ᒪᒃᑯᒃᑐᐃᑦ ᐃᓚᐅᔪᑦ ᑐᒃᑐᓂᒃ ᐊᐅᓚᑦᑎᔪᑎᓂᒃ ᐃᓕᓴᖅᑐᓂ

by Michele LeTourneau- November 26, 2017

ᒪᒃᑯᒃᑐᐃᑦ ᑭᕙᓪᓕᕐᒥᐅᑦ ᖃᐅᔨᒪᓕᖅᑐᑦ ᑐᒃᑐᓂᒃ ᐊᐅᓚᑦᑎᔨᐅᓂᕐᒥᒃ, ᐊᒻᒪᓗ ᓴᕆᒪᓱᒃᖢᑎᒃ ᖃᐅᔨᒪᓂᕆᓕᖅᑕᒥᓂᒃ ᑕᑯᑎᑦᑎᒋᐊᒃᓴᖅ ᐊᓯᒥᓄᑦ.

ᒋᐅᕆᑦ ᐊᓄᐃ, ᒍᕇᑦ 7-ᒥ ᐃᓕᓴᖅᑎ ᕿᑎᖅᖠᕐᒥ ᐃᓕᓴᕐᕕᐊᓂ ᐊᕐᕕᐊᓂ, ᐊᑭᐅᓯᐊᓚᐅᕐᒪᑦ ᐱᐅᓂᖅᐹᒥᒃ ᐊᑭᓇᒥ ᐊᔾᔨᖑᐊᒃᓴᒥᒃ ᓴᓇᔭᖓᓄᑦ ᐱᕗᓕᒥ ᖃᒪᓂᕐᔪᐊᒥᓗ ᑐᒃᑐᓂᒃ ᐊᐅᓚᑦᑎᔨᒃᑯᑦ ᑲᑎᒪᔨᖏᓐᓄᑦ ᐊᑐᖅᑕᐅᓂᐊᖅᑐᓂᒃ ᐅᓂᒃᑳᓕᐅᖅᖢᓂᐅᒃᓗ ᑖᓐᓇ ᐊᔾᔨᖑᐊᓕᐊᓂ.

37 ᐃᓕᓴᖅᑏᑦ ᑭᐅᓯᓚᐅᕐᒪᑕ ᑎᑎᖅᑐᕋᖁᔨᔪᓂᒃ ᐱᕗᓕ ᖃᒪᓂᕐᔪᐊᒥᓗ ᑐᒃᑐᐃᑦ ᐊᐅᓚᑕᐅᔪᑎᖏᓐᓄᑦ ᑲᑎᒪᔨᓄᑦ ᐊᑭᓇᒥ ᐊᔾᔨᖑᐊᒃᓴᓂᒃ ᐊᒻᒪᓗ ᐅᓂᒃᑳᓕᐅᖁᔭᐅᓪᓗᑎᒃ. ᓵᓚᒃᓴᖃᑦᑕᐅᑎᓕᓚᐅᖅᑐᑦ ᐊᑕᐅᓯᕐᒥᒃ ᐅᓂᒃᑳᓕᐅᖁᔭᐅᓪᓗᑎᒃ ᐃᒃᐱᖕᓇᕐᓂᖓᓂᒃ: ᐅᔾᔨᖅᓱᑦᑎᐊᕆᐊᖃᕐᓂᖏᑦ ᑐᒃᑐᓂᒃ ᐊᖑᔭᐅᔪᓂᒃ, ᐱᒻᒪᕆᐅᓂᖓᓂᒃᓗ ᑐᒃᑐᑕᐅᔪᑦ ᐅᓂᒃᑲᐅᓯᐅᒋᐊᖃᕐᒪᑕ, ᐊᒻᒪᓗ ᖃᓄᑎᒋ ᐃᒃᐱᖕᓇᕐᓂᖃᕐᒪᖔᑕ ᐅᓄᕐᓂᖅᓴᓄᑦ ᐱᔭᐅᖃᑦᑕᓕᕐᓂᖏᓐᓄᑦ.

ᕗᐃᓕᐊᒻ ᑳᒻᐳᓪ, ᒍᕇᑦ 10-ᒥ ᐃᓕᓴᖅᑎ ᔮᓐ ᐊᕐᓈᓗᒃᔪᐊᑉ ᐃᓕᓴᕐᕕᒃᔪᐊᖓᓂ ᐊᕐᕕᐊᓂ, ᐅᓂᒃᑳᑦᑎᐊᓚᐅᕐᒪᑦ ᖃᓄᑎᒋ ᐊᒥᓱᓄᑦ ᑐᒃᑐᑕᐅᖃᑦᑕᓕᖅᑎᓪᓗᒋᑦ ᐃᒃᐱᖕᓇᕐᓂᖃᕐᓂᖓ ᑕᒫᓂ ᑐᒃᑐᓄᑦ ᐅᒥᐊᕐᒥᒃ ᐆᒃᑐᕋᐅᑎᖃᖅᓗᓂ – ᐃᒫᒃ ᐅᒥᐊᖅ ᑕᑕᓗᐊᕈᓂ ᑭᕕᑐᐃᓐᓇᕈᓐᓇᕐᒪᑦ.

“ᐋᕿᒃᓱᐃᓯᒪᒋᐊᖃᓕᕋᑦᑕ ᑕᒪᐃᓐᓄᑦ ᑐᓴᐅᒪᑎᑦᑎᔪᑎᓂᒃ ᐅᖃᐅᓯᕆᔪᓐᓇᕐᓂᐊᖅᑕᑦᑎᓐᓂᒃ ᐊᖓᔪᖅᑳᓄᑦ ᓄᓇᒥ ᐱᕙᓪᓕᐊᑎᑕᐅᔪᑦ ᓱᒃᑲᓴᓗᐊᖁᓇᒋᑦ ᓄᓇᒥᑕᔭᓂᒃ ᐲᔭᐃᔪᑦ ᓄᓇᒥ ᐸᒡᕕᓴᐃᖃᑦᑕᕐᒪᑕ ᑐᒃᑐᓂᒃ ᑕᒫᓂ ᓇᔪᒐᖃᖅᑐᓂᒃ ᐆᒪᔪᓄᑦ ᐊᖏᕐᕋᐃᑦ ᓴᐳᑎᔭᐅᓯᒪᒋᐊᖃᓕᕐᒪᑕ. ᐊᒃᓱᕈᓕᖅᑎᑕᐅᖁᓇᒋᑦ ᐆᒪᔪᐃᑦ ᓄᓇᑦᑎᓐᓂ ᐱᖅᑯᓯᖏᓐᓄᑦ ᐱᐅᖏᒻᒪᑦ ᑲᑉᐱᐊᓵᖅᑕᐅᖃᑦᑕᖅᖢᑎᒃ,” ᐅᓂᒃᑳᕆᓪᓗᓂ ᑳᒻᐳᓪ.

“ᑕᐃᒪᓐᓇ ᐱᑦᑎᐊᕈᑦᑎᒍ, ᑐᒃᑐᐃᑦ ᐆᒪᔪᐃᓪᓗ ᑕᒫᓂ ᑭᖑᕚᒃᓴᑦᑎᓐᓄᑦ ᐃᕐᖑᑕᑦᑕ ᕿᑐᖓᖏᓐᓄᓪᓗ ᐱᑕᖃᐃᓐᓇᖁᒐᑦᑎᒍ. ᑕᒪᐃᑕ ᐱᓇᓱᐊᕆᐊᖃᖏᑕᕗᑦ ᓯᕗᓂᒃᓴᑦᑎᓐᓄᑦ ᐊᒥᐊᒃᑯᓯᒪᒋᐊᖃᕋᑦᑕ. ᑕᐃᒪᖓᓄᑦ ᑐᒃᑐᓂᒃ ᐱᑕᖃᕈᓐᓇᕐᓂᐊᕐᒪᑦ ᑭᖑᕚᒃᓴᑦᑎᓐᓄᑦ, ᑕᐃᒪᖓᓄᑦ.”

ᑕᐃᒪᓐᓇ ᑎᑎᕋᖅᓯᒪᓚᐅᖅᑐᖅ ᓄᑕᖅᑲᓂᑦ ᓯᓚᑐᔪᒥᒃ ᐅᓂᒃᑳᖅᓯᒪᓪᓗᓂ, ᑖᒃᑯᐊ 13-ᓂᒃ ᑲᑎᒪᔨᖃᖅᑐᑦ ᑐᓂᓯᓚᐅᖅᑐᑦ ᑳᒻᐳᓪᒥᒃ ᓯᕗᓪᓕᖅᐹᒥ ᐊᑭᐅᓯᐊᖅᑎᓱᒍ, ᐊᒻᒪᓗ ᖃᕆᑕᐅᔭᕌᓛᒥᒃ ᑐᓂᐅᓯᐊᖅᖢᓂ iPad-ᒥᒃ.

ᐊᓯᖏᑦ ᑐᓂᐅᓯᐊᓚᐅᕐᒥᔪᑦ ᑐᓵᔪᑎᓂᒃ Beats-ᓂᒃ ᐊᒻᒪᓗ ᑐᓴᕐᓈᒐᒃᓴᓂᒃᓗ iTunes-ᑯᓐᓂᑦ. ᑲᑎᒪᔩᑦ ᐊᒡᓚᒡᕕᐊᓂ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᓗ ᕌᔅ ᑖᒻᓴᓐ ᐃᒡᓚᖅᖢᓂ ᑕᐃᒪᓐᓇ ᐅᓂᒃᑳᓚᐅᖅᑐᖅ.

“ᑕᐃᓱᒪᓂᐅᓐᓂᖅᐸᑦ ᐃᓕᓴᕐᕕᓂᑐᖃᕐᓂ ᖃᓄᐃᒃᓴᕋᔭᓚᐅᖏᑦᑐᑦ ᐱᓱᑎᓂᒃ ᐊᐅᓚᓴᐅᑎᓂᒃᓗ ᑕᐃᒪᐃᑦᑐᓂᒃ ᐅᓪᓗᒥᓕ ᑭᓯᐊᓂᓕ ᐱᒃᑯᒥᒋᔭᐅᔪᓂᒃ ᐱᑎᓚᐅᕐᒥᔭᕗᑦ, Apple-ᑯᑦ ᐱᖑᐊᕈᑎᖏᓐᓂᒃ,” ᐅᖃᕆᓪᓗᓂ ᑕᒻᓴᓐ.

“ᐊᓱᐃᓛᒃ ᑕᐃᒪ ᑲᑉᐳᔾᔭᖅᑐᓕᖕᓂᒃ ᑐᓂᐅᓯᐊᓚᐅᖅᐳᑦ … ᑭᓯᐊᓂᓕ ᓄᓇᓕᖕᒥᐅᑦ ᐅᖃᓪᓚᖃᑎᒋᓚᐅᖅᖢᒋᑦ ᑕᐃᒪᓐᓇ ᐱᓚᐅᖅᑐᑦ ᐱᒃᑯᒥᒋᔭᖏᓐᓂᒃ ᒫᓐᓇ ᓄᓇᓕᖕᒥᐅᑦ.”

ᖃᓄᐃᓕᖓᓕᕐᓂᖏᓪᓕ ᑐᒃᑐᐃᑦ ᓄᓇᒥ, ᐊᓱᐃᓛᒃ, ᑕᒪᓐᓇ ᐃᔪᕐᓇᑐᐃᓐᓇᕈᓐᓃᕐᒪᑦ – ᑕᒪᑐᒪᓂ ᐅᓐᓃᑦ ᑖᒃᑯᐊ ᐱᕗᓕ ᖃᒪᓂᑦᑐᐊᒥᐅᓪᓗ ᑐᒃᑐᖏᑦ ᖃᓄᐃᖏᓐᓂᖅᐹᖑᒐᓗᐊᖅᑎᓪᓗᒋᑦ ᐊᓯᖏᓐᓂᑦ ᑐᒃᑐᓂᑦ.

“ᑕᒪᐃᑕ ᑐᒃᑐᐃᑦ ᑲᓇᑕᒥ ᐊᒥᓲᖏᓐᓂᖅᐹᖑᖃᑕᐅᖕᒪᑕ ᓱᒃᑲᓕᔪᒥᒃ 1994-ᒥᓂᑦ ᓈᓴᖅᑕᐅᓚᐅᖅᑎᓪᓗᒋᑦ. ᖃᒪᓂᕐᔪᐊᒥᐅᑦ ᑐᒃᑐᖏᑦ 450,000-ᓃᓐᓂᕋᖅᑕᐅᔪᖕᒪᑕ. ᐃᓱᒪᓇᖅᓯᔪᑦ ᒫᓐᓇᒧᑦ ᑎᑭᖢᒍ ᐃᒻᒪᖄ 200,000-ᖏᓐᓃᓕᕐᒪᑕ. ᓱᓕ ᐅᑕᖅᑭᒐᒃᑕ ᓈᓴᐃᓚᐅᖅᑐᓂᒃ ᐊᐅᔭᖅ ᓄᕐᕆᕕᖓᓂ,” ᐅᓂᒃᑳᕆᓪᓗᓂ  ᑕᒻᓴᓐ, ᐃᓚᓪᓗᓂᐅᒃ ᖃᒪᓂᕐᔪᐊᒥᐅᑦ ᑐᒃᑐᐃᑦ ᑭᖑᓪᓕᖅᐹᖑᓪᓗᑎᒃ ᐊᒥᓱᐊᓘᓪᓗᑎᒃ ᐃᖏᖃᖃᑦᑕᕐᒪᑕ ᓄᓇᒥ ᓇᒧᑐᐃᓐᓈᓕᕌᖓᒥᒃ.

ᑕᒪᑐᒪᓂᐅᓂᖓᓂᓕ, ᐱᕗᓕᐅᓂᕋᖅᑕᐅᔪᑦ ᑐᒃᑐᐃᑦ, ᐊᓯᐊᓄᖔᖅ ᐃᖏᕐᕋᖃᑦᑕᓕᕐᒪᑕ ᓄᕐᕆᔭᖅᑐᖃᑦᑕᓕᕐᒪᑕ ᐅᑭᐅᖅᑕᖅᑐᒥᐅᑦ ᓯᒡᔭᖓᓄᑦ, ᐅᓄᕐᓂᖃᖅᐸᔪᔪᑦ 300,000-ᓂᒃ.

“ᒫᓐᓇᓕ, ᐃᓱᒪᓇᖅᑐᖅ ᓇᑉᐸᓪᓗᐊᖏᓐᓂᒃ ᐊᒥᐊᒃᑯᓯᒪᓕᕐᒪᑕ ᒥᑭᓐᓂᖅᓴᐅᓕᖅᑐᑦ,” ᐅᖃᕆᓪᓗᓂ ᑖᒻᓴᓐ.

ᑕᒪᐃᑕ ᐊᒥᐊᒃᑯᖏᑦ ᐊᖏᔪᑲᓪᓚᐅᔫᒐᓗᐊᑦ ᓱᓕ ᐃᒡᓗᐊᓄᖔᖅ ᑕᑯᓪᓗᒋᑦ ᐊᓯᖏᑦ ᑐᒃᑐᐃᑦ, ᒪᑯᐊ ᐸᑐᔅᒥᐅᑦ ᑐᒃᑐᖁᑎᖏᑦ ᕿᖓᐅᕐᒧᐊᖃᑦᑕᖅᑐᑦ.

“ᐱᕗᓕᒥ ᖃᒪᓂᕐᔪᐊᒥᓗ ᐱᔭᕆᑐᖕᒪᑕ ᐃᓄᖕᓄᑦ ᐊᐅᓚᑕᐅᓇᓱᐊᕆᐊᒃᓴᖅ,” ᐅᓂᒃᑳᓕᐅᓚᐅᖅᑐᖅ ᒍᕇᑦ 12-ᒥᐅᑕᖅ ᓕᓐᓯ ᐋᖅᓴᕐᓂᖅ ᖃᒪᓂ’ᑐᐊᒥᐅᖅ, ᐊᑭᐅᓯᐊᓚᐅᕐᒥᔪᖅ ᐅᓂᒃᑳᓕᐊᒥᓄᑦ ᐃᓕᓴᖅᑏᑦ ᒍᕇᑦ 10-ᒥᑦ 12-ᒧᑦ ᐅᓂᒃᑳᓕᐅᖅᑎᑕᐅᑎᓪᓗᒋᑦ.

ᑖᒻᓴᓐ ᐅᖃᕆᓪᓗᓂ ᒪᒃᑯᒃᑐᐃᑦ ᐃᓚᐅᑎᓱᒋᑦ, ᐃᑲᔪᖅᑕᐅᓪᓗᑎᒃ ᐊᖓᔪᖅᑳᖏᓐᓄᑦ ᓇᓗᓇᖏᑦᑐᖅ, ᑕᒫᕐᒥᐅᑦ ᐃᓱᒪᒋᔭᖏᓐᓂᒃ ᓈᒻᒪᓈᖅᓯᑦᑎᐊᖅᖢᑎᒃ ᐅᓂᒃᑲᓕᐅᓚᐅᕐᒪᑕ ᑐᓴᖅᑕᐅᒋᐊᓕᖕᓂᒃ ᑐᒃᑐᐃᑦ ᐅᓄᕐᓂᖏᑦ ᐱᔾᔪᑎᒋᓪᓗᒋᑦ ᐊᖑᓇᓱᒃᑎᓄᑦ ᐊᐅᓚᑕᐅᔪᑎᖏᓪᓗ. ᑕᒪᑐᒪᓂ ᐃᓕᓴᖅᑏᑦ ᐃᓚᐅᖃᑕᐅᑎᓱᒋᑦ ᐊᒃᓱᕉᑎᖃᕈᓐᓇᕐᓂᖅᓴᐅᖕᒪᑕ, ᐃᓚᖏᑦ ᑕᕐᕆᔭᐅᑎᒃᓴᓂᒃ ᐊᔾᔨᓕᐅᕆᓚᐅᕐᒥᔪᑦ, ᐊᑭᓇᒥᓗ ᐊᔾᔨᖑᐊᒃᓴᓂᒃ ᑎᑎᖅᑐᕋᖅᖢᑎᒃ ᐊᒻᒪᓗ ᐅᓂᒃᑳᓕᐅᖅᖢᑎᒃ ᒫᓐᓇ ᖃᓄᐃᓕᕐᓂᖏᓐᓂᒃ.

“ᐊᒻᒪᓗ, ᓇᓗᓇᖏᒻᒥᔪᖅ, ᒪᒃᑯᒃᑐᐃᑦ ᓯᕗᓕᐅᖕᒪᑕ ᑕᒪᒃᑯᓂᖓ ᓯᕗᓂᕆᓂᐊᖅᑕᑦᑎᓐᓄᑦ ᑐᕌᖓᔪᓂᒃ ᑕᐅᑐᖑᐊᒐᖃᖅᖢᑎᒃ ᐱᒃᑯᒥᒋᔭᒥᓂᒃ ᓯᕗᓂᒃᓴᑦᑎᓐᓄᑦ. ᕿᓚᓈᕆᔭᕗᑦ, ᑭᖑᓪᓕᕐᒥ ᐊᕐᕌᒍ, ᐅᓄᕐᓂᖅᓴᓂᑦ ᐱᔪᓐᓇᖅᓯᔪᒫᕋᑦᑕ ᒪᒃᑯᒃᑐᓂᑦ ᐃᓚᐅᑎᑦᑎᓗᑕ, ᓯᕗᓂᕆᓂᐊᖅᑕᑦᑎᓐᓂ ᐱᒃᑯᒥᒋᓇᔭᖅᑕᖏᓐᓂᒃ ᐃᓱᒪᒃᓴᖅᓯᐅᕈᑎᖃᓕᕐᓗᑎᒃ ᖃᓄᐃᑦᑐᓂᒃ ᓯᕗᓪᓕᐅᑎᑦᑎᓗᑎᒃ ᐊᒃᓱᕉᑎᖃᕐᓂᐊᕐᒪᖔᑕ ᑲᔪᓯᑎᑕᐅᒋᐊᓕᖕᓂᒃᓗ,” ᐅᖃᕆᓪᓗᓂ ᑖᒻᓴᓐ.

ᓄᓇᕗᒥ, ᐊᑭᒪᖃᑦᑕᐅᑎᖕᒪᑕ ᑕᒪᑐᒥᖓ ᑐᓴᐅᒪᑎᑦᑎᔪᑎᒥᒃ ᐋᕿᒃᓱᐃᓪᓗᑎᒃ ᖁᔭᓐᓇᒦᒃ ᑮᓇᐅᔭᖃᑦᑎᑕᐅᓪᓗᑎᒃ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ ᓄᓇᕗᒥ ᐃᓕᓴᐃᔪᑎᓂᒃ ᑮᓇᐅᔭᓂᑦ.

Leave a Comment:

Your email address will not be published. Required fields are marked *