ᓄᑖᖅ ᑲᖏᖅᖠᓂᕐᒥ ᐊᓐᓂᑭᑕᕐᕕᒃ ᐊᕐᕌᒍᓕᒫᒥᐅᓂᐊᖅᐳᖅ, ᖃᔅᓯᒐᓚᖕᓄᑦ-ᐊᑐᖅᑕᐅᓗᓂ ᐃᒡᓗᕐᔪᐊᖑᓗᓂ

by Darrell Greer- June 22, 2018

ᓱᓕ ᐱᔭᕇᓚᐅᔾᔮᓇᓂ, ᑕᑯᒃᓴᐅᓂᖓᓂ ᓄᑖᖑᔪᒥ ᐊᓐᓂᑭᑕᕐᕕᒃᓴᒥ ᐋᖅᑭᒃᐸᓪᓕᐊᓂᖓᓂ ᑲᖏᖅᖠᓂᕐᒥ ᓄᓇᓕᖕᓂ ᖁᕕᐊᑉᐸᓪᓕᐊᑎᑦᑎᕗᖅ ᑎᑭᓛᕐᓂᖓᓂ ᐊᑯᓂᐅᔪᒥ-ᐅᑕᖅᑭᔭᐅᔪᒥ ᖃᔅᓯᒐᓚᖕᓄᑦ-ᐱᔾᔪᑎᖃᖅᑐᒧᑦ ᐃᒡᓗᕐᔪᐊᒥᑦ.

ᑲᖏᖅᖠᓂᕐᒥ ᐱᙳᐊᖅᑐᓕᕆᔨ ᑕᐃᕕᑦ ᑲᓛᒃ ᐅᖃᐅᔾᔨᕗᖅ, ᑭᓯᐊᓂ, ᐊᕙᓗᒃᓴᖓ ᐃᒡᓗᕐᔪᐊᒧᑦ ᓱᒃᑲᓛᖑᔪᒥ ᓴᖅᑭᓐᓂᐊᖅᐳᖅ.

ᓄᑖᖅ ᐊᓐᓂᑭᑕᕐᕕᒃ ᐋᖅᑭᒃᐸᓪᓕᐊᓕᖅᐳᖅ ᑲᖏᖅᖠᓂᕐᒥ ᔫᓂ 14-ᖑᑎᓪᓗᒍ. ᓄᑖᖅ ᐃᒡᓗᕐᔪᐊᖅ ᐊᑐᖅᑕᐅᓂᐊᖅᐳᖅ ᖃᔅᓯᒐᓚᖕᓄᑦ-ᐱᔾᔪᑎᖃᕐᓂᐊᖅᑐᒧᑦ ᐃᒡᓗᕐᔪᐊᖑᓗᓂ ᓄᓇᓕᖕᓂ.
The new arena begins to take shape in Rankin Inlet on June 14, 2018. The new arena will be used as multi-purpose facility in the community. Darrell Greer/NNSL photo

ᐅᖃᓚᐅᖅᐳᖅ ᐱᓕᕆᓂᖓ ᐃᓗᐊᓂ ᐃᒡᓗᕐᔪᐊᒧᑦ ᐊᑯᓂᐅᓂᖅᓴᐅᓂᐊᖅᐳᖅ ᐃᓚᒋᔭᐅᓂᖓᓂ ᓇᑉᐸᖅᑎᖅᑕᐅᓂᖓᓂ ᐊᖏᔪᒻᒪᕆᐊᓗᖕᒥ.

ᐃᒻᒥᒃᑰᖅᖢᓂ ᓯᐊᕐᕆᔮᕐᕕᐅᓂᐊᖅᐳᖅ ᐳᓚᕋᕐᕕᖃᕐᓗᓂ ᐊᒻᒪ ᐱᐅᔪᒻᒪᕆᐊᓗᖕᒥ ᓂᐅᕕᕐᕕᖃᕐᓗᓂ/ᓂᕿᓕᐅᕐᕕ, ᐊᒻᒪᓗ, ᐊᖓᔪᕐᔪᐊᕌᓘᙱᒃᑲᓗᐊᖅᑎᓪᓗᒍ, ᐃᒡᓗᕐᔪᐊᖑᓗᓂ, ᓂᕆᐅᒃᐳᖓ ᐱᓕᕆᓂᖃᑦᑎᐊᕐᓂᐊᖅᐳᖅ ᓄᓇᓕᖕᓄᑦ ᐊᒻᒪᓗ ᐃᓂᑦᑎᐊᕙᐅᓗᓂ ᐃᓄᖕᓄᑦ ᖁᕕᐊᒋᔭᐅᓗᓂ ᖁᙱᐊᕆᐊᕐᓂᕐᒧᑦ ᕼᐋᑭᒥ ᐊᒻᒪ ᐊᓯᖏᓐᓂ ᖃᓄᐃᓕᐅᕐᓂᐅᔪᓄᑦ ᐊᕐᕌᒍᓕᒫᒥ” ᐅᖃᓚᐅᖅᐳᖅ ᑲᓛᒃ. “ᑕᖅᑭᓄᑦ-12-ᓄᑦ ᐃᒡᓗᕐᔪᐊᖑᓂᐊᖅᐳᖅ ᐊᑐᖅᑕᐅᓂᖓᓄᑦ, ᐊᒻᒪ ᐅᖃᐅᓯᖃᕈᓐᓇᖅᐳᖓ ᐊᑐᖅᑕᐅᔪᒃᓴᕆᓂᐊᖅᑕᖓᓂ ᑭᕙᓪᓕᕐᒥ ᓂᐱᕗᒻᒥ ᒫᓐᓇᐅᔪᒥ.”

ᕼᐋᑭᖃᑦᑕᕐᓂᐊᖅᐳᑦ ᐅᒃᑐᐱᕆᒥ ᑕᐃᑯᖓ ᐊᐃᑉᕆᓕᐅᑉ ᕿᑎᐸᓗᐊᓄᑦ, ᓯᑯᖃᕐᕕᒋᔭᖓᓂ ᐊᑐᕐᓂᐊᖅᐸᒍᑦ ᐊᖏᔫᑎᓄᑦ ᖃᓄᐃᓐᓂᐅᔪᓄᑦ ᐸᑲᓪᓚᖕᓇᐅᑎᓪᓗᒍ ᐅᐱᕐᙶᒃᑯᑦ, ᐊᒻᒪ ᐱᒋᐊᕐᓗᓂ ᔫᓂᒥ, ᐃᓗᐊᓂ ᐋᖅᑭᒃᓯᓂᐊᖅᐳᑦ ᓇᑎᐅᔭᕐᒥᑦ ᐊᕿᔭᕐᓂᕐᒧᑦ, ᐊᐅᓚᖁᑎᖃᕐᓗᑎᒃ ᕗᑦᐹᓪᒥ, ᐃᒻᒪᖄ ᓚᑯᕌᔅ, ᐊᒻᒪ ᐊᓯᖏᓐᓂ ᐊᓕᐊᓇᐃᑦᑑᑎᓂ ᖃᓄᐃᓕᐅᕐᓂᐅᔪᓂ ᐋᒍᔅᑎᙳᕋᓱᐊᕐᓂᖓᓄᑦ, ᐊᒻᒪ ᓇᑎᙳᐊᖓ ᐲᖅᑕᐅᓗᓂ ᐃᒡᓗᕐᔪᐊᖅ ᐸᕐᓇᒃᓯᒪᓂᐊᕐᓂᖓᓄᑦ ᑭᕙᓪᓕᕐᒥ ᐱᓕᕆᐊᖑᔪᓄᑦ ᑕᑯᒃᓴᐅᑎᑕᐅᓂᐅᔪᒧᑦ ᐊᒻᒪ ᐊᓱᐃᓛᒃ ᓯᑯᓕᐅᖅᐸᓪᓕᒃᑲᓐᓂᓕᕐᓗᑕ,” ᐅᖃᓚᐅᖅᐳᖅ.

ᐊᑕᐅᓯᖅ ᓄᓇᓕᐅᔫᑉ ᐃᓱᒫᓘᑎᓪᓚᐅᑕᕆᔭᖓ ᓄᑖᖑᔪᒧᑦ ᐊᓐᓂᑭᑕᕐᕕᖕᒧᑦ ᐃᒃᓯᕚᕐᕕᐅᔪᓐᓇᕐᓂᐊᕐᓂᖓᓂ ᐊᖏᓂᖓᓂ ᓈᒻᒪᒃᑲᓗᐊᕐᒪᖔᑦ ᐃᓄᒋᐊᒃᑐᐊᓗᖕᓄᑦ ᐅᐸᓲᓄᑦ ᑲᖏᖅᖠᓂᕐᒧᑦ ᐊᕐᕌᒍᑕᒫᒥ ᕼᐋᑭᒧᑦ ᓵᓚᖃᕋᓱᐊᕐᓂᐅᔪᒧᑦ, ᓲᕐᓗ ᓇᓄᕐᒧᑦ ᓵᖓᓄᑦ ᐊᒻᒪ ᑎᐊᕆᓐᔅ ᑑᑑᒧᑦ ᐃᖅᑲᐅᒪᓂᐅᔪᒧᑦ.

ᐊᒥᓱᐊᓗᖕᓂ ᖁᙱᐊᕈᒪᔪᓄᑦ ᐃᓯᕈᓐᓇᖅᑎᑕᐅᕙᙱᓚᑦ ᑕᑕᓗᐊᕐᓂᖓᓄᑦ ᐱᙳᐊᕐᓂᐅᓂᐊᖅᑐᓄᑦ ᖄᖏᖅᓯᒪᓕᖅᑐᓂ ᖃᔅᓯᒐᓚᖕᓂ ᐊᕐᕌᒍᓂᑦ, ᐃᓚᖃᖅᑐᒥ ᑕᐃᒃᑯᐊ ᐊᐅᓪᓛᖅᓯᒪᔪᓄᑦ ᐊᓯᖏᓐᓂ ᓄᓇᓕᖕᓂ ᖁᙱᐊᕆᐊᖅᑐᖅᑐᓄᑦ ᓵᓚᖃᕈᓱᐊᕐᓂᐅᔪᓄᑦ.

ᑲᓛᒃ ᐅᖃᓚᐅᖅᐳᖅ ᒫᓐᓇᓕᓴᐅᓛᖑᔪᒥ ᑐᓴᒐᒃᓴᓕᐊᖑᔪᒥ ᑐᓂᔭᐅᓂᖓᓂ ᐊᓐᓂᑭᑕᕐᕕᒃᐅᑉ ᐃᓐᓄᒍᓐᓇᕐᓂᖓᓂ 900-ᓂ ᓯᐊᕐᕆᔮᕐᕕᖓᓂ ᐃᓗᐊᓂ, ᐊᒻᒪ 100-ᐸᓗᖕᓂ, ᐃᓄᖃᕐᕕᖓᓐᓂ.

ᐅᖃᓚᐅᖅᐳᖅ ᑕᒪᓐᓇ ᓱᓕ ᐊᖏᖅᑕᐅᔭᕆᐊᖃᖅᐳᖅ ᑎᑎᕋᕐᕕᐅᔪᒥ ᐃᑭᑦᑐᓕᕆᔨᒃᑯᓐᓄᑦ, ᑭᓯᐊᓂ ᐅᓄᕐᓂᐅᕗᑦ ᑐᕌᕐᓂᕆᓇᓱᐊᖅᑕᖏᓐᓄᑦ.

ᓯᕗᓪᓕᖅᐹᒥ ᐊᑐᖅᑕᐅᔪᒃᓴᖓᓄᑦ ᒪᑐᐃᕐᓂᐊᕐᓂᖓᓄᑦ ᔭᓄᐊᕆ 2019-ᖑᕗᖅ, ᑭᓯᐊᓂ ᑲᓛᒃ ᓇᓚᐅᑦᑖᕆᕗᖅ ᓄᓇᓕᐅᔪᑦ ᐊᑕᐅᓯᒃᑲᓐᓂᕐᒥ ᕼᐋᑭᕐᓂᖃᒃᑲᓐᓂᕐᓂᐊᖅᐳᖅ ᐊᕐᕌᒍᒧᑦ ᓯᕐᓗᐊᕕᓂᑐᖃᕐᒥ ᐱᒋᐊᓚᐅᖅᑳᕋᑎᒃ ᓄᑖᖑᔪᒥ ᐊᓐᓂᑭᑕᕐᕕᖓᓐᓂᑦ.

ᑲᓛᒃ ᐅᖃᓚᐅᖅᐳᖅ ᐱᓕᕆᖃᑎᖃᖅᐳᖅ ᐱᙳᐊᕐᓂᕐᒧᑦ ᑲᑎᒪᔨᕋᓛᖑᔪᓂ ᐊᒻᒪ ᕼᐋᒻᓚᒃᑯᑦ ᑲᑎᒪᔨᖏᓐᓂ ᐊᔾᔨᒌᙱᕈᓘᔭᖅᑐᓂ ᐃᓱᒪᒋᔭᐅᔪᓄᑦ ᐊᑐᖅᑕᐅᔪᒃᓴᓄᑦ ᓄᑕᐅᙱᑦᑐᒥ ᐊᓐᓂᑭᑕᕐᕕᖓᓐᓂ ᓄᑖᖑᔪᖅ ᐊᑐᖅᑕᐅᓕᖅᐸᑦ.

ᐅᖃᓚᐅᖅᐳᖅ ᐱᕕᒃᓴᐃᕈᑎᕙᓪᓕᐊᓕᖅᐳᑦ ᐊᒻᒪ ᐊᑐᕈᓐᓇᕈᒪᕗᖅ ᓄᑕᐅᙱᑦᑐᒥ ᐃᒡᓗᕐᔪᐊᒥ ᐊᑐᐃᓐᓇᕈᑐᐊᖅᐸᑦ.

ᑐᙵᕕᖃᑦᑎᐊᖅᑐᒥ ᐸᕐᓇᐅᑎᓕᐅᕆᐊᖃᖅᐳᒍᑦ ᓄᑕᐅᙱᑦᑐᒧᑦ ᐃᒡᓗᕐᔪᐊᒧᑦ ᐊᒻᒪ ᓇᓂᓯᓗᑕ ᑮᓇᐅᔭᓂᑦ ᐱᔭᕆᐊᓕᖕᓂ ᐱᕙᓪᓕᕈᑕᐅᒃᑲᓐᓂᕐᓂᐊᖅᑐᒧᑦ ᓄᓇᓕᑦᑎᓐᓄᑦ,” ᐅᖃᓚᐅᖅᐳᖅ. “ᕼᐋᒻᓚᒃᑯᑦ ᒪᕐᕉᖕᓂ ᓯᐊᕐᕆᔮᕐᕕᓂ ᐃᖏᕐᕋᑎᑦᑎᔾᔮᙱᑦᑐᑦ ᐊᑕᐅᑦᑎᒃᑯᑦ.”

Leave a Comment: