Skip to content

ᒥᔅ ᐃᒡᓗᓕᒃ ᐊᖏᕐᕋᒥᓂᒃ ᐱᐅᒃᓴᐳᖅ ᖁᕕᐊᒋᔭᖃᖅᐳᖅ, ᐊᒻᒪ ᐊᖏᕐᕋᒥᓄᓪᓗ ᓇᒡᓕᒋᔭᐅᓪᓗᓂ

ᒥᔅ ᐃᒡᓗᓕᒃ ᑯᐃᓐᖑᖑᐊᓚᐅᖅᐳᖅ ᓇᓴᖅᑕᐅᓪᓗᓂ. ᐋᔾᔨᓚ ᐊᒪᕈᐊᓕᒃ ᓂᕈᐊᖅᑕᐅᓚᐅᖅᐳᖅ 22-ᓂᑦ ᓵᓚᒃᓴᐅᑎᖃᑦᑕᐅᑎᑎᓪᓗᒋᑦ ᓄᑖᒥ ᐊᕐᕌᒍᒥ ᔭᓐᓄᐊᕆ 1.

ᒥᔅ ᐃᒡᓗᓕᒃ ᐋᓐᔨᓚ ᐊᒪᕈᐊᓕᒃ ᐃᓐᖏᓚᐅᖅᐳᖅ ᐊᑎᖃᖅᑐᒥᒃ ᐊᖏᕐᕋᕕᒐ, ᐊᔪᖏᓐᓂᖃᖅᖢᓂ ᑕᑯᑎᑦᓯᒍᒪᓪᓗᓂ ᓵᓚᒃᓴᕋᓱᐊᖅᖢᓂ ᔮᓐᓄᐊᕆ 1-ᒥ ᓵᓚᒃᓴᓚᐅᖅᖢᓂᓗ.

ᐊᒪᕈᐊᓕᒃ ᐊᒻᒪ ᓗᐃᓴ ᑕᖃᐅᒐᒃ ᑭᖑᓪᓕᖅᐸᐅᓕᓚᐅᖅᐳᒃ ᒪᕐᕉᒃ ᓂᑯᕕᖓᓪᓗᑎᒃ ᑕᑯᒃᓴᐅᑎᓪᓗᑎᒃ ᑖᓐᓇ ᔪᐊᓇ ᖁᐊᓴ ᓇᓴᖅᑎᑦᓯᓚᐅᖅᖢᓂ ᐊᒪᕈᐊᓕᐅᑉ ᓂᐊᖁᖓᒍᑦ ᓄᓇᓕᖕᒥ ᐱᓐᖑᐊᕐᕕᖕᒥ.

“ᓂᓪᓕᕈᓐᓇᐃᓪᓕᓚᐅᖅᐳᖓ! ᓂᓪᓕᕈᒪᒐᓗᐊᖅᖢᖓ ᐳᐃᒍᓚᐅᖅᐳᖓ ᖃᓄᐃᓕᓂᐊᕐᒪᖔᕐᒪ,” ᐊᒪᕈᐊᓕᒃ ᐅᖃᓚᐅᖅᐳᖅ, ᐃᒡᓚᖅᖢᓂᓗ.

ᓯᕗᓂᐊᒍᑦ, ᑭᒃᑯᑐᐃᓐᓇᐃᑦ ᑕᑯᓐᓇᖅᑎᓪᓗᒋᑦ ᐅᖃᓪᓚᒋᐊᖃᓚᐅᕋᒥ ᑭᐅᓪᓗᓂᓗ ᓯᑕᒪᓂᒃ ᐊᐱᖁᑕᐅᔪᓂᒃ.

ᓵᓚᒃᓴᕋᓱᐊᖃᑕᐅᔪᑦ ᐊᐱᕆᔭᐅᓚᐅᕐᒪᑕ ᐊᔾᔨᒌᖏᑦᑐᓂᒃ ᑭᓱᑐᐃᓐᓇᕐᓂᒃ, ᓲᕐᓗ ᒥᑭᔪᓂᒃ ᐃᒡᓗᕐᔪᐊᖅᑕᖃᕆᐊᖃᕐᒪᖔᑦ ᐃᒡᓗᑭᒃᓴᖏᓐᓂᖅᓴᐅᓂᐊᕐᒪᑕ ᐃᒡᓗᓕᖕᒥ, ᖃᓄᐃᓕᐅᕈᒪᖕᒪᖔᑦ ᐃᓅᓯᕐᒥᓂ, ᑭᓇᒥᒃ ᐱᐅᒃᓴᕐᒪᖔᑦ ᐅᐱᒋᔭᒥᓂᒃ, ᖃᓄᖅ ᐅᖃᕈᒪᒐᔭᕐᒪᖔᑕᓗ ᒪᒃᑯᒃᑐᓄᑦ, ᐊᒻᒪ ᖃᓄᐃᑦᑐᒥᒃ ᐅᖃᓕᒫᒐᒥᒃ ᐱᐅᒃᓴᕐᓂᖓᓄᑦ.

ᐊᒪᕈᐊᓕᒃ ᐅᖃᐅᓯᖃᓚᐅᖅᐳᑦ ᑐᑭᖃᑦᓯᐊᖅᑐᓂᒃ ᐅᓐᓄᒃᑯᑦ.

“ᐱᑕᖃᓚᐅᕆᕗᖅ ᐊᕐᓇᐅᖃᑎᓐᓂᒃ ᐅᖃᐅᓯᒃᓴᖃᓚᐅᖅᑐᓂᒃ. ᐅᕙᖓᓕ, ᑭᐅᑐᐃᓐᓇᖃᑦᑕᓚᐅᖅᐳᖓ ᐊᐱᕆᔭᐅᒑᖓᒪ,” ᐅᖃᓚᐅᖅᐳᖅ, ᐊᒻᒪ ᑕᐃᒪᓐᓇᐃᓕᐅᕐᓂᐊᕋᓱᒋᓚᐅᖏᓐᓇᒥ ᑕᑯᒃᓴᐅᑎᑕᐅᓗᓂ ᑭᒃᑯᑐᐃᓐᓇᕐᓄᑦ ᐊᒥᓱᓄᑦ. “ᓂᕆᐅᓚᐅᖅᐳᖓ ᐊᑲᐅᖏᓐᓂᖅᓴᐅᓂᐊᕋᓱᒋᓪᓗᒍ. ᖁᒃᓴᓱᓚᐅᖅᐳᖓᓗ ᑕᒃᐸᐅᖓᐅᓪᓗᖓ ᑭᓯᐊᓂ ᖃᓄᐃᓚᐅᖏᑉᐳᖅ.”

ᑕᖃᐅᒐᒃ ᓵᓚᒃᓴᐅᑎᖃᓚᐅᖅᐳᖅ ᐊᓐᓄᕌᖅᓯᒪᑦᓯᐊᓚᐅᕐᒪᑕ ᐊᒻᒪ ᑲᑕᔾᔭᒃᖢᓂ ᐱᐅᒋᔭᐅᓚᐅᕐᒪᑦ ᖃᐅᔨᓴᖅᑎᓄᑦ.

ᐊᒪᕈᐊᓕᒃ ᐱᐅᒋᔭᐅᓚᐅᖅᖢᓂ ᖃᐅᔨᓴᖅᑎᓄᑦ ᐃᓐᖏᖅᑎᓪᓗᒍ ᐃᓄᒃᑎᑐᑦ ᐊᖏᕐᕋᕕᒐ. ᐃᓐᖏᖅᑕᖓ ᐱᔾᔪᑎᖃᓚᐅᖅᐳᖅ ᓄᓇᒥᓂ ᐊᖏᕐᕋᒥᖕᓃᖏᓕᕌᖓᒥ − ᑕᖅᑭᓄᑦ ᖃᑦᓯᒐᓚᖕᓄᑦ ᐊᐅᔭᐅᓚᐅᖅᑐᒥ ᑕᑯᔭᖅᑐᖅᓯᒪᓪᓗᓂ ᓄᑲᒥᓂᒃ/ᐊᖓᔪᒥᓂᒃ ᒪᓐᑐᕆᔮᒥ − ᐅᖃᐅᓯᑦ ᐃᓄᒃᑎᑐᑦ ᑭᖑᓂᖃᖃᑦᑕᕐᒪᑕ, ᓄᓇᖓᓗ ᐊᒻᒪ ᐃᓄᖏᑦ ᐃᒡᓗᓕᖕᒥᐅᑦ.

ᐊᒪᕈᐊᓕᒃ, ᐊᕐᕌᒍᖃᓕᓚᐅᖅᖢᓂ 19-ᓂᒃ, ᔭᓐᓄᐊᕆ 8−ᒥ, ᑮᓇᐅᔭᓂᒃ ᓵᓚᒃᓴᐅᑎᖃᓚᐅᖅᐳᖅ $700ᓂᒃ “ᖁᓕᖅᑕᖅᑖᕈᑎᒋᓂᐊᖅᖢᓂᐅᒃ.”

ᒍᕇᑦ 12-ᒥ ᐃᓕᓐᓂᐊᖅᑎ, ᐊᕐᕌᓂ ᐃᓱᒪᓚᐅᖅᑐᖅ ᐸᓚᐅᒑᒃᓴᓂᒃ ᓂᕿᓕᐅᕈᑎᖃᕈᒪᓪᓗᓂ ᓄᓇᒥᓂ, ᐅᖃᓚᐅᖅᐳᖅ ᐸᕐᓇᐅᑎᖃᕋᒥ ᐊᓯᐊᓂᒃ ᐱᓕᕆᐊᖃᕈᒪᓪᓗᓂ.

“ᐃᓕᓐᓂᐊᕆᐊᕈᒪᓪᓗᓂᓗ ᓂᕿᓕᐅᕐᓂᕐᒧᑦ,” ᐅᖃᓚᐅᖅᐳᖅ.

ᐃᓚᓕᐅᑎᓚᐅᖅᐳᖅ ᓵᓚᒃᓴᐅᑎᖃᑕᐅᓂᕐᒧᑦ, ᐊᐅᓚᑕᐅᓪᓗᓂ ᐱᓐᖑᐊᖅᑐᓕᕆᔨᒃᑯᓐᓄᑦ, ᐃᑲᔪᕈᒪᓪᓗᓂ ᓄᓇᒥᓂᒃ, ᐅᖃᓚᐅᖅᐳᖅ.

ᐊᒪᕈᐊᓕᒃ ᐱᓕᕆᖃᑎᖃᖅᓯᒪᓪᓗᓂ ᒪᒃᑯᒃᑐᓂᒃ ᐱᓐᖑᐊᖅᑐᓕᕆᔨᒃᑯᓐᓂ ᐊᒻᒪ ᐊᔾᔨᐅᖏᑦᑐᒥᒃ ᐱᓕᕆᐊᖃᓕᕌᖓᑕ ᐃᑲᔪᖃᑦᑕᖅᖢᓂ. ᐅᖃᐅᓯᖃᕈᒪᓚᐅᖅᖢᓂᓗ ᐅᓗᕆᐊᓇᕐᓂᖓᓄᑦ ᓯᒡᒐᓖᖅᑐᖃᑦᑕᖅᑐᓂᒃ ᒪᒃᑯᒃᑐᓂᒃ. ᑭᒍᑎᓕᕆᓂᖅ ᐱᓕᕆᐊᕆᓂᐊᕆᓪᓗᓂᐅᒃ ᑕᒪᒃᑯᓂᖓ ᑐᓂᐅᖃᐃᓗᓂ ᑭᒍᑎᓯᐅᑎᓂᒃ, ᕚᓴᕈᑎᖏᓐᓂᒡᓗ ᐊᓯᖏᓐᓂᒡᓗ ᑭᒍᑎᓄᑦ ᑲᒪᒍᑎᒃᓴᓂᒃ ᐃᒡᓗᓕᖕᒥ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐱᓕᕆᐊᖃᖅᑎᓪᓗᒋᑦ.

ᑕᐃᒪᓐᓇ ᓯᕗᓪᓕᕐᒥ ᒥᔅ ᐃᒡᓗᓕᒃ ᐃᓚᐅᓂᐊᖅᐳᖅ ᓯᕿᓂᖅ ᐅᑎᖅᓯᒪᓕᖅᐸᑦ ᖃᓄᐃᓕᐅᕈᑎᖃᖅᑎᓪᓗᒋᑦ ᐱᓇᓱᐊᕈᓯᒥ. ᐃᓚᐅᓂᐊᖅᐳᖅ ᑕᐃᒪᓐᓇ ᑯᐃᖑᐊᖑᓗᓂ ᐅᖃᓚᐅᖅᐳᕐᓗ ᖁᕕᐊᓱᑦᓯᐊᕋᒥ ᑕᐃᒪᓐᓇ ᐃᓚᐅᑎᑕᐅᔪᓐᓇᕋᒥ.