ᑮᓇᐅᔭᓂᒃ ᐱᕈᖅᓴᐃᓂᖅ ᑲᔪᓯᕗᖅ ᕼᐋᑭᖅᑎᑦ Rock ᐱᓐᖑᐊᖅᑎᖏᑦ ᑐᕌᓐᑐᓕᐊᕐᓂᐊᓕᕐᒪᑕ

by Darrell Greer- September 19, 2017

ᐊᑐᖅᑕᐅᓂᐊᖅᑐᖅ ᖃᒡᓕᕙᓪᓕᐊᑐᐃᓐᓇᖅᐳᖅ Experiences Canadaᖑᓂᕋᖅᑕᐅᔪᖅ ᕼᐋᑭᖅᑎᑦ ᑭᐴᑎᖃᑦᑕᐅᑎᑎᑕᐅᓂᐊᖅᑎᓪᓗᒋᑦ ᑲᖏᖅᖠᓂᕐᒥᐅᑦ Rankin Rock ᐋᑕᒻᑯᑦ ᐱᓐᖑᐊᖅᑎᖏᑦ ᐲᕖᒃᑯᓪᓗ ᐊᒻᒪᓄ ᑖᒃᑯᐊ Mimico Canadiens ᑐᕌᓐᑐᒥᐅᑦ.

ᐊᕐᕌᒍᒥ 2017-ᒥ A−ᑯᑦ Crockett Cup ᓵᓚᒃᓴᓚᐅᖅᑐᑦ ᑲᖏᖅᖠᓂᕐᒥᐅᑕᐃᑦ Rankin Rock ᐋᑕᒻᑯᑦ ᐅᑯᐊ, ᑐᓄᐊᓂ ᓴᐅᒥᐊᓂᑦ, ᕖᓐ ᑯᓱᒐᒃ (ᐃᓕᓐᓂᐊᖅᑎᑎᔨᐅᑉ ᐃᑲᔪᖅᑎᖓ), ᔫ ᕘᐱᒃ (ᐱᓐᖑᐊᖅᑎᑦ ᐃᑲᔪᖅᑎᖓᑦ), ᑏᕝ ᕙᐃᔅᒪᓐ (ᐃᓕᓐᓂᐊᖅᑎᑎᔨᐅᑉ ᐃᑲᔪᖅᑎᖓ) ᐊᒻᒪ ᑮᑎ ᐱᐊᓪ (ᐃᓕᓐᓂᐊᖅᑎᑎᔨᒻᒪᕆᒃ); ᐱᖓᔪᖓᓂ ᓴᐅᒥᐊᓂᑦ, ᑕᔅᑕᓐ ᒫᑎᓐ, ᑎᓖᓐ ᕗᕆᑦᓚᓐ, ᐹᓪ ᑕᑎ, ᓯᑦ ᕼᐋᒧᑕᓐ, ᓱᕕᐊ ᖃᓗᔾᔭᒃ, ᑎᐊᓇ ᒥᓯᕋᓛᒃ, ᓘᒃ ᓯᒃᓯᒃ, ᒪᑲᓐᓯ ᐳᑦᓚᑦ, ᐃᐅᕆᓐ ᑲᑉᓗᐃᑦᑐᒃ, ᕖᓐ ᑯᕈᒃ−ᒪᓃᑦᑐᒃ, ᐃᐅᕆᒃ ᑲᑕᓗᒃ, ᑲᐃᓚᓐ ᓴᕕᐊᕐᔪᒃ, ᐲᑕᓐ ᖃᑉᓗᐃᑦᑐᒃ, ᓵᒥᐅ ᖃᓗᓪᔭᒃ, ᕕᔅᑎᐊ ᓇᑦᓯᒃ, ᕼᐃᓕ ᑕᑎ ᐊᒻᒪ ᓱᑯᓗᒃ ᐅᑲᓕᒃ; ᑐᖏᓕᐊᓂ ᓴᐅᒥᐊᓂᑦ, ᑳᑐ ᐴᑕᓐ, ᔨᑕᓐ ᕘᐱᒃ, ᐃᓄᒃ ᐳᕋᐅᓐ, ᑎᐅᕆᓐ ᓄᑲᖅᖠᖅ ᐃᒃᑲᕼᐃᒃ, ᒪᓯᓐ ᕌᓄ, ᓕᐊᒻ ᐃᐊᓐ ᑕᑦᑐᐃᓂ, ᕕᓕᐊᒻ ᕼᐊᑦᒪᓐ, ᑮᑕᓐ ᐃᑦᑐᒃ, ᒍᕆᒍᕆ ᕙᐃᔅᒪᓐ, ᓄᖃᓪᓚᖅ ᐅᒃᐸᑕᐅᔭᒃ ᐊᒻᒪ ᐱᓖᓐ ᑯᓱᒐᒃ; ᐊᒻᒪ ᓯᕗᓂᐊᓂ ᓴᐅᒥᐊᓂᑦ, ᐱᓐ ᑯᓱᒐᒃ, ᐱᓐ ᑐᓗᒐᒃ, ᑮᓐ ᑕᐅᑐᖏ, ᓘᒐᓐ ᐳᐊᑐ ᐊᒻᒪ ᐳᕆᔅᑕᓐ ᖃᓗᔾᔭᒃ 47−ᒥ ᐊᕐᕌᒍᑕᒫᖅᓯᐅᑎᒥ Munn Cup ᑖᒻᓴᓐ, ᒪᓂᑑᐸᒥ, ᕼᐋᑭᕐᓇᐅᓚᐅᖅᑐᒥ. ᐊᒥᓲᓂᖅᓴᐃᑦ ᐱᓐᖑᐊᖅᑎᑦ ᕼᐋᑭᖅᑎᑦ ᑐᕌᓐᑐᓕᐊᕐᓂᐊᖅᐳᑦ ᕼᐋᑭᖅᑎᑦ ᑭᐴᑎᓂᐊᖅᑎᓪᓗᒋᑦ ᑕᖅᑭᐅᓂᐊᖅᑐᒥ.

ᑖᒃᑯᐊ ᑲᖏᖅᖠᓂᕐᒥᐅᑕᐃᑦ Rock ᐱᓐᖑᐊᖅᑎᖏᑦ ᐊᐅᓪᓚᕐᓂᐊᖅᐳᑦ ᐋᓐᑎᐅᕆᔪᒧᑦ ᐊᒃᑐᐱᕆ 6-ᖑᓕᖅᐸᑦ.

ᐃᒻᒪᖄ 60 ᓄᑕᖃᑦ ᐃᓚᐅᓂᐊᕋᓱᒋᔭᐅᓪᓗᑎᒃ ᑭᐴᑎᖃᑦᑕᐅᑎᓂᕐᒥᒃ, ᑖᒃᑯᐊ Mimico ᑎᑭᓐᓂᐊᖅᖢᑎᒃ ᑲᖏᖅᖠᓂᕐᒧᑦ ᐄᐳᕈ 2018-ᖑᓕᖅᐸᑦ.

ᑭᐴᑎᖃᑦᑕᐅᑎᓂᖅ ᐊᑭᑐᔪᒻᒪᕆᐅᓂᖓᓄᑦ ᑕᒪᐃᓐᓄᑦ ᐊᒻᒪ ᐋᑕᒻᑯᑦ ᐃᓕᓐᓂᐊᖅᑎᑎᔨᒻᒪᕆᖓ ᑮᑎ ᐱᐊᓪ ᓂᐅᕕᖃᑦᑕᖁᔨᕗᑦ ᑮᓇᐅᔭᓂᒃ ᐱᕈᖅᓴᐃᓇᓱᐊᖅᖢᑎᒃ ᓇᓚᐅᑦᓵᖅᑎᑦᓯᓂᖏᓐᓄᑦ.

ᐱᐊᓪ ᐅᖃᓚᐅᖅᐳᖅ ᑖᒃᑯᐊ Rock ᐱᓂᐊᖅᐳᑦ 32−ᓂᒃ ᓄᑕᖃᓂᒃ ᐋᓐᑎᐅᕆᔪᒥᑦ, 16 ᑮᓇᐅᔭᑎᒍᑦ ᐃᑲᔪᖅᑕᐅᒍᑎᖃᖅᖢᑎᒃ Experiences Canadaᑯᓐᓂᑦ, ᐊᑭᓖᓚᐅᖅᖢᑎᒃ ᐅᑎᕈᑎᒃᓴᖏᓐᓄᑦ ᑎᖕᒥᓲᒃᑰᕈᑎᒃᓴᖏᓐᓄᑦ.

ᐅᖃᓚᐅᖅᖢᓂᓗ ᑖᒃᑯᐊ Rock ᐊᑭᓖᒋᐊᖃᓚᐅᖅᖢᑎᒃ $50,000ᓂᒃ ᑎᖕᒥᓲᒃᑰᕈᑎᑦ ᓈᒻᒪᑦᓯᐊᖁᑉᓗᒋᑦ.

ᐊᓯᖏᑦ ᐊᑭᓕᐅᑎᒃᓴᐅᓂᐊᖅᑐᑦ ᑕᒪᒃᑯᐊ ᓂᕿᑦ, ᐅᑉᓗᓄᑦ ᖁᓕᓄᑦ ᖃᓄᐃᓕᐅᕈᑕᐅᓂᐊᖅᑐᑦ ᓄᑕᖃᓄᑦ ᐋᓐᑎᐅᕆᔪᒥ , ᓯᓂᒃᑕᕐᕕᖕᒥ ᓯᓂᒃᑕᕈᑎᑦ ᑲᒪᔨᖏᓪᓗ ᐊᒻᒪ ᓯᓂᒃᑕᕐᕕᒃ ᕙᓂᐹᖕᒥ ᓯᓂᒃᑕᕆᐊᖃᕐᓂᐊᕐᒪᑕ ᐅᓐᓄᒃ ᐊᑕᐅᓯᖅ,” ᐅᖃᓚᐅᖅᐳᖅ ᐱᐊᓪ.

ᐊᒻᒪ, ᐊᑭᓖᒋᐊᖃᕐᓂᐊᖅᖢᑕ ᑐᕌᓐᑐᒥᐅᓂᒃ ᑕᒪᐅᖓᖅᐸᑕ ᐄᐳᕈᒥ.

ᐊᐅᓚᓴᕆᐊᕈᒪᓂᐊᕐᒪᑕ, ᐃᓐᓇᑐᖃᐃᑦ ᐃᒡᓗᖁᑎᖏᓐᓄᓪᓗ, ᖃᒧᑎᒃᑰᕐᓂᖅ, ᐃᓄᐃᑦ ᓂᕿᖏᓐᓂᒃ ᓂᕆᓂᖅ ᐊᒻᒪ ᖃᓄᑐᐃᓐᓇᖅ ᐊᑐᖅᑕᐅᕙᒃᑐᓂᒃ ᐅᑭᐅᖅᑕᖅᑐᒧᐊᖅᑐᓄᑦ ᑕᐃᒪᓐᓇᐃᓕᐅᕈᑎᒋᕙᒃᑕᑉᑎᓐᓄᑦ, ᑮᓇᐅᔭᓂᒃ ᐱᕈᖅᓴᐃᒋᐊᖃᕐᓂᐊᖅᐳᒍᑦ ᑕᒪᑐᒧᖓ ᑐᕌᓐᑐᒥᐅᑦ ᐊᑭᓖᓂᐊᕐᒪᑕ ᐃᓚᖏᓐᓂᒃ ᐊᒥᓲᓂᖅᓴᓂᒃ ᑕᒫᓂᒥᐅᓄᑦ ᑕᐅᓇᓃᓐᓂᖏᓐᓂ.”

ᐱᐊᓪ ᐅᖃᓚᐅᖅᐳᖅ ᓂᐅᕕᖅᑐᖃᓗᐊᖃᑦᑕᖏᒻᒪᑦ ᓇᓚᐅᑦᓵᕈᑎᓂᒃ ᐊᒻᒪ ᑖᒃᑯᐊ Rock ᑕᒪᒃᑯᓂᖓ ᓂᐅᕕᐊᒃᓴᖃᕆᐊᖃᕐᒪᑕ ᑮᓇᐅᔭᓂᒃ ᐱᕈᖅᓴᐃᒍᑎᒃᓴᑐᐊᖑᖕᒪᑦ.

ᓇᓚᐅᑦᓵᕈᑎᑦ ᐊᖏᓂᖅᓴᒃᑯᑦ ᑮᓇᐅᔭᓕᐅᕈᑎᒋᒋᐊᖃᕋᑉᑎᒍ, ᑕᐃᒪᓐᓇ ᓂᕆᐅᒃᐳᒍᑦ ᓂᐅᕕᖅᑕᐅᓂᖅᓴᐅᖁᑉᓗᒋᑦ ᐊᒧᔭᐅᕕᒃᓴᖓ ᖃᒡᓕᓕᖅᑎᓪᓗᒍ.

ᐃᑲᔪᖅᑕᐅᑦᓯᐊᖃᑦᑕᖅᐳᒍᑦ ᕼᐋᑭᖅᑐᓂᒃ ᑕᐅᑐᒋᐊᖅᑐᖅᐸᒃᑐᓂᒃ ᓄᓇᓕᖕᓂ ᐊᒻᒪ ᓄᓇᓕᖕᓂᒥᐅᓄᑦ ᑕᒪᐃᓐᓄᑦ, ᑕᐃᒪᑐᖅ ᑮᓇᐅᔭᓕᐅᕈᓐᓇᕐᓂᐊᖅᐳᒍᑦ ᓇᓗᓇᖏᑦᑐᖅ, ᐃᑲᔪᖅᑕᐅᓗᑕ ᓄᓇᓕᖕᓂᒥᐅᓄᑦ.”

ᓇᓚᐅᑦᓵᕈᑎᑦ ᐊᑐᖅᑕᐅᔪᓐᓇᓚᐅᖅᖢᓂ ᐱᔅᓂᔅᓂᒃ ᐃᑲᔪᖅᑎᖃᖅᖢᑎᒃ ᑕᒪᒃᑯᓂᖓ Eskimo Point Lumber, Inukshuk Construction, NDL Construction Ltd., NUNA, Sakku Investments Corp. ᐊᒻᒪ ᐅᒥᖕᒪᒃᑯᑦ ᕿᔪᒃᑖᖅᑎᑎᔨᖏᑦ Umingmak Supply.