Skip to content

ᐊᑭᑭᑦᑐᒃᑯᕕᒃ ᓂᐅᕕᕐᕕᒃ ᒪᑐᐃᖅᐳᖅ ᖃᒪᓂᑦᑐᐊᒥ

ᒃᓱᕈᕐᓂᖅᑕᖃᓚᐅᖅᐳᖅ ᑎᑭᓐᓇᓱᐊᖅᖢᒍ, ᑭᓯᐊᓂ ᖃᒪᓂᑦᑐᐊᕐᒥ ᐊᑭᑭᑦᑐᒃᑯᕕᖕᒥ ᓂᐅᕕᕐᕕᖕᒥ ᒪᑐᐃᖅᓯᓪᓚᕆᓚᐅᖅᐳᑦ ᐹᖏᓐᓂ ᒪᐃ 11-ᖑᑎᓪᓗᒍ.

ᓂᐅᕕᕐᕕᒃ ᐊᐅᓚᑕᐅᕗᖅ ᐊᑉᓗᖅᑕ ᑲᑐᔾᔨᖃᑎᒌᖑᔪᓄᑦ ᐊᒻᒪ ᑮᓇᐅᔾᔭᒃᓴᓂᐅᔪᑦ ᐱᓕᕆᐊᖑᔪᒧᑦ ᐊᑐᖅᑕᐅᓂᐊᖅᐳᑦ ᑮᓇᐅᔭᖃᖅᑎᑕᐅᓂᖓᓂ ᓂᕿᑖᕐᕕᖕᒧᑦ ᐊᔪᖅᓴᖅᑐᓄᑦ ᓄᓇᓕᐅᔪᓄᑦ.

ᓂᐅᕕᕐᕕᖕᒧᑦ ᐊᐅᓚᑦᑎᔨ ᓯᐊᕋᓐ ᐊᓕᖅ ᐊᒻᒪ ᐊᑉᓗᖅᑕ ᑲᑐᔾᔨᖃᑎᒌᖑᔪᓄᑦ ᐊᖓᔪᖅᑳᖓ ᔫᓯᐱ ᐊᕐᓇᓱᖓᖅ, ᑕᓕᖅᐱᖓᓐᓂ, ᑭᐱᓯᑎᓪᓗᒋᑦ ᓯᓂᒃᓴᒥ ᒪᑐᐃᓪᓚᕆᖕᓂᕐᒧᑦ ᐊᑭᑭᑦᑐᒃᑯᕕᖕᒥ ᓂᐅᕕᕐᕕᖕᒥ ᖃᒪᓂᑦᑐᐊᒥ ᒪᐃ 11-ᖑᑎᓪᓗᒍ.
Store manager Sharon Alerk and Abluqta Society president Joseph Arnasungaq, right, cut the ribbon to officially open the Thrift Store in Baker Lake on May 11, 2018. photo courtesy of Erin Strachan

ᐃᓱᒪᓂᐅᔪᖅ ᑲᑐᔾᔨᖃᑎᒌᖑᔪᓄᑦ ᓴᖅᑭᓚᐅᖅᐳᖅ ᐃᐊᕆᓐ ᔅᑐᕌᑭᓐ ᐱᓕᕆᑦᑎᐊᕐᓂᕐᒧᑦ ᐊᐅᓚᑦᑎᔨᐅᔪᓄᑦ ᐅᖃᐅᔾᔨᔨᐅᔪᓂ ᑐᓂᓯᖕᒪᑕ ᐃᖅᑲᓇᐃᔮᒃᓴᒧᑦ ᐱᓕᒻᒪᒃᓴᕐᓂᐅᔪᒥ ᐱᓕᕆᐊᖑᔪᒥ ᖃᒪᓂᑦᑐᐊᕐᒥ ᑮᓇᐅᔭᖃᖅᑎᑕᐅᓪᓗᓂ ᐃᖅᑲᓇᐃᔮᓄᑦ ᐱᕙᓪᓕᐊᑎᑦᑎᓂᐅᔪᒥ ᐊᕕᒃᓯᒪᓂᐅᔪᒥ ᐱᓕᕆᕕᐅᔪᒥ ᐃᓚᒌᓄᑦ ᐱᔨᑦᑎᕋᕐᓂᕐᒧᑦ 2016-ᒥ.

ᐱᓕᕆᐊᖑᔪᖅ ᓴᓇᓯᒪᕗᖅ ᐃᑲᔪᕐᓂᕐᒧᑦ ᐃᓄᖕᓂ ᐊᔪᕈᑎᓕᖕᓄᑦ ᐅᕙᓘᓐᓃᑦ ᐊᓯᖏᓐᓂ ᐊᒃᓱᕈᕐᓂᖃᖅᑐᓄᑦ ᐃᖅᑲᓇᐃᔮᒃᓴᓂ ᓇᓂᓯᔭᕆᐊᒃᓴᖅ.

ᖃᒪᓂᑦᑐᐊᕐᒥ ᐃᓚᒋᔭᐅᔪᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᒻᒪ ᖃᓄᐃᙱᑦᑎᐊᕐᓂᐅᔪᒥ ᑲᑎᒪᔨᕋᓛᖏᓐᓂ ᐅᖃᐅᓯᖃᕐᒪᑕ ᐱᑕᖃᕆᐊᖃᕐᓂᖓᓂ ᐊᑭᑭᑦᑐᒃᑯᕕᖕᒥ ᓂᐅᕕᕐᕕᖕᒥ ᓄᓇᓕᖕᓂ ᔅᑐᕌᑭᓐᒧᑦ, ᐃᓱᒪᕙᓪᓕᐊᓂᐅᔪᑦ ᐱᒋᐊᓚᐅᖅᐳᑦ ᓴᖅᑭᑎᑦᑎᓂᐅᔪᒥ ᐊᑉᓗᖅᑕ ᑲᑐᔾᔨᖃᑎᒌᖑᔪᓄᑦ ᐊᒻᒪ ᐊᑭᑭᑦᑐᒃᑯᕕᒃ ᓂᐅᕕᕐᕕᖕᒥᑦ.

ᔫᓯᐱ ᐊᕐᓇᓱᖔᖅ ᐊᖓᔪᖅᑳᖑᕗᖅ ᑲᑐᔾᔨᖃᑎᒌᖑᔪᓄᑦ, ᓯᐊᕆᓐ ᐊᓕᖅ ᐊᐅᓚᑦᑎᓂᐊᖅᖢᓂ ᐊᑭᑭᑦᑐᒃᑯᕕᒃ ᓂᐅᕕᕐᕕᖕᒥ .

ᔅᑐᕌᑭᓐ ᐅᖃᓚᐅᕆᕗᖅ ᐃᓕᑦᑎᓚᐅᕐᓂᖓᓂ ᐱᔭᕆᐊᖃᕐᓂᐅᔪᒥ ᓂᕿᑖᕐᕕᖕᒥ ᐊᔪᖅᓴᖅᑐᓄᑦ ᖃᒪᓂᑦᑐᐊᕐᒥ, ᑭᖑᓪᓕᖅᐹᖑᔪᖅ ᒪᑐᓚᐅᖅᓯᒪᖕᒪᑦ 2015-ᒥ.

ᐊᑭᑭᑦᑐᒃᑯᕕᒃ ᓂᐅᕕᕐᕕᒃ ᒪᑐᐃᖓᓲᖑᕗᖅ ᐅᓪᓗᓂᑦ ᒪᕐᕉᖕᓂ – ᕿᑎᖅᑰᒥ ᐊᒻᒪ ᓯᕙᑖᕐᕕᖕᒥ.

ᔅᑐᕌᑭᓐ ᐅᖃᓚᐅᖅᐳᖅ ᐊᑭᑭᑦᑐᒃᑯᕕᒃ ᓂᐅᕕᕐᕕᒃ ᐱᓚᐅᖅᐳᑦ ᐅᒥᐊᕐᔪᐊᒃᑯᕈᑎᒥ ᐴᕌᓗᖕᒥ ᑕᑖᖅᑐᒥ ᑐᓐᓂᖅᑯᑕᐅᓂᑯᓂ ᐃᑯᕐᕋᖅ ᓂᕿᑖᕐᕕᖓᓐᓂ ᐊᔪᖅᓴᖅᑐᓄᑦ (ᑏᑲᓐ ᒪᒃᐱᖅᑕᔫᖓᑦ) ᑲᖏᖅᖠᓂᕐᒥ ᐊᐅᓚᑕᐅᓂᖓ ᐱᒋᐊᑦᑎᐊᖁᔭᐅᓪᓗᓂ.

ᐅᖃᓚᐅᖅᐳᖅ ᑕᐃᒪᙵᓂ ᒪᑐᐃᓚᐅᕐᓂᖓᓂ, ᓂᐅᕕᕐᕕᒃ ᐱᓯᒪᕗᖅ ᐊᒥᓱᐊᓗᖕᓂ ᑐᓐᓂᖅᑯᓯᐊᖑᔪᓂ ᐃᓄᖕᓂ ᓄᓇᓕᖕᓂ.

ᑭᓱᑐᐃᓐᓇᐃᑦ ᑎᑭᓯᒪᕗᑦ ᐃᓄᖕᓂ ᓅᑉᐸᓪᓕᐊᒃᑲᓐᓂᖅᑐᓄᑦ ᖃᓪᓗᓈᑦ ᓄᓇᖓᓐᓄᑦ, ᐃᓄᖕᓂ ᐃᖅᑲᓇᐃᔭᖅᑐᓄᑦ ᐅᑎᖅᑕᖅᐸᒃᑐᓂ ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᖓᓄᑦ ᐊᒻᒪ ᐃᓚᖏᓐᓂ ᐃᓄᖕᓂ ᐱᖁᑎᖃᖅᑐᓂ ᑐᓐᓂᖅᑯᑎᒃᓴᖃᖅᑐᓄᑦ,” ᐅᖃᓚᐅᖅᐳᖅ.

ᑲᑐᔾᔨᖃᑎᒌᖑᔪᑦ ᒫᓐᓇᓕᓴᒥ ᐱᙴᖅᑎᑦᑎᓚᐅᖅᐳᑦ ᑮᓇᐅᔭᓂᑦ ᐱᕈᖅᓴᐃᓇᓱᐊᖅᖢᑎᒃ ᓂᐅᕕᕐᕕᖕᒧᑦ ᐊᒻᒪ ᐊᑐᕐᓂᐊᖅᖢᑎᒃ ᐃᓚᖏᓐᓂ ᑮᓇᐅᔭᓕᐊᖏᓐᓂ ᓂᐅᕕᕐᓂᕐᒧᑦ ᓯᕗᓪᓕᖅᐸᐅᔪᓄᑦ ᓂᕿᒃᓴᐅᓂᐊᖅᑐᓄᑦ ᐊᒻᒪ ᑐᓐᓂᖅᓴᕐᓗᒋᑦ ᖁᓕᓄᑦ ᐃᓚᒌᖑᔪᓄᑦ ᐱᔭᕆᐊᖃᖅᑐᓂ ᖃᒪᓂᑦᑐᐊᕐᒥ.

ᔅᑐᕌᑭᓐ ᐅᖃᓚᐅᖅᐳᖅ ᐊᑉᓗᖅᑕ ᑲᑐᔾᔨᖃᑎᒌᖑᔪᑦ ᐱᕙᓪᓕᐊᑎᑦᑎᓯᒪᕗᑦ ᐆᒥᖓ ᐱᒋᐊᕈᑕᐅᔪᒥ ᖄᖏᖅᓯᒪᓕᖅᑐᒥ ᐊᕐᕌᒍᓄᑦ ᐱᖓᓱᓄᑦ ᐊᒻᒪ ᐊᒃᓱᕈᕐᓇᓚᐅᖅᐳᖅ ᑮᓇᐅᔭᖅᑖᕋᓱᐊᕐᓂᕐᒧᑦ ᐊᐅᓚᑕᐅᓂᖓ ᒪᑭᑎᓐᓇᓱᐊᖅᑕᐅᓂᖓᓄᑦ ᐊᒻᒪ ᐊᐅᓚᓂᖓᓄᑦ.

ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᖃᕐᔪᐊᕆᐊᖃᓚᐅᖅᐳᖅ ᐊᒻᒪ ᐋᖅᑭᒃᓱᐃᓂᐅᔪᒥ ᑎᑭᐅᑎᓂᖓᓄᑦ ᒫᓐᓇᒧᑦ, ᐊᒻᒪ ᓂᕆᐅᖕᓂᖃᑦᑎᐊᖅᐳᖓ ᐱᔪᓐᓇᓛᕐᓂᑦᑎᓐᓂ ᐊᑯᓂᐅᔪᒃᑯᑦ ᑮᓇᐅᔭᖃᖅᑎᑕᐅᓂᐅᔪᓂ ᓯᕗᒻᒧᒃᐸᓪᓕᐊᓂᐅᔪᒧᑦ,” ᐅᖃᓚᐅᖅᐳᖅ. “ᐊᒥᓱᐊᓗᖕᓂ ᑳᒃᑐᖅᑕᖃᖅᐳᖅ ᐃᓄᖕᓂ ᖃᒪᓂᑦᑐᐊᒥ, ᐊᒻᒪ ᓇᒥᑐᐃᓐᓇᖅ ᓄᓇᕗᒻᒥᑦᑕᐅᖅ,” ᐃᓚᒋᐊᖅᓯᓚᐅᖅᐳᖅ.

ᓲᓴᓐ ᑑᓗᒃᑐᒃ, ᓄᓇᓕᖕᓂ ᐃᓄᑐᖃᐅᔪᖅ, ᐃᒻᒥᓂᒐᓚᒃ ᐊᐅᓚᑦᑎᓚᐅᖅᐳᖅ ᓯᕗᓂᐊᓂ ᓂᕿᑖᕐᕕᖕᒥ ᐊᔪᖅᓴᖅᑐᓄᑦ ᖃᒪᓂᑦᑐᐊᕐᒥ ᐊᒻᒪᓗ ᒫᓐᓇ ᐊᑉᓗᖅᑕ ᑲᑐᔾᔨᖃᑎᒌᓂ ᐃᓚᒋᔭᐅᖃᑕᐅᓕᖅᐳᖅ, ᐅᖃᓚᐅᖅᐳᖅ ᔅᑐᕌᑭᓐ.

ᐅᖃᓚᐅᖅᐳᖅ ᑑᓗᒃᑐᒃ ᑲᒪᓇᖅᑑᓪᓗᓂ ᐃᓅᕗᖅ.

ᓲᓴᓐ ᐊᔪᕈᑎᖃᖅᐳᖅ ᑐᓵᙱᓐᓂᖓᓂ, ᑭᓯᐊᓂ ᐊᖑᓇᓱᒃᑎᑦᑎᐊᕙᐅᓛᖑᕗᖅ ᓄᓇᓕᐅᔪᒥ. ᐃᓄᑑᓗᓂ ᐊᐅᓪᓚᓲᖑᕗᖅ -40 C ᐅᓪᓗᖓᓂ ᐊᒻᒪ ᐅᑎᕐᓗᓂ ᐅᒥᖕᒪᖃᕐᓗᓂ ᑐᒃᑐᒥᓪᓘᓐᓃᑦ,” ᐅᖃᓚᐅᖅᐳᖅ. “ᐱᐅᔪᒻᒪᕆᐅᓂᐊᖅᐳᖅ ᓲᓴᓐᒧᑦ ᑕᑯᔪᓐᓇᖅᓯᓂᐊᕐᓂᕐᒧᑦ ᐆᒥᖓ ᑲᑎᑉᐸᓪᓕᐅᓂᐅᓂᖓᓂ ᐃᓅᓯᕆᔭᒥᓂᑦ ᑐᕌᖓᓂᖃᑦᑎᐊᕐᒪᑦ ᓇᒡᓕᖕᓂᖓᓂ ᐊᒻᒪ ᐊᒃᓱᕈᕐᓂᖓᓂ ᑕᑯᔪᒪᓂᖓᓂ ᐃᓄᖕᓂ ᖃᒪᓂᑦᑐᐊᕐᒥ ᓂᕿᒃᓴᖃᑦᑎᐊᕐᓂᖏᓐᓂ,” ᐅᖃᓚᐅᖅᐳᖅ.