ᓴᓇᖑᐊᑦᑎᐊᕙᐅᓂᖅᐹᖅ, ᐱᐅᓴᐅᑎᓕᐅᖅᑎᐅᓪᓗᓂᓗ, ᐃᓱᒪᒃᓴᖅᓯᐅᖅᑐᖅ

by Michele LeTourneau- December 2, 2017

ᒍᕆᒍᕆ ᒧᐊᒐᓐ ᓴᓇᔭᖏᑦ ᐊᒥᓱᓄᑦ ᐱᔪᒪᔭᐅᓕᕐᒪᑕ, ᓇᖕᒥᖅᑕᐅᖅ ᐱᔪᒪᔭᐅᓕᕆᓪᓗᓂ – ᑭᓯᐊᓂᓕ ᐃᓕᓵᓂᒃᑯᓂ ᓄᓇᕗᑦ ᓯᓚᑦᑐᒃᓴᕐᕕᒃᔪᐊᖓᓂ ᐱᐅᓴᐅᑎᓂᒃ ᓴᓇᐅᒐᖅᑎᐅᓂᕐᒥᒃ ᓴᕕᕋᔭᓂᒃ ᐱᐅᓴᐅᑎᒃᓴᓕᐅᕐᓂᕐᒥᒃ ᐃᓕᓴᖅᑕᖓᓂᒃ ᒪᐃᒥ ᐃᓱᓕᓐᓂᐊᕐᒪᑦ, ᐊᐃᑉᐸᕇᒃ ᓇᒥ ᐊᖏᕐᕋᖃᕐᓂᐊᕐᓂᕐᒥᓂᒃ ᓇᓗᔪᖅ ᓱᓕ.

ᐊᐃᑦᑖᒍᒐᓗᐊᖅ ᑕᒪᑐᒪᓂ ᑖᓐᓇ ᓴᓇᖑᐊᖅᑎ ᐱᐅᓴᐅᑎᓕᐅᖅᑎᓗ, ᓱᓕ ᓯᕗᓂᒃᓴᒥᓂᒃ ᖃᓄᖅ ᐱᓂᐊᕐᒪᖓᕐᒥᓂ ᓇᓗᖕᒪᑦ.

ᐃᓱᒪᖃᑦᑕᖅᑐᕉᖅ ᒪᓕᖕᓂᐊᕋᓱᒋᓪᓗᓂ ᒫᑎᐅ ᓄᕿᖓᕐᒥᒃ ᐋᔪᕋᒃᑯᓐᓂ ᓴᓇᔨᐅᔪᒪᓪᓗᓂ ᐃᖃᓗᖕᓂ, ᑭᓯᐊᓂᓕ ᐃᒡᓗᒃᓴᖃᖏᒻᒪᑕ ᓱᓕ. ᒧᐊᒐᒃᑯᑦ ᐊᐃᑉᐸᕇᒃ ᕿᑐᖓᖏᓗ ᐊᖏᕐᕋᒃᓴᖃᖏᒻᒪᑕ ᐃᖃᓗᖕᓂ – ᑕᒪᐅᖓ ᓄᒃᑎᓚᐅᕐᓂᕐᒪᑕ ᓴᓇᐅᒐᖏᑦ ᑕᒫᓂ ᐱᔭᐅᓴᕋᐃᓐᓂᖅᓴᐅᑉᒪᑕ ᐃᖃᓗᖕᓂ ᓂᐅᕕᐊᒃᓴᕆᓪᓗᒋᑦ ᓴᓇᐅᒐᒃᑲ ᑕᒫᓂ ᐱᕙᓪᓕᐊᓂᖅᓴᐅᔪᓐᓇᕐᒪᑕ – ᐃᓕᓴᖅᑏᑦ ᐃᒡᓗᖏᓐᓂᑦ ᐊᓂᒋᐊᖃᕐᓂᐊᕐᒪᑦ ᐃᓕᓵᓂᒃᑯᓂ.

ᐱᖏᒍᓱᐃᓐᓇᖅᑐᑦ ᐱᓂᐊᕐᒪᖔᕐᒥᓂᒃ ᐊᖏᕋᖃᖏᓪᓗᑎᒃ ᖃᓄᖅ ᑕᒫᓃᓐᓂᐊᕆᐊᒃᓴᖅ, ᐅᖃᕆᓪᓗᓂ.

ᐱᐅᓴᐅᑎᒃᓴᓂᒃ ᓴᓇᖑᐊᖅᑎᓄᑦ ᐃᓕᓴᐃᔨ ᒋᐊᓪ ᕼᐊᑐ ᐅᓂᒃᑳᓚᐅᖅᑐᕐᓕ ᐃᖅᑲᐅᒪᓂᕋᖅᖢᓂ ᓯᕗᓪᓕᖅᐸᒥ ᑕᑯᒋᐅᕋᒥᐅᒃ ᐃᓕᓴᖅᑎᒋᓂᐊᖅᑕᓂ ᒧᐊᒐᓐ ᐊᕐᕋᓂ.

“ᓱᖕᒪᑦ ᐱᐅᓴᐅᑎᓂᒃ ᐃᓕᓴᕈᒪᖕᒪᖔᑕ ᑕᕝᕙᑐᐊᖅ ᐊᐱᖅᑯᑎᒃᓴᑐᐃᓐᓇᐅᓕᖅᑐᖅ ᐊᔾᔨᐅᖏᒻᒪᑦ ᑕᒫᓂᕐᒥᐅᓄᑦ ᓴᓇᐅᓯᐅᒋᐊᖓ,” ᐅᖃᕆᓪᓗᓂ ᕼᐊᑐ, ᓯᕗᓪᓕᖅᐸᒥ ᐱᒋᐊᖓᓕᖅᑎᓪᓗᒍ ᐃᓕᓴᕐᕕᖕᒥ ᐃᓕᓴᖅᑏᑦ ᑲᑎᓯᒋᐊᖅᑎᓪᓗᒋᑦ ᐃᓕᓴᖃᑎᒥᓂᒃ.

ᒧᐊᒐᓐ, ᓴᓂᕋᔭᖕᒥᐅᕕᓂᖅ, ᐅᓂᒃᑳᓚᐅᖅᑐᖅ ᓴᓇᖑᐊᖅᑎᐅᓕᕋᒥᒎᖅ ᐅᑭᐅᓂᒃ ᐊᒥᓱᓂᒃ 25-ᓂᒃ ᓄᓇᓕᖕᒥᓂ.

“ᑭᓯᐊᓂᓕ ᐃᓛᓐᓂᓚᐅᓱᖓᒃᑯᑦ ᑲᑎᓯᔪᒪᖃᑦᑕᕋᒪ ᓴᓇᐅᒐᖃᑎᓐᓂᒃ ᐊᔾᔨᒌᖏᑦᑐᓂᒃ ᓴᓇᖅᑯᑎᖃᖅᑐᓂᒃ ᐅᔭᕋᓂᒃ ᓴᕕᕋᔭᖃᖅᑐᓂᒃ ᓴᓇᖑᐊᒐᓂᒃ,” ᐅᓂᒃᑳᕆᓪᓗᓂ ᐃᓕᓴᖃᑎᒥᓄᑦ.

ᕼᐊᑐ ᐃᓱᒪᓚᐅᖅᑐᕉᖅ ᑖᓐᓇ ᑕᐃᒪᓐᓇ ᐱᒃᐸᑦ ᖃᓄᐃᒃᑲᔭᕆᐊᖓᓂᒃ.

“ᑭᓯᐊᓂᓕ ᓯᕗᓪᓕᖅᐸᒥ ᑕᖅᑭᒥ ᓴᓇᖃᑦᑕᓕᖅᖢᓂ ᐊᒥᓱᓄᑦ ᐱᒃᑯᒥᒋᔭᐅᔪᒻᒪᕆᐅᓚᐅᕐᒪᑦ ᐃᔨᖏᑦ ᑕᑯᓪᓗᒋᑦ ᓇᓗᓇᓚᐅᖏᑦᑐᖅ ᖁᕕᐊᒋᓂᖓᓂᒃ ᑕᑯᓪᓗᓂᒋᑦ ᓴᕕᕋᔭᓂᑦ ᓴᓇᓯᒪᔪᑦ ᑕᐃᒪᓐᓇ. ᐊᒥᓱᓄᑦ ᓂᐅᕕᖅᑕᐅᓴᐅᑎᒋᖃᑦᑕᓚᐅᕐᒪᑕ,” ᐅᖃᕆᓪᓗᓂ ᕼᐊᑐ, “ᐃᖅᑲᐅᒪᔭᒃᑲᓘᓐᓃᑦ ᓯᕗᓪᓕᖅᐹᒥᒃ ᐅᖃᐅᓯᕆᓚᐅᖅᑕᖏᑦ – ᐃᓚᓯᔪᒪᑐᐃᓐᓇᕐᓂᕋᖅᖢᓂ ᓴᕕᕋᔭᓂᒃ ᓴᓇᐅᒐᕐᒥᓄᑦ.”

ᐅᖃᕆᓪᓗᓂ ᑕᖅᑮᑦ ᓯᑕᒪᑦ ᓈᓯᒪᓕᖅᑎᓪᓗᒋᑦ ᐃᓕᓴᕕᖕᒥ ᓱᓕ “ᒍᕆᒃ ᐅᐊᖑᓕᓚᐅᖅᑐᖅ ᐃᓕᒃᑲᓐᓂᕈᒪᔪᖅ ᕿᐸᓇᒻᒪᕆᓕᓚᐅᖅᑐᖅ ᓴᓇᐅᓯᕐᓂᒃ ᐃᓕᓴᕈᒪᔪᖅ ᓴᕕᕋᔭᓕᕆᓂᕐᒥᒃ ᕿᓪᓕᖅᑕᓗᐊᓂᒃ.”

ᒧᐊᒐᓐ ᐱᒃᑯᒥᒍᓱᓚᐅᕐᒪᑦ ᑕᒪᐃᓐᓂᓕᒫᖅ ᓴᓇᐅᓯᕐᓂᒃ, ᖃᓄᖅ ᐱᒋᐊᖓᐅᓯᖏᓐᓂᒃ.

“ᑕᐃᒪᖓᓂᑦ ᐃᓕᓴᖅᑐᓂᑦ ᖃᓂᓐᓂᖅᐹᖑᐃᓐᓇᐅᔭᕐᒪᑦ ᓴᓇᕕᐅᔪᓄᑦ. ᑭᓯᐊᓂᓕ ᐃᓱᒪᖅᓱᖅᖢᓂ ᖃᐃᖃᑦᑕᕐᒪᑦ ᖃᐃᓯᒪᓕᕌᖓᒥ ᐊᒃᓱᐊᓗᒃ ᓴᓇᖃᑦᑕᖅᖢᓂ. ᐃᓕᓴᖅᑎᓱᒍ ᑕᑯᑎᒃᑲᖓᑦᑎᒍ ᐊᑕᐅᓯᐊᖅᖢᓂ ᐊᓯᖏᑦ ᐃᓕᓴᖅᑏᑦ ᓱᓕ ᐊᑕᐅᓯᕐᒥᒃ ᓴᓇᑎᓪᓗᒋᑦ ᐱᐊᓂᒃᓯᓯᒪᓕᓲᖅ ᐃᒻᒪᖄ ᓯᑕᒪᓂᒃ,” ᐅᖃᕆᓪᓗᓂ ᕼᐊᑐ.

ᐅᓂᒃᑲᐅᓯᕆᓚᐅᖅᑕᖓ ᒧᐊᒐᓐ ᓴᓇᐅᓯᐊ ᓲᕐᓗᒎᖅ ᑐᓴᕐᓂᖅᑐᐊᓗᖕᓂᒃ ᑎᑕᐅᓯᕐᓂᒃ ᐊᔪᖏᑦᑐᑎᑐᑦ ᐱᖕᒪᑦ ᑯᑭᑦᑕᐹᖅᓯᑎᑐᑦ.

“ᑯᑭᑦᑕᐹᖅᓯᐅᑎᓂᒃ ᐃᓕᓴᕈᓐᓇᖅᑕᓯ ᑕᒪᓯ ᑭᓯᐊᓂᓕ ᑕᒪᐃᑕᓕᒫᖅ ᑐᓴᕐᓂᕐᓂᖅᐹᓂᒃ ᐱᓯᓕᐅᓲᖑᖏᒪᑕ ᑕᐃᒪᖓᓂᑦ. ᐃᓛᓐᓂᓚᐅᓱᖓᒃᑯᑦ ᐱᑕᖃᓱᖑᖕᒪᑦ ᑕᒪᐃᓐᓂᓕᒫᖅ ᐊᔪᒐᖃᖏᑦᑐᓂᒃ ᐊᒻᒪᓗ ᓇᖕᒥᓂᖅ ᑕᕐᓂᕐᒥᓂᑦ ᐱᔪᓂᒃ ᓴᓇᔪᓐᓇᖅᖢᓂ.”

ᐅᑯᐊ ᑕᕝᕙ ᒥᑭᓐᓂᖅᓴᐃᑦ ᐃᖃᓗᖑᐊᑦ ᓴᓇᔭᐅᓚᐅᖅᑐᑦ ᒍᕆᒍᕆ ᒧᐊᒐᓐᒧᑦ ᑐᓐᖓᕕᒋᔭᐅᓂᐊᖅᑐᑦ ᐊᖏᔪᐊᓗᖕᒧᑦ ᓴᓇᓚᐅᖅᑕᖏᑦ ᐱᖃᑎᒋᓪᓗᒍ ᓘᑎ ᐱᔭᒥᓂ ᐃᖃᓗᐃᑦ ᓄᓇᕐᔪᐊᒥᐅᓄᑦ ᖃᖓᑕᓲᒃᑯᕕᐊᓂ.

ᒧᐊᒐᓐ ᐅᖃᕆᓪᓗᓂ ᑎᑎᖅᑐᕋᕆᐅᓚᐅᖅᓯᒪᒐᒥᒎᖅ 16-ᓂᒃ ᐊᕐᕌᒍᖃᓕᖅᖢᓂ, ᐊᒻᒪᓗ ᓴᓇᖑᐊᕆᐅᖅᖢᓂ 19-ᓂᒃ ᐊᕐᕌᒍᖃᓕᖅᖢᓂ.

“ᑕᐃᓱᒪᓂ ᐱᖃᓐᓈᖃᓚᐅᖅᓯᒪᒐᒪ, ᒫᓐᓇ ᐊᐃᑉᐸᕆᓕᖅᕋ – ᒫᓐᓇ ᓴᑭᒋᓕᖅᑕᒪ ᐅᖃᐅᑎᓚᐅᖅᓯᒪᖕᒪᖓ ᑎᑎᖅᑐᕋᕈᓐᓇᕈᕕᑦ, ᓴᓇᖑᐊᕈᓐᓇᖅᑐᑎᑦ,” ᐅᖃᕆᓪᓗᓂ, ᐊᓱᐃᓛᒃ ᓯᕗᓪᓕᖅᐹᒥ ᓴᓇᖑᐊᕆᐅᕐᓂᖅᖢᓂ, ᐱᐊᓂᑦᑎᐊᖅᖢᓂᐅᒃ, ᐃᒻᒥᓂᒃ ᑕᐸᓇᐃᖅᑐᕕᓂᖅ.

ᐊᒻᒪᓗ ᓴᓂᕋᔭᖕᒥᐅᑦ ᓄᓇᓕᖓ ᒥᑭᓐᓂᖓᓄᑦ ᐱᕝᕕᑭᓐᓂᖅᓴᐅᖕᒪᑦ ᐃᖅᑲᓇᐃᔮᒃᓴᖃᖏᓱᑎᒃᓗ, ᒧᐊᒐᓐ, ᑕᓪᓕᒪᓂᒃ ᐸᓂᖃᕐᒪᑦ, ᑕᐃᒪᖓᓂᑦ ᓴᓇᖑᐊᖅᖢᓂ ᑭᓯᐊᓂᐅᓐᓂᕐᒪᑦ.

“ᖃᐅᑕᒫᑦ ᓴᓇᖑᐊᖃᑦᑕᓕᓚᐅᖅᑐᖓ,” ᐅᖃᕆᓪᓗᓂ, ᑭᓯᐊᓂᓕ ᑕᒪᑐᒪᓂ ᓴᓇᖑᐊᕆᐊᖃᖏᑎᑕᐅᒐᒪ ᓄᓇᕗᒥ ᓯᓚᑦᑐᒃᓴᕐᕕᒃᔪᐊᖓᓂ ᐃᓕᓴᕐᓂᓐᓂ ᓴᓇᕕᒃᓴᒥᒃ ᐱᕝᕕᑭᒃᓴᓗᐊᕋᑦᑕ.

2001-ᒥ, ᐃᓅᖃᑎᖃᓚᐅᕐᓂᕐᒪᑦ ᐹᓪ ᒪᓕᑭᒥᒃ ᐊᒻᒪᓗ ᐃᓄᒃ ᓵᓕᒥᒃ NACA-ᑯᑦ ᐱᖑᐊᕕᒃᔪᐊᖅᑎᓪᓗᒋᑦ ᐃᖃᓗᒃᑑᑦᑎᐊᒥ.

“ᐊᐱᕆᓚᐅᖅᓯᒪᒐᒃᑭᑦ, ‘ᖃᓄᕐᓕ ᐊᔪᖏᓴᖅᓯᒪᕕᓯ ᓴᓇᐅᒐᖅᑎᐅᓂᕐᒥᒃ.’ ᓴᓇᖅᑯᑎᖃᐃᓐᓇᕈᕕᑦ ᐊᒋᐊᓂᒃ ᓯᐅᕋᓕᖕᓂᒃᓗ ᒪᓂᖅᑲᒃᓴᐅᑎᓂᒃ, ᐱᐅᔪᐊᓗᖕᓂᒃ ᓴᓇᔪᓐᓇᕐᒥᔪᑎᑦ. ᑕᐃᒪᖓᓂᑦ ᑕᕝᕙ ᓴᓇᖃᑦᑕᓕᓚᐅᖅᑐᖓ. ᓴᓇᖑᐊᒐᒃᑲ ᒪᓂᖅᑲᒃᓴᑦᑎᐊᖅᓯᒪᓪᓗᑎᒃ ᓴᓇᖃᑦᑕᓕᓚᐅᖅᑕᒃᑲ.”

ᑕᐃᓱᒪᓂ ᒥᑭᔫᑎᓂᒃ ᓴᓇᖑᐊᒐᓂᒃ ᓴᓇᖃᑦᑕᓕᖅᑐᕕᓂᖅ ᖃᐅᔨᒪᔭᐅᓕᖅᖢᓂᓗ ᑕᐃᒪᐃᑦᑐᓂᒃ ᓴᓇᖃᑦᑕᕐᓂᖓᓄᑦ, ᐃᒫᒃ, ᐊᐃᕖᑦ ᑭᒍᑎᖏᓐᓂᑦ ᓴᓇᖑᐊᖃᑦᑕᕐᒪᑦ. ᐊᒃᑎᒋᓂᖃᖅᑐᑦ ᑯᑭᒃᑎᑐᑦ ᓴᓇᖑᐊᒐᖏᑦ ᐊᒡᒐᒧᑦ ᑎᒍᒥᐊᒐᒃᓴᐅᓪᓗᑎᒃ. ᒥᑭᔫᑎᓂᒃ ᓴᓇᔪᓐᓇᕐᓂᖓᓂᒃ ᖃᐅᔨᒪᔭᐅᓕᖅᑐᖅ – ᓇᓗᓇᖏᑦᑐᖅ ᑕᕝᕙ ᐱᐅᓴᐅᑎᓂᒃ ᓴᓇᔪᓐᓇᑦᑎᐊᖅᐳᖅ – ᐊᒻᒪᓗ ᑕᒪᓐᓇ ᐱᓇᓱᐊᕆᓪᓗᒍ ᑮᓇᐅᔭᒃᓴᐅᑎᒋᔪᓐᓇᖅᖢᓂᐅᒃ, ᒥᑭᔫᑎᑯᓗᖕᓂᒃ ᓴᓇᖃᑦᑕᖅᖢᓂ ᓇᒃᓯᐅᑎᓇᓱᐊᕆᐊᒃᓴᖅ ᐊᑭᑭᓐᓂᖅᓴᓂᒃ ᐅᕿᖏᓗᐊᖏᒻᒪᑕ ᖃᓪᓗᓈᓂᒥᐅᓄᑦ ᑎᑭᓴᖅᑕᐅᒑᖓᑕ ᓴᓇᖑᐊᒐᖏᑦ.

ᒧᐊᒐᓐ ᓂᐅᕕᖅᑕᐅᑎᑦᑎᖃᑦᑕᖅᑐᑦ ᓴᓇᐅᒐᕐᒥᓂᒃ ᒥᑭᔫᑎᓂᒃ, ᐊᒻᒪᓗ ᒫᓐᓇ ᐱᐅᓴᐅᑎᓂᒃ ᒥᑭᔫᑎᓂᒃ ᓴᓇᖃᑦᑕᓕᕆᓪᓗᓂ, ᕿᓚᒥᕈᓗᒃ ᓴᓇᔪᓐᓇᕐᒪᒋᑦ, ᑭᓯᐊᓂᓕ ᐊᑭᑐᓂᖅᐹᖅ ᓴᓇᓯᒪᔭᖓ ᒫᓐᓇ ᐊᓯᒥᓂᒃ ᓴᓇᖃᑎᖃᖅᖢᓂ ᓘᑎ ᐱᔭᒥᓂᒥᒃ. ᑖᒃᑯᐊ ᒪᕐᕉᓪᓗᑎᒃ ᓴᓇᓯᒪᔪᑦ 8-ᕖᑦᓂᒃ ᐊᖏᓂᖃᖅᑐᒥᒃ ᑕᑯᓪᓗᒍ ᑕᒪᐃᑕ ᓄᑖᒥ ᐃᖃᓗᐃᑦ ᓄᓇᕐᔪᐊᒥᐅᓄᑦ ᖃᖓᑕᓲᒃᑯᕕᐊᓂ – ᐊᖏᔪᖅ ᐃᓚᖃᐅᖅᓗᓂ ᒥᑭᔫᑎᓂᒃ, ᐊᑐᓂ ᓴᓇᓯᒪᓪᓗᑎᒃ, ᑲᑎᓱᒋᑦ ᐃᖃᓗᖑᐊᑦ ᐊᖏᒡᓕᕙᓪᓕᐊᔪᑦ, ᐊᖏᓂᖅᐹᒥᒃ ᖄᖓᓃᑦᑐᖃᖅᖢᓂ.

ᐊᒥᓱᓄᑦᑕᐅᖅ ᑖᓐᓇ ᓴᓇᖑᐊᖅᑎ ᐱᒃᑯᒥᒋᔭᐅᓗᐊᓕᕐᒪᑦ ᓴᓇᔪᓯᖓ ᑕᐅᑐᒃᑕᐅᔪᒪᖃᑦᑕᕐᒪᑦ ᖃᐃᖁᔭᐅᖃᑦᑕᖅᓯᒪᔪᖅ ᐅᒥᐊᕐᔪᐊᓄᑦ ᓂᐅᕈᑲᑕᒃᑐᓄᑦ ᓄᓇᓕᖕᓄᑦ, ᐊᐅᔭᖅ One Ocean Expedition-ᑯᓐᓂ ᓴᓇᖑᐊᕆᐊᖅᑐᓚᐅᕐᒥᔪᖅ. ᑭᓯᐊᓂᓕ ᕿᐸᓗᒋᐊᖃᖃᖅᑕᖅᓯᒪᓕᖅᑐᑦ ᐊᓯᖏᓐᓂᒃ ᐅᒥᐊᕐᔪᐊᓂᒃ Crystal Serenity ᐋᒃᑳᓚᐅᖅᑕᖓ ᑕᒪᑐᒪᓂ ᖃᖓᑕᓲᒃᑯᕕᖕᒥ ᓴᓇᓂᖏᓐᓂ ᐊᑕᐅᑦᑎᒃᑰᓚᐅᕐᒪᑕ.

ᐊᐃᑦᑖᒍᒐᓗᐊᖅ ᑕᒪᑐᒪᓂ ᑖᓐᓇ ᓴᓇᖑᐊᖅᑎ ᐱᐅᓴᐅᑎᓕᐅᖅᑎᓗ, ᓱᓕ ᓯᕗᓂᒃᓴᒥᓂᒃ ᖃᓄᖅ ᐱᓂᐊᕐᒪᖓᕐᒥᓂ ᓇᓗᖕᒪᑦ.

Leave a Comment:

Your email address will not be published. Required fields are marked *