ᐋᓐᓂᕐᔪᐊᓚᐅᖅᐳᖓ ᓄᓇᓕᖕᓂᒥᐅᑦ ᓂᐱᖃᖏᓕᕐᒪᑕ.

“ᓴᐱᓕᕆᐊᖃᓚᐅᖏᓐᓇᑉᑯ ᓄᓇᒐ, ᐃᓄᐃᓪᓗ ᓄᓇᓕᖕᓂᒥᐅᑦ ᑕᑯᑎᑦᓯᓚᐅᕐᒪᑕ ᓂᕈᐊᕐᓇᐅᓕᕐᒥᑎᓪᓗᒍ ᓴᐱᓕᖅᑕᐅᓚᐅᖏᓐᓂᒻᓂᒃ.”

ᑯᓱᒐᒃ ᐅᖃᓚᐅᖅᐳᖅ ᓂᕈᐊᕐᓇᐅᑎᓪᓗᒍ ᐅᓐᓄᒃᑯᑦ 2017-ᒥ ᐊᔾᔨᐅᖏᑦᑐᒥᒃ ᐃᖅᑲᐅᒪᐃᓐᓇᕐᓂᐊᖅᐸᕋ.

ᐅᖃᓚᐅᖅᖢᓂᓗ ᖁᕕᐊᓱᓚᐅᕋᒥ ᐱᖃᓐᓇᕆᔭᒥᓂᒃ ᐱᖃᑎᖃᕈᓐᓇᓚᐅᕋᒥ, ᐃᓚᒥᓂᒡᓗ ᐊᒻᒪ ᓄᓇᓕᖕᓂᒥᐅᓂᑦ ᐅᑉᓗᒃᑯᑦ ᓂᕈᐊᕐᓇᐅᔪᒥ ᓵᓚᒃᓴᓚᐅᖅᖢᓂᓗ ᐅᓐᓄᒃᑯᑦ.

“ᑕᐃᒪ, ᑳᐱᑐᓚᐅᖅᑐᒃᓴᐅᑉᓗᖓᓗ ᖁᓕᓂᒃ ᐅᓐᓄᒃ ᐱᒋᐊᓕᖅᑎᓪᓗᒍ,” ᐅᖃᓚᐅᖅᐳᖅ ᑯᓱᒐᖅ ᐃᒡᓚᕐᖢᓂ.

“ᐊᒥᓱᓄᑦ ᐃᓄᖕᓄᑦ ᐅᖃᓪᓗᕆᒃᓴᖃᑎᖃᓚᐅᖅᐳᖓ, ᐅᓂᒃᑳᒐᒃᓴᖏᑦ ᐃᖅᑲᐅᒪᓇᑦᓯᐊᖅᐳᓪᓗ.

“ᓂᕈᐊᕈᑎᑦ ᓈᓴᖅᑕᐅᓚᐅᖅᑎᓪᓗᒋᑦ, ᑕᒪᕐᒥᒃ ᐅᖃᓘᑎᐊᓛᕋ ᑎᒍᒥᐊᒐᒃ ᐊᓯᖏᓪᓗ ᐅᕙᑉᑎᓐᓂ ᐅᖃᓘᑎᑦ ᓯᕙᓂᖏᓐᓇᓕᓚᐅᕐᒪᑕ ᐃᑲᕋᓄᑦ, ᐅᒃᑯᐊᒦᑦᑐᖃᐃᓐᓇᖅᖢᓂᓗ ᐱᖃᓐᓇᕆᔭᒃᑲ ᐅᑎᖅᑕᖅᑐᖅ ᐅᕙᑉᑎᓐᓄᑦ.

“ᐃᖅᑲᐅᒪᔭᒃᓴᐅᑦᓯᐊᕐᓂᐊᖅᐳᖅ ᐅᓐᓄᒃ.”