ᑕᓪᓕᒪᑦ ᐃᓕᓐᓂᐊᖅᑎᐅᔪᑦ ᐊᕐᕕᐊᑉ ᔮᓐ ᐊᕐᓇᓗᒃᔪᐊᖅ ᖁᑦᑎᒃᑐᒥ ᐃᓕᓐᓂᐊᕐᕕᖓᓐᓂ ᐊᖏᕐᕋᐅᔾᔨᔪᐃᓐᓇᐅᓚᐅᖅᐳᑦ ᐅᔭᒥᖕᓂᑦ 13-ᖓᓂ ᓄᓇᕗᒻᒥ ᐊᔪᙱᓐᓂᐅᔪᓄᑦ ᓵᓚᖃᕋᓱᐊᕐᓂᐅᔪᒥ ᐃᖃᓗᖕᓂ ᐊᐃᑉᕆᓕ 29-ᖑᑎᓪᓗᒍ.
ᓵᓚᖃᖅᑐᓄᑦ ᖃᑯᓪᓕᕐᒥ ᐅᔭᒥᖕᓂᑦ ᐅᑯᐊᖑᕗᑦ ᒫᓗᕆ ᐅᑲᑦᓯᐊᖅ ᓄᔭᓕᕆᓂᕐᒧᑦ ᐊᒻᒪ ᑕᒪᕇᔅ ᓄᑕᕋᓱᖕᓂᒃ ᐊᔾᔨᓕᐅᕆᓂᕐᒧᑦ. ᐱᓕᐊᕐ ᐊᐅᓚᑦᔪᑦ ᐊᒻᒪ ᐸᐅᓕ ᐃᓱᒪᑕᕐᔪᐊᖅ ᐊᕕᒃᓯᓚᐅᖅᐳᑦ ᖃᑯᓪᓕᕐᒥ ᐅᔭᒥᖕᒥ ᑕᕐᕆᔭᓕᐅᕆᓂᕐᒧᑦ ᒦᑲ ᑯᒪᒃ ᐱᓪᓗᓂ ᑲᓐᓄᔭᐅᔭᕐᒥ ᐱᐅᓴᐃᓂᐅᔪᒥᑦ.
ᔮᓐ ᐊᕐᓇᓗᒃᔪᕐᒥ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᓕᓴᐃᔨᑦ ᓯᐊᕋ ᐳᕋᒃᓱᕙᐃᒍᕐ, ᐅᖓᓯᒃᑐᒥ ᓴᐅᒥᖓᓐᓂ, ᐊᒻᒪ ᒍᐊᑦ ᐱᓛᑦ, ᐅᖓᓯᒃᑐᒥ ᑕᓕᖅᐱᖓᓂ, ᐃᓚᐅᖃᑕᐅᕗᑦ ᐊᕐᕕᐊᓂ ᐃᓕᓐᓂᐊᖅᑎᓂᑦ ᒫᓗᕆ ᐅᑲᑦᓯᐊᖅ, ᐱᓕᐊᕐ ᐊᐅᓚᑦᔪᑦ ᐊᒻᒪ ᐸᐅᓕ ᐃᓱᒪᑕᕐᔪᐊᖅ, ᑐᓄᐊᓂ ᓴᐅᒥᖕᒥ, ᐊᒻᒪ ᒦᑲ ᑯᒪᒃ, ᓯᕗᓂᐊᓂ ᓴᐅᒥᖕᒥ, ᐊᒻᒪ ᑕᒪᕇᔅ ᓄᑕᕋᓱᖕᓂᒃ, ᓯᕗᓂᐊᓂ ᑕᓕᖅᐱᖓᓂ, ᑕᑯᒃᓴᐅᑎᑦᑎᓂᖏᓐᓂ ᐅᔭᒥᖏᓐᓂ ᐱᔭᒥᓂᑦ ᓄᓇᕗᒻᒥ ᓯᕗᓕᐅᖅᑎᒧᑦ ᐹᓪ ᖁᐊᓴᒧᑦ 13-ᖓᓐᓂ ᓄᓇᕗᒻᒥ ᐊᔪᙱᓐᓂᐅᔪᒥ ᓵᓚᖃᕋᓱᐊᕐᓂᐅᔪᒥ ᐃᖃᓗᖕᓂ ᐊᐃᑉᕆᓕ 29-ᖑᑎᓪᓗᒍ.
ᐊᕐᕕᐊᕐᒥᐅᑕᒃᑲᓐᓂᕐᒥ ᐃᓚᐅᖃᑕᐅᔪᒥ, ᑖᓂᐅᓪ ᐊᓚᒐᓚᒃ, ᐱᓚᐅᖅᐳᖅ ᖃᑯᓪᓕᕐᒥ ᐃᓕᓐᓂᐊᕆᐊᒃᑲᓐᓂᕐᓂᐅᔪᒥ ᖁᑦᑎᖕᓂᖅᓴᒧᑦ ᕿᔪᓕᕆᓂᕐᒥᑦ.
ᐃᓕᓐᓂᐊᖅᑎᐅᔪᑦ ᐃᓚᐅᖃᑎᖃᓚᐅᖅᐳᑦ ᐃᖃᓗᖕᓄᑦ ᐊᔪᕆᖅᓱᐃᕙᒃᑐᓄᑦ, ᒍᐊᑦ ᐱᓛᑦ ᐊᒻᒪ ᓯᐊᕋ ᐳᕋᒃᓱᕙᐃᒍᒧᑦ, ᐃᓕᓐᓂᐊᕐᕕᖕᒧᑦ ᖃᐅᔨᒪᖃᑎᒌᖕᓂᐅᔪᒥ ᐊᔪᙱᓐᓂᐅᔪᓄᑦ ᓄᓇᕗᒻᒥ
ᐱᓛᑦ ᐅᖃᓚᐅᖅᐳᖅ ᓵᓚᖃᕋᓱᐊᕐᓂᐅᔪᖅ ᐱᓕᕆᑦᑎᐊᓚᐅᖅᐳᖅ ᐊᕐᕕᐊᕐᒥᐅᓄᑦ ᐃᓕᓐᓂᐊᖅᑎᓄᑦ ᐊᒻᒪ ᑕᒪᒃᑭᓄᑦ ᑲᑎᙵᓂᐅᔪᓄᑦ ᐱᓱᓯᓪᓗᑎᒃ ᐱᓕᕆᑦᑎᐊᖅᓯᒪᓂᖃᖅᖢᑎᒃ ᐱᓇᓱᐊᕈᓯᐅᑉ ᓄᙳᐊᓂ ᐃᖃᓗᖕᓂ.
“ᐱᖓᓱᓂ ᖃᑯᓪᓕᓂᑦ ᐊᒻᒪ ᑲᓐᓄᔭᐅᔭᒥ ᐅᐱᒋᔭᒃᓴᐅᕗᖅ,” ᐅᖃᓚᐅᖅᐳᖅ ᐱᓛᑦ. “ᐊᔪᙱᓐᓂᐅᔪᓅᑐᐃᓐᓇᓲᖑᙱᑦᑐᑦ ᒎᓗᒧᑦ. ᑕᐃᑯᙵᐅᓲᖑᕗᑦ ᐊᑐᓕᒪᓂᑲᕐᓂᕐᒧᑦ ᓵᓚᖃᕋᓱᐊᕐᓂᐅᔪᒧᑦ, ᐊᓯᓂᑦ ᐃᓄᖕᓄ ᑕᑯᔭᕆᐅᕐᓂᕐᒧᑦ, ᐊᒻᒪ ᐃᓕᑦᑎᒃᑲᓐᓂᕐᓂᕐᒧᑦ ᐃᓅᑦᑎᐊᕋᓱᖕᓂᕐᒧᑦ ᐃᓚᐅᖃᑕᐅᓂᕐᓂ. ᐊᓕᐊᓇᐃᑦᑑᒐᓗᐊᖅ ᒎᓗᑖᖅᖢᓂ ᐊᒻᒪ ᓇᐃᓴᐅᓯᖅᑕᐅᓂᕐᒥ ᖁᑦᑎᖕᓂᐅᔪᒥ ᑲᓇᑕᒥᐅᓄᑦ ᓵᓚᖃᕋᓱᐊᕐᓂᐅᔪᒧᑦ – ᑕᐃᒪᐃᓯᒪᕐᔪᐊᖅᖢᑕ – ᑭᓯᐊᓂ ᑕᒪᑉᒥᒐᓚᑦ ᐃᓕᓐᓂᐊᖅᑎᕗᑦ ᑕᒪᑐᒪᓂ ᐊᕐᕌᒎᔪᒥ ᓯᕗᓪᓕᖅᐹᒥ-ᐃᓚᐅᖃᑕᐅᓚᐅᖅᐳᑦ ᓵᓚᖃᕋᓱᐊᕐᓂᐅᔪᒥ.”
ᐱᓛᑦ ᐅᖃᓚᐅᖅᐳᖅ ᓄᑕᕋᓱᖕᓂᖅ ᐱᖓᔪᖓᓐᓂ ᐊᔪᙱᓐᓂᐅᔪᒥ ᓵᓚᖃᕋᓱᐊᕐᓂᐅᔪᒦᓚᐅᖅᐳᖅ ᐊᒻᒪ ᓱᓕ ᑲᒪᕐᔪᐊᓚᐅᖅᐳᖅ ᐃᓕᑦᑎᔪᓐᓇᓚᐅᕐᓂᖓᓂ ᐊᔾᔨᓕᐅᕆᓂᐅᔪᒥ ᐃᓕᓐᓂᐊᕐᓂᕆᔭᒥᓂᑦ. ᐅᑲᑦᓯᐊᖅ, ᐱᓗᐊᖅᑐᒥ, ᑎᒃᑯᐊᖅᑕᐅᓚᐅᖅᐳᖅ ᐊᒻᒪ ᐃᑲᔪᖅᓯᖅᑕᐅᓪᓗᓂ ᓄᔭᓕᕆᔨᐅᔪᒧᑦ ᐱᔭᕆᑐᔪᓄᑦ ᐃᒃᓯᕙᐅᑕᕆᔭᐅᔪᒥ ᓲᓵᓐ ᓚᓕᐴᑦᒧᑦ.
“ᒫᓗᕆ (ᐅᑲᑦᓯᐊᖅ) ᐅᓪᓗᓂ ᒪᕐᕉᖕᓂ ᓯᕗᓂᐊᓂ ᐊᐅᓪᓚᕆᐊᖃᓚᐅᖅᐳᖅ ᓯᐊᕆᒥ (ᐳᕋᒃᓱᕙᐃᒍ) ᐊᖏᔪᐊᓗᖕᒧᑦ ᐃᓕᓐᓂᐊᕐᓂᐅᓂᐊᖅᑐᒥ ᓄᔭᓕᕆᓂᕐᒧᑦ ᓵᓚᖃᕋᓱᐊᕐᓂᐅᔪᒥ ᐸᕐᓇᐃᓂᕐᒧᑦ ᑭᓯᐊᓂ ᐱᖅᓯᖅᑐᒧᑦ, ᑎᑭᐅᑎᔪᓐᓇᓚᐅᙱᓚᖅ,” ᐅᖃᓚᐅᖅᐳᖅ ᐱᓛᑦ. “ᑕᐃᒪᓐᓇ ᐱᓚᐅᙱᓚᖅ ᐱᓕᒻᒪᒃᓴᕐᓂᐅᔪᒥ ᑭᓯᐊᓂ ᐅᓐᓄᓴᖓᓂ ᓵᓚᖃᕋᓱᐊᕐᓂᐅᓂᐊᖅᑐᒥ ᓲᓵᓐ (ᓚᓕᐴᑦ) ᐱᓪᓗᓂᐅᒃ ᐊᒻᒪ ᐃᓕᓐᓂᐊᖅᑎᖦᖢᓂᐅᒃ ᖃᔅᓯᒐᓚᖕᓂ ᐱᓕᕆᓂᐅᔪᓂ ᐱᖃᑕᐅᓚᐅᙱᑕᖓᓂ ᐃᓕᓐᓂᐊᕐᓂᐅᔪᒥ.”
ᐅᑲᑦᓯᐊᖅ ᐱᖕᒪᑦ ᖃᑯᓪᓕᕐᒥ, ᓚᓕᐴᑦ ᐅᖃᑲᐅᖅᑐᓚᐅᖅᐳᖅ ᐊᒃᓱᕈᓚᐅᕐᓂᖓᓂ ᑲᒪᓇᕐᔪᐊᓚᐅᖅᐳᖅ, ᐃᓱᒪᒋᓪᓗᒍ ᐃᓚᐅᖃᑕᐅᓚᐅᙱᓐᓂᖓᓂ ᑕᒪᕐᒥᒐᓚᖕᒥ ᐱᓕᒻᒪᒃᓴᕐᓂᐅᓚᐅᖅᑐᒥ. ᐅᐱᒋᓚᐅᖅᐸᖓ ᑎᑭᐅᑎᔪᓐᓇᕐᓂᖓᓂ ᑭᒡᓕᐅᔪᒧᑦ ᓵᓚᖃᕋᓱᐊᕐᓂᐅᔪᒥ ᕿᓚᒥᒻᒪᕆᑯᓗᖕᒥ, ᐅᖃᓚᐅᖅᐳᖅ.