ᒪᓕᒐᓕᐅᖅᑏᑦ ᓵᖓᖅᑐᑦ ᓄᑖᓄᑦ

by Contrib 1- November 4, 2017

ᐃᓄᐃᑦ ᐃᓱᒪᒋᔭᒥᓂᒃ ᐅᖃᓚᐅᖅᐳᑦ ᐊᒻᒪᓗ ᐊᓯᔩᔪᒪᓂᖏᑦ ᓇᓗᓇᖏᑦᑎᐊᖅᖢᑎᒃ. ᕿᓚᓈᕆᔭᖃᕋᑦᑕ ᓄᑖᓂᒃ ᒪᓕᒐᓕᐅᖅᑎᖃᓕᕈᑦᑕ ᑖᒃᑯᐊ ᐅᖃᐅᓯᕆᓚᐅᖅᑕᒥᓂᒃ ᐋᕿᒋᐊᖅᓯᓂᐊᕐᓂᕋᖅᖢᑎᒃ ᑲᔪᓯᑎᑦᑎᔪᓐᓇᕐᓂᐊᖅᐳᑦ ᓂᕈᐊᒐᒃᓴᐅᓪᓗᑎᒃ ᓇᓗᓇᐃᔭᓚᐅᖅᑕᒥᓂᒃ ᐃᒪᐃᓐᓂᐊᕐᓂᕋᖅᖢᑎᒃ.

ᐊᑕᐅᓯᖅ ᐊᑐᕐᓂᖃᕐᓂᖅᐹᖑᔪᖅ ᐋᕿᒋᐊᕐᓂᐊᖅᑐᖅ ᐊᒥᓱᑦ ᒥᓂᔅᑕᐃᑦ ᓄᑖᖑᕐᓂᐊᕐᒪᑕ ᓄᑖᓂᒃ ᐃᓄᖃᕐᓂᐊᓕᕐᒪᑕ ᒐᕙᒪᑎᒃᑯᑦ ᐊᐅᓚᑦᑎᔨᖏᑦ ᑲᑎᒪᔨᑦ. ᒐᕙᒪᑎᒃᑯᓐᓂ ᖁᑦᑎᖕᓂᑦᐹᓂᒃ ᐃᖅᑲᓇᐃᔮᖃᖅᑐᓂ, ᓯᕗᓕᖅᑎ ᐲᑕ ᑕᑉᑑᓇ ᐊᒻᒪᓗ ᑮᓇᐅᔭᓕᕆᔨᒋᓚᐅᖅᑕᖓ ᒥᓂᔅᑕ ᑮᑦ ᐲᑐᓯᓐ ᓄᖅᑲᓚᐅᕐᒪᑕ, ᐊᒻᒪᓗ ᓯᕗᓕᖅᑎᐅᑉ ᑐᒡᓕᐊ ᒫᓂᑲ ᐃᐊᓪ-ᑲᓇᔪᖅ ᓂᕈᐊᖅᑕᐅᓚᐅᖏᓱᓂ, ᑕᐃᒫᓴᐃᓐᓇᖅ ᒥᓂᔅᑕᐅᓚᐅᕐᒥᔪᖅᑕᐅᑦ ᔪᐊᔨ ᑲᑦᓱᒃ ᐊᒻᒪᓗ ᔮᓂ ᒪᐃᒃ, ᐅᖃᖅᑎᖓᓪᓗ ᔪᐊᔨ ᖁᓚᐅᑦ.  ᓯᕗᓕᖅᑎᐅᓚᐅᕐᒥᔪᖅ ᐹᓪ ᐅᑲᓕᖅ, ᐱᒋᐊᓕᖅᑎᓪᓗᒋᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᒥᓂᔅᑕᒋᔭᐅᓚᐅᖅᓯᒪᔪᖅ ᐃᖅᑲᖅᑐᐃᕕᓕᕆᔨᒃᑯᓐᓄᓪᓗ ᓄᖅᑲᓚᐅᕐᒥᖕᒪᑦ ᐃᖃᓗᖕᓂ ᐱᐊᑖᕐᕕᓕᐅᕐᒪᑕ, ᑖᓐᓇᑦᑕᐅᖅ ᓂᕈᐊᖅᑕᐅᒃᑲᓐᓂᓚᐅᖏᒻᒥᖕᒪᑦ.

ᐅᑯᐊ ᐃᓯᖔᓚᖓᓕᖅᑐᑦ ᓄᓇᕗᒥᐅᓄᑦ ᖃᐅᔨᒪᔭᐅᑦᑎᐊᖅᑐᑦ, ᐊᓱᐃᓛᒃ ᓇᓗᓇᖏᑦᑐᖅ ᐊᔾᔨᒌᖏᑦᑐᓂᒃ ᐱᕝᕕᒃᓴᖃᓕᕋᑦᑕ ᓯᕗᓕᖅᑎᒃᓴᓂᒃ ᓂᕈᐊᖅᓯᓂᐊᖅᑐᒃᓴᐅᕗᑦ ᐊᑐᓂ ᒐᕙᒪᑎᒃᑯᑦ ᐱᓕᕆᕝᕕᖏᓐᓂ ᓇᓗᓇᐃᖅᓯᔪᑕᐅᓂᐊᕐᒥᔪᓂᒃ ᓇᒧᑦ ᓄᓇᕗᒥᐅᑦ ᐃᖏᕐᕋᓂᐊᕐᓂᖏᓐᓂᒃ ᓯᕗᓂᕆᓂᐊᖅᑕᑦᑎᓐᓂ.

ᐊᒻᒪᓗᑦᑕᐅᖅ ᓄᑕᐅᖏᑦᑐᓂᒃ ᐃᓯᖅᑐᖃᕆᓪᓗᓂ – ᕿᓚᓈᕆᔭᑦᑎᓐᓂᒃ ᑖᓐᓇ ᐹᓪ ᖁᐊᓴᖅ ᐊᒻᒪᓗ ᔪᐊᔨ ᕼᐃᒃᔅ ᐱᒃᑯᒥᓇᕐᒥᔪᑦ – ᓱᓕᒃᑲᓐᓂᑦ ᓯᕗᓕᖅᑎᐅᒋᐊᒃᓴᖅ ᖃᐅᔨᒪᔪᒻᒪᕆᖕᓂᒃ ᐱᑕᖃᐅᕆᓪᓗᓂ ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᕕᓂᐊ ᑲᑎ ᑕᐅᑐᖏ, ᐊᒻᒪᓗ ᐃᖃᓗᖕᒥᐅᓄᑦ ᒥᔪᕕᓂᖅ ᐃᓕᓴᐱ ᓯᐅᑎᐊᐱᒃ, ᐃᖃᓗᒃᑑᑦᑎᐊᒥᐅᑦᓗ ᒥᔪᖓ ᔩᓂ ᐃᕼᐊᓗᐊᖅ (ᓱᓕ ᐃᖅᑲᖅᑐᐃᕕᒃᑎᒍᑦ ᓂᕈᐊᖅᑕᐅᓂᖓ ᖃᐅᔨᓴᖅᑕᐅᔪᖅ), ᐊᒻᒪᓗ ᐊᖓᔪᖅᑳᖑᓚᐅᕐᒥᔪᖅ ᓄᓇᕗᑦ ᒐᕙᒪᖓᓂ ᑏᕕᑦ ᐊᕿᐊᕈᖅ. ᑕᒪᐃᑕ ᑖᒃᑯᐊ ᑲᑎᓪᓗᒋᑦ ᒐᕙᒪᑎᒃᑯᑦ ᐊᐅᓚᑦᑎᕕᐊᓂ ᐃᓚᐅᓂᐊᖅᐸᑕ ᐊᒃᓱᑲᓪᓚᒃ ᓲᖑᔪᓂᒃ ᒐᕙᒪᑎᖃᕈᓐᓇᖅᑐᒍᑦ ᖃᐅᔨᒪᔭᐅᕙᒌᖅᑐᓂᒃ ᐱᓕᕆᑦᑎᐊᕈᓐᓇᕐᒃᓂᖏᓐᓂᒃ ᐃᒻᒥᓄᑦ ᐊᓯᒥᓄᓪᓗ ᐊᑐᓂ ᐃᓄᑑᓪᓗᑎᒃ ᐊᖓᔪᖅᑳᖑᔪᓐᓇᕐᒪᑕ.

ᐊᒃᓱᓗᐊᖑᐊᖅ ᐅᔾᔨᕐᓇᕐᒥᔪᖅ ᐊᕐᕕᓂᓕᖕᓂᒃ ᐊᕐᓇᓂᒃ ᓂᕈᐊᕐᒪᑕ ᐅᐊᕈᑎᓯᒪᓂᐊᖅᑐᓂᒃ ᒐᕙᒪᑎᒃᑯᑦ ᐊᐅᓚᑦᑎᔨᖏᓐᓂ ᓇᓗᓇᖏᑦᑐᖅ ᑕᒪᑐᒪᓂ ᐅᑭᐅᖑᓂᐊᖅᑐᓂ, ᐊᒻᒪᓗ ᓂᕈᐊᖅᑕᐅᓇᓱᐊᖅᑎᓪᓗᒋᑦ ᓱᓕᒃᑲᓐᓂᑦ ᑭᖑᓕᖅᑎᐅᓚᐅᖅᖢᑎᒃ. ᐊᒃᓱᐊᓗᒃ ᑖᓐᓇ ᓱᕚᓪᓕᐅᑕᐅᓂᐊᖅᑐᖅ ᓇᓗᓇᖏᒻᒥᔪᖅ ᒪᓕᒐᓕᐅᕐᕕᐅᑉ ᐃᓗᐊᓂ, ᑭᖑᓪᓕᐅᓚᐅᖅᑐᒥ ᐱᖓᓱᐃᓐᓇᐅᓚᐅᕐᒪᑕ ᐊᕐᓇᐃᑦ ᒪᓕᒐᓕᐅᖅᑎᐅᔪᑦ ᐱᒋᐊᓕᖅᑎᓪᓗᒍ ᑭᖑᓪᓕᖅᐸᒥ ᒪᕐᕈᐃᓐᓇᐅᓕᖅᖢᑎᒃ ᒫᓂᑲ ᐃᓪ-ᑲᓇᔪᖅ ᐊᒻᒪᓗ ᐹᑦ ᐊᕐᓇᑲᖅ. ᐊᕐᓇᐃᑦ ᑭᒡᒐᖅᑐᖅᑎᖃᖏᑎᓪᓗᒋᑦ ᒪᓕᒐᓕᐅᕐᕕᖕᒥ ᑲᖑᓇᒻᒪᕆᖃᑦᑕᓚᐅᕐᒪᑦ, ᑕᕝᕙ ᕿᓚᓈᕆᕙᕗᑦ ᓇᓕᒧᔫᒥᔪᒥᒃ ᑭᒡᒐᖅᑐᖅᑎᖃᓕᕐᒪᑕ ᑲᔪᓯᑎᑦᑎᔪᓐᓇᕐᓂᖅᓴᐅᓂᐊᕐᓕᖅᑐᑦ ᐊᑲᐅᓂᖅᓴᒧᑦ ᑭᖑᓪᓕᕐᒥ ᓂᕈᐊᒃᑲᓐᓂᓕᕐᒥᒃᐸᑕ.

ᐱᒃᑯᒥᓇᓗᐊᕐᒥᔪᖅᑕᐅᖅ, ᓄᓇᕗᒥᐅᑦ ᓇᑉᐸᖏᑦ ᒪᒃᑯᒃᑐᐃᓐᓇᐅᖕᒪᑕ 25 ᐊᑖᓂ ᐊᕐᕌᒍᓖᑦ, ᑕᑯᒃᓴᐅᓂᖅᓴᐅᓕᖅᑐᑦ ᒫᓐᓇ ᒪᓕᒐᓕᐅᕐᕕᖕᒥ ᒪᒃᑯᒃᑐᐃᑦ ᓂᕈᐊᖅᑕᐅᓇᓱᐊᖅᑐᑦ ᐅᓄᕐᓂᖅᓴᐅᓚᐅᕐᒪᑕ ᑕᐃᓱᒪᖓᓂᓂᑦ ᐊᑭᓯᔪᓪᓗ. ᖁᕕᐊᓇᖅᑐᑦ ᑕᑯᓪᓗᒍ ᐋᑕᒥ ᐋᕆᐊᖅ ᓚᐃᑦᓯᑑᓐ, 30, ᐊᒻᒪᓗ ᒦᓚ ᐊᒡᔪᑲᖅ ᑲᒥᖑᐊᖅ, 31, ᒪᓕᒐᓕᐅᖅᕕᖕᒧᑦ ᐃᓯᕐᒪᑕ. ᓱᓕᒃᑲᓐᓂᖅ ᒪᒃᑯᒃᑐᓂ ᐱᑕᖃᕆᐊᖃᕐᒪᑕ ᐊᐅᓚᑦᑎᔩᑦ ᑲᑎᒪᕕᐊᓂ ᐊᒃᓱᕉᑎᖃᕐᓂᖅᓴᐅᓲᖑᖕᒪᑕ ᕿᑐᖏᐊᓕᓵᖅᑐᓄᑦ ᑭᒡᒐᖅᑐᖅᑎᐅᓪᓗᑎᒃ  ᐱᕈᖅᓴᐃᔪᓂᒃ ᓄᑕᖅᑲᓂᒃ ᒪᒃᑯᒃᑐᐃᓪᓗ ᐃᓱᒫᓗᒋᔭᖏᓐᓂᒃ.

ᐃᓱᒪᓇᖅᑐᖅ – ᕿᓚᓈᕆᓪᓗᑎᒍᓗ – ᓄᓇᕗᒥᐅᑦ ᐊᓱᐃᓛᒃ ᐱᖏᖕᓇᖏᑦᑐᒦᓕᖅᐳᑦ ᐅᑭᐅᖑᓂᐊᖅᑐᓂ.

ᐊᒻᒪᓗ ᐱᓗᐊᖑᐊᖅᑐᒥᒃ ᑕᒪᓐᓇ ᓱᓕᔪᕆᔪᒥᓇᖅᑐᖅ, ᒪᓕᒐᓕᐅᖅᑎᕗᑦ ᑕᒪᑐᒪᓂ ᐱᕕᒃᑐᓂᒃ ᐊᒃᓱᕉᑎᖃᕆᐊᖃᕐᓂᐊᕐᒪᑕ ᑐᑭᑖᕈᑎᖃᖃᑦᑕᕐᓗᑎᒃ ᐃᓄᓕᒫᓄᑦ ᐃᒃᐱᖕᓇᕐᓂᖃᖅᑐᓂᒃ.

ᐃᒻᒪᖄ ᑕᐃᓐᓇ ᖁᑦᑎᖕᓂᖅᐹᖅ ᐱᔭᕆᑐᔪᖅ ᐅᖃᐅᓯᓕᕆᔪᑎ ᐃᓕᓴᖅᑐᓕᕆᔪᑎᓗ ᐱᖁᔭᒃᓴᖅ 37 ᓄᐃᑎᑕᐅᒃᑲᓐᓂᕐᓂᐊᖅᐳᖅ, ᐊᒻᒪᓗ ᖃᓄᑭᐊᖅ ᐋᕿᒋᐊᖅᑕᐅᓗᓂ ᐊᑐᓕᖅᑎᑕᐅᔪᓐᓇᖅᓯᓇᔭᖅᐸ? ᐃᒻᒪᖄ ᑖᒃᑯᐊ ᒐᕙᒪᑎᐅᓕᖅᐸᑕ ᑲᓱᒍᑕᐅᓯᒪᔪᓂᒃ ᐋᕿᒃᓱᐃᓇᓱᐊᕈᓐᓇᕐᓂᐊᖅᐳᑦ ᐃᓄᐃᑦ ᐅᖃᐅᓯᖏᑦ ᐊᓯᐅᖁᓇᒋᑦ?

ᓄᑖᒥᒃ ᒐᕙᒪᑎᖃᓕᕈᑦᑕ ᐃᑲᔪᖅᓴᕐᓂᖅᓴᐅᓂᐊᖅᐹᑦ ᐅᕝᕙᓘᓐᓃᑦ ᕿᐱᓗᒐᔪᖕᓂᖅᓴᐅᓂᐊᖅᐹᑦ ᓄᓇᒥᑕᔭᓂᒃ ᐱᕙᓪᓕᐊᑎᑦᑎᔪᒪᔪᓂᒃ ᓵᓚᒋᔭᐅᖁᓇᒋᑦ ᓄᓇᕗᒥ?

ᑕᐃᒪᓗᑦᑕᐅᖅ ᐃᒡᓗᓕᕆᔪᑏᑦ, ᓂᕿᖃᑦᑎᐊᕈᑏᓪᓗ ᓄᓇᓕᖕᓂ, ᐃᓅᔪᑏᑦ ᐊᑭᑐᔪᕖᖓᐅᑎᓪᓗᒋᑦ ᓂᐅᕕᕐᕕᓂ, ᐃᓄᐃᓪᓗ ᐃᖅᑲᓇᐃᔭᖅᑎᑖᕆᔭᐅᖔᕆᐊᓖᑦ, ᐃᓱᒪᓐᓂᐊᕈᑏᓪᓗ, ᓄᓇᓕᓕᕆᔪᑏᑦ ᓴᓇᖅᑯᑎᕐᔪᐊᑦ ᐱᑕᖃᑦᑎᐊᕐᓂᖅᓴᐅᓕᖁᓪᓗᒋᑦ – ᓄᓇᓖᑦ ᐊᑯᓐᓂᖏᓐᓂ ᐊᖅᑯᑎᕐᔪᐊᑦ, ᑐᓚᒃᑕᕐᕖᑦ, ᓄᓇᕗᒥᑦ-ᒫᓂᑑᐸᒧᑦ ᐊᖅᑯᑏᑦ ᑕᒪᐅᖓ ᑎᑭᓯᒪᓕᖁᓪᓗᒋᑦ ᐊᒻᒪᓗ ᖃᕆᑕᐅᔭᓄᑦ ᐅᐊᔭᐃᑦ ᑕᒪᔾᔭ ᑲᒪᒋᔭᐅᒋᐊᖃᕐᓂᐊᖅᑐᑦ – ᐃᒥᐊᓗᓕᕆᔪᑏᑦ ᐋᖓᔮᕐᓇᖅᑐᓕᕆᔪᑏᓪᓗ ᖃᓄᖅ ᓂᐅᕕᐊᒃᓴᐅᓕᕈᓐᓇᕐᒪᖔᑕ ᑕᒪᒃᑯᓂᖓ ᐊᒃᓱᑲᓪᓚᒃᑕᐅᖅ ᐅᖃᐅᓯᐅᓂᐊᕐᒥᔪᑦ ᓇᓗᓇᖏᒻᒥᔪᖅ.

ᑖᓐᓇ ᓄᑖᖑᕆᐊᖅᑐᖅ ᒪᓕᒐᓕᐅᕐᕕᒋᓂᐊᖅᑕᕗᑦ ᐃᑲᔪᖅᓴᕆᐊᖃᕐᓂᐊᖅᑕᕗᑦ ᐅᔾᔨᖅᓱᖅᑎᖃᑦᑎᐊᕐᓗᑎᒃᓗ. ᐊᑏᑦ ᐊᔪᐃᓐᓇᓚᐅᕐᓚᕗᑦ ᓯᕗᓂᕆᓂᐊᖅᑕᑦᑎᓐᓄᑦ ᕿᓚᓈᕆᔭᕗᑦ ᓄᓇᑦᑎᓐᓂ ᑲᔪᓯᑎᑕᐅᔪᓐᓇᖔᕐᓂᐊᕐᒪᑕ ᐃᓄᐃᑦ ᐱᒃᑯᒥᒋᔭᖏᓐᓂᒃ ᒪᓕᒃᖢᑎᒃ ᐅᒃᐱᕆᔭᖏᓐᓂᒃᓗ, ᐱᓇᓱᐊᖃᑎᒌᑦᑎᐊᖁᓗᒋᑦ ᐃᓅᓯᖅᐳᑦ ᐃᓗᐊᖅᓯᕚᓪᓕᕐᓂᐊᕐᒪᑕ ᓄᓇᕗᒥ.

Leave a Comment:

Your email address will not be published. Required fields are marked *